رواية غرام السلطان الفصل الثالث عشر13 والرابع عشر14 بقلم عادل عبد الله
بعد مرور عدة شهور
في غرفة النوم ...
تفتح عينيها علي اضواء الصباح فتضع اصابعها بين خصلات شعره المبعثرة وتضمه الي صدرها بحنان ثم تنفث انفاسها الدافئة علي وجهه وتطبع قبلتها الحارة عليه .
شهد : حبيبي...روح قلبي ...اصحي بقي يا روحي .
تستيقظ حواسه ويفتح عينيه بابتسامته العريضة : صباح الخير يا قمر .
تمرر شهد اصابعها علي شفتاه برفق ونعومة : صباح الهنا والسعادة يا روحي .
يمسك سلطان يدها ويقبلها : صباح الجمال و الدلع يا قلبي .
ثم يضحك ويقول : شكلي كده مش رايح الشغل النهاردة ،،، ويضمها بقوة ووو....
بعد مرور بعض الوقت...
سلطان يقبلها :ربنا يخليكي ليا يا قلبي .
شهد : ويخليك ليا يا روحي .
سلطان : هقوم انا اخد شاور سريع علشان اروح الشغل .
شهد : حبيبي كنت عايزة اقولك علي حاجة بس من غير زعل .
سلطان : قولي يا حبيبتي .
شهد : النهاردة عايزاك تروح معايا مشوار مهم .
سلطان : مشوار فين يا حبيبتي ؟
شهد : شيماء اختي هتستلم عفش شقتها النهاردة من المحكمة .
سلطان : تاني شيماء !!! انا قولتلك مليش علاقة بشيماء في اي حاجة ، لو عايزة تروحي انتي معها معنديش مانع .
شهد : معلش يا حبيبي لازم يكون معانا راجل في اليوم ده مينفعش اتنين ستات يروحوا لوحدهم في حاجة زي دي ، وانت عارف احنا ملناش حد اقرب لنا منك يا روحي .
سلطان : حاضر يا شهد ، هروح معاكي بس اعملي حسابك هكون واقف بعيد وتقولي لأختك متتكلمش معايا خالص .
شهد " تضحك " : ربنا يخليك ليا يا روحي .
سلطان : ويخليكي ليا ، نور لسه نايم ؟؟
شهد : اسمه الدكتور نور من فضلك .
سلطان " يضحك " : اسف يا ستي ، الدكتور نور لسه نايم ؟
شهد : ايوه يا حبيبي كان بيلعب طول الليل وقعدت جنبه العب معاه لحد لما نام بعد الفجر .
سلطان " يبتسم " : ايوه طبعا خلاص الدكتور نور اخد كل وقتك واهتمامك وابوه خلاص اتركن علي الرف !!
تضحك شهد : يا حبيبي انت زي القطط بتاكل وتنسي !!! اومال اللي من شوية ده ايه !! اهتمام ولا مش اهتمام ؟!!
يضحك سلطان : خلاص خلاص اهتمام مصدقك ، بس متنكريش ان نور اخد معظم وقتك واهتمامك .
شهد : يا روحي انا بحب نور كل الحب ده علشان هو حتة منك .
يضحك سلطان : ايوه ، هو ده الكلام اللي بتضحكوا بيه علينا ، عموما يا ستي ربنا يهني سعيد بسعيدة .
تضحك شهد : لا يا روحي هي دي الحقيقة ، يلا بقي قوم خد الشاور بتاعك علشان نفطر ونكلم شيماء علشان نروح معها المحكمة .
يخرج سلطان من الحمام ويجلس يتناول طعام الافطار ويلعب مع نور في ذات اللحظة .
تنظر اليهم شهد في سعادة بالغة ، وفجأة تتبدل ملامح سلطان لتلاحظ عليه الشرود والحزن !!!
شهد " بتعجب " : مالك يا سلطان ؟؟ شكلك اتغير فجأة ليه ؟!!!
سلطان : مفيش حاجة .
شهد : لأ ، فيه حاجة غيرتك فجأة !!! لو مش هتقولي انا هتقول لمين ؟
سلطان : افتكرت غرام .
شهد : ان شاء الله ربنا هيطمنك عليها وتعرف مكانها .
سلطان : انا بدأت افقد الأمل ، عدا ٨ شهور ومفيش اي خبر .
شهد : مش صاحبك قالك مادام مفيش خبر ان حصلهم حاجة تبقي هي وامها لسه عايشين ، يعني مسألة وقت وهتلاقي بنتك بأذن الله وتطمن عليها .
سلطان : يارب .
شهد : قولي يا سلطان انت عايز تلاقي غرام بس ولا جميلة كمان ؟
سلطان : انا بتكلم عن بنتي ، بتجيبي سيرة جميلة ليه دلوقتي ؟؟ انتي عايزة اي سبب علشان نزعل مع بعض ؟!!
شهد : قولي الحقيقة يا سلطان .
سلطان : انتي عايزة ايه بالظبط يا شهد ؟
شهد : الصراحة انا محتارة فيك يا سلطان ، اوقات احس ان عمرك ما حبيت في الدنيا غيري واوقات احس انك كنت بتحب جميلة !!
سلطان : انا فعلا عمري ما حبيت في الدنيا غيرك يا شهد ، لكن جميلة كانت مراتي لفترة وانا انسان وليا مشاعر واكيد في الفترة دي مشاعري اتحركت ناحيتها انما الاكيد اني مش حبتها زي ما حبيتك .
شهد : انا بقي عمري ما حبيت راجل تاني غيرك يا روحي .
_
بعد ١٨ سنة
في فيلا سلطان
سلطان : مساء الخير يا شهد .
شهد : مساء النور يا حبيبي ، حمد لله ع السلامة.
سلطان : الله يسلمك ، ياااه النهاردة كان يوم متعب اوي طول النهار اجتماعات ووجع دماغ !! قوليلي نور مش باين ليه ؟
شهد : لسه مرجعش من الجامعة .
سلطان : معقول !!! الساعة ٧ ونص ولسه في الجامعة ؟!!
شهد : عنده محاضرات كتير النهاردة .
سلطان : كل يوم محاضرات كتير يا شهد !! انا مش مقتنع !!! ده غير السهر !!! انتي مش شايفة ان كده غلط ؟؟
شهد : سيب الولد يعيش عمره ، لازم يشوف الدنيا .
سلطان : انتي بتدلعيه زيادة عن اللزوم يا شهد وده مش في مصلحته .
شهد : عموما هو بيكون مع بسام ابن خالته مش مع حد غريب .
سلطان : وهو ده اللي قلقني .
شهد : ليه ؟ ماله بسام ابن اختي ؟!!
سلطان : يعني انتي مش عارفة انه فسدان !!!
شهد : سلطان انا ولاد اختي متربيين احسن تربية .
سلطان : باسل ابن اختك فعلا شاب كويس ومحترم ياريت ابنك كان مصحبه بدل ما هو ماشي علطول مع الفسدان التاني .
شهد : هيصاحبه ازاي يا سلطان ده باسل اكبر منه ب ٦ سنين انما بسام بينهم سنتين بس علشان كده تفكيرهم قريب من بعض .
سلطان : انتي يا شهد اللي شايفة كل حاجة ابنك بيعملها صح حتي ولو كانت غلط !! وقعدتي تدلعي فيه وتقولي دكتور نور راح دكتور نور جي لحد ما في الاخر مجموعه مدخلوش حتي معهد سنتين و اضطرينا ندخله كلية تجارة في جامعة خاصة يمكن ينفع فيها علي الاقل يساعدني في الشغل انا كبرت دلوقتي وعندي ستين سنة ومحتاجه معايا .
شهد : طيب سيبه دلوقتي علي راحته علشان لما يتخرج ويدخل دوامة الشغل يكون عاش يومين حلوين قبل المسئوليات اللي هيشيلها .
سلطان : انتي مفيش فايدة في الكلام معاكي .
******
في ذلك الحي الشعبي القابع علي اطراف المدينة تدخل تلك الفتاة الجميلة احد محلات الاكلات السريعة .
بمجرد دخولها تبتسم لتلك المرأة التي تقف وتبيع " السندوتشات " وتقول لها " بأبتسامة عريضة " : لو سمحتي يا ست الكل ممكن سندوتشين كبدة .
تبتسم المرأة وتقول : المحل وصاحبة المحل تحت أمرك يا ست البنات .
الفتاة : صاحبة المحل مرة واحدة !!! ده كتير عليا والله يا ست الكل .
المرأة : الدنيا كلها مش كتير عليكي يا دكتورة .
الفتاة : لسه بدري يا ماما علي لقب دكتورة ده ، انا لسه في اولي طب .
المرأة " جميلة " : بدري من عمرك يا حبيبة قلب ماما ، تاخدي ساندوتش علي ما تطلعي البيت ولا تطلعي تتغدي فوق ؟؟
الفتاة " غرام " : لا انا هطلع اتغدا فوق يا ماما .
المرأة " جميلة " : حبيبتي انا سيبالك الاكل في التلاجة سخني واتغدي واقعدي ذاكري بس يا بت اوعي تتعشي الا لما اطلعلك بالليل .
تضحك الفتاة " غرام " : حاضر يا ماما هستناكي علي العشا يا قمر
في الحادية عشر مساء
في شقة صغيرة متواضعة
تصعد جميلة الي شقتها فتجد غرام تجلس في غرفتها تستذكر دروسها ...
جميلة : معلش يا دكتورة أتأخرت عليكي شوية كان عندي شغل .
غرام : ولا يهمك يا ست الكل انا كنت لسه بذاكر .
جميلة : طيب عشر دقايق اسخن العشا واجيلك .
غرام : لا يا حبيبتي علشان خاطري اقعدي انتي ارتاحي وانا هسخن العشا واجيلك ، واعملي حسابك مش هسيبك تنامي النهاردة الا لما تكملي كلام البارح .
جميلة : كلام ايه يا حبيبتي ؟
غرام : البارح انتي وقفتي عند لما اللي اسمها شيماء طردتك وانتي قعدتي تلفي بيا في الشوارع لحد لما روحتي عند الراجل صاحب الكشك .
الفصل الرابع عشر
غرام : البارح انتي وقفتي عند لما اللي اسمها شيماء طردتك وانتي قعدتي تمشي في الشوارع لحد لما روحتي عند الراجل صاحب الكشك .
جميلة : مش عايزة افتكر اللي حصل لأنها ذكريات صعبة قوي .
غرام : معلش يا ماما انا من زمان وانا بطلب منك تحكي وكنتي بترفضي بحجة اني كنت صغيرة ، دلوقتي انا كبرت ومن حقي اعرف كل حاجة .
جميلة : حاضر يا قلبي ، انا كنت حكيتلك ان الست اللي كنت بشتغل عندها طلبت مني اتجوز جوزها علشان كان نفسه يخلف وهي كانت عقيمة .
غرام : ايوه ، الرجل ده هو سلطان بيه اللي هو بابا ؟
جميلة : ايوه ، وكنت وقتها عندي عشرين سنة ويتيمة وفقيرة مفيش في ايدي اني اوافق او ارفض .
غرام : اومال ليه بابا طلقك وليه الست دي هي واختها طردوكي من عندهم ؟
جميلة : شهد واختها شيماء مش طردوني من شقتها ، هما طردوني من شقتي اللي ابوكي اشتراها علشان اعيش فيها لما شهد صممت انه يطلقني .
غرام : شهد كانت هي اللي عايزاكي تتجوزي جوزها ، ليه فجأة موقفها اتغير من ناحيتك ؟؟
جميلة : مش هقدر انكر ان شهد طيبة لكن لما هي حملت ممكن تكون ندمت انها جوزتني جوزها وممكن تكون غيرة ستات ، الله اعلم ، لكن هي اتغيرت من ناحيتي انما اللي فعلا كانت بتقويها عليا وظلمتني وذنبي انا وانتي في رقبتها هي اختها شيماء .
غرام : وبابا كان موقفه ايه وسط كل ده ؟؟
جميلة : باباكي كنت شايفاه مش راضي علي اللي بيحصلي لكنه كان ميقدرش يزعل شهد ابدا .
غرام : معني كلامك ان بابا كان بيحبها و محبكيش انتي !!
جميلة : احساسي بيقولي انه حبني .
غرام : ازاي حبك وازاي يسمح ان يحصلك كده ؟!!
جميلة : معرفش ، وعلشان كده عمري ما سامحته ابدا .
غرام : وانتي حبتيه يا ماما ؟؟
جميلة : انا عمري ما حبيت غيره ابدا ولا عرفت معني الحب الا معاه ، لكن صدمتي فيه كانت شديدة .
غرام : وليه مش رجعتي عند خالك ؟
جميلة : علشان كنت رافضة اللي حصلي والبهدلة اللي شوفتها وكنت خايفة لو رجعت عند خالي ارجع لسلطان تاني علشان كده قررت اني ابعد بعيد واعيش انا وانتي بعيد .
غرام : وليه مش اتجوزتي يا ماما رغم انك جميلة وصغيرة و اتقدملك عرسان كتير ؟؟
جميلة : لو كنت اتجوزت كنتي ضيعتي يا غرام زي ما انا ضيعت علشان كده كان كل همي اني اربيكي واكبرت واطلعك احسن بنت في الدنيا .
غرام : ربنا يخليكي ليا يا ست الحبايب ، قوليلي بقي ليه دايما كنتي بتقوليلي انك عايزاني اكون دكتورة ؟؟ ليه دكتورة تحديدا ؟؟
جميلة : علشان شهد كانت عايزة تطلع ابنها دكتور و سمعتها بتقول لسلطان انت عايز ابنك تكون اخته بنت خدامة ويعايروه بها لازم اخته يتشرف بيها ، علشان كده قولت في نفسي لازم تطلعي يا غرام احسن من ابنها كمان .
غرام : وبعدين يا ماما حصل ايه بعد ما بقيتي في الشارع ؟؟
جميلة : زي ما قولتلك قبل كده فضلت مش عارفة اروح فين في اليوم ده لحد ما قابلت الراجل العجوز صاحب الكشك كان راجل طيب وقف جنبي لما عرف حكايتي وهو اللي ساعدني أجر الشقة دي والمحل اللي فتحته للسندوتشات .
غرام : تعبتي انتي كتير يا ماما ونفسي اتخرج واريحك من المصاريف والشغل .
تضحك جميلة : راحتي في حالة واحدة بس لما اشوفك دكتورة قد الدنيا وعندك عيادة كبيرة .
غرام " تضحك " : عيادة مرة واحدة !!
جميلة : طبعا وعيادة كبيرة وفي منطقة راقية كمان .
تضحك غرام : وهتجيبي فلوسها منين بقي يا ست الكل ؟؟
جميلة : ملكيش دعوة اتشطري انتي بس واتخرجي وانا هتصرف .
غرام : ربنا يخليكي ليا يا ماما .
جميلة : يلا بقي يا حبيبة امك نامي علشان جامعتك الصبح .
غرام : تصبحي علي خير يا احلي ام في الدنيا .
في السابعة صباحا
تستيقظ غرام مبكرا فتنظر بجانبها فتجد أن أمها قد رسمت لها صورة بالفحم اثناء نومها !!
تضحك غرام : مفيش فايدة في الست دي ، استنت لما نمت ورسمتني !! والله الست دي هتجنني قولتلها مليون مرة حرام موهبتها دي تضيع هباء كده !!
غرام : ماما ، ماما ، يلا يا قلبي علشان تفطري معايا .
جميلة : صباح الخير يا روحي ، يلا روحي البسي علي ما اجهز الفطار .
غرام " تضحك " : بردو استنيتي لما نمت ورسمتيني ؟
جميلة : كان مش جايلي نوم قعدت رسمتك ، شكلك وانتي نايمة يا حبيبتي زي الملاك بالظبط ، من زمان وانا بحب ارسمك وخصوصا وانتي نايمة .
غرام : والله يا ماما لو كنتي سمعتي كلامي كان زمانك دلوقتي الصور اللي بترسميها في كل المعارض .
جميلة : يا حبيبتي انا معنديش وقت ، برسم لما بحس اني عايزة اعبر عن اللي جوايا بس ، انما علشان صوري تبقي في معارض لازم دراسة .
غرام : وفيها ايه ، ما تتعلمي اللي ناقصك ، ده انتي ساعتها هتبقي ولا فان جوخ .
تضحك جميلة : يا حبيبتي اتعلم ازاي اذا كنت مبعرفش اقرا واكتب !!!
غرام : قولتلك قبل كده سبيلي نفسك شهرين بس هخليكي تكتبي وتقرأي لبلب .
جميلة " تضحك" : بعد ما شاب ودوه الكتاب .
غرام : مين اللي شاب يا ماما !! انتي لسه في عز شبابك .
جميلة : حبيبتي ربنا يخليكي ليا .
*****
في احد كافيهات المهندسين
نور : يلا يا بسام لازم اروح دلوقتي .
بسام : لسه بدري ، هتروح من دلوقتي ؟!!!
نور : ايوه ، بابا بيزعقلي جامد لما بتأخر .
بسام " يضحك " : يا حبيب بااابا !!! طيب اوعي تقول كده تاني للبنات تضحك عليك ، ويقولوا عليك لسه عيل صغنن .
نور : انا راجل .
بسام " يضحك " : طيب عيب يا قلب أخوك لما تقول الكلام العب.يط ده ، عارف يا نور لولا انك ابن خالتي كنت روحت قولت للبنات وضحكتهم عليك .
نور : لا اوعي تقولهم يا بسام .
بسام : طيب يلا يا قلب اخوك نطلعلهم فوق عند البلياردو .
نور : يلا وامري لله ، بس مش عايزين نتأخر النهاردة .
بسام : حاضر يا حب ، هاتلي علبة مارلبورو بقي قبل ما تطلع علشان الفلوس اللي معايا خلصت .
نور : ما انت عارف انا مش بشتري سجاير .
بسام : ليه يا حبيبي ؟ خايف ايدك توسخ ؟؟
نور : مش متعود .
بسام " يضحك " : ياريتك يا خالتي كنتي خلفتي بنت احسن .
نور : بطل يا بسام هزعل منك بجد .
بسام : طيب خلاص متزعلش ، بس انا عايزك تسترجل كده شوية علشان البنات تحبك والشباب يعملولك حساب .
نور : والبنات مش هتحبني الا لما اشرب سجاير ؟!!
بسام : هو انت شايف السجاير حاجة كبيرة قوي ؟؟
نور : ايوه ، اومال صغيرة ؟؟
بسام : يا نور السجاير دي اقل حاجة ، اومال لو شوفت الحاجات التانية !!
نور : حاجات تانية زي ايه ؟؟
بسام : لا لا متشغلش بالك ، المهم دلوقتي هات ٢٠٠ جنية من معاك .
نور : خد بس اعمل حسابك دي اخر فلوس معايا ، يعني ترجعهالي بكره الصبح .
بسام : حاضر متخافش يا حبيب اخوك ، بكره الصبح هرجعهملك .
نور : اكيد ؟؟
بسام : مالك خايف ع الفلوس كده ليه ياض ؟ ده انت معاك بنك خالتي شهد كله يا معلم .
نور : مش هينفع اخد منها فلوس تاني بكره علشان قالتلي مفيش فلوس لأخر الاسبوع .
بسام : متشغلش نفسك بالفلوس يا نور انا بكره هسافر لأبويا اسكندرية اخد منه فلوس .
نور : انت لما بتسافر لابوك بيدلك الفلوس بسهولة كدة ؟؟
بسام : ايوه مادام الموزة بتاعته مش شافتني بيديني الفلوس اللي عايزها .
نور : الموزة بتاعته !!!
بسام : ايوه ، مراته .
نور : عيب يا بسام ، دي مرات ابوك .
بسام : طيب خلينا في المهم ، يلا بقي نطلع للشقط اللي فوق .
******
في قصر سلطان
فوجئت شهد بعودة سلطان الي الفيلا في منتصف اليوم علي غير عادته !!!
شهد : خير يا سلطان ، رجعت بدري ليه ؟
سلطان : انا حاسس اني تعبان قوي النهاردة .
شهد : سلامتك يا حبيبي الف سلامة ، مالك ايه اللي تعبك ؟
سلطان : حاسس بحرقان في صدري من يومين لكن النهاردة مش قادر .
شهد : روحت للدكتور ؟
سلطان : لا لا مش عايز .
شهد : ليه لأ !!! لازم تروح للدكتور ، ولا اقولك انا هتصل بدكتور يجي هنا احسن .
سلطان : لا يا شهد علشان خاطري مش بحب الدكاترة .
شهد : ماشي ، مادام قولت علشان خاطري ، هتتغدا دلوقتي ولا هتستني شوية ؟؟
سلطان : هدخل اخد شاور يمكن ابقي كويس ولما اخرج هقولك هاكل ولا لأ .
شهد : حاضر يا حبيبي
يدخل سلطان الي الحمام ويجلس في البانيو ويبدأ في الاستحمام .
وفجأة تسمع شهد صرخة مدوية !!!
سلطان : شهدددد ، ألحقيني يا شهددددد انا