رواية هوي القلب الفصل العشرون20والاخير بقلم غزل وليد
بعد الحصل بقيت م قادرة ع الواجهة ، وما قادرة أرفع عيوني أعاين ليهو ، جريت توبي الفي طرف السرير وعايزة اقوم ....
رامي : حبيبي ماشة وين ، خليك شوية في حضني ...
مسكها من إيدها ورجعها في حضنو ....مبرووك بقيتي مرتي قولا وفعلا وابتسم معاها...
رفيف خدودها حمرو من الخجل وم قادرة تعاين ليهو ...
قرب وشو من وشها شديد وقال ليها ماتخجلي مني ،
الحصل بينا كان حلو شديد ، وباسها في شفايفها ...
رفيف: ر ر رامي انا انا عايزة انوم ...
رفيف : طيب تعالي ...
ورقدها في حضنو وبمشى ايدو في شعرها ...
رامي : خلاص ننوم عشان نصحى بدري ورانا سفر ...
رفيف : امممم خاشة اتحمم بالأول ....
رامي : طيب حبيبي ،،، واذا م عندك مانع خلينا نخش سوا..
رفيف : لالالا انا بخلص سريع وبطلع ، غطت روحها بالتوب وخشت الحمام ، رامي قعد يضحك وقال ليها خجلك دة بنتهي ليك منو هههههه وبعدين انا شفت كل حاجة هههههه ، رفيف قالت ليهو تفاهتك دي م قادرة عليها .....
بعد م خشيت الحمام بقيت بعاين لروحي في المراية وبضحك ، يعني خلاص بقيت مرتو حق وحقيقة ، والحاجة الكنت خايفة منها طلعت بالبساطة دي 🙈
اتحممت واغتسلت وعقلي كان بفكر في التفاصيل الحصلت قبل شوية ، بالجد طعم الحلال ماف زيو ...
بعد م طلعتة هو خش ، انا سشورتة شعري واتعطرتة ورقدتة عشان أنوم ، بس وحياة الله النوم حلف م يجيني ، رامي بعد م خلص جاء رقد جمبي وحاوطني بإيدو انا كنت مغمضة عيوني بس م نايمة .....قرب من إضاني وقال لي حبيبي نمتي خلاص... انا عملتة فيها نايمة وم جايبة خبر ، قال لي تصبحي على خير بهمس وباسني في رقبتي ، انا بقيت شادة ع المخدة ب أيدي ، ، رامي شكلو انتبه وقال لي لسة صاحية صح ههههههه
وتاني رجع كرر الحركة ، لحظتها حسيت اني لسة عايزاه ، فتحتة عيوني عاينتة ليهو ...
رفيف: رامي ليه بتعمل فيني كدة ( بدلع قالتها)
رامي : عشان بحبك وماقادر اشبع منك ....
رفيف ختت ايدها في لحيتو وبتمشيها ...
رفيف: انا بحبك شديد يارامي...
رامي: وأنا بعشقك ...
وقرب من شفايفها، رفيف اتجاوبت مع القبلة ، وانعاد الفلم من جديد ( خسارة الحمام ههه) مع الارهاق نامو بعدها طوالي وم صحو الا بصوت المنبه .....
قامو صلو الصبح واتجهزو مشو ع المطار .....
الرحلة كانت ممتعة شديد ، لحدي م وصلنا موريشيوس بسلام الحمد لله ❤️❤️❤️
م ح أحكي ليكم رهابة المكان عشان ح انزل ليكم الصور تشوفوها قدر شنو حلوة شديد وطبيعتها خلابة .....
قضينا فيها أحلى ايام مع بعض ، اكتشفت جانب حلو شديد في رامي وهو انو حنون جدا ورومانسي لدرجة بعيدة ، بحب يعبر عن مشاعرو وم بدسها خالص ، دمو خفيف وفكاهي ❤️....
كنا قاعدين ع الشاطئ وبنتأمل في المنظر الخلاب دة
رامي : ما كنت متخيل في يوم إني ألقى شريكة حياتي بالمواصفات الأنا بتمناها، بس سبحان الله القدر رسلك لي وبقيتي لي معجزة كدة ما بتتوصف ....
رفيف: فعلا القدر دة غريب شديد ، جيت مكسورة ومحطمة بهدف اني انسى جرحى ، وسبحان الله ربنا كتب لي قصة حب حلوة ما كنت متخيلة في يوم اني اعيشها ، كل حاجة كانت بالصدفة ومن دون أي تخطيط
رامي : أول لقاء لينا كان لما كنت مع اخوي آسر كان جايبك المستشفى ، وقتها ما كنت بعرفك ولا بتعرفيني بس الغريب من أول نظرة في حاجة شدتني تجاهك زي المغناطيس
وخلتني أحسن إنو في قصة حب حتحصل بينا وسبحان الله قد كان ❤️
رفيف : من أول نظرة انا أعجبتة بيك شديد لدرجة اني ماكنت قادرة ابطل تفكير فيك ، ودي أول مرة اتعلق بإنسان واحبو من أول نظرة ، في البداية كنت فاكراهو مجرد إعجاب وحيزول مع مرور الايام بس ابدا م حصل كدة، الحصل اني بقيت بتعلق بيك كل يوم أكتر من القبلو..
رامي : لما قلتي لي انك عايزة تنهي صداقتك بي حسيت الدنيا كلها ضلمت في وشي وحسيت بوجعة كدة ما بتتوصف، بس كنت مصمم إنو ابدا ما ح أتخلى عنك لو حيكلفني الشي دة حياتي .......
رفيف : وقتها مشاعري كان مخلبطة شديد ، وما عارفة مشاعرك تجاهي ، كنت خايفة حبي ليك يكون من طرف واحد ، ودي حتكون كارثة بالنسبة لي عشان كدة قررت أبعد عنك ، لأني وقتها ماكنت مستعدة قلبي يرجع يتكسر من جديد ....
رامي : رغم الصعوبات المرينا بيها في حياتنا عامة ، انا ممتن لأي موقف خلانا نقرب من بعض أكتر ونتعرف على بعض ، ممتن ل تدابير ربنا دايما وابدا ❤️❤️
وشبك ايدو مع ايدها❤️
قضينا أحلى ايام في موريشيوس ، وبكرة خلاص حنودعها ونسافر .....
كنت بستف في الشنط حقتنا استعدادا للسفر ....
رامي: الزول لو عليهو يبني ليه فيلا هنا ويستقر باقي حياتو فيها ...
رفيف : هههههه حرفيا والله ....
رامي : تعالي مشتاق ليك ....
رفيف : رامي انت نستوعب انو انت بقيت ع طول امممم ....
رامي : قوليها قوليها ، وبعدين احنا مش جينا هنا عشان نعمل الحاجة دي براحتنا ؛ في اي وقت واي زمن🤣
رفيف : وااي منك ، اقسم بالله في البداية كنت فاكراك بريئ ودرويش بس طلعتة انا الدرويشة والبريئة😭
رامي ضحك لمن عيونو دمعت وقال ليها يحليلك مسكينة 🤣🤣🤣 اسي تعالي عايز اقول ليك حاجة حلوة ، وقرب من اضانها قال ليها كلام ( علمي علمكم م عارفة قال شنو 🤣)
بعدها ضربتو في صدرو وقالت ليهو اقسم بالله انت قليل ادب يارامي 😭
رامي : م هو الناس بتعرس عشان قلة الأدب دي 🤣
رفيف : يعني قصدك عرستني عشان كدة بس م عشان بتحبني صح ، كويس الفيك اتعرفت..
رامي : هههههههه حبيبي انت جاادة زعلتي ، يعني الواحد خالص م يهظر معاك ....
رفيف: زح مني م تلمسني عايزة انوم ....
رامي : ياقلبي والله بهظر ....
رفيف ولا اشتغلت بيهو مشت رقدت واتغطت ....
رامي طبعا م خلاها وقدر يحنكها لحدي م خلاها نست العالم ومشى بيها عالم تاني (غيتو م علينا عرسان مبسوطين 🚶♀️)
رجعنا البورت ونزلنا في بيتهم لرامي ؛ عملو لينا كرامة ، عزمو فيها الاهل القريبين ....
حسون قالت لي بقينا سلفات 🙈
قلتة ليها اي يابت خالتي 🤭
المهم اتونسنا كتيير و وصفتة ليها صور شهر العسل ،
ميعاد كانت بتتوحم والحمل متعبها شديد ، قالت لي يا رفو انا الوداني اعرس شنو بري دي مسؤولية م بقدر عليها🤧 قلتة ليها تتحملي بس ماف ليك طريقة هههههه
♡♡♡♡♡♡♡♡♡♡♡♡♡♡♡♡♡♡♡♥︎♡♡♡♡♡♡
*عند هند *
أسامة كان طاير من الفرحة بعد م عرف انو هند حامل ، ما كان قادر يصدق انو حيبقى أب ويكون عندو طفل من لحمو ودمو ، وكان نفسو يرفع هند ويلف بيها المستشفى كلها من الفرحة الحاسي بيها ....
هند كان مصدومة وما اتوقعت خالص انو يكون دة حمل ، لأنها م كانت خاتة انها حتحمل تاني ، احساسها كان مخلبط مبسوطة من ناحية وخايفة من ناحية ، هل أولادها حيقدرو يتقبلو انو امهم تجيب ليهم طفل تاني بعد السنين دي كلها ، طلبت من أسامة أنو مبدئيا خبر الحمل دة يكون بيناتهم فقط ، حتى الاولاد م عايزاهم يعرفو أسي ؛ أسامة قال ليها ماف مشكلة حبيبتي العايزاهو ببقى .....
المشكلة كانت انو هند وحمها كان كعب كعب شديد ، اليوم كلو بتستفرغ ، وم بتأكل إلا يضغطوها شديد ، عشان كدة أسامة كان مركز ليها على السوائل ....
كانت بتحاول تدس تعبها عشان أولادها م يلاحظو بس كان ظاهر في وشها المرض ....
محمد : أمي ملاحظ انك اليومين دي زي العيانة ، عيونك داخلة لجوة و أمس بالليل كنت بتستفرغي ..
هند : كويسة أنا ياولدي بس امس كنت تعبانة شوية لكن اليوم الحمد لله أصبحتة قوية ....
محمد : طيب ارح الدكتور يفحصو ليك احتمال تكون ملاريا ....
هند : كدي بقيل اليوم دة لو حسيت اني م كويسة بمش طوالي الدكتور ، م تخاف علي حبيبي ....
محمد : طيب امي ، طبعا ماكلمتك التسجيل حق جامعتنا بدأ ف لازم اسافر في اليومين الجاية عشان ألحق أسجل ....
هند: عليك الله ، يعني حتمش تخلينا ، حنشتاق ليك شديد ، دموعها نزلت ...
محمد قرب من أمو وحضنها : يمة عليك الله م تبكي ، والله بخلي الجامعة اذا شفتة دموعك دي تاني .....
هند : تخليها كيفن ي ولدي ، عايزة اشوفك دكتور كدة كبيييير قدر الدنيا ؛ عايزة افرح بتخريجك حبيبي....
محمد : ان شاءالله أمي ، بس عليك الله تاني م تبكي ؛ اصلا بين كل فترة والتانية بجيكم ....
هند : طيب حبيبي .....محمد ولدي ...
محمد : نعم يمة ...
هند عصرت روحها وقالت
تكلمو مرة واحدة اصلا كدة كدة حيعرف ....
هند : ياولدي ان شاءالله حيبقى عندكم بيبي جديد ...
محمد : بيبي منو ( طبعا م فاهم شي طاشي شبكة في البداية هههه)
هند : يعني حيكون عندكم اخ أو اخت قريب ان شاءالله، وختت ايدها في بطنها ...
هنا ي داب محمد فهم الحاصل ؛ عيونا لمعت من الفرح ..
محمد : انت جااادة ياأمي ، يعني انت حامل ؟
هند هزت راسها بمعني اي ...
محمد دموعو نزلت وحضن أمو عليه ...
مبروك ياأمي ربنا يحلك لينا بالسلامة ...
هند: اميين حبيبي ، مالك بتبكي ي ولدي ( وقشت ليه دموعو)
محمد : مبسوط يمة ، بعد السنين دي كلها حيكون عندنا بيبي صغير ينور عائلتنا..
هند : يعني م زعلان ...
محمد : ازعل ليه يمة ؟؟؟؟ خبر زي دة بزعل؟
......
ردت فعل محمد كانت جميلة جدا ، خلت هند تنبسط شديد وحست إنو هم كبير جواها انزاح ، بناتها لما عرفو قربوا يدردقو من الفرح ههههه كلهم متحمسين شديد للبيبي الجديد وأولهم أسامة طبعاا ❤️....
..... طيل فترة الحمل دي كانو مدلعنها شديد بناتها وأسامة ،أما محمد بالرغم من انو كان بعيد لما سافر جامعتو بس كل يومين تلاتة بتكلم مع امو بالتلفون بتطمن عليها ولو هو م اتصل هي بتتصل ليه ........
لحدي م تمت شهور الحمل وجاء موعد الولادة ،
ولادتها كانت طبيعية لأنو وضعها الصحي مستقر والطفل نزل الحوض بالوضعية الصحيحة ....
ولدت جابت ليها ولد حلاة الدنيا عليهو سمتو براء ❤️
كانو بحبوهو بطريقة خيااالية ؛ أمو وابوه واخوانو ، عمل ليهم برنامج في البيت وملاهو بهجة وسعادة ، محمد بكون متحمس متين يأخد اجازة ان شاءالله اسبوع عشان يجي يشوف اخوه الصغير وأهلو ، كان متعلق بالبراء شديد ❤️❤️❤️...
♡♡♡♡♡♡♡♡♡♡♡♡♡♡♡♡♡♡♡♡♡♡♡
رامي ورفيف حياتهم حلوة شديد ملانة حب وحنية وتفاهم ❤️
رفيف امتحنت مزاولة المهنة وربنا سهلها ليها لقت ليها وظيفة في مستشفى خاص من طرف صحبو لرامي ...
وحتى المستشفى الشغالة فيها قريبة من المستشفى الشغال فيها رامي ......
بعد سنة قررو انهم يفكرو في الإنجاب ، لأنهم كان متفقين انو أول سنة تكون ليهم لوحدهم ...
سبحان الله ربنا رزقها طوالي وحملت ، سعادتهم كانت م بتوصف ابدا وحاليا منتظرين مولوهم على أحر من الجمر ❤️❤️❤️❤️❤️❤️❤️
حسون وآسر برضو في إنتظار مولودهم الجديد ، م باقي ليها شي للولادة ❤️❤️❤️
مهيد لقى ليهو فرصة عمل في السعودية سافر ، ورقية مشت اهلها مسافة يظبط ليها ورقة الزيارة عشان تلحقو ؛ مهيد رغم انو التعامل معاه صعب بس حبو ل رقية غير فيهو كتير ؛ وحتى رقية ذكية شديد وبتعرف كيف تتعامل مع زوجها ❤️❤️❤️
♡♡♡♡♡♡♡♡♡♡♡♡♡♡♡♡♡♡♡
وماقبل الختام : خليك عارفة إنو رزقك في الدنيا دي مسطر ومكتوب سواء دراسة او عمل أو زواج أو غيرو ، ومهما تعدي عليك ظروف صعبة اتأكدي إنو حيجي يوم وتفرج إن شاءالله ❤️❤️❤️❤️
خليك دااايما متفائلة بإنو الجاي سمح شديد
تمت