رواية أبيه يونس الفصل الاول1 بقلم اسراء ابراهيم
انت ندمان يا فارس انك اتجوزتني
فارس بضيق / يووه يا ملك ،، هو كل يوم عالاسطوانة دي ،، قولتلك اني مش ندمان ،، انا بس نفسي ابقي اب ،،امنية حياتي انه يكون ليا عيل من صلبي افرح بيه
ملك بحزن/ ومين قالك اني انا كمان مش نفسي ابقي ام ،، بس امنيتي مختلفة عنك لاني مش عاوزة طفل غير منك ولو مش منك مش عاوزاه ،، انا عذراك يا فارس بس صدقني غصب عني يا ابن عمي ،، لو عليا اجيبلك بدل العيل اتنين ولا تلاتة
فارس بخنقة/ خلاص يا ملك ملوش لزوم الكلام ده ،،كدة كدة انا قولتلك اني مش هتجوز عليكي متخافيش
ملك بتكشيرة/ ومين قالك اني بقولك كدة عشان انا خايفة تتجوز عليا يا فارس ؟ انا بقولك الكلام ده لانك اتغيرت ،، طريقتك واسلوبك ونظرتك ليا متغيرة ،،مش ده فارس اللي حبيته ،، انت طول الوقت بتعاتبني وبتلوم عليا كأني السبب ،،حتي لو مش بتقولها بلسانك بس بتقولها بعنيك
فارس بتهرب / ملك انتي اعصابك تعبانة ،، روحي لامك اقعدي عندها كام يوم ،،اهو حتي تونسي بنت اختك فريدة الله يرحمها
ملك بخنقة/ انا همشي فعلا يا فارس بس مش عشان اشوف ماما وعيال اختي ،،لا عشان اسيبك تفكر وتقرر براحتك من غير ما اضغط عليك ،، فكر يا فارس ،، لو قررت انك تطلقني وتتجوز انا حتي مش هلوم عليك ولا هعتب عليك ،، انت من حقك تتجوز وتخلف ،، هستني ردك يا فارس
كانت ملك هتدخل اوضتها بس وقفها فارس بصوته لما نادي عليها فبصتله بلهفة وهي مستنية انه يتمسك بيها ويقولها انه بيحبها وانه لا يمكن هيتخلي عنها بس للاسف صدمها
فارس باندفاع/ استني يا ملك ،، انا مش محتاج افكر ،، انتي عندك حق ،،احنا حياتنا للاسف مش نافعة لاني طول الوقت هبقي بفكر في العيال واني ابقي اب ،، عموما انا بتمنالك الخير وكل شيئ قسمة ونصيب
ملك بقبضة في قلبها / فعلا كل شيئ قسمة ونصيب ،، ربنا يسعدك ويعوضك خير ،، طلقني يا فارس
....................................
جنة بابتسامة / هي خالتو هتتأخر يا تيتة ،، انا عاوزة اشوفها قبل ما نمشي
شهيرة بقلق/ معرفش يا جنة ،، هي اتأخرت ليه كدة ،، دي مكلماني من ساعة وقايلالي انها جاية ،، وخصوصا اما عرفت انكم هنا فقالت تسلم عليكم قبل ما تمشو
يونس بهدوء/قولتلك يا ماما بلاش ،، مكنش لازم تقوليلها ،،انتي عارفة ان جوزها صعب شوية ومش بيرضي يخليها تيجي كتير
شهيرة بضيق / وفيها ايه يعني ،، ده انت جوز اختها الله يرحمها وبنت اختها يعني مفيش حد غريب ،، ليه بقي مش هيخليها تيجي ،، عموما اكيد هي زمانها علي وصول
يونس بابتسامة / طيب مش تباركي لجنة يا ماما شهيرة ،، خلاص داخلة الجامعة
شهيرة بفرحة / بجد ؟ نجحتي في الثانوية العامة يا جنة ،، لوولولولي الف مبروك يا قلب تيتة عقبال ما افرح بجوازك يارب
جنة بابتسامة /ربنا يخليكي لينا يا تيتة بصراحة ده مجهود خالتو ملك ،،بجد تعبت معايا اوي ،، انا حاسة انها هتفرح اكتر مني اصلا
شهيرة بفرحة /اه والله دي كل ما تكلمني تقولي انا متابعة نتيجة جنة ومتفائلة خير ،، بتحبك كأنك بنتها اللي مخلفتهاش
جنة بسعادة / وانا بحبها اوي يا تيتة ،، بحس ان ربنا عوضني بيها عن امي الله يرحمها
قطع كلامهم خب*ط الباب فقامت جنة تفتح بسرعة وفرحة وهي مش متخيلة رد فعل ملك وفعلا اول ما فتحت وملك شافتها ابتسمت بحب وحضنتها بفرحة
ملك بحب / الف مبروك يا قلب خالتو ،، انا دخلت عالنتيجة وشوفتها بنفسي ،، مبروك يا دكتورة جنة ان شاء الله
جنة بتكشيرة / اخس عليكي كدة حرقتي المفاجئة ،، ده انا بحضر فيها مع بابا من الصبح
ملك بغرور مصطنع/ وانتي فكرك انك هتقدري تخبي عليا ،، ده انا ماما يلا
ضحكت جنة بصوت عالي وكان متابعهم يونس اللي فرحان بعلاقتهم اوي
يونس بابتسامة / ازيك يا ملك ،،عاملة ايه
ملك بابتسامة / الحمد لله يا ابيه يونس ،، مبروك لملك ،، شوفت مش قولتلك انها هتنجح
يونس بابتسامة / لا كدة اتأكدت انك مُدرسة شاطرة ،، بعد كدة هجيبلك تلاميذ بقي
شهيرة بابتسامة / طب ادخلي يا حبيبتي انتي هتفضلي واقفة عند الباب ،، وانتي اقفلي الباب يا جنة
ملك بتوتر / لا استني يا جنة ،، شنطتي برة ،، دخليها الاول
شهيرة بخضة / شنطتك ؟ في ايه يا ملك ،، وجاية بشنطتك ليه ؟
ملك بصت ليونس باحراج وتوتر وهو لاحظ فقام واتكلم بهدوء / طب نمشي احنا بقي يا ماما شهيرة ،،وان شاء الله نجيلك الاجازة الجاية
شهيرة باستغراب وقلق / هتمشي ليه يا يونس احنا اتفقنا هتغدي سوا ده انا عاملة محشي يا حبيبي
ملك بتأكيد /ايوة خليك يا ابيه يونس وبعدين انا مش قصدي حاجة صدقني انا بس محرجة بس انت مش غريب ،،انا اتطلقت يا جماعة وخلاص مفيهاش رجعة
شهيرة وهي بتخب*ط علي صد*رها/ يا نهار اسود ؟ ليه كدة ،، طلقك ليه فارس اتكلمي يا ملك ،،اتخانقتو ولا ايه اللي حصل
يونس بهدوء / متضغطيش عليها يا ماما شهيرة وانتي يا ملك اقعدي واهدي كدة وبعدين نتكلم بعدين ،،اكيد مشكلة بسيطة وتتحل عادي انا هقعد مع فارس
ملك برفض / لا يا ابيه يونس لو سمحت مترخصنيش اوي كدة ،، وبعدين حتي لو فارس اللي كلمني عشان نرجع انا مستحيل ارجعله ،، وسبب طلاقنا مش مشكلة حصلت بينا او حاجة ،، احنا اتفقنا عالانفصال بالتراضي لانه عاوز يكون اب وانا عفيته من العيشة معايا وطلبت منه يشوف حياته
شهيرة بغضب /اخس عليه راجل ناقص ،، بقي عمل كدة عشان يتجوز ويخلف ،، مقولتيلوش ليه انك وقت ما كنتو مستنيين التحاليل قولتي ان حتي لو العيب منه انا مش هسيبه لاني بحبه ،، وفي الاخر هو يعمل كدة ؟ منه لله
ملك بدموع محبوسة/ خلاص يا ماما ،،لو سمحتي ،، ده حقه وده شرع ربنا وهو من حقه انه يكون ليه ابن من دمه ،، عموما خلاص الموضوع اتقفل ولو سمحتي مش عاوزة افتحه تاني
يونس بهدوء / اسمعيني يا ملك ،، مهما كان قرارك فاتأكدي انه صح وانك عملتي عين العقل واهم حاجة انك مقتنعة بقرارك ،، وانا جمبك مهما حصل ولو احتجتي اي حاجة انا معاكي
ملك بحزن/شكرا يا ابيه يونس ،، ربنا يخليك يارب
كانت قاعدة جنة بتعيط وهي حاضنة بايديها ايد ملك وكأنها حاسة بو*جعها وملك بصتلها بابتسامة عشان تطمنها وتبتت في ايديها
ملك بهمس / انا كويسة يا جنة متقلقيش عليا
جنة بصوت مسموع/ هو ميستاهلكيش ،،انتي تساهلي راجل بجد ،، زي بابا كدة
ملك اتوترت وبصت ليونس اللي اتفاجأ بكلام جنة وبص لملك هو كمان باحراج وكملت شهيرة كلام جنة واكدت كلامها
شهيرة بتأكيد/ والله عندك حق ،، فعلا اللي يستاهلها ويقدرها فعلا يكون راجل بجد زي يونس كدة ،، ربنا ينتقم منه فارس
ملك بضيق وهي بتقوم/ لو سمحتي يا ماما كفايا كدة بقي ،، هو بقي في حاله وانا في حالي خلاص
يونس بهدوء/ يلا يا جنة ،، لو احتجتي حاجة يا ملك كلميني علطول
ملك بابتسامة باهتة/ حاضر يا ابيه يونس ،، متشكرة ليك اوي ،، وانتي يا جنة كلميني لما تروحي تعملي التنسيق عشان اروح معاكي ونختار سوا الكلية
جنة بابتسامة وهي بتحضن ملك / حاضر يا خالتو ،، هكملك فون اما اروح اطمن عليكي ماشي اوعي مترديش
ملك بحب / مقدرش يا روح قلبي ما انتي عارفة انتي صديقي الصدوق، يلا سلام
مشيت جنة مع يونس ابوها وملك وقتها دموعها نزلت بحزن واخدت بعضها ودخلت اوضتها وقفلت علي نفسها وكانت متابعاها شهيرة بحزن وشفقة لانها صعبان عليها حالة بنتها واللي وصلت ليه بسبب طليقها
.....................................
بعد كام شهر كان قاعد يونس شغال علي الاب توب بتاعه لحد ما دخلت عليه جنة اللي كان باين عليها الضيق ولاحظ يونس شكلها فبصلها بقلق
يونس بقلق / خير يا جنة يا حبيبتي مالك ،، في حاجة ولا ايه ؟
جنة بضيق / مفيش يا بابا بس مضايقة شوية
يونس بانتباه/ ليه كدة ،، مضايقة مرة واحدة ،، قوليلي من ايه وانا اتصرف فورا
جنة بتنهيدة / بصراحة كدة صعبان عليا خالتو ملك اوي ،، ليه جوزها يعمل كدة ،، دي اتغيرت خالص يا بابا ،، علطول صوتها كأنها معيطة ولما اسألها تقولي مفيش حاجة انا كويسة
يونس بجدية/ اسمعي يا جنة ،، انتي عشان لسة صغيرة بس الامور بتاعة الجواز والحياه الزوجية عموما بتبقي معقدة ،، هي هتفضل مضايقة شوية وبعد كدة هتتعود علي الوضع وهتلاقيها بترجع زي الاول
جنة بحزن / طب ليه هو مقدرهاش وسابها ،، مش بيقول انه بيحبها ،، هو في حد يحب حد ويسيبه عشان سبب زي ده ؟
يونس بتنهيدة / الحب احيانا لوحده مش كفايا يا جنة وملك بكرة ربنا يعوضها باللي يستاهلها
جنة باندفاع / وليه ميكونش حضرتك يا بابا الانسان ده
يونس بصدمة / جنة ؟ انتي بتقولي ايه ؟ انتي عاوزاني اتجوز ؟
جنة بتأكيد / ليه لا ،، بصراحة كدة انا بحب خالتو ملك اوي ولو هتمني حد يكون مكان ماما فاكيد هتبقي هي ،، لانها بتحبني زي بنتها وانا بحس انها زي ماما ،، لو سمحت يا بابا وافق عشان خاطري ولو علي خالتو انا هقنعها
يونس كان مصدوم ومستغرب من كلام جنة وانها للدرجادي متعلقة بملك خالتها وللحظة سرح بخياله بعيد وتخيل لو ده فعلا حصل بس رجع انتبه لنفسه وغير الموضوع
يونس بهدوء/ جنة انا مش عارف رأي خالتك ملك في الموضوع هيبقي ايه ،، لان علاقتنا دايما مكنتش كدة ابدا وكمان انا كبير يا جنة عليها انتي عارفة ان فرق بينا 13 سنة ؟
جنة بسرعة/ وفيها ايه يا بابا ،، بالعكس في علاقات اصلا بتنجح بسبب ان في فرق سن ونضوج في التفكير
يونس بصدمة / من امتي وانتي كبرتي وبقيتي مثقفة كدة يا انسة جنة
حنة بابتسامة / من زمان يا استاذ بابا بس حضرتك اللي مش واخد بالك ها بقي قولت ايه في الموضوع ده
يونس بتفكير / خلاص اتكلمي انتي مع ملك ولو وافقت انا هتقدملها بس لو رفضت يا جنة توعديني ان الموضوع ده مش هيتفتح تاني ابدا
جنة بحماس وفرحة/ لا متقلقش انا مش هسيبها الا لما توافق لا تقلق يا والدي ،، يلا هقوم انا بقي واسيبك تشتغل براحتك
مشيت جنة ويونس وقتها اتنهد بحيرة وهو مش عارف اللي عمله ده صح ولا غلط لما طاوع بنته علي اللي قالته وخصوصا انه متأكد ان ملك هترفض تتجوزه بس اقنع نفسه انه بيعمل كدة عشان خاطر بنته وسعادتها مش اكتر
.......................................
كانت داخلة ملك الكافيه وهي بتدور بعنيها علي جنة اللي كانت قاعدة قلقانة اوي وخايفة ملك ترفض
ملك بابتسامة / معلش اتأخرت عليكي يا جنتي بس المواصلات زحمة اوي
جنة بابتسامة / ولا يهمك يا خالتو يا قمر انتي ،، انا اصلا قولت نتغدي سوا كدة بعيد عن جو البيت واهو نعرف نتكلم
ملك بابتسامة ثقة/ امم طب قولي يا جنة الموضوع اللي عاوزة تتكلمي فيه علطول انا سامعاكي
جنة بصدمة/ ايه ده انتي عرفتي منين اني عاوزاكي في موضوع ؟
ملك بثقة/ عشان انا اللي مربياكي وحافظة تفاصيلك ،، ها قولي كنتي عاوزة ايه ؟
جنة بتوتر / طب قوليلي الاول مالك بقالك كام يوم زعلانة مع تيتة ليه ؟
ملك بتنهيدة / هو مفيش زعل ولا حاجة ،،تقدري تقولي اننا بتنتاقر زي الفراخ ،، اصلها يا ستي كانت عاوزاني اوافق علي العريس
جنة بلهفة/ ايه عريس ؟ عريس ايه ده ،،اوعي تكوني وافقتي
ملك باستغراب/ اهدي يا بنتي في ايه مالك ،، ده كانت عاوزاني اوافق علي العريس ده لانها شايفة انه مناسب بس انا بقي رفضت فزعلت
جنة بقلق / طب وانتي رفضتيه ليه ،،مش يمكن يطلع كويس ؟
ملك بتنهيدة / عشان انا مش عاوزة اكرر غلطتي تاني يا جتة ،، انا كدة مرتاحة ،، سيبك بقي مني قوليلي في ايه مالك
جنة بتردد/ بصي بقي من غير ما تتخانقي معايا زي تيتة بس انا جيبالك عريس
ملك بصدمة /نعم ؟
جنة بلهفة/ اسمعي بس الاول واعرفي هو مين وبعدين ردي ماشي ،، والنبي يا ملك فكري كويس الاول
ملك بصدمة / تعالي هنا فهميني ،،عريس ايه ده وتعرفيه منين وازاي اصلا تفكري في كدة .. انتي مفكرة اني عاوزة اتجوز ،،انا اصلا لغيت الفكرة من وقت ما اطلقت
جنة بلهفة/ طب اعرفي حتي هو مين
الاول ،، والله لو وافقتي هتخليني اسعد واحدة في الدنيا يا ملك
ملك باستغراب/ للدرجادي يا جنة انا اول مرة اشوفك مصممة علي حاجة كدة وخصوصا موضوع العريس ده ،، هو في ايه بالظبط ؟ ومين هو بقي اللي هتتجنني واوافق عليه ؟
جنة بابتسامة واسعة/ بابا
ملك بصدمة /ابيه يونس ؟ انتي شكلك اتجننتي يا ملك ،، لا انتي اكيد اتجننتي
جنة بلهفة/ ليه بس يا ملك ،،والله ده عريس لقطة ،، جان في نفسه وكمان ارمل ،، واهم حاجة عنده بنت زي القمر وبتحبك ،، انتي مش عاوزة تعيشي معايا علطول ؟ مش دايما كنا بنقول كدة ؟
ملك بتهتة/ جنة انا مش عارفة اقولك
ايه ؟ بس صدقيني انا ويونس قصدي ابيه يونس مينفعش نتجوز ،، ده انا بقوله يا ابيه يا جنة ،،اتجوزه ازاي بس
جتة بحزن مصطنع / يبقي انتي حبك ليا وهم ،، شفقة مش اكتر ،، اومال ايه بقي انتي حبيبتي وانتي بنتي اللي مخلفتهاش ولما جتلك الفرصة انك تعيشي معايا وابقي بنتك بجد انتي اللي ترفضي ،،عموما مش هجبرك علي حاجة غصب عنك ،، انسي الموضوع ،، انا هبلغ بابا رفضك
ملك بسرعة/ استني بس يا جنة ،، متزغلي والله انا مقصدش بس يعني الموضوع مفاجأة مش اكتر وبعدين تعالي هنا هو باباكي يعرف بكلامك ده ؟
جنة بزعل / ايوة طبعا عارف اومال انا فاتحت الموضوع معاكي ازاي ؟ مش لازم يبقي عارف ؟ عموما خلاص بس انا كدة عرفت مين اللي بيحبني اكتر ،، عالاقل بابا وافق عشاني وعشان حس قد ايه انا هبقي سعيدة لكن انتي مش همك غير نفسك ،،سلام
مشيت جنة تحت نظرات ملك المصدومة وعقلها متخدر ومش فاهمة ازاي ممكن توافق علي حاجة زي دي ،، اكيد لا يمكن طبعا ده جنون
...............................................
شهيرة بلهفة/ بجد يا ملك ؟ ،،يونس طلب يتجوزك ؟ ده يوم المني ،،طبعا وافقي
ملك بضيق / يا ماما ايه اللي بتقوليه ده بس ،،اوافق ازاي يعني ؟ وبعدين انتي عارفة ان ابيه يونس اكيد وافق بناء علي رغبة جنة وعشان راحتها فعقلك ميروحش لبعيد
شهيرة بخبث / طب وفيها ايه ؟ وهو انا بقولك وافقي عشان بتحبيه ؟ ما برضه عشان البت الغلبانة المتلطمة دي ومتعلقة بيكي كأنك امها ،، انا بصراحة مستغرباكي،، يعني تبقي قدامك فرصة انك تكوني جمب جنة ومعاها وتقولي لا ؟ طب ليه ؟
ملك بتفكير / يا امي حسي بيا ،،الموضوع برضه مش سهل يعني ،، انتي عارفة ده ايه ؟ ده جواز وانا عمري ما بصيت ليونس انه كدة ابدا ،، انا دايما بعتبره اخويا الكبير
شهيرة باقناع/ يا حبيبتي وفيها ايه ،،اكيد مش من اول الجواز هتشوفيه جوزك يعني ،، انتي معاكي وقتك وانا متأكدة ان يونس هيتعامل معاكي بالطريقة اللي ترضيكي
ملك بحيرة / حاضر يا ماما ،، اللي انتي شايفاه
شهيرة بابتسامة / لولوولولولولي ،، ايوة كدة يا قلب امك ،،ربنا يسعدك يارب يا حبيبتي ،،انا هروح اكلم جنة ابشرها ،،دي هتفرح اوي
ملك بابتسامة / ايوة قوليلها خلاص تصالحني بقي وترد عليا احسن ما كانت مخاصماني ومش بترد عليا الجزمة دي
...................................
عدي اسبوعين كانت ملك بتتهرب من يونس لحد ما جه معاد كتب الكتاب وكان قاعد يونس بيبصلها وعلي وشه ابتسامة وترتها اوي وخلتها تبعد عنيها بعيد عنه وشوية واتفاجأت ملك بفارس داخل عليها فبصتله بصدمة وبصت ليونس اللي كان باين عليه الضيق
فارس بلهفة/ ملك ،، ارجوكي اديني فرصة ،، خلينا نتكلم شوية لوحدينا ،، انا كنت جاي وبدعي ربنا ان كتب الكتاب يتأخر ،، يمكن دي اشارة من ربنا
ملك بهدوء/انت ايه اللي جابك يا فارس ،، لو سمحت امشي ،،احنا مفيش بينا كلام
فارس بمحايلة/ ارجوكي يا ملك اديني فرصة ،، انا ندمت اوي ونفسي نرجع و ابقي معاكي ،، انا خلاص مش عاوز اولاد بس متسيبنيش يا ملك
يونس كان قاعد ضاغط علي ايده جامد وحاسس باحساس غريب لكنه فضل السكوت وانه ميتدخلش ويسيب ملك تقرر هي عاوزة ايه
ملك بجمود/ وانا مش عاوزاك تعتذر يا فارس ،، انت دلوقت بقيت حر نفسك ولو انت خلاص مبقتش عاوز اولاد دي حاجة ترجعلك بس انا خلاص مش فارق معايا رجوعي ليك ولا بفكر فيه فلو سمحت امشي
فارس بص لملك بندم وكان متأكد انه ضيعها من ايديه وبص ليونس بغضب ومشي ووقتها ملك غمضت عنيها وكأنها بتواسي نفسها بس فتحت علي صوت يونس اللي لاول مرة يتكلم معاها من وقت طلبها للجواز
يونس بهدوء / ملك ،،،انتي عارفة انتي غالية قد ايه عندي بعيد عن موضوع جوازنا فلو انتي حاسة انك اتسرعتي وعاوزة ترجعي لطليقك صدقيني انا
ملك بثقة وابتسامة جذابة وهي بتبص لجنة اللي كان باين عليها القلق / انا اخدت القرار الصح يا ابيه يونس ،، وانا متأكدة اني مش هندم ابدا ،، كفاي عليا السعادة اللي شايفاها في عيون جنة ،،دي بتأكدلي ان قرار موافقتي صح جدا
يونس ميعرفش ليه اضايق لما ملك قالت كدة وكأنه كان متخيل او بيتهيأله انها وافقت علي جوازها منه عشانه هو فبص لجنة ورجع بصلها ورد بابتسامة باهتة / تمام يا ملك ،، كدة ييقي نكتب الكتاب ،، يلا بينا
..........................................
فتح يونس باب شقته ودخلت ملك اللي كانت متوتر اوي بس جنة مدتخاش فرصة لانها كانت فرحانة اوي كانها طفل صغير
جنة بسعادة / ملك ،، انا مش مصدقة انك اخيرا هتعيشي معايا ،، يا خبر صديقتي الانتيم اللي تبقي برضه خالتو هتعيش معايا علطول ،، انا بحلم
ملك بابتسامة / حبيبتي انا اللي مش مصدقة اني فعلا هبقي معاكي علطول وهتنامي في حضني زي ما كنتي بتعملي وانتي صغيرة
يونس كشر وفهم قصد ملك لما حس انها قاصدة تقوله انها هتنام مع جنة في اوضتها فحاول يداري ضيقته واتكلم بجدية
يونس بجدية/ تقدرو تروحو تنامو انتو انا عندي شغل هخلصه وداخل مكتبي ،، اعمليلي قهوة يا جنة وهاتيهالي
استغربت ملك رد فعل يونس وكلامه وكأنه قاصد يتجاهلها وكأنه عقاب بس اتجاهلت اللي حصل وابتسمت لجنة اللي كانت ماسكة ايديها
ملك بابتسامة / يلا خدي شنطتي ووديها اوضتك وانا هعمل القهوة لباباكي واجيلك
جنة بسعادة / ماشي ،،اعملي حسابك هنسهر سوا نرغي هاااا
ابتسمت ملك وراحت المطبخ وبدأت تعمل القهوة وبعد ما جهزت راحت مكتب يونس وخبطت
يونس بجدية/ تعالي يا جنة ادخلي
ملك وهي بتفتح الباب / ده انا يا ابيه يونس
يونس بضيق / متشكر بس مكنش ليه لزوم تتعبي نفسك ،،انتي هنا عشان جنة مش عشاني
ملك باستغراب / طب وحضرتك مضايق ليه ،،منا عارفة اني هنا عشان جنة ،، وبعدين انا قولت اعملها انا ،، بس خلاص طالما حضرتك بتضايق بعد كدة هخلي جنة تعملهالك
قالت ملك كلامها وكانت هتمشي بس وقفها يونس بسرعة
يونس بلهفة/ ملك استني ،، انا اسف ،،حقيقي مقصدش ،، بس يعني انا حاسس انك هنا غصب عنك وده مضايقني
ملك بهدوء / مين قال كدة ،،حضرتك شوفت بنفسك اني كان ممكن ارجع لطليقي وارفض اني اكون هنا بس انا رفضته وفضلت مكاني هنا جنب جنة لانها مسؤلة مني
يونس بابتسامة / طيب ممكن نفتح صفحة جديدة واعتبريني صديق ليكي ،،زي ما كنت دايما
ملك بابتسامة / اكيد طبعا يا ابيه يونس ،،انت عارف انك بالنسبالي حاجة كبيرة اوي
يونس بهدوء/ انا عارف ،، يلا روحي بقي لجنة احسن تيجي تخطفك عشان اتأخرتي عليها
ملك بضحكة / والله عندك حق ،،انا رايحالها بقي تصبح علي خير
يونس بابتسامة / وانتي من اهل الخير
مشيت ملك ووقف يونس يبص لاثرها بحيرة وكان مضايق لانه عارف ان ملك بتعامله كأخ مش اكتر وقرر وقتها ميعشمش نفسه بأكتر من كدة عشان ميخسرهاش وكفايا عليه انها معاه
.............................................
بعد حوالي اسبوعين كانت ملك بدأت تاخد علي وضعها الجديد خصوصا ان يونس بيتعامل معاها بنفس معاملته ليها اللي كانت قبل كدة بس الذيادة عليه انه بقي يتكلم معاها كتير ويشاركها يومه وكأنهم فعلا قريبين من بعض وهي كانت مبسوطة اوي بكدة وحست انها اخدت عليه اكتر وبقت ترتاح في وجوده ،، كانت واقفة ملك بتعمل الغدا لما دخلت عليها جنة اللي كانت خايفة اوي وبتعيط
ملك بخضة/ جنة مالك في ايه ؟ ايه اللي حصل
جنة بعياط/ الحقيني يا ملك ،، بابا كلمني وقالي انه هيتأخر شوية عشان عنده شغل بس تقريبا نسي يقفل الخط وسمعت حد جمبه بيقوله كويس انك مقولتش ليها انك عملت حادثة وفي المستشفي ،،انا مرعوبة اوي
ملك حست بقبضة في قلبها واخدت جنة في حضنها بس كانت مرعوبة علي يونس
ملك بتصنع / اهدي يا جنة طالما كلمك في التليفون يبقي هو كيس اهدي انتي بس بالله عليكي
جنة بخوف / انا خايفة اوي انا مليش غيره يا ملك بابا هيروح مني زي ماما
ملك بحنان/ اهدي بس يا حبيبتي ،، بصي انا هلبس وانزل اشوفه فين وانتي خليكي هنا كأنك متعرفيش حاجة عشان هو ميقلقش عليكي وانا هطمن واطمنك اوعدك
جنة بسرعة/ طيب طيب ،،يلا بسرعة ،،انا هستني مكالمتك اوعي تتأخري عليا
ملك بسرعة راحت غيرت هدومها واخدت التليفون ونزلت وكلمت يونس اللي رد بتعب بعد تاني مكالمة
يونس بتعب / ملك ،،في حاجة ولا ايه
ملك بخضة/ابيه يونس انت فين ؟
يونس بكدب/ عندي شغل ياملك هخلص واجي ،،هو في حاجة ؟قوليلي وانا هتصرف
ملك بدموع/ انا عارفة انك عملت حادثة لو سمحت قولي مكان المستشفي انا في الطريق
يونس بتنهيدة / تمام يا ملك انا في مستشفي الجارحي
ملك بلهفة/ مسافة الطريق متقفلش تليفونك عشان اطمن عليك سلام
قفل يونس وابتسم رغم تعبه واتمني لو يكون الاحساس اللي وصله منها حقيقي وانها فعلا خايفة عليه وبعد حوالي نص ساعة وصلت ملك وسألت علي مكان الاوضة بتاعته وراحت بسرعة ودخلت بس فجأة شهقت بخضة اول ما شافت...
يتبع