رواية عوضي الجميل الفصل الاول1 بقلم اسراء ابراهيم

انتي اتجننتي يا ملك عايزة تروحيلهم برجليكي وانتي عارفة انك لو روحتيلهم مش هترجعي تاني ابدا ولا هيخلوكي تشوفي الشمس 

قالت كدة سلمى بصدمة وهي بتبص لملك صاحبتها اللي كان باين عليها التعب والحزن واتفاجأت بيها بتقولها بتوهان :

وايه يعني يا سلمي ،، منا كدة كدة عايشة كأني ميتة ،، فكرك اني عاجبني حياتي  كدة ؟،، تلات شهور عايشة في رعب بين كل لحظة والتانية متخيلة اني هلاقي خالي كمال ومراته في وشي ويرجعوني تاني لجحيمهم ،، عشان كدة الموت عندي اهون و بما اني مش هقدر اعمل كدة واخد الخطوة دي فتكون علي ايديهم وخلاص 

كانت سلمي بتسمع ملك وهي مستغربة ،،ازاي في ناس بالبشاعة دي يعملو كدة في بنتهم ،، فكان صعبان عليها ملك خالص فطبطبت عليها بحزن وردت بابتسامة باهتة :

انا يا ملك جايز معرفكيش غير من تلات شهور بس ،، بس والله حبيتك كأنك اختي وبقيت بخاف عليكي اكتر من نفسي وعشان كدة مش عايزاكي تستسلمي للناس دي ،، عايزاكي تبقي اقوي من كدة 

ابتسمت ملك بحزن وقربت من سلمي وحضنتها وهي بتقولها بتنهيدة كلها تعب :

انا بحبك اوي يا سلمي وعمري ما هنسي انك وقفتي جمبي وانك الوحيدة اللي قربتي مني وانا مرمية في الشارع وساعدتيني ،، انا لو عشت عمري كله مش هوفي جميلك عليا 

كانت سلمي هترد بس تلفونها رن فقامت وهي بتبص لملك وبتقولها بسرعة قبل ما ترد علي المكالمة :

بس يا بت بطلي عبط ،،احنا اخوات ،،استني هرد بسرعة عشان مستنية المكالمة دي من  الصبح 

قالت سلمي كلامها وخرجت البلكونة وهي بترد علي الفون وسرحت ملك وافتكرت حياتها قبل تلات سنين قبل ما امها تموت لما كانت بتتعامل من الكل بحب وازاي وشوشهم كانت خداعة لدرجة انها مكنتش شايفة كر*ههم ليها وقلوبهم السودا من ناحيتها وانهم بانو علي حقيقتهم بس لما امها تعبت وماتت فجأة من يومها وكل حاجة اتبدلت ،، كانت متخيلة انهم هيبقو سندها وعيلتها لانها مكنش ليها حد غيرهم بس للاسف  شافت اسوأ معاملة من مرات خالها اللي كانت بتقولها دايما انها زي بنتها ،، للاسف طلعت بتكر*ها اوي وبدأت تعملها وحش وتضر*بها وتخليها تعمل كل شغل البيت كأنها خدامة ليها ولعيالها ،، تلات سنين وهي بتتعامل اسوأ معاملة جس*مها متعلم وكله كد*مات منهم لحد ما سمعت الكلام اللي خلاها تاخد قرار انها تهرب وده اول قرار اخدته في حياتها ،، انتبهت ملك لسلمي اللي قالتلها بفرحة وهي بتقعد جمبيها عالكنبة :

افرحي يا ستي ،،اخيرا لقيتلك الحل و هتبقي حرة ومش هتخافي ابدا من اي حااجة 

كشرت ملك باستغراب وسألت سلمي بفضول وهي بتبصلها بحيرة:

حل ايه ده ؟ فهيني يا سلمي انا مش فاهمة حاجة ابدا 

ضحكت سلمي وردت بغرور مصطنع وهي بتعدل لياقة التيشرت بتاعها :

عيب عليكي هو انا اي حد برضه ؟،، اومال انا مستنية المكالمة دي من الصبح ليه ماهي عشانك ،، بصي يا ستي انا قعدت افكر افكر في حل يخليكي تقدري تخرجي وتعيشي حياتك بشكل طبيعي من غير ما تبقي خايفة من حاجة وبعد تفكير عميييق لقيت انه مفيش غير حل واااحد بس ،، هو انك تبعدي عن اسكندرية خالص وعشان كدة انا كلمت نهي بنت عمي هناك في القاهرة وخليتها دورتلك علي شغل يكون كويس وكمان يخليكي مش بتخرجي كتير وهي بقي كلمتني وقالتلي ان طلبي جاهز 

كانت ملك بتسمع سلمي وعلي وشها ابتسامة واسعة وكأنها اخيرا هتبقي حرة فمسكت ايد سلمي وردت بتلقائية ودموعها بتنزل :

بجد يا سلمي ،، يعني هسافر واعيش حياتي بعيد عن خالي ومراته ،، انا مش عارفة اقولك ايه يا سلمي ،، وكملت ملك كلامها وهي بتحضن سلمي فجأة وبتعيط بفرحة ،، انا بحبك اوي يا سلمي ،، بجد لو كان ليا اخت مكنتش هتعمل عشاني اللي انتي عملتيه ده كله ،، ربنا يخليكي ليا 

ابتسمت سلمي بحب وخرجت ملك وردت عليها وهي بتمسحلها دموعها :

خلاص بقي ،،بطلي عياط احسن انا كمان هعيط وانتي عارفاني عيوطة ،، المهم انتي مسألتنيش ايه هو الشغل بقي 

ردت ملك بتلقائية وهي بتمسح دموعها بايديها :

مش مهم ،، مش هتفرق لو عرفت ،،المهم اني اكون بعيدة عن هنا وخلاص ،،حتي لو هشتغل خدامة ،، انا كمان هغير شكلي ومش هخلي حد يعرفني لو شافني،، هبدأ من جديد يا سلمي ،، مش هسمح ليهم يدمرولي حياتي ومش عاوزة منهم فلوس ولا ورث ،،انا كل اللي طالباه يسيبوني في حالي 

طبطبت سلمي علي ايد ملك بتشجيع وردت بحماس وهي بتقوم من مكانها :

ايوة كدة عايزاكي قوية دايما ،، خلي مامتك تبقي فخورة بيكي ،، اوعي تتذلي لحد او تحسسيهم انهم اقوي منك ،،خليكي دايما فاكرة ان ربنا معاكي وهو احسن من اي حد 

حركت ملك راسها بايجابية ورددت في سرها :

ونعم بالله ،، وكملت كلامها بصوت عالي وهي بتقول لسلمي ،، بس قوليلي ايه هو الشغل وهعيش فين ؟

ردت سلمي بحماس وهي بترجع تقعد تاني قدام ملك وقالتلها بفرحة :

بصي يا ستي ،، انتي هتشتغلي مع بنت عمي في نفس المكان اللي بتشتغل فيه وهو فندق كبير اوي في القاهرة فندق خالك ومراته ميحلموش يدخلوه اصلا فهتبقي مطمنة ،، المهم انك هتعيشي كمان هناك لانه بيوفر سكن للي بيشتغلو فيه ودي سياسة الفندق يعني ،،ها ايه رأيك 

ابتسمت ملك وردت بفرحة وهي بتقوم وتلف حوالين نفسها :

ياااه ،، اخيرا هبقي حرة يا سلمي ،، مش مصدقة ،، يارب اقدر اقف علي رجلي واعرف اعيش حياتي اللي كانت راحت مني ،،

فجأة افتكرت ملك حاجة فبصت لسلمي بخوف وهي بترجع شعرها الطويل ورا ودنها بتوتر :

  بس قوليلي يا سلمي ،، انتي عرفتي نهي اني معيش ورق او اي اثبات شخصية غير بطاقتي بس واني كمان يعني عندي 20 سنة ؟

حست سلمي بقلق ملك فطمنتها بعنيها وهي بتبصلها بحنان وقالتلها بهدوء :

متقلقيش ،،انا عرفتها وهي هتظبط كل حاجة متقلقيش انتي بس جهزي نفسك عشان هتسافريلها كمان يومين 

......................

بعد يومين كانت واقفة ملك في محطة مصر وهي شايلة شنطتها ،، شكلها مختلف تماما عن ما كانت قبل كدة ،، شعرها الطويل قصته لحد يدوب ورا ودنها وصبغت لونه الاسود بلون نبيتي غامق لايق اكتر مع بشرتها البيضة وعيونها العسلي فكانت جميلة اوي ،، ملك كانت متوترة وكل شوية تبص في ساعتها لحد ما لقت تليفونها اللي فجأتها سلمي بيه وهي بتديهولها بعد ما سجلت رقمها عليه عشان يتكلمو سوا ،، 

رفعت ملك الفون علي ودنها بعد ما ردت وهنا سمعت صوت نهي وهي بتقولها بسرعة واسف:

اسفة يا ملك حقيقي انا خمس دقايق واكون قدامك بس اللي اخرني اني معرفتش ازوغ من الشغل عشان الشيفت بتاعي لسة مخلصش 

ردت ملك بهدوء وابتسامة هادية وهي بترد علي نهي :

ولا يهمك ،، انا مستنياكي ،،  وبعدين انا اللي اسفة اوي ،،عشان مخلياكي سبتي شغلك وجايالي 

ردت نهي بتلقائية وهي بتقاطع ملك :

بس يا بنتي ،،ايه اللي بتقوليه ده ،،علي فكرة انتي لسة متعرفنيش ،،انا صاحب صاحبه اوي يعني اعجبك  ،، وبعدين سلمي حكتلي علي كل حاجة وانا حبيتك من قبل ما اشوفك اصلا فخلاص احنا اصحاب مفيش نقاش 

ضحكت ملك بخفة وردت بتأكيد وهي بتبص حواليها بتوتر :

اكيد طبعا ،، اصلا انا اللي حبيتك من كتر كلام سلمي عنك وعن قد ايه انتي انسانة جميلة ،،خلتني بقي عندي فضول اشوفك واتعرف عليكي 

وهما بيتكملو كانت نهي وصلت المحطة فردت نهي بحب وهي بتدور بعنيها علي ملك :

استني انا شوفتك اهو وجيالك بس ايه الجمدان ده ،، وربنا قمر 

ابتسمت ملك علي كلام نهي وشافتها داخله عليها فسلمو علي بعض وبعدين نهي اخدت ملك ومشيو بسرعة علي الفندق 

.......................

بعد شهر كانت قاعدة ملك في اوضتها بترتاح بعد ما خلصت شغلها وسلمت زميلتها الشفت بتاعها ،، بصت لاول مرتب تقبضه واهو بين ايديها وابتسمت بفرحة وقررت تشتري بيه هدية لسلمي وتبعتهالها ،، فجأة قامت ملك بسرعة بعد ما افتكرت ان المدير طلبها بعد الشغل وهي نسيت خالص فغيرت هدومها بسرعة وراحتله وخب*طت ودخلت وهي بتبتسم بمجاملة وبتقوله بعملية :

اتفضل يا فندم ،، حضرتك عاوزني في ايه ؟

اتكلم شريف بجدية وهو بيشاور لملك تقعد :

انتي بقالك شهر معانا يا ملك وما شاء الله شغلك ممتاز وكمان النزلاء بيشكرو فيكي وعلمتي معاهم وعشان كدة انا هثق فيكي واطلب منك تظبطي اوضة يامن نصار ومش عاوز انبهك انه من اهم النزلاء هنا في فندقي ودايما بيجي هنا يخلص شغله فعايز غرفته تكون خمس نجوم ،، تقدري تتفضلي 

ابتسمت ملك بتوتر وسابت شريف وخرجت وهي مش مصدقة انه طلب منها هي تشتغل في غرفة يامن نصار وده لانها سمعت كتير عنه من زمايلها وانهم بيتمنو انه المدير يختارهم للمهمة دي وده بسبب انه بيدي مبلغ كبير للبنت اللي بتظبتله غرفته وانه انسان كريم جدا لكنه صارم جدا جدا وبيخافو منه ،، راحت ملك علي اوضتها عشان تغير هدومها لهدوم الشغل و عدت علي اوضة نهي اللي صرخت بحماس اول ما قالتلها ملك وردت عليها بفرحة :

انتي عارفة اقل مبلغ بيديه يامن بيه للبنت المسئولة عن نضافة اوضته كام ؟،، ضعف مرتبي انا وانتي ،، افرحي يا ملك دي بداية حلوة اوي ليكي 

خافت ملك اكتر وردت بخوف وهي بتبص لنهي :

بس انا خايفة يا نهي ،، انا خايفة اغلط والبنات كانت بتقول انه صارم اوي وبيغضب من اقل حاجة 

مسكت نهي ايد ملك وقالتلها بتشجيع :

انتي قدها انا متأكدة ،، يلا روحي شوفي شغلك ،، بكرة عاوزة يامن ينبهر لما يشوف اوضته وطريقتك الحلوة بترتيبها 

اخدت ملك نفسها وابتسمت لنهي بتشجيع وسابتها ومشيت 

....................

تاني يوم كانت واقفة ملك بتعب وهي بتشيك علي الاوضة بعد ما خلصت وبعدين اخدت ادوات التنضيف بتاعتها وخرجت وراحت علي مكتب شريف مديرها عشان تبلغه ان الغرفة جاهزة فخب*طت ودخلت بس ملقتوش فاستغربت بس معلقتش وخرجت تاني وراحت اوضتها تغير وتستريح شوية بس من كتر التعب نامت ومحستش بنفسها غير ونهي بتصحيها بسرعة فقامت بخضة وهي بتقول لنهي :

في ايه يا نهي ،،حد يصحي حد كدة برضه ؟

ردت نهي بسرعة وقلق وهي بتبص وراها :

قومي بسرعة يا ملك ،، في مصيبة 

ملك قلبها اتقبض وبصت لنهي بخوف وهي بتسألها بتردد:

مصيبة ايه بس 

ردت نهي وهي بتبص لملك وقالتلها بسرعة :

الدنيا مقلوبة عليكي برة ويامن نصار عايزك من تحت الارض وقالب الدنيا وشكله كدة ميبشرش بخير 

ملك قامت بسرعة وهي بتسأل باستغراب :

وعاوزني في ايه اللي اسمه يامن ده ،، انا مش خلصت شغلي وسلمته ،،عايز مني ايه ؟

ردت نهي بضيق وهي بتبص لملك بعتاب :

ازاي بس ،، واوضته اللي المفروض تنضفيها مقلوبة فوق بعضها 

شهقة خرجت من ملك بصدمة بعد ما سمعت كلام نهي وردت بتلقائية وهي بتحاول تستوعب اللي اتقالها :

محصلش يا نهي ،،انا لسة مخلصة من كام ساعة ،،حتي عديت علي استاذ شريف اقوله بس ملقتوش في مكتبه 

فكرت نهي شوية وبعدين ردت بسرعة وهي بتخب*ط بايديها علي راسها :

يبقي حد من زمايلنا هو اللي عملها اكيد ،، تلاقيهم اتغاظو لما اخدتي انتي الشغل منهم ،، طب هنعمل ايه دلوقتي 

ردت ملك بثقة وهي بتظبط هدومها وبتخرج من الاوضة :

ولا حاجة هبلغ مستر شريف باللي حصل 

لحقتها نهي بسرعة عشان تحاول تمنعها بس ملك رفضت وكملت طريقها لمكتب شريف وخب*طت ودخلت واول ما شافها شريف ........