رواية عشق في ظروف قاسيه الفصل الاول1 بقلم اسراء ابراهيم

انا لا يمكن هتجوز واحدة زي دي  يا امي ،،انتي متعرفيش الناس بتقول عليها ايه تحت ؟ 

كان بيتكلم سليم بغضب وهو رايح جاي في اوضته وكانت متابعاه هدي امه بحزن

هدي وهي بتترجي سليم/ عشان خاطري يا سليم ،، هتكسف امك ،،انزل يا حبيبي الحق سمعة بنت عمك المعازيم هتاكل وشها وتجيب سيرتها 

سليم بصدمة / انا مش عارف ازاي انتي بالذات تطلبي مني طلب زي ده يا امي ،،انتي ناسية اللي امها عملته فيكي زمان  ؟ ناسية انهم السبب في ان بابا يطلقك ولولا ان بابا عرف الحقيقة كان زمانك لسة مطلقة منه 

هدي باصرار/ وانا مسامحة وبعدين ورد مالهاش علاقة بالموضوع ،،دي بنتي ده انا اللي مربياها ،،يكفي انها سابت امها وهي صغيرة عشان تعيش معايا من كتر ما بتحبني ،، عشان خاطري يا سليم انزل بقي يلا 

سليم بسخرية/ انزل اعمل ايه ما خلاص سيرتها بقت علي كل لسان ،، دي تستاهل ان كريم يسيبها يوم فرحها ،،تلاقيه عرف كل قذار*تها و

سكت سليم لما ضر*بته هدي بالقلم علي وشه وهي بتبصله بغضب / انت اتجننت ،،ازاي تقول علي ورد كدة ،، ورد دي تربيتي ولو هي كدة يبقي العيب مني انا مش هي  

سليم بتنهيدة/ انا اسف يا امي ،،انا مقصدش بس انتي متعرفيش انا عرفت ايه عنها وسمعت ايه 

هدي بغضب / يبقي تكدب اللي سمعته وتصدق تربيتي اللي خليتك راجل ،،يا خسارة يا سليم ،،كنت فاكرة اني عرفت اربي 

.......................................

كانت قاعدة بتبص حواليها بتوهان ،، لحد اللحظة دي بتكدب نفسها وبتقنع روحها ان كريم جاي وانه اكيد مش هيسيبها يوم فرحها ،، كانت لحد امبارح بترسم احلام وردية معاه وبالوعود اللي وعدها بيها والحياه اللي كان راسمها ليهم سوا ،، كانت شايفة نظرة الناس ليها وعيونهم اللي فيها اتهامات ،، كانت سامعة بودنها كلامهم عليها وان كريم ممكن يكون سابها عشان عرف عنها حاجة ،،او يمكن تكون غلطت معاه وهرب ،،دموعها نزلت بصمت وهي باصة للفراغ لحد ما عنيها جت في عيون نوران بنت عمها واخت سليم ،،وقتها وكأن صعقة كهربية مسكتها ،، نظرة الشماتة اللي في عيون نوران اكدت ليها انها السبب وكان بيتردد في ودنها جملة نوران ليها وهي بتقولها  انا نفذت وعدي ليكي وخليته سابك وكمان يوم فرحك ،، غمضت ورد عنيها بقهر وحزن وفتحتهم علي صوت المأذون 

المأذون باستعجال /  هو العريس اتأخر اوي ليه كدة انا ورايا فرح تاني يا حضرات 

نبيل عم ورد باحراج / معلش يا مولانا الغايب حجته معاه ،،اكيد حاجة عطلته 

المأذون وهو بيقوم / لا معلش انا اتأخرت ولازم امشي بعد اذنكم 

ورد بصت للمأذون بلهفة وكأنه لما يمشي هياخد اللي باقي من كرامتها معاه لحد ما سمعت فجأة صوت سليم اللي انقذها من دوامة حزنها / 

سليم بجدية وهو نازل عالسلم / استني يا مولانا ،، يلا اتفضل اعقد 

المأذون باستغراب/ طب وهو فين العريس يا ابني 

ورد بصت لسليم بلهفة وافتكرت ان كريم كلمه وانه اكيد جاي وحاجة عطلته بس اتفاجأت بيه بيقرب منهم وبيقعد وهو بيقول ببرود/ العريس قدامك اهو اتفضل اعقد وادي بطاقتي اهي

الكل اتصدم بما فيهم نوران اللي كانت واقفة هتو*لع من الغيظ وهي شايفة سليم اخوها بيتجوز من اكتر واحدة بتكر*ها في حياتها وده خلاها تتكلم باندفاع 

نوران بقصد/ وانت ايه ذنبك يا سليم تربط نفسك بواحدة زي دي ؟

ورد دموعها نزلت بصمت واللي اتكلم سليم اللي بص لنوران بغضب / نوران مسمعش صوتك انتي فاهمة وبعدين فين المشكلة ،،انا العريس ومكنش في حد غيري هيتجوز  ورد لاني انا اللي منعت كريم يجي 

ورد شهقت بصدمة وبصت لسليم اللي رسم الدور باحرترافية وقام من مكانه وقرب من ورد اللي متابعاه بعنيها وهو بيقرب منها وبيمسك ايديها / ورد هي حب عمري ومكنتش هقدر اسيبها لراجل غيري ،، سامحيني يا ورد بس مقدرتش اسيبك لاني بحبك واتمني توافقي تتجوزيني 

ورد كانت مصدومة وهي باصة لسليم اللي فوقها من صدمتها وهو بيضغط بايديه علي ايديها وخلاها نطقت بهدوء /  موافقة 

الناس كلها سقفت وهي بتبصلهم بفرحة وكأنها قصة حب افلاطونية وهما ميعرفوش الحقيقة  اللي ورا اللي بيحصل 

سليم بجدية وهو بيبص للمأذون/ اتفضل اعقد يا مولانا 

ابتسم المأذون وقعد بحماس وبدأ يعقد قران سليم علي ورد 

.........................................

كانت واقفة ورد جنب سليم وبيودعو المعازيم اللي ماشية وكانت متابعاهم نوران بغيظ وخصوصا انها شايفة معاملة سليم لورد قدام الناس وهي مفكرة انه فعلا بيحبها اما ورد فكانت مستغربة كلام سليم ومش مصدقة انه فعلا بيحبها وانه هو اللي عمل كل ده فعلا ومع اخر شخص خرج من الڤيلا كأنه سليم اتحول لشخص تاني وساب ايد ورد بغضب وبعد عنها 

سليم بغضب مكتوم / اظن انا عملتلك 

اللي انتي عاوزاه يا امي ،، ارجوكي بقي متضغطيش عليا اكتر من كدة ،،انتي مش متخيلة انا حاسس بأيه والبت دي علي ذمتي 

ورد بصدمة / انت بتقول ايه ؟ يعني انت كلامك قدام الناس كان كدب ولعبة منك ؟

نوران بسخرية/ وانتي مفكرة ان اخويا ممكن يبص لواحدة زيك ،،يا عالم خطيبها سابها عشان ايه و

هدي بغضب / اخرسي يا نوران ،، اوعي تقولي كدة علي بنت عمك ،،انتي اتجننتي ؟

نوران بغضب / دلعك ليها هو ده اللي خلاها كدة ؟ من كتر ما بتفضليها عننا خلتيها  تتغر بنفسها ومبقتش تفرق بين الصح والغلط ،، ايه مسمعتيش الناس كانت بتقول ايه عليها 

هدي بعصبية/ ومش هصدق ،،ورد بنتي لا يمكن تغلط وكريم ده انا لسة حسابي معاه بعدين ،، تجيبهولي يا سليم من تحت الارض ،،لازم اعرف ليه عمل كدة ولما هو مش هيتمم الجوازة ليه مقالش قبل الفرح وخلانا نعزم الناس 

نوران بخبث / مش جايز من اللي سمعه عنها 

هدي بانفعال/ اخررسي ،، اتفضلي غوري من وشي 

نوران ببرود/ ماشي يا ماما ،،بس بكرة تعرفي ان كل اللي بيتقال عليها صح 

سابتهم نوران وطلعت وورد كانت بتسمع كل اللي بيتقال عليها ومصدومة ومكنتش بتنطق بحرف ،،دموعها بس بتنزل وخلاص وسليم كان بيبصلها بغضب متملك منه ميعرفش ليه خصوصا بعد كلام نوران اخته 

هدي بهدوء حاولت ترسمه عليها/ سليم ،، انت دلوقتي جوز ورد يعني هي مسئولة منك لحد ما اعرف ليه كريم عمل كدة  واحاسبه عليه ودلوقتي اتفضل خد مراتك واطلع علي اوضتكم 

سليم باعتراض /  اوضتنا ؟ انتي مفكرة انها جوازة بجد ؟ مش معني اني وافقتك يا امي باني اتجوزها واستر عليها يبقي اعيش معاها طبيعي وكأني بموت فيها 

ورد كانت حاطة ايديها علي قلبها اللي و*جعها من جملة سليم وكانت بصاله وهو بيقول عليها كدة ودموعها بتنزل لحد ما عنيه جت في عنيها اللي بتبصله بيهم بعتاب خليته يتوتر ويسكت وشافها وهي بتوه بعنيها بعيد عنه و بتغمض وبتقع عالارض فجري عليها بسرعة ولحقها ووقعت بين ايديه تحت صريخ هدي المرعوبة علي ورد

..................................

كانت بتفتح ورد عنيها وهي بتبص حواليها بتعب وكانت جمبيها هدي اللي قربت منها بلهفة 

هدي بخوف / ورد انتي كويسة؟ حبيبتي طمنيني عليكي 

ورد بدموع/ انا ليه بيحصل معايا كدة ؟ انا تعبت يا ماما هدي 

هدي بحزن/ متزعليش يا ورد من كلام سليم ،،هو مش واعي بيقول ايه حقك عليا يا بنتي 

ورد بخزلان/ ليه حق يقول كدة يا ماما هدي ،،انا عذراه ،، اللي خلي خطيبي اللي كان هيبقي جوزي هرب يوم فرحنا ،، انا بس نفسي اعرف هو عمل كدة ليه ؟ انا عملتله ايه وحش عشان،يتخلي عني بالطريقة البشعة دي 

هدي بتوعد/ اوعدك اني اعرف كل حاجة يا ورد خليكي واثقة فيا 

ورد برجاء/ ماما هدي لو سمحتي خلي سليم يطلقني انا مش عاوزة الغبط ليه حياته ،،هو ميستاهلش كدة ابدا 

هدي بابتسامة/متقلقيش من الموضوع ده يا ورد ،،سليم كدة كدة مش بيفرق معاه حاجة ولو عاوز يعمل حاجة هيعملها يعني لو عاوز يكمل حياته وانتي علي ذمته هتلاقيه بياخد خطوة ،،المهم انه سمع كلامي واتجوزك عشان كلام الناس 

ورد سرحت بحزن في حياتها اللي اتشقلبت 180 درجة في يوم وليلة واتنهدت بحزن وهي بتقرر تكون قوية عشان تقدر تكمل حياتها وخصوصا مع كلام اللي حواليها 

....................................

كان قاعد سليم تحت وهو حاطط وشه بين ايديه وبيفكر في ورد ،،من جواه حاسس انها مظلومة لكن كلام نوران اخته وتصرف كريم بيأكدوله ان الكلام ده صح ،،كانت نازلة نوران عالسلم وشايفة سليم وحيرته فقربت منه بخبث وهي مقررة تخليه يكر*ه ورد اكتر 

نوران بابتسامة/ والله ليك حق تقعد القاعدة دي ،، بصراحة انا مش عارفة انت ازاي خليت البنت دي علي ذمتك 

سليم بضيق / وانا كنت هعمل ايه ،، انتي عارفة ورد بالنسبة لماما ايه ،،ولما طلبت مني اتجوزها مكنش ينفع اقول لا 

نوران بضيق / انا معرفش البت دي عاملة لماما ايه ،، بس ليها حق تعمل اكتر من كدة ماهي بتعرف تخدع اللي قدامها كويس اوي ببراءتها الكدابة بس علي مين اهي اتكشفت وبانت علي حقيقتها 

سليم بحيرة/ انا مش عارف ازاي ممكن تعمل كدة ؟،، شكلها ميقولش انها بالحقا*رة دي ابدا 

نوران بخبث وهي بتقرب من سليم / منا قولتلك بقي يا سليم ،، دي تمسلية راسماها عشان تخبي حقيقتها الق*ذرة ،، بقولك شفتها بعيني وهي بتلاغي زميلي يوم عيد ميلادي وخلته رايح جاي وراها ولا بقي يوم ما روحنا مارينا عشان نصيف من كام اسبوع ،، كانت ماشيه مع الشاب الاجنبي اللي كان ساكن في نفس الدور بتاعنا وكانت بتضحك وايه 

سليم بانفعال / خلاص بقي ،، متنسيش انها بقت زفت مراتي ،،مش عاوز اسمع عنها حاجة لحد ما تغور في داهية ،، انا لازم اطلع اتكلم معاها واحط النقط عالحروف عشان متفتكرش انها ممكن تضحك عليا وتوقعني انا كمان 

خلص سليم كلامه وطلع تحت نظرات نوران اللي كلها فرحة وشماتة بعد ما وصلت لغرضها 

.......................................

كانت واقفة ورد بتظبط طرحتها  وهدي قاعدة معاها لما دخل عليهم سليم اللي كان باين عليه الغضب 

سليم بهدوء غريب / ممكن لو سمحتي يا ماما تسيبني اتكلم مع ورد لوحدينا شوية 

هدي بفرحة/ طبعا يا حبيبي ماهي مراتك برضه ،،انا هروح اوضتي بقي وانت كدة كدة هتنام هنا ها ،،اشوفكم الصبح علي خير يا حبايبي 

خرجت هدي وورد كانت متابعاها بتوتر وبعدين بصت لسليم اللي قرب منها فخافت ورجعت هي لورا بهدوء لحد ما وقف قدام وشها واتكلم ببرود/ انتي بترجعي  لورا ليه ،، تكوني خايفة مني ؟ مفكرة اني ممكن اقربلك مثلا ؟

ورد بحزن / لا مش خايفة منك ،،انت بالذات لا يمكن اخاف منك يا سليم 

سليم اتوتر من رد ورد بس داري ده برده القاسي عليها  / ولا يمكن عشان متعودة ؟ كام واحد سمحتيله يقرب منك بالشكل ده غير الشاب بتاع عيد ميلاد نوران والشاب الاجنبي ،،هه عشان كدة خطيبك سابك ،، لما عرف علاقتك الق

سكت سليم لما ورد ضر*بته بالقلم علي وشه فجأة وهي بتبصله بغضب 

ورد باحتقا*ر / انا لايمكن هسمحلك تتهمني في شر*في ،،انت فاهم ،،اوعاك تكون فاهم سكوتي علي كلامك ضعف ،،لا يا سليم ،، انا سكتالك عشان ماما هدي وبس ،،غير كدة انا اعرف اوقفك عند حدك ،، انا لو زعلانة فعشان انت صدقت عني كلام نوران اختك عني ،، ايه اتفاجأت بكلامي ؟ ايوة انا عارفة ان نوران اللي قالتلك كدة عني ودلوقتي فهمت ليه بتعاملني كدة من الاول ،، بس الحق مش عليك ،، الحق علي اللي قالت عني الحجات دي ،،وتعرف انا بس مكنتش متخيلة انك تصدق عني كدة ،،انا اللي اتربيت في بيتك واللي ربتني امك ولو مش واثق فيا ليك حق بس المفروض تثق في تربيتها هي ،،اخرج برة ،، برررة 

سليم مكنش عارف يعمل ايه وخصوصا ان كلام ورد وطريقتها خلت قلبه يرق ليها بس معملش حاجة غير انه سابها وخرج ووقتها هي انهارت من العياط وهي بتقعد عالارض وبعدين افتكرت نوران فمسحت دموعها بغضب وهي بتتوعد ليها في سرها 

..............................................

بعد كام يوم كانت ورد بتتجاهل سليم وهو كمان كان بينام في اوضة تانية وبيحاول ميتقابلش مع ورد خالص وفي يوم كانت لابسة ورد ونازلة عالسلم وشافت نوران قاعدة بتفطر فبصتلها بغضب وبعدين قربت منها وقعدت جمبها 

ورد ببرود/ اهلا باخت جوزي القمر 

نوران بسخرية/ مش هطولي خدي بالك ،، وقريب اوي سليم هيطلقك 

ورد بضحكة سخرية/ ااه ،،عشان الكلمتين الخايبين اللي روحتي بختيهم في ودنو ؟ لا عادي ،،متقلقيش انا كنت عارفة كويس اوي انك هتعملي كدة ،،اصل الحقا*رة متجيش غير منك 

نوران ببجا*حة/ اممم واضح  ان كلامي عمل مفعول سريع ،،عموما دي البداية وقريب هخليه يطقلك ،،زي ما خليت كريم يسيبك يوم فرحك وسيرتك تبقي لبانة في بوق  الكل

ورد بقوة/ عارفة انك تعملي كدة واكتر كمان بس يا تري بقي اخوكي ومامتك عارفين انتي بتعملي فيا كدة ليه ؟ اقولك انا ،، انتي قولتي اتغدي بيها قبل ما تتعشي بيا ،، عشان كدة روحتي قولتي لاخوكي اللي حصل بس بالعكس ،،، بس تفتكري بقي رد فعله ايه لما يعرف انك انا اللي شوفتك مش انتي اللي شوفتيني 

نوران بتوتر / هه ،،ومين هيصدقك  ،، سليم ؟ ده شاف بعنيه خطيبك اللي هرب يوم فرحك بسبب سمعتك 

ورد بثقة/ هيصدقني ،، لما اخليه يشوف بعنيه كل حاجة بس كله بالهداوة ،، سلام يا اخت جوزي 

مشيت ورد ونوران كانت متابعاها بغضب ومن جواها قلقانة من الثقة اللي كانت بتتكلم بيها اما ورد اول ما خرجت قناع القوة وقع وكانت خايفة اوي ومش عارفة تعمل ايه بس اتنهدت بتشجيع وكملت طريقها 

في الكافيه كان قاعد سليم مع نانسي وتبقي زميلته في شغله وبيتكلمو وبيضحكو سوا لحد ما اتفاجأ بورد وهي داخلة من باب المطعم.....