رواية وصية عشق الفصل الأخير بقلم اسراء ابراهيم
اتفاجأت ريم بندى وهي بتقولها بثقة/ اممم طبعا مرات الكبير ، اهلا يا قمر
ردت ريم بهدوء وهي بتبص لطه/ كويسة ازيك انتي
اتكلمت ندي وهي بتقعد جمب طه وبتبصله وبتبتسم/ تمام اوي عشان شوفت طه بصراحة ،،تعرف انا كنت زعلانة اوي منك وكنت حالفة مكلمكش
رد طه بسرعة وهو بيبص لندي وبيبتسم ليها هو كمان / لا طبعا مقدرش ،،انتي اصلا في بالي علطول وبسأل ماما عليكي دايما حتي اسأليها
قامت ريم اول ما طه قال كدة وسابتهم ودخلت المطبخ قبل ما دموعها تنزل وكانت حاسة انها مخنوقة اوي مش عارفة ليه وكانت متابعاها ملك بغموض وقامت دخلت وراها وقالتلها بغموض / انتي قومتي ليه يا ريم ؟
ريم حاولت تكتم دموعها وردت بهدوء/ مفيش اصلي شبعت ،،روحي كملي اكلك انتي وانا هعمل الشاي
ملك ابتسمت وقربت من ريم وهي بتقولها / تعرفي اني مبشوفش طه بيضحك اوي من قلبه كدة الا لما البت ندي بتيجي
ولما هو فعلا كدة متجوزهاش ليه ؟
قالتها ريم باندفاع وهي بتبص لملك بغيظ ووقتها ملك ضحكت بتلقائية لانها وصلت لغرضها وقدرت تكشف مشاعر ريم فقالت بقصد وهي بتبص لريم / واضح ان فعلا مفيش مشاعر من ناحيتك لطه يا ريم
اتصدمت ريم وبصت لملك وهي فاتحة بؤها بصدمة وقالتلها / انتي بتقولي ايه يا ملك
طبطبت ملك علي ريم وقالتلها بابتسامة/ بقولك تراجعي نفسك يا ريم لانك لو فعلا مبتحبيش طه مكنتيش غيرتي عليه اوي كدة ،، باين عليكي اوي انك واقعة يا بنتي
ريم سرحت في كلام ملك وبصت بعيد بتوهان وهي بتقول لنفسها بهمس/ معقولة اكون بحبه ؟
اتكلمت ملك بخبث وهي بتطبطب علي كتف ريم / علي فكرة بقي ،، ندي كانت قايلالي انها بتحب طه اوي وزعلت اوي لما اتجوز ،،انا قولت اقولك يعني ،، يلا اسيبك تعملي الشاي بقي
خرجت ملك وهي بتبتسم بخبث لانها وصلت لمرادها وريم كان وشها احمر من الغضب بعد ما سمعت كلامها
..............................................
كانت خارجة ملك بالشاي وعنيها علي طه اللي بيتكلم مع ندي بصوت واطي وجمبهم مديحة اللي ابتسمت وهي بتقول بصوت عالي / تسلم ايدك يا حبيبتي ،،تعالي يلا اقعدي بقي
بصت ريم لطه وقالتله بغيظ/ طه ممكن تيجي تاخد مني الصنية اصلها تقيلة وخايفة تقع مني
قام طه واخد منها الصنية وحطها عالترابيزة وكان هيروح يقعد مكانه تاني جمب ندي بس لحقته ريم وهي بتقوله بسرعة/ تعالي يا طه صح كنت عاوزة اوريك حاجة عالتليفون مهمة اوي
رد طه باستغراب وهو بيقرب من ريم وبيقعد جمبها/ تمام وريني كدة
ابتسمت ريم وفتحت تليفونها وهي بتوريه صورة فستان وبتقوله بابتسامة/ ايه رأيك بفكر اجيب الفستان ده تفتكر هيبقي حلو عليا ؟
رد طه بابتسامة باهتة وهو بيبص لريم / اكيد هيكون حلو ، اطلبيه طبعا وعرفيني بالمعاد
اتجرأت ريم ومسكت ايد طه وهي بتقوله بدلع / ربنا يخليك ليا يا حبيبي
طه كان مصدوم وهو باصص لايد ريم اللي حاضنة ايديه ورجع بصلها فابتسمت ليه ابتسامتها اللي بتخط*ف قلبه بيها فغمض عنيه هو بحزن وافتكر انها بتعمل كدة عشان بس قدام اهله فسكت وكانت متابعة اللي بيحصل ملك وهي فرحانة اوي
.......................................
دخل طه وريم من باب شقتهم ووقتها طه كان هيدخل علي اوضته علطول فلحقته ريم بسرعة/ هو انت هتنام علطول كدة ؟
طه بتلقائية وهو بيلف وبيبصلها / ايوة ،، انتي عاوزة حاجة؟ لو علي موضوع الفستان فانا قولتلك اطلبيه وبلغيني بتمنه وهيوصل امتي
ردت ريم بغيظ وهي بتبص لطه بغضب/ يا سلام ومالك مكشر كدة ليه ان شاء الله ،، صح ما هنا علطول مكشر وساكت لكن مع ست ندي الضحكة من هنا لهنا مش كدة ؟
كشر طه باستغراب ورد بجدية / وايه علاقة ندي بالموضوع دلوقتي عشان تجيبي سيرتها مش فاهم
ريم باندفاع وهي بتقرب من طه وبتتكلم بصوت عالي / للدرجادي بتدافع عنها ،، ايوة ماهي حبيبة القلب مش كدة؟
طه بص لريم بغضب ومسك ايديها جامد وهو بيقولها بعصبية/ صوتك ميعلاش عليا ،،انتي فاهمة ؟
ريم بصتله ودموعها نزلت ومنطقتش بحرف فسابها طه ونفخ بغضب وبعدين ودخل اوضته وهبد الباب ووقتها ريم قعدت عالارض بحزن وهي متأكدة ان طه بيحب ندي فعلا
..............................................
بليل كانت قاعدة ريم عالكرسي في البلكونة وسرحانة في طه ،،مش متخيلة انها اكتشفت انها بتحبه اوي كدة وفجأة عرفت ده وبدون مقدمات ،، بس للاسف لما عرفت حقيقة مشاعرها كان بعد فوات الامان ،، كان بعد ما طه حب واحدة غيرها وكر*هها هي ،، مسحت دموعها بسرعة لما سمعت صوت باب اوضة طه وحست بيه بيقرب منها وبيقولها باستغراب / انتي لسة صاحية ليه لحد دلوقتي يا ريم ؟
ريم ردت من غير ما ترفع عنيها عشان طه ميعرفش انها كانت بتعيط/ مفيش اصل مش جايلي نوم ،،روح انت كمل نوم
رفع طه وش ريم ليه بايديه وبص في عنيها وهو بيقولها بتنهيدة/ وعيونك المنفخة دي برضه من قلة النوم
ريم بهروب وهي بتنزل وشها تاني / اه من قلة النوم
قعد طه قدام ريم عالكرسي وبصلها وقالها بهدوء/ انا اسف اني اضايقت عليكي يا ريم ،،حقيقي مقصدش
ردت ريم وهي بتبص لطه بحزن / ولا يهمك ،،انا كمان غلطت لما عليت صوتي عليك ،، انا اسفة
ابتسم طه بطريقة جذابة خلت ريم قلبها يدق ولقته بيقولها وهو بيمد ايديه ليها/ يعني خلاص صافي يا لبن ؟
ابتسمت ريم وهي بتمد ايديها وبتقول بتلقائية/ صافي يا لبن
قومها طه وهو بيشدها من ايديها وبيقولها بحماس / طيب يلا بقي ادخلي نامي وكفايا سهر كدة عشان متتعبيش بالنهار
مشيت ريم مع طه لحد ما وصلت لاوضتها وبصتله بتردد وهي مش عارفة تخرج الكلام بس شجعت نفسها وقالتله باندفاع / طه انا خايفة انام لوحدي
طه بص لريم شوية بحيرة وبعدين قالها بهدوء/ شغلي قرآن ونامي هتعرفي تنامي كويس ،،تصبحي علي خير
دخل طه اوضته ووقتها ريم غمضت عنيها بحزن واتأكدت ان مفيش امل ودموعها نزلت من جديد
...........................................
عدت فترة كانت ريم بتحاول تقرب من طه بتصرفاتها معاه واهتمامها بيه وانهاردة عرفت ان عيد ميلاده بكرة من ملك فقررت تنزل تجيبله هدية بس من غير ما تقوله فنزلت بعد ما هو نزل الشغل وبسرعة حاولت تعدي من قدامه من غير ما ياخد باله وفعلا راحت اشترت هدية حلوة ليه بس اتأخرت شوية فرجعت وهي قلقانة يكون طه وصل قبلها وكانت بتدعي انها توصل الاول بس املها خاب لما فتحت الباب وشافت طه قاعد مستنيها وباين علي وشه الغضب واول ما شافها قام وقرب منها بغضب وهو بيتكلم / اهلا بالست هانم اللي فاكره انها مالهاش راجل ترجعله
خافت ريم من صوت طه العالي وحاولت تتكلم وقالتله بخوف / لا يا طه مش كدة والله انا محبتش اقولك عشان
قاطعها طه ورد بغضب وهو بيخ*بط باديه عالحيطة/ محبتيش تقوليلي عشان مش شايفاني يا ريم ،، مش معتبراني جوزك ،، عشان كدة بتتعاملي كأنك حرة ،، فاكرة بتصرفاتك دي هتخليني ازهق واطلقك ،، عندك حق ماهو انا صابر لحد دلوقتي وقابل علي كرامتي ان مراتي تبعد عني وتقولي بتصرفاتها انها مكنتش عاوزاني ،، بس اللي عاوز اعرفه ،،ليه وافقتي من الاول ،،ليه انتي اللي قولتي انك موافقة ليييه انطقي
ردت ريم بحزن ودموع وهي بتبص لطه بخزلان/ عشان كنت غب*ية يا طه صدقني ،، انا منكرش اني اتجوزتك عشان بابا كان عاوز كدة ،، خفت يكون غضبان عليا لما رفضت من الاول اني اتجوزك ،، صدقني يا طه كنت غ*بية
غمض طه عنيه بحزن بعد ما فهم كل حاجة ورد بهدوء/ دلوقتي فهمت يا ريم ،، وانا اللي كنت فاكرك موافقة وبتحبيني زي ما انا ب... ، ، تمام يا ريم وانا مش هغصبك عليا اكتر من كدة انتي
ريم كانت مصدومة ومش متخيلة ان طه هيطلقها بسرعة كدة من غير ما يفهم ويعرف انها بقت بتعشقه فقبل ما ينطق حرف كمان كانت اترمت في حض*نه وهي بتتكلم بانهيار/ لا يا طه ،،اوعي تقولها ،،صدقني انا بحبك ومش بس بحبك انا بعشقك ومتعلقة بيك اوي ولو سبتني انا ممكن اموت ،، طه يمكن مكنتش بحبك بس ده لاني مكنتش اعرفك ،، يمكن كنت غبي*ة وبفكر بعقليي زي اي بنت لكن اكتشفت انك اكتر انسان قريب مني ،، طه انا مشاعري كانت تايهة وانت معايا خلتني اطمن واتأكد بمعاملتك ليا اني بحبك يا طه ،،ارجوك متبعدنيش عنك وحيات غلاوة بابا عندك
طه كان بيسمع ريم وهي بتتكلم وهي في حضنه وكان من جواه مبسوط اوي واسعد راجل في الدنيا ،، عياطها والخوف اللي في صوتها احسن يبعد عنها خلاه يتأكد انها صادقة وعشان كدة رفع ايديه بهدوء وحاوطها وهو بيتنهد براحة ووقتها ريم ابتسمت بخجل وهي في حض*نه وخصوصا لما سمعت صوته اللي قريب لقلبها/ مكنتش اعرف انك واقعة اوي كدة ،، بس تعرفي،، انا كمان واقع اكتر منك
خرجت ريم من حضنه وبصت في عيون طه وهي بتقوله بابتسامة/ بجد يا طه ،، يعني انت مش بتحب ندي ؟
طه وهو مكشر باستغراب / ندي ؟ ،، يا بنتي ندي تبقي اخت ملك في الرضاعة وبالنسبالي زي ملك بالظبط وهي كمان بتعتبرني اخوها،، دي كانت بتاخد رأيي لسة في واحد متقدملها
ابتسمت ريم بفرحة وفجأة حضنت تاني طه اللي ابتسم وشالها ولف بيها من فرحته بغيرتها عليه اللي خد باله منها دلوقتي وريم كمان كانت فرحانة انها اخدت القرار الصح لما اتجوزت طه وانها كانت غلط لما حكمت عليه من شكله ومهنته من غير ما تعرفه ....
تمت بحمد الله