رواية وصية عشق الفصل الاول1 بقلم اسراء ابراهيم

انت عاوزني اتجوز واحد زي طه ده ؟ يا بابا انت بتقول ايه بس ،،انت مش شايف شكله عامل ازاي 

كانت بتتكلم ريم بصدمة وهي واقفة قدام ابوها اللي كان بيبصلها ومش عاجبه طريقتها فرد عليها بضيق / وماله بقي طه يا ريم ؟ شاب زي الفل وبيشتغل وبيكسب بعرق جبينه 

نجار ؟ شغال نجار يا بابا ،، بقي انا خريجة اداب لغة عربية اتجوز نجار ؟ 

قالت كدة ريم بسخط وهي بترمي نفسها عالكرسي فرد عليها رجب ابوها  بتنهيدة/ وماله النجار يا ريم ؟ ما ابوكي اهو سواق وبعدين تعالي هنا انتي  باصة  في العالي ليه ،، يعني تتجوزي واحد تعليم عالي وبيشتغل شغلانة حلوة بس ينكد عليكي ويخو*نك وتعيشي تعيسة معاه ولا تتجوزي واحد علي قد حاله بس يشيلك فوق راسه العمر كله ،، فكري بعقلك يا ريم ،، طه يستاهل ست البنات والحارة كلها بتشكر في اخلاقه وانا مصدقتش لما طلب ايدك مني ولو ضيعتيه يا ريم صدقيني هتندمي يا بنتي 

ريم باصرار وهي بتقوم من مكانها/ وانا مش محتاجة افكر يا بابا ،، انا مش موافقة علي طه 

رجب بتعب وهو بيقوم من مكانه / بقي كدة يا ريم ،، مش عايزة تريحي ابوكي يا بنتي ،، بقي دي اخرتها .

ريم بخوف وهي بتقرب من ابوها / بابا حبيبي ،،انت كويس ،، طمني عليك اجيبلك دكتور طيب 

رجب بتعب وهيطو بيحط ايده علي قلبه / لا يا حبيبتي انا كويس هدخل اخد العلاج وهبقي عال اوي ،،المهم انتي تفكري كويس في اللي قولتهولك وربنا يجعله من نصيبك يا ريم يا بنتي ياااارب 

سندت ريم ابوها وساعدته يدخل اوضته وبعدها خرجت وهي محتارة وبتفكر ومش عارفة تعمل ايه ،، هي بتحب ابوها اوي ومش عاوزة تزعله بس في نفس الوقت مش حابة طه جارهم ده ومش موافقة عليه ،، طلعت ،، ريم البلكونة وبصت علي طه اللي ورشته قدامها علطول وشافته وهو شغال ووقتها نفخت بضيق ودخلت تاني بسرعة 

............................................

بعد اسبوع من الاحداث اللي حصل كانت ريم قاعدة في عزا ابوها وهي منهارة من العياط ،،مش متخيلة انه فارقها بسرعة كدة ،،حاسة انها خلاص بقت لوحدها لانه هو اللي كان مالي عليها دنيتها بعد موت امها ،، كانت بتعيط ومش حاسة باللي حواليها ،، كانت بتبص لوشوش ستات الحارة وهي تايهة ومش عارفة هتعيش ازاي ،، عنيها وقفت علي مديحة جارتهم اللي فضلت معاها طول التلات ايام بتوع العزا وكانت واخدة بالها منها وبتعاملها كأنها بنتها ،، دموع ريم نزلت بحزن لما افتكرت ابوها وكلامه عن جوازها من طه اللي يبقي ابن الست مديحة دي اللي لقتها ريم بتقرب منها وبتقولها بحنية/ يلا يا ريم الناس مشيت ،،قومي غيري هدومك يا حبيبتي وريحي شوية 

ريم بحزن وهي بتقوم/ متشكرة يا طنط مديحة

مديحة بحنان وهي بطبطب علي ريم/ حبيبتي متقوليش كدة ،، ده انتي بنتي زي ملك بالظبط 

ريم بخوف / طب ممكن تباتي معايا هنا ،،انا خايفة اوي ابات لوحدي 

مديحة بصت لريم بشفقة وردت بابتسامة/ متخافيش يا حبيبتي ،،مش هسيبك ،، انا معاكي اهو ،، هكلم طه بس اقوله اني هبات معاكي عشان يشطب العزا ويروح هو 

حركت ريم راسها بهدوء وسابت مديحة ودخلت اوضة باباها ووقتها قعدت تفكر فيه وفي اخر كلام بينه وبينها 

...............................................

بعد شهر من اللي حصل كانت ريم بقت احسن وبدأت تفوق لنفسها وكانت مديحة معاها لحظة بلحظة هي وطه ومش سايبينها خالص فكانت قاعدة عالسفرة هي ومديحة بياكلو سوا لحد ما اتكلمت مديحة / هقوم انا بقي يا ريم يا حبيبتي عشان ملك في الجامعة وزمانها علي وصول ولازم اعملها اكل ،،انا قولت اجي اطمن عليكي واكلك عشان عارفة انك مش هتاكلي لوحدك 

ريم بابتسامة وهي بتقوم من مكانها/ متشكرة اوي يا طنط مديحة علي كل اللي عملتيه معايا ،، حقيقي انا ممتنة ليكم اوي 

ردت مديحة بزعل وهي بتبص لرسم بعتاب / اخس عليكي يا ريم ،، هو انتي مش زي بنتي ،، عيب تقولي كدة 

ريم بتوتر وهي بتبص لمديحة بتردد/ طنط مديحة ،،انا كنت عاوزة اقولك علي رسالة ياريت تبلغيها لطه 

مديحة بابتسامة / خير يا ريم ،،قولي يا حبيبتي وعنيا هقوله طبعا 

ريم بحزن وهي بتبص في الارض باحراج/ قوليله لو لسة عند طلبك اللي كنت طلبته من بابا قبل ما يتوفي فانا موافقة  

مديحة بفرحة وهي بتحضن ريم/ بجد يا ريم ؟ ده يوم المني يا حبيبتي والله ،، فرحت قلبي ده انا كنت بدعي ربنا ان يجعلك من نصيب طه 

اكتفت ريم بابتسامة بسيطة من غير ما ترد وهي من جواها مش عارفة هي اخدت القرار الصح ولا لا بس اللي هي متأكدة منه ان ابوها كان هيفرح بموافقتها و هو ده اللي كان عاوزة ،،عشان كدة وافقت 

.............................................

بجد يا امي ؟ ريم وافقت ؟

كان بيتكلم طه بفرحة مسيطرة عليه وكانت متابعاه بفرحة مديحة امه اللي ردت بغمزة/ ايوة يا سيدي ،،هي اللي قالتلي اقولك كدة بالظبط ،، والله البنت غلبانة يا طه ويا حبة عيني وحدانية وانت كمان حنين وراجل اسم الله عليك وهتقدر تحافظ عليها 

طه ابتسم بفرحة بس رجع اتنهد بحيرة وهو بيقعد / انا كنت فقدت الامل اصلا ،، قولت طالما عم رجب الله يرحمه مردش عليا يبقي خلاص بقي ريم مش موافقة 

مديحة بصدمة وهي بتبص لطه/ نعم ؟،، مش موافقة ليه ،،هي تلاقي راجل زيك فين يا حبيبي ،،هو بس الرجل كان تعبان وعشان كدة مقدرش يبلغك بالموافقة وبعدين هي بنفسها اهو اللي قالت انها موافقة يعني لو مش عاوزاك مكنتش جابت سيرة وخلاص 

اتنهد طه براحة بعد كلام امه وقالها بفرحة / عندك حق يا ماما ،، طيب عاوزين نتمم في اقرب وقت ،،كفايا عليها بقي كدة قاعدة لوحدها ،، حاولي اتكلمي معاها يا امي لاني مش عاوز احرجها لانها اكيد هتتكسف مني 

مديحة غمزت لطه بخبث وهي بتقوله بضحك/ وانت بقي عامل علي قعدتها لوحدها برضه ولا مستعجل عشان تبقي مراتك يا ابن بطني 

اتحرج طه وقام بهروب وهو بيقول بثقة مزيفة/ لا طبعا بس يعني قعدتها لوحدها دي غلط عليها لانها هتفضل تفكر كتير ،،انتي كلميها وبعد الاربعين نكتب الكتاب علطول ان شاء الله 

.........................

بارك الله لكما وبارك عليكما وجمع بينكما في خير 

اول ما المأذون قال كدة قام طه بفرحة وقرب من ريم اللي كانت متوترة ومش باين عليها اي رد فعل ولقت طه بيقف قدامها وبيقولها بفرحة وهو بيبتسم ليها / مبروك يا ريم 

ريم بتوتر وهي بتبص حواليها / شكرا  الله يبارك فيك 

شوية والناس مشيو ومكنش باقي غير طه وريم اللي صممت انهم يتجوزو في شقة ابوها وطه محبش يزعلها ،، ريم كانت خايفة ومتوترة ومش عارفة هتقول ايه لطه و اتفاجأت بيه بيقرب منها وبيحض*نها فاتوترت اوي وقلبها دق وخصوصا اما سمعته بيقولها بهمس / تعرفي اني كنت بحلم باليوم ده يا ريم ،، ياما كنت بقعد بالسعات استناكي تنزلي عشان املي عيني منك ولما اشوفك كنت بغض بصري عشان ربنا يكرمني وتبقي ليا 

سكتت ريم ومكنتش عارفة تقول ايه بس ردت بهروب وهي بتبعد عن طه/ احم ،،طه انا كنت عاوزة اقولك اني يعني ،، اقصد انا 

طه ابتسم وقاطعها وهو بيلمس وشها بايديه/ حبيبتي ،،انا عارف انك مكسوفة  ومش عارفة تقولي ايه بس متقلقيش قدامنا العمر كله سوا وانا مش مستعجل عشان اسمع منك الكلام ده ،، يلا تعالي معايا اوضتنا 

ريم باندفاع وهي بتبعد عن طه بسرعة/ ايه ؟ لا مش هينفع ،، اقصد يعني اني هنام في اوضة بابا الله يرحمه ،، اصلي يعني محتاجة شوية وقت وكدة لو سمحت يعني يا طه

طه استغرب بس رد بتلقائية وهو بيبتسم بهدوء/ ولا يهمك يا ريم ،،طيب مش هتاكلي ،،دي ماما عاملالنا اكل حلو اوي 

ريم برفض وهي بتسيب طه وتدخل اوضتها/ لا مش جعانة كل انت بالهنا والشفا ،،تصبح علي خير 

دخلت رسم اوضتها وقفلت الباب ووقف طه يبص لاثرها باستغراب وقلق وبعدين هو كمان دخل اوضته 

............................................

عدي اسبوع علي الاحداث اللي حصلت كانت فيها ريم بعيده عن طه وكل ما يحاول يقرب منها كانت بتتهرب منه بس قايمة بكل واجباتها معاه زي الاكل والشرب لكن دايما قافلة علي نفسها ومش بتكلمه كتير ،، كان داخل طه من باب الشقة وريم كانت وقتها خارجة من الحمام فشهقت بخضة اول ما شافته لانها كانت بشعرها فكانت هتدخل اوضتها بسرعة بس وقفها طه لما شدها من ايديها عليه فاتوترت وقلبها دق وردت بتهتهة / طه ،،ممكن تسيبني لو سمحت انا 

طه بتوهان وهو مركز في عيون ريم/ انتي ليه بتبعدي عني ،،ريم انتي مش بتحبيني،، طب ليه بتهربي مني 

ريم بلعت ريقها بخجل وردت بتردد/ طه مينفعش كدة ،،انت بتقول ايه بس ،،انا قولتلك اني محتاجة وقت و

طه بحيرة وهو بيسيب ريم تبعد عنه/ وانا سيبتك يا ريم براحتك كتير اوي بس مش لدرجة انك مش عاوزة تقعدي قدامي بشعرك ،،انتي ناسية انك مراتي ؟

ريم اتنهدت بحيرة ومكنتش عارفة تقول ايه لطه وده لانها عارفة اانه ملوش ذنب بس هي كمان بتفكر انها مالهاش ذنب لانها مش بتحبه ووقتها انتبهت لصوت طه اللي فهم كل حاجة واتكلم بجدية/ تمام يا ريم ،، انا كدة فهمت كل حاجة 

دخل طه اوضته ووقف ريم حزينة اوي وغمضت عنيها بحيرة 

................................................

بعد فترة كانت واقفة ريم في مطبخ مديحة حماتها وكانت بتساعد ملك في عمايل الاكل وكانت ريم بتق*طع السلطة وبتحكي لملك كل حاجة من وقت ما ابوها اتوفي وده لانها حبتها اوي واعتبرتها صحبتها وقربو من بعض اوي وردت عليها ملك بحزن/ طب وطه عمل ايه من بعد اخر مرة اتكلمتو فيها يا ريم 

ريم اتنهدت بحيرة وردت / ماهي دي المشكلة ،، طه اتغير يا ملك ،، بقي معاملته ليا مش زي الاول ،،دايما ساكت وحتي مبقاش ياكل ،، لو اتكلم معايا بيبقي يدوب عشان يعرف ناقصني حاجة ولا لا 

ردت ملك بشفقة علي اخوها وهي بتبص لريم بعتاب / بصراحة هو حقه يا ريم ،، اي راجل مكانه لو حصل معاه كدة هيحس ان كرامته مجروحة،، عارفة يعني ايه راجل يحس ان مراته متجوزاه غصب وانها مش قابلاه ،، طه ملوش ذنب انك اتجوزتيه عشان تنفذي وصية ابوكي وبس 

ريم بتأنيب ضمير وهي بتبص بعيد  / انا عارفة انه ملوش ذنب وعارفة اني جر*حته وانه ميستاهلش كل ده مني بس انا غصب عني ،، مش بايدي اني احبه،،دايما حاسة اني اتجبر عليا اكون معاه 

كانت ملك هترد بس قاطعتها مديحة اللي دخلت عليهم / ها يا بنات خلصتو الاكل ،،طه زمانه علي وصول 

ردت ملك بسرعة وهي بتقلب الاكل / اه يا ماما كله تمام اوي ،، صحيح 

ندي صحبتي جاية تتغدي معانا ،،اصلا عزمت نفسها اول لما عرفت ان طه جاي 

كلام ملك لفت انتباه ريم فبصت ليها باستغراب وبعدين انتبهت لكلام مديحة وهي بترد بضحك/  طبعا ليها حق واحشها مناقرتها مع طه بقالها كتير مشفتوش كمان يلا خلصو طيب  وانا هطلع اجهز السفرة 

خرجت مديحة وريم وقفت تبص للفراغ وهي بتفكر في كلامها مع ملك ومتعرفش ليه كانت مضايقة 

........................................

دخل طه من باب الشقة بعد ما فتحت ليه ملك وسلم عليها وريم كانت متابعاه وهو بيضحك وبيهزر معاها وكانت اول مرة تشوف طه بيعمل كدة ويضحك ويهزر مع حد وخصوصا بنت ؟ واتفاجأت بيه بيقرب منها وبيبوس راسها قدامهم وكأن مفيش حاجة حصلت وبيقولها بحب / حبيبتي ،، عاملة ايه انهارده 

ابتسمت ريم وردت بفرحة وهي بتبص لطه/الحمدلله ،،انت اتأخرت ليه ،،كان في شغل ذيادة ولا ايه 

رد طه بتلقائية وهو بيقعد جمب امه وقدام ريم /  اه انهاردة كان في طلبية ولازم اخلصها 

حركت ريم راسها بايجاب ووقتها جرس الباب رن  فاتكلمت ملك بحماس وهي بتقوم / حذر فذر مين اللي عالباب بقي 

طه بابتسامة وهو بيبص لملك بثقة/ هو في غيرها ،،اكيد ام لسانين 

ضحكت ملك وراحت فتحت الباب ووقتها دخلت ندي وهي بتقول بصوت عالي / يا هلا يا اهل الدار ،،اكيد وحشتكم صح ؟ خصوصا انت يا طه انا عارفة 

ضحكت مديحة وبصت لطه اللي قام وسلم علي ندي وهو بيقول بابتسامة/ اهلا  يا ام لسانين ،،انا قولت برضه مفيش حد بيعمل دوشة غيرك 

كانت ريم قاعدة وشها احمر من الغيظ وهي شايفة طه بيتكلم مع ندي وبيضحك وبيهزر معاها فكانت ساكتة خالص وبصالهم بجمود لحد ما اتفاجأت بندي ب......