رواية صديق عمري الفصل الاول1 بقلم اسراء ابراهيم

عارف يا سيف انت بجد احسن صديق ليا انا مش عارفة انت ازاي قريب مني كدة 

سيف بابتسامة/ يمكن عشان ابن عمك مثلا ولا عشان احنا صحاب من واحنا عيال 

مريم بابتسامة واسعة وغرور مصطنع/ يابني لا كدة ولا كدة  ده عشان انا صاحبة جامدة جدااا ، ها قولي بقي مرات عمي عاملة اكل ايه انهاردة اصلي جعانة اوي وامي عاملة سبانخ وانا مبحبهاش 

سيف بثقة / لا متتعبيش نفسك دول كانو بيتسوقو مع بعض من السوق يعني امي عاملة نفس الاكل 

مريم بضحك / احسن فرحانة فيك ،، عشان انت كمان مبتحبهاش،، احم بقولك صحيح ايه رايك في شكلي انهاردة؟ 

سيف باهتمام / طبعا قمر،، انتي يا بنتي قمر بكل حالتك،، يابخته اللي احنا من بخته والله

مريم بابتسامة / فعلا يا بخته يا سيف 

كانت باصة مريم لسيف باهتمام وكانت في كل لحظة مستنية سيف يعترفلها بحبه ،،  كانت بتتمني ان سيف ابن عمها و صاحب عمرها يكون كمان حبيبها وجوزها بس للاسف سيف كانت معاملته دايما ناحيتها انها اخته وصديقة عمره مش اكتر 

سيف بسرعة/ يا خبر انا اتاخرت اوي،، يلا بينا نروح،، اصلي عندي مشوار مهم لازم اروحه 

مريم بتكشيرة/ نعم بقي،، انت بتهزر،، دي الخروجة دي مستنياها بقالي شهر بسبب شغلك الرخم ده،،  دلوقتي عاوز تقلبني عشان مشوارك ،، هو اهم مني يا سيف؟ 

سيف باهتمام / لا طبعا،، مفيش حاجة اهم منك يا مريومة بس ده يعني مشوار كدة تقدري تقولي شخصي اوووي،،ولازم اروحه بس اوعدك هعوضهالك  

مريم بشك / شخصي اوي؟ ومن امتي بقي الكلام ده يا سي سيف،،  اتفضل قولي حالا رايح فين هه 

سيف بتنهيدة / انا عارف انك زنانة ومش هتسكتي الا لما تعرفي،،عموما يا ستي ده مشوار عاطفي،، اصل بصراحة كدة في بنت معجب بيها اوي،، بشوفها كل يوم وانا راجع من الشغل بتخرج من عيادة جمبي كدة شكلها بتشتغل فيها وناوي انهاردة اتجرأ واتكلم معاها،، ها ارتحتي كدة بقي؟ 

مريم بحزن/ اه ارتحت،،  يلا عشان متتأخرش طيب 

سيف باستغراب / مالك في ايه؟  شكلك اتغير ليه فجأة كدة؟ 

مريم بهدوء/ لا مفيش،، انا بقولك يلا اهو عشان متتاخرش علي معادك 

سيف باصرار / لا طبعا فيه،،هو انا مش عارفك يا مريم،، ما تقولي في ايه علطول مرة واحدة في حياتك،،مش لازم اقعد سنتين اسألك عشان تجاوبي 

مريم بضيق وهي بتمشي / قولتلك مفيش يا سيف،، لو سمحت بطل بقي طريقتك دي 

سيف وهو بيمسك ايد مريم عشان يلحقها / استني بس،، ده الموضوع كبير،،  انتي زعلتي عشان خبيت عليكي يعني؟  انا اسف يا مريم مقصدش، انا بس يعني مكنتش واخد للموضوع اهمية اوي فعشان كدة مقولتلكيش 

مريم بتنهيدة/ تمام يا سيف وانا مش زعلانة ،،  يلا بقي عشان هتأخر انا كمان علي ماما 

سيف باستغراب/ تمام يا مريم.،، بس انا عارف انك لسة زعلانة 

مريم مردتش علي سيف وكانت ماشية معاه وحاسة انها في عالم تاني،، كانها فاقت من حلمها علي واقع صعب اوي تتقبله وعشان كدة مقدرتش تتكلم او حتي تعترض لانها كانت عارفة ان سيف من الاول مش بيحبها   بس هي اللي كانت معشمة نفسها بوهم 

................................. 

بليل كانت قاعدة مريم سرحانة والدموع بتلمع في عنيها ووقتها دخلت عليها نسرين امها اللي كانت مستغربة حالتها 

نسرين بقلق / مالك يا مريم؟ فيكي.ايه يا حبيبتي،،من وقت ما جيتي من برة وانتي قاقلة علي نفسك،،حتي الاكل مرضتيش تاكلي،،فهميني في ايه؟ 

مريم بكدب / مفيش يا ماما،،ما انتي عارفة اني مبحبش السبانخ لكن عادي يعني مفيش حاجة 

نسرين بشك/ عليا برضه؟ الموضوع مش حكاية الاكل والسبانخ لا،، في حاجة تانية يا بنت بطني،، ها قوليلي،، من امتي وانتي بتخبي عليا 

مريم بتنهيدة/ يا ماما قولتلك مفيش،، انا بس تعبانة شوية وحاسة بصداع من الصبح،،حتي مكملتش الخروجة وخليت سيف يروحني 

نسرين بقلق /سلامتك يا حيبتي،، مكنتش اعرف انك تعبانة،، انا قولت انك اتخاقتي مع سيف عشان كدة رجعتي بدري 

مريم بجدية/ لا يا حبيبتي متقلقيش،،  مفيش حاجة،،  ده شوية صداع بس عموما هبقي كويسة متقلقيش 

قطع كلامهم جرس الباب فقامت نسرين تفتح ووقتها مريم غمضت عنيها بحزن بس فتحت تاني علي صوت سيف اللي بيخب*ط علي باب اوضتها 

سيف بصوت عالي / بت يا مريم افتحي،، عاملك مفاجئة

مريم قامت فتحت واتفاجأت بسيف وهو بيديها علبة بيتزا كبيرة 

مريم بصدمة / ايه ده؟ انت جبت بيتزا؟ 

سيف بابتسامة / طبعا وانا اقدر اسيبك برضه تاكلي السبانخ بتاعة مرات عمي 

نسرين بضحك/ اخس عليك وانا اكلي وحش يا واد انت؟ 

سيف بسرعة/ لا يا مرات عمي انتي في زي اكلك برضه بس انتي عارفة مريم غالية عندي وانا بصراحة قولت مينفعش اسيبها تاكل اكلة مش بتحبها 

نسرين بابتسامة/ جدع يا واد يا سيف،، عقبال ما نفرح بيكو بقي يارب 

مريم قلبها دق. وبصت لسيف اللي رد بتلقائية علي امها / قريب يا مرات عمي هتفرحي بيا ومريم بقي ادعيلها احسن بلسانها المترين ده معتقدش حد هيعبرها 

مريم اتاكدت ان سيف عمره ما هيفكر فيها غير اخته ووقتها بان عليها الحزن وكانت متابعاها نسرين باهتمام وكانها كانت شاكة بس اتاكدت وزعلت اوي لما اتأكدت ان مريم  بتحب سيف وهو مش بيحبها

نسرين بابتسامة / بس يا واد انت،، دي مريم دي ست البنات وبكرة يجي اللي يقدرها ويحميها ويحبها ويستاهلها كمان 

سيف بتأكيد/ مريم دي مفيش زيها يا مرات عمي وانا متأكد ان اللي هياخدها هيبقي محظوظ 

مريم بحزن/ انا تعبانة وعاوزة انام،،بعد اذنكم 

سيف استغرب وبص لنسرين اللي ابتسمت وحاولت تغير الموضوع 

نسرين بابتسامة / قولي بقي،، انت قولت قريب هفرح بيك،، مين هي بقي سعيدة الحظ

سيف بابتسامة / دي اسمها مني،، شغلها جمب الشغل بتاعي وكنت بشوفها كدة صدف وهي خارجة بس اعجبت بيها وكلمتها وقريب هخطبها يا مرات عمي ادعيلي 

نسرين بحزن  / ربنا يجعلها من نصيبك يابني لو فعلا بتحبها،، ويهدي ابوك ويوافق احسن دماغه صعبة ربنا يهديه 

سيف بتنهيدة / عندك حق يا مرات عمي،،  بس انا هحاول وان شاء الله خير 

.............................. 

ومالها مريم بنت عمك بقي عشان تروح تتجوز واحدة منعرفهاش؟ اومال رايحين جايين مع بعض وصحاب ومش عارف ايه وفي الاخر تقولي اتجوز واحدة تانية؟ 

كان بيتكلم عزت بعصبية وهو قاعد وباصص لسيف بغضب وسيف وقتها كان مصدوم ورد بتلقائية / عشان مريم اختي يا بابا،، احنا اتربينا سوا وانا عمري ما بصتلها غير اختي،،  فمينفعش اصلا افكر فيها غير كدة 

عزت بضيق / والله عشان انت اللي كنت بتقنع نفسك بده لكن مريم مش اختك،،دي بنت عمك وبعدين مش يمكن هي بتحبك وانت اللي غب*ي مش عارف 

سيف باستغراب / ايه؟  لا طبعا،،  مريم لا يمكن تفكر فيا كدة،، لاني بالنسبالها اخوها وصديقها مش اكتر،،حضرتك بس اللي فاهم غلط 

عزت بثقة/ خلاص نبقي نسألها،، والرأي رأيها بس يا سيف لو مريم وافقت يبقي تنسي البنت دي نهائي انت فاهم؟ 

سيف بثقة/ انا متاكد ان مريم مش هتوافق لانها مش شايفاني غير اخوها وصديقها وبس ومع ذلك انا موافق يا بابا ان حضرتك تسألها بس لو رفضت توعدني اني اتمم جوازي من البنت اللي اختارتها 

عزت بغموض / ولو مريم وافقت هتوعدني انك تتمم جوازك منها وتنسي البنت دي نهائي

سيف رد بثقة لانه متأكد ان مريم مش بتحبه وانها هترفض اصلا / موافق يا بابا 

.................................... 

تاني يوم كانت مريم بتعمل هي الاكل لما الباب خب*ط ففتحت نسرين الباب واتفأجات بعزت اخو جوزها ومعاه ماجدة مراته وتبقي ام سيف

نسرين بابتسامة / اهلا يا حج عزت،، اتفضلو ،، ده ايه النور ده 

عزت بابتسامة / بنورك يا ام مريم،، تعالي يا ماجدة 

نسرين بابتسامة / ايه يا ام سيف ياختي،، مش كنتي تقوليلي عشان نعمل واجب حلو كدة 

عزت بهدوء/ ملوش لزوم نتعبك يا ام مريم،،  احنا كنا جايين كدة شوية وهنمشي والواجب كدة كدة قريب هيتعمل 

نسرين باستغراب / اه طبعا،، نورتو والله،،  يا مريم تعالي سلمي علي عمك ومرات عمك 

خرجت مريم من المطبخ وهي باين عليها الحزن وقربت من عمها وسلمت عليهم 

سيف بابتسامة / بصي بقي يا ست العرايس،، احنا جايين انهاردة عشانك 

مريم باستغراب / خير يا عمي ،، في حاجة 

عزت بتلقائية/ خير يا بنتي،،  احنا بعتنا سيف ابني انهاردة عشان نطلب ايدك ليه ايه رأيك؟ 

مريم بصدمة وقلبها بيدق / ايه؟ سيف؟ حضرتك متأكد يا عمي؟

عزت بتلقائية/ طبعا،، اومال هنطلع نخطبك ليه كدة من غير ما يعرف ،، هو بعتنا نعرف رأيك عشان يعني محرج منك،،فانتي قوليلنا رأيك من غير كسوف يا بنتي 

مريم بصت لامها اللي ابتسمت ليها لانها عارفة انها بتحب سيف بس مريم كانت محتارة ومش فاهمة حاجة،، ازاي سيف اتقدملها وهو كان لسة قايل ليها انه بيحب بنت تانية وانه مش شايفها اصلا،،  وكانت بتكلم نفسها انه ممكن يكون حس بالغيرة من كلام امها امبارح معاه وعرف انه بيحبها هي بس خاف يواجهها؟ خرجت من شرودها علي صوت عمها اللي كان بيبصلها بفضول

عزت بفضول / ها يا مريم،،رأيك ايه يا بنتي؟ 

مريم بتردد/ مش عارفة يا عمي ،، بس يعني ممكن اتكلم مع سيف الاول 

عزت باستغراب / ليه بقي ما الراجل هو اللي باعتنا ليكي اهو نعرف رأيك،، ولا يعني احنا مش عاجبينك 

نسرين بتفكير/ لا طبعا العفو يا حج عزت،، البنت بس مكسوفة شوية،، وانت يعني  عارف البنات،، وبعدين السكوت علامة الرضا اهو مش محتاجة سؤال 

مريم بصا لامها بعتاب وكانت هتعترض بسرعة علي كلامها ونسرين كانت متأكدة انها عملت الصح واللي لازم يحصل ووقتها عزت قام بفرحة هو وماجدة مرات عمها 

عزت بفرحة/ انا قولت كدة برضه،،  الف مبروك يا حبيبتي ،، استنونا بليل ان شاء الله هنطلع نطلب ايديك رسمي ونتفق علي كل حاجة،،  يلا يا ماجدة

مشي عزت ومراته واول ما قفلت نسرين الباب اتكلمت مريم بعتاب / ليه كدة بس يا ماما،، حرام عليكي،، ليه تعملي كدة،، انا كنت هرفض 

نسرين بابتسامة / وترفضي ليه بس ،، ماهما جم لحد عندك اهو،، وانا عارفة انك بتحبي سيف من زمان،،يبقي ليه لا بس 

مريم بحزن/ عشان سيف بيحب حد تاني 

نسرين بكدب/ انتي هبلة يا بت وهو لو بيحب حد تاني كان قال لابوه وامه يطلعو يطلبو ايديكي

مريم بحيرة/ ولو فعلا كدة مطلعش هو معاهم ليه؟  امي اكيد في حاجة غلط 

نسرين باقناع / ولا غلط ولا حاجة،،  اكيد هو عرف قيمتك بعد كلامنا اخر مرة وعشان كدة قال ميضيعكيش من ايديه بس كان خايف من رد فعلك وعشان كدة بعت ابوه وامه الاول 

مريم بتنهيدة/ يارب يا ماما يطلع فعلا كدة،،  ده يبقي حلم عمري اتحقق 

نسرين بحنان وهي عقلها مشغول / ان شاء الله هو كدة يا حبيبتي وهتشوفي 

........................ 

دخل عزت شقته وكان سيف قاعد بيتفرج عالتلفزيون بهدوء وثقة لانه متأكد ان مريم اكيد رفضت بس اتفاجأ بماجدة بتزغرط

ماجدة بفرحة/ الف مبروك يا حبيبي،، مريم وافقت 

سيف بانفعال وصدمة / نععععم،،  يعني ايه وافقت انا مش فاهم حاجة،، اكيد في حاجة غلط 

عزت بثقة/ يعني وافقت اهو،،  مش قولتلك البت شكلها بتحبك وبتموت فيك وانت اللي غب*ي وكنت هتضيعها من ايديك 

سيف بغضب / لا طبعا،، مستحيل انا متأكد ان حضرتك ضغطت عليها،، انا طالع ليها دلوقتي افهم الحقيقة

عزت بغضب / انت رايح فين ،، لو فكرت تعمل كدة انا هبقي غضبان عليك انت فاهم،، ايه ضغطت عليها ده،، هو انا هجوزهالك عافية،، البنت سألناها وقالت موافقة يبقي خلاص 

سيف مكنش مصدق وقعد بصدمة وهو بيفكر هيعمل ايه بس وقتها كمل عزت كلامه بجدية / اعمل حسابك هنطلع بكرة نخطب بنت عمك ونحدد كتب الكتاب اخر الاسبوع والفرح يبقي بعد امتحانات الكلية بتاعتها 

سكت سيف ومردش علي ابوه وكان كل تفكيره انه يطلع لمريم ويعرف ايه اللي حصل 

............................ 

تاني يوم كانو قاعدين كلهم عند مريم في شقتها وكانت مريم بتبص لسيف بخجل بس هو كانت نظراته جامدة 

عزت بابتسامة /طبعا انتي عارفة اننا جايين نطلب ايد مريم يا ام مريم فقوليلنا طلباتك 

نسرين بفرحة/ طلبات ايه بس يا عم عزت،،  اهم حاجة انه يحافظ علي بنتي دي بنتي الوحيدة 

ماجدة بفرحة / وده كلام برضه يا نسرين،،  دي في عنينا كلنا،، مريم مش هتبقي مرات ابني بس،،دي بنتي 

نسرين بابتسامة/ ده العشم يا حبيبتي والله ،، واحنا كمان هنلاقي احسن من سيف فين،، ده ابني هو كمان 

عزت بابتسامة/ تمام علي بركة الله،،نقرا الفاتحة بقي 

قرو كلهم الفاتحة وسيف كانت عنيه علي مريم وبيبصلها بغضب لانها ساكتة وواضح انه كان فاهم غلط وانها عاجبها الموضوع واول ما خلصو وزغرطت نسرين قام سيف وقرب من مريم واخدها من ايديها وسحبها وراه للبلكونة وكانت متابعاهم ماجدة بفرحة وعزت بغموض،،  اما عند مريم فاتفاجات بسيف اول ما دخلو البلكونة بيسيب ايديها بغضب وهو بيبصلها وبيتكلم 

سيف بحد*ة/ ممكن افهم ايه اللي بيحصل دلوقتي؟  شايفك ساكتة وكمان بابا يقولي انك وافقتي،،  ازاي وانتي عارفة اني مبحبكيش واني بحب بنت تانية 

مريم عنيها دمعت واتأكدت من شكوكها ومكنتش عارفة تقول ايه وتبرر بإيه موقفها 

مريم بتردد/ انا مقدرتش اقول حاجة يا سيف،،  انت عارف باباك 

سيف بغضب/ يعني ايه؟ هو مش طلع وسألك؟ ليه وافقتي 

نسرين من ورا سيف / عشان انا السبب يا سيف،، مريم مالهاش دعوة،، انا اللي قولت لابوك انها موافقة 

سيف باستغراب / انا مش فاهم؟  ليه يا مرات عمي ،، ما انتي عارفة اني بحب بنت تانية؟ 

مريم بصت لامها بخوف احسن تقوله عليها وانها بتحبه بس اتفاجأت بكلام 

امها 

نسرين بهدوء/ عشان انا تعبانة يا سيف ومش هطمن علي مريم غير معاك 

مريم بصدمة / ماما،، انتي بتقولي ايه؟  بجد انتي تعبانة؟ 

نسرين بابتسامة/ حبيبتي متخافيش،، انا هبقي كويسة بس لازم اطمن عليكي 

مريم اترمت في حضن امها وبقت تعيط وكان متابعهم سيف بصدمة ومش متخيل ان مريم ممكن تتحرم من امها اللي مالهاش غيرها

سيف بعتاب/ ليه خبيتي يا مرات عمي،، ليه مقولتيش عشان نقف جمبك 

نسرين بابتسامة/ تقف جمبي لما تحافظ علي بنتي يا سيف ،، اوعي في يوم تجر*حها وانتي يا مريم عاوزاكي تهدي،، انا جمبك اهو،، وبعدين ده امر ربنا محدش يقدر يعترض فالحمد لله 

مريم بانهيار/ انتي هتتعالجي وهتبقي كويسة 

نسرين بحب/ ودي محتاجة كلام برضه،، انا اصلا بتعالج يا حبيبتي عشانك والله 

مريم بحب/ ربنا يخليكي ليا يا امي 

سيف بهدوء/  امسحي دموعك يا مريم ويلا عشان نحدد كتب الكتاب 

مريم بصت لسيف بحزن لانها متاكدة انه هيعمل كدة ويتجوزها عشان صعبت عليه بسبب مرض امها فسكتت ومقدرتش تتكلم،، اما نسرين فحمدت ربنا ان حلمها هيتحقق وانها هتطمن علي مريم

......................... 

بارك الله لكما وبارك عليكما وجمع بينكما في خير 

ماجدة بفرحة / لولولوي،، الف مبروك يا حبايبي،،  ربنا يسعدكم 

مريم ببهتان/ شكرا يا مرات عمي ربنا يخليكي لينا 

نسرين بفرحة/ يلا يا حبايبي انا محضرالكم قاعدة في البلكونة انما ايه رومانسية اخر حاجة 

قام سيف وقرب من مريم ومسك ايدها فبصتله وكان نفسها لو يكون مشاعره ناحيتها نفس مشاعرها ناحيته بس للاسف،،  دخلت معاه البلكونة وكانت نسرين محضرالهم قاعدة بشموع وكان الجو حلو اوي فقعدت مريم هي وسيف اللي قعد قدامها بس كان باصص بعيد بشرود 

مريم بحزن/ انا اسفة يا سيف،،  عارفة انك اتجوزتني غصب عنك بس صدقني انا مليش ذنب 

سيف بتنهيدة/ ايه الكلام الغريب ده بس يا مريم،،  مين قالك اني اتجوزتك غصب عني ،، انا اتجوزتك بارادتي وانا عارف بعمل ايه كويس 

مريم بحزن/ عشان تاخد بالك مني زي ما وصتك ماما،، انا عارفة وصدقني مقدرة اوي اللي عملته عشاني وعشان كدة بقولك اتجوزها يا سيف ،، البنت اللي انت بتحبها اتجوزها 

سيف بتكشيرة / مريم انتي بتقولي ايه؟ اكيد لا،، خلاص كل شئ نصيب وهي هتروح لنصيبها

مريم بلهفة/ ليه لا،،  انت بس روحلها وفهمها الوضع او اقولك،، خليني اروح اتكلم معاها وانا متأكدة اني هقنعها وهي هتفهمني 

سيف برفض/ وانا عمري ما هخليكي تعملي كدة ابدا،،  انسي يا مريم،،  خلاص كل شيئ نصيب 

مريم كانت حاسة بخنقة لانها السبب في تعاسة سيف وانه ميستاهلش انه يربط نفسه بيها وهو قلبه مع واحدة تانية وعشان كدة قررت تتصرف،، المهم انه يكون سعيد..... 

يتبع