رواية طفله ولكنى عشقتها الفصل الاول1 بقلم اسراء ابراهيم
يا ماما بقولك الشقة دي و*حشة اوي ،، احنا هنفضل عايشين فيها علطول ؟
صبرين بتنهيدة / متتعبيش قلبي معاكي يا رؤي ،، الشقة مش و*حشة اوي يعني وبعدين انتي بس عاملة علي اننا اغراب لسة اكمننا لسة ناقلين من كام يوم
رؤي بحزن/ بس انا مش عاجبني الناس اللي هنا ،، انا عاوزة ارجع بيتنا اللي في بلدنا هناك عشان صحابي انا هنا معرفش حد
صبرين بتحذير / اوعي يا رؤي تجيبي سيرة البلد هناك اوعييي ،، احنا مش عاوزين حد يعرفنا ولا نعرف حد ،، رؤي لو بتحبيني بجد اوعي تقولي لحد علي مكانا ولا تتكلمي مع حد غريب ومتقلقيش هنا في مدرسة ثانوي حلوة اوي هقدملك فيها وانسي البلد واللي فيها احنا هنا هنرتاح اكتر
رؤي بطاعة/ حاضر يا ماما ،، بس انتي لسه مش عاوزة تقوليلي احنا مشينا ليه من هناك ؟ انا عاوزة اعرف ليه مشينا فجأة وبليل كمان ؟
صبرين بقلة حيلة / بصي يا رؤي ،،انتي دلوقتي كبرتي وتقدري تفهمي كل حاجة ،،احنا هناك مكناش هنعيش زي ما احنا عايشين هنا ،،اديكي شوفتي اللي كان بيحصلنا هناك من ابوكي وعمك ومراته ،، وهنا احسن عشان كدة بقولك انسي كل القديم وابدئي من جديد
رؤي بطاعة وهي مخنوقة / حاضر يا ماما
.............................
بعد كام يوم كانت نازلة رؤي من البيت ورايحة المدرسة اللي امها قدمت ليها فيها فكان باين عليها انها مضايقة اوي لحد ما انتبهت لصوت بينادي عليها فبصت وراها باستغراب وشافت شاب غريب اول مرة تعرفه
رؤي باستغراب / حضرتك بتكلمني انا ؟
زين بابتسامة / ايوة كنت بقولك القلم ده وقع منك
رؤي بابتسامة / شكرا لحضرتك ،، بعد اذنك
زين بسرعة/ هو انتي جديدة هنا ؟ اصلي انا جارك هنا في البيت اللي هناك ده
رؤي بتردد/ ايوة بعد اذنك بقي عشان متأخرة
مشيت رؤي وكان متابعها بعنيه يحي اللي كان شايفها من بعيد بتتكلم مع زين وهو قاعد في ورشته وبعدين كمل شغل بلا مبالاه وشوية وجاله تليفون
يحي بابتسامة وهو بيرد/ ست الكل اخبارك ايه ؟
زينب بابتسامة / بخير يا حبيبي ،، ايه انت نزلت فتحت بدري ليه ؟ مش قولت هتتأخر شوية ؟
يحي بابتسامة / بصراحة كان عندي شغل كتير ولازم اسلمه في معاده بس متقلقيش هاجي عالغدا
زينب بحماس/ كويس عشان عندنا ضيوف وعاوزاك تتعرف عليهم
يحي باستغراب / ضيوف مين ؟ خير بس مش بعادة يجيلنا ضيوف
زينب بضحك/ ايوة علطول مقطو*عين كدة ولوحدنا بس الحمد لله جالنا جيران جداد ومش عاوزة اقولك بقي طيبين ازاي وغلابة اوي ،،المهم انت بس متتأخرش
يحي بابتسامة / حاضر يا ست الكل متقلقيش ،، هاجي في المعاد علطول
قفلت زينب وقامت بسرعة تحضر الاكل اللي هتعمله
..........................................
خلصت رؤي اليوم بتاعها وروحت عالبيت علطول واول ما دخلت نادت علي امها بصوت عالي ووقتها خرجت صبرين علي صوتها
صبرين بابتسامة / اهلا يا حبيبتي ،،طمنيني اخبار اول يوم مدرسة ايه ؟ يارب يكون كويس
رؤي بغرور مصطنع/ عيب عليكي يا ست الكل ما انتي عارفاني اني عشرية وبتعرف عالناس بسرعة ،، عاوزة اقولك اني اتعرفت علي نص المدرسة
صبرين بفرحة/ انا اللي مفرحني انك بدأتي تتعودي عالناس هنا وكدة احسن
رؤي بضيق / متفكرنيش يا ماما والنبي احسن انا افتكرت انهاردة في المدرسة صحابي القدام وفضلت اعيط زي العيال الصغيرة ،، وكملت رؤي كلامها بحماس ،، صحيح نسيت اقولك اني اتعرفت علي بنت اسمها ضحي طلعت ساكنة معانا هنا في الشارع وشكلنا هنبقي اصحاب اوووي
صبرين بابتسامة / جدعة يا رؤي ربنا يسعدك يا حبيبتي ،،صحيح نسيت اقولك اننا معزومين عند جيرانا اللي في وشنا ،، اسمها زينب وعندها ابن اسمه يحي بس اي مش عاوزة اقولك ست تتحط عالجر*ح يطيب اه والله ،، المهم بقي يلا غيري بسرعة ويلا عشان نروحلها ونلحق نعمل معاها اي حاجة
رؤي بحماس وهي بتجري علي اوضتها/ ايوة كدة يا ام رؤي،، انتي كمان بقي ليكي صحاب هنا ،، حالا وهكون جاهزة
ضحكت صبرين علي كلام رؤي وفرحت انها بدأت تتقبل عيشتها الجديدة وبقت تدعي انهم يفضلو عايشين كدة بعيد عن كل حاجة و*حشة
..........................................
كانت قاعدة زينب مبتسمة وهي بتتكلم مع صبرين ورؤي اللي جم من شوية / اهلا يا ام رؤي ده انتي نورتي والله
صبرين بابتسامة / تسلمي يا ام يحي ده بنورك يا حبييتي ،،والله مكنش ليه لزوم تتعبي نفسك
زينب بود / لا طبعا متقوليش كدة يا صبرين ،،ده احنا شكلنا هنبقي اكتر من اخوات ،،وكملت زينب كلامها وهي بتشاور علي رؤي ،، دي بقي رؤي مش كدة؟
رؤي بسرعة وحماس/ ايوة هي بشحمها ولح*مها ،،ازيك يا طنط يا صاحبة ماما يا قمر انتي
صبرين بقلة حيلة / بت يارؤي عيب كدة
زينب بابتسامة / سيبيها يا صبرين ،،دي قمر وشكلي كدة هحبها ،، دي عشرية وتتحب والله
رؤي بابتسامة /تسلميلي يارب يا طنط زينب ،، قوليلي بقي فاضل ايه عشان اعمله انا ؟
زينب بفرحة / فاضل الملوخية ،، يلا وريني شطارتك
رؤي بثقة / لا الملوخية دي لعبتي يا طنط لا تقلقي
صبرين بضحك/ ربنا يستر يا صبرين ،،انتي وحظك عشان بنتي اوقات تعملها حلو و اوقات تطلع استغفر الله
زينب بابتسامة / لا انا متأكدة انها هتطلع زي العسل من ايد رؤي طالما هي اللي هتعملها
رؤي قامت بحماس بس وقتها جه يحي اللي خب*ط عالباب وفتح الباب ودخل عليهم واول ما شاف رؤي استغرب لانه فهم انها نفس البنت الغريبة اللي شافها واقفة بتكلم زين جارهم فاضايق لانها طلعت هما جيرانه الجداد بس مبينش
يحي بابتسامة / السلام عليكم
صبرين بابتسامة / عليكم السلام ورحمة الله وبركاته ،، اكيد انت يحي بقي
يحي بابتسامة / ايوة انا يا طنط ،، اخبار حضرتك ايه ،،نورتي المنطقة كلها
صبرين بود/ تسلم وتعيش يا حبيبي ،، دي منورة بوجودكم انت والست والدتك العسل دي
يحي بهدوء / طب بعد اذنكم هغير هدومي واجي علطول
رؤي بتكشيرة/ ايه ده هو انا اتمنتچت ليه ؟ هو انا صورة ؟ ولا مش شايفني يعني
صبرين بضيق واحراج/ رؤي عيب كدة ،، ايه اللي بتقوليه ده
رؤي بضيق / يا ماما ده متعمد يتجاهلني ،،ده انا لو مرات ابوه مش هيعمل كدة ،، يكونش قت*لاله قت*يل
يحي ببرود وكأنه مش سامعها / ماما استأذنك تيجي دقيقة عاوزك
قامت زينب بتوتر ووقتها صبرين زقت رؤي بغضب
صبرين بحد*ة /ينفع تجيبيلي الكلام يا هانم ؟ ايه يا رؤي ،،عاوزاهم يقوله اني معرفتش اربي ؟ ليه يا بنتي كدة
رؤي بسرعة/ انا اسفة يا ماما ،،بس انتي عارفاني وعارفة اني مبعرفش اسكت ولا اعدي وبعدين هو ليه يتجاهلني كدة ؟
صبرين بعصبية خفيفة/ تلاقيه محرج وبعدين قال اكيد انتي بنت وهتتكسفي ميعرفش انك لسانك مترين ،، اتفضلي قدامي عالبيت الله يسامحك كسفتيني
رؤي بتزمر / يووه ،،طب والملوخية طيب
صبرين بصدمة وغضب / ملوخية ؟،،اما انتي بت معندكيش د*م صحيح
زينب بلهفة وهي بتقرب عليهم / استني بس يا صبرين رايحة فين ؟
صبرين باحراج / معلش يا زينب ياختي ،،اصلي في حجات نسيتها ولازم الحق اخلصها ،،ان شاء الله تتعوض مرة تانية ،، سلميلنا بقي علي يحي
زينب باصرار / لا والله ما يحصل ،،اصلا يحي قالي انه جاله شغل فاعتذر ومشي يعني مفيش حد غيرنا ،،ايه هتسيبوني اتغدي لوحدي ؟
رؤي بفرحة/ لا طبعا يا طنط زينب ،،اكيد هنتغدي معاكي ،،مش كدة يا ماما ،،حتي عيب يعني لو سيبنا طنط لوحدها ومشينا هروح انا الحق اعمل الملوخية
قالت رؤي كلامها ودخلت المطبخ وصبرين كانت محرجة اوي من اللي هي عملته اما زينب فكانت بتضحك بتلقائية
زينب بابتسامة / طب والله بنت زي العسل ،،هي عشرية وده عاجبني فيها
صبرين بتنهيدة / رؤي دي بنتي الوحيدة يا زينب ،، وانا عشانها سبت بلدي واهلي كلهم وكل ده عشان ابعدها عن ش*ر الشيطان اللي كان بيحوم حوالينا ،، بس الجراءة اللي هي فيها دي مخلياني خايفة عليها
زينب بقلق/ استني بس ،،فهميني شيطان ايه ومين ده اللي سبتي بلدك عشان تهربي منه
صبرين بقلق/ هقولك بعدين ،،تكون رؤي مش هنا ،،المهم دلوقتي تقولي ليحي ميزعلش من رؤي هي لسانها مضر*ب بس طيبة وغلبانة والله
زينب بابتسامة / متخافيش ،،يحي مش من النوع اللي بيزعل بسرعة وبعدين هو لسة ميعرفهاش لما يعرفها هيفهم انها طيبة وغلبانة
صبرين بتفكير / ربنا يهديها بنتي والله
............................
تاني يوم كانت نازلة رؤي عالسلم رايحة مدرستها وقابلت يحي عالسلم فبصتله بضيق ورمت بالكلام وهي نازلة عالسلم
رؤي بضيق / يا ربي ، كدة اليوم بان من اوله
يحي برفعة حاجب / افندم ؟ انتي تقصدي ايه بكلامك
رؤي بلا مبالاه/ انا مقصدش حاجة ،، وبعدين هو انت علي راسك بطحة عشان تاخد الكلام علي نفسك ؟ ولا عشان عارف نفسك ؟
يحي بغضب مكتوم/ مش يمكن عشان مفيش غيري اللي نازل عالسلم معاكي ؟ انصحك تلمي لسانك عشان انتي متعرفينيش
رؤي بضحكة سخرية/ تصدق خوفت ؟ لا بجد مش قادرة من الرعب ،، بقولك ايه يا شاطر ،،الشويتين دول تعملهم علي حد غيري لكن انا مبخافش لا منك ولا من عشرة زيك
يحي بصدمة وغضب / بت انتي احترمي نفسك واوعي تفكري انك بطريقتك الواضحة اوي دي تبقي كدة هتخليني ابصلك اصل الاسلوب ده ر*خيص اوي
رؤي بصدمة / انت بتقول ايه ؟ واسلوب ايه اللي بتتكلم عنه ،،انت فاكرني ايه ؟
يحي بسخرية/ فاكرك ؟ الا انا متأكد كويس اوي وعارف انتي ايه ؟ تحبي اقولك من امتي ؟ من وقت ما شوفت بنت مش محترمة واقفة في الشارع مع شاب سمعته مش تمام وبتبتسم ليه ،، وقتها عرفت انك منهم
رؤي كانت حاطة ايديها علي بوقها بصدمة وافتكرت لما وققها زين في الشارع وقالها عالقلم بتاعها اللي وقع منها
رؤي بغضب وعيون محبوسة فيها الدموع/ ده تحليل الناس المريضة اللي زيك وانا مش مجبرة اني ابرر ليك او لغيرك
يحي بغضب /وانا مش فارق معايا عشان استني انك تبرريلي ،، لانك ببساطة بالنسبالي بنت مش تمام ومش انتي اللي افكر ابصلها
رؤي بصتله بعيون مدمعة وسابته ونزلت جري وهو كان متابعها بسخرية وفي باله معتقد ان دي دموع تماسيح
.....................................
بعد كام ساعة في المدرسة كانت قاعدة رؤي وبتفكر في كلام يحي ليها وكانت مخنوقة اوي لحد ما انتبهت لصوت ضحي صحبتها الجديدة
ضحي باستغراب / ايه يا رؤي مالك ؟ مش طبيعية من وقت ما جيتي الصبح ،،في ايه ؟
رؤي بحزن/ ضحي هو انا و*حشة ؟ يعني طريقتي واسلوبي و*حشين ؟
ضحي بتلقائية / لا طبعا ،،ليه بتقولي كدة ؟ انتي بس عشرية بذيادة ،،يمكن ده اللي ممكن يخلي اي حد ياخد عنك فكرة غلط
رؤي بحزن / ايوة فهمتك ،،يعني قصدك انهم يفهموني غلط ويفتكرو اني مش كويسة ؟
ضحي بتنهيدة / انتي ملكيش دعوة بحد ومتفتكريش انك كدة تبقي و*حشة ،،اهم حاجة انتي من جواكي كويسة فعلا ولا لا ،،فهمتي يا رؤي
رؤي بابتسامة / عندك حق ،، انا بجد متشكرة اوي يا رؤي ،، عشان انتي مفهمتنيش غلط وعارفة كويس اني مش و*حشة رغم اننا نعرف بعض من فترة قصيرة اوي
ضحي بحب / والله انا بحبك عشان انتي مش كئيبة زيي لكن انا لخمة اوي وكمان عشان بتضحكيني فانتي بصراحة لقطة يعني
رؤي بضحك / طب يلا بقي عشان نروح اصلي جعانة اوي وامي انهاردة عاملالي مكرونة بشاميل وانا بموت فيها
ضحي بشهية/ الله ،، مكرونة بشاميل ،لا ده انا شكلي كدة هتغدي عندكم انهاردة بقي
رؤي بلهفة/ خلاص يلا بينا بقي عالبيت ده ماما هتفرح اوي والله لما تشوفك عشان انا كلمتها عنك كتير
ضحي بتردد/ طب هتصل بماما واقولها ولو كدة هاجي معاكي يا ستي
رؤي بفرحة/ ايوة بقي ،، هو ده الكلام ،، يلا بينا بسرعة طيب
........................................
بعد اليوم ما عدي كانت ضحي ورؤي ماشين في الشارع وهما بيتكلمو في طريقهم للبيت واول ما وصلو قابلو يحي اللي كان خارج بالصدفة واول ما شاف رؤي كشر بضيق بس رجع ابتسم اول ما شاف ضحي معاها ولاحظت رؤي ده
يحي بابتسامة / اهلا ،،ازيك يا انسة ضحي
ضحي بابتسامة / اهلا يا يحي ،، طنط زينب عاملة ايه ؟
يحي بابتسامة / الحمد لله كويسة قوليلي اخبار محمد اخوكي ايه ؟ ابقي سلميلي عليه
ضحي بطاعة/ هو كويس الحمد لله وحاضر هسلملك عليه ،، يلا يا رؤي
رؤي اضايقت اوي ان يحي حتي مبصلهاش وانه كان مضايق اوي منها عشان فاكرها مش كويسة فاتكلمت بغضب وهي بتبصله
رؤي بغضب / يلا يا ضحي
طلعو هما الاتنين شقة رؤي واول ما دخلو قالت رؤي بصوت عالي / ماما ،، تعالي عندنا ضيوف
صبرين باستغراب / اهلا وسهلا يا حبيبتي ،،نورتي ،، مين دي يا رؤي
رؤي بابتسامة /دي ضحي صاحبتي يا ماما ،، جت انهاردة مخصوص عشان تدوق المكرونة بتاعتك القمر
صبرين بابتسامة / حبيبتي نورتينا يا قمر ،، ان شاء الله تعجبك خديها يا رؤي اوضتك وانا هروح لخالتك ام يحي وجاية علطول عشان كانت بتنادي عليا
رؤي بابتسامة / حاضر يا ماما يا قمر ،، يلا يا ضحي تعالي
دخلو الاتنين الاوضة ورؤي كانت مترددة بس اتكلمت لانها محتاجة تحكي لحد
رؤي بحزن/ كنت عاوزة اخد رأيك في حاجة لاني مخنوقة اوي ومش عارفة اعمل ايه
ضحي باستغراب / خير يا رؤي ،،اتكلمي انا سامعاكي
رؤي بتردد / هحكيلك
......................................
زينب بزعل / لسة فاكرة يا صبرين ؟ ده انا قولت انك انتي هتبقي ونسي في البيت الفاضي ده ،، كل ده عشان سألتك ايه اللي حصل ،،خلاص ياختي مش عاوزة اعرف
صبرين بابتسامة / ابدا والله ،،ده انا ربنا يعلم اني ارتحتلك ازاي ،،ده انا ما صدقت اني بقي ليا حد وانا حاسة دايما اني مقطو*عة من شجرة ،، وبعدين انا جاية اصلا دلوقتي عشان احكيلك
زينب بحب / طب تعالي ،،الشاي عالنار هصبه واجيلك ،، هو صحيح البت رؤي فين ؟
صبرين وهي بتقعد / معاها واحدة صحبتها جوة قاعدة معاها ،، المهم بس سيبك من الشاي وتعالي يمكن انتي تشوري عليا وتقوليلي اعمل ايه ؟
زينب بقلق/ خير يا صبرين قلقتيني ؟
صبرين بتنهيدة / انا طول عمري شايلة القر*ف ودايما علطول في مشاكل بيت العيلة بس كنت بكبر دماغي واعدي ،، ذ*ل وبهدلة وتفرقة بيني وبين سلفتي اللي منها لله ،،كانت بتغير مني وحطاني في دماغها ودايما تقومهم عليا
زينب بزعل/ اخس عليهم عالم ناقصة ،، ياختي بجملة العيشة اللي اخرها بهدلة ،، ايه اللي كان جابرك علي كل ده ؟
صبرين بو*جع/ قدري يا زينب ،، اللي كان مصبرني قدري ،، واحدة مالهاش اهل ابوها وامها ميتين ومالهاش اخوات ليهم حق يبيعو ويشترو فيها وبالاخص لما يكون معاها راجل سلبي في كل حاجة وقابل اهانة اهله عليا
زينب بشفقة/ معلش يا حبيبتي الحمد لله ان ربنا نجاكي منهم ،، اهو عندك بنتك ربنا يخليهالك يارب ويباركلك فيها
صبرين بلهفة/ ماهو ده اللي انا خايفة منه يا زينب ،،انهم يأ*ذوني في بنتي ،،مش هستحمل ان يجرالها حاجة ،، انا اخدتها وهربت ،، ايوة كان لازم اعمل كدة لما اسمع سلفتي بتحرض ابنها علي بنتي وعاوزاه يأ*ذيها عشان تفض*حني وتوطي راسي وسط الناس وابنها ده مجر*م وعينه من البت وانا اللي كنت موقفاه عند حده ،، بس طول الوقت خايفة يا زينب خايفة يعطرو فينا ووقتها اخسر بنتي
زينب بصدمة / يا مصيبتي ،، دول عالم ظالمة ايه الجنان ده ،، هو مفيش قانون ولا بوليس
صبرين بسخرية/ اسهل حاجة هيقولولي اثبتي اننا اللي عملنا كدة في بنتك وانا بنتي هبلة ،،اه بلسانين بس هبلة ومش هتعرف تدافع عن نفسها
زينب بقلق / طب والحل يا صبرين ،، يعني انتي هتفضلي ساكتة كدة وعايشة في قلق ؟ انتي لازم تاخدي موقف
صبرين بدموع / انا محلتيش حاجة اعملها غير اني ادعي ربنا انهم ميعرفوش طريقي حتي جوزي خلاص مبقتش طايقاه كفايا عليا اعيش لبنتي وتبقي قدام عيني
زبنب بتفكير / متقلقيش ان شاء الله ربنا عالم بيكي ومش هيضيعك ابدا يا حبيبتي
صبرين بلهفة / يارب يا حبيبتي يارب
......................................
ضحي بصدمة / بقي يحي قالك كدة ؟
رؤي بخنقة / ايوة يا ضحي ومش عاوزة اقولك اني وقتها قد ايه كان صعبان عليا نفسي ،، كان نفسي ازعق فيه واقوله انه فهمني غلط بس معاملته ليا واني انسانة مش كويسة دي مخلياني مقدرتش اتكلم
ضحي بتلقائية / طب وانتي يفرق معاكي رأي يحي فيكي يا رؤي طالما انتي متأكدة انك مغلطتيش
رؤي بضيق / مش عارفة ،،انا بس متخيلتش انه يقولي الكلام اللي قاله ويقلل مني كدة ،، كل ده عشان انا عشرية بزيادة وعشان شافني في الشارع بتكلم مع واحد غريب ،،لكن مشافش انه كان بيديني القلم اللي وقع مني ولا شاف اني في الشارع بمشي محترمة اوي والله
ضحي بابتسامة / طب اهدي وكبري دماغك ،، والله هو لو واخد عنك فكرة غلط بكرة تتصلح لكن انتي مش مجبرة ومش فارق معاكي هو شايفك ازاي يبقي اهدي وكبري دماغك كدة ،، يحي صاحب اخويا محمد من زمان وانا عارفة انه انسان كويس اوي علي فكرة هو بس سوء تفاهم مش اكتر
رؤي باقتناع / عندك حق يا ضحي ،، وانا هعمل كدة فعلا ،، انا هتجاهله وهكبر دماغي منه ،، اصلا هو ميفرقش معايا
ضحي بضحك / ايوة واضح انه مش فارق معاكي جدااااا
رؤي كشرت بعيظ وضر*بت ضحي بالمخدة وفضلو يهزرو سوا
...........................
عدي كام يوم كانت رؤي كل ما تشوف يحي بتتجاهله تماما فكانت عندهم في البيت عشان زينب طلبتها تعملها الملوخية بتاعتها اللي عجبتها اوي اخر مرة ورؤي كانت واقفة بتعملها في المطبخ
رؤي بضيق / يارب الحق اخلص قبل ما يحي يجي عشان انا مش عاوزة اشوف وشه
يحي من وراها / ده علي اساس ان هو هيتجنن ويشوفك مثلا ،،ده في احلامك
رؤي اتفاجأت بكلام يحي فبصتله بغضب وقررت توقفه عند حد*ه
رؤي بعصبية/ انت اصلا ملكش انك تتكلم معايا يا بتاع انت ياريت تخليك في حالك
يحي ببرود/ انا لو عليا مش طايق اشوف وشك لكن للاسف انتي اللي فاكراه بيت اهلك وكل شوية عندنا ،، ياريت تخلي عندك كرامة وتبطلي تيجي هنا
رؤس بصوت مخنوق / انا لو باجي هنا فده مش عشانك ،،انا باجي عشان خاطر طنط زينب لانها غالية عندي ومينفعش تطلب مني حاجة واقولها لا لكن الدور والباقي عليك ،، اللي داخل وشايفني وواقف تتكلم معايا ،، والله لو فعلا بتكر*هني يبقي تتجنبني احسن والا هتسمع كلام مش هيعجبك
يحي بضيق / انا مكنتش داخل عشانك اصلا انا كنت داخل اشرب وخلاص نفسي اتسدت وماشي من البيت كله بسببك
قال يحي كلامه ورؤي عنيها دمعت وكملت اللي بتعمله بحزن وهي من جواها مخنوقة اوي
زينب من وراها/ في ايه يا رؤي ،،ايه اللي حصل وصوتك انتي ويحي عالي ليه ؟
رؤي بحزن/ مفيش يا طنط زينب ،،بس واضح ان ابن حضرتك مش طايقني فاعذريني انا بعد كدة مش هقدر اجيلك ،،ابقي تعالي انتي هناك لاني مش حابة اني اتواجد في مكان هو موجود فيه
زينب بصدمة/ ليه كدة بس ،،اخس عليك يا يحي ،، معلش امسحيها فيا والله ده غلبان اوي بس هو دبش حبتين
رؤي بهدوء/ عادي يا طنط ،،انا بس اللي بقول كدة عشان شايفة ان متقابلش معاه احسن طالما ده هيريحه
زينب بحيرة/ ربنا يهديه يارب يحي انا معرفش هو ماله يا بنتي والله
سكتت رؤي ومرضيتش تتكلم بس كانت مضايقة اوي من كلام يحي اللي بيتردد في ودنها
تاني يوم كانت ماشية رؤي في الشارع لانها كان عندها درس والوقت اتأخر هناك فكانت بتمد عشان تلحق تروح وتطمن امها اللي اكيد قلقانة عليها بس وهي ماشية لفت نظرها شاب غريب ماشي وراها فقلبها اتقبض وبقت تمد اكتر والشاب هو كمان يمد جامد زيها عشان يلحقها فهنا فهمت انه قاصدها هي فعلا فبقت تجري وهي مرعوبة والشاب بيجري وراها لحد ما لحقها ومسكها من ايديها فصوتت رؤي و.....