رواية فرح فهيمه الفصل الرابع4 بقلم ايه شاكر
"إنتِ إلي لابسه طرحه أوف وايت هاتي الكارنيه بتاعك وتعالي"
نظر يوسف نحوها مجددًا وقال بتأكيد وبنبرة يشوبها بعض الحده:
إنتِ مسمعتنيش قومي هاتي الكارنيه وتعالي
استدار موليهم ظهره وهو يعدل من جهاز الابتوب، فنهضت فرح بارتباك بعد أن أخرجت كارنيه الجامعه الخاص بها واتجهت نحوه بخوف وقلق وعند نزولها من المدرج تعرقلت قدمها وافترشت الأرض واصطدم أنفها فتأوهت وهي تعتدل واقفة وخلعت عويناتها لتتأكد من سلامتها...
التفت يوسف لها أثر ضحكات الطلبه بعد صوت ارتطامها بالأرض فوقفت فرح بشموخ ونظرت خلفها للطبة لتخاطبهم بنبرة حادة:
-بتضحكوا على إيه أول مره تشوفوا حد واقع!!!!
حين ارتفعت همهمات الطلاب وضحكاتهم، طرق يوسف مكتبه بغضب هاتفًا:
-الصوت بطلوا كلام
تجعدت ملامحه وطالع فرح قائلًا بتعجب:
-إنتِ رايحه فين!؟
مدت يدها بالبطاقة قائله:
-حضرتك طلبت الكانيه
هز رأسه بالنفي وأشار للبنت التي تجلس خلف فرح قائلًا:
-لأ أنا قصدي على الأستاذه الي نايمه هناك دي مش إنتِ! اتفضلي ارجعي مكانك
ابتسمت فرح وسحبت يدها لتواري بطاقتها الجامعيه "الكارنيه" خلف ظهرها وأخذت تعود للخلف بظهرها وهي تحمد ربها فلن يعرف باسمها الذي تكرهه والذي يرتسم على وجه البطاقه...
كانت تبتسم ببلاهه وهي تعود بظهرها فتعرقلت مرة أخرى ووقعت على ظهرها لتتصاعد ضحكات الطلبه مجددًا، كبح يوسف ضحكته وهتف قائلًا:
-خلي بالك يا فرح إنتِ ماشيه بظهرك!!
قامت على الفور والتفتت إليه في دهشه وهي تسأل حالها هل قال فرح للتو! هل نطق إسمها قبل لحظات؟ فهذا يعني أنه يعرفها! ابتلعت ريقها في اضطراب، وقد حاوطتها هالة من الحيره حتى تناست أمر سقوطها قبل لحظات، سألته بملامح مندهشة:
-حضرتك قولت إيه؟!
عقب قائلًا برتابة:
-بقولك خلي بالك... واتفضلي ارجعي مكانك
لم يُعيد اسمها مرة أخرى فرجعت مكانها وسألت زميلتها بخفوت:
-إنتِ سمعتيه بيقولي خلي بالك يا فرح ولا دي تهيئات من الوقعه!
رفعت زميلتها كتفها لأعلى ولوت شفتيها لأسفل كناية عن جهلها ثم قالت:
-ماخدتش بالي بس معتقدش.... هو هيعرف اسمك منين أصلًا!
تلعثمت فرح قائله:
-هه لأ أبدًا ميعرفش اسمي
انفـ ـجرت زميلتها بالضحك وقالت:
-بس شكلك كان مسخره وإنتِ بتقعي
لكزتها فرح بكوعها بنزق، وقاطعهما صوت يوسف قائلًا:
-هناخد بريك عشر دقائق ونكمل
ثم خرج من المدرج ليستفسر عن اكتمال أوراق نقله...
________________________________
يجلس هشام "والد فرح" على الأريكه بأريحه بعد أن عاد من عمله "مدير بمدرسة خاصه" نظر لزوجته قائلًا بوجه خالي من المشاعر:
-أنا استقالت من الشغل
تهلل وجه زوجته كأنها كانت تنتظر هذا الخبر وقالت:
- أخيرًا عملتها
أطلق تنهيدة طويلة وقال:
- هنرجع البلد وهفتح مشروع هناك وأكمل حياتي جنب أبويا مش هنفضل عايشين في شقه ايجار طول عمرنا والي بنكسبه باليمين بنصرفه بالشمال
ربتت زوجته "شاهيناز" على ظهره قائله برضا:
-عين العقل يا هشام
ابتسم قائلًا:
-يارب الولاد يوافقو وميتعبوناش
عقبت شاهيناز بثقه:
-متقلقش فرح تتمنى تعيش في البلد ونوح نفسه يفتح مشروعه هناك
تنهد بارتياح ونظر في ساعة يده قائلًا:
-حيث كدا بقا هقوم أروح لفرح الكليه وأجهز أوراق النقل وإنتِ ابدئي جهزي نفسك وكلمي نوح عشان بكره نكون في البلد أن شاء الله
ابتسمت بابتهاج قائله:
-إن شاء الله
_________________________________
صدع هاتف فرح بالرنين برقم والدها فأجابت على الفور قائله:
-حبيبي
لياتيها صوته قائلًا:
-حبيبة بابا... خلصتِ محاضراتك ولا لسه؟
-لسه باقيلي نص ساعه أو ساعه إلا ربع
-طيب أنا جايلك الجامعه عشان هاخد ورقك من الشؤون وهنقلك جامعة كفر الشيخ
جحظت عيناها من هول المفاجأه وعقبت:
-ليييه؟!
عقب والدها:
-عشان هنرجع البلد وهنقعد هناك علطول
تلعثمت قائله:
-طيب وشغلك يا بابا
رد مطمئنًا:
-متقلقيش أنا رتبت كل حاجه
عقبت بنبرة حزينه:
-ماشي يا حبيبي إلي تشوفه
فلو قال والدها هذا الكلام قبل إسبوعين لرفرفت بجناحيها فرحًا لكن الآن إن تركت الجامعه فلن ترى يوسف مجددًا!!
تنهدت بحزن وانتبهت له عند دخوله للمدرج، كانت ملامحها عابسه تنظر إليه بوجه متجهم تظن أنها المرة الأخيرة التي ستراه بها فأطرقت رأسها بحزن...
أكمل يوسف شرح محاضرته وبعد أن انتهى تنحنح وهتف قائلًا:
-وبكدا تكون دي أخر محاضره ليا معاكم وإن شاء الله هتكمل معاكم الكورس الدكتوره سجى
ارتفعت همهمات الطلبه فعقب قائلًا:
-تقدروا تتفضلوا
خرج الطلاب من القاعة، فهتفت زميلتها قائله:
-وااااحسرتااااه
عقبت أخرى:
-واااادكتوراااه
وواحدة ثالثه:
-وااااأسفااااه
ضحكت فرح على كلامهن وخرجت من المدرج لتتجه لشؤون الطلبه وتقابل والدها لتنتقل من الجامعه إلى أخرى بمحافظة أخرى وعادات أخرى وقصص أخرى....
__________________________
وفي البلد كان سليمان يستشيط غضبًا من تصرفات وأفعال ابن أخيه طلب رقمه وانتظر إجابته، سرعان ما أجاب مرددًا السلام، رد عمه بنبرة حاده:
-عليكم السلام يا يوسف.... إيه الي أنا سمعته ده؟!
-خير يا عمي سمعت إيه؟!
رد عمه بنبرة غاضبه:
-إنت ناوي تأچر شقه وإنت ليك بيت كامل!!
حاول يوسف التبرير قائلًا:
-أنا مش حابب أعيش في البلد وهأجر شقه جنب شغلي معتقدش دي حاجه تزعلك؟!
رد عمه بغضب عارم:
-عليا الطلا....ق بالتلاته ما يحصل طول ما أنا عايش!
زفر يوسف بحنق وعقب بنبره متعجبه من يمين الطلاق الذي رماه عمه:
-مش فاهم حضرتك زعلان ليه!؟
عقب عمه بنفس الغضب:
-إنت عايز الناس تاكل وشي وتقول طفش ابن أخوه من البلد.... طيب أنا كنت موافق الأول عشان كنت في محافظه تانيه إنما دلوقتي لا يمكن أوافق!
نفخ يوسف بحنق فهو يعرف عمه وطباعه العنيد فمهما جادله لن يتراجع عن كلامه، تنهد بأسى قائلًا:
-خلاص يا عمي متزعلش من بكره هرجع أقعد في البلد...
_______________________
عاد يوسف لبيته وبعد تناول وجبة العشاء جمع والدته وأخته ليحكي لهما حديث عمه فعقبت صفاء"والدته"
-يعني هنرجع نعيش في البلد؟!
تنهد بأسى وقال:
-للأسف مضطربن نستحمل فتره على ما يُسر تتجوز ونشوف هنعمل ايه
عقبت والدته برضا زائف:
-عادي يا حبيبي أي مكان مش فارقه
تدخلت يُسر قائله بتقزز:
-يعني هتستحملوا حنان وقرفها!
صفاء بتهكم:
-وإحنا مالنا بيها إحنا هنقفل علينا بابنا ونعيش في حالنا
قام يوسف وهو يتنهد وقال:
-جهزو نفسكم عشان هنرجع البلد بكره عشان هنقل شغلي هناك
سار خطوات تجاه غرفته وعاد مرة أخرى كان مرتبكًا، يحك أنفه بتوتر ويمسح على ذقنه بقلق، تردد كثيرًا قبل أن يلفظ جملته:
-أنا عايز أعترفلكم بحاجه
انتبهتا له وحدقتا به والاستفهام يتمشى على ملامحها، فأردف قائلًا باقتضاب:
-أنا اتجوزت
ضـ ـربت أمه صدرها بصدمه وفغرت أخته فاها قائلين بنفس اللحظه:
-اتجوزت!!!
_____________________________
وبعد أن جمعت ملابسها وكل مستلزماتها لمغادرة القاهره وبدأ حياة جديده بالريف الذي كان تتمنى العيش به وتستمتع بالأيام التي تقضيها برفقة عائلتها بالبلد...
ابتلعت غصة في حلقها حين تذكرت يوسف وأنها لن تراه مجددًا، حملت هاتفها الذي صدع برساله من زميلتها لتقرأ الرسالة التي محتواها:
"بيقولوا دكتور يوسف سافر يحضر الدكتوراه بره وهيرجع كمان خمس سنين"
ردت فرح برسالة أخرى:
" عرفتِ ازاي؟!"
كتبت زميلتها:
"البنات كلهم بيقولوا كدا"
أغلقت معها وشعرت بخنقة تقبض على صدرها أخذت نفسًا عميقًا وزفرته بقـ ـوه، ثم طلبت رقم "المجهول" لتستمتع قليلًا بإزعاجه وتخرج من تلك الحاله التي انتابتها...
______________________________
"منك لله يا سليمان"
قالتها صفاء بقلة حيله ثم طالعت يوسف وأردفت بنبرة معاتبه:
- وإنت إزاي تعمل كدا من غير ما تقولي يا يوسف!
-أقولك إيه يا أمي صدقيني مكنش قدامي أي حل تاني
وضعت يُسر يديها حول خصرها قائلة:
-وشكلها إيه البت دي ومؤهلاتها إيه؟
تلعثم قائلًا:
-لا أنا مشوفتهاش أصلًا ولا أعرف أي تفاصيل عنها
عقبت يُسر بتعجب:
-ازاي مشوفتهاش؟! هاتلي اسمها بالكامل وأنا أجيبلك كل حاجه عنها...
قاطعهم رنين هاتفه فنظر لشاشة الهاتف الذي أضاء باسم"فهيم" مبتسمًا فقد أنقذته من اسئلة أخته ونظرات والدته الحادة ولاول مره يجيبها وهو راضٍ...
نظر لوالدته قائلًا:
-معايا مكالمه مهمه جدًا بخصوص شغلي
هرول من أمام والدته ودخل غرفته ثم أوصدها من الداخل وأجاب قائلًا:
-حيوانة حياتي
ردت فرح قائلة بنزق:
-أحيانًا تلسعك الحياه على قفاك بشخص يشبه البهائم ليعكر حياتك أكتر ما هي عكره
-هو أنا مش فاهم الجمله دي عندك مدح ولا سب بس ما علينا خير عايزه إيه الساعه دي؟
تنهدت قائله:
-كنت مخنوقه قولت أكلمك شويه تفرفشني
عقب قائلًا بسخرية:
-افرفشك... يعني أقوم أرقصلك ولا أعمل إيه؟!
عقبت بابتسامه:
-والله لو بتعرف ترقص ارقصلي
خبطت يدها على فخذتها قائله بتنغص:
-بس المشكله هشوفك إزاي؟!
زم شفتيه بحيرة زائفة:
-فعلًا مشكله؟!
عقبت فرح متخابثه:
-طيب عارف يا حيوان....
عقب يوسف قائلًا بحده:
-برده حيوان!!! يا بنتي ارحميني
كبحت ضحكتها وتجاهلت كلامه قائله بجدية زائفة:
-عايزه أقولك إن أنا بعرف أرقص حلو قوي حتى سندس تشهد يامه رقصتلها كنت بمسك عصابة چدى وأقعد أرقصلها بالساعات
مجرد تخيله لما تقول كان كافيًا لينفـ ـجر بالضحك تركته يضحك وعقبت مردفةً:
-مش مصدقني طيب دا سندس مكنتش بتبطل تشچعني طول ما أنا برقص
كبح ضحكته وسألها بابتسامه:
-بتشجعك ازاي؟! كانت بتهزلك ديلها ولا بترقع بالصوت من الهبل إلي بتشوفه
وضعت يدها على فمها لتكتم ضحكتها وعقبت:
-لا دا كانت بترقص معايا وتتنطط كدهون في قلب الزريبه
انفـ ـجر يوسف بالضحك حتى أدمعت عيناه وقال من خلف ضحكاته:
-ودا ملفتش نظرك إن الجاموسه خافت من الهبل إلي إنتِ بتعمليه!
لم تستطع كبح ضحكتها وأغلقت الخط بوجهه لتنفـ ـجر ضاحكة، وبعد أن انتهت من نوبة الضحك طلبته مجددًا فأجاب مسرعًا لتكمل حديثها بحزن زائف:
-أنا عايزه أحكيلك وأشكيلك
وضع قدمًا فوق الأخرى وقال:
-احكي واشكي دا أنا معاكِ للصبح
وضعت فرح يدها على عنقها قائله:
-انا مخنوقه كدهون وفيه حاچه طابقه على نفسي
سألها مستفهما بنبرة ساخرة:
-مخنوقه من ايه اوعي يكون سندس حصلها حاجه؟! طمنيني عليها ولدت ولا لسه؟!
ابتسمت قائله:
-ولدت وچابت عچل زي فلجة القمر
عقب بابتسامه مصطنعه:
-الف حمد الله على سلامتها
رقدت على سريرها ورفعت قدميها لأعلى على الحائط قائله:
-بس أنا مخنوقه ومضايقه كده
سألها يوسف بسخريه:
-ليه بس مش اطمنتي على سندس إيه إلي خانقك؟!
-مش عارفه أنا ممكن اكون مضايقه عشان متعشتش كويس!؟
رد يوسف بسرعه:
-طيب قومي اتعشي ولا البرسيم خلص!
لم تعقب على جملته وهتفت قائله:
-لا لا لا الظاهر إني مضايقه عشان منمتش كويس
عقب يوسف:
-طيب قومي نامي وريحيني
لم تعقب على جملته وقالت:
-لا أنا بچد عرفت أنا مخنوقه ليه!
وضع يده أسفل ذقنه قائلًا:
-طيب مخنوقه ليه؟!
عقبت ببكاء زائف:
-عشان عمتى خدت مني العروسه وأنا لسه مكملتش لعب
عقب بسخريه:
-فعلًا حاجه تضايق لازم تعاتبيها
ردت بنبرة حادة:
-ليه هو أنا اتهبلت أعاتبها على موقف بقاله ١٥ سنه
تجهمت ملامحه ولم يرد عليها فأردفت:
-عارف يا حيوان أنا عندي عقده كبيره كدهون في حياتي بسبب الموقف دهوت وحاسه إني محتاچه أتعالچ نفسيًا
عقب يوسف قائلًا بتأكيد:
-فعلًا أنا ملاحظ إنك محتاجه تتعالجي
كبحت ضحكتها لتقول:
-شوفت أهو الي يسوى والي ميسواش بقا ملاحظ عقدتي
-مين ده الي يسوى ومين الي ميسواش إوعي يكون قصدك عليا!
ضحكت ضحكة مكتومه وهي تضغط على شفتيها وقالت:
-طبعًا هو أنا بكلم حد غيرك ركز شويه يا حيوان
سألها بحده:
-حيوان الأخيره دي كانت شتيمه صح؟
كبحت ضحكتها وردت قائله:
-لا دي غلاوه متقلقش
عقب قائلًا بسخرية:
-أنا بطمن بس!
أغلقت الهاتف بوجهه وضحكت وهي تنظر للهاتف وتقول:
-دي كانت جرعة اليوم بالشفا يا حيوان
قالت جملتها قبل أن تنفـ ـجر بالضحك
___________________________
وفي اليوم التالي وصلوا للبلد كان نوح يحمل الأمتعه للداخل وفرح تجلس على المقعد في الحديقة بكل أريحه وتنظر لنوح الذي يدخل ويخرج من البيت تُطالعه بمكر وتغني:
-شي حا يا حماري يلا امشي بالرحه وشيل أحمالي كلها
رمقها بغيظ وهتف:
-حمارك.... ماشي يا فرح أخلص ونتحاسب
ابتسمت بسخرية وقالت بنبرة مرتفعه:
-أنا في حماية جدي محدش يقدر يقربلي هنا
نظر لها والدها قائلًا:
-قومي يا ام لسان طويل خدي ورقك قدميه في الكليه
وقفت تهندم ثيابها وتقول:
-حد يجي معايا أنا معرفش المكان
كان نوح قد انتهى من توصيل كل الحقائب والأمتعة لشقتهم اتجه نحوها ليلقنها درسًا على نعته بالحمار، فركضت بالحديقة وهو يركض خلفها ويقول:
-أنا حمار يا نص جاموسه
رمقها بسخريه وضحك مردفًا:
-والله حتى ما كملتي ربع جاموسه
ادعت الضحك ساخره وهي تقول:
-يا خفيف!!
كانت ترمقهم بنظرات مغتاظه من شرفة شقتها بالطابق الثالث، فرفع نوع بصره لأعلى، فدخلت السيدة على الفور..
اقترب نوح من فرح هامسًا:
-كانت واقفه تبص علينا عينها هتتخلع
ابتسمت فرح بألم وقالت:
-الله يرحمه عمي إيهاب جابلنا بلوى قبل ما يموت
قاطعهما صوت والدهما قائلًا:
-روح يا نوح مع أختك وقدملها ورقها في الكليه
اومأ رأسه بالإيجاب ونظر لها قائلًا:
-ورايا يا ربع جاموسه
سارت خلفه متمتمه بكلمات سب له فرمقها بغيظ وهو يجذبها من ملابسها بحده لطيفه:
-قصري لسانك وامشي قدامي
"زوجة إيهاب وتدعى ساميه امراه حقوده لم يتزوجها ايهاب حبًا بها لكن تزوجها لتصليح غلطته معها بعد أن تبين حملها منه، أمرأة بمنتصف الثلاثينات متوسطة القامه ممتلئة الجسم قليلًا لا يوجد أي مميز بملامحها وتمتلك بشرة خمريه"
قدّم يوسف أوراقه بالجامعه واستلم عمله الجديد، خرج من الجامعة وابتهج حين رآها تقف أمام الكليه تنتظر أخاها حتى ينتهي من تقديم أوراقها، أقبل نحوها ليتأكد من هويتها وما أن تأكد هتف بابتسامة:
"إنتِ كدا بقا ماشيه ورايا!"
قال يوسف جملته مبتسمًا، فاستدارت فرح أثر صوته ونظرت له قائله بدهشه:
-دكتور يوسف!!
"إنتِ كدا بقا ماشيه ورايا!"
قال يوسف جملته مبتسمًا، فاستدارت فرح أثر صوته ونظرت له قائله بدهشه:
-دكتور يوسف
تذكرت كلام زميلتها وأردفت تساله باستفهام:
- هو مش حضرتك سافرت تاخد دكتوراه بره!
قطب حاجبيه وارتسمت ابتسامة عذبه على شفتيه قائلًا:
-جبتِ الكلام ده منين!؟
عقبت فرح قائله:
-البنات الي في جامعة القاهره قالولي كده!
لوى شفتيه لأسفل قائلًا:
-مش كل حاجه بتتقال بتكون صح
أومأت رأسها بالإيجاب قائله بإبتسامه واسعه كشفت مدى سعادتها لرؤيته، حاولت إدعاء الجديه وسألته باستفهام:
-هو حضرتك بتعمل إيه هنا؟!
أشار للكليه خلفهم وقال:
-بشتغل.... نقلت شغلي هنا
اتسعت ابتسامتها مرة أخرى فقد ظنت أنه سافر لخارج مصر ولن تراه مجددًا لكن جمعهما القدر مجددًا، طال الصمت بينهما فوضع يديه الإثنين بجيوب سرواله قائلًا بمكر:
-ماشيه ورايا ليه بقا يا فرح!؟
ابتسمت فرح قائله:
-او يمكن حضرتك إلي ماشي ورايا!
ابتسم ثم سألها بجديه:
-اوعي تقوليلي انك نقلتِ كليتك هنا!
أومأت رأسها بالإيجاب قائله بابتسامه:
-حصل
تنهد بحيره قائلًا:
-تفتكري بقا الصدف دي ليها معنى؟!
ابتسمت قائله:
-كل حاجه بتحصل حولينا بيكون ليها معنى بس مش دائمًا بنفهمه!
عقب بابتسامه واسعة أظهرت غمازاته:
-بس أنا فهمته
قطبت حاجبيها قائله:
-فهمت إيه؟!
حاول الهروب من سؤالها فنظر بساعته قائلًا بجديه:
-أستأذنك بقا لأن عندي شغل مهم
عقبت فرح:
-اتفضل
ولى ظهره لها وانصرف أما هي فوقفت تنظر لأثره مبتسمه.
هرول يوسف حتى وصل مكتبه أخرج هاتفه ونظر للرقم الذي سجله "فهيم" ابتسم بمكر وقرر أن يزعجها كما تزعجه دائمًا فضغط على الرقم ليتصل بها..
وعند فرح صدع هاتفها بالرنين وحين رأت اسمه "المجهول" زفرت بحنق قبل أن تجيب عليه بنبرة حاده:
- هو أنا مش بعتلك رساله قولتلك إن سندس نايمه وأنا قاعده چارها يا حيوان
اعتقدت أنه سيغضب ككل مره تنعته بالحيوان، لكن خاب ظنها حين عقب متخابثًا وهو يقول بنبرة هادئه:
-تعرفي إن كلمة يا حيوان بقت تقع على سمعي زي كلمة حبيبي بالظبط.... دماغي اتبرمج على كدا
كبحت ضحكتها ولم تعقب فأردف قائلًا:
-يعني لو حد شتمني وقالي يا حيوان هقوله حبيبي تسلم
أغلقت الهاتف بوجهه وابتسمت قائله:
-والله دمك خفيف يا مضـ ـروب
وبعد دقيقة وقف أخوها أمامها وقال:
-قدمت ورقك وجبتلك جدول المحاضرات
قالت بامتنان:
-شكرًا يا حبيب أختك يا عسل يا سكره
-عدي الجمايل بقا
هتفت بمرح:
-ياريت بقا تعزمني على عصير ولا حاجه تبل ريقي وأنا أعد بضمير
اومأ رأسه قائلًا:
-هعزمك بس متاخديش على كده!
____________________________
وفي المساء
ارتدت مريم فستانها الوردي وحجابها الأزرق، كانت على أهبة الإستعداد لمقابلة نوح والإتفاق على تفاصيل زواجهما، مر الوقت سريعًا وها هي تجلس أمامه تفرك يدها بعنـ ـف وتنظر أرضًا بخجل كأنها تراه لأول مرة، وبعد أن يأس منها، فقد مر خمس دقائق ولا تنطق بحرف هتف قائلًا:
-ممكن تبصيلي يا مريم
استمرت بفرك يديها بتوتر فأردف:
-أنا مش فاهم إنتِ مكسوفه ليه دا إحنا عشرة عمر... بصيلي يا مريوم
رمقته سريعًا ثم أخفضت بصرها فقال:
-أنا قولت لعمتي نكتب الكتاب علطول مش هستحمل أنا ظوابط الخطوبه دي
لم تنبس بحرف ولم ترفع رأسها فستأنف:
-قالو زمان السكوت علامة الرضا
أردف متخابثًا:
-وأنا مش بصدق الجمله دي وهطلع أقولهم انك مش موافقه
ابتسمت مريم ورفعت رأسها لتنظر إليه فعقب مردفًا:
-إيه أطلع أقولهم انك مش موافقه!!؟
عقبت وهي تنظر إليه:
-أنا موافقه يا نوح لأني مش محتاجه فترة خطوبه عشان أتعرف عليك
رفع يده في وضع الدعاء قائلًا:
-يا فرج الله أخيرًا نطقتِ
نظر لها متفحصًا وأردف وهو يغمز بغينه:
-بس حلو اوي الفستان دا
ابتسمت قائله بحياء: شكرًا
أخرج هاتفه والتقط لها صورة بدون إذنها لم تظهر ملامحها لأنها كانت تنظر أرضًا وجميع أعضاء جسدها في وضع الإنقباض، فهتف:
-عشان نوثق اللحظه دي والفستان القمر ده وصاحبة الفستان الخجوله دي
وقف أمامها وابتسم وهو يغير وضعية الكاميرا للأماميه قائلًا:
-بصي هنا بقا
والتقط الصورة وهي تنظر له مبتسمه بحياء حدق بصورتها قائلًا بحب:
-قمر هينور حياتي قريب
ابتسمت بحياء ولم ترد فقام ووقف أمام باب الغرفه وهو يقول بمرح:
-سمعينا زغروده يا عمتي خلي الفرحه تملى البيت
أدخل رأسه من باب الغرفه ونظر لمريم هامسًا:
-وتملى حياتي
اتفقوا على إتمام الخطبه وكتب الكتاب في خلال إسبوع والزواج بعد شهرين أو ثلاثة بعد الإنتهاء من تجهيز الشقه والإستعداد للزواج...
_______________________________
وفي اليوم التالي كانت فرح على وشك الإقتراب من موقف سيارات الأجره لتحضر محاضراتها، لكن أوقفها صوت ذالك الطفل الذي يجلس على الدرج أمام بوابة بيته هتف بنعومة وبراءة مصطنعه يخفي خلفها كثيرًا من المكر والدهاء وقال:
"عمتو ممكن تساعديني"
كان طفلًا بملامح بريئه يبدو أنه لم يتجاوز السبعة أعوام، كان واضعًا كلتا يديه على وجنتيه ومبتسمًا، اقتربت منه فرح حتى وقفت أمامه مباشرة وانحت لمستواه قائلة بحنو:
-يا قمر... محتاج إيه يا حبيبي؟
ابتسم الطفل ونكس رأسه لأسفل بخجل مصطنع قائلًا:
-كنت محتاج مساعده بسيطه
ربتت على كتفه قائله بحنو:
-قول يحبيبي محتاج إيه؟!
رمقها بمكر وحمل قنينة المياه من جواره، عقدت فرح حاجبيها تحاول فهم ما يريد، وفي حركة سريعة سكب قنينة المياه عليها فغرق وجهها بالمياه وأصبحت الرؤية مشوشه عندما نزلت قطرات المياه على زجاج نظارتها الطبيه، خلعت نظارتها وأغلقت عينها لتمسح المياه عن وجهها فوقف الطفل وأكمل سكب القنينة على ملابسها، صرخت فرح وهي تلوح بيدها لتحاول إمساكه وهي تقول:
-إنت روحت فين ياض؟
ركض الطفل لبوابة بيته وهو يقول بضحكة ساخره:
-وقعتِ فيها هههههههه شربت المقلب
انشغلت فرح بتنظيف زجاج نظارتها لترتديها وتستطيع رؤيته بوضوح، انفجر الطفل بالضحك وأخرج رأسه من البوابه قائلًا:
-علفكره دي مايه البيبي بتاعي "بول"
صرخت باشمئزاز فضحك الطفل بصخب ثم أحكم إغلاق بوابة بيته وتركها تصرخ بخفوت وهي تملس على ملابسها المبتله بنفور وتصيح:
-ياد يا ابن ال....
مسحت وجهها بكلتا يديها وهي تكاد تبكي هاتفةً بتقزز:
-يعععع ماية بيبي
سرعان ما نظر لها الطفل من نافذة بيته وهو يضحك قائلًا:
-متخافيش يا عمتو دي مايه من الحنفيه
لم ينتظر ردها ودخل ثم اغلق النافذة، أما هي فضربت البوابه بيدها وهي تصيح:
-متربوا عيالكم بقا
رأت نافورة مياه بالقرب منها ففتحتها وغسلت وجهها ثم مسحت ملابسها وهي تقول بنزق:
-هروح الكليه ازاي دلوقتي؟!
قررت أن تعود لبيتها لتبدل ثيابها وبالفعل سارت بضع خطوات إلى أن رأت كلبًا يقابلها من بعيد فاستدارت مرة أخرى، تقوس فمها لأسفل كطفل يوشك على البكاء وهي تغني:
-أنا رايح فين أنا راجع تاني
قررت أن تذهب لجامعتها بتلك الهيئة فضلًا من أن تمر بذالك الكلب فيتهجم عليها، سارت وهي تردد بغضب:
-دا زحمة القاهره أرحم بكتير من كلاب الريف وأطفال الريف وماية ال......
قُطع سيل كلامها بصرخة مدوية أطلقتها من حلقها حالها حين انزلقت قدميها بسبب المياه المسكوبة أمامها وافترشت الأرض، تأوهت وصاحت وهي تجلس بالوحل:
-لا دا أنا أكيد فيه حد بيدعي عليــــا
نهضت ونظرت حولها متمنية ألا يراها أحد بتلك الحاله لكن يا لحظها المشؤم! خرج يوسف أمامها وكأنه قد ظهر من العدم فهو أخر شخص تتمنى رؤيته الآن!
وقف أمامها بهيبته وأخذ يرمقها بنظرات متعجبه، قطب حاجبيه وهو يقول مستفهمًا:
-إيه إلي عمل فيكِ كدا؟!
نظرت لفستانها الأسود الذي تلطخ بالطين ويدها التي تحول لونها للأسود وابتسمت ببلاهه وهي ترفع كلتا يديها وتبدل نظرها بينهما وبين يوسف معقبة بسخرية:
-فعلًا يا محلاها عيشة الفلاح!!
ابتسم يوسف على سخريتها ونظر لها متفحصًا ملابسها المتسخه وهو يقول:
-إنتِ اتبهدلتِ خالص
لوت شفتيها لأسفل وهي تنظر لكلتا يديها وتنظر للكلب الذي يقف حائلًا بينها وبين عودتها للبيت ثم نظرت ليوسف قائلة بصوت يوشك على البكاء:
-عديني من الكلب عشان أروح لأمي بالله عليك
______________________________
وفي المساء جلس يوسف مع والدته وأخته لفرز ما تبقى لإكمال جهاز أخته، نظر ليُسر قائلًا بجديه:
-شوفي يا حببتي لو عايزه أي حاجه أجيبهالك
عقبت يُسر برضا قائلة:
-لا يا چو تسلم إنت جايبلي كل حاجه بزياده
تنحنحت يسر وسألته للمرة العاشره على التوالي:
-مش ناوي تقولي مين المحظوظه إلي ربنا جعلك من نصيبها
وكالعادة قبل إجابة السؤال يقاطعه شيء، قاطعه طرقات على باب شقته وصدوع صوت جرس الباب عاليًا، قام على الفور يفتح ليظهر عمه أمام الباب ويقول بأمر:
-يلا عشان هنروح نسهر عند نسايبك شويه
يوسف متعجبًا من طلب عمه:
-نسايب مين! لا مش هينفع
قال بحزم:
-يلا يا يوسف أنا اديت الچماعه ميعاد ومستنينا
لم يعقب يوسف ومسح وجهه بغضب فأردف عمه:
-هنروح عشان نعزمهم على فرح يُسر
زفر يوسف بحنق فقد بدأت تحكمات عمه ومن الواضح أن المعاناه قد بدأت منذ الآن، ردد يوسف بقلة حيله:
-حاضر يا عمي هغير هدومي وأنزلك
وبعد فترة دخل يوسف لذلك البيت للمرة الثانية رحب به الجميع على عكس المرة السابقة وجلس نوح جواره يريد أن يفتح معه كلام بعد أن لاحظ صمته وتجنبه لمشاركتهم الحوار فسأله بنظرة ساخره وهو يرمقه متفحصًا:
-وإنت بقا يا أستاذ يوسف شغال ايه؟
عقب يوسف بجديه وهو يعدل من جلسته قائلًا:
-أنا معيد في كلية آداب
اعتدل نوح في جلسته وأنزل رجله من فوق الأخرى فقد ظن أنه بدبلوم أو يعمل بأي صنعة مثل نقاشه سباكه، كهرباء، لكن لم يعتقد أنه معيدًا بالجامعة عقب نوح قائلًا باحترام:
-دا احنا نقولك يا دكتور بقا!
ابتسم يوسف باحترام قائلًا:
-لا قولي يا يوسف عادي احنا نعتبر من سن بعض
تحدث نوح معرفًا نفسه قائلًا:
-أنا خلصت طب بيطري وناوي أفتح عيادة هنا في البلد
ردد يوسف قائلًا: ما شاء الله
تذكر يوسف صورة فرح وطريقة كلامها وأنها أنهت دبلوم زراعه وربطها بكلام أخيها وتعليمه وهتف قائلًا:
-بس الظاهر إن العيله بتاعتكم بتهتم بتعليم الولاد وبتهمل في تعليم البنات
عقب نوح معترضًا:
-لا طبعًا بنات العيله كلهم معاهم تعليم عالي حتى ماما أصلًا معاها كلية تربيه
تنحنح يوسف وسأل: وفهيمه؟
قطب نوح حاجبيه وسأله متعجبًا:
-هي فهيمه مقالتلكش... علفكره إنت ممكن تكون عارف فهيمه
تذكر يوسف صورتها بالقسيمة الزواج وقال:
-لأ معتقدش أنا شوفت صورتها في القسيمه و....
قاطعه ضحكات نوح الذي عقب موضحًا:
-لا دا الصوره دي....
كان على وشك أخباره بحقيقة الصوره لكن قاطعه جده حين قال:
-خد الأستاذ يوسف يا نوح واطلعوا فوق عشان يقعد مع فهيمه شويه
وقف نوح قائلًا:
-حاضر يا جدي
خاطب نوح يوسف:
-اتفضل معايا يا دكتور
حاول يوسف أن يتهرب من هذا اللقاء قائلًا:
-خليها مره تانيه عشان...
تدخل سليمان مقاطعًا بأمر:
-لا تانيه ولا تالته يا يوسف روح معاه
زفر يوسف بقـ ـوه وصعد الدرج مع نوح في صمت، كان شاردًا هل سيراها الآن وتُكمل حديثها عن حديقة الحيوان الخاصه بها!
قطع حبل أفكاره صوت طرقات نوح باب شقتهم ثم فتحه وهو يضـ ـرب كفيه معًا ويقول بنبرة مرتفعة:
-معايا ضيوف يا أهل الدار... يارب يا ساتر.... يا ستير يارب
_________________________
على جانب أخر كانت تجلس في غرفتها تتسلى بأكل حبات العنب وهي تشاهد فيلم كوميدي وتضحك إلى أن سمعت صوت أخيها الذي تجاهلته واستأنفت الفيلم!
فما بالها بالضيوف فستقدم والدتها الضيافه، قاطعها دخول والدتها للغرفه وهي تلهث قائله:
-قومي بسرعه عريسك بره
هبت فرح واقفه بصدمه وقالت:
-يالهووووي بره فين؟! طيب أستخبى فين ولا أهرب منين
رمقتها والدتها بغيظ وهي تقول:
-تهربي ليه؟! إلبسي عشان تقابليه.....