رواية مذكرات رجل فاقد للذكورة الاول1والثاني2 بقلم مي علي

رواية مذكرات رجل فاقد للذكورة كامله بقلم مي علي

الفصل الاول والثاني 

بقلم: مي علي ⁩

الضعف عند الرجال مشكله ليها ابعاد ف حياه الراجل ...بالذات 

ف الأشخاص اللي بيتأثرو بالموضوع ده زي مراته مثلا...بس 

الاكتر من ده انو صورته بتتهز قدام نفسه...لانه بيبقي شايف 

أن رجولته ناقصه جزء ...ونظرا لمجتمعنا ف الجزء ده 

بالنسباله مهم جدا ...وبتبدأ مع الوقت ثقته ف نفسه تقل وف 

حاله ان مفيش علاج للموضوع ده ....فبيبدأ يتشكل اثار سلبيه 

جدا علي نفسيته واللي حواليه بالاخص زوجته لدرجه انو يبدأ 

يشك فيها وده لانه حاسس بالنقص وشايف انها ممكن تدور 

علي اللي ناقص عندو بره ومع حد تاني.....وبيفضل النقص 

يزيد وآثاره تزيد معاه....فهل يتري ليها حل ويا تري ممكن 

إحساسه بالنقص ده يوصله لحد فين

تعالو نشوووف

بقلمي :: مي علي ⁩

أنا أدهم عندي ٢٥ سنه .... لسه ف تانيه جامعه ف 

حقوق....وده لاني بسقط بقالي كتير.....عندي اخت اكبر مني متجوزه وعايشه ف اوكرانيا

انا من عيله عاليه اوي....بس عيليتنا دي ليها فروع اهو احنا بقي من الفرع المكسور ف العيله ...ابويا مات وانا عندي ١٦سنه وامي متوفيه مبقلهاش سنه ....وبقيت عايش لوحدي

انا بإختصار كده ضارب الدنيا طنااااش ع الاخر ..زيي زي شباب كتير...بصراحه كده مبحبش اشتغل واتعب وادور....ومقتنع اوي أن شهادتي دي ف الاخر هبلها واشرب ميتها....انا عاوز فلوس....فلوس كتير اوي أفضل اصرف منها ومتخلصش...عاوز ادلع واتبسط واعيش حياتي بلا شغل بلا تعب بلا وجع دماغ...

بحب واحده اسمها إنجي من ايام ثانوي بس ابوها رافض علاقتها بيا عشان شايفني صايع وعايش علي الفلوس اللي بتبعتها اختي ...ومليش ف الشغل ومش هعرف افتح بيت....بس هيا بتحبني وعوزاني وهو سايبها براحتها ....اصلهم عيله اوبن مايند اوووي

دي تالت سنه او تاني سنه...والله مش فاكر انا سقطت كام مره.....عد عندك ....٢ ثانوي و٢او٣ جامعه.....ماشالله ربنا يحفظني...حقيقي مش فاكر سقطت اد اي ....

العيله دي كانو كلهم مهندسين ودكاتره ومحاسبين بس خلاص خلصو مفضلش غيري انا واختي البشمهندسه.....امي كانت دايما تندب حظها معايا وتقول عليا الفاشل الموكوس اللي ف العيله

فضلت كده عايش علي فلوس اختي لا مذاكره بقي ولا بتاع

لحد ما جه شهر.....مبعتتش اي فلوس

اي الوقاحه دي.....هي عارفه اني مليش دخل تاني غير الفلوس اللي بتبعتها.....مبعتتش ليه يعني

حاولت ابعتلها تلكس اشوف اي الموضوع....عدي بعدها يجي اسبوعين ومفيش رد

لا بقي مش هينفع كده انا عاوز فلوس....ولو اتطربقت السما ع الأرض انا مش هنزل اشتغل

بعد اسبوعين بالظبط ردت عليا بكلام فور الدم ف عروقي....قال ايه باعته بتقولي...

إنها خلاص مش هتبعت فلوس تاني عشان هيا كده بتبوظني ومخلياني معتمد عليها واني لازم بقي اعتمد على نفسي ولا وكمان بتهزقني وتقولي اخلي عندي دم انا داخل ف التلاتينات وقاعد زي النسوان ف البيت...وإن الفلوس دي فلوس جوزها وهو خلاص مش هيديها فلوس تاني تبعتهالي ....وبتنصحني انزل اشتغل واعتمد على نفسي عشان مبقتش عيل

انا سمعت الكلام واتعصبت والدم غلي ف نفوخي.....متغوووور هيا وفلوسها هو انا بشحت منها....وقال فلوس جوزها قال....جوزها ده كان شحات.....طيب يا سهي طااااايب

عدي يومين والفلوس اللي معايا كلها خلصت.....مفيش اكل....مفيش فلوس....مش عارف اجيب سجاير ولا انزل اقعد ع القهوه ...انا اه كنت عايش علي فلوس اختي لكن عمري متسنكحت علي حد

عدي الحال يومين كمان وكل الاكل اللي كان ف التلاجه خلص...خرمان عاوز اشرب سجاره ...اي ده كمان مفيش شاي ولا قهوه....طب اعمل اي بس....ابعت لسهي استعطفها تبعتلي فلوس الشهر ده وبس.....لا ...لا يمكن ...لا الحوجه ليها ولا لفلوسها....بصيت ف النتيجه ....النهارده اول الشهر ....جه ف بالي الواد كمال صحبي تلاقيه لسه قابض ابن الفقريه ...اهو ده بقي من نوع الرجاله اللي بتحب الشغل وتشتغل بإيدها وسنانها علشان يتقال عليه راجل واد المسؤوليه وياخد البت اللي بيحبها.....انا ممكن انزل اروحلو واستلف منه ....اه...هو كده....وفيها اي....احنا اصحاب اكيد مش هيكسفني يعني

وفعلا لبست ونزلت روحتلو ...ندهت عليه من تحت بتهم

- يا كماااااال.......يا كماااااال

-ايوه......ايوه مين

- كمال موجود يا حجه

- ايوه يا بني اقولو مين

- قوليلو.....ادهم

دخلت الست....اي ده كلو هيا نامت جوه ولا اي

-ادهم....اي يا معلم ليك وحشه

- وانت كمان ياسطي ...ليك وحشه....طب اي هنتكلم ف الشارع كده بالمكروفون ولا اي

- ههههههه لا اطلع يا معلم

- لا ياعم انزل انت

- ياعم اطلع بس ف ايدي حاجه هخلصها....ونبقي ننزل سوا

وطلعت

- السلام عليكم

- وعليكم السلام ورحمه الله وبركاته...اتفضل يا معلم ادخل

- اي ياعم كل دي سلالم

- سلالم اي احنا ف الدور التاني.....انت دايما كده مبتحبش تتعب نفسك

- يادي ام التقطيم اللي كل اما تشوف وشي تقولهولي

- ياعم مش قصدي ....سيبك انت بس والله واحشني

- إنت اكتر والله

- يا أمي اعمليلنا شاي .....منور والله يا معلم

- ده نورك ....بس ملوش لازمه الشاي انا جايلك ف حوار كده وماشي علي طول

- خير يا صحبي عنيا ليك

- انت عارف اني مبشتغلش.....وعايش علي الفلوس اللي اختي بتبعتهالي

- اه عارف....ثواني

هاتي يا امي الصينيه دي ...ارتاحي انتي بقي

اتفضل يا صحبي الشاي

- احلي كوبايه شاي من ايد ام كمال

- ربنا يخليك يابني تسلم

- كمل يا معلم كنت بتقول اي

بصتله وسكت

- اه طيب تعالي ندخل جوه ف قوضتي نتكلم علي رواقه

- حلوه قوضتك يا معلم

- اتفضلها يا صحبي

- هههههههههه عسل.....الا صح بتروح الجامعه

- جامعه!!!!!.......جامعه اي يا ادهم انت ناسي اني خلصت

- خلصت؟!

- اه خلصت انت ناسي ولا اي

- لا يا عم فاكر.....فاكر.....هههههه قصدي مبتروحش عادي يعني ما في ناس بتروح الجامعه بعد ما خلصت

- لا مبروحش.....هو انا فاضي انا ورايا هم ميتلم.....امي تعبت وكده.....وكمان بوضب ف الشقه عشان اتأهل واتجوز بقي

- أنت لسه مع البت دي؟!

- اه ياعم وخطبتها رسمي كمان

- ماشالله ربنا يهنيكم

- يارب يامعلم......وانت مش ناوي تخلص جامعه بقي ولا هتفضل مبرشط كتير

- لا لا هشد حيلي ياعم هي الجامعه هتروح فين ....انا بنجح بس علي مهلي

- ههههههههه طب بس قول لمهلك يجي بسرعه

- ههههه مش بقولك عسل .....المهم بس متوهنيش ف اللي جايلك عشانو

- اه.....قول يامعلم عاوزني ف اي بقي.....اؤمرني

- قصر الكلام اختي قطعت عني المصروف عشان اتعدل وأشوف شغلانه واقف علي رجلي بقي

وبيني وبينك يا صحبي قطعته فجأه حتي مقلتليش....ولقيت معييش ولا مليم ومبشتغلش زي مانت عارف

- طب ودورت علي شغل

- ها......اه....اه..دورت كتير بس ملقتش حاجه تنفعني

- يعني اي ملقتش اللي ينفعك هو انت لازم تشتغل اللي ينفعك؟!!!

- ياعم لا بس ع الأقل تناسبني......يعني مثلا لو لقيت شغلانه زبال... يبقي هشتغل زبال

- والله الشغل مش عيب يا ادهم طلاما هتعتمد علي نفسك وتاكل لقمتك بالحلال

- اه....اه طبعا بس والنبي بلاش كلام إنشا ده احسن انا اتخنقت

- انا مش بخنوقك يا صحبي.....ومع ذلك انا مستعد ادورلك علي شغلانه كويسه بمرتب حلو ...بس انت لازم تكمل جامعتك عشان الشركات مبتقبلش دلوقتي غير بالخبرات واللغات والكلام اللي انت عارفه ده

- اه عارف.....خلاص يا عم دورلي علي شغل....بس دلوقتي اللي جايلك عشانو هو......والله محروج منك يا كمال

- عيب عليك ياعم محروج مني ده انا اخوك...قول بس

- بصراحه كده كنت عاوزك تسلفني قرشين امشي بيهم حالي بس علي ما ربنا يفرجها

- بس كده عنيا......عاوز كام

- اي حاجه امشي بيها حالي مش هحدد يبقي كتر خيرك

- طيب بص خد دول .....٣٠٠جنيه مشي بيهم حالك لحد ما اجبلك شغل

- ٣٠٠جنيه!!!!!

- اي قليلين؟عاوز تاني؟

- لا لا دول كتير ...تسلم يا كمال ....طيب ياخويا كتر خيرك معلش ازعجتك ....انا همشي بقي

- طيب يا ادهم....وانشالله قريب هكلمك وانا جايبلك شغل....

- ربنا يسهل يا معلم.....سلامو عليكو ياحجه

- مع السلامه يا بني

ونزلت من عندهم

- كان عاوزك ف ايه يابني؟!

- مفيش يا امي كان جاي يستلف مني فلوس

- يابني هو انت حمل حد يستلف منك

- يا امي ظروفه صعبه .....سلفته لحد بس ملاقيله. شغل

- ربنا يراضيك يابني

- ويخليكي يا امي....طيب انا هقوم اخلص شغلي بقي

نزلت من عندهم وانا بقول ف نفسي

٣٠٠جنيه.....اه يا معفن بتشتغل شغلانه بتقبض فيها يجي٥٠٠٠جنيه وتديني٣٠٠بس ماااااشي ...لا وكمان عاوز تجبلي شغلانه ....اما نشوف هتجبلي اي يا سي كمال

انا جعان اوي .....نفسي رايحه للفراخ المشويه....انا هجبلي نص فرخه ولا حاجه ....وروحت علي محل بتاع فراخ وكفته مشويه

- لو سمحت بكام نص فرخه؟

- ب٦٥جنيه

فكرت ف نفسي وقولت....٦٥جنيه..انا مش عارف كمال هيجيبلي شغل امتي....متقضيها جبنه وعيش وخلاص يا ادهم بقي

مشيت من عندو خطوتين وقلت ف نفسي ...هيجري اي يعني ٦٥,جنيه لسه باقي معايا مبلغ هحافظ عليه لحد ميجيبلي شغل

رجعت له تاني .....ماشي ياعم اعملي نص فرخه

وفعلا حضرلي الطلب ومشيت وجبت عيش وسجاير ب٢٨ جنيه ادي ١٠٠جنيه اتفرتكت ف نص ساعه....طلعت كلت ونمت زي القتيل

صحيت ع الساعه تسعه الصبح علي صوت ترزيع الباب جامد ......

صحيت الصبح الساعه تسعه علي صوت ترزيع الباب 

جامد....قومت مخضوض اي ده في اي ...مين الحيوان اللي بيخبط بالمنظر ده

بصيت من العين السحريه....لقيته ابو الفتوح صاحب البيت 

....اكيد جاي ياخد الايجار.....طب افتح اكسر وشه دلوقتي

فتحت وانا متعصب.....اي يا عم أبوالفتوح في حد يخبط علي حد كده

- معلش منا بقالي ربع ساعه بخبط.....

- طب يعني انت ربع ساعه بتخبط ...افرض انا مش جوه

- لا مانا لقيت جزمتك قدام الباب عرفت انك هنا.... ع العموم معلش حقك عليا....انا قلت اعدي اخد الايجار عشان مسافر 

البلد ... ولازم اسافر بدري ...كل شهر وانت طيب

- اااه.... الايجار....لا بص ياعم ابو الفتوح بصراحه كده معلش 

الايجار هيتأخر شويه يوم ولا يومين او يمكن اسبوع ....عشان اختي بس مبعتتش فلوس يمكن حصل حاجه عندها ولا حاجه

- اممممم....لا وماله يا استاذ ادهم ....احنا اهل ميجراش حاجه ....ابقي افوت اخده وقت تاني بقي....معلش صحيتك....سلامو عليكو

- مع السلامه.....وقفلت الباب

ياساااااتر....اي ده ...في فلاحين كده ....عالم جلنفات ....أما اروح اكمل نوم

نمت وصحيت الساعه ٤ نزلت جبت اكل وفطرت وجبت شاي و بن..الفلوس بتتسرسب زي الميا ....عدي تلت ايام مفضلش معايا غير ٢٠جنيه مفيش غيرها...لو خلصت هعمل اي

فضلت قاعد ف البيت...سجايري خلصت...مقدرتش عاوز اشرب سجاره....نزلت جبت فرط...وطلعت وانا طالع قابلت كمال ع السلم

- ابو كمال بالحضن......اتاخرت عليا لي ..انا قولت انت نسيتني

- لا يا عم مقدرش ...هنتكلم ع السلم كده!!!

- لا ياعم تعالي اتفضل

ودخلنا...وقعدنا وعملت شاي وكمال ابتدي يتكلم

- بص بقي ياعم انا جبتلك شغلانه

- بجد ...اي هي ...قول بسرعه

- هيا ف عياده .. سكرتير ف عياده ...تكتب الاسامي وتحجز كشوفات وتظبط مواعيد وكده....وممكن تعمل شاي وقهوه للدكاتره ...ومتقلقش دي عياده خاصه يعني مش مستوصف

- امممم....لا حلو....وكام المرتب؟؟؟

- المرتب١٢٠٠جنيه مع الزياده

- نعم ١٢٠٠جنيه بس

- اه ياعم مالهم ...مش عاجبينك ولا اي؟؟؟

- انت عارف انا بصرف كام ع السجاير بس يا كمال.....انا صرفت ف ٣ تيام ٣٠٠جنيه الا ٢٠ جنيه قدامك اهيه

- ماهو انت بقي لازم من النهارده تسستم حياتك علي انك تحط أولويات ....يعني

 السجاير تبطلها ....بلاش يا سيدي تبطلها....خفها علي الاقل...وبالنسبه للاكل...حاول تجيب خزين بالشهر انت لوحدك يعني...هات حاجتك وانت بتعرف تطبخ كمان وعندك الغاز وكل حاجه

- كمان اطبخ.....هو انا هشتغل واجي تعبان اطبخ

- يا ادهم مواعيد شغلك خمس ساعات بس من ٤او٥لحد ١٠ بليل ....جرب بس ومش هتندم

- ماشي يا كمال هجرب ....بس انا مينفعش معايا اقبض بالشهر بقولك معييش غير ٢٠ جنيه....خليهم يقبضوني بالاسبوع حتي

- طيب انا هشوف الحكايه دي ...بس المهم بكره هعدي عليك نروح الساعه ٣نقابل الدكتور صاحب العياده

- ماشي يا صحبي....تسلم يارب علي تعبك...نردهالك انشالله

- متقولش كده احنا اخوات....اسيبك انا بقي واروح....احسن انا لسه راجع من الشغل عليك علي طول

- مع السلامه....ربنا يقويك....مع السلامه

ونزل...

١٢٠٠جنيه ده مبلغ ده...طيب ماشي...هنشوف

فضلت قاعد قدام التليفزيون لحد الساعه خمسه بعد الفجر...كان في أفلام رعب

 حلوه اوي كنت بتفرج عليها ....ونمت وصحيت حوالي الساعه٤بعد العصر...علي صوت التليفون.....اي ده...كمال....يانهار ابيض انا نسيت المعاد ...رديت عليه

- الو يا كمال

- اي يا ادهم....كل ده انا برن عليك بقالي ساعه يا اخي

- معلش والله...انا اسف راحت عليا نومه...انت فين؟؟

- انا فين!!!....انا واقف مستنيك قدام محل كاباكا الحلاق البس وتعالي ....انا اعتذرت للراجل علي التأخير ولسه قاعد مستنينا ... انجز

- طيب حاضر ...هوا

ولبست ونزلت وروحت قابلته واخدني وروحنا للراجل ....عياده حلوه وشيك وهاديه ...مليت الورقه بتاعت المعلومات وخلصت وقالي

 هيبتدي معايا من بكره واهم حاجه الالتزام بالمواعيد واتفقت معاه هيقبضني بالاسبوع...٣٠٠جنيه كل اسبوع ...وفعلا خلصنا ونزلنا من عنده واحنا ماشيين لقيت كمال بيقولي...

- بص بقي يا ابو الاداهيم.... الراجل ده عميل عندي ف الشركه اللي بشتغل فيها ...هو اه دكتور بس مبيشتغلش ف العياده ماسك الاداره بس ...ف اي حاجه هتعملها هتبقي ف وشي....عاوزك ترفع راسي

- عيب عليك ياعم اللي بتقولو ده...متصغرناش

- مش قصدي حاجه يا ادهم ...انا بس بوصيك

- لا متقلقش الشغلانه عجبتني اوي

وفعلا مشينا وروحت فضلت قاعد وكلت واخدت دوش ونمت صحيت ع الساعه تلاته العصر كده فطرت وظبطت حالي...ونزلت ...مواعيد شغلي كانت من خمسه لعشره

وصلت لحد العياده دخلت....لقيت بت قاعده ع المكتب بس حتت بت اي موزه جامده اوي

دخلت قالتلي....ايوه يافندم اتفضل.....حضرتك حاجز كشف جلديه صح

- انا ؟!.....لا....انا ادهم اللي جاي اشتغل هنا....هو دكتور شريف صاحب العياده مش موجود

- لا هو مش موجود بس هو مديني خبر انك جاي... اتفضل ارتاح....انا هكلمه ابلغه انك وصلت

وفعلا اتصلت بيه

- الو يا دكتور ..استاذ ادهم موجود دلوقتي.....اه........حاضر يا دكتور .....طيب تمام.....مع السلامه

بصتلها....قالت

- الدكتور جاي بس ع الساعه تسعه ونص كده....وهو قلي أعلمك المطلوب منك

- اه اوي اوي

- اتفضل معايا

دخلتني قوض وعرفتني دي قوضه اي ولاي دكاتره ....وكوبايه كل دكتور مكتوب عليها اسمه ....والحاجات اللي بيستخدموها كل يوم ...زي السونار لدكتور النسا...وسونار دكتور الباطنه وازاي اشغلهم.....وحاجات غسيل الودان....وحاجات دكتور الاطفال.....والعظام ....وبعد مخلصت كل ده بصتلي وقالت.....

طبعا انت صعب تتعلم كل ده مره واحده ...بس مع الوقت وبوجود الدكاتره هتتعلم ...وكل واحد هيقولك هو عاوز منك اي ...ومهمتك تظبط المواعيد بين الدكاتره والمرضي وتحجز الكشوفات سواء بالتليفون أو الناس اللي بتيجي تسأل....وانا معاك متقلقش

- اه تمام....طب وانتي اسمك اي بقي

- انا إسراء ...شغاله معاك هنا بس ف المعمل....مسؤله عن كل حاجه فيه

- هو هنا في معمل كمان

- اه

- طيب

- تعالي بقي اوريك الدفاتر بتاعت الشغل....ده دفتر الفواتير لو حد طلب فاتوره...ودي اجنده الحجز بنكتب فيها اسم المريض والموب و كشف ولا استشاره واسم الدكتور والقيمه ....ولو التسطيرات خلصت...بتسطر نفس التسطيره

واحنا بنتكلم دخلت حاله ...اخدت بياناتها وادتني ورقه فيها اسامي الدكاتره وارقام التليفونات... واتصلت بالدكتوره وعدي اليوم تمام...وابتديت اشتغل واتعلمت وبقيت بظبط الشغل....ودكتور شريف كان مبسوط مني وبقيت بقبض واديت صاحب البيت الايجار ...وجبت خزين وبقيت بطبخ وقللت سجاير

دكتور شريف مكنش ابدا بيجي الا لما يتصل معرفش ليه بس كان حاببني جدا ....وانا كمان اشتغلت خمس شهور ف العياده حبتها اوي.....وكل يوم بردو كنت بقرب من إسراء اكتر واكتر وهيا ارتاحتلي اوي....بس انا طبعا مبحبهاش انا زيي زي اي شاب معجب بواحده موزه ....وبصراحه هيا كان عندها استعداد وفراغ عاطفي وفتحت ف الكلام معايا وعرفت عنها حاجات كتير ...زي انها البنت الوحيده لأهلها وخريجه معهد نظم ومعلومات.....وكانت مخطوبه لابن عمها بس فسخت عشان بتحب واحد تاني بس طلع بيلعب بيها ....فتحت قلبها اوي اوي اوي يعني....وكانت موزه ولبسها كلو قصير وديق والبرفن اللي بيقلب المكان والميكب اللي مبتستغناش عنه ....المنظر ده يعجب الشباب لكن ميفكرش يرتبط بيها زي معمل حبيبها ....عشان انا لما اتجوز واحده اتجوز واحده حشمه مش عارضه لحمها كلو للناس ....كنت ساعات بروح انا وهي وكنت بمشي جنبها ف الشارع والله انا شاب اهو بس بتكسفلها.....والشباب عينيهم راشقين فيها وهيا عادي

بس انا ماالي هي حره....كنت ببعد عنها واحنا ماشيين ف الشارع ...وهيا مكنتش بتخاف احسن حد يشوفها وهيا ماشيه معايا ف وقت زي ده ..كنت بستعجبلها....انا انجي بتعمل كده معايا بس انا وانجي بنحب بعض ومع بعض من زمان إنما دي متعرفنيش

فتحتلي بصراحه مجال وبدل الكلام بقي ضحك والضحك بقي مياصه وهزار بالإيد وانا بصراحه انتهزت الفرصه وكنت بدوس ف الهزار وهيا مكنتش ممانعه خالص ....والكلام بدأ يتطور ويدخل ف كلام محظور مينفعش نتكلم فيه ..وهيا كانت عادي

وبدأت العلاقه تتطور من هزار ومياصه لمسكه ايد ف حضن ف بوسه...والعك ده كلو ...بس العيب من الاول عليها هيا اللي سمحت ...انا مكنتش هتجرأ كده الا لما هي تبقي فاتحالي سكه ولا اي

وفضلنا كده كل أما المكان يبقي فاضي نقعد مع بعض ومتطمنين أن الدكتور مبيجيش اصلا الا قليل وبيتصل قبل ما ييجي

لحد ما فيوم العياده كانت فاضيه ....ودخلنا كالعاده ونسينا نفسنا ....ومحسناش بحاجه غير بخضه ما يعلم بيها الا ربنا

لما لقيت الدكتور قصادي

                  الفصل الثالث من هنا

لقراءة باقي الفصول من هنا