رواية موضوع عائلي الجزء الثالث3 بيت الهنا الفصل السابع والثلاثون37 والثامن والثلاثون38 بقلم رحاب القاضي

بتبدأ حلقة النهارده بيوسف وهو واقف قدام نيلي في اوضتهم في الاوتيل اللي المفروض هيقضو فيه اول ليله ليهم بعد جوازهم، وقالها يوسف بعصبيه... 

يوسف 

بتشتكي لامك فاكره اني كده هخااف منكم؟!.. 

نيللي بهدوء

هي اللي جات وعرفت انك ما كنتش بايت هنا وشافت وشي وعرفت انك مديت ايدك عليا انا ما قولتش حاجه.. 

يوسف 

اسمعي يا بت انتي اللي بيني وبينك ما حدش يعرفه يعني امسح بكرامتك الارض بيني وبينك بس بره قدام الناااس نبقي حلوين مع بعض لحد ما الحوار ده يخلص.. 

اول ما خلص كلامه ضربته بالقلم وقالت بحده 

لا عاش ولا كان اللي يفكر يمد ايده عليا او يدوس علي كرامتي يا يوسف.. 

_اتحولت ملامحه للغضب ورمي جاكيت بدلته اللي كان في ايده علي الارض وقرب منها وقال.. 

يوسف 

انا هوريكي ازاي تمدي ايدك عليا يا بنت الجرجيري.. 

_قال كلامه وزقها جامد علي السرير وقرب منها وهو ماسك ايديها الاتنين ومقيد حركتها وهي بتحاول تبعده عنها بكل قوتها وقالت بغضب ونبره خائفه... 

نيلي

انت اتجننت سيبني يا يوسف.. 

يوسف بخبث

مش عامله جامده وبتمدي ايدك اهو في لحظه خليتك تبقي شبه الفار المبلول ولسه... 

اتملت عينيها دموع وقالت بحده 

يعني انت كده راجل عشان بتستقوي عليا؟!.. 

قرب وشه منها اكتر وقال

انتي عندك شك اني مش راجل.. 

نيلي بحده 

ابعد عني ايااك تقربلي.. 

ابتسم بسخريه وقرب منها وقال بنبره خبيثه 

ليه الخوف ده كله هو الحرام بالنسبالك احلي من الحلال ولا ايه؟ 

نزلت دموعها في الوقت ده وقالت بجديه 

انا مش حقيره زيك عشان افكر كده، وفي الحالتين انا مش طيقاااك... 

_بدأ يحس بالشفقه ناحيتها اول ما شاف دموعها ونظرة عينيها اللي كلها حزن عكس اول مره شافها فيها، وبرغم تعاطفه معاها الا ان عِنده خلاه يضغط علي ايدها بكل قوته وقال بنبره صارمه.. 

يوسف 

اقسم بالله لو ايدك اتمدت عليا تاني لاكسرهالك فاهمه يا بت انتي.. 

ردت عليه بصوت كله الم وقالت 

سيب ايدي يا يوسف هتتكسر بجد.... 

بعد عنها وقام وقال 

هغير هدومي وهنمشي.. 

مسحت دموعها وقالت 

ريم صاحبتي جايه هتاخدني وارجع شقتي.. 

يوسف

ترجعي شقتك تعملي ايه؟ 

نيلي

هقعد فيها اكيد يعني مش هقعد معاك في بيت واحد 

يوسف 

اومال ابوكي كلف نفسه وبعت عفش لحد بيتنا وفرش الشقه اللي هنتنيل نعيش فيها ليه؟ 

ردت عليه وهي ماسكه ايدها بألم وقالت 

ابقي لما تشوفه اسأله 

يوسف بحده 

بصي سواء جوازنا حقيقي او لا انتي دلوقتي مراتي وما ينفعش تقعدي لوحدك لان اي تصرف هتعمليه هيبقي في وشي انا، وانا ما اضمنش وانتي قاعده لوحدك ايه اللي ممكن يحصل 

نيلي بحده 

احترم نفسك انا اشرف منك ومن اللي زيك، ومش رايحه معاك لبيتك وانت حر اخبط دماغك في الحيط 

يوسف

لا انا هكلم ابوكي اقوله وهو يتصرف معاكي عشان ده ما كانش اتفاقنا من الاول.. 

نيلي بقلق 

استني يا يوسف خلي كل واحد براحته بقي.. 

يوسف بجمود 

هاخد شاور واخرج الاقيكي جاهزه عشان نمشي ومش عايز رغي كتير.. 

_قال كلامه وسابها ودخل الحمام، وهي قعدت علي السرير ودموعها نزلت وهي بتبص بحزن لايدها اللي لسه وجعاها ولونها بقي احمر جدا وما كانش قدامها حل غير انها تسمع كلامه وهي مش عارفه ايه اللي ممكن يحصل لما تعيش مع عيلة يونس الصاوي... 

ــــــــــ #بقلم_الكاتبه_رحاب_القاضي ــــــــ

_وفي الوقت ده في الصعيد كان واقف عز الدين مع شعبان ابن خلف ورجالته اللي محاوطين عربية عز اللي فيها روان وهما ماسكين اسلحتهم... 

عزالدين 

يا حبيبي اكسر الشر وسيبني امشي وبلاش تدخل انت وابوك في مشاكل معايا انا كمان.. 

شعبان 

اهو الحج خلف جالك بنفسه هو يتفااهم معاك.. 

وبص عز وراه ولقي خلف فعلا جاي بعربيته فقال بغيظ

الله يخربيتك انت وابووك في ساااعه واحده... 

ونزل خلف من عربيته وقال 

ايه يا شعبان موقف الحج عز الدين ليه اكده؟ 

عز 

وبعدين بقي في جر الشكل ده، بقولك. ايه يا خلف انا بنتي معايا وعايز امشي وبلاش تخلي ابنك يلعب معايا عشان انا لو حطيته في دماغي هتحزن عليه.. 

خلف بجمود 

انا ما بتهددش بقيت مسنود من اللي اعلي من عيلتكم كلها، المهم انا مش هاخد بت اخوك معانا بس تقول لولد اختك يطلق أسرار بالذووق ده لو عايز الشر بينا يخلص واهملكم في حالكم.. 

عز 

بس كده من عينيا هقوله يا كمال طلق اسرار حاضر ممكن نمشي بقي 

خلف 

انا ما نقصش مسخره يا راجل انت، انت فاهم كلامي كويس.. 

عز 

ما انا قولتلك هقوله فض بقي النمره دي عشان بقيت بايخه واحمد ربنا يا خلف انت وابنك ان انا راجل في حالي وماشي ورا القانون ومش عايز ادخل في اللعبه الوسخه بتاعتكم دي والا كنت طربقتها علي دماغكم انتو واللي مسندوين بيه.. 

اتنهد خلف بضيق وقال 

امشي يا عز بيه وما تتنساااش اللي قولتلك عليه توصله لولد اختك.. 

_ابتسم عز بهدوء ورااح ركب العربيه جنب روان اللي كانت خايفه جدا منهم ومن نظرااتهم ليها هي وعز الدين وقالت.. 

روان 

هما كانو عايزين ايه؟ 

عز بغيظ 

بيهزرو معانا ولاد الظريفه.. 

_واخد روان ورجعو البيت وكانت عليااء قااعده مستنياااهم وقالت بقلق اول ما شافتهم.. 

علياء

انتو كنتو فين كل ده قلقتوني عليكم.. 

عز 

ما تقلقيش ما فيش حاجه، المهم كمال عامل ايه؟ 

علياء

لا احسن من الاول بكتير وكمان الدكتور قال ممكن يخرج ويكمل علاج من البيت بس المستشفي احسن وامان اكتر.. 

روان 

فين رضوي يا عمتو؟ 

علياء

سيبتها قاعده مع ابوها والممرضه هناك واخده بالها منها، وانا جيت بس اطمن عليكم وراجعه هناك تاني.. 

عز 

استني طيب نرتاح شويه وهوصلك انتي وروان هناك، المستشفي امان اكتر من البيت وانا ما اضمنش خلف وابنه في دماغهم ايه.. 

ــــــــــ #بقلم_الكاتبه_رحاب_القاضي ــــــــ

وبالليل في بيت الاستاذ حسن كانت قاااعده هنا هي ورضوي في اوضتها وقالتلها رضوي بصوت واطي.. 

رضوي 

اوعي يا هنا حد يعرف حاجه عن اللي شوفتيه.. 

هنا 

بس انا مش راضيه عن اللي بتعمليه ده، جلساات نفسيه يا رضوي ليه انتي مجنونه ده انتي ست العاقلين ده كلنا في البيت بناخد رئيك في كل حاجه عشان انتي اكتر واحده فاهمه فينا 

رضوي 

يا هنا الجلسات النفسيه دي بيبقو قاعدين فيها ناس كلهم عاقلين بيفضلو بقي يحكو عن مشاكلهم والعقده اللي في حياتهم زي فضفضه كده ومش شرط احكي يعني ممكن اقعد اسمع وبس فاهمه

هنا 

لا مش فاهمه ومش عايزاكي تروحي

رضوي بضيق

طيب يا هنا هو اصلا الحجز بتاعي بعد شهر هفكر تاني ويمكن اغير رأيي، وما تمسكيش اللابتوب بتاعي تاني مدام مش راضيه تفهميني وتسبيني براحتي.. 

هنا 

يااه ده انا بهزر معاكي روحي يا حبيبتي بس كله الا اللابتوب عشان بذااكر عليه والله... 

دخلت عندهم في الوقت ده ليلي وقالت بحده لرضوي

انتي سيبتي الشغل يا بت انتي؟ 

رضوي

ايوه اشتغل ليه انا عندهم تاني؟.. 

ليلي

جوز اختك كلمني وقالي ان يوسف ما بيروحش مكان شغلك خالص وان في اتفاق بينك وبين الشركه ان ما ينفعش تسيبي الشغل 

رضوي بسخريه

قوليلو يحبسني وبرضو مش هروح اشتغل عندهم تاني ومش هشتغل اصلا انا هقعد في البيت.. 

ليلي قعدت جنبيها وقالت 

لا تقعدي في البيت ازاي، بلاش شغل في شركة الصاوي دي روحي شوفي شغل في اي شركه تانيه انا هخلي عمك يدورلك 

رضوي 

لا يا ماما مش هشتغل تاني 

ليلي

يا بنتي اطلعي وادخلي خلي الناااس تشوفك 

رضوي 

هبقي اطلع وادخل حاضر قومي بقي شوفي هتعملي ايه 

ليلي

انتي بتكلميني كده ليه يا بت انتي هو انا بشحت منك، ومدام هتقعدي بي البيت اطلعي جهزي العشا وروقي اوضة اخوكي يلااا.. 

رضوي بغيظ وهي خارجه من الاوضه

هو انا ما ينفعش ارتاح خالص يعني ايه ياربي ده 

ليلي

بطلي برطمه بدل ما اجيلك يا بت.. 

وقامت لكمت هنا اللي كانت بتضحك في كتفها بقوه وقالت

وانتي يا تذااكري يا تطلعي تساعديني بره في شغل البيت.. 

هنا بألم 

حاضر والله بذاكر اهو.... 

ليلي قفلت الباب وقعدت جنبيها وقالتلها

قوليلي فكرتي في موضوع جوازك انتي وطارق؟ 

هنا بحزن 

ما ينفعش يا ماما والله.. 

ليلي

ليه طيب ما ينفعش هو حلفلي انه مش هيخليكي تسيبي الجامعه ولو حصل غير كده كلنا هنقف في صفك، وكمان هتأجلو الخلفه لحد ما تخلصي دراسه هو بس مش عايز يقعد لوحده في شقته وعايزك معاه في اسرع وقت عشان بيحبك ده انا ابني وعرفااه 

_اتنهدت هنا بضيق وما ردتش عليها وليلي طبطبت علي كتفها بهدوء وقالت.. 

ليلي

علي العموم القرار ليكي ما حدش هيغصب عليكي ولو قولتي مش عايزه تتجوزي دلوقتي انا اول واحده هقف في صفك ومش هخلي حاجه تحصل غصب عنك، انا بكلمك دلوقتي وبنصحك كأم بتنصح بنتها وفي الحالتين انا معاكي ومع قرارك.. 

هنا 

هفكر يا ماما حاضر وهقولك.. 

ليلي ابتسمت وقالت 

براحتك خالص معاكي شهر شهرين احنا اهو قاعدين.. 

ابتسمت هنا وقالت 

حاضر ان شاء الله خير

ليلي

ان شاء الله يا حبيبتي، كملي بقي مذاكره و.... 

_سمعو في الوقت ده صوت حاجه بتتكسر فقامت ليلي وقالت بحده وهي خارجه من اوضة هنا.. 

ليلي

كسرتي ايه يا همي التقيل.. 

ــــــــــ #بقلم_الكاتبه_رحاب_القاضي ــــــــ

_وفي بيت يونس الصاوي كانت نيلي قااعده بتتفرج علي التلفزيون والباب خبط فقاامت فتحت وكانت شهد ومعاها الشغاله اللي ماسكه صنية الاكل... 

نيلي

اهلا وسهلا يا طنط اتفضلي.. 

خلت شهد وقالت بهدوء

بعتلك انتي ويوسف عشان تتعشو معانا ما نزلتوش فقولت اجيبلكم العشا لحد هنا.. 

نيلي

يوسف لسه نايم وانا اكلت حاجه خفيفه عشان ماليش نفس للاكل ده خالص.. 

شهد بصت للشغاله وقالت 

دخلي الاكل في المطبخ وانزلي.. 

الشغاله 

حاضر يا هانم.. 

ودخلت الشغاله المطبخ وشهد مسكت ايد. نيللي وقالت 

تعالي بقي نقعد مع بعض شويه وبلاش تقعدي لوحدك كتير انزلي اقعدي معايا انا ويارا وريناد مرات يزن هتحبينا وتحبي قعدتنا جدا علي فكره... 

قعدت نيلي جنبيها وقالت

حاضر.. 

شهد 

هو انتي حامل في الشهر الكام بالظبط؟ 

نيلي بأحراج 

تلات شهور تقريباً.. 

شهد 

هو انتي مش متابعه الحمل مع دكتور.. 

نيلي

لا ما اهتمتش بصراحه اروح لدكتور.. 

شهد

ما ينفعش يا حبيبتي انا هحجزلك عند دكتور كويس وهقولك علي المواعيد.. 

خرج يوسف من اوضته في الوقت ده وقال

دكتوره يا ماما انا مراتي ما تروحش عند. رجاله.. 

اتنهدت نيللي بضيق اول ما شافته وشهد ابتسمت بهدوء وقالت

ايه بتغير يا حبيبي

يوسف قعد جنب شهد وقال

ويوم ما اغير اغير علي دي، انا بتكلم علي المبدأ ازاي يعني  تتكشف علي راجل مش اسمها مراتي.. 

شهد بحده 

طيب اتكلم كويس مع مراتك... 

قامت نيللي وقالت بحزن 

بعد اذنكم انا داخله انام... 

يوسف بحده 

ايه قلة الذوق دي امي قاعده معانا يبقي تترزعي لحد ما هي تنزل وبعدين ابقي ادخلي اتخمدي براحتك 

شهد 

انت بتكلمها كده ليه يا زفت انت، ادخلي يا حبيبتي نامي حقك عليا انا ده هو اللي عديم الذووق هو وابوه.. 

وكانت لسه هتدخل اوضتها هي ويوسف فزعق فيها وقال بحده

عندك. يا سكر شوفي اوضه تانيه اقعدي فيها اكيد مش هقعد معاكي في اوضه واحده.. 

_اتملت عيونها دموع بعد اهانته ليها وردت عليه بنبره مهزوزه وقالت... 

نيلي

انا اصلا كنت داخله اخد حاجتي من جوه وهقعد في اوضه تانيه ما تقلقش.. 

ودخلت الاوضه وقفلت الباب وشهد قالتله بنبره غاضبه 

في حد يعمل كده كسفتها قدامي.. 

يوسف 

فكك يا ماما هي تستاهل 

شهد بحده 

هي تستاهل كده وانت بقي تستاهل ايه والغلط الاكبر غلطك انت ؟ 

يوسف 

انتو مش خلتوني اتجوزها واسيب رضوي يبقي اتعامل معاها بالطريقه اللي تريحني 

شهد 

بس كده حرام عليك انت بتظلمها، وبعدين دي بنت ناس مش واحده من الشارع عشان تعمل فيها كده 

يوسف 

والله بعد اللي حصل بيني وبينها هي وبنات الشارع ما فيش فرق بينهم بالنسبالي

شهد 

لا طبعا في فرق كبير نيلي بنت متعلمه وكويسه وبنت ناس غصب عنك، والاهم من ده انها ام ابنك علي فكره لو فضلت تعاملها كده ابنك ده هيتولد وهو بيكرهك ومش طايقك... 

يوسف بقلق

انتي بتتكمي بجد؟! 

شهد بخبث

اومال... تخيل بقي ابنك يتولد وهو بيكرهك احساس وحش اووي

يوسف 

لا انتي بتحوري عليا عشان انتي كنتي حامل في يارا وكنتي بتتخانقي مع بابا كتير هل هي بقي بتكره بابا دلوقتي ده بتحبه اكتر منك.. 

شهد 

ومين قالك اني كنت بكره ابوك، يا حبيبي ابوك مهما يعمل فيا هفضل بعشقه وما فيش راجل غيره يملي حياتي حتي بعد ما خلفتك انت واخواتك برضو هو ليه حته لوحده كده جوه قلبي

يوسف بسخريه

بيعرف يثبتك اقسم بالله بيخليكي تبيعي كرامتك برخص التراب.. 

شهد 

اتلم يا ولد انت واتعدل مع مراتك والا والله هقول لابوك وهو يتصرف معاك، البنت شكلها غلباانه حرام تظلمها وتوجعها بكلامك ده.. 

يوسف بلامبالاه

طيب.. 

شهد 

ربنا يهديك يا يوسف انا نازله وانت تدخل تصالحها فاهم ولا لا؟ 

يوسف 

حاضر يا ماما والله هصالحها عشان خاطرك.. 

_وسابته شهد ونزلت وهو دخل اوضته لقي نيلي مطلعه كل هدومه ورميااهم علي السرير وقالتله بحده.. 

نيلي

انا هقعد هنا خد هدومك واقعد في اي حته تانيه زي ما تحب.. 

يوسف بخبث

لا انا وانتي هنقعد هنا خلاص.. 

نيلي بحده 

هو بمزاج اهلك ولا ايه، ولا انت فاكرها جوازه بجد 

يوسف 

ايوه هي جوازه بجد لحد ما تولدي.. 

نيلي

بتحلم هو بالكتير شهر شهرين وهمشي من هنا ونتطلق قال اقعد معاك لحد ما اولد كمان انا ناقصه.. 

يوسف 

لا ما هو انا مش هسيبلك. ابني علي فكره انتي هتقعدي معايا هنا وبالطريقه اللي انا عايزها لحد ما تولدي وبعد ما ابني يجي تاخدي بعضك وتمشي لوحدك.. 

نيلي بحده 

انت بتحلم اني اسيبلك ابني وامشي.. 

يوسف 

ده غصب عنك انا ابني مش هيتربي مع واحده زيك بأخلاقك دي.. 

نيلي بعصبيه

لا وانت حوش الاخلاق اللي عندك يا شيخ يوسف.. 

يوسف 

انا معايا ماما واختي ومرات اخويا هيااخدو بالهم منه انما انتي اهلك بايعينك وقاعده لوحدك اسيبلك ابني او بنتي ازاي انا بقي.. 

نيلي بحزن 

انت مش محترم وعلي فكره لا انت ولا اهلك تقدرو تحرموني من ابني يا يوسف.. 

يوسف بسخريه

هنشووف لمي الحاجات دي في الدولاب وعاجبك تقعدي معايا هنا اهلا وسهلا مش عاجبك في داهيه شوفي اي اوضه تانيه اقعدي فيها.. 

_سابتله الاوضه كلها وخرجت وراحت قعدت في اوضه تانيه لوحدها وحطت ايدها علي بطنها وقالت بدموع.. 

نيلي

مش هيقدر ياخدك مني انا اصلا ماليش غيرك.. 

ــــــــــ #بقلم_الكاتبه_رحاب_القاضي ــــــــ

_وبعد شويه في المستشفي اللي فيها كمال كان مااسك موبيله وبيتكلم مع حد وبيقوله.. 

كمال

تمام انا هجيلك حالا بس انت ظبط الوضع زي ما قولتلك بالظبط.. 

_وقفل الفون وقاام من علي السرير وهو ماسك كتفه بألم وفتح الشنطه اللي فيها الهدوم بتاعته وطلع قميص وبنطلون وغير هدومه بسرعه واول ما خرج من الاوضه اللي كان نايم فيها لقي  عز في وشه وقاله.. 

عز 

انت رايح فين؟ 

كمال

انت اللي بتعمل ايه هنا يا خالي وسايبهم لوحدهم في البلد 

عز 

لا ما امك وبنتك وروان هنا في المستشفي

كمال

هنا بيعملو ايه؟ 

عز

بص خلف وابنه يقدرو يعملو اي حاجه جوه البلد، بره البلد ما يقدروش فانا عشان الامان يعني حجزتلهم اوضه هنا جنب اوضتك وخليتهم يباتو هنا.. 

كمال بغيظ

هو فندق دي مستشفي كنت خد. اي شقه ايجار وخليهم يقعدو فيها 

عز

لا هنا امان اكتر، انت بقي رايح فين.؟ 

كمال 

رايح اجيب مراتي.. 

عز 

تمام يا حبيبي وهاتلي معاك اتنين كيلو مانجا، انت عبيط يا ابن الهبله خلف وابنه عايزين يخلصو عليك هتروحلهم بنفسك 

كمال

انا مظبط كل حاجه ماهر اللي كان شغال مع عبدالله مكان عمر الله يرحمه كلمته وخليته ظبطلي ناس من اللي شغالين عند خلف وهدخل وهاخد اسرار وهمشي من غير ما حد يحس بيا

عز 

وانت فاكرها بالسهوله دي وانت تعبان، يا كمال خلف ده مايه من تحت تبن ممكن يكون عاملك كمين.. 

كمال

ما تقلقش انا عامل حسابي ولو حسيت باي خطوره هعرف ارجع 

عز 

طيب انا هاجي معاك مش هسيبك تروح لوحدك.. 

كمال

لا خليك معاهم هنا لاحسن يبقي فعلا كمين ويعملو حاجه في امي او روان او بنتي وما تقلقش عليا يا خالي 

عز بقلق

ازاي ما اقلقش بس ده انت رايح لشياطبن برجليك، طيب استني عبدالله قرب يخرج وو.. 

قطع كمال كلامه وقال بحده 

انا مش هستني اخويا يطلع عشان يرجعلي مراتي وانا ابقي قااعد. متداري زي النسوان، انا يا اجيبها من عندهم واحميها منهم كمان يا هبقي مش راجل يا خالي.. 

قال كمال كلامه ومشي وعز طلع موبيله وكلم الظلابط وقاله

ايوه يا علاء باشا انا طالب مساعدتك في موضوع مهم دلوقتي.. 

_ وبعد. شويه كان واقف كمال هو وماهر جنب بيت خلف وماهر قاله بجديه.. 

ماهر

ده الباب اللي هندخل منه يا كمال بيه، وجوه في حد هيكون مأمن الطريق.. 

كمال

طيب يلا بينا ندخل.. 

ماهر

استني اكده ده صوت الشرطه.. 

_بصو الاتنين لبعض بقلق، وراحو وقفو علي مساافه قريبه وشاافو الشرطه وهي بتقبض علي خلف وابنه... 

_وعلاء بص لكمال بطرف عينه وكأنه عارف الخطه بتاعته وبيسااعده فيها.. 

ماهر

الظااابط شافنا يا كمال بيه والله بصلنا وما اتكلمش.. 

كمال

تعالي ندخل بسرعه دلوقتي ما حدش هيبقي واخد باله من حاجه يلا.. 

_ودخل فعلا كمال ومعاه مااهر وكان مستنيهم واحد من رجالة خلف اللي قال.. 

ـ خشو من الناحيه دي في واحده من الشغالين هتطلعكم لاوضة اسرار ما تقدرش تخليها تنزل لحالها عشان خايفه حد يشوفها 

كمال 

تمام خليك انت يا ماهر هنا ولو حصلت حاجه كلمني.. 

_ومسك كمال المسدس بتاعه ودخل لبيت خلف وكان المطبخ كله ضلمه ولقي ست واقفه وقربت منه وقالت.. 

ـ اطلع لفوق علي طول من السلم ده اول اوضه في وشك فيها الست أسرار.. 

كمال

انا شوفتك فين قبل كده؟ 

ـ انا نعيمه اللي كنت شغاله عندكم، بس الظروف اللي حصلت خلتني اجي اشتغل اهنا بس غصب عني والله، وانا والله اخدمكم بعنيا ده خير عبدالله بيه والست علياء مغطيني.. 

كمال

طيب خليكي واقفه هنا لحد ما اجيبها وانزل 

نعيمه 

بس الاوضه مقفوله بالمفتاح وانا ما عرفتش اجيب المفتاح، والحجه فتحيه مرت الحج خلف معاها نسخه منه بس ما اعرفش مخبياها فين؟ 

كمال مسك سكينه من جنبيها وقال

لو حد كان طالع فوووق صوتي اعملي نفسك شوفتي فار او اي حاجه 

نعيمه 

تمام.. 

ـ وطلع فعلا كمال فووق ومسك كتفه بألم، واول ما وصل عند اوضة أسرار فتح الباب بالسكينه اللي في ايده وهي كانت قااعده علي السرير وباين عليها الخوف لحد ما شافته واقف قدامها ابتسمت باتسااع وقاامت بسرعه وحضنته وقالت ببكاء.. 

أسرار 

انت عايش وكويس صح؟ 

ابتسم بهدووء وهو بيضمها ليه بقوه

ايوه طبعا اومال هيكون عفريتي اللي واقف قدامك ده.. 

أسرار بعدت عنه وقالت بقلق

انت ازاي دخلت هنا لو شافوك مش هيحصل كويس 

كمال 

ما تخافيش خلف وابنه اتقبض عليهم وانا دلوقتي هاخدك وهنمشي وما حدش هيقدر يوقفني يللا.. 

_ومسك ايدها بكل قوه واخدها ونزلو تحت واول ما طلعو من البيت الحارس بتاع خلف قالهم.. 

ـ قبل ما تمشو فين بااقي فلوسي اللي  اتفقنا عليها يا ماهر

كمال

طلع الشنطه اللي في العربيه دي يا ماهر واديها ليه.. 

_سمع ماهر كلامه وطلع شنطه صغيره فيها فلوس واخدها الحارس وقال بنبره كلها سعاده.. 

ـ انا تحت امرك في اي حاجه تاني يا كمال بيه؟ 

ماهر

ربنا ما يحوجنا ليك ولا لـ اللي زيك تاني.. 

_وركب كمال العربيه جنب أسرار وماهر ركب من قدام وساقها وبان علي كمال الالم وبدأ جرحه بنذف فأسرار قالتله بخوف.. 

أسرار 

انت لسه تعبان يا كمال 

ماهر

هنرووح علي المستشفي يا كمال بيه حالتك بقيت وحشه قوي.. 

كمال

لا وصلني للمكان اللي قولتلك عليه الاول.. 

أسرار 

مكان ايه يا كمال انت فعلا لازم تروح المستشفي.. 

كمال بصوت كله تعب

مكان هتقعدي فيه لحد ما اجيب امي وروان ورضوي ونرجع القاهره، عشان لو خلف عرف مكانك فين في سوهاج مش هيسكت غير لما يرجعك عنده تاني.. 

أسرار بقلق

هو عبدالله فين؟ 

كمال بضيق

لسه القضيه بتاعته شغاله.. 

_وفعلا اخدها كمال لشقه بعيده جدا عن البلد، وسابها هناااك ورجع المستشفي وكان تعبان جدا اول ما شافه عز قاله.. 

عز 

ايه اللي حصل حد عملك حاجه.. 

كمال بتعب

خلي الدكتور يجي انا ما كنتش فاكر اني هتعب كده 

عز 

ما انت مش شاكينك بدبوس ده انت مضرووب بالناار وعامل عمليه كانت خطر تعالي ندخل، بس ايه رئيك في الحركه اللي عملتها كلمت الظابط علاء وقولتله كل اللي انت عملته وهو قبض علي خلف وابنه في تهمه هايفه عشان يخليك تاخد أسرار من غير ما حد ياااخد باله منك 

كمال

ومدام هو عارف ان مراتي مخطوفه ما انقذوهااش ليه مش هما رجالة الشرطه والقانون 

عز 

القانون اللي هنا قانون الصعيد ما يقدرش يدخل بيت خلف وياخد اسرار اللي هي بنت اخته، وبعدين كلمه بس من سلطان العدوي اللي هو خلف متحامي فيه يخلي علاء يروح في خبر كان.. 

كمال

اومال لما عبدالله هيخرج ان شاء الله هيحصل ايه؟ 

عز 

ما اعرفش وما حدش فينا يقدر يعرف ايه اللي في دماغ اخوك، المهم مراتك. فين؟ 

كمال

اتعالج بس الاول وهنروح ناخدها ونرجع كلنا القاهره وهبقي اجي انا هنا لعبدالله بس اخف شويه. 

عز 

ارجع انت وخالك حسن هيبقي معاك هناك، وانا مش همشي من هنا غير لما عبدالله يخرج.. 

ابتسم كمال وقال

ربنا يخليك لينا يا خالي.. 

ــــــــــ #بقلم_الكاتبه_رحاب_القاضي ــــــــ

_وبعد كام يووم في بيت الاستاذ حسن كانت قاعده رضوي بتتفرج علي التلفزيون وطلع طارق من اوضته وقعد جنبيها وقال.  

طارق

هنا فين؟ 

رضوي ابتسمت وقالت

ما بقتش تسأل غير علي هنا انت، اتقل شويه يا حبيبي مش كده.. 

طارق

اخلصي هنا فين من الصبح مش شايفها؟ 

رضوي

رراحت الجامعه.. 

طارق بغيظ 

وما قالتليش ليه البت دي لازمها تربين من اول وجديد؟ 

رضوي 

وتقولك انت ليه اصلا، اخدت الاذن من بابا وماما.. 

طارق 

بتاكلي ايه هاتي حته.. 

رضوي 

انت عارف ايه اللي باكله ده اصلا؟ 

طارق

لا بس شكله حلو هاتي حته.. 

رضوي 

ياربي علي الرزاله، لا مش هديك انا عامله لنفسي.. 

طارق 

هو ايه ده طيب كيكه وجيلي مع بعض ازاي؟ 

رضوي 

كيك بتتعمل حته واحده كده وانا عملاها لنفسي.. 

طارق 

عماله تاكلي وقاعده زي البطه البلدي كده والمفروض تدخني شويه لا بتخسي بقيتي شبه مسمار عشره.. 

رضوي 

انت مالك انت قووم من عندي يا طارق.. 

طارق ضحك وقال

خلاص خلاص سمعتي عن اللي عملو كمال عشان مراته؟؟ 

رضوي بضيق

سمعت.. 

طارق 

االا ما شوفنااه عمل ربع كده عشانك فالحه تستنيه بالعشر سنين لحد ما اداكي خازوق معتبر.. 

رضوي 

انت عايز ايه يا طارق عايزني اتعصب عليك ونتخانق يعني.  

طارق بخبث

انا لا خالص انا لو عايزنا تتخانق كنت جيبتلك سيرة يوسف مثلا يا رضوي خوازيق ههههههههه..

رضوي بحده 

لا حوووش الواد خليني ساكته بلاش افكرك بسندس وعمرو اللي ضحكو عليك ونصبو عليك في فلوسي اللي كنت سالفها مني ولولا عبدالله جابلك حقك منهم كان زمانك قاعد كحيان.. 

طارق بخبث

بس حلوه البت اللي اتجوزها يوسف دي وصغيره وسمرا كده شوكلاتايه.. 

_اتنهدت رضوي بضيق وفضلت تاكل من غير ما ترد عليه وهو قال بخبث.. 

طارق

مش ده اللي كنتو سوا شمس مع الهوا خليك ساكت يا لسااني مش هنعمل محتوي.. 

رضوي 

بطل رخامه بقي يا طارق.. 

طارق 

خلاص والله كنت بهزر معاكي وبعدين انا وانتي لو ما عيرنااش بعض ما نبقاش رضوي وطارق.. 

رضوي بحزن 

بص هزر في اي حاجه الا موضوع يوسف عشان خاطري.. 

طارق 

لا يوسف ولا غيره وبعدين هو اللي خسرك يا عبيطه والله، المهم في واحد صاحبي طلب ايدك لاخوه بصي هو اخوه ده كان متجوز قبل كده ومراته ماتت وعنده ولد صغير بس هو كويس انا اعرفه وشوفته اكتر من مره.. 

رضوي بضيق

لا يا طارق انا مش عايزه اتجوز دلوقتي.. 

طارق

يا بنتي دي فرصه وبعدين انتي بتتمنعي علي ايه العمر هيعدي عليكي وكمان كام سنه هتلاقي شعرك بقي ابيض وسنانك وقعت هو انتي عندك كام سنه دلوقتي مش اربعين.. 

رضوي بحده 

جاتك اربعين عفريت ياكلوك كبرتني عشر سنين مره واحده.. 

طارق 

والله خلقتك بالبؤس ده تقولي خمسين ستين مش اربعين بس.. 

رضوي بغيظ

انا قايمه من جنبك خالص وما تجيبش سيره عن العريس ده قدام بابا وماما والا والله العظيم يا طارق هزعل منك لاخر عمري

طارق بجديه

طيب نتكلم بجد بقي انتي هتفضلي كده لحد امتي؟ 

رضوي بدموع 

انا مش هتجوز واحد كان متجوز قبل كده ومعاه طفل كمان وهياخدني سد خانه وبس، فهمت يا طارق انا رافضه ليه..

وحطت الكيك قدامه وقالت 

خد اطفح سديت نفسي.. 

_قالت كلامها ودخلت اوصتها وطارق بصلها بحزن، فهي مهما حاولت تداري حزنها ووجعها الا ان كلهم عارفين انها بتمر بفتره صعبه.. 

ــــــــــ #بقلم_الكاتبه_رحاب_القاضي ــــــــ

_وفي بيت كمال في القاهره دخلو كلهم البيت، وكانت روان مدايقه جدا وكمال قال.. 

كمال 

في حراس بره هيبقو واقفين علي الباب، وما فيش خروج من البيت غير معايا.. 

روان بحده 

مدام كده كده هنتحبس ما كنت سيبتنا نقعد في البلد احسن واهو ابقي قااعده جنب جوزي.. 

كمال 

يا ستي هتقعدي ازاي في البلد لوحدك؟.. 

روان 

كنت هقعد مع عمي عز وبعدين مدام جيت القاهره هروح اقعد في بيت اهلي.. 

كمال 

لا هتقعدي هنا ولما عبدالله يجي اعملي اللي عايزااه 

روان بحده 

هو انت هتمشي كلامك عليا ولا ايه، انا ايه اللي يخليني قاعده محبوسه هنا 

كمال بضيق

امي كلميها انتي انا مش نااقص روان وزن روان ده عبدالله ليه الجنه..

علياء

بقولكم ايه انا فيا اللي مكفيني وداخله انام... 

قالت كلامها ودخلت اوضتها وكمال قال

انا كمان داخل انام واهدي يا روان ما تعمليش مشاكل لنفسك ولاهلك قعدتك هنا امان اكتر.. 

ودخل كمال هو كمان اوضته وأسرار قالتلها

هما معاهم حق انتي ما تعرفيش خلف وابنه ممكن يعملو ايه وخصوصا ان كمال اخدني من وسط بيتهم مش هيسكتو.. 

روان 

ماشي بس جوزك ده ما يتأمرش فيا، ما هو اللي ناقص كمان ان كمال يعمل عليا واحد.. 

طلع كمال من اوضته وقال 

ما تتلمي يا بت انتي انا واحد غصب عنك وعن اللي يتشددلك.. 

روان بحده 

انا مش هرد عليك عشان انت بني ادم مهزأ اصلا.. 

طلعت علياء هي كمان من ازضتها وقالت 

ما تتلم انت وهي احنا في ايه ولا في ايه، وانتي يا ست روان هتبقي مبسوطه لو روحتي قعدتي عند اهلك وخلف عملك حاجه انتي وهناك ما كفايه اللي حصل لاخوكي، كمال بيقولك هنا امان خليكي قاعده وهانت وجوزك هيخرج ان شاء الله من اللي هو فيه واعملي اللي عايزااه وقتها.. 

روان 

طيب وانا هنام فين بقي؟ 

كمال

مع رضوي في اوضتها او مع امي مش حجه دي. 

رضوي 

لا انا هنام مع أسرار.. 

روان 

انا اصلا ما كنتش هنام جنبك انا ما بعرفش انام جنب حد.. 

كمال بغيظ 

مش بقولكم عبدالله ليه الجنه انه متجوزها.. 

روان 

ما تحرم نفسك 

كمال 

انا محترم غصب عنك 

علياء

خلاص انا هبات عند رضوي وانتي نامي لوحدك في اوضتي يا روان.. 

رضوي 

لا انا عايزه أسرار تقعد معايا.. 

أسرار

حاضر يا حبيبتي هقعد معاكي.. . 

كمال

طيب هاتيها وتعالي وسيبي ماما تنام براحتها.. 

_وكل واحد فيهم دخل اوضته وطلع كمال بعد شويه من الحمام وقال.. 

كمال 

مالكم قااعدين كده ليه؟ 

أسرار 

لا ما فيش حاجه.. 

رضوي 

انا هروح انام عند تيته.. 

قالت كلامها وخرجت بسرعه وكمال قال

مالها هي زعلانه ليه؟ 

أسرار

هو انت مش ناوي تحسن علاقتك ببنتك، هي كانت عايزاني انا ابات معاها في اوضتها ولما عرفت انها هتنام جنبك خافت وقالت هتروح تبات عند مرات عمي.. 

كمال قعد علي السرير وقال بحزن 

عارفه وانا في المستشفي اول حد جه في بالي هي، بصراحه يعني حسيت اني كنت ممكن اموت وانا بنتي بتكرهني وبتحاف مني وخلاص عمري هيخلص من غير ما اقولها اني بحبها واني مش بكرها انا بكره مامتها مش بكرها هي.. 

أسرار

هي مالهاش ذنب في مامتها، علي العموم بنتك طيبه وقلبها ابيض وهتعرف تخليها تحبك بسرعه لو بطلت تزعق فيها وبقيت تعاملها كويس.. 

كمال 

اسرار هو انتي ليه مبسووطه كده؟ 

ابتسمت بهدوء وقالت 

عشان مشيت من بيت خلف وانت كويس وو وبصراحه اللي عملته عشااني مفرحني وفرحتي هتكمل لما نخلص من خلف وابنه خالص.. 

كمال قرب منها وقال

انا قولتلك قبل كده اني ماليش دعوه بالموضوع بتاع تار عمر وخلف وابنه والحوار ده كله، بس بعد اللي حصل ده هتلاقيني انا قبل عبدالله بسعي اني اجيبلك تار اخوكي منهم.. 

أسرار بقلق

لا بس عبدالله يخرج من القضيه اللي هو فيها وانت تقنعه انه ما يعملش فيهم حاجه توديه في داهيه ولا تخسره حياته حتي لو هنسيب البلد كلها ونعيش هنا انا راضيه وتار اخويا عند ربنا المهم ما تحصلكمش انتو حاجه.. 

كمال 

انا ولا عبدالله؟ 

أسرار بخجل

انتو الاتنين طبعا.. 

كمال قرب منها اكتر وقال

هو انتي كنتي خايفه عليا ليه عشان ابن عمك ولا خوف حب عشان جوزك بقي وكده؟.. 

أسرار بتوتر 

هو ده وقته يا كمال يعني اللي انت بتقوله.. 

كمال 

ومش وقته ليه عايز اعرف مراتي كانت خايفه عليا ليه؟ 

أسرار 

طبيعي يعني مراتك تخاف عليك.. 

كمال 

لا لا في ستات ما بتحبش جوازها فبتفرح لما تحصلهم حاجه 

اسرارابتسمت وقالت

دول مش كويسين وانا مش زيهم والمفروض انك تبقي عارف كده، ولو علي المشاكل اللي كانت بينا اخر فتره كان بسبب اللي عرفته عنك واني اتصدمت فيك.. 

كمال

انسي اللي حصل زمان ده خالص، والله العظيم انا من لما اتجوزتك وما في واحده دخلت حياتي غيرك، ولا هبص لواحده غيرك انا الاول كنت فعلا متجوزك عشان رضوي ومحتاج زوجه وخلاص وبنت عمي احسن ما اتجوز واحده غريبه بس مع الوقت والعشره بينا انا بقيت بحبك ومتعلق بيكي وحببتيني في البيت هنا وبقيت حابب اقضي الوقت كله معاكي انتي ورضوي.. 

ابتسمت أسرار وقالت 

طيب ممكن تقعد وترتاح شويه عشان اجيبلك تاكل وبعدين تاخد العلاج بتاعك 

كمال 

يا سيدي علي الاهتمام هطلب اكل لينا كلنا، وخليهم يصحو ياكلو ما حدش فيهم اتعشي.. 

خبطت روام علي الباب في الوقت ده وقالت

يا بتاع انت هات باسورد الواي فاي يلاا.. 

كمال بضيق 

الفاتوره خلصاانه 

روان 

ادفعها.. 

كمال بخبث

مش معايا فلوس.. 

روان 

ما تبقاش رخم بقي انا ما بعرفش اقعد من غير نت.. 

أسرار 

خلاص يا روان انا هاجي اديهولك.. 

روان 

ميرسي يا أسرار كلك ذووق مش زي البأف اللي عندك.. 

كمال 

تصدقي البت دي طلعت رخمه فعلا، بيحب فيها ايه عبدالله.. 

ــــــــــ #بقلم_الكاتبه_رحاب_القاضي ــــــــ

_وفي بيت خلف كان قااعد جنب مراته وشعبان واقف قدامه وهو متعصب جدا وقاله.. 

شعبان

خدها ورجع بيها القاهره، قولتلك يا ابوي نخلصو عليه وهو في المستشفي انت ما رضيتش... 

خلف 

ولما نخلصو عليه وهو في المستشفي ونلبسو قضية قتل هيبقي زين يعني اكده 

شعبان

عزالدين الهواري لسه في البلد ناخدوه ونهدد كمال انه يرجع اسرار يااخد عمه 

خلف بحده 

انتي مخك ده مخ حمار يا واد انت، عايز تلبسنا في مصيبه مع عيلة الهواري ناقصين احنا، وبعدين لو سمعت حديتك وخدت عزالدين كمال هيرضي يجيبلك مرته لحد اهنا 

فتحيه

 اومال ايه العمل يا حج خلف؟ 

خلف 

الارض كلها ملكي هزرعها واخد محصولها واللي ليه حاجه يجي يطلبها، وكمال ما هيقدرش يجي البلد تاني ابدا، وعبدالله فده حبسته مطوله قووي 

شعبان 

واسرار انت وعدتني انك هتخليني اتجوزها.. 

خلف 

هو اللي خلقها ما خلقش غيرها يعني، البلد ملياانه بنات نقي اللي عايزها ونجوزوها ليك 

شعبان

انا مش هسكت يا ابوي وهرجعها واللي يحصل يحصل.. 

ــــــــــ #بقلم_الكاتبه_رحاب_القاضي ــــــــ

_وبعد شهر عدي علي ابطالنا وفي بيت يونس الصاوي كانو قاعدين بيتعشو كلهم ويونس قال بهدوء ليارا... 

يونس

باركي لمرات اخوكي يا يارا حامل جديد.. 

ابتسمت يارا وبصت لريناد وقالت

الف مبروك يا رورو كده ابقي انا اخر واحده اعرف.. 

كتم. يزن ضحكته وريناد بتوتر

لا والله مش انا.. 

يونس 

اقصد نيلي يا بنت الهبله.. 

يارا بضيق 

امم مبروك يا نيلي.. 

نيلي بهدوء

الله يبارك فيكي.. 

يارا

مبروك يا يوسف مش متخيله شكلك وانت اب هتبقي عامل ازاي 

يزن بسخريه

والله ولا انا.. 

يوسف بغيظ 

طيب بس يا ظريف منك ليها، وما ابقاش ليه اب طيب ده انا اتفرجو علي ابني هيبقي ازاي.. 

شهد 

اكيد هيطلع زي القمر بس مش ليك لمامته.. 

نيللي ابتسمت بهدوء وقالت

ميرسي يا طنط ده من ذوقك.. 

بص يونس لريناد وقال

وانتي يا ريناد مش ناويه تفرحينا انتي كمان؟ 

ريناد بهدوء

ان شاء الله يا عمو بس تكبر تيا شويه الاول.. 

يونس ضحك بسخريه وقال ليزن 

عقل مراتك يا يزن.. 

ريناد بضيق 

انا عاقله علي فكره وبخطط لحياتي صح.. 

شهد 

اكيد طبعا يا حبيبتي، اصلا هتيجي تشتغل معايا يا يونس

يزن 

لا يا ماما معلش ريناد مش هتشتغل.. 

وقام وقف وقال

انا هسبق حضرتك علي المكتب يا بابا عشان نكمل باقي شغلنا  

ومشي يزن وريناد بصتله بحزن وقامت هي كمان وقالت

انا كمان شبعت بعد اذنكم.. 

_ومشيت هي كمان وطلعت شقتها واخدت تيا بنتها معاها، ويونس بص ليوووسف وقاله.. 

يونس

ايه يا افندي بقالك شهر متجوز ونايم في البيت مش ناوي تيجي تشوف شغلك او حتي تروح الكليه بتاعتك عشان تتخرج بقي وتخلصنا.. 

_شوح يوسف بأيده وما ردش عليه فيونس اتعصب وقال بحده لشهد.. 

يونس

شايفه بيشوحلي ما هو تربيتك 

شهد 

اتلم يا يوسف ورد علي ابوك كويس.. 

يوسف 

ما شوحتش يا بابا ده انا كنت بهش دباانه معديه.. 

ابتسمت نيلي بهدوء ويونس قاله

هتنزل الشغل من بكره، تصحي بدري وتروح مع اخوك الساعه سبعه 

يوسف

ليييه هنروح نبيع لبن، الساعه عشره حلو 

يونس

زي ما اخوك ملتزم في شغله تبقي زيه، وتصحي بدري فااهم.. 

يوسف بضيق

حاضر.. 

شهد 

نيلي معاد الدكتوره بتاعك امتي يا حبيبتي؟ 

نيلي

كمان ساعتين كده يا طنط 

شهد 

طيب انا هجهز واروح معاكي

يونس 

وتروحي انتي معاها ليه جوزها هو اللي يروح معاها مش ابنه يروح مع مراته يطمن عليه وتخلي مراتك تغير جو بدل قعدت البيت فاهم

يارا 

بابا اروح معاهم انا كمان عايزه اخرج 

يونس 

هبقي انا اخرجك انما هتروحي معاهم ليه دول رايحين لدكتور... 

يارا

خلاص وعد انت هتخرجني يا بابا.. 

يونس بهدوء

من عينيا يا روح بابا.. 

_وبعد شويه في شقة يوسف كانت نيلي واقفه قدام المرايه وبتحاول تلبس حاجه واسعه عشان بطنها ما تباانش كبيره وقلعت البلوزه اللي لابساها وقالت بضيق.. 

نيلي

وبعدين بقي الناس تقول عليا ايه دلوقتي.. 

فتح يوسف الباب وقال

خلصتي ولا لسه؟ 

مسكت البلوزه بسرعه ولبستها وقالت بحده 

ما تتنيل تخبط الاول.. 

يوسف 

لا مش هخبط انتي مراتي وام ابني هتداري ايه عني.. 

نيلي بحده 

خلاص هبقي انا اعمل حسابي واقفل بالمفتاح.. 

قرب منها يوسف وقال 

بطلي الشويتين اللي بتعمليهم دول، وبعدين البسي حاجه اوسع من كده مش ناقصين فضايح.. 

نيلي 

ما تيجي نطلق انا بجد تعبت من القعده معاك هنا واصلا مش طيقاااك.. 

يوسف 

قال وانا اللي هموت عليكي مثلا، بس مش هطلقك غير لما اخد ابني وبعدها هطلقك من غير ما تقولي.. 

نيلي بحده 

ما تهزرش يا يوسف انا اكيد مش هسيبلك ابني وامشي.. 

يوسف 

مش وقته دلوقتي نتكلم في الموضوع ده، اخلصي واجهزي عشان نخلص من الحوار ده عندي شغل الصبح.. 

_قال كلامه وخرج من عندها وهي حطت ايدها علي بطنها وبصت لنفسها في المرايه ولدموعها اللي بقيت تنزل حتي من غير ما تحس بيها، فمسحتها بسرعه وفضلت تدور علي حاجه واسعه تلبسها.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في شقة يزن كانت ريناد قااعده بتنيم في تيا ودخل يزن وقال.. 

يزن 

منيماها ليه هنا؟ 

ريناد

كانت بتتفرج علي الكرتون ونامت هدخلها جوه اهو، سيف رن عليا كتير علي فكره وما ردتش عليه وكلمت بابا عشان هو اللي يكلمه... 

يزن 

طيب كويس نيمي تيا وتعالي عايز اتكلم معاكي.. 

ريناد شالت تيا وقالت 

حاضر ثانيه واحده... 

_ودخلت تيا لاوضتها ورجعت قعدت جنب زين وسألته بهدوء وقالت.. 

ريناد 

خير يا حبيبي في ايه؟ 

يزن 

هو انتي ليه ما قولتليش علي موضوع انك مأجله الخلفه ده دلوقتي؟ 

ريناد 

انت ما سألتش.. 

يزن 

ما سألتش عشان كنت فاكر انك مش رافضه الموضوع ولو في تأخير ده عشان لسه ربنا ما ارادش.. 

ريناد 

انا مش رافضه الموضوع انا بس بأجل شويه لحد ما تيا علي الاقل تدخل المدرسه عشان ما اقصرش معاها ولا مع البيبي الجديد.. 

يزن 

لسه هستني كام سنه كمان.. 

ريناد بضيق 

هو في ايه يا يزن بالظبط؟ 

يزن 

انا بجد مش فاهم في ايه، اشمعنا دلوقتي عايزه تأجلي موضوع الخلفه ولما كنتي مراته هو كنتي حامل وكانت تيا صغيره اكتر من كده كمان.. 

ريناد بتوتر 

مم مالهاش علاقه علي فكره الحمل في الاول كان غلطه وو.... 

قطع يزن كلامها وقال بجديه 

لو بتاخدي اي حاجه تمنع الحمل وقفيها والموضوع ده يتقفل يا ريناد مش كل يوم والتاني هتبقي في بينا مشكله.. 

ريناد 

علي فكره قبل ما نتجوز انت ما كنتش كده، كنت مفهمني ان اي قرار يخص حياتنا هناخده مع بعض.. 

يزن 

وانتي ما عملتيش كده انتي قررتي من نفسك مس عايزه تخلفي دلوقتي وما اهتمتيش لرغبتي انا.. 

ريناد 

قال وانت بتهتم اووي لرغبتي انا عايزه ايه ومش عايزه ايه، انا من لما اتجوزتك وانت مش بتعمل حاجه غير انك بتعمل الحاجه اللي تريحك وبس، مش فارق معاك انا ولا بنتي ولا اي حاجه، جاي دلوقتي تتخانق معايا علي موضوع الخلفه وانا اصلا مرعوبه وحاطه ايدي علي قلبي من رد فعل سيف لما يعرف ان تيا قاعده معانا هنا، انت بقي فكرت في الموضوع ده، اكيد لا عشاان تيا مش بنتك فمش مهم بقي اللي يحصلها او تتربي معايا ولا لا.. 

يزن 

انا داخل انام واللي عندي قولته يا ريناد وانا عند وعدي معاكي ما حدش هيقدر يحرمك من بنتك فمتخافيش وشكرا اووي علي كلامك يا هانم.. 

_قال كلامه وسابها ودخل اوضته وهي فضلت قااعده مدايقه وبعد شويه دخلت عنده لقيته نام، فراحت نامت جنبيه فقرب منها وحضنها وقال.. 

 يزن 

هنقضيها كل يوم نكد 

ريناد 

سيبني يا يزن وبعدين هو مين اللي بيجيب النكد 

يزن 

انتي طبعا ده انا غلباان والله.. 

_ولسه هيقرب منها سمعو صوت تيا بتعيط فبعدت عنه بسرعه وقالت.. 

ريناد 

معلش بقي وقت تاني تيا لسه ما اتعودتش علي المكان هنا.. 

يزن بضيق

براحتك انا كده كده كنت هنام.. 

_ما ردتش عليه ورااحت بسرعه لتيا وهو حدف المخده علي الارض وقال بغيظ.. 

يزن 

اقسم بالله حد باصصلي في ام الجوازه دي.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في العياااده عند يوسف ونيلي كان يوسف ماسك موبيله وملهي فيه وهي قااعده جنبيه وبتكلم ريم صاحبتها علي الوتساب وقالتلها... 

نيلي

"اعملي زي ما بقولك يا ريم، شوفيلي اقرب حجز لكندا انا خلاص قررت هسافر ومش هرجع تاني" 

ريم

"طيب مش المفروض تطلقي الاول" 

نيلي

"يوسف مش موافق ولو فضلت قااعده هو ممكن فعلا ياخد ابني مني، انا لازم اهرب منهم كلهم مش هستني لحد ما يحرموني من ابني كمان" 

ريم

"خلاص هشووف امتي اقرب حجز وهقولك" 

يوسف

بتكلمي مين؟ 

قفلت نيلي الموبيل وقالت

بكلم ريم.. 

يوسف 

تفتكري اسمي ابني ايه؟ 

نيلي 

اي حاجه.. 

يوسف

هسميه علي اسم بابا، ولا اقولك كفايه يونس الصاوي واحد بس احنا نسميه حذيفه علي اسم ابو عبيده الحقيقي وبرضو اسم حلو... 

نيلي 

هو انت مبسووط اوي انك هتبقي اب؟... 

يوسف 

بصراحه دي احلي حاجه في الموضوع اني هبقي اب، مش عارف ازاي كنت هستغبي واسيبهولك او ما اعترفش بيه.. 

نيلي بدموع 

هو ابني اناوكمان علي فكره وانا امه يعني بحبه اكتر منك ومن اي حد في الدنيا ازاي بقي عايز تاخده مني.. 

اتنهد بضيق ورد. عليها وقال

قولتلك وقتها نبقي نتصرف.. 

نيلي بسخريه

اممم مااشي يا يوسف بس انا مش هسمحلك تاخد مني ابني مهما كلفني الموضوع.. 

الممرضه 

نيلي الجرجيري اتفضلي.. 

لسه يوسف هيقوم فنيلي قالتله بحده 

ما تجيش معايا لو سمحت هبقي اقولك الدكتوره قالتلي ايه.. 

_وسابته ودخلت لوحدها عند الدكتوره، وهو فضل قااعد مستنيها وحس بالندم انه خوفها منه وهددها انه هيااخد. ابنها منها... 

_فتفتكرو يوسف بيخطط لايه؟ 

ــــــــــ #بقلم_الكاتبه_رحاب_القاضي ــــــــ

_وتاني يووم الصبح كانت طالعه هنا اوضتها وطارق كان لسه هيخرح من البيت بس لما شافها وقف وقالها.. 

طارق

رايحه فين ما عندكيش محاضرات النهارده 

هنا 

رايحه لاسرار وروان هقعد معاهم شويه.. 

طارق

طيب تعالي هوصلك في طريقي 

هنا بقلق

لا عشان ما قولتش لبابا حسن.. 

قرب منها طارق ومسك. ايدها وقال

دبلتي في ايدك ومخطوبين قدام الناااس كلها مش هاكلك يعني.. 

هنا بالم 

طيب سيب ايدي يا طارق.. 

ساب ايدها وقال 

يلا يا هنا وبعدين عايز اتكلم معاكي في موضزع جوازنا.. 

هنا بضيق

طيب... 

_ونزلت معاه هنا وهما في الطريق كانت ساكته وباصه من الشباااك وقالها طارق بهدوء.. 

طارق

بقالك شهر واكتر بتفكري ايه يا هنا للدرجه دي الموضوع تقيل عليكي.. 

هنا 

لا هو مش تقيل بس مسؤليه كبيره وانا عندي مسؤلية الجامعه كبيره ومش عايزه اضغط نفسي.. 

طارق

هو ايه الضغط. انتي بدل ما قااعده تحت. هتطلعي تقعدي معايا فوق واحنا متجوزين بالعكس الجو هيبقي اهدي انا وانتي وبس ما فيش اي حاجه تانيه، ووالله وعد مني ما هنخلف غير بعد ما تخلصي الجامعه بتاعتك وتشتغلي كمان.. 

سكتت هنا وهو مسك ايدها وقال

انا بحبك يا هنا وعايزك معايا النهارده قبل بكره، وعمري ما هاجي عليكي ولا هظلمك معايا خليكي بقي واثقه في كلامي وما تخافيش مني.. 

هنا بهدوء

 انا موافقه يا طارق.. 

ابتسم بسعاده وبااس ايدها وقال 

النهارده هكلم بابا في الموضوع واول اسبوع في الاجازه  الجايه هنتجوز علي طول.. 

اخفت هنا قلقها وخوفها وقالت

ان شاء الله اللي فيه الخير يقدمه ربنا.. 

ــــــــــ #بقلم_الكاتبه_رحاب_القاضي ــــــــ

_وفي مركز الدكتوره سلوي للعلاج النفسي كانت رضوي قااعده في الجلسه النفسيه اللي حجزت فيها مع الدكتوره سلوي، وكان قااعد معاها ست اشخاص ما تعرفش حد منهم خالص والدكتور سلوي بصت لرضوي وابتسمت وقالت.. 

الدكتوره سلوي 

اهلا بيكي يا رضوي انتي اول مره تحضري معانا الجلسه دي مش كده؟ 

رضوي بتوتر

ايوه فعلا اا انا عمري في حياتي ما فكرت اني اعمل حاجه زي دي.. 

ردت عليها واحده من اللي قاعدين وقالت 

هتتعودي الجلسات دي هتبقي بالنسبالك ادمان بعد الراحه اللي هتحسي بيها لما تقعدي وتتكلمي معانا.. 

سلوي 

اهو اخر واحد في الجلسه وصل اللي بيجي متأخر ديما.. 

_دخل حامد الصاوي في الوقت ده وقال من غير ما ياخد باله من رضوي.. 

حامد 

سوري يا جماعه علي التأخير وو... 

_سكت اول ما شااف رضوي وهي بصتله بصدمه وتوتر وسلوي قالتله بهدوء.. 

سلوي 

انتو تعرفو بعض ولا ايه؟ 

قعد حامد وقال بهدوء 

لا ما اعرفش حد.. 

رضوي 

وانا كمان ما اعرفش حد.. 

الدكتوره سلوي 

طيب اعرفك بيهم يا رضوي دي منه وكريم وعبدالرحمن والاستاذ حسام وفاطمه واخيرا بقي الشخص اللي ديما هيعطلنا ويجي متأخر حامد.. 

رضوي بتوتر

اهلا وسهلا... وانا اسمي رضوي.. 

فاطمه

اهلا بيكي يا رضوي علي فكره احنا ما كنااش نعرف بعض في الاول وكلنا بقينا اصدقااء دلوقتي وانتي هتبقي واحده مننا.. 

رضوي ابتسمت بهدوء وقالت 

دد ده شرف ليا حضرتك.. 

سلوي 

طيب نبدأ بقي يا جماعه ايه رئيكم النهارده نتكلم عن حاجه تختارها لينا رضوي عشان تندمج معانا بدل ما هي متوتره كده.. 

رضوي بتوتر اكبر

مش عارفه الحقيقه يعني انا زي ما قولتلكم انا اول مره اجي واحضر حاجه زي كده.. 

عبدالرحمن 

يا بنتي فكي كده ما تقلقيش احنا كلنا هنا نااس محترمين وبنقدر بعض وبنحس ببعض ، يعني عندك. انا مثلا عشان كنت مريض فتره وكل الناس بعدت عني بسبب مرضي ده لولا الجلسه دي انا كان زماني منتحر بعد الاكتئاب اللي كنت فيه.. 

رضوي بفضول

مرض ايه ده اللي يخلي الناس تهرب منك؟

عبدالرحمن 

مرض جلدي هو مش مُعدي بس هما خافو علي نفسهم مني فبعدو عني لحد ما بقيت لوحدي ودي كانت حاجه صعبه اووي عليا.. 

منه 

الوحده اوحش حاجه ممكن يحس بيها الانسان.. 

حسام 

قبل كده كنت شوفت فديو عن واحد كده بيتكلم بيقول عن الوحده سعات احنا بنختار نبقي لوحدنا وسعات بيتفرض علينا نبقي لوحدنا 

كريم 

في كلا الحالتين هو شعور زباله اصلا.. 

ضحكو كلهم بهدوء وحامد قال 

لو نتكلم عن الخياانه هيبقي موضوع لطيف ومختلف.. 

بصتله رضوي وقالت بتحدي 

وليه ما نتكلمش عن الوحده بما اننا فتحنا الموضوع اصلا.. 

الدكتوره سلوي 

تمام نكمل علي موضوع الوحده النهارده لان واصح كده ان كلنا عندنا المشكله دي، سوري يا حامد بس رضوي النهارده هي اللي هتختار.. 

حامد 

اوكي ما فيش مشكله.. 

سلوي

يلا بقي عايزه اعرف منكم ايه معاناة كل واحد فيكم مع الوحده وازاي قدر يتخطي الموضوع ده وهل فعلا تخطي ولا لسه بيواجه نفس المشكله.. 

_وبدأو كلهم يتكلمو وكل واحد بيحكي مشكلته لحد ما جه الدور علي حامد اللي قال بتوتر.. 

حامد 

اا انا مش حابب اتكلم النهارده يعني حاسس الموضوع مش مهم بالنسبالي وما عنديش مشكله مع الوحده.. 

بصولو كلهم باستغراب وكريم قال

يا جدع قول كلام غير ده، ده انت سبب وجودك هنا معانا هو وحدتك.. 

سلوي 

كريييم ما تبقااش رخمم بقي، تعرفي يا رضوي كريم جاي هنا بسبب ايه؟ 

رضوي بصت لكريم بفصول وكريم ابتسم وقال بثقه

اللي قدامك ده يا استاذه رضوي اكتر بني ادم متنمر ممكن تقابليه في حياتك.. 

ضحكو كلهم ورضوي ابتسمت بهدوء وقالت 

ازاي يعني؟ 

منه 

من كتر ما كان بيتنمر علي الناااس صحابه وقرايبه بقي منبووذ منهم ما حدش بيتكلم معاه بيتجاهلوه اتحط في الوحده غصب عنه بس بسبب عمايله.. 

كريم 

والله يا جماعه بدأت اتحسن اهو وابطل تنمر، صح ولا لا يا دكتوره سلوي.. 

سلوي

صح طبعا اديكم انتو اهو بقيتو صحابه وبتحبوه.. 

فاطمه 

طيب احكيلنا بقي يا رضوي انتي ايه مشكلتك مع الوحده؟ 

رضوي تجاهلت وجود حامد وقالت بهدوء

يمكن انا اكتر واحده اللي يشوف حياتها يقول ازاي دي تحس بوحده عندي اب وام احلي اب وام في الدنيا وعندي اخوات كلهم طيبين وعايشه وسط عيله جميله جدا، بس انا الوحده بالنسبالي في اللي جاي مش في الوقت الحالي، يعني لما افكر في بكره واخواتي هيتجوزو وعيلتي كل واحد فيهم هينشغل في حيااته انا هبقي فين اكيد هبقي لوحدي ده اللي بيجي في بالي اني هفضل لوحدي مش هتبقي عندي عيله خاصه بيا لوحدي انا كمان.. 

الدكتوره سلوي 

ليه بتفكري كده مع انك لسه ممكن تتجوزي وتبقي عندك عيله خاصه بيكي  زي باقي اخواتك.. 

رضوي 

انا لو عايزه اتجوز هتجوز اي حد ممكن يتقدملي كانت كمان الفرصه دي متاحه ليا زمان اكتر من دلوقتي لما كنت صغيره قبل ما اوصل لسن التلاتين الكابوس بتاع اي بنت، لكن دلوقتي بقيت خايفه من الجواز وبقيت خايفه اتجوز اصلا

منه 

انتي مريتي يعني بتجارب صعبه يعني هي اللي وصلتك للحاله دي؟ 

اتملت عيون رضوي دموع وهي بتفتكر يوسف وقالت 

اكيد كانت صعبه اووي.. 

حامد بسخريه 

وايه بقي اللي خلاكي تقعي في التجارب الصعبه دي، اوحش حاجه البجاحه ان الانسان يبقي شايف الغلط قدامه ويقع فيه ويرجع يعيط في الاخر... 

_بصوله كلهم بحده ولوم علي كلامه ورضوي حست باهانه من كلامه وندمت انها اتكلمت قدامه وقاامت مشيت من غير ما تقول اي حاجه... 

منه 

ايه يا ابني الرخامه دي.. 

سلوي 

حامد ممكن تروح تعتذرلها قبل ما تمشي ولو كنت تعرفها ياريت كنت قولت من البدايه.. 

حامد بضيق

انا فعلا اعرفها بس... حاضر هروح اعتذرلها ما تبصوليش كده.. 

_قام حامد وخرج بسرعه ورا رضوي اللي كانت لسه هتركب عربيتها فوقف قدامها وقفل الباب وقال.. 

حامد

ما كنتش اقصد ادايقك سوري.. 

رضوي بحده 

اوعي يالا من وشي بدل ما اوريك البجاحه علي اصولها.. 

حامد 

انا قبل كده قداام يوسف ده مش حذرتك منه، قولتلك ده مش بتاع جواز ده بتاع تسليه وبس وانتي ما سمعتيش كلامي.. 

رضوي 

ايوه فعلا انت حذرتني منه، فحقك دلوقتي تشمت فيا وتحرجني قدام الناس، وبعدين هو انت كنت جوه بتعمل ايه اصلا لولا انك مريض ومعقد.. 

حامد 

شكرا يا ستي علي العموم انا اسف ما كنتش اقصد ادايقك بس انتي استفزتيني بصراحه وفي نفس الوقت قولتلك الكلمتين اللي قولتهم لاختي لما يوسف عمل معاها نفس الموقف اللي عملو معاكي، انا فيش بيني وبينك حاجه عشان اكرهك بس والله انتي صعباانه عليا ولما عرفت اللي حصل قبل فرحكم وجوازه من واحده تانيه زعلت جدا عليكي مش شمتان فيكي خالص.. 

رضوي بهدوء

حصل خير ممكن تسيبني امشي بقيى؟ 

حامد 

لا طبعا لازم تيجي وتكملي الجلسه وانا كمان هتكلم قدامك واشمتي فيا يا ستي براحتك 

ابتسمت رضوي بهدوء وقالت 

لا انا مش بشمت في حد، بس هو انا ارتحت في الكلام جوه وحسيت اني مرتاحه وانا بتكلم وفي ناس فاهمه خوفي وقلقي لحد ما انت اتكلمت وخربت كل حاجه.. 

حامد 

خلاص بقي قولت انا اسف، يلا اتفضلي ادخلي واعتبريني ما قولتش حاجه انا فهمتك اهو انا قولت كده ليه.. 

رضوي 

خلاص ندخل بس ما توجهليش كلام خالص.. 

حامد ضحك بهدوء وقال

حاضر يا بشمهندسه رضوي.. 

رضوي 

لا ما خلاص ما بقاش فيها بشمهندسه هو حد يدخل عيلة الصاوي ويطلع منها زي ما كان.. 

 حامد 

انا اسمي حامد الصاوي اقسم بالله.. 

رضوي 

ايوه صح انت من نفس العيله لامؤخذه.. 

ابتسم حامد وقال وهما داخلين تاني المركز 

لا ولا يهمك انا هنا اصلا بسبب العيله دي، تعرفي ان عيلة الصاوي دي اكتر عيله مؤذيه ممكن تشوفيها في حياتك، تحسي الطبع التوكسيك فيهم ده وراثي.. 

بصتله رضوي بعدم فهم وهو وقف وقال

افهمك الحكايه بدأت من زمان اووي لما جدي حامد الصاوي اتجوز جدتي هناء غصب عنها، سيبك من الجلسه النهارده واقعدي هنا وانا هحكيلك كل حاجه.. 

_وقعدو هما الاتنين علي كنبه صغيره في مدخل المركز وكانت بتسمعه باهتمام كبير وهو بيحكيلها عن عيلته والحاجات اللي ما كانتش تعرفها، وبعد ما خلص كلامه قالها.. 

حامد 

ادي الحكايه من البدايه كل الاجيال اللي جات بعد كده كلها كانت معقده سواء ابويا او عمي يونس او عمي مازن اللي انتي ما شوفتيهوش.. 

رضوي 

يوسف كان حكالي عليه قبل كده انه اكتر واحد اتأذي بانفصال باباه ومامته، وانت بقي بتيجي هنا ليه ايه مشكلتك 

حامد 

الوحده برضو اني حسيت ديما اني لوحدي.. 

رضوي. 

ما انت قولتلي ان بعد ما باباك ومامتك انفصلو بقي عندك بدل العيله اتنين.. 

حامد بسخريه

بالظبط بس انا غريب في العيلتين انا لما اروح عند امي ديما شايف ان جوزها واهله ناس غريبه انا مش منهم هما بيعاملوني كويس بس انا مش من العيله بتاعتهم انا من عيلة الصاوي، ولما تروح لعيلة ابويا اللي انا منها بحس نفس الاحساس واوحش كمان لان مرات ما بطقنيش ولو قعدت اكتر من يومين معاهم بسمعها بتتخانق مع ابويا انها مش واخده راحتها اني قاعد معاهم، اخواتي نفسهم بحسهم زهقو مني لانهم مش متعودين علي قعدتي معاهم علي طول برغم اني بحبهم جدا والله وبحاول اقرب منهم وابقي اخوهم الكبير وصاحبهم بس مش بالعافيه يعني.. 

رضوي 

طيب وايه مشكلتك مع يوسف ويزن هو ليه قالي انك بتكرهم.. 

اتملت عيونه دموع وقال

مش بكرهم علي قد ما... مش عارف اقولك ايه بس سعات كده ببصلهم واشوف طنط شهد اللي ضحت بحاجات كتير وكملت مع يونس الصاوي اللي هو وحش جدا فوق ما تتخيلي بس كملت معاه عشان خاطر ولادها وفعلا هما طالعين كويسين وما فيش واحد فيهم بس عنده نقص زي اللي عندي، سعات بقول لنفسي طيب هو انا يعني ما كنتش استاهل ان اهلي يتحملو بعض شويه عشان خاطري عشان يبقي عندي اب وام وعيله ما احسش فيها اني غريب.. 

رضوي 

انت هتخليني اعيط عليك ولا ايه؟ 

ابتسم حامد وقال 

لا لا انا الحمد لاه بدات اتخطي ده كله.. 

رضوي 

امم ما هو واضح.. 

قربت منهم في الوقت ده الدكتوره سلوي وقالت

طيب الحمد لله انكم اتصالحتو، تعالو بقي نكمل الجلسه مع بعض ولا مش حابين.. 

حامد 

انا من ناحيتي اعتذرت وهدخل اكمل الجلسه انما بقي هي حره.. 

رضوي 

خلاص حصل خير انا كمان هدخل اكمل الجلسه.. 

_ابتسم حامد بهدوء ودخلو هما الاتنين مع الدكتوره سلوي وكملو الجلسه وكانت رضوي مبسوطه جدا بالكلام معاهم ونفسيتها اتحسنت جدا... 

_تفتكرو بقي ايه اللي هيحصل بين رضوي وحامد الفتره الجايه وهل هو العوض ليها ولا للقدر رأي اخر؟ 

ــــــــــ #بقلم_الكاتبه_رحاب_القاضي ــــــــ

_وفي الصعيد كان واقف عز بره قسم الشرطه وطلع عبدالله ومعاه المحامي اسلام وقرب منه وحضنه وعز قال بابتسامه واسعه.. 

عز

كفاره يا كبير الصعيد.. 

عبدالله بعد عنه وقال

شكرا يا خالي لولا وقفتك جنبي انا ما كنتش هخرج من هنا.. 

اسلام 

وانا مجهودي في القضيه اتبخر خلاص بقيت وقفة عز بيه هي اللي خرجتك دلوقتي.. 

عبدالله 

لا طبعا يا متر ده انت الكل في الكل، وحقك محفوظ واكتر من اللي اتفقنا عليه.. 

اسلام

علي خير انا هرجع القاهره عشان عندي شغل مهم، وهبقي اخد الفلوس من عز بيه في مكتبي 

عز 

ان شاء الله يا متر.. 

مشي اسلام وعز قال بحماس لعبدالله 

هااا بقي هتعمل ايه، اهل البلد مستنينك تخلصهم من خلف وابنه هااا هتعمل ايه؟ 

عبدالله بهدوء

هروح اخد دوش وانام احسن انا من لما جيت هنا ما استحمتش ومش طايق نفسي، وكمان ما كنتش بعرف انام كويس بقولك ايه ارجع انت القاهره انا خلاص كل حاجه تمام.... 

عز 

ايه البرود ده يالا، انت داخل علي حرب مع خلف وابنه.. 

عبدالله

وانا قدهم وزياده كمان بس مش دلوقتي يا خالي ليهم وقتهم بس ارتاح الاول 

عز 

لا انا قاعد معاك 

عبدالله 

انت هترجع القاهره يا خالي وما تخاليش اي حد يجي البلد الفتره دي وخصوصا كمال وانا مشاكلي وتار عمر وحق اخويا واهلي وكل واحد اتأذي في البلد دي عندي انا وقريب اووي هخلي خلف وابنه عبره للبلد كلها...