رواية اعظم خيانه الفصل الثلاثون30بقلم الزهيرية الزهيرية
ما دمت لم تخطئ بحق احد
دع الناس يرونك كما يريدون
ولا تهتم
ريماس/ طبعاً وصلت لقناعه كامله انه الي حظه مصخم وفاين يبقى طول عمره مصخم اني حظي وين ما أخليه اسود ومصخم يعني ياربي جبتها من صفيه لام رحاب وهسه اجيت يم بيان هم الله سلط عليه لميس وامها واني قبل يوم من اجتي لقاء تعاركت ويه بيان ما اعرفها بس اني چنت اعرف بيان مزوج وطول الساعات الي مضت ما شفت اي بنيه بالبيت والغرفه الي استقريت بيها ما شفت بيان گلي لا دخلين الغرفه
وبوقت عركة بيان ولقاء قارنت ما معقوله هاي زوجة بيان هاي المره چبيره بس نذكر اسم لميس اكثر من وبيان يگول انتي وبنتچ لهذا افتهمت انه هاي امها لزوجة بيان وبعد مشاده كلاميه وبيان خنگ لقاء وچان راح يموتها وطردها والحجيه ظلت تحچي على بيان
ام سامي / بعد حبوبتك بيان ليش هيچ معصب وليدي دزلها مصروف وكان الله يحب المحسنين لخاطر حملها
بيان / بيبي اني مو على الفلوس والله بس لقاء سنين تتمسكن حتى تتمكن ومن ما تمكنت توقعي الغدر منها بأي لحظه خلي تروح ترفع قضيه نفقه وشگد يحكم القاضي إِنّي انطيها بعيني بس عن طريق الدوله
ام سامي/ بعد حبوبتك ليش ما تخليها ترجع هي چم دوب ظل بيت خالها
بيان / بيبي اني ما طردتها هي طلعت وحدها إلا أخليها تحسب الف حساب من تريد سوي شغله اني قبل چنت اگول هنيال عمي وسام على عمه لقاء بس صدگ البيوت اسرار طلع چان صاگرها صگر وهيچ چانت خانسه
ريماس/ وبعد هاي الحادثه تصورت بعد ما يريدون عشه بس خيبوا ظني وعادي تعشوا وشربوا چاي كانه ما صاير شي وعلى ثاني يوم قبل ما يطلع بيان گعدني يگلي گومي سوي ريوگ عبالي ساعه 8 او 9 الصبح اباوع على الساعه طلعت ساعه 5 الفجر گتله / رحمه على ابوك يا ريوگ اكو ريوگ بالليل
بيان / يا ليل ساعه 5 الفجر صار شگد من آذن الفجر شنو انتي ما صلين
ريماس/ ليش ام رحاب اشعل لشتها تعلم صلاه حتى اصلي
وهو ضحك وگال
بيان / اني اصلي بس ما اعرف اعلم واحد يصلي اني بس أوزع ثواب على روح عمي مهند يله بسرعه اريد اريوگ حتى أروح لدوامي
ريماس/ گمت من فراشي گوه احس جسمي مكسر ونزلت وعبالي بس بيان گاعد طلع ابو وبيبيته هم گاعدين وشفت مره يمهم طلعت ام حارث زوجة الرجال الي شافنه قبل يوم وحاچى عمي احمد
وحارث جايبه صينية گيمر وتگللها للحجيه هاي البارحه سويتها واللبن خلي البنات يخضن اللبن حتى اجيبلچ لبن وزبد وهسه تجي رسميه تجيب خبز جاي تخبز والحجيه مسويه الچاي وام حارث تحچي وسوي بالطماطه والبيض شلون ما اعرف هاي لو اني چان احترگ الاكل على النار واني بعدني اسولف بس شگد حقدت على بيان لكون گعدني من أحلى نومه والريوگ مكملي بس ما ضميتها بگلبي طلعت طايره من المطبخ رحت لصاله لگيت عمو سامي صعدت فوگ لگيته بغرفته يخلي اللمسات الاخيره وهو العطر
گتله / عندك رب دين يعني الريوگ كامل ليش مگعدني
وهو تقرب يمي وگال
بيان / شوفي حبابه انتي گاعده هنا ويانه شلون احنه نگعد من الصبح تگعدين ولا تجين لغرفتي هسه كملت تبديل حتى اروح لدوام لو انتي جايه تردين هسه ثواب على روح عمي مهند الله يرحمه
ريماس/ حمد لله انت مصور الناس كلها مثلك اروح من يمك احسن
وعفته ونزلت ولگيت عمو سامي والحجيه گاعدين يتريگون گلت بگلبي لازال گعدت خلي اتريگ وياهم وشلون مسوين ريوگ ريحه تسطر مال الچاي وأكثر شي عجبني الحليب بارد مطلعي من الثلاجه كل شويه اخلي بالاگلاص واشربه نزل بيان اتريگ وطلع وبعد الريوگ اجتي وحده حلوه مدببه طلعت رسميه جايبه لبن مخضوض وزبد اني فهمت لبن وزبد بس مخضوض شنو ما فهمت وبعد رسميه اجتي ام حارث وياها 2 بنات عرفت ذني چناين ام حارث وبدن ينظفن بالبيت واستحيت منهن لهذا ساعدتهن وهذا چان ساعه 7 الصبح وخلصنه البيت كله حدود الساعه 10 وربع
وهن راحن واني سبحت وگعدت ويه الحجيه اتفرج على باب الحاره وعمو سامي چان طالع للزرع وما يقارب الساعه 11 وثلث اندگت باب الصاله والحجيه گالت گومي حبوبه افتحي الباب وساعة الگشره من فتحت الباب دخلن 3 نسوان وحده عرفتها اسمها لقاء قبل يوم شفتها والثانيه من بطنها لكونها حامل عرفتها زوجة بيان اما الثالثه عزه چنها دنگه من الطول والضخامه ولميس بالبدايه حچت ويه الحجيه تگللها
لميس / صحيح بيان ازوج
والحجيه/ بنتي استهدي بالرحمان وگولي يا الله انتي حامل هسه يجي رجلچ العصر وتفاهمي ويا
ريماس/ شو ذني عافن الحجيه ورجعن عليه لزمني موتني كتل وخطيه الحجيه ما بيها حيل بس فتحت الباب شفتها وتعيط على رسميه بس شنو هلكت من الضرب مالتهن لما أجتي رسميه قوات التدخل السريع وهي خلصتني منهن واني صرت وره رسميه وهي ما تخليهن يضربني وبذاك الوقت اجى عمو سامي وطردهن كلهن بس شنو حالتي لا سر عدو ولا حبيب اخذتني رسميه للمغسله تغسل بوجهي وهي تواسي بيه وتگلي
رسميه/ شبيچن خاله متعاركات على الزلمه صيرن حبايب هاي اني وام حارث حبيبات وگلب على گلب والله ولدها وبناتها مثل وليداتي وبنواتي وعايشين حياتنه
ريماس/ هنا فهمت ام حارث ورسميه ضراير واني ما بيه حيل اجاوبها وسحبتني وياها للمطبخ حتى نسوي غده واني بأراء حال واجتي الحجيه هم ساعدتنه ولكون بيان تاخر تغدينه اني بعد هلكت صعدت فوگ نمت ومن اجى بيان عرف بالصار بس ما اهتم ابد وعلى ثاني يوم گعدني حتى اروح ويا على اشتكي على الموبايل انه نسرق
ومن وصل ودگوا جنسيتي حاسبه طلعت عليه شكوى ظليت صافنه بوجه بيان وهو هم ظل صافن بوجهي ولكون بيان ضابط سأله منو مشتكي عليه
جاوبه ابو الحاسبه / سيدي وحده اسمها لميس وانه هي حامل وريماس ضاربتها مما مأدي إلى نزيف حاد بس بعدها القضيه ما رايحه للمحكمه انت ابو القانون إذا راحت القضيه للمحكمه هذا شروع بالقتل يعني ريماس تنحكم
وجرني من ايدي بيان حتى نروح على ضابط التحقيق من طلعنه من يم ابو الحاسبه گتله لبيان / شنو فوگ حگه دگه فوگ ما هن 3 ضربني ورسميه خلصتني منهن چان اني هسه ميته انوب يشتكن عليه
بيان / انصرف لا تخافين اني اعلمها الچلبه هي وامها
ريماس/ تحولنه على ضابط التحقيق وبيان انه الاعتداء چان من الطرف المشتكي وانه احنه عدنه تقرير يثبت كلامنه وكملنه شكوتنه على انه موبايلي انسرق مني وطلعنه من المركز واخذني للبيت وهو يفور وينطفي
ومن دخلنه للبيت خابر على عمه وسام وانه يريده يجي يمهم واني بدلت ورجعت نزلت اشتغل بالغده وياهم والي فهمته انه عمهم وسام راح يجيب ويا عائلته وبقينه بشغل المطبخ على قدم وساق لما اجى عمه وسام ودخلوا من باب الصاله واني چنت بالمطبخ لما صاح عليه بيان رحت سلمت عليهم وردت ارجع للمطبخ بس بيان صاح عليه اگعد يمه وبيان حچى كل الصار لعمه وسام وهو چان جوابه
وسام / وانت شبيك والزمهن بشطب رمان وين ما يوجعك شنو اظل اعلم بيك
بيان / وربك لو موجود چان ما تطلع وحده صاحيه منهن بس جايات بالوقت الي اني بي ما موجود
وسام / باچر انت روح طلع تقرير طبي لزوجتك واشتكي انت هم وشكوى بشكوى واهم شي الشكوى تكون ضد زوجة اخوها للقاء وهو من يشوف زوجته مشتكين عليها زين إذا بعد لفه لقاء ولميس ببيته
بيان / خلاص اني اليوم چنت راح اسوي تقرير طبي واشتكي بس ما حبيت تجاوزك
ريماس/ واني گاعده مثل الاطرش بالزفه اخيرها بيان قرب حلگه يم اذني وگال / شايفه هاي الگاعده گدامچ هاي زوجة واطفال مهند الله يرحمه الي نقتل على ايدچ
صدگ هنا فزيت وظليت اباوع على المره تطلع عمرها بداية الثلاثينات وعدها بنات اثنين وولد وزوجة مهند لابسه اسود وگاعده نظراتها كانه وحده تايهه التفتت على بيان شفته سحب ابن مهند بحضنه وظل يبوس بي
بيان / يعني اني ادري البشر يكتسب العادات السيئة اكتساب بس اكو ناس العادات السيئة نولدوا بيها وما اكتسبوها لهذا التعامل يصير وياهم صعب لانه يكون الغدر بدمهم ومثال هيچ ناس عمه لقاء يعني الفقر مو عيب بس دناءة النفس هي الي حرام وعمي وسام من أزوجها هي فقيره وحالة عائلتها فقيره كلش غير تحمد ربها وتشكره انه رب العالمين انطاها قسمه زينه لا ظلت تحفر جوانه وتريد كلشي الها ولآهلها وعمي وسام بعد زواجه منها وبمرور الوقت يله اكتشفها بس بعد فوات الأوان رچان مبقيها على مود بناته وچان دائماً يحذرها وما يفيد
وسبحان الله لميس اكثر وحده من بنات عمي وسام مطبعه باطباع امها چانت جشعه بشكل بس اني چنت ما انطيها مجال وبيوم الي ضاربات ريماس ما حبيت اكبر السالفه بس مال اروح دى اقدم شكوى على موبايل ريماس نسرق والگاهن مشتكيات عليها يعني هيچ قباحه اني ما شايف
وثاني يوم رحت اخذت تقرير من المستشفى واشتكيت عليهن غير الوضع إلى هنا وخلاص ونبقى على المحاكم إلا تفاجأت أنه تستدعوني من شوؤن وزارة الداخلية
واني كضابط اعرف انه اكو شكوى ضدي بس ما فهمت ليش رحت لشوؤن وبلغوني أنه لقاء ولميس مقدمات شكوى ضدي انه اني وزوجتي الي هي ريماس ضاربين لميس وهسه حالة الجنين مهدده بالخطر وانه اني مهددهم لكوني ضابط ومسوين عليه مجلس تحقيقي
واثناء التحقيق ويايه صار شي مو بالحسبان اتصل بيه
فرقد / شلونك بيان طبعاً اني خبر اني ما متاكد منه بس محتاجيك ضروري تجي
بيان / خير سيدي اكو شي قلقتني
فرقد/ والله ما اعرف منين ابدي وياك بس لازم تعرف اول وتالي لازم تعرف انت تدري احنه عممنه صورة أختك لانه من أنطي اسمها ما راح نوصل لشي وهسه اجتني اخباريه انه موصفات الصوره مال البنيه الي نطيتها موجوده بالطب العدلي يا ريت تروح حتى اني هم اجي لانه يريدون ياخذون عن طريقك تحليل دي ان اي إذا أختك صحيح يسلموها الك
بيان / إذا أريد اوصف شعوري والله ما ينوصف رجلي گامن يرجفن يعني معقوله أغاريد صار سنين ماكو هسه راح استلمها من الطب العدلي
والضابط الي بشوؤن من عرف عندي حالة وفاة اجل المجلس التحقيقي إلى إشعار اخر وطلعت واني احس روحي سكران ما اعرف شلون وصلت للمستشفى الي ذكرها الي فرقد ومن سألت على الطب العدلي دلوني عليه وصلت لگيت فرقد ويمه واحد وگال
فرقد/ هذا ابن خالتي ونسيبي ابو كرار البنيه الي ظهرت بالفديو هي نفسها لانه اني شفتها بس بالنسبه للمستشفى تعتبر مجهولة الهويه لهذا لازم يطابقون بينكم لانه شهادة وفاتها تحتاجها بعدين لمسألة ميراث او اي شي ثاني يتعلق بالدوله
بيان / احس روحي ما بيه حيل احچي رحت وياهم ودخلوني لثلاجة الموتى احس روحي ترجف واكو واحد اخذنه يم شلون عبالك جرار سحبه وچانت مغطين وجهه بعده الغطى عن وجهه هي نفسها گلبي يگول هاي أختك وعقلي يرفض تصديق من شفتها گمت اتقيأ طلعني فرقد وابو كرار وفرقد انطاني مي غسلت بي وجهي وگال
ابو كرار / تحليل دي ان اي يحتاج اقل شي 10 ايام يله يجاوبوك بس تحليل الدم خلال نص ينطوك الجواب
بيان / خلوا تحليل دم افضل شيصبرني منا لعشرة ايام
وابو كرار سحب مني دم وبقينه ننتظر ويمي فرقد بعدها سالت فرقد شنو سبب الوفاة
فرقد / اني گتلك عممت صورتها على السيطرات والمستشفيات ودوائر الدوله قبل ما اتصل بيك بنص ساعه اجتني اخباريه انه البنيه الي عمموا صورتها موجوده بالطب العدلي من البارحه وسبب الوفاة بيها سرطان ومنتشر بجسمها بس مجهولة الهويه لانه لاگيها بشارع وهي متوفيه وناقلتها دوريه مال شرطه للمستشفى
بيان / ظليت بس أهز براسي ودماغي كله يدور شلون راح ابلغ ابويه انه لگيت أغاريد بس جثه هامده وبعدني غارق بأفكاري طلع
ابو كرار گال/ تطابق يعني انتوا أشقاء
بيان / گال هيچ ابو كرار چنت بس احساس بس هسه تأكدت مليون بالميه هاي اختي ساعتها من كتم الضغط بداخلي خشمي طگ دم ساعتها فرقد گام يصيح على الدكاتره أخذوني للطوارئ وفحصوا ضغطي طلع صاعد الضغط عندي لهذا خلوا كانونه ومغذي وضربوا بيها ابره في سبيل ينزلون ضغطي
فرقد / انت حاير شنو راح تگول لاهلك شوف بيان البنيه انتقل حسابها من الدنيا للاخره وهناك رب هو يحاسب أستر عليها ولا تجيب طاري اي شي ما راح ينفع إذا حچيت شي هسه هي بين ايد رب رحيم ارحم مني ومنك
بيان /خلص المغذي واتصلت بعمي وسام وبلغته انه لگيت أغاريد بس ميته وما اعرف شگد مر وقت حتى اجوي ابويه وعمي وسام وما كسر خاطري قهرني غير أبويه ولما وصلوا للمستشفى ابن خالة فرقد كمل شهادة الوفاة وانطاها الي وابويه يركض بالمستشفى من باب ردهه لباب ردهه ثانيه ويگول بس اريد اشوفها هاي الحبيبه الي دورت عليها هاي السنين هسه اخذها حتى بس اذب التراب عليها ربي رحمتك
گوه سحبه عمي وسام وأخذه لثلاجه مال الموتى ودخلنه بعد ما فرقد جاب تابوت هو ويا اثنين ما اعرفهم وطلعوا أغاريد من الثلاجه وخلوها بالتابوت وابويه رفع الغطى عن وجهه وظل يبوس بوجهه وبعدها يبوس بيدها وگوه فرقد وعمي وسام سحبوا أبويه وگوموا وغطوها وغطيته التابوت وماكو مره ويانه حتى ناخذها للمغيسل لهذا خلينها على السياره وطلعنه بيها للمزرعه
ومن وصلنه للمزرعه الظاهر چانت بيبي ما تعرف ومن نزلنه التابوت وعرفت هاي أغاريد تخبلت وبوقتها تخربطت وأخذها ابو حارث وريماس للمستشفى ورجعنه طلعنه التابوت خلينه على السياره وزجة عمي مهند وام حارث ورسىميه ويانه واخذناها للمغيسل وبعد الغسل توجهنه بيها للنجف
يا مقابر النجف اشگد اخذتي من عدنه اعزاز