فى بيت الشهاوى .
رغد كانت غيرت عشان تنام بس فونها رن واستغربت لما شافت رقم محمد لانه لسه ماشي من عندهم .
رغد:مالك يامحمد ؟
رغد قامت وقفت بخضه:انت بتقول ايه؟! .... حريق فى المستشفى ... حصل امته وازاى يا محمد ؟؟ .... طب اقفل وانا هلبس واجيلكوو .
رغد قامت تلبس بسرعه وكلمت حسن يجيلها بسرعه .
بعد شويا حسن رن عليها تنزل وهو مش فاهم هما رايحين فين ولا ليه .
رغد نزلت وحاولت متعملش صوت عشان مؤمن ولارا وكانت بتجرى وقربت من حسن ودموع متحجر جوا عينيها .
حسن:فى ايه يا رغد مالك؟!
رغد:محمد كلمنى وبيقولى ان فى حريق جامد فى المستشفى .
حسن:وحصل ازاى ده ؟؟
رغد:مش عارفه يا حسن تعالى بس نروح بسرعه .
حسن:طب اركبي يلا .
رغد:خلينا نروح بالعربيه يا حسن مش هقدر اركب الموتوسيكل .
حسن:طب خليكى هنا هروح اجيب العربيه بسرعه .
بعد شويا حسن رجع بالعربيه رغد ركبت جمبه وحسن كان طاير بالعربيه .
ورغد طول الطريق بتكلم محمد اللى وصل هو ومها عند المستشفى وبيقولها كل الاخبار .
رغد كانت هتجنن ازاى ده حصل .... وهل فاروق ليه يد فى اللى حصل .
بقلم الكاتبه جنات
ــــــــــــــ★ـــــــــــــ
بعد وقت طويل مع شروق شمس يوم جديد .
حسن ورغد وصلو قدام المستشفى ورغد نزلت من العربيه وعينها على المستشفى اللى محروق اجزاء كتير منها .
ورجال المطافى كانو قدرو يسيطرو على الحريق .
رغد كانت بتبص على المستشفى ورجليها خانتها وكانت هتقع بس حسن ضمها من ضهرها .
حسن:رغد انتى كويسه ؟
رغد ماكنتش سامعه ولا شايفه غير المستشفى .
محمد شاف رغد وقرب منها:رغد انتى كويسه ؟
رغد عينها على المستشفى مش مصدقه ولا مستوعبه اللى حصل .
مها طبطبت على كتفها:رغد حبيبتى انتى كويسه ؟
رغد فاقت على لمسه ايد مها وبصت لمحمد:حد حصله حاجه يا محمد ؟
محمد:الحمدلله قدرو يخلو المستشفى من المرضي والطاقم كله ومحدش حصله حاجه .
رغد قلبها ارتاح واتنهدت براحه:الحمدلله .... هو ايه اللى حصل ؟
مها:لسه لحد الوقت بيحققو مش عارفين السبب .
الظابط مدحت خرج من المستشفى وقرب من رغد لانه عارفها .
مدحت:ازيك يا دكتورة رغد ؟
رغد:الحمدلله ... عرفتو سبب الحريق ؟
مدحت:الظاهر كدا حد من عمال المطبخ نسو الغاز مفتوح .
رغد:الطاقم بتاع المطبخ متمكنين فى شغلهم ... ومتاكده انهم ميعملوش غلط سخيف زى ده .
مدحت:حاليا هنقبض على كبير الطاقم ونحقق معاه ومع الطاقم كله .
واحد من العساكر قرب منهم وهو ماسك عم عبده الطباخ .
عبده:انا معملتش حاجه يا بنتى والله .
رغد بصت لمدحت:عم عبده معانا من اول ما بدأنا شغل فى المستشفى ومستحيل يعمل كدا .
رغد بصت لعم عبده كأنها بطمنه .
مدحت:بردو هنقبض عليه .
رغد بحده:وده مش هيحصل ..... عم عبده مش هيمشي معاكو .
مدحت:ده شغلنا يا دكتورة .
رغد بعصبيه:الشغل اللى حضرتك مش عارف تشوفه كويس ... وبتعلق كل حاجه على كتف راجل غلبان ملوش ذنب .
محمد:اهدى يا رغد مش كدا .
مدحت:لو لا انى مقدر حالتك كنت قبضت عليكى بسبب طريقتك معايا .
رغد:طب اعملها كدا ورينى هتعملها ازاى ؟!
فى الوقت ده وصل مراد اللى حسن كلمه .
مراد:رغد اهدى مش كدا ... معلش يا مدحت باشا الصدمه صعبه عليها بردو .
مدحت:انا عامل حساب لفاروق بيه عمها غير كدا ماكنتش هسكت .
رغد:لا والله ... اقولك على حاجه ...
حسن كتم بوق رغد لانه عارف انها مش هتسكت واخدها بعيد عنهم .
ومراد كان بيحاول يهدى مدحت اللى اضايق من رغد .
بقلم الكاتبه جنات
ــــــــــــــ★ـــــــــــــ
حسن شد رغد بعيد عنهم:انتى مجنونه يا رغد ... هتغلطى فى ظابط انتى عارفه انه ممكن يقبض عليكى ومحدش هيقوله عملت كدا ليه .
رغد:اللى حضرتك متعرفوش ان ظابط ده كلب فلوس وممكن يبيع امه عشان خاطر الفلوس .
حسن:ايا كان يا رغد ... لازم تهدى عشان نتصرف .
رغد طلعت فونها وكلمت لواء كان صديق والدها جمال وطلبت منه انه يخلى مراد المسؤل عن القضيه مش مدحت وهو وافق بعد ماعرف ان مراد نقل شغله القاهرة .
رغد رجعت هى وحسن لمراد ومحمد وبصت لمدحت بتحدى وهو استغرب نظرتها .
فون مدحت رن وكان امر ليه بانه يمشي لان القضيه اتسحبت منه وبقت فى ايد مراد .
مدحت قفل وبص لرغد بغل .
رغد قربت منه:ابقي سلميلى على فاروق لما تشوفه وقوله مكانك محجوز فى حبل المشنقه جمب صاحبك .
مدحت مشي من غير مايرد عليها .
مراد:انت عملتى ايه يا قادرة .
رغد:كلمت اللواء محمد عبد السلام وانت عارف انه كان صديق بابا .
مها:قولت قويه ومستقويه ومحدش صدقنى .
رغد بصت لمراد:انا عايزة عم عبده والطاقم كله يطلع منها يا مراد فهمنى .
عم عبده:يا بنتى فى واد جديد جه من يومين وانا ماكنتش مرتاح ليه والعلم عند الله بردو يا بنتى .
رغد:هو فى حد جديد اشتغل فى المستشفى بدون علمى يا محمد ؟!
محمد:محدش جديد دخل الطاقم انا معنديش علم اصلا .
رغد:اومال ازاى يدخل ويشتغل يومين بدون علمكو وعلمى .
مراد:اهدى يارغد ..... تعالى معايا يا عم عبده هناخد شويا اجابات منك وهترجع على بيتك .
عبده:حاضر يابنى.
عبده وطاقم المطبخ راحو مع مراد .
رغد مشت ناحيه المستشفى وحسن مسك دراعها:راحه فين يا رغد ؟!
رغد:هدخل جوا شويا يا حسن .
محمد:مش امان يا رغد انك تدخلى جوا .
رغد:لا هدخل .
رغد دخلت المستشفى وحسن وراها وعينيها كانت بتلف فى كل زاويه من زوايا المستشفى وكأن شريط ذكرياتها بيتعاد قدامها من اول يوم دخلت فيه المستشفى مع ابوها وهو بيفرجها على المستشفى اول ماجهزت وكل لحظه حلوة قضيتها جوا المستشفى.
حسن:رغد خلينا نمشي احسن .
رغد وهى بتبص على المستشفى:تعرف ان انا اول حد شاف المستشفى لما جهزت .... جيت هنا مع بابا وقتها كنت لسه فى ٣ ثانوى .... وبابا فضل يفرجنى عليها وماكنش بيقولى غير يادكتورة .... قولتله انت واثق اوى كدا انى هابقي دكتورة .... رد عليا وقالى هتبقي احلى واشطر دكتورة وعندى ثقه كبيرة فيكى .... ولما نجحت ودخلت طب واتخرجت وجيت اتدربت واشتغلت كنت دايما بشوف فى عينيها نظرة فخر بيا .
رغد بصوت عالى:انا اسفه يابابا ماكنتش اد الثقه دى .
حسن:رغد انتى مالكيش ذنب واكيد هنعرف اللى عمل كدا .
رغد بصت لحسن ودموعها نزلت:انا متاكده انه هو فاروق وابنه ... بينتقم منى على كل حاجه ... واخد منى اكتر حاجه بحبها ... عرف يوجعنى صح يا حسن .
حسن مسك وشها بين ايده ومسح دموعها:رغد انتى قويه ... ومش لازم يحسو انهم قدرو يكسروكى فهمانى .... هتكملى للاخر وهتاخدى حقك منهم وانا معاكى وفى ضهرك سمعانى .
رغد بصت فى عينيها وهزت راسها باه .
حسن خلينا نمشي وجودنا هنا مش هيفيدنا بحاجه ومراد اكيد هيعرفنا كل الاخبار .
رغد:حاضر
حسن مسك ايدها وخرجو من المستشفى وركبو العربيه واتحركو .
بقلم الكاتبه جنات
ــــــــــــــ★ـــــــــــــ
فى الحارة وتحديدا فى بيت الشهاوى .
مؤمن صحى على صوت لارا:بابي اصحى بقي .
مؤمن فتح عينيه:ايه يا لارا صاحيه بدرى ليه ؟!
لارا:الساعه ١٠ يا بابي وانا جعانه ورغد مش هنا .
مؤمن قام قعد:مش هنا ... معقول راحت العياده .
لارا:معرفش .
مؤمن:طب هاتى فونى لما ارن عليها .
لارا جابتله الفون ومؤمن رن على رغد اللى ردت عليه .
مؤمن:انت روحتى العياده يا رغد ؟
رغد:لا يا مؤمن انا كنت فى القاهرة وجايه فى الطريق .
مؤمن بقلق:القاهرة ليه يا رغد ... انتى ازاى تسافر لوحدك !
رغد:اهدى يا مؤمن انا مش لوحدى حسن كان معايا وسافرت بليل وانتو نايمين .
مؤمن:فهمينى يا رغد فى ايه !
رغد:حصل حريق فى المستشفى .
مؤمن:حريق ... ازاى ؟
رغد:مش قادرة اتكلم يا مؤمن لما اجى نتكلم .
مؤمن:حاضر يا رغد .
مؤمن قفل معاها وكان هيتجنن ازاى حصل الحريق ده .
بقلم الكاتبه جنات
ــــــــــــــ★ـــــــــــــ
فى بيت البطل .
هدى كانت بتحضر الفطار عشان تطلعه لعروسين .
حنين:يا هدهد يا حبيبتى لسه بدرى هنطلع نخبط عليهم الوقت والله عيب .
هدى:انتى شوفتى بنفسك رهف بتصحى من بدرى واخوكى كمان ... على مانخلص هيكونو صحو .
حنين:غريبه حسن لسه منزلش ليه ؟!
هدى:امبارح تعب ياحبت عينى سبيه ينام شويا ... هو الشغل هيطير يعنى .
حنين:على رايك ... وانا كلمت امهات الولاد والبنات اللى عندى وقولتهم اجازة.
اولفت وعزة دخلو المطبخ:صباح الخير .
هدى وحنين:صباح النور .
اولفت عينها على صنيه اللى عليها انواع مختلفه من الاكل:هى دى للعرسان ولا ايه ؟
هدى:ايوا بالف هنا على قلبهم .
اولفت:هما مش هينزلو يفطرو هنا ليه يا هدى ؟
هدى:ينزلو فين يا عينيا دول عرسان ... هيفضلو فى شقتهم والاكل يطلع لحد عندهم .
اولفت:العروسه الحلوة بعد فترة شهر العسل دى ... هتطبخ وتاكل فى بيتها ولا هتاكل معاكو هنا .
هدى:دى حاجه ترجعلهم يا اولفت ... هما وراحتهم .
حنين:حمزة عمره ما هيبعد عننا يا ماما .
هدى:ربنا يبارك فيه وفى مراته يارب .... يلا ياحنين شيلى معايا .
هدى شالت صنيه وحنين صنيه وطلعو خبطو على الباب براحه .
بقلم الكاتبه جنات
ــــــــــــــ★ـــــــــــــ
فى شقه العروسين .
رهف كانت فى المطبخ بتشرب وسمعت صوت خبط على الباب .
قربت من الباب تشوف مين من العين السحريه وشافت هدى وحنين وبصت على لبسها اللى كان عباره عن بجامه ستان بلون البينك وفتحت الباب .
هدى اول ماشافتها:بسم الله ماشاء الله ربنا يحميكى يا بنتى .
رهف:صباح الخير يا هدهد .
هدى:صباحيتك مباركه يا حبيبه قلب هدهد .
حنين:عروستنا القمرايه عامله ايه ؟
رهف:الحمدلله يا حنين .... تعالو اتفضلو .
هدى:نتفضل فين لا احنا طالعين نطلعلكو الفطار .
هدى وحنين دخلو حطو الصوانى على السفرة وخرجو بسرعه.
هدى لفت وبصت لرهف:هو الواد حمزة فين ؟
رهف:لسه نايم يا هدهد .
هدى:الواد انحرف من اول يوم جواز وهينام لضهر .
حنين ورهف ضحكو وهدى ضحكت معاهم ونزلو.
رهف بصت على الاكل ودخلت المطبخ تجيب عصير وبعدها تدخل تصحى حمزة .
فى الاوضه .
حمزة صحى ماكنتش رهف جمبه قام يدور عليها ماكنتش فى الحمام اللى فى الاوضه .
خرج من الاوضه وشاف صوانى على السفره وسمع صوت فى المطبخ .
حمزة وقف على باب المطبخ وابتسم لما شاف رهف واقف وبتحط العصير فى الكوبايات .
حمزة قرب منها وحضنها من ضهرها.
رهف اتخضت:حرام عليك خضتينى يا حمزة .
حمزة:سلامتك من الخضه ياروح وقلب حمزة .... صباح الجمال و الحلاوة .
رهف:صباح النور .... انا كنت لسه هاجى اصحيك .
حمزة:مين اللى جاب الاكل اللى برا ؟
رهف:دى هدهد ونونا .
حمزة:هروح الحمام واجى نفطر سوا .
رهف:حاضر .
بعد شويا قعدو يفطرو سوا ورهف كانت مبسوطه باهتمام وحب حمزة ليها .
رهف:انا عايزة اكلم حمزة يا حمزة ممكن .
حمزة:انتى بتسالينى ياحبيبتى ... وقت ماتحبي تكلميها كلميها علطول .
رهف ابتسمت:حاضر
رهف جابت فونها ورنت على رغد اللى كانت لسه فى العربيه وردت على رهف وبتحاول تبان كويسه عشان متزعلش اختها .
رغد:صباح الجمال يا احلى عروسه .
رهف:صباح النور ياحبيبتى .... ايه ده يا رغد انتى مش فى البيت ؟؟
رغد:خرجت اشترى شويا حاجات يا حبيبتى متقلقيش .
رهف:رغد انتى كويسه بجد .
رغد:اه يابنتى بخير .... وبعدين فين حمزة هو سايبك ترغى فى الفون عادى كدا .
رهف فتحت الاسبيكر:حمزة جمبي وسامعك كمان .
رغد:صباح الخير يا عريس .
حمزة:صباح القشطاا يا دكتورة .
رغد:انت سايب عروستك بترغى معايا كدا عادى .
حمزة:هو انا اقدر ازعلها يعنى .
رغد:رهف حبيبتى انا بخير .... روحى اقعدى مع عريسك ومتشغليش بالك بيا او باى حد ماشي ياقلبي ..... وانا هجيلك بليل ان شاء الله .
رهف:حاضر ياحبيبتى .
رغد:يلا سلام بقي .
رهف:باى .
بقلم الكاتبه جنات
ــــــــــــــ★ـــــــــــــ
بعد شويا دخلت عربيه حسن الحارة ورغد نزلت قدام بيت الشهاوى .
وحسن نزل وفتح شنطه العربيه ولف طلع منها شنط كبيرة كان فيها علب حلويات كتير ورغد شالت معاه وطلعو بيت الشهاوى .
رغد خبطت ولارا فتحت ليها .
مؤمن خرج من الاوضه:رغد .
مؤمن بص على علب الحلويات:ايه ده يارغد ؟
رغد:مش المفروض نروح لرهف بليل وناخد معانا حلويات ... انا ماكنتش اعرف ده حسن اللى قالى .
مؤمن:طب كويس ... تعالى اقعدى بقي وفهمينى ايه اللى حصل ؟
رغد:حاضر ... هدخل الشنط دى جوا واجى .
رغد وحسن دخلو الشنط المطبخ وخرجو قعدو فى الصاله .
رغد:لولى ياروحى ايه رايك ترسمى رسمه حلوة وتاخديها لرهف هديه واحنا رايحين نزورها .
لارا بحماس:فكرة حلوة اوى .
لارا جرت على المرسم .
مؤمن:هااا يا رغد اتكلمى بقي .
رغد بدات تحكيله من اول مكالمه محمد وكل اللى حصل لحد مارجعو .
مؤمن:طب الواد الجديد ده انتى ماكنتيش تعرفى عنه .
رغد:لا ... مش عارفه مين اللى دخله بين طاقم المطبخ .
مؤمن:يبقي محلوله الواد ده يجى وهنعرف كل حاجه .
حسن:مراد شغال على الموضوع وان شاء الله نوصله للى عملها ..... انا همشي الوقت يا رغد وانتى ارتاحى شويا .
رغد:حاضر ياحسن .
حسن خرج ورغد دخلت اخدت شاور ونامت شويا عشان يصحو يروحو لرهف بليل.
بقلم الكاتبه جنات
ــــــــــــــ★ـــــــــــــ
فى القاهرة فى ڤيلا فاروق اللى قاعد مع ابنه فى المكتب .
مازن:يعنى مدحت مش هو اللى ماسك القضيه ؟!
فاروق:بت الـ.... خلت الواد اللى اسمه مراد هو اللى يمسكها .... اكيد ابوها حكيلها عن مدحت .
مازن:الخطوة التانيه هتبقي امته؟
فاروق:اهدى بس ... لما تفوق من صدمتها الاولى .
مازن:انا مش عايزة تلحق تفوق انا هخليها تندم على اليوم اللى فكرت تتجوز من الواد ده .
فاروق:وده كمان هخلصك منه قريب ما تقلقش .
مازن:حلو اوى ... خليها تحرم تلعب معانا مرة تانيه .
بقلم الكاتبه جنات
ــــــــــــــ★ـــــــــــــ
بليل .
رغد ومؤمن ولارا نزلو من بيت الشهاوى عشان يروحو لرهف .
رغد مؤمن كانو بيحاولو يبانو كويسين عشان رهف متحسش بحاجه .
وصلو بيت البطل وفتحتلهم حنين:ياميت اهلا والف سهلا .
رغد ضحكت:يامرحب بيكى ياختى وسعيلى كدا بقي .
رغد دخلت وحنين بصت لمؤمن وضحكت:البت دى مالها ؟
مؤمن:رهف وحشاها مش اكتر .
لارا:نوناا وحشتينى .
حنين:قلب نونا ياناس ... يلا اتفضلو .
الكل دخلو وسلمو على هدى واولفت وعزة والحاج محمود .
وفضلو يرغو كتير .
حسن نزل من شقته بعد ماقضي اليوم كله نوم .
حسن قعد على ايد الكنبه اللى قاعده عليها رغد وهمسلها:بقيتى احسن .
رغد ابتسمت:الحمدلله يا حسن .
عزة عينها كانت عليهم وهى شيفاهم بيتهامسو سوا وده كان مضايقها جداا .
حمزة ورهف نزلو وكانت رهف لابسه عبايه استقبال بلون الاوف وايت وطرحه بنفس اللون وكانت جميله جداا
رغد اول ماشافتها ابتسمت وقامت من مكانها وقربت منها وحضنو بعض بحب .
رغد بعدت عنها:ماشاء الله حلوة اوى يارهف .
رهف:طالعه لاختى .
رهف وحمزه سلمو على الكل وقعدو معاهم .
هدى:بس انا زعلانه منك يارغد .... ايه كل الحاجات اللى انتى جيباها دى يابنتى .
اولفت:ما دى الاصول ياهدى ... اهل العروسه هما اللى ليجيبو حلويات الصباحيه .
رغد:دى حاجات بسيطه ياهدهد مش من قيمتكو ولا قيمه رهف ... انا لو اطول اجبلها كل حاجه حلوة لحد عندها .
حنين:ياسيدى ياسيدى على الحب .
محمود:ربنا يبارك فيكو يابنات ويخليكو لبعض يارب .
رهف:ويخليك لينا ياعمو محمود .
هدى:عمو ايه بقي ... انتى من النهارده تقوليله يا بابا ... لكن انا هدهد زى ما انا .
كلهم ضحكو وقضو وقت جميل سوا وبعدها مؤمن ولارا ورغد رجعو على البيت .
حمزة ورهف طلعو شقتهم .
والكل راحو عشان ينامو .....
الفصل الثلاثون30
عدى اكتر من شهر .
حمزة ورهف اللى عايشين احلى ايام سوا .
رهف بعد اسبوعين من فرحها نزلت تحت وبتشاركهم الاكل .
اولفت وعزة اللى بيضايقو رهف بس وهما لوحدهم ... ورهف مش بتقول لحمزة ولا هدى عشان مايحصلش مشاكل بسببها .
مراد اللى شغال على القضيه ولسه لحد الان الولد اللى دخل طاقم المطبخ مختفى ومش لاقينه .
رغد اللى كل وقتها فى العياده .
محمد اللى اقترح على رغد يكلمو شركه التأمين عشان المستشفى ترجع تانى بس هى رفضت لحد ما الاوضاع تتصلح .
مازن وفاروق اللى بيخططو لانتقام من رغد ومنتظرين الوقت المناسب لتنفيذ خطتهم .
حمزة اللى فاجأ رهف ونقلها المرسم اللى كان فى بيت الشهاوى لشقتهم لانه عارف انها بتحب الرسم جداا .
لارا اللى خلصت امتحاناتها ورجعت على الحارة وعايشه مع رغد والوقت اللى رغد بتروح العياده بتروح تقعد مع حنين .
بقلم الكاتبه جنات
ـــــــــــــ★ــــــــــــــ
صباح يوم جديد .
رغد نزلت من بيت الشهاوى ومعاها لارا عشان توصلها بيت البطل .
وصلو عند بيت البطل وكان الباب مفتوح رغد ولارا دخلو البيت .
رغد وقفت لما سمعت كلام اولفت مع رهف .
اولفت:اعمليلى قهوة انا وعزة .
رهف:حاضر ياطنط اولفت .
عزة جت من وراها ومعاها دريس وحدفته لرهف:واغسليلى ده عشان عندى مشوار مهم بكرة وهلبسه .
رغد اتعصبت ودخلت الشقه .
اولفت وعزة اتصدمو من وجودها .
رغد شدت الدريس من رهف ورميته فى وش عزة:اظن حضرتك مش مشلوله لما تغسلى هدومك لنفسك .
رغد بصت لاولفت:انا اختى مش خدامه عندك عشان تعملك قهوة انتى وبنتك ... اللى يحب يطفح حاجه يعملها لنفسه .
رهف:عيب كدا يارغد .
رغد بصتلها بحده:انتى تسكتى خالص ... من امته الوضع ده بقي على كدا .... مشغلينك خدامه ياهانم .
اولفت:هى لما تساعد اهل جوزها تبقي خدامه يا رغد هانم.
رغد:اديكى قولتيها بنفسك اهل جوزها وعلى حد علمى حضرتك متقربيش حاجه لحمزة ولا ايه ؟!
اولفت:انا مرات خال حسن يا رغد يعنى لما تتجوزى وتيجى تعيشى هنا مش هتنفذى طلباتنا .
عزة:ده المفروض يا ماما .
رغد:ااااه ده عند امك ياحيلتها انا مش خدامه عندكو .... وقسمابربي اللى حصل ده مش هيعدى على خير .
رغد بصت لرهف واتكلمت بحده:طنط هدى فين ؟
رهف:راحه تشترى حاجه وحنين فوق على السطح .
رغد:ولما حماتك مش هنا قاعده تعملى ايه ... ماتطلعى شقتك لحد مايرجعو ..... اطلعى يا لولى لحنين .
لارا طلعت ورغد لفت عشان تمشي .
رهف:رغد استنى ...
رغد مشت من غير ماترد عليها ورهف زعلت وطلعت شقتها .
بقلم الكاتبه جنات
ـــــــــــــــ★ــــــــــــــ
رغد خرجت من بيت البطل وهى متعصبه وراحت على ورشه البطل ودخلت المكتب من غير ماتخبط .
كان حمزة وحسن قاعدين .
رغد دخلت ووقفت قدام حمزة واتكلمت بعصبيه:انت لما جيت وطلبت ايد اختى منى قولتلك اختى خط احمر صح ولا لأ ؟! .... قولتلك لو حد ضايق اختى يا حمزة مش هعديها .
حمزة بص لحسن باستغراب ورجع بص لرغد:مالك يارغد هى رهف مالها ؟
رغد:فى ان اختى شغاله خدامه فى بيت جوزها يا استاذ حمزة .
حسن:اهدى يا رغد ... هى لما تساعد امى واختى تبقي اسمها خدامه !
رغد:انت عارف انا مش قصدى على هدهد ولا حنين ولا حتى عمو محمود .... انا قصدى على العقربه اللى قاعده عندكو هى وبنتها ومشغلين اختى خدامه عندهم وهى مش بتتكلم وبتنفذ طلباتهم والاكيد انها مش هتقول لا ليك ياحمزة ولا حتى لهدهد .
حمزة:طب ممكن تهدى وتفهمينى ايه اللى حصل .
رغد حكيلته على كلام وطريقه اولفت وعزة مع رهف .
حمزة اضايق:صدقينى يارغد انا معرفش باى حاجه من دى وانتى عارفه رهف بنسبالى ايه واكيد مش هرضي انها تشتغل خدامه كدا .... انا طلبت منها تفضل فى شقتها لانى كنت خايف من اولفت وعزة ولانى متاكد انهم هيضايقوها وهى اللى رفضت وعايزة تفضل معاهم تحت ..... وكل يوم بسالها حد فيهم ضايقك وهى بتقول لأ .
رغد:انا دمى اتحرق لما شوفت طريقتهم معاها ياحمزة .
حمزة:متقلقيش انا هتصرف .
رغد:ياريت انا المرة دى اتكلمت بس المرة الجايه مش هعديها اقسم بالله .
رغد قالت كدا وخرجت من الورشه وراحت على العياده .
حمزة بص لحسن:كنت متاكد انهم هيضايقوها والله وطلبت منها تفضل فى الشقه فوق وهى اللى رفضت .
حسن:اهدى واحنا هنتصرف بس بالعقل يا حمزة .
حمزة بعصبيه:هى مرات خالك خلت فيها عقل يا حسن .
حسن:طب اهدى .... تعالى نكمل شغلنا ولما نرجع نشوف هنعمل ايه .
حمزة:انا هرجع البيت يا حسن معلش .
حسن:طب بلاش تزعل رهف هى ملهاش ذنب .
حمزة:اكيد مش هزعلها ... بس لازم تعرف انها غلطت لما خبت عليا .
حسن:اكيد ماحبتيش تعمل مشاكل يا حمزة ... اكيد مش انا اللى هقولك على رهف وطيبتها .
حمزة:عارف يا حسن .
حسن:طب روح انت وانا هكمل شغل .
حمزة:حاضر .
بقلم الكاتبه جنات
ـــــــــــــــ★ــــــــــــــ
فى بيت البطل .
رهف كانت قاعده فى شقتها وعماله تعيط لان رغد مش بترد عليها .
باب الشقه اتفتح ودخل حمزة وشافها وهى بتعيط .
رهف قامت وقفت وحمزة قرب منها:ليه خبيتى عليا يا رهف ؟
رهف:رغد اللى قالتلك ؟
حمزة:انتى كمان مش عايزاها تقولى يا رهف !
رهف عيطت:انا مرضيتش اقولك عشان ميحصلش مشاكل يا حمزة والله .... وكمان هما كانو بيعملونى كويس جدا قدامكو وخوفت لو جيت اقولك او اقول لهدهد محدش فيكو يصدقنى .
حمزة:انتى شيفانى كدا يا رهف .... ليه نكذبك اولا انا وهدهد عارفينك كويس زى ماحنا عارفين اولفت وبنتها .... ثانيا لو كانت هدهد عرفت حاجه زى دى اكيد كانت هتقف فى صفك انتى يا رهف .
رهف عيطت:انا اسفه والله .
حمزة:هما لما عملو كدا معاكى يا رهف قللو منك ... ولما هما يقللو منك معناها قللو منى انا يا رهف ... عملو مراتى خدامه فى بيتها ...
انتى غلطتى يا رهف وغلط كبير .
حمزة قال كدا ودخل اوضته وقفل الباب عليه ورهف قعدت على الكنبه تعيط .
بقلم الكاتبه جنات
ـــــــــــــــ★ــــــــــــــ
فى عياده رغد .
قاعده فى مكتبها بعد ما خلصت كل الحالات اللى عندها .
رغد بتفتكر معامله اولفت وعزة لاختها ... ومضايقه لانها خبت عنها .
رهف كل شويا ترن عليها وهى يا تكنسل يا متردش عليها .
الباب خبط .
رغد:ادخل .
الباب اتفتح ودخل حسن:الدكتورة فاضيه .
رغد:اه ياحسن اتفضل .
حسن دخل وقعد على الكرسي قدام المكتب:لسه مضايقه مش كدا ؟
رغد:عندى حق يا حسن .
حسن:عارف ... بس اظن محدش يعرف اختك اكتر منك ولا ايه ؟
رغد:مش فاهمه قصدك !
حسن:اكيد رهف خبت عنكو عشان ميحصلش مشاكل يا رغد صح ولا ايه ؟!
رغد:اكيد رهف مافيش اطيب من قلبها ... بس مش معنى كدا انها تسيبهم يعاملوها بطريقه دى .
حسن:حمزة اكيد هيتصرف ... واكيد مش هيرضي باللى حصل ... حمزة الاسبوع اللى فات عمل معاهم مشكله كبيرة عشان بس عشان عيبو فى اكل رهف ووقتها عرف يجيب حق مراته ... معنى كدا انه مش هيسكن يا رغد .
رغد:انا عارفه انه بيحبها وجدا كمان ومش خايفه عليها طول ما هى مع حمزة وفى وسطكو يا حسن .... بس الوليه دى وبنتها انا مش بيطيقهم .
حسن ضحك:متخافيش عليها احنا كلنا معاها .
الباب خبط .
رغد:ادخل .
فرح فتحت الباب ودخلت:دكتورة فى حاله برا .
رغد:طب دخليها .
حسن:همشي انا يا دكتورة .
رغد ابتسمت:حاضر يا حسن .
حسن قام وقف ولما شاف الشاب اللى داخل مع بنت صغيرة قعد مكانه تانى ورغد استغربته .
حسن:خلصى كشف على الحاله وانا هستناكى عشان عايزك فى موضوع مهم .
رغد:حاضر .
رغد قامت من على المكتب وقربت من البنت:ازيك يا قمرايه .
البنت:الحمدلله .
رغد بصت لشاب:حضرتك باباها ؟
الشاب:لا انا اخوها يا دكتورة .
رغد:طب هى بتشتكى من ايه ؟
الشاب:كانت سخنه اوى يا دكتورة .
رغد بصت للبنت:ممكن القمرايه تنام على السرير ؟
البنت طلعت على السرير ورغد بدات تكشف عليها وحسن ملاحظ نظرات الشاب لرغد وده عصبه جدااا .
رغد خلصت كشف وساعدت البنت تقوم ونزلت ليها هدومها وراحت قعدت على المكتب:هى عندها التهاب جامد فى زورها وده اللى سببلها السخونيه .... انا هكتبها العلاج ده تمشي على المواعيد مظبوط وتيجيلى كمان ٤ ايام اعاده الكشف .
رغد بدات تكتب الروشته ومدت ايدها لشاب:اتفضل.
الشاب:تسلمى يا رغد .
حسن بحده:اسمها الدكتورة رغد يا مروان .
مروان بص لحسن بخوف:اسف يا بطل .
مروان اخد البنت وخرج .
رغد بصت لحسن:انت رجعت قعدت ليه مش كنت ماشي .
حسن:تصدقى انا غلطان انا ماشي .
حسن قام وقف وخرج من المكتب والعياده كلها ورغد ضحكت لانها عارفه انه قعد عشان غيران عليها .
بقلم الكاتبه جنات
ـــــــــــــــ★ــــــــــــــ
فى بيت البطل .
وقت الغدا والكل متجمعين على السفرة ماعدا حمزة ورهف .
هدى:اطلعى ياحنين نادى على اخوكى ومراته عشان يتغدو معانا .
بعد شويا رهف وحمزة نزلو وهدى بصتلهم اوى حمزة اللى شكله مضايق ومتعصب ورهف اللى عينيها حمرة وشكلها كانت بتعيط .
حمزة:السلام عليكم .
الكل:وعليكم السلام .
وقعدو مكانهم واولفت بصت لبنتها وابتسمو بخبث لانهم عملو مشكله بينهم .
بعد ماخلصو اكل .
حمزة:من بكرة يا هدهد هناكل فوق فى شقتنا .
هدى:ليه يا بنى ايه اللى حصل ؟ .... حد زعلك ولا زعل رهف ؟!
حمزة:كدا احسن يا هدهد ... انا هطلع ارتاح شويا .
حمزة طلع ورهف قامت وقفت:هطلع اشوف حمزة عن اذنكو .
محمود:اذنك معاكى يا بنتى .
رهف طلعت ومحمود بص لهدى اللى عينها على اولفت وبنتها .
محمود:هو حد زعل رهف يا ام حسن ؟
هدى:مش عارفه ياحاج والله امبارح كنا كويسين ورهف مش حابه تقعد فوق لوحدها .
اولفت وعزة قامو وراحو اوضتهم .
محمود بص لحسن:انت تعرف فى ايه يا حسن .
حنين:انا عارفه السبب يا بابا .
هدى:ايه يابنتى.
حنين حكتلهم الكلام اللى قالته ليها رغد لما كلمتها .
هدى:بيشغلو البت عندهم خدامه وانا مش موجودة !!! ..... انا قلبى ماكنش مرتاح لما شوفت معاملتهم الحلوة ليها وكنت متاكده انهم بيخططو لحاجه .... قولتلك ياحاج مشيهم من هنا انت اللى مش راضي .
محمود:وانا من امته طردت حد من بيتى ياحاجه .... اصبرو كلها اسبوع والبيت يخلص .
هدى:هما البيت ده مش ناوى يخلص كل شويا لسه اسبوع لسه اسبوع .... ماتشوف حد كويس يا حسن يرممه بدل الراجل الكسلان ده .
حسن:ست الكل معاها حق يا حاج .... الراجل تحسه بيماطل معانا ومش عايز يخلص البيت وكل شويا يسحب مننا فلوس وبس .
محمود:خلاص ياحسن بكرة شوف راجل تانى يكمله وادى لراجل باقى فلوس وماشيه .
حسن:حاضر ياحاج .
محمود:ابقي كلمى حمزة يا حاجه وخليه مايزعلش رهف .... البت شكلها كانت معيطه .
هدى:حاضر يا حاج انا هطلع ليهم الوقت .
محمود قام وقف:يبقي احسن انا هطلع اوضتى .
حسن:اتفضل يا حاج .
هدى:لمى الاطباق يا حنين وانا هطلع اشوف مرات اخوكى شكلها كان يقطع القلب .
حنين:حاضر يا ماما .
بقلم الكاتبه جنات
ـــــــــــــــ★ـــــــــــــ
هدى طلعت الاول .
وخبت على اوضه اولفت اللى فتحتلها:تعالى يا هدى يا ختى اتفضلى .
هدى:اظن مش هضيفينى فى بيتى يا مرات اخوياا ..... انا جايه اقولك كلمتين تحطيهم انتى وبنتك حلقه فى ودانكو ..... مراتات ولادى دول ستات البيت ... يقعدو كدا ملكات ... مش تشغليها خدامه عندك انتى و بنتى .... انا المرة دى هكتفى بتحذير يا اولفت ... المرة الجايه صدقينى لو غلطتى مش هتفضلى دقيقه تانيه فى بنتى يا اولفت .
هدى قالت كلامها ومشت من قدامهم وخرجت من الشقه .
واولفت وبنتها كانو هيتجننو وجواهم غل وحقد ناحيتهم .
بقلم الكاتبه جنات
ـــــــــــــــ★ــــــــــــــ
فى شقه حمزة اللى طلع ودخل على اوضته وقفل عليه ورهف قلعت الطرحه وقعدت على الكنبه وحاولت ترن تانى على رغد بس بردو مردتش عليها .
رهف عيطت هى ماكنش حابه تعمل مشاكل بس فى نفس الوقت زعلت منها اكتر اتنين بتحبهم .
الباب خبط ورهف مسحت دموعها وبصت من العين السحريه شافت هدى فتحتلها :اتفضلى يا هدهد
هدى دخلت قعدت على الكنبه:بتعيطى ليه يا قلب هدهد .
رهف:مافيش حاجه يا هدهد .
هدى:حنين قالتلى اللى حصل يا بنتى .... ليه معرفتنيش يا رهف وانا كنت جبتلك حقك من حباب عينيهم .
رهف عيطت:خوفت حمزة يعمل مشاكل معاهم والله واكون انا السبب .
هدى اخدتها فى حضنها:اهدى يا حبيبه قلبي ... اومال فين الواد حمزة .
رهف مسحت دموعها:قافل على نفسه من وقت ما جه من الورشه ومش راضي يكلمنى .
هدى:ليه يعنى وانتى ذنبك ايه ؟!
هدى نادت بصوت عالى:وااااد يا حمزة .
حمزة خرج من الاوضه شاف هدى قاعده جمب رهف اللى عينيها حمرة من كتر العياط:خير يا هدهد فى حاجه ؟
هدى:دى حاجات مش حاجه واحده يا واد .... انت مزعل القمر دى ليه ؟
حمزة:هو مين اللى مزعل مين يا هدهد انت متعرفيش حاجه .
هدى:لا عرفت رغد حكت لحنين وهى قالتلى .... انت يا واد ماشوفتش اللى تتشك فى قلبها عزة كانت فرحانه ازاى وهى شايفه رهف نزله معيطه ... كدا تشمتهم فيكو يا واد .
حمزة:انا على اخرى منهم يا هدهد ومش راضي اتكلم عشان خاطرك انتى والحاج .
هدى:وانا بقولك اهو اللى يجى على مراتك دوس عليه ومايهمكش حد ... ومتقلقش انا والحاج مش هنزعل منك .... وانا طالعه ليكو روحت اديتهم كلمتين وحذرتهم لو غلطو تانى همشيهم من البيت ... يلا خد مراتك فى حضنك وراضيها ومتخلهاش تعيط تانى يا واد يا انا اللى هطلع عينك فاهم ..... هنزل انا بقي .... وبكرة تنزلو وتاكلو معانا وتحط صوابعك العشرة فى عينيهم ولا يهمك ده بيتك مش بيتهم .
حمزة:حاضر يا هدهد .
هدى خرجت من الشقه وحمزة عينه على رهف اللى دموعها نازله وقرب منها واخدها فى حضنه وباسها من راسها:حقك عليا يا رهف متزعليش منى .
رهف:متزعلش انت منى انا اسفه مش هخبي عنك حاجه تانى والله ... متبقاش انت ورغد زعلانين منى برن عليها كتير مش بترد عليا .
حمزة:رغد مضايقه عشانك يا رهف ... ومتقلقيش انا هاخدك ليها وراضيها براحتك .
رهف بصتله وابتسمت:ربنا يخليك ليا يا حمزة .
حمزة:ويخليكى ليا يا روح قلب حمزة .... روحى البسي زمان الدكتورة روحت من العياده لانها اخدت لارا .
رهف:حاضر .
رهف لبست عبايه سودا ونزلت مع حمزة اللى وصلها لتحت البيت وراح لحسن على القهوة .
بقلم الكاتبه جنات
ـــــــــــــــ★ــــــــــــــ
فى بيت الشهاوى .
رغد قاعده بتكلم محمد وسمعت جرس الباب قفلت مع محمد وراحت تشوف مين وشافت رهف من العين السحريه .
رغد فتحتلها ومشت من غير ما تكلمها .
لارا اول ما شافتها جرت عليها:رورو .
رهف:قلب رورو انتى.
رهف عينها على رغد اللى سابتها وقعدت تلعب فى فونها .
رهف قربت وقعدت جمبها وشدت الفون منها:لسه زعلانه منى بردو ؟!
رغد ....
رهف:انا مقدرش على زعلك يا رغد .
رغد بصتلها:وانا ميرضنيش اللى بيحصل فيكى .
رهف:انا اسفه انى خبيت عليكو والله مش هتحصل تانى ميبقاش قلبك اسود بقي .
رغد:رهف بلاش تخلى حد يقلل منك يا حبيبتى ... ده انتى رهف جمال الصاوى فاكرة بابا كان بيعاملنا زى الاميرات فى بيته .... ماتجيش واحده زى دى تعمل معاكى كدا .
رهف:حاضر والله مش هيحصل تانى متزعليش بقي .
رغد ابتسمت ورهف حضنتها بحب .
وقضو باقى اليوم سوا وبليل حمزة اخد رهف عشان يرجعو على بيت البطل .
حمزة وصل رهف لحد البيت وقالها انه هيروح يجيب حاجه من السوبر باركت ويجى .
رهف وقبل ماتدخل البيت سمعت صوت اولفت بتكلم ابنها عزت اللى لسه واصل .
اولفت:كنت فين يا مخفى طول الفترة دى ؟
عزت:كنت فى داهيه ياما عايزة ايه منى ؟!
اولفت:خليكى عمال تتسرمح والبت طارت من ايدك واهى اتكتب كتابها على غيرك يا فالح .
عزت:مانا راجع عشان انتقم منهم ياما ... انتى مفكرانى هسكت يعنى .
اولفت:ناوى على ايه يا واد ؟
عزت بدا يقولها خطته ورهف اتصدمت من اللى سمعته ...........