صباح يوم جديد .
رغد كانت نايمه فى اوضتها وصحت على صوت فونها اللى بيرن وكان برقم بنت من شركه النضافه .
رغد قامت قعدت:الو ..... ازاى يعنى مافيش كهربا مقطوعه فى الحارة كلها يعنى .... واشمعنا البيت يعنى اللى مش فيه كهربا ..... تمام اقفلى وانا هجيلكو اشوف الموضوع ده ...سلام .
رغد قفلت:استغفر الله العظيم اكيد منصور الزفت هو اللى عملها قال ايه كدا هيطفشنا مثلا .
رغد قامت لبست بسرعه ونزلت وكانت رهف ولارا لسه نايمين وركبت عربيتها وراحت على اسكندريه .
بقلم الكاتبة جنات
ـــــــــــــــ★ـــــــــــــــ
فى حارة البطل وتحديداا فى بيت عيله البطل .
هدى صحت وكانت نايمه جمب حنين اللى صاحيه وباصه لسقف الاوضه .
هدى طبطبت على راسها:صباح الخير يانونه .
حنين:صباح النور ياماما .
هدى:عامله ايه الوقت يابنتى ؟
حنين:الحمدلله .
الباب خبط ودخل محمود:صباح الخير .
هدى:صباح الخير ياحاج تعالى اتفضل .
حنين قامت قعدت:صباح الخير يابابا .
محمود قعد جمب حنين واخدها فى حضنه:عامله ايه ياقلب ابوكى ؟
حنين:الحمدلله يابابا .
محمود:كدا تخضينى عليكى ياحنين .
حنين:غصبن عنى والله يابابا انا خوفت اوى لما شوفت خيال حد فى الاوضه انا اسفه .
محمود:متتأسفيش ياحبيبه قلبي وبعدين يابنتى ماهو اخوكى دخل الاوضه ودور فيها ماكنش فى حد تلاقيه كابوس وحش هو اللى خوفك بس .
حنين بتوهان:يمكن !!
هدى:انا هقوم احضرلكو الفطار .
محمود:خدينى معاكى ياام حسن .... يلا ياحنين قومى غيرى وانزلى عشان تفطرى معانا .
حنين:ماما لو سمحتى استنينى ننزل سوا .
هدى بصت لمحمود ورجعت بصت لحنين:حاضر ياحبيبتى هستناكى برا .
حنين:حاضر .
محمود وهدى خرجو .
هدى:البت خايفه اوى ياحاج .
محمود:لا اله الا الله ولا حول ولا قوة الا بالله ... ربنا يهديها ياام حسن .
هدى:يارب .
اولفت وعزة خرجو من الاوضه واتفاجو بيهم واقفين فى الصاله .
اولفت:صباح الخير .
محمود وهدى:صباح الخير .
محمود:انا هنزل تحت ياام حسن .
هدى:حاضر ياحاج .
اولفت:هو الحاج رضي عنكو ولا ايه ياهدى ... وكله بفضل حنين ودلعها .
هدى بصتلها بضيق:بنتى مش بتدلع يااولفت ... اظن انتى شوفتى خوفها امبارح ربنا يبعد عنها الشيطان .
حنين خرجت من اوضتها.
عزة:عامله ايه ياحنين الوقت ؟!
حنين:كويسه ... يلا ياماما ننزل .
هدى:يلا يابنتى .
هدى نزلت مع حنين ووراها اولفت وعزة وبداو يجهزو الفطار .
حسن وحمزة نزلو من شققهم واتقابلو على السلم ونزلو سوا كان الحاج قاعد قربو منه وباسو ايده .
حسن وحمزة:صباح الخير ياحاج .
محمود:صباح الخير ياولاد .
حسن:اومال فين حنين ياحاج ؟
محمود:جوا مع امك فى المطبخ يابنى.
حمزة:تعالى ندخل نطمن عليها ياحسن .
حسن:يلا.
حمزة وحسن دخلو المطبخ كانو بيحضرو الفطار وحنين واقفه سرحانه .
حسن قرب منها :عامله ايه يانونه ؟
حنين بصتله وابتسمت:بخير ياحبيبي الحمدلله .
حمزة:كدا تخوفينا عليكى يانونه ولا عايزة تعرفى غلاوتك عندنا ولا ايه ؟
حنين ابتسمت .
حسن حضنها:متخافيش ياحبيبتى احنا كلنا معاكى ومحدش يقدر يدخل بيت البطل ابداا ولا يقرب من اى حد فيه .... ولو حد اتجرأ نهايته هتكون على ايدى .
حسن نهى كلامه وهو بيبص لاولفت اللى اتوترت وعملت نفسها بتجهز الفطار .
هدى:يلا ياحبايبى عشان نفطر سوا .
الكل خرجو واتجمعو على السفرة وفطرو سواا والكل ملاحظين حنين اللى خايفه طول الوقت ومش بتاكل وبعد وقت الشباب خرجو وراحو الورشه .
بقلم الكاتبة جنات
ـــــــــــــــ★ـــــــــــــــ
فى شركه الصاوى .
مازن وصل الشركه ودخل مكتب ابوه كان السكرتيرة قاعده برا ولما شافته ابتسمت اوى واتكلمت بدلع:اهلا مازن باشا .
مازن قرب وركن بايديه على مكتبها:اهلا ياقمر ..... بابا جوا ؟
السكرتيرة:لا لسه مجاش ياباشا .... تحب احضرلك قهوتك؟
مازن:ياريت .
مازن دخل وقعد مكان فاروق على المكتب وبعد شويا دخلت السكرتيرة ومعاها القهوة وحطيتها قدام مازن على المكتب:اتفضل ياباشا .
مازن:شكرا ياقمر .
السكرتيرة قربت منه بدلع ومازن بصلها اوى والقلم اللى فى ايده وقع على الارض ومازن ميل بجسمه عشان يجيبه من تحت المكتب وطلع حط القلم على المكتب وبص لسكرتيرة بحده:اطلعى برا .
السكرتيرة لسه هتقرب منه تانى مازن زعق باعلى صوت:قولت براااااا .
السكرتيرة خافت وخرجت من المكتب بسرعه .
ومازن كان مضايق جدا وقام خرج من المكتب والشركه كلها وكلم فاروق عشان يقابله .
بقلم الكاتبة جنات
ـــــــــــــــ★ـــــــــــــــ
رغد وصلت الحارة ونزلت من عربيتها وسلمت على ام فرح وطلعت بسرعه البيت .
رغد بصت للبنات:الكهربا لسه مقطوعه ؟!
بنت منهم:من اول ماجينا الصبح بدرى وهى مقطوعه وسالنا الناس فى الحارة الكهربا موجوده عندهم .
رغد:طب مكلمتوش حد يشوف اسلاك الكهربا .
ولد معاهم:انا كلمت واحد تباعنا وزمانه على وصول .
رغد:تمام
فون الولد رن:ده الاسطا على الكهربائى اكيد وصل تحت .
رغد:تعالى ننزله.
رغد نزلت ومعاها الولد اللى فهم الاسطا على كل حاجه واخده عند بوكس الكهربا وبدا يشوف الدنيا فيها ايه .
على:ده حد لاعب فى السلوك ياانسه ... وشكله حد فاهم اوى فى الموضوع .
رغد:طب انت تقدر ترجع كل حاجه مكانها ؟
على:اكيد ياانسه .
رغد:طب شوف شغلك يلا .
رغد كانت مضايقه جدا ومتاكده ان منصور اللى عمل كدا بس مافيش دليل على ده .
ام فرح:مالك يابنتى شكلك مضايقه ؟!
رغد:لا ولا حاجه ياام فرح بس فى حد لاعب فى بوكس الكهربا بتاع البيت .
ام فرح:ومين يابنتى اللى هيعمل كدا ؟!
رغد بصتلها:برأيك هيكون مين ياام فرح.
ام فرح شهقت واتكلمت بصوت واطى:معقول يكون منصور ؟!
رغد:وهو فى غيره مضايق من قاعدتى هنا !
ام فرح:وهتعملى ايه يابنتى ... منصور راجل شرانى ومراته محروسه عقربه ولو حطوكى فى دماغهم مش هتخلصى منهم يابنتى .
رغد:انا مش بخاف ياام فرح متقلقيش عليا .
ام فرح ضحكت:مانا شوفت لما اديتله على دماغه لما جاب رجالته وكان مفكر انه هيخوفك .
رغد:دانا رغد واجر عالله يام فرح .
ام فرح ضحكت:ربنا يحميكى يابنتى يارب ... الوقت اختك التؤام شبههك كدا ؟؟
رغد:لا رهف مش شبههى خالص لا فى الشكل ولا فى الطبع حتى .
ام فرح:اومال تؤام ازاى بقااا !!
رغد:مش عارفه والله ...بس ماهى ماما وخالتى كانو تؤام وبردو كانو مختلفين عن بعض .
ام فرح:بس اكيد اختك قويه وجدعه زيك كدا ؟!
رغد:لا خالص ... رهف بسكوتايه فى نفسها اوى يام فرح والله .... ده هى اللى بقيالى والله وبعمل كل حاجه عشان خاطرها هى .
ام فرح:ربنا يخليكو لبعض يابنتى .
رغد:يارب يام فرح .
الاسطى على قرب منهم:المشكله اتحلت ياانسه خلاص وكهربا رجعت .
رغد طلعت فلوس وعطيتهم لعلى:شكراا يااسطى على .
على اخد منها الفلوس:تشكرى ياانسه .
حمزة كان داخل الورشه وشاف على واقف مع رغد واستنى لما رغد طلعت البيت ونادى عليه
على قرب منه:ازيك ياحمزة ؟!
حمزة:بخير ياعلى ... كنت بتعمل ايه مع الدكتورة ؟!
على بص على بيت الشهاوى:قصدك الانسه اللى فى البيت ده !
حمزة:ايوا .
على:الظاهر كدا حد عمل معاها حركه وحشه ولعب فى بوكس الكهربا والكهربا كانت مقطوعه عندهم من بدرى .
حمزة:عملت معاها الواجب يعنى ؟
على:اكيد يابطل .
حمزة:تمام روح انت .
على مشي وحمزة دخل لحسن المكتب:الظاهر كدا منصور حط الدكتورة فى دماغه .
حسن بصله:ازاى مش فاهم ؟!
حمزة قاله كلام على .
حسن:المشكله اتحلت يعنى ؟
حمزة:ايوا الكهربا رجعت.
حسن ضحك:هو مفكر انه كدا هيطفشها فى الحارة ... ميعرفش انه لما بيتحداها هيخليها تحب الحارة بزياده وتعاند قدامه .
حمزة:اه والله راجل عبيط .
وكمل بخبث:وطبعا انت عايز كدا ؟
حسن:عايز ايه ؟!
حمزة:ان الدكتورة تحب الحارة وتفضل عايشه هنا .
حسن:اممم انت هتبدأ مش كدا .
حمزة:انا مش عيل ولا عبيط ياحسن دانا بفهمك ياصاحبي ... وعارف ومتاكد انك معجب بالدكتورة .
حسن:وايه اللى خلاك متاكد اوى كدا يافيلسوف عصرك .
حمزة:اتريق اتريق .... بس ده هدهد هتفرح اوى ... اصل منواها تفرح بحد فينا واهى هتفرح بالبطل قريب جدااا .
حسن حدفه بالقلم:امشي ياحمزة من وشي عندى شغل .
حمزة:طبعا ماهو الشغل تبع الدكتورة .... ياعمى دانت كان ممكن تكلف اى حد من الصبيان اللى هنا يعملو الشغل ده لانه سهل اوى بس ازاى ده تبع الدكتورة لازم البطل يعمله بنفسه .
حسن:شكلك مش هتمشي غير لما وشك ينور ببوكس محترم .
حمزة ضحك:انا ماشي يابطل .
حمزة خرج وهو بيضحك وحسن ضحك عليه وكمل شغل .
بقلم الكاتبة جنات
ـــــــــــــــ★ـــــــــــــــ
فى بيت البطل .
حنين طلعت اوضتها وكانت بتبص فى كل اتجاه فى الاوضه وهى خايفه ولفت انتباها حاجه واقعه جمب الدولاب قرب منها ومسكتها وكانت حظاظه رجالى .
حنين سرحت شويا :انا كنت متاكده انه هو عزت انا شميت البرفان بتاعه .... وكمان دى حظاظته انا بشوفها فى ايده دايما ..... بس راح فين وخرج من الاوضه ازاى ؟ ... ودخل الشقه ازاى اصلا ؟! .... اقول لحسن وبابا ...... لالا اكيد هيعملو مشكله واحتمال حسن يقتله .... طب اعمل ايه ياربي افرض فكر يدخل اوضتى تانى ..... اهدى ياحنين انا هابقي اقفل عليا الاوضه بالمفتاح كويس والشباك كمان وهو اكيد مش هيعرف يدخل مرة تانيه .
حنين فتحت الدولاب وخبت الحظاظه كويسه ونزلت تانى بسرعه .
بقلم الكاتبة جنات
ـــــــــــــــ★ـــــــــــــــ
اليوم عدى بسرعه والمغرب آذن .
عند رغد فى بيت الشهاوى كانو البنات خلصو كل حاجه والبيت بقي حاجه تانيه لما اتفرش
رغد شكرت البنات اللى اخدو كل ادواتهم ومشو .
ـــــــــــــــ★ـــــــــــــــ
فى القاهرة وتحديدا فى ڤيلا الصاوى .
رهف ولارا قاعدين يرسمو سوا فى اوضه رهف وفجأه سمعو صوت حاجه وقعت فى البلكونه .
لارا قربت لرهف بخوف:ايه ده يارهف ؟
رهف:مش عارفه استنى اشوف فى ايه !
رهف قامت ولسه هتقرب من باب البلكونه فجاه لقت نار جامده مسكت فى باب البلكونه والستاير .
لارا صرخت بخوف ورهف حضنتها:اهدى يالارا اهدى .
لارا اغمى عليها من الخوف ورهف شالتها واخدت اسدال وفونها وخرجت من الاوضه بسرعه اللى النار مسكت فيها كلها .
ورهف اتصدمت لما شافت النار فى اجزاء كتير من الڤيلا .
دادا سلمى جرت عليها واخدت منها لارا ورهف لبست الاسدال بسرعه ونزلو وكانو بيحاولو يتفادو النار ودخلو المطبخ وخرجو من الباب الخلفى .
ورهف كلمت مؤمن اللى اتصدم من كلام رهف وقالهم يطمنو وهو جاى فى الطريق .
خلال عشر دقايق مؤمن كان وصل وراح عند الباب الخلفى واخد لارا ورهف اللى كانت مرعوبه وركبو العربيه وركبت معاهم دادا سلمى وبنتين اللى بيساعدوها .
رهف عينيها كانت على الڤيلا والنار بتاكلها وشريط ذكرياتها هى وباباها ومامتها وكمان رغد كله راح مع النار .... رهف انهارت وكانت بتعيط بهستيريا ودادا سلمى كانت بتحاول تهديها .
مؤمن وصل دادا سلمى والبنات بيتهم وراح على المستشفى عشان يطمن على لارا ورهف اللى هدت وكانت فى صدمه من اللى حصل .
بقلم الكاتبة جنات
ـــــــــــــــ★ـــــــــــــــ
فى حارة البطل .
رغد لسه خارجه من الشقه عشان ترجع القاهرة فونها رن وكان مؤمن .
رغد:ايه يامؤمن انا جايه اهو معلش عارفه انى اتاخرت .
مؤمن.....
رغد:مالك يامؤمن فى حاجه ؟!
مؤمن:الڤيلا اتحرقت يارغد .
رغد وقفت على السلم بصدمه:ڤيلا مين اللى اتحرقت يامؤمن ؟!
مؤمن:الڤيلا بتاعتكو يارغد .
رغد بخوف:رهف ولارا حصلهم حاجه يامؤمن طمنى ونبي .
مؤمن:الحمدلله قدرو يخرجو ومحدش فيهم حصله حاجه .... احنا الوقت فى المستشفى .
رغد:مستشفى ليه يامؤمن ؟!
مؤمن:لارا اغمى عليها من الخوف واخدتها عشان اطمن عليها .... وكمان رهف مصدومه وعيطت كتير جدا وبعدها هدت ومن وقتها مش بتنطق خالص .
رغد:وانت هتعمل ايه الوقت ؟
مؤمن:هنفضل فى المستشفى لحد الصبح .
رغد:لا رهف هتيجى النهارده اسكندريه فاهم .
مؤمن:انا مش هقدر اسيب لارا يارغد .... وكمان رهف عايزة راحه .
رغد:انا هكلم دكتور محمد عشان يوصل رهف وانت خليك مع لارا .
مؤمن:ماشي يارغد اللى تشوفيه انا بجد مش قادر افكر.
رغد:حاضر يامؤمن وابقي طمنى على لارا .
مؤمن:تمام .
رغد دخلت الشقه تانى وعيطت من الخوف والصدمه ومسكت فونها ورنت على محمد وقالتله يوصل رهف وهو وافق وبعتتله اللوكيشن .
رغد قفلت مع محمد ودخلت تسمع فاروق وابنه معقول اتفقو وهى مسمعتش بس اتفاجت لما لاقت المايك مش شغال ...
بقلم الكاتبة جنات
ـــــــــــــــ★ـــــــــــــــ
فى ڤيلا فاروق اللى قاعد فى مكتبه ومعاه مازن ابنه وبيتفرجو على فيديو على فون مازن والڤيلا بتولع .
فاروق كان مبسوط اوى:كانو مفكرين انهم هيقدرو يلعبو معانا .
مازن بصله اوى وافتكر اللى حصل
••فلاش باااك••
مازن لما كان فى المكتب بتاع فاروق ومعاه السكرتيرة والقلم وقع منه على الارض ونزل عشان يجيبه شاف المايك تحت المكتب ووقتها طرد السكرتيرة ومسك المايك وخرج من الشركه وكلم ابوه عشان يقابله وكسر المايك .
واتقابل هو وابوه على النيل .
فاروق:مالك يابنى عايزنا نتقابل هنا ليه ؟!
مازن ايده بالمايك لفاروق.
فاروق:ايه ده ؟!
مازن:مايك كان فى مكتبك تحت المكتب بتاعك .
فاروق:ومين اللى هيحط مايك فى مكتبي ؟!
مازن:مؤمن .... اكيد خطه منه ماهو مافيش اى حد هيدخل مكتبك ويعمل كدا ... انت فاكر لما السكرتيرة قالتلك انه دخل مكتبه واستناك جوا اكيد وقتها .
فاروق:ومن وقتها وهما بيسمعو كل خططنا .
مازن:اكيد وعارفين احنا بنخطط لايه .
فاروق:وهنعمل ايه الوقت ؟!
مازن:هنتحرك النهارده انا كلمت رجاله تبعى والنهارده الڤيلا هتولع ورهف ولارا فيها .
فاروق:بس .
مازن:من غير بس احنا استنينا كتير عالفاضى .
فاروق:تمام
••بااااك••
مازن:شوفت دماغى بقي .
فاروق:انت متاكد انهم كانو جوا الڤيلا ؟
مازن:ايوا كانو فيها .
فاروق:معقول ماتو فيها !!
مازن:النار أكلت الڤيلا خلاص قول الله يرحمهم .
فاروق:وتفتكر لو ماتو رغد هتسكت؟!
مازن:هى بموت اختها هتكون انتهت خلاص يافاروق باشا ... يعنى رغد اتكسرت خلاص .
فاروق:صح .
فون فاروق رن.
فاروق:ده الظابط مدحت .
مازن:اكيد هيبلغك الخبر اعمل نفسك متفاجأ بقي.
فاروق:الوو ... ازيك يامدحت؟ ... خير فى ايه ؟....ازاى الكلام ده وحصل امته ؟؟.... طب اقفل وانا هجيلك مسافه الطريق ... سلام .
فاروق ومازن ضحكو اوى .
بقلم الكاتبة جنات
ـــــــــــــــ★ـــــــــــــــ
بعد شويا كان فاروق ومازن وصلو عند ڤيلا الصاوى اللى كانت متفحمه حرفياا والمطافى كانو سيطرو على الحريق .
فاروق قرب من مدحت واتكلم بخوف مصتنع:ايه اللى حصل يامدحت ؟؟
مدحت:لسه التحقيقات شغاله يافاروق بيه ... الجيران كلمونا وقالو ان الڤيلا بتولع والمطافى بيعملو اللى عليهم .
فاروق:طب وبنات اخويا كانو جوا يامدحت والشغالين حد حصله حاجه ؟؟
مدحت:ربنا بيحبهم لان ماكنش فى حد فى الڤيلا .
فاروق بص لمازن بصدمه.
مازن:اومال هما فين؟!
مدحت:علمى علمك الظاهر لسه مش عندهم خبر باللى حصل هنا .
فاروق:طب وانتو هتعملو ايه بعد كدا ؟!
مدحت:التحقيقات شغاله لما نعرف ايه سبب الحريق ولما اهل البيت يظهرو ويشوفو عايزين ايه .
مازن شاور لابوه:خلاص يابابا تعالى نكلم رغد ورهف ونشوفهم هما فين ونطمنهم .
فاروق:عندك حق يلا يابنى ... عن اذنك يامدحت .
مدحت:اتفضل ياباشا .
فاروق ومازن ركبو العربيه وبعدو عن الڤيلا والشرطه ووقفو فى طريق فاضي .
فاروق بص لابنه بحده:مش قولتلى انهم فى الڤيلا !
مازن:الراجل اللى مراقب الڤيلا قالى رغد خرجت من بدرى ولسه مرجعتش ومحدش خرج ولا دخل الڤيلا من الصبح ده حتى البت الصغيرة مراحتش المدرسه النهارده .
فاروق اتعصب وضرب دركسيون بقوة:يعنى اتبخرو مثلا ؟!
مازن:انا هتجنن زيك .
فاروق:معقول عرفو بخططنا وهربو ؟!
مازن:ازاى وانا كسرت المايك قبل مانتفق .
فاروق:انت تأبق وتغطس وتعرفى راحو فين فاهم .
مازن:حاضر
فاروق اتحرك بالعربيه ورجعو على ڤيلتهم .
بقلم الكاتبة جنات
ـــــــــــــــ★ـــــــــــــــ
فى منتصف الليل فى حارة البطل .
حسن وحمزة ومراد قاعدين على القهوة
حسن عينه جت على بيت الشهاوى وشاف نور مفتوح:هو فى حد فى بيت الشهاوى لحد الوقت ؟!
مراد وحمزة بصو على البيت .
حمزة:يمكن لسه بيعملو فيه حاجه .
مراد:هما لسه منقلوش هنا ؟!
حمزة:لا لسه .
بقلم الكاتبة جنات
ـــــــــــــــ★ـــــــــــــــ
فوق عند رغد كانت غيرت هدومها ولبست اسدال وقلبها كله خوف على رهف ونفسها توصل فى اسرع وقت وتاخدها فى حضنها بسرعه .... وكانت هتجنن معقول فاروق شاف المايك وكسرو وقرر ينتقم منها فى اختها .
رغد كانت مخنوقه جداا وكلمت محمد وقالها ان كلها ربع ساعه و هيكونو عندها فى الحارة .
رغد خرجت البلكونه و حسن شافها و ملاحظ انها متوترة او خايفه بس مش قادر يحدد .
مراد شاف رغد فى البلكونه عماله راحه جايه وحمزة كمان لاحظ توترها:هى الدكتورة هتبات هنا ولا ايه ؟!
مراد:مش عارف !!
مراد قام وقف ومسك فونه ورن عليها ورغد كانت متوترة وراحه جايه وفاقت على صوت رنه فونها وكان مراد وشافته واقف قريب من القهوة .
رغد ردت عليه:ازيك يامراد ؟
مراد:رغد انتى كويسه مالك متوترة وراحه جايه كدا ليه ؟!
رغد اتنهدت:الحمدلله يامراد ... كل الحكايه ان رهف جايه فى الطريق والوقت متاخر زى مانت شايف وقلقانه عليها مش اكتر .
مراد:مش مصدق ولا كلمه قولتيها يارغد ... بس متاكد هيجى الوقت اللى تحكيلى كل حاجه .
رغد بصتله اوى:اكيد يامراد ... بس والله رهف جايه فى الطريق وانا خايفه عليها .
مراد:تمام يارغد .
مراد قفل وراح قعد مع الشباب
حسن:فى حاجه يامراد ؟!
مراد:لا .. كل الحكايه ان اخت الدكتورة جايه فى الطريق و هى قلقانه عليها ... تؤامتها بقي .
حسن هز راسه ورفع عينه لرغد اللى لسه راحه جايه فى البلكونه .
فون مراد رن وكانت نورة مراته ... مراد رد عليها وقام وقف وبص لشباب:انا همشي ياشباب نور بنتى سخنه اوى وهروح عشان اوديها لدكتور .
حسن:تمام وابقي طمنا عليها .
مراد رد عليه وهو ماشي:حاضر .
بعد شويا .
رغد زى ماهى راحه جايه وعينها على مدخل الحارة واول ماشافت عربيه محمد دخلت الحارة نزلت بسرعه وخرجت من البيت وجرت على العربيه وفتحت الباب وساعدت رهف تخرج واخدتها فى حضنها بقوة:كنت هموت من القلق عليكى يارهف .
رغد بعدت عنها ومسكت وشها بين ايدها:انتى كويسه حصلك حاجه؟
رهف هزت راسها بلا .
رغد شاورت على بيت الشهاوى:ده بيت جدو صالح يارهف فاكرة ماما لما كانت بتحكلنا دايما عنه ... تعالى شوفيه بجد هتحبيه اوى .
رغد بصت لمحمد:تعالى يامحمد اتفضل .
رغد طلعت وهى ماسكه ايد رهف ورافضه تسيبها ومحمد طلع معاهم .
حسن وحمزة كانو متابعين كل اللى بيحصل ومش فاهمين حاجه .
حمزة:معقول كل الخوف ده عشان اختها جايه من القاهرة لاسكندريه ؟!
حسن:معتقدش وبعدين دى مش جايه لوحدها يعنى ... الظاهر كدا فى حاجه !
حمزة:علمى علمك !
بقلم الكاتبة جنات
ـــــــــــــــ★ـــــــــــــــ
فوق فى البيت الشهاوى .
رغد قاعده على الكنبه وفى حضنها رهف اللى ساكته ومش بتتكلم خالص .
رغد بصت لمحمد وهزت راسها بمعنى " مالها "
محمد هز راسه وغمض عينيها بيطمنها انها كويسه .
رغد بصت لرهف:مقولتيش اى رايك فى البيت يارهف ؟
رهف زى ماهى مش بتنطق .
محمد قام وقف:انا همشي وهابقي اطمن عليكو .
رغد هزت راسها باه
محمد نزل ورغد بصت لرهف:هنزل اتكلم مع محمد واجيلك يارهف مش هتاخر .
بقلم الكاتبة جنات
ـــــــــــــــ★ـــــــــــــــ
محمد خرج من البيت وراح عشان يركب عربيته وقف لما رغد نادت عليه:محمد .
محمد لف وبصلها وهى قربت منه:هى رهف مالها ليه مش بتتكلم ولا بتعيط حتى .
محمد:اللى عرفته من مؤمن انها لما شافت الڤيلا بتولع انهارت والظاهر كدا ده سببلها انهيار عصبي ومن وقتها وهى مش بتنطق .... بس ده مؤقت يارغد متخافيش ومتنسيش ان الصدمه كانت كبيرة عليها اذا كان وهى وسط النار او حريق الڤيلا اللى تقريبا كل ذكرياتكم فيها .
رغد:عارفه انه اللى مرت بيه مش سهل .... طب ولارا كويسه؟
محمد:لارا اغمى عليها من الخوف لما شافت النار ومتخافيش عليها ... ومؤمن قالى انه هياخدها ويروح شقته اللى فى القاهرة وبعدها هيجبها هنا عشان تعيش معاكو .
رغد:ايوا ده كان اتفقنا اصلا عشان يبعدها عن فاروق وابنه .
محمد:انا بجد مش متخيل عمك ده ايه شيطان ؟!
رغد:بابا عمره ما وثق فيه يامحمد وانا زيه مش بحب لا هو ولا ابنه ولا حتى مراته كلهم زى العقارب .
محمد:اهم حاجه خدى بالك من نفسك ومن رهف ولو احتاجتى اى حاجه ماتردديش لحظه انك تكلمينى .
رغد ابتسمت:اكيد يامحمد وبجد مش عارفه اشكرك ازاى .
محمد:انتى عبيطه يابت انتى اختى يارغد .
رغد:وانت ونعمه الاخ والله .... معلش الحمل هيكون تقيل عليك فى المستشفى الفترة الجايه .... وانا كلمت مها وفهمتها كل حاجه وهى هتكون معاك ... بس الاهم فاروق وابنه ميعرفوش انكو بتتواصلو معايا .... وفؤاد لانه صاحب فاروق الروح بروح وممكن يقوله .
محمد:اكيد يارغد متقلقيش من اى حاجه ... يلا اطلعى لرهف هى محتاجاكى جمبها .
رغد:اكيد .
محمد:سلام .
رغد:سلام .
محمد ركب عربيته ورغد عينها عليه لحد ماخرج من الحارة وبصت على البيت وطلعت وماكنتش شايفه عيون حسن اللى كانت عليها .......
الفصل الثاني عشر12
رغد طلعت بعد محمد مامشي ... كانت رهف قاعده مكانها على الكنبه وسرحانه .
رغد قعدت جمبها ومسكت ايدها:عارفه انك مصدومه من كل اللى حصل .... الموقف مش سهل يارهف انا حاسه بيكى والله ..... عارفه انك مخضوضه من اللى حصل والنار اللى كانت حوليكى فى كل مكان فى الڤيلا .... وكمان الڤيلا اللى قضينا فيها كل ذكرياتنا مع بعض وذكرياتنا مع بابا وماما الله يرحمهم .
رغد كانت بتتكلم وبتحاول تمسك دموعها عشان خاطر رهف .
رغد:انتى كنتى مفكرة ان انا و مؤمن ظالمين فاروق مش كدا .... عمك بقاله فترة كبيرة بيحاول ينتقم منى انا و مؤمن فيكى انتى و لارا عشان يكسرنا و ياخد كل الاملاك لنفسه يارهف .
رهف بصتلها وعينيها كلها صدمه .
رغد اتنهدت وبدأت تحكيلها كل اللى حصل من اول ماحطو المايك فى مكتب فاروق وكل كلامه وخططه مع مازن .
رغد:انا ماكنتش حابه انك تعرفى عشان متحسيش بالخوف اللى انا حسيته والرعب اللى كنت عايشه فيه وانا بسمعه كل يوم بيخطط يخلص منكو ازاى عشان يكسرنى انا ومؤمن ..... رهف عمك ده شيطان ... بابا عمره ماكان بيثق فيه عشان عارف حبه للفلوس وطمعه .
رغد سابت ايدها وقامت وقفت قدامها:عشان كدا انا مؤمن كنا بندور على مكان نعيش فيه بعيد عن فاروق وفكرنا كتير جداا ... لحد ماافتكرت البيت ده .
رغد قعدت على ركبتها قدام رهف ومسكت ايدها:فاكرة ماما وكلامها وحكاياتها عن البيت ده يارهف ... فاكرة خالتو منى كانت بتحب البيت ده اد ايه ومتمسكين بيه ورافضين انهم يبعوه .
رهف افتكرت كل ده وهزت راسها وهى بتبتسم بحزن .
رغد:عشان كدا دورت على البيت وجيت وجبت ناس نضفوه كويس واشتريت كل حاجه هنحتاجها ... و كنت كمان بحضرلك مفاجاه حلوة اوى هتعجبك ... بس اللى حصل بقي و جينا هنا بدرى و المفاجاه لسه مش جاهزة ........ قومى معايا شوفى المفاجاه يلا .
رغد شدت رهف اللى قامت معاها ورغد فتحت الاوضه ورهف شافت كل اللوح مركونه على الحيطه فى اوضه فاضيه ..
رهف:دى لوحى !!
رغد:ايه رايك فى المعرض بقي ؟!
رهف بصتلها:بتهزرى ... انتى اخدتيهم عشان تجبيهم هنا؟!
رغد:اه والله ... مانا اكيد مش هسرقهم يعنى يارهف ..... تعالى فى بلكونه كمان حلوة اوى
..... ايه رايك ؟
رهف:جميله .
رغد:خليتهم يحطولك الورد ده عشان ترسمى بمزاج رايق يامزتى .
رهف ابتسمت .
(فى الوقت ده كان حسن قاعد فى بلكونه شقته وعينه جت على رغد واختها وشايفهم وهما بيتكلمو سوا بس طبعا مش سامع لان فى مسافه بينهم )
رغد:مانا فضلت افكر اخد اللوح ازاى مانتى عارفاهم بالواحده يارهف ...... فكرت اخدهم من وراكى واقولك حرامى دخل وسرقهم وخلاص ...... بس اكيد يعنى مش من طبيعى الحرامى يدخل يسرق لوح مش فنان هو .
رهف ضحكت بصوت عالى ورغد فرحت لما شافت ضحكتها و ضحكو الاتنين من قلبهم ورغد شدتها لحضنها والاتنين بيضحكو ....
بس ضحك رهف اتحول لعياط .
رهف وهى بتعيط:وحشونى اوى يارهف .... حتى ذكرياتهم كلها راحت فى الحريق .
رغد عيطت هى كمان فى حضن رهف وكأنها كانت مستنيه الاشارة عشان تطلع كل الوجع والخوف والقلق والتوتر اللى عاشته الايام اللى فاتت على شكل عياط .
الاتنين عيطو كتير جدااا لحد ماهدو .
رغد بعدت عن حضن رهف ومسحت دموعها وبصت لرهف اللى بتبصلها اوى .
رهف:رغد انتى كويسه ؟!
رغد وهى بتعيط:انا الفترة اللى فاتت كنت تعبانه اوى يارهف ... كنت خايفه عليكى انتى ولارا ...كنت قلقانه ومتوترة وعايزة اعمل اى حاجه عشان احميكو .... انا ومؤمن كنا بنموت كل يوم من القلق واحنا بنسمع فاروق وابنه بيخططو يتخلصو منكو ازاى .... اوقات كتير يارهف كنت ببقي عايزة اجى اترمى فى حضنك بس ماكنتش عايزاكى تعيشي الخوف اللى انا عيشته .
رهف حضنتها بحب:استحملتى كل ده لوحدك ياحبيبه قلبي .
رغد بعدت عن رهف:انا الوقت بقيت كويسه وانتى معايا وبعيده عن فاروق وابنه .
(حسن كان عينه عليهم مستغرب ضحكهم اللى فجأه اتحول لعياط ... وشايف رغد اللى بتعيط فى حضن اختها اول يمكن يشوفها ضعيفه كدا دايما بتكون قويه جدا )
رغد:وبعدين الذكريات ايه اللى راحت مع الڤيلا ؟!
رهف:صورنا مع بابا وماما وصورنا واحنا صغيرين ... غير الاوقات الحلوة اللى قضيناها سوا فى الڤيلا مع بابا وماما من اول مااتولدنا .
رغد:اولا كل الصور انا اخدتها يعنى هى هنا فى البيت مراحتش فى الحريق ولا حاجه ...
ثانيا بقي ذكرياتنا مع بابا وماما واوقاتنا سوا دول جوا فى قلوبنا وعقلنا يارهف مش بالمكان خالص .... طب ماحنا قضينا اوقات حلوة اوى فى ڤيلا جدو صالح فى اسكندريه مع خالتو منى ومؤمن .... ياترى نسينا الذكريات دى لما باعو الڤيلا ؟
رهف:لا .
رغد:يبقي خلاص ليه نزعل وكل ذكرة ووقت حلوة قضيناه مع بابا و ماما جوا قلبنا و عقلنا .
رهف لسه هترد عليها بس قاطعها صوت فون رغد اللى رن .
رغد:صح انا طلبت اكل ... اكيد جعانه زيي مش كدا ؟
رهف:جدا الصراحه .
رغد:تمام ادخلى الاوضه وافتحى الدولاب هتلاقى لبس كتير غيرى على ماانزل اجيب الاكل واجى .
رهف:حاضر .
رغد نزلت واستلمت الاكل وحاسبت الشاب وطلعت كانت رهف واقفه قدام الدولاب فى الاوضه الكبيرة مستغربه .
رغد:مالك يارهف؟!
رهف:الهدوم كلها الوان !
رغد:ماحنا خلاص مش هنلبس اسود من النهارده ..... ومتنسيش انها وصيه بابا ولا ايه ؟!
رهف:صح .
رغد:بقولك ايه تيجى ناكل فى البلكونه ؟
رهف:هلبس اسدال واجيلك .
رغد اخدت اطباق ودخلت البلكونه وبدات تطلع الاكل على التربيزة الصغيرة الموجوده ورهف جت وبداو ياكلو سواا
رهف كانت عينها على الحارة وبتتفرج عليها .
رغد:ايه رايك فيها ؟!
رهف:مكان مختلف جدا وجديد وتصدقى نفسي النهار يطلع واشوف الحياه فيها بتبقي عامله ازاى !
رغد:هى حياه مختلفه ... بس الناس اللى عايشين هنا طيبين جداا ... انا اتعرفت على ام فرح ودى صاحبه فرشه الخضار اللى تحت دى ...وبنتها فرح طيبه جدا وفرحها كمان قرب ومعزومين عليه ياستى .
رهف ضحكت:انتى لحقتى تتعرفى على الناس وكمان تتعزمى على افراحهم يارغد .
رغد:وكمان اتعرفت على عمو محمود البطل وده صاحب الورشه دى وتخيلى بقي ده كان صاحب جدو صالح وعارف ماما وخالتو منى وسالنى انا بنت مين فيهم كان مفكرنى بنت خالتو منى عشان شبهها جدا .
(كل ده وحسن عينه عليهم وشايفها وهى عماله تشاور على كل حاجه فى الحارة كأنها بتعرف اختها عليها وضحك على حالتها اللى بتتغير فى ثانيه )
البنات خلصو اكل ودخلو كل واحده لبست بجامه ونامو جمب بعض فى الاوضه اللى فيها سرير واحد .
بقلم الكاتبة جنات
ـــــــــــــــ★ـــــــــــــــ
صباح يوم جديد .
رغد فتحت عينيها على صوت دوشه جامده واللى كانت عبارة عن اصوات مكرفونات عاليه وكل واحد بينادى على الحاجه اللى بيبعها اللى بيبع خضار واللى بيبع فاكهه ... وعيال بتلعب فى الشارع ...... وصوت صاروخ اللى بيقطعو بيه الخشب فى الورشه .
رهف كمان صحت:هى الساعه كام ؟!
رغد مسكت فونها وكانت الساعه ٨ .
رغد بضيق:اوف بقي هى الناس دى ايه اللى مصحيهم من الساعه ٨ ؟!
رهف ضحكت عليها.
رغد بصتلها:اهلا بيكى فى الحارة .... نفسك النهار يطلع اهو طلع ياختى استمتعى بالدوشه بقي .
رهف ضحكت اكتر :هما صح ليه صاحين بدرى كدا ؟!
رغد:يابنتى ده دول بينامو من الساعه ٩ .
رهف:وهنعمل ايه الوقت هنكمل نوم ولا هنصحى ؟!
رغد:بذمتك تقدرى تنامى فى الدوشه دى لو جدعه اعمليها بقا .
رهف:مش هقدر طبعاا .... طب هنعمل ايه الوقت ؟!
رغد:هنعمل زى الناس عاديين هنقوم نغسل وشنا واسنانا ونتوضي ونصلى الصبح ونفطر .
رهف:طب يلا بينا .
البنات قامو رغد دخلت الحمام الاول وبعدها رهف وصلو الصبح ودخلو المطبخ .
رهف بتفتح التلاجه اللى كانت فاضيه وبصت لرغد .
رغد ضحكت:صحراء جرداء .
رهف:يعنى انت جبتى كل حاجه ونسيتى اهم حاجه وهى الاكل !!
رغد:اعملك ايه ماكنتش اعرف اننا هنستقر هنا امبارح .
رهف:طب هنعمل ايه ياحضره الدكتورة ؟!
رغد:بردو هنعمل زى الناس هنزل اشترى طلبات البيت .
رغد ورهف بصو لبعض وضحكوو .
رهف:وانتى تعرفى حاجه هنا على كدا ؟!
رغد:اللى يسأل ميتوهش يااوختشى .... هروح اغير .
رغد دخلت الاوضه وكلمت مؤمن تطمن على لارا وقالها انه جاى فى الطريق عشان يجيب لارا لان فاروق ومازن بيدورو عليهم فى كل مكان ... ورغد بعتتله اللوكيشن .... وقالها انه قرب منهم .
بقلم الكاتبة جنات
ـــــــــــــــ★ـــــــــــــــ
فى ورشه البطل .
كان حسن وحمزة قاعدين قدام باب الورشه وبيشربو قهوة .
حمزة:عزت ابن خالك مجاش البيت من يوم موضوع حنين .
حسن:مانا ملاحظ .
حمزة:وتعرف سكته ؟!
حسن:هتلاقيها متنيل سهران فى اى مكان من بتوعه .
حمزة:عايزك تعرف مرات عمى تاخد بالها من حنين وحذر حنين وقولها تبعد عن مرات خالك وبنتها .
حسن:بلاش احسن انت عارف ست الكل دماغها هتفضل دوى وتجيب ... ولما ناكد بردو يكون احسن .
حمزة:اللى يريحك يابطل .
فى الوقت ده نزلت رغد اللى لابسه سوت بلون الازرق وطرحه بلون الابيض وحسن ابتسم لانه اول مرة يشوفها لابسه الوان .
رغد وقفت تكلم ام فرح .
رغد:صباح الخير ياام فرح .
ام فرح:صباح قشطه يابنتى .... ألا صحيح انتى هنا من بدرى ولا ايه ؟!
رغد:انا بايته هنا من امبارح انا واختى .
ام فرح:ياميت اهلا وسهلا بيكو يابنات نورتو الحارة والله .
رغد:منورة بيكو ياام فرح ... عروستنا عامله ايه ؟!
ام فرح:بخير يابنتى الحمدلله .
رغد:ربنا يفرحك بيها يارب .
ام فرح:يسمع من بوقك ربنا يابنتى .
رغد:ام فرح هو مافيش اى سوبر ماركت قريب اشترى منه طلبات للبيت .
ام فرح:فى واحد بس صغير فى نص الحارة ... لكن لو عايزة واحد كبير ويكون عنده كل طلبات هتخرجى من الحارة هتلاقيه فى وشك .
رغد:ماشي ياام فرح .
رغد لسه هتمشي نادت عليها رهف من البلكونه:رغد .
رغد لفت وبصتلها:فى ايه ؟!
رهف:نسيتى مفاتيحك .
رغد وقفت تحت البلكونه:طب احدفى .
رهف حدفتهم ورغد مسكتهم .
ام فرح وهى بتبص على رهف :دى اختك يارغد ؟!
رغد:ايوا دى رهف اختى التؤام .... ودى ام فرح يارهف .
ام فرح:اهلا بيكى يابنتى نورتى الحارة .
رهف كانت مكسوفه لان تقريبا كل اللى فى حارة سامعهم:منورة بيكو ياام فرح .
ام فرح بصت لرغد:عندك حق يارغد لما قولتيلى ان اختك بسكوتايه خالص .
رغد ضحكت:مش قولتلك .... يلا همشي انا بقي .
رهف دخلت من البلكونه لما رغد مشت
حمزة ضحك:الدكتورة اخدت على الحارة فى كام يوم كأنها من اهلها .
حسن ابتسم .
حمزة:بس اختها غيرها خالص ياجدع .
حسن:امممم
حمزة:عندها حق ام فرح لما قالت انها بسكوتايه .
حسن:لا والله .
حمزة ضحك:اه والله .
بعد شويا رغد رجعت وهى شايله شنط كتير وبتتكلم فى الفون اللى سنداه بكتفها ووقفت فى مدخل البيت وحطت كل الشنط على الارض .
رغد:تمام يامحمد خلص كل حاجه وعرفنى بالتفاصيل وعايزة تقارير بكل حاجه بتم فى المستشفى .... سلام .
رغد رنت على رهف وقالتلها تنزل تاخد منها الشنط عشان تروح تجيب باقى الحاجات .
رغد ماسكه فونها ولسه هترن على مؤمن بس لفت لما سمعت صوت لارا بتنادى عليها لما شافتها:رغــــــــد .
لارا جرت عليها ورغد حضنتها بحب وباستها من خدها:روح قلب رغد انتى .
لارا:شوفتى اللى حصل يارغد كان فى نار كتير فى الڤيلا وانا ورهف كنا خايفين .
رغد:الحمدلله انكو بخير ياحبيبتى .... انتى جايه مع مين ؟!
لارا:مع بابى بس هو راح يركن العربيه .
رغد بصت ابتسمت لما شافت مؤمن قرب عليهم:عامل ايه يامؤمن؟
مؤمن:الحمدلله وانتو عاملين ايه ؟!
رغد:حلوين جداا .
لارا:بابى قالى انى هفضل هنا معاكو .
رغد:ده ايه الخبر القمر ده .
رهف نزلت وقربت منهم:لولى عامله ايه ياقلبي ؟
لارا نزلت من حضن رغد وحضنت رهف:انا كويسه وكنت خايفه عليكى جداا .
رهف باستها من خدها:انا بخير ياحبيبتى .
مؤمن:انتى كنتى فين يارغد ؟!
رغد:كنت بجيب طلبات للبيت .
مؤمن:مقولتيش ليه كنت جبتلك كل حاجه وانا جاى .
رغد:انا جبت شويا الحاجات وباقى الحاجه فى سوبر ماركت عشان مقدرتش اشيل كله .... لولى ياقمر طلعى الشنط مع رهف وفى شوكلت حلوة اوى هتعجبك .
لارا:حاضر .
رغد:اطلع يامؤمن هجيب باقى الحاجه واجى .
مؤمن:تعالى هاجى معاكى .
رغد مسكت فى دراعه:هيا بنا .
مؤمن ضحك على جنانها وراح معاها ... وحسن وحمزة كانو متابعين اللى بيحصل .
حمزة:هو مين ده ؟
حسن:معرفش .
حمزة:معقول جوزها ودى بنتها؟!
حسن بصله:تفتكر ؟!
حمزة:العلم عند الله .
رغد ومؤمن رجعو سوا وكانو شايلين شنط كتير .
رغد:مؤمن حط كدا الشنط دى وتعالى معايا .
مؤمن:هنروح فين ؟!
رغد:حطهم بس هنا وتعالى هو انا هخطفك يعنى .
رغد ومؤمن حطو الشنط فى مدخل البيت ورغد قفلت الباب وقربت من حسن وحمزة اللى استغربو .
رغد:صباح الخير .
حسن:صباح النور .
رغد:معلش بس هى الحاجات اللى كنت طلبتها خلصت ولا لسه .
حسن:لسه لمسات بسيطه بس ... تحبي تبصي عليهم؟
رغد:ياريت .... تعالى يامؤمن .
رغد ومؤمن دخلو الورشه مع حسن وشافت الحاجات .
مؤمن:هى رهف هتعمل مرسم هنا كمان ؟!
رغد:لا انا كنت حابه اعملها مفاجاه واجهزلها اوضه مرسم انت عارف هى بتحب الرسم اد ايه .... ايه رايك بقي ؟!
مؤمن:ماشاء الله الشغل حلو جدا تسلم ايدين اللى عمله .
رغد شاورت على حسن: صح نسيت اعرفكو ... ده حسن البطل هو اللى عمل الشغل يامؤمن .
رغد شاور على مؤمن:وده مؤمن .
حسن مد ايده لمؤمن:اهلا بيك الحارة نورت بيكو .
مؤمن سلم عليه:الحارة منورة باصحابها يابطل .... وبجد مش عارف اشكرك ازاى على وقفتك جمب رغد .
حسن بص لرغد ورجع بص لحسن:انا ماعملتش حاجه .
رغد:طب انا هستلم الشغل ده امته ؟!
حسن:بكرة ان شاء الله هيدهن وهخلى الشباب يطلعو الشغل لحد عندكو .
رغد:بجد يبقي كتر خيرك .... صح عمو محمود عامل ايه ؟
حسن:الحاج بخير الحمدلله .
رغد:وصله سلامى .
حسن:يوصل ان شاء الله .
مؤمن:يلا يارغد عشان همشي انا بقي .
رغد بصتله:ليه لسه بدرى خليك معانا شويا .
مؤمن:هروح عشان الشغل وهابقي اجيلكو تانى .
رغد:اذا كان كدا اوكى .
مؤمن ضحك وطبطب على كتفها:خدى بالك على نفسك وعلى لارا ورهف .
رغد:اكيد فى عينيا .
مؤمن بص لحسن:مبسوط انى اتعرفت عليك يابطل واكيد لسه هنتقابل تانى .
حسن ابتسم:اكيد .
مؤمن خرج وراح ركب عربيته ومشي ورغد دخلت البيت اخدت الشنط وطلعت .
بقلم الكاتبة جنات
ـــــــــــــــ★ـــــــــــــــ
بليل فى بيت عيله البطل .
حسن وحمزة دخلو البيت:السلام عليكم .
كان الكل متجمعين وردو عليهم السلام .
هدى:حمدلله على السلامه ياحبايب قلبي .
حسن وحمزة قربو منها وباسو راسها .
حسن قرب من حنين وباس راسها:عامله ايه الوقت يانونه ؟!
حنين ابتسمت:بخير ياحبيبي الحمدلله .
حمزة:زى القردة اهى ياحسن .
حنين ضحكت:مقبوله منك يازومه .
حمزة طلع شوكلت كبيرة من جيبه:احلى شوكلاتايه لاحلى نونه فى الدنيا .
حنين:حبيبي يازومه ربنا يخليكو ليا .
حسن بص لاولفت وعزة اللى متابعين فى صمت:عامله ايه يامرات خالى ؟
اولفت:بخير ياحسن الحمدلله .
حسن:اومال عزت فين محدش بيشوفه ؟!
اولفت:ده عنده كام مشكله فى ورشه ابوه ربنا يعينه عليهم .
حمزة:ده حتى مش بيجى ينام هنا ولا يكون بينام فى الورشه كمان !!
اولفت بصتله بغل:لا بيروح ينام فى شقتنا عشانها قريبه من الورشه .
حمزة:ربنا يعينه .
حسن:اومال الحاج فين ياست الكل ؟
هدى:طلع ينام ياحبيبي .... هتتعشو هنا ولا فوق ياحبايبى ؟!
حنين:لا نطلع فوق يا ابو على وناكل سوا ... انا بستناكو على فكرة .
حمزة:طيب هطلع اغير واجيلكوو .
حسن:هاتى الاكل وتعالى يانونه .
حنين:فوريرة.
حنين دخلت المطبخ والشباب طلعو .
هدى بصت لاولفت:صح يااولفت الحاج قالى انه شاف واحد عشان يرمم البيت بتاعكو يعنى كلها اسبوعين ويكون خلص .
اولفت:لدرجه دى بقيتا تقال عليكو ياهدى ... على العموم كتر خيركو ... يلا نطلع ننام ياعزة .
عزة:يلا ياما .
هدى:تصبحو على خير .
اولفت:تلاقى الخير ياهدى .
بقلم الكاتبة جنات
ـــــــــــــــ★ـــــــــــــــ
فى ڤيلا فاروق اللى قاعد فى مكتبه ومعاه مازن .
فاروق بعصبيه:يعنى ايه ملهموش اثر يامازن ؟!
مازن:مش عارف انا هتجنن راحو فين دول !
فاروق:دانا كلمت فؤاد اسال على رغد وقالى انها بقالها يومين مش بتيجى المستشفى ودى غريبه هى مش بتتاخر عن شغلها ابدا !
مازن:ومؤمن عرفت انه جه الشركه متأخر اخد شويا ملفات ومشي .
فاروق:اكيد الواد ده عارف هما فين .
مازن:حتى لو عارف مش هينطق بكلمه.
فاروق:عندك حق .
باب المكتب اتفتح ودخلت شهيرة مرات فاروق .
مازن:فى حاجه ياماما ؟!
شهيرة قعدت قدام مازن وبصتلهم:انتو ورا اللى حصل فى ڤيلا جمال صح ؟!
فاروق:ايه الكلام الفارغ ده ياشهيرة ؟!
شهيرة:لا مش كلام فارغ يافاروق انا متاكده انكو وراها ... ودليل ده انكو قاعدين هتتجننو وتعرفو رغد ورهف فين ..... عايز تقتل بنات اخوك يافاروق؟!
فاروق:شهيرة اقفلى على الموضوع ده خالص ومش عايز اسمعك بتفتحيه مرة تانيه فاهمه ؟
شهيرة قامت وقفت:ماشي يافاروق .
مازن:انا مستغربك ياماما مانتى كنتى فى صفنا وعايزة نصيب بابا من الورث !
شهيرة:مش بالقتل يامازن ... انا فى الاخر ام وهمى الوحيد هو انت ... وانا ميرضنيش انك تتأذى ياحبيبي .
مازن قام وقف وقرب منها:ياشوشو ياقمر محدش يقدر يجى جمبي وانتى عارفه ده كويس ... ومتقلقيش احنا كل حكايه عايزين الشركه والمصنع لانهم حقنا .
شهيرة:ماشي يامازن بس خليك فاكر اخر اللى بتعملوه ده مش خير ... تصبحو على خير .
شهيرة خرجت ومازن قعد تانى مكانه .
مازن:هندور تانى عليهم .
فاروق:كلم رجالتنا يدورو عليهم فى كل حته .
مازن:تمام هطلع انام انا بقي .
فاروق:غريبه مش هتروح تسهر زى عادتك ؟!
مازن:انا طول اليوم بدور عليهم وتعبت ... باى .
مازن خرج وفاروق بيفكر مع نفسه وهيتجنن ونفسه يعرف البنات راحو فين .
بقلم الكاتبة جنات
ـــــــــــــــ★ـــــــــــــــ
فى حارة البطل وتحديدا فى شقه حسن اللى كان بيتعشي مع حنين وحمزة وضحكو كتير .
حنين:تعرفو انا من يوم اللى حصل وانا خايفه وبنسي كل خوفى اول ما بقعد معاكو .
حسن:احنا معاكى يانونه ومحدش يقدر يقرب منك .
حنين:حبيبي يا ابو على ربنا يخليك ليا .
حمزة:وانا ايه شفاف يعنى ؟!
حنين ضحكت:انت اخويا وحبيبى يازومه ... يارب بقي تتجوزو و افرح بيكو ..... عايزة يكون معايا بنات فى البيت ده نسهر و نضحك سوا .
حمزة:ايه طموحاته دى ياحنين ... مرة تقولى عايزة تلبسي فستان ومره عايزة بنات تسهرى معاهم ... وبعدين احنا هنتجوزهم عشان يسهرو معاكى ؟!
حنين:اتجدعن انت بس وهات عروسه .
حمزة غمزلها:لا مانتى هتفرحى بالبطل الاول .
حسن بصله برفعه حاجب:انت هتبدأ و لا ايه ؟!
حمزة:الله وانا قولت ايه غلط يابطل ... ماهى الدكتورة جت ونورت الحارة وكلها شويا وتنور بيت عيله البطل .
حنين شهقت:هى جت تعيش هنا خلاص ؟!
حمزة:ايوا هى واختها .
حنين:عايزه اشوفها واتعرف عليها ياابو على .
حسن:وانا مالى بكل ده وبعدين تتعرفى عليها ليه يعنى ؟!
حنين:مش هتبقي مرات اخويا !!
حسن:يخربيتك انتى بتقولى ايه ... انتى تسكتى خالص لحد يسمعك فاهمه .
حنين:طب بص فى عينى كدا واحلف انك مش معجب بيها .
حمزة:حتى لو معجب بيها ... فى مشكله يانونه .
حنين:مشكله ايه ؟!
حمزة:النهارده فى شاب جالهم ومعاه بنت صغيرة شكلها بنته والبنت كانت متعلقه بالدكتورة اوى .
حنين:وفيها ايه ؟!
حمزة:مش يمكن جوزها ودى بنتها .
حنين:معقول !! ... هى لابسه خاتم فى ايدها ؟!
حمزة:واحنا هنعمل ايه بالخاتم اللى فى ايدها !!
حنين:يااذكى اخواتك خاتم بيدل انها متجوزة مخطوبه كدا يعنى .
حمزة:تصدقى فاتتنى دى .. اسالى البطل يمكن كان مركز ولا حاجه .
حسن:انا مش هخلص منكو مش كدا ... يلا يابت انتى وهو انا عايز انام .
حنين بصت لحمزة:احنا شكلنا بنطرد يازومه !!
حمزة ضحك:شكلنا ... لا ياحبيبتى احنا اطردنا خلاص ... يلا ننزل ننام بشويا الكرامه اللى فاضلين .
حنين وحسن ضحكو عليه .
وحنين وحمزة نزلو وحسن دخل البلكونه وعينه كانت على بلكونه رغد بس مقفوله فضل شويا يبص عليها بس مخرجتش ... فدخل عشان ينام هو كمان .....