صباح يوم جديد .
رغد صحت من بدرى عشان تروح تشوف بيت جدها صالح الشهاوى .
جهزت ونزلت وقابلت لارا ورهف .
رغد:صباح الحلويات ياقمرات.
رهف:صباح النور يارغد.
لارا:صباحك بيضحك يارغوده.
رغد باستها من خدها:ياروح رغوده انتى.
رهف:انتى راحه فين من بدرى كدا يارغد؟!
رغد:عندى مشوار مهم هعمله وهروح المستشفى .
رهف:طب تعالى نفطر الاول .
رغد:لا مستعجله اوى ... سلام.
رهف ولارا:سلام .
لارا:تعالى نفطر بقي .
رهف:يلا ندخل لدادا سلمى نشوف خلصت الكيك ولا لسه .
لارا بحماس:يلااا.
رغد خرجت وركبت عربيتها واتحركت بيها وكلمت مؤمن اللى كان لسه نايم .
رغد:صباح الفل ياسي مؤمن ناموسيتك كحلى ولا ايه.
مؤمن:لسه بدرى يابنتى ده الساعه ٨ .
رغد:اوكى انا بكلمك اعرفك انى راحه اسكندريه.
مؤمن:بردو مصممه تروحى لوحدك ؟!
رغد:ياعمى قولتلك هقابل مراد وهنروح سوا متشغلش بالك انت .
مؤمن:طب استنى اغير واجى معاكى .
رغد:لا مش لازم تغيب عن الشركه عشان فاروق .
مؤمن:طب خدى بالك على نفسك وانا هابقي اكلمك اطمن عليكى.
رغد ضحكت:حاضر يابابا.
مؤمن:هتروحى بعربيتك.
رغد:لا هسيب العربيه وهكمل لحد اسكندريه باوبر .
مؤمن:طب ليه؟!
رغد:كدا احسن الله اعلم مش يمكن يكون فاروق بيراقبنى ولا حاجه.
مؤمن:انتى سمعتيه قال كدا؟!
رغد:لا بس الاحتياط واجب ياباشا يلا سلام.
مؤمن:سلام .
ــــــــــــــــــ★ـــــــــــــــــــ
فى حارة البطل .
حسن صحى وجهز ونزل عشان يفطر مع العيله وقابل حمزة وهو خارج من شقته .
حمزة:صباح الفل.
حسن:صباح الخير .
حمزة غمزله بهمس:بنت خالك كانت بتعمل ايه معاك امبارح بليل؟!
حسن:وانت عرفت ازاى ؟!
حمزة ضحك:سمعتك وانت بتهزقها.
حسن ضحك هو كمان:طب يلا ياخويا ومتبقاش ترمى ودانك عند الباب.
الشباب ضحكو ونزلو .
كانت هدى وحنين بيجهزو الفطار على السفره واولفت وعزة قاعدين على السفرة .
الشباب:صباح الخير.
الكل:صباح النور.
الشباب قربو من هدى وباسو راسها.
هدى:صباحكو كله خير ياحبايبى يارب ... يلا عشان نفطر سوا.
حمزة:انا هروح افتح الورشه ياهدهد وهفطر مع الشباب.
هدى عارفه انه مش بيحب يقعد معاهم عشان اولفت وقربت منه:لا هتفطر ياحمزة يلا ياحبيبى انت بقالك كتير ماقعدتش تفطر معانا يابنى يلا.
حسن:يلا ياحمزة هنفطر ونروح نفتح الورشه سوا ... اومال الحاج فين ياست الكل ؟
هدى:نازل اهو ياحبيبي.
الحاج محمود دخل الشقه:السلام عليكم.
الكل:وعليكم السلام ياحاج .
الشباب قربو منه وباسو ايده والحاج محمود قعد مكانه على السفره:كنتو فين امبارح ياحسن واتاخرتو ليه؟!
حسن:كنا سهرانين فى القهوة مع مراد ياحاج.
محمود:ربنا يحميكو ياشباب يارب.
حنين خرجت من المطبخ ومعاها . طبق:عملالكو بقي طبق بيض بالبسطرمه هتاكلو صوابعكو وراه.
حسن:تسلم ايدك يانونه.
الكل قعدو يفطرو سوا .
حسن:اومال عزت فين يامرات خالى؟!
اولفت:جاله شغل مهم وراح ياحسن.
حسن:ربنا يصلح حاله.... يلا احنا ياحمزة.
حمزة:يلا .
الشباب خرجو والحاج طلع شقته وهدى وحنين بداو يلمو الاكل ودخلو المطبخ .
اولفت همست لعزة:اخوكى ده ناوى يعملنا مشاكل .
عزة:اللى فيه عاده عمره مايغيرها ياما.
اولفت:بس لما يجيلى ... قومى ندخل نساعدهم.
عزة:روحى انتى انا مش قادرة.
اولفت:ماشي ياختى.
بقلم الكاتبه جنات
ــــــــــــــــ★ــــــــــــــ
عند رغد وصلت قدام مول كبير فى القاهرة ونزلت من عربيتها ودخلت المول وطلبت اوبر وكلمت مراد اللى رد عليها وكان حوليه دوشه جامده .
رغد:مراد عامل ايه؟
مراد:انا بخير يارغد انتى جيتى اسكندريه؟!
رغد:لا انا لسه فى القاهرة انت فين كدا؟
مراد:اصل نورة بتولد النهارده واحنا فى المستشفى الموضوع جه فجاه والله.
رغد:ربنا يطمنك عليهم ويقومو بسلامه يارب .
مراد:تسلمى يارغد ... خليكى بقي يوم تانى عشان اكون معاكى.
رغد:لا انا هروح قولى بس الحارة دى فين وانا هروح واسال اى حد.
مراد:انتى راحه بعربيتك؟
رغد:لا هاخد اوبر ... اهو وصل اهو.
مراد:طب خلينى اقوله على المكان.
رغد خرجت من المول وقربت من السواق واديته الفون ومراد قاله وهو جاب العنوان على جى بي اس وبدا يتحرك .
رغد:تمام يامراد وابقي طمنى على نورة.
مراد:باذن الله .... رغد لما توصلى الحارة لو ماحدش دلك على البيت اسالى على حسن البطل وهو هيعرفك هو فين.
رغد:ومين حسن البطل ده كمان اوعى يكون بلطجى.
مراد ضحك:لا مش بلطجى يادكتورة انتى لما تشوفيه هتعرفيه لوحدك هتلاقيها كدا شاب اخر وسامه وكاريزمااا.
رغد:حد قالك انى راحه اقيم شباب الحارة يا سياده الرائد .
مراد ضحك:اسالى عليه والف واحد هيدلك عليه.
رغد:تمام يامراد روح بقي خليك مع نورة.
مراد:اوكى سلام.
رغد:سلام.
رغد قفلت مع مراد وفضلت تقلب فى فونها عشان تضيع وقتها على ماتوصل .
بقلم الكاتبه جنات
ــــــــــــــــ★ــــــــــــــ
فى الشركه .
مؤمن وصل وعرف ان فاروق ومازن عاملين اجتماع لكل موظفين بدون علمه وراح على اوضه الاجتماعات ودخل من غير ماخبط
فاروق:فى حد يدخل كدا؟
مؤمن قعد على راس تربيزة الاجتماع قدام فاروق:ممكن اعرف ايه مناسبه الاجتماع ده؟
مازن:شئ مايخصكش .
مؤمن:انت ناسي ان انا هنا مكان رهف ورغد وعمى جمال الله يرحمه هو اللى عطانى المسؤليه دى وانا المسؤل الاول عن الادارة .
فاروق:ده اجتماع عشان المشروع الجديد.
مؤمن:مشروع كمان بدون علمى وايه هو بقي .
واحد من الموجودين مد ايده بالملف لمؤمن اللى اخده وبدأ يقراه .
مؤمن:انتو هتاخدو كمان قرار بناء مصنع بدون ماترجعو لاصحاب الشركه .
مازن:ماهو بابا موجود.
مؤمن:متنساش ان فاروق بيه نصيبه فى الشركه ٢٥٪ بس لكن النصيب الاكبر لرهف ورغد وانا اللى بدير نصيبهم.
مؤمن قام وقف ورمى الملف:الكلام ده مش هيحصل احنا عندنا المصنع والشركه مش محتاجه مصنع تانى .
مؤمن بص لموظفين:اللى هياخد اى خطوة بدون مايرجعلى يعرف انه اخر يوم ليه فى الشركه مفهوم .
مؤمن خرج من الاوضه ومازن بص لابوه وكانو مضايقين جدا لان مؤمن احرجهم قدام الكل والموظفين كلهم خرجو من الاوضه .
مازن:لازم نتحرك فى اسرع وقت.
فاروق:اهدى يامازن لازم نفكر كويس عشان نبقي بعيد عن الحوار كله.
مازن:تمام.
بقلم الكاتبه جنات
ــــــــــــــــ★ــــــــــــــ
فى حارة البطل .
العربيه اللى فيها رغد وقفت .
السواق:وصلنا يادكتورة دى حارة البطل .
رغد بصت من الشباك:انت متاكد؟!
السواق:ايوا لو تحبي انزل اسالك اى حد.
رغد:لا خليك انا هنزل وهسال.
السواق:تحبي استناكى؟
رغد:لا امشي انت ولما اجى امشي هكلمك.
السواق:حاضر.
رغد نزلت وعينها على الحارة كأنها بتقيمها والناس اللى ماشين بيبصو عليها اوى مستغربين مين الوجه الجديد اللى ظهرت فى الحارة .
رغد مشت شويا ولاقت واحده بتبيع خضار
رغد:صباح الخير .
ام فرح:صباح النور يابنتى .
رغد:انا كنت بدور على بيت صالح الشهاوى حضرتك تعرفى هو فين ؟
محروسه مرات منصور كانت واقفه تبص عليها ولما سمعتها بتسال على البيت خافت لتكون جايه تشتريه وقربت منها:انتى بتسالى على بيت الشهاوى ليه ياقمر؟
رغد لفت وبصتلها اوى باستغراب من كميه الدهب اللى لابساه والميكب الاوفر اللى على وشها:بسال عشان عايزة اعرف هو فين ؟
ام فرح:بيت الشهاوى اهــ.....
ام فرح سكتت لما محروسه بصتلها بغضب ورغد لاحظت نظرتها ولفت بصت لام فرح:ايوا هو فين بيت الشهاوى ؟!
رغد شافت نظرة ام فرح لمحروسه وانها خايفه منها .
رغد بصت لام فرح:هما قالولى انه فى منطقه اسمها حارة البطل هى دى مش كدا ؟
ام فرح شافت حسن جاي وكان راكب الموتوسيكل بتاعه ونادت عليه بصوت عالى:ياحسن ..... اهو البطل عندك اهو اساليه بنفسك.
حسن وقف ورغد لفت وشافته وبصتله اوى وبصت لموتوسيكل اللى راكبه وافتكرت كلام مراد انه كاريزما وابتسمت .
حسن اللى اتفاجأ انه شايفها قدامه وكان بيبصلها ومستغرب هى جايه الحارة ليه ونزل من على الموتوسيكل وبص لام فرح:فى حاجه يام فرح؟!
ام فرح:اه الانسه كانت بتسال على بيت الشهاوى .
حسن بص لرغد:خير ياانسه بتسالى على بيت الشهاوى ليه ؟
محروسه:ماهو لو حضرتك جايه تسالى علشان تشتريه فاحنا مش هنبيع.
رغد بصتلها:انتو مين معلش اللى مش هتبيعو ... هو البيت بتاعكو ؟!
محروسه:لا مش بتاعنا بس قريب هيكون لينا يعنى للمعلم منصور جوزى .... احنا متكلمين عليه من الاخر.
رغد بسخريه:هى عروسه هتتكلمو عليها .
رغد بصت لحسن:لو سمحت فى حد قالى اجى حارة البطل واسال على حسن البطل وهو هيدلنى على البيت .
حسن:انا حسن البطل .
رغد:اهلا وسهلا ... البيت فين بقي ؟!
حسن لسه هيتكلم قاطعته محروسه:ماحنا مش هنبيع ياقمرايه والبيت يخصنا .
رغد بصتلها وكانت خلاص جابت اخرها منها:نبيع مين .... انا لا جايه ابيع ولا اشترى ... ويخصكو ازاى مش فاهمه ... ببساطه عشان تعرفى انا بسال على البيت ليه .... صالح الشهاوى يبقي جدى يعنى انا حفيدته وصاحبه البيت اللى حضرتك واقفه تتفاوضي معايا علي بيعه ... فهمتى بقي .
محروسه فرحت:انتى حفيدته بجد ... اخيرا ظهرتو داحنا دورنا عليكو كتير .
رغد باستغراب:دورتو علينا ليه مش فاهمه؟!
محروسه:اصل المعلم منصور جوزى عايز يشترى البيت بتاعكو عشان يهده ويبنى عمارة
وبدام انتو ظهرتو يبقي هتبيعو بقي .
رغد:هو حضرتك مسمعتيش انا قولتلك ايه انا لا هبيع ولا هشترى .
رغد لفت وبصت لحسن:البيت فين لو سمحت؟!
حسن رفع ايده وشارولها على البيت:ده البيت .
رغد بصت على البيت ورجعت بصت لمحروسه:يعنى انتى بقالك نص ساعه بتتفاوضي معايا طب كنتى ريحى نفسك وريحينى وقوليلى انى واقفه جمب البيت اصلا.
رغد بصت لحسن:شكراا .
حسن:العفو .
رغد رفعت عينيها وكانت بتتفرج على البيت وقربت عشان تدخل كان فى خشب وكراكيب قدام الباب وزرع كتير ميت وعدت من جمبهم بصعوبه ولما قربت من الباب فتحت شنطتها وطلعت المفتاح اللى كانت دايما والدتها تحكيلها عنه وانها محتفظه بالمفتاح لحد الوقت .... وفتحت الباب واتصدمت من كميه التراب وشبك العناكب اللى موجود وطلعت وفتحت الشقه اللى كانت كلها تراب ومنظرها كان صعب .... الاثاث كله كان متغطى باقمشه بيضه .
والبيت كان كبير وفيه صاله كبيرة واوضتين ومطبخ وحمام وبلكونه كبيرة .
رغد كانت مخنوقه من ريحه التراب وفتحت البلكونه بسرعه ووقفت تبص على الحارة .
حسن كان قاعد على باب الورشه اللى فى وش بيت الشهاوى ورفع عينه لما سمع البلكونه بتتفتح .
رغد كانت بتتفرج على الحارة جو ومكان جديد وتجربه اول مرة تعيشها .
رغد دخلت ودورت على شركه لنضافه تكون فى اسكندريه وكلمت واحده وطلبت منهم يجولها فى اسرع وقت وهما استجابو ليها وهى فضلت تتفرج على البيت على ماالناس اللى هتنضف توصل .
رغد مستحملتش تقعد فى البيت اكتر من كدا من ريحه التراب وقررت تنزل تستناهم تحت بعد ماواحده منهم قالتلها انهم قربو من المكان
رغد نزلت ووقفت تبص على البيت والحارة وكل ده وحسن متابعها .
فون رغد رن وكانت رهف:ايه يارهف؟
رهف:انتى فين يابنتى برن عليكى من بدرى فونك غير متاح؟
رغد:معلش المكان اللى انا فيه الشبكه فيه وحشه.
رهف:ليه هو انتى فين؟!
رغد:عندى مشوار هخلصه يارهف وهرجع متقلقيش بقي.
رهف:طيب خدى بالك على نفسك.
رغد:حاضر ياروحى باى.
رهف:باى.
رغد قفلت مع رهف وفونها رن وكانت بنت من شركه النضافه وردت عليها وقالتلها انهم وصلو ورغد شافتهم وشاورت ليهم وقفلت معاها .
بنت قربت وكان معاها ٣ بنات وشابين
رغد سلمت عليهم:بصو البيت محتاج شغل كتير جدا وكله تراب وعناكب لانه مقفول من سنين طويله .
بنت منهم:متقلقيش هيبقي زى الفل.
رغد:وانا واثقه فيكو ... وكمان ياريت الكراكيب دى والزرع الميت ده شيلوه شكله مش حلو.
شاب منهم:تحبي نجيب زرع مكانه؟!
رغد:هيبقي تمام جداا الصراحه ... يلا همو وراكو شغل كتير وانا مستعجله الصراحه عشان انقل هنا.
بنت منهم:حضرتك عايزاه امته؟!
رغد:انا عارفه انه هياخد وقت بس مش هستنى اكتر من اسبوع.
البنت:اكيد .
رغد طلعت نسخه من المفتاح كانت عملاها:اتفضلو دى نسخه خليها معاكو ولما تخلصو هابقي اخدهم .... وانا هابقي امر عليكو علشان لو احتاجتو حاجه .
المجموعه:تمام
الكل طلعو ورغد فضلت مكانها وعينها على البيت وبتفتكر كلام والدتها وبتلف اتفاجأت براجل واقف قدامها .
رغد:نعم!!
منصور انبهر بجمالها وبلع ريقه:انا المعلم منصور.
رغد بصت على محروسه اللى واقفه عن محل الجزارة ورجعت بصت لمنصور:خير؟!
منصور:بصراحه انا عايز اشترى البيت وهديكى المبلغ اللى تطلبيه.
رغد:هى مراتك ماقالتلكش انا قولتها ايه؟
منصور:قالتلى .
رغد:وبدام هى قالتلك جاى تتكلم معايا ليه بقي .
منصور:قولت يمكن تغيرى رايك.
رغد بضيق:لا مش هغير رايي ... واخر كلام عشان نخلص من الموضوع ده بيع انا مش هبيع نقطه وانتهى الكلام خلصنا.
منصور:بس...
رغد بعصبيه:انت لسه هتبسبس قولتلك مش هبيع خلاص بقي واتفضل يلا .
منصور مشي وهو مضايق ورغد كلمت السواق اللى كان موصلها وقفلت معاه وفونها رن برقم مؤمن .
رغد:الو.
مؤمن:انتى لسه فى اسكندريه يارغد؟!
رغد:ايوا لسه هناك ... فى حاجه ولا ايه؟
مؤمن:فى حاجه حصلت بس لما تيجى نبقي نقعد نتكلم .
رغد:خير فى ايه ؟!
مؤمن:لما تيجى يارغد ... المهم انتى كويسه انا مش مطمن وانتى عندك.
رغد ضحكت:انا حاسه انى عيله صغيرة والله وكلكو خايفين عليا اتوه .
مؤمن:انتى اختى يارغد وبجد خايف عليكى.
رغد:مؤمن ياحبيبي انا كويسه وكلها كام ساعه واكون عندك ياقلبي يلا سلام العربيه جت.
مؤمن ضحك:سلام.
حسن عينه عليها لحد ماركبت العربيه وكان سامع كلامها ونفسه يعرف مين مؤمن ده بتقوله حبيبي وقلبي .
حسن بضيق:وانا مالى ماتكلم اللى تكلمه.
حمزة قعد جمبه:لا حول ولا قوة الا بالله انت اتجننت يابطل بتكلم نفسك.
حسن:تصدق بالله جنانى هيطلع عليك ... خلصت الشغل .
حمزة عينه على بيت الشهاوي اللى مفتوح وشبايبكه كلها مفتوحه:خلصت .... هو مين اللى فى البيت ده ؟
حسن:حفيده صالح الشهاوى جت من شويا.
حمزة:ده المعلم منصور هيفرح اوى.
حسن:مش هتبيع وهى بنفسها قالت كدا لمنصور.
حمزة:ده منصور ممكن يموت فيها واكيد مش هيسكت غير لما توافق.
حسن ابتسم:معتقدش انه ممكن يقنعها ولا هيقدر.
حمزة:وايه الثقه دى بقي؟!
حسن بصله:انت عارف مين حفيده الشهاوى؟
حمزة:مين؟ ....حد نعرفه؟!
حسن:الدكتورة اللى كانت فى مستشفى القاهرة.
حمزة:قول والله!
حسن هز راسه.
حمزة بمكر:وانت فرحان اوى مش كدا.
حسن بصله:وهابقي فرحان اكتر لما وشك ينور بالبوكس اللى هتاخده منى الوقت.
حمزة:ياعم انت ماحدش يهزر معاك ابدااا.
حسن:لا ... قوم يلا عشان نروح المستشفى.
حمزة:ليه؟
حسن:مراد مراته بتولد النهارده تعالى نروح نشوفه لو محتاج حاجه ونطمن على مراته وبنته.
حمزة:يلا .
بقلم الكاتبه جنات
ــــــــــــــــ★ــــــــــــــ
فى المستشفى عند مراد اللى شايل بنته اللى سماها نور وفرحان بيها جدااا .
فونه رن برقم حسن ورد عليه وعرف منه انهم فى المستشفى .
مراد نيم نور فى حضن مراته وخرج لشباب اللى سلمو عليه بحب .
حسن:حمدلله على سلامتهم ياصاحبي تتربي فى عزك.
مراد:حبيبي يابطل.
حمزة:ربنا يباركلك فيها يامعلم.
مراد:تسلم ياصاحبي .... بجد احساس حلو اوى ... عقبالكو لما تعيشوه انتو كمان .
حمزة:ياعم بس هى تيجى بنت الحلال الاول.
مراد ضحك:هتيجى متقلقش .
حسن:مش محتاج اى حاجه يامراد؟
مراد:تسلم ياصاحبي .... صح فى واحده جت النهارده تسال على بيت الشهاوى او عليك ياحسن؟
حسن:ايوا ....انت تعرفها؟!!
مراد:ماهى دى المهمه القوميه يابطل اللى كنت بقولك عليها.
حمزة:لحظه انا مش فاهم حاجه.
مراد:الدكتورة كانت عايزانى اعرفلها بيت جدها صالح الشهاوى فين الظاهر كدا هيعيشو فيه هى واختها .... ولما خليت حد تبعى يدورو على البيت عرفت انه نفس البيت اللى منصور عايز يهده .
حسن:وانت تعرفها منين؟!
مراد:لا دول معرفه قديمه ... ووالدها الله يرحمه ليه فضل كبير عليا لما كنت فى القاهرة وحتى هيا كمان لما مرة اتصابت هى اللى عملتلى العمليه وقتها وتقدر تقول كدا ان فى عشرة مابينا وبعتبرها هى واختها اخواتى وعمى جمال والدها كان دايما يوصينى عليهم.
حمزة:يوصي مين ياعم ... دى عليها قوة تهد اى حد يقف قدامها.
مراد بقلق:هو حد اتعرضلها فى الحارة ولا ايه ؟
حسن:لا متقلقش.
حمزة ضحك:دى تخاف على اللى هيتعرضلها مش عليها.
مراد:اومال عرفتو قوتها منين؟!
حمزة حكاله الموقف اللى حصل فى القاهرة
مراد ضحك:هى رغد كدا مش بتحب الظلم ومستحيل تشوف حد غلطان وتسكت انا عارفها.
حمزة:وهى كلمتها مسموعه اوى كدا ليه فى المستشفى؟
مراد:ببساطه لان المستشفى دى ملك والدها وهى مستلمه الادراة من قبل وفاته ... عمى جمال كان عنده ثقه كبيرة فيها وعارف انها تقدر تمشي المستشفى كلها من غير ولا غلط .
حسن كان بيسمع الكلام وبيفكر فى قوتها اللى شاغله تفكيره من وقت ماشافها وانه عمره ماشاف بنت فى القوة دى .
حسن فاق من تفكيره:تمام ياصاحبي هنمشي احنا بقي ولو احتاجت اى حاجه كلمنا.
مراد:تسلمو ياشباب بجد.
الشباب مشو ومراد دخل لمراته وبنته ......
الفصل الثامن8
رغد رجعت من الاسكندريه على القاهرة وراحت المستشفى خلصت شغلها وبعدها راحت على الڤيلا وكان مؤمن مستنيها فى الجنينه .
رغد نزلت من عربيتها:ايه اللى حصل يامؤمن ؟
مؤمن:اهدى بس وارتاحى من الطريق.
رغد قعدت على الكرسي:هديت اهو احكى بقي.
مؤمن قعد جمبها وحكالها على الاجتماع اللى فاروق عمله عشان يبنى مصنع .
رغد:هو مش عايز يجيبها لبرا مش كدا !
مؤمن:متقلقيش انا هتصرف معاه وبعد كلامى مع الموظفين مستحيل حد يحط ايده فى ايده فاروق وابنه.
رغد:تمام بكرا هاجى معاك الشركه وهنعمل اجتماع لكل الموظفين تمام وفاروق وابنه لازم يحضرو.
مؤمن:طب ليه؟!
رغد:بكرا هتعرف.
مؤمن:تمام اطلعى ارتاحى شويا بقي وانا همشى ولارا نامت فى حضن رهف من بدرى .
رغد:تمام يامؤمن.
مؤمن مشي ورغد طلعت اوضه رهف فتحت الباب براحه كانت رهف صاحيه ولارا نايمه فى حضنها .
رهف قامت براحه وقربت من رغد:اخيرا جيتى.
رغد:كان عندى شغل كتير يارهف .. مؤمن قالى انكو نايمين من بدرى.
رهف:وانا هقدر انام قبل ماترجعى .
رغد حضنتها:ربنا يخليكى ليا يانصى التانى .
رهف:ويخليكى ليا يارغد.
رغد:هروح انا بقي ..... واااه بكرة جهزى نفسك هتيجى معايا الشركه.
رهف:ليه؟
رغد:بكرا هتعرفى ... يلا تصبحى على كل خير .
رهف:تلاقى الخير ياقلب اختك .
رغد باستها من خدها وراحت على اوضتها اخدت شاور وغيرت وكلمت مجدى المحامى وبعدها قفلت معاه ونامت .
بقلم الكاتبه جنات
ـــــــــــــــ★ـــــــــــــ
فى حارة البطل وتحديدا فى شقه حسن اللى قاعد فى مكانه المفضل وقعدته المفضله فى البلكونه ورافع رجليه على السور وماسك فونه وبيدور على الفيس بوك على اكونت رغد اللى لاقاه بسهوله جدا لانها دكتورة شاطرة طبعا .
وبدأ بتفرج على صورها الكتير وكل صورة باستايل مختلف عن التانى .
حسن ابتسم:الظاهر كدا بتحب التغير .
حسن فضل يقلب فى الاكونت بتاعها وقرا كل بوست نزلته عن وفاه والدها ووالدتها واللى كان باين اد ايه هى متعلقه بيهم وبتحبهم .
حسن فضل يتفرج على صورها لحد ماغلبه النوم ونام مكانه على الكرسي .
بقلم الكاتبه جنات
ـــــــــــــــ★ـــــــــــــ
صباح يوم جديد .
مؤمن وصل لارا المدرسه وراح على الشركه وجمع الكل عشان الاجتماع وفاروق ومازن كانو مستغربين وعايزين يعرفو سبب الاجتماع واللى قلقهم اكتر وجود مجدى المحامى .
بعد شويا وصلت رغد ورهف ودخلو اوضه الاجتماع .
رغد دخلت وقعدت مكان والدها على راس التربيزة وجمبها على اليمين رهف ومؤمن وعلى الناحيه التانيه مجدى المحامى وباقى الموظفين كلهم حولين التربيزة وفاروق على راس التربيزة قدامها وجمبه ابنه مازن .
رغد:صباح الخير ياجماعه .
الكل:صباح النور.
فاروق:ايه سبب الاجتماع يارغد.
رغد اتجاهلته وده ضايقه جدا:طبعا الكل مستغربين وعايزين يعرفو سبب الاجتماع وخصوصا ان انا ورهف اول مرة نحضر اجتماع معاكو .... بس زى مانتو عارفين بابا الله يرحمه كتب الشركه باسم رهف وماما الله يرحمها وقال فى وصيته ان لو ماما اتوفت نصيبها يبقي لرهف يعنى نصيب بابا فى الشركه اللى بيمثل ٧٥٪ باسم رهف والـ ٢٥٪ طبعا نصيب عمو فاروق .... اما المصنع فهو باسمى انا ورهف .
فاروق:يعنى بردو مفهمناش سبب الاجتماع!
رغد:اصبر ياعمو اصبر وانت تعرف.
رغد بصت لمجدى المحامى:حضرتك جهزت كل حاجه ياعمو ؟!
مجدى:اه يابنتى كل الورق جاهز ومش ناقصه غير الامضا .
رغد اخدت منه الورق:الورق ده توكيل منى انا ورهف لمؤمن وانه ليه الحريه الكامله وحريه التصرف فى نصيبنا وطبعااا كلمته هى الكلمه الاولى والاخيرة فى الشركه والمصنع.
مؤمن والكل اتفاجأو بكلام رغد لكن مجدى ورهف اللى رغد قالتلها على كل حاجه وهما جاين ورحبت جدا بالموضوع .
فاروق:ازاى يعنى هتأمنيه على كل فلوسكو؟!
رغد:ايوا ياعمو هأمن مع مؤمن على كل حاجه تخصنا .
رغد بصت لرهف:امضي يارهف يلا.
رهف اخدت الورق .
مؤمن:لحظه يارهف .... رغد انا بدير كل حاجه من غير توكيل يعنى ملوش لازمه.
رغد:لا ليه يامؤمن وصدقنى انا متاكده ان محدش هياخد باله من املاك بابا غيرك .... يلا امضي يارهف يلا .
رهف مضت ورغد كمان مضت وعطت الورق لمجدى المحامى .
مجدى:تمام يارغد انا هوثق الورق ويبقي كل حاجه تمام .
رغد:شكرا ياعمو.
مجدى قام وقف:العفو يابنتى .. يلا عن اذنكوو .
مؤمن:اذنك معاك ياعمى.
رغد بصت لفاروق اللى كان بيبص لابنه وعيونهم فيها غل .
رغد:مؤمن قالى على موضوع الاجتماع اللى اتعمل امبارح بدون علمنا ... ده مش عايزاه يتكرر تانى ... واى موظف هنا هيعمل اى حاجه بدون الرجوع لمؤمن يبقي اخر يوم ليه زى مامؤمن قالكو ... اتفضلو على شغلكو.
كل الموظفين خرجو وفضل البنات ومؤمن وفاروق وابنه.
رغد:يلا يارهف عشان اوصلك واروح المستشفى.
مازن قام بسرعه:انا هوصل رهف.
رغد قلبها دق بخوف وبصت لمؤمن ورجعت بصت لمازن:متشكرين لخدماتك يامازن ... بس انا اللى هوصل اختى .
رغد مسكت ايد رهف وخرجو من الشركه كلها ومؤمن راح مكتبه .
فاروق:البت دى مش هتجيبها لبرا .
مازن:واحنا لازم نتحرك فى اسرع وقت.
فاروق:هنتحرك متقلقش .
حسن صحى وكان نايم مكانه على الكرسي فى البلكونه ولما اتحرك رقبته وجعته واتحرك براحه وراح الحمام اخد شاور وغير ونزلو وقابل حمزة على السلم .
حمزة:صباح الفل.
حسن:صباح الخير .
حمزة:مالك ماسك رقبتك كدا ليه؟!
حسن:الظاهر كدا اتلوحت عشان كنت نايم غلط.
حمزة باستغراب:غلط ازاى يعنى!!
حسن:نمت وانا قاعد على الكرسي ف البلكونه .
حمزة صفر بصوت عالى:اللى واخد عقلك يابطل .
حسن زقه:امشي من وشي ياحمزة احسنلك .
حمزة ضحك ونزلو سواا وصبحو على الكل
هدى:مالك ياحسن؟
حمزة:رقبته ملوحه ياهدهد .
هدى:من ايه ياحبيبي ؟!
حسن:متخافيش ياست الكل انا زى الفل .
هدى:حنين قومى هاتى المرهم لما ادهن لاخوكى رقبته.
حنين:حاضر ياماما .
حنين راحت جابت المرهم وهدى دهنت لحسن رقبته .
هدى:المرهم ده حلو ومفعوله سريع ياحبيبي شويا كدا رقبتك هترتاح .
حسن:تسلمى ياست الكل .
محمود:هو صحيح ياحسن حفيده صالح الشهاوى جت وفتحت البيت .
حسن:ايوا ياحاج ... وجابت ناس ينضفو البيت .
هدى:ودى هتبقي بنت مين ياحاج مريم ولا منى ؟
محمود:العلم عند الله ... بس بدام ظهرت الحفيده بكرة هيظهرو كل العيله.
هدى:صح ياحاج .
حنين:انتى تعرفيهم ياماما.
هدى:طبعاا .... لما اتجوزت وجيت الحارة كانو منى ومريم بنات الحاج صالح الشهاوى التؤام عايشين فى بيتهم وكانو ونعمه البنات ادب واخلاق وعلام واهل الحارة كلهم كانو بيحبوهم بس لما نقلو من هنا وانتى عارفه يابنتى الدنيا تلاهى وكل واحد انشغل بحياته معرفناش عنهم حاجه من وقتها .
حمزة بهمس لحنين اللى قاعده جمبه:بت يانونه.
حنين بهمس:نعم!
حمزة:عارفه مين اللى بيتكلمو عليه دى ؟
حنين:مين؟!
حمزة:حفيده الشهاوى هى نفسها الدكتورة بتاعه القاهرة.
حنين بصوت عالى:قول والله!!
الكل بصو عليها .
هدى:فى حاجه ياحنين؟!!
حنين:لا ابدا ياماما ده حمزة بيقولى انه جبلى الشوكلت اللى بحبها .
هدى:ربنا يخليكو لبعض ياحبايبى .
حسن بص بشك لحنين وحمزة اللى رجعو يتهامسو تانى وكان عارف ومتاكد ان حمزة هيقولها .. وماكنوش مركزين مع عزة اللى سمعت كل كلامهم لانها قاعده جمب حنين
الكل فطرو سوا وبعدها الشباب راحو الورشه .
فى اوضه اولفت وعزة .
اولفت:ومين الدكتورة دى وايه علاقته بيها؟!!
عزة:مش عارفه ياماما بس انا سمعت حمزة وهو بيتوشوش هو وحنين على الفطار .
اولفت شهقت:معقول يابت يكون بيحبها وعشان كدا جت تعيش فى الحارة ولا وكمان قدام الورشه يعنى قدامه طول النهار!!.
عزة:مش عارفه ياما انا هتجنن .
اولفت:اومال اخوكى فين؟!
عزة:مانتى عارفه ياما هيكون فين هتلاقيه كان سهران مع اى واحده من اللى يعرفهم .
اولفت:مش عارفه اعمل ايه مع اخوكى ده ... عماله اقوله اتظبط عشان الحاج وهدى يوافقو عليه وهو اللى فى دماغه فى دماغى مش بيتغير .
عزة:اللى فيه طبع عمره ماهيغيره ياما وابنك عمره ماهيتغير ولا مرات خالى هتوافق عليه لبنتها.
اولفت:وانا مش ههدى غير لما تبقو انتو الاتنين متجوزين ولاد هدى .
بقلم الكاتبه جنات
ـــــــــــــــ★ـــــــــــــ
عدى ٣ ايام وكل واحد من ابطال رواياتنا مشغولين فى حياتهم .
رغد اللى كل همها تحمى اختها ولارا وبدات تشترى مستلزمات اللى هيحتاجوها فى البيت من اطقم سراير وادوات المطبخ واشترت كمان هدوم ليها ولرهف وكانت بتسيب الحاجه اللى بتشتريها فى ڤيلا مؤمن .
صباح يوم جديد .
رغد صحيت من بدرى عشان تروح تشوف البيت بعد ماكلمتها بنت من شركه النضافه ان بيت خلص وانهم مستنين الحاجات اللى جابتها عشان يرتبوها فى الشقه .
رغد خرجت من الڤيلا وكلمت مؤمن اللى كانت متفقه معاه يجبلها عربيه كبيرة عشان تقدر تنقل كل الحاجات اللى اخدتها من الڤيلا والحاجات اللى اشتريتها وفعلا كانت الحاجه اتحملت فى العربيه ورغد ركبت مع السواق وراحت على اسكندريه.
بقلم الكاتبه جنات
ـــــــــــــــ★ـــــــــــــ
فى ڤيلا فاروق اللى قاعد على راس التربيزة بيفطر مع شهيرة ومازن .
شهيرة بصت لفاروق وابنها اوى:صحيح يافاروق انت سكت يعنى على حوار الوصيه ومابقيتش تفتحه!!
فاروق بص لابنه ورجع بصلها تانى:يعنى هعمل
ايه لو فتحته خلاص الموضوع انتهى .
شهيرة:ليه وانا عبيطه عشان اصدقك .. انا متاكده انكو بتخططو لحاجه من ورايا .
مازن:حاجه ايه ياشوشو اللى هنخطط ليها ؟!
شهيرة:اوعى تكون يامازن هتساعد ابوك فى الخطه اللى كان بيفكر فيها انه يأذى بنات عمك؟!
مازن:بذمتك ياشوشو انا اقدر أأذى رغد بردو ؟!
فاروق:انا مش فاهم ايه الحنيه والحب اللى نزل عليكى فجاه ده !!
شهيرة:لا حب ولا حنيه كل الحكايه انا مش هفكر أأذى حد فيهم عشان خاطر ابنى .. انا مقدرش اشوفه بيتأذى ... ولو انت حابب تاخد الشركه منهم خدوها بس من غير أذى .
فاروق:وده ازاى بقى ان شاء الله ؟!
شهيرة:معرفش ... بس المهم متأذيش بنات اخوك عشان مايتردش فى ابننا يافاروق .
فاروق:قوم يابنى نروح شغلنا قوم .
مازن:يلا يابابا ... سلام ياشوشو .
فاروق ومازن خرجو وشهيرة عينها عليهم:ابنى وبابا ... ده اكبر دليل انكو حاطين ايديكو فى ايدين بعض وبتخططو لحاجه كبيرة اوى كمان .
بقلم الكاتبه جنات
ـــــــــــــــ★ـــــــــــــ
بعد ساعات كتير فى حارة البطل وتحديداا فى بيت عيله البطل .
الحاج محمود اللى بيسبح وهدى واولفت اللى بيقورو الكوسه والبتنجان عشان هيعملو محشي وحنين على السطح بتعطى الدروس للولاد .
اولفت بصت لمحمود:كنت عايزة اكلمك فى موضوع ياحاج .
محمود بصلها وهدى بصتلها اوى
محمود:خير يام عزت ؟!
اولفت:الصراحه يعنى ياحاج انا بطلب القرب منك .
هدى سابت اللى فى ايدها:يوووه .. مش احنا اتكلمنا فى الموضوع ده قبل كدا يا اولفت .
محمود باستغراب:موضوع ايه اللى اتكلمتو فيه يام حسن ؟!
اولفت:انا بطلب ايد حنين لعزت ابنى ياحاج .
هدى بحده:والبت قالت مش موافقه يااولفت والكلام خلص خلاص .
محمود:بت مين اللى قالت ؟ ... انتو بتفتحو مواضيع من ورايا وكمان بتاخدو رأى بنتى ... ليه ابوها واخوها ماتو ياهدى ؟!
هدى:بعد الشر عليكو ياحاج ربنا يباركلى فى عمركو يارب ... كل الحكــ
اولفت حبت تضايقهم وتشعلل الجو وقاطعتها:ياحاج والله عزت اتكلم مع حنين بس عشان يعرف رايها مش اكتر .
هدى بصتلها بغضب كبير .
محمود قام وقف بعصبيه:وابنك يتكلم مع بنتى ولا يقرب منها بصفته ايه ياام عزت ... اللى اعرفه ان المواضيع دى بتتفتح مع الكبار مش العيال .
اولفت:والله ياحاج هو بس ..
محمود:من غير بس ياام عزت تعرفى ابنك البيت ليه احترامه ... ولو حابين تفضلو هنا على عينا على راسنا لكن بالادب والاحترام ... وابنك يبعد عن بنتى والموضوع مرفوض .
اولفت:يعنى ايه ياحاج هو انا ابنى ماله يعنى عشان ترفضه !!
محمود:ابنك لو كان فاتحنى انا او اخوها كنت قولتلك هفكر لكن انه يروح ويكلم بنتى من ورا ضهرى انا واخوها اللى مأمنله وسايبه فى البيت يبقي الموضوع مرفوض ياام عزت وخلص الكلام .
محمود خرج من البيت وكان مضايق جداا .
هدى:انا مش اتكلمت معاكى وقولتلك الموضوع انتهى ليه تفتحيه من اساسه .
اولفت:انا ولادى مالهم ياهدى هاااا بنتى وابنك رفضها وكمان بنتك رفضت ابنى .
هدى:ده جواز يامرات اخويا والجواز مش بالعافيه ... ومتزعليش منى انا مش هجبر ولادى على حاجه عشان خاطرك .
هدى سابتها ودخلت المطبخ واولفت كانت مضايقه منهم وراحت على اوضتها وكانت عزة نايمه .
بقلم الكاتبه جنات
ـــــــــــــــ★ـــــــــــــ
الحاج محمود دخل الورشه وحسن اول ماشافه قام من على المكتب:نورت الورشه ياحاج .
محمود قعد على الكرسي بتعب وحسن قرب وقعد قدامه:مالك ياحاج انت كويس ؟
محمود:شكل ضغطى نزل ياابنى شويا .
حسن:فى حد زعلك ياحاج انت مش بتتعب غير لو زعلت ؟!
محمود:ابعت بس يابنى هات الدكتور رفعت يقيسلى الضغط .
حسن نادى على محمد وقاله ينادى لدكتور رفعت اللى عنده صيدليه على اول الحارة
بعد شويا الدكتور جه وقاس الضغط للحاج محمود اللى كان واطى جدا والدكتور اداه علاجه عشان يبقي كويس .
رفعت:الف سلامه عليك ياحاج محمود .
محمود:الله يسلمك يادكتور رفعت .
حسن قرب وباس ايد ابوه باحترام:الف سلامه عليكي ياحاج .
محمود:الله يسلمك ويبارك فيك يابنى .
رفعت:انا قولتلك قبل كدا ياحاج بلاش تضغط نفسك فى الشغل ولا التفكير الكتير وابعد عن اى زعل عشان خاطر صحتك .
محمود:يابنى الحمدلله انا بخير وبعدين خلاص بقي انا كبرت والصحه راحت خلاص .
رفعت:ربنا يديك طوله العمر ياحاج .
حسن:دانت الخير وبركه الحارة كلها ياحاج .
محمود:يا ابني هو احنا هناخد زمنا وزمن غيرنا الحمد لله ربنا بس يديم عليا شويا الصحة دول لحد ما اموت مش عايز ابقي حمل عليك .
حسن:حمل ايه يا حاج ده ... انا اشيلك فوق راسي اوعي تقول كدا مرة تانيه ربنا يباركلنا فى عمرك وصحتك يارب .
محمود:تسلم يابنى .
رفعت:ربنا يخليك لينا ياحاج محمود ويباركلك فى حسن زينه شباب الحارة .... ونبي انا لو عندى بنت ماكنت هجوزها غير لحسن وغصبن عنه .
حسن ومحمود ضحكو .
محمود:ربنا يباركلك فى ولادك يابنى .
رفعت:تسلم ياحاج ... هستاذن انا بقي .
محمود:اذنك معاك .
رفعت خرج ودخل حمزة بخوف:مالك ياحاج محمد قالى انك كنت تعبان ؟
محمود:انا بخير يابنى هو الضغط مانت عارف .
حمزة:هو فى حاجه حصلت ياحاج ولا حد زعلك .
محمود:لا يابنى انا كويس ... يلا كل واحد يروح على شغله .
حمزة:روح ياحسن مشوارك انا وهفضل مع الحاج هنا .
محمود:رايح فين يابنى .
حسن:هروح للمعلم مدحت عشان شحنه الخشب الجديده بس عادى هخليها وقت تانى .
محمود:روح يابنى يلا متعطلش نفسك وبعدين اخوك معايا اهو .
حسن:حاضر ياحاج .
حسن ركب موتوسيكل بتاعه ومشي وفى نفس الوقت وصلت العربيه اللى فيها رغد .....