رواية ولي العهد
الفصل الرابع والعشرون24
بقلم نورهان نصار
و دخلت عشان تقيس الفستان و كان حلو عليها جدا...و يحي اول ما شافه عليها اتهوس ازاي حد يشوف مراته بالفستان ده..دي زي الأميره!!!يحي بتوعد في نفسه:اروحك بس و انفخك يا فريده...
فريده بصت ليحي ببرود و قالت للبنت بابتسامه:ده تمام جدا...
و دخلت قلعته و لبست هدومها و خرجت....
فريده ببراءه مصطنعه:يلا يا يحي عشان تحاسب...
يحي بصلها بغيظ..و زقها بالراحه:يلا يا ديدا...
فريده منعت ضحكتها و مشت ادامه و هو وراها......و حاسبوا و نزلوا علي العربيه...و طول الطريق يحي ساكت...طبعا علشان التليفونات و فريده بتحاول متضحكش علشان ميتكشفوش....و وقفها عند البيت و فريده نزلت و معاها الفستان...
فريده ببرود:تصبح علي خير
يحي بغيظ: و انتي من اهله...
و استني لما طلعت و مشي بالعربيه...
كانت أميره قاعده في البيت ادام التليفزيون و سرحانه...و لحد امتي هتفضل كده...الايام بتحري و لازم تشوف حل...
أميره لنفسها:طب أسافر!!
و بتوتر:بس كده برضه..مش حل...
فضلت تفكر شويه و بعدين ابتسمت بخبث و لنفسها:خلاص لقيتها...
و فتحت تليفونها و بعتت علي الواتساب لجاسم و طبعا خافيه الشات بينهم.
"جاسم فيه تعديل انا بكره هحاول أخلق مشكله مع فريده و اوقع نفسي عشان يبان أنها سقطتني و اتفق مع الدكتوره علي ده"
و سابت الفون...و بعد خمس دقايق سمعت صوت رنه الواتساب ف مسكت الفون و فتحت لقت رد جاسم
"هتفق معاها علي ده بكره و كمان اعملي محضر في فريده و هي هتطلعلك تقرير طبي"
أميره ابتسمت بشر و افتكرت خطتهم من الاول...
*فلاش باك*
أميره في عربيتها و بتتكلم في التليفون مع جاسم..
أميره بجديه:اتصرف شوفلي دكتوره تعمل ده...
جاسم:حاضر الدكاتره اللي من النوع ده كتير...
أميره بجديه:لا يا حبيبي انا عاوزه واحده تكون مشهوره و معروفه مش واحده تحت بير السلم...
جاسم:تمام يا أميره....
و قفل مع أميره و اتصل علي حد من رجالته...و طلب منه أنه يتفق مع دكتوره تقول إن أميره حامل و ده طبعا مقابل مبلغ كويس...
*باك*
أميره بابتسامه رضا:كده صح..
تاني يوم الصبح
فتحت أميره عينيها و لقت يحي واقف ادامها مبتسم بهدوء...
أميره استغربت شويه و قامت قعدت و بابتسامه:صباح الخير..
يحي اختفت الابتسامه من علي وشه و ضرب أميره بالقلم...
أميره حطت ايديها علي خدها و بصراخ:اااه...انت اتجننت...
يحي جاب كرسي من زاويه ف الأوضه و قعد ادامها..
و بسخرية:ايه كنتي مفكراني نايم علي وداني ده كله..و مش عارف باللي بتعمليه..
أميره بتوتر:ق..قصدك ايه...
يحي ضربها تاني بالقلم....و أميره صرخت...
يحي بصوت عالي:مش عاوز استهبال....
أميره بدأت تعيط و بكدب:انت بتقول ايه يا يحي انا مش فاهمه حاجه و ليه بتضربني...
يحي قام و شدها من شعرها و بحده:تعالي و انا افهمك...و نزل بيها و هو لسه ماسك شعرها و هي بتحاول تبعد ايده عن شعرها....و دخل بيها مكتبه و زقها علي الارض و قفل وراهم الباب...و فتح درج مكتبه بعصبيه و راح قعد علي كرسي ادامها و شغل التسجيل.....
سمعت أميره صوت امها و خالتها و راجل غريب...و تقريبا بيتكلموا عن حاجه زي السحر....و بعد شويه طفي يحي التسجيل.....
و بجديه:من وقت ما التسجيل ده وصلني و انا بدأت اعرف الليله ماشيه ازاي....
*فلاش باك*
راح يحي لأنور في المديريه بعد ما قابل مسعد و سمعه التسجيل...
أنور:و قالك ايه!!
يحي:بعد يومين هيكلمني..
أنور:تمام...و انا هعمل تحريات عنه...
*باك*
يحي بسخريه و صوت عالي:و طبعا عشان بنت خالتي و مشككش حد فيها و يمكن ملهاش ذنب قولت اكلف راجل من بتوعي يراقبك...بس وقتها مكانش فيه اي فعل غريب منك...بس بعد الفيلم الهندي اللي عملتيه ده اكتشفت أن عمي أنور كان هو كمان شاكك فيكي و راقبك...و عرفنا كل حاجه عنك...
و بنبره جامده:و عن فسادك..
أميره ببكاء:يحي..يحي.. أنا.. أنا بقيت أم ابنك...
يحي ضحك بصوت عالي و سخريه....و أميره استغربت من ده و خافت كمان...و بصلها و بحده:حتي في دي كمان كدابه...و زقها برجله بعيد..
و بسخرية:بس تعرفي يا ميرو فكرتك دي انقذتني الصراحه...لاني لعبتها معاكي برضه...
أميره بصت ليحي بعدم فهم...
يحي ابتسم لها بسخرية
*فلاش باك*
استغل يحي نوم أميره و دخل حط في حمامه هو و فريده شرايط تسقط الحمل و كمان منع حمل...و خباهم كويس و خرج...
*باك*
يحي غمزلها:بس ايه رأيك..بتعلم انا بسرعه مش كده؟!
أميره ببكاء مسكت ايده و بتبوسها:ابوس ايدك متعرفش حد ب ده طلقني و خلاص انا مش عاوزه حاجه منك...هو هو اللي خلاني اعمل كده
يحي شدها من شعرها و زقها بعيد...
يحي بحده:انتي مجرمه يا أميره و مش هتفلتي من حبل المشنقه يا ماما و لا هو كمان...
أميره بتوسل: ابوس ايدك يا يحي ده مراتك و بنت خالتك...
يحي قام و شد أميره وقفها و اخدها حبسها في أوضه جانبيه...و قفل عليها...و دخل المكتب تاني...و طلع التليفون الجديد اللي كان بيسجل بيه فيديو للي بيتقال...
في المشرحه..
كان مهاب قاعد و مستني تقرير التشريح الخاص بالولد اللي مات بسبب المخدر بتاع أميره....
*فلاش باك*
شال الولد علي كتفه و راح بيه لعربيته و حطه في شنطه العربيه و طلع بيه علي الصحراء...و دفنه...و كان طول الطريق وراه عربيه بتراقبه و بتسجل ده...
و بعد ما مشي بربع ساعه نزل اتنين من العربيه و حفروا و طلعوا جثه الولد..
*باك*
دخل الدكتور من باب المكتب..
الدكتور بترحيب:اهلا يا حضره الظابط...
مهاب قام وقف:اهلا بحضرتك...
و بعد مهاب...و كذلك الدكتور..
الدكتور: في البدايه استغربت طلب أنور باشا أن التشريح يتم بطريقه سريه عاليه جدا..بس فعلا عنده حق..ده مخدر قاتل و اللي صنعه شيطان مش ممكن يكون بني ادم...تسبب في وقف القلب للولد و لو حد عمره اكبر كانت هتوصل لحاجات اكتر...اتفضل التقرير..
و سلم التقرير لمهاب...
الدكتور:و بخصوص الدفن هنحاول نوصل لحد من اهله و لو مفيش هنتصرف...
مهاب:تمام
(و بكده ربنا أراد أن يرجع حق الولد)
كانت فريده بتجهز لحفله بليل و عامله ماسكات و بتتفرج علي اليوتيوب علي الميكب اللي عاوزه تعمله لنفسها...و مروه كانت صاحيه و مستغربه روقان فريده ده...
كان نور واقف في الصيدليه بيشوف طلبات الناس و لمح بوكس وقف أدام الصيدليه و نزل منه ظابط و وراه العساكر...نور اتخض اول ما شاف ده...
الظابط بصوت عالي:فتشولي الصيدليه دي...مش عاوز مكان ميتقلبش...و راح لنور...
الظابط بحده:بطاقتك
كان جاسم قاعد في قصره و فونه رن..
جاسم:الو...
صلاح:جه أمر بتفتيش صيدليات أميره كلها و طلع حمله علي هناك...
جاسم وقف و بجديه:بتقول ايه!!!!و انت لسه جاي تعرفني دلوقتي...
صلاح:انا من الصبح في اجتماع مع سياده اللواء و لسه طالع و عرفت الخبر..
جاسم بصوت عالي:يووه..اقفل يا صلاح اقفل علي ما اشوف ههبب ايه...
و قفل جاسم مع صلاح و اتصل علي رجالته عشان يتأكد من اللي حصل...و عرف أنهم وصلوا لكل الحاجه اللي في المعامل و اتقبض علي كل اللي في الصيدليه....و اتصل علي صلاح بسرعه عشان يساعده أنه يهرب برا البلد...
صلاح بتردد:بس انت يا جاسم .....
جاسم بترقب:ايه!!!
صلاح:اتحطيت في قايمه الممنوعين من السفر...
جاسم مسح وشه و بيحاول يهدأ:اتصرف و امنلي اي حاجه تخرجني برا البلد...
صلاح اتنهد: تمام
كانت فريده خلصت الشاور بتاعها و طلعت و هي بتغني و قعدت تعمل الميكب و تجهز شعرها...و هي فرحانه بالفستان بتاعها اللي علي السرير وراها...
وصلت دولت و إسعاد البيت عند يحي و أميره بدري عشان يشوفوا الدنيا ماشيه ازاي..و كان يحي بيباشر مع العمال اللي بيجهزوا الجنينه ببرود...و اول ما شافهم ابتسم...و راحلهم...
دولت بتساؤل:اومال فين أميره؟!
يحي:تعالوا معايا بس الأول...و دخل بيهم علي مكتبه و قفل الباب وراه...
إسعاد باستغراب:ايه يا يحي فيه ايه؟!
يحي مردش عليها بس طلع التليفون و حطه ادامهم و شغل الفيديو....و إسعاد و دولت كانوا قاعدين مصدومين من اللي بيسمعوه....
دولت بقهر:انا بنتي!!بتعمل كده...
و بقت تلطم:يا نهار اسود يا نهار اسود....
إسعاد مكانتش عارفه تتكلم و تقول ايه مكسوفه من ابنها و أنها دبسته في مشكله كبيره....
دولت بحده:هي فين...اللي تعدمني فين؟؟؟
يحي:في الفيلا هنا و كان زمانها دلوقتي في القسم...
دولت بحنان ام و بتعيط:يحي..انا عارفه انها غلطانه و عاوزه قطم رقبتها بس بس دي مراتك و بنت خالتك يبني يعني من لحمك و دمك...
يحي بص في الأرض و سكت شويه و بعدين بصلها:لو عليا ف انا هطلقها من سكات بس أميره متورطه في شغل كبير و البوليس عنده علم ب ده...
دولت اول ما سمعت ده اغمي عليها...و مبقوش عارفين هي مالها...و يحي شالها بسرعه و خرج بيها علي عربيته و أمه وراه و طلعوا بيها علي المستشفي...و طلعوا مع دولت علي المستشفي و عرفوا أنها دخلت في غيبوبه من الصدمه و مش عارفين هتفوق امتي...و ده كله و إسعاد ساكته و بتبعد نظرها عن ابنها بخجل من اللي عملته.
كان صلاح في مكتبه بيحاول يأمن خروج جاسم...بس اتفتح باب المكتب عليه و دخل مهدي.....
صلاح قام وقف:اتفضل يا سياده اللواء...
و بعد عن كرسيه عشان مهدي يقعد مكانه....بس مهدي ابتسم و بصله و بجديه:شوف يا صلاح انت عارف اني بعتبرك زي ابني و بعزك...و انت راجل قانون محترم و نزيه و عارف الصح من الغلط...ف بلاش تكمل في اللي انت فيه...انا عارف أنه صحابك و كده و عشره عمر...بس ده واحد قاتل و مجرم و فاسد...و لو ساعدته يبقي بتخون البدله اللي انت لابسها دي...و خبط علي كتف صلاح مرتين...و ابتسم و خرج....و صلاح فضل واقف بيفكر في كلام مهدي..
خلاص اتجمعت كل الادله علي تورط جاسم و أميره و صدر أمر بالقبض علي جاسم و علي أميره...و اتحركت قوه علشان التنفيذ و كان أنور معاهم.....و جاسم اول ما وصلوا الخبر طلع علي عربيته بسرعه علشان يهرب...بس قدروا يقبضوا عليه....و علي بيت يحي دخل أنور عشان يجيب أميره...بس لما يحي فتح عليها الباب لقوها كاسره من ازاز الشباك و قاطعه شراينها...و علي طول شالها أنور و طلعوا بيها علي المستشفي....و هناك قدروا يلحقوها و ينقلولها دم.....
أنور بغمز ليحي:ما يلا روح شوف الحفله اللي وراك...انت قاعد بتعمل ايه...
يحي بابتسامه:طول عمرك فاهمني...
و قام باسه من خده..
أنور بحده:ولااا...
بس كان يحي اختفي بسرعه من قدامه و قعد أنور يضحك...
وصل علي الفيلا بتاعته و طلع علي أوضته و اخد شاور سريع و لبس بدلته و جهز نفسه و نزل يجري بسرعه علي عربيته.....و طلع علي بيت فريده...و أول ما مروه فتحتله الباب...
يحي بطريقه سينمائيه و كوميديه:حمااتي الغاليه بالاحضااان...
و حضن مروه..
مروه ضربته علي كتفه:حماتك الغاليه يا حيوان...بقي يا ولد ده كله بتشتغلوني...
يحي بيلبسها لأنور:أوامر البوص الكبير....
مروه بتوعد:اما يجيلي بس...
و في الوقت ده خرجت فريده و كان شكلها جميل جدا عامله زي الأميرات بفستانها الجميل و الشيك
و شعرها اللي رفعته و الميكب الهادي الخفيف....
مروه بانبهار: بسم الله ماشاء الله...
يحي راح لفريده و بجديه:مش قولت الفستان ده لا...
فريده بصتله بنص عين:وحش؟!
يحي بنفي:لا...
فريده بجديه:اومال مش عاوزني البسه ليه؟؟!
يحي بصوت عالي:ما هو علشان حلو و بص لمروه:ايه يا حماتي فين مرايات البيت....
فريده بابتسامه:يعني شكلي حلو...
يحي بحب: جدااا...
و مسك ايد فريده:متتأخروش بقي يا حماتي مع السلامو عليكووو...
و نزل بفريده لعربيته