رواية بين هذا وذاك الفصل الاول1بقلم مريم سمير
_ انتوا جايبينلي ست تحميني؟ أنا مهدد بالقتل انتوا بتعملوا اي ؟
° الست الي مش عجباك دي ضاربه كل البودي جاردات الي كانوا برا وبيتعالجوا دلوقتي
_ افندم ؟؟ دي مين دي ؟
دخلت المكتب = أيوة يفندم ؟ حضرتك طلبتني
_ أيوة يمريم تعالي كنت عاوز..
= أولا بس يباشا نقي الناس الي بتشتغل معاك بعد كد لو سمحت ، مبقاش قاعدة مستنياك وألاقي الرجالة بتعاكس ، يعني دي اصول يعني يجدعان؟
_ هي دي؟ دا انا لو نفخت فيها هتطير!
° طب متفردش نفسك اوي
= استني انت يكبير ، بتقول حاجة ؟
_ بقول انك مش هتعرفي تعملي حاجة اصلا ف جايبينك تحميني ازاي ؟
= امممم ، طب ما توريني شطارتك كد؟
_ أنا ؟ لا أنا عمري ما امد ايدي علي واحدة ست
= لاء أنا الي بقولك ، لو عرفت تمد مد
_ والله ؟
رفع أيده ف لويتها وراه
° كان لازم تعمل فيها فتك اوي ؟
_ احممم ، قولها تسيبني يبوب
° معلش يمريم يبنتي سبيه ، مكنش يعرفك
زقيته = ها يباشا أي خدمة؟
° فيه ناس عاوزين يقتلوني ، ف أنا وابني في خطر ، أنا هضطر اسافر عشان شغل مهم جدا برا ، ومينفعش اسيبه هنا من غير حماية ، وزي ما شوفتي الرجالة الي عندي ميسدوش في أي حاجة نفخ علي الفاضي ، ف عاوزك تاخدي بالك منه لحد ما ارجع
_ خدي بالك منه لحد ما ارجع؟ هي البيبي سيتر ولا اي؟
= طب اركن انت يحمادة ، هتقعد قد أي برا يباشا؟
° ست شهور ، عاوزك تخبيه عندكم في الحارة ، مستحيل حد يقدر يوصله هناك
=..
° هديكي نص مليون جنيه ، قولتي اي؟
_ كتر خيرك يباشا ، وانا منساش وقفتك جمبي زمان ، أنا عمري ما ارفضلك طلب ابدا
° هو دا العشم يبنتي كتر خيرك ، يلا يا احمد امشي معاها ، أنا طيارتي كمان ساعة ولازم اروح علي المطار حالا
= ابقي خلي بالك من نفسك يباشا وابقي طمنا عليك ، يلا؟
طلعنا من المكتب وركبنا عربية من العربيات بتوعهم ، حياتي كانت دايما صعبة ، وعيت علي الدنيا لقيت نفسي راجل البيت! ، مكنش ينفع ابقي ضعيفة ولو لحظة واحدة خصوصا إن أنا وماما لوحدنا في البيت وملناش حد ، بقيت في الحارة بتضرب بيا المثل في البنت الي بميت راجل ، مكنتش عاوزة كد! كنت عاوزة اعيش سني ، ألبس فساتين زي البنات ، احس ولو لمرة واحدة اني مش جبل زي ما علي طول بتقالي .
_ ماما أنا جيت
° حمدالله على السلامه يحبيبتي و.. أي دا؟ طب والجيران تقول عليا أي يمريم ؟ دخلالي ب راجل؟ طب ما البطيخ مالي السوق ؟
_ احممم ، ماما هفهمك بعدين
° انت متجوز يبني؟
= اي؟
_ اييي؟ ماما!! ، ايدك ابوسها تسكتي يغالية ، دا شغل ، وبعدين دا مش راجل
= نعم يختي؟ انتي كد بتكحليها؟
_ قصدي يعني مش راجل غريب ، دا ابن عاصم بيه الي حكيتلك عليه قبل كد
° اه يآنس ويشرف ، اتفضل يبني
_ يتفضل فين؟ هيقعد في الشقة بتاعتنا الي في وشنا ، معاكي مفتاحها؟
° أيوة معايا ، بس والله لازم يدخل يرتاح شوية
دخلنا وماما عملت غدا وكلنا وعملنا شاي بالنعناع
° أنا ارتحتلك اوي يبني والله
_ ماما انتي لو حد ضحك في وشك بترتحيله ، لا يفتكر انك ميزتيه ولا حاجة
= هو انتي لي؟
_ اصل لقيت عينك لمعت يعني مرة واحدة ف لاء اهدي
طلعت أنا وهو ودخلنا الشقة الي قدامنا
_ ها يسيدي ولا اللوكاندة الخمس نجوم
= ماشي مش بطالة
_ طب ولما اطلعك تنام علي مدخل العمارة؟
= خلاص والله يمريم هو محدش يعرف يتكلم معاكي كلمتين!!
_ تصبح على خير
رجعت شقتي تاني _ انتي عاوزة مني اي يماما؟
° والله واد لقطة
_ هو احنا نعرفههه!!!
دخلت اوضتي ونمت ، صحيت الصبح وطلعت من الاوضة
_ ماما فين الفطار و.. انت أي الي جابك هنا؟
= بالله عليكي يذوبة لما المحشي يتشرب مايته تهدي عليه عشان يستوي
_ بعد اذن الشيف نادية السيد ، انت بتهبب اي؟
= مينص اسمها طباخ
_ اه ، طب أنا لسه صاحية من النوم في قصر معايا
° احمد دا لطيف اوي يمريم ، ساعدني في المحشي الي ياما احتايلت عليكي تلفيه معايا
_ خلاص يماما
° افضلي كد لحد ما تبوري ومحدش يرضي يتجوزك
_ حبيبت قلبي متحرمش منك
° بالك يواد يا احمد البت مريم دي زينة العرايس والله ، سيبك من الي مصدراه دا ، دا من جواها عاملة زي البفتة البيضا
_ مخلاص يست الكل جري اي؟
° عندك شقة يا احمد؟
_ اصوت؟ ارقع بالصوت؟؟؟
قعدنا فطرنا ، كان بيتكلم وبيحكي حاجات عن والدته الله يرحمها ، قد أي هي وحشاه وقد أي هو مفتقد وجودها ، أنه حاسس أنه لوحده عشان باباه دايما مسافر ، ويرجع يقلب الموضوع هزار ولا كأنه معيط امي من كلامه!
_ هو معلش في الكلمة حضرتك كنت فين؟
= اتخنقت من القعدة ف قولت اتمشي شويه
_ طب ولما يجيلي خبر اغتيالك هعمل أي ساعتها؟
= أنا متنكر مستحيل حد يعرفني
_ هي النضارة الشمس دلوقتي بقت تنكر ؟ طب ادخل شقتك وتلاشاني بعد اذنك
بعد ساعة لقيته بيرن عليا عشان اطلعله ، طلعتله برا لقيته لابس هدوم خروج
_ احنا جايين نلعب ولا اي بقي يفندم؟ انت رايح تهبب اي؟
= هو انتي بتاخدي مرتب عشان تهزقيني بس ولا اي ؟
_ وممكن اقدم استقالتي حالا وامسكك اعدمك العافية عشان جبت اخري منك ؟
= خلاص والله ، رايح اجيب أكل
_ اممم ، لي؟
= مفيش ، يقعد معايا يسليني بدل الوحدة دي انتي عارفة ، هو أي الي لي؟ هو انتي بتحرسي مين؟
_ بحرسك انت!
= بني ادم يعني مش باخد غدايا طاقة شمسية؟
_ طب واستخفاف الدم لازمته أي دلوقتي يفندم؟
= لاء انتي باين الي واخدة ب باقي عقلك عضلات
_ طب ولما اطلع عليك هم الزمان يفندم ، جرأتك ساعتها هتفيدك ب اي؟
قال ب نرفزة = طب متخلنيش أمد أيدي عليكي
_ حلو ، وريني
= استغفر الله العظيم يا رب ، شوف ساعة الشيطان الواحد بيقول اي كلام ، المهم دلوقتي هاكل اي؟
_ لازم يعني؟
= هو أي المعاملة دي والله؟ دا انتي هتاخدي نص مليون عليا مش لازم تقدريني؟
_ لاء مش لازم
= الي تشوفيه يريسة ، عاوز انزل بقي عشان اي مطعم اتعشي فيه
_ طب ولما تاخد طلقة في نص دماغك تمددك وتضرني في شغلي ساعتها هتبقي مبسوط؟
= وانا هبقي موجود ساعتها عشان اتبسط؟ وبعدين معلش خدي هنا هو كل الي فارق معاكي شغلك؟
_ أنت بالنسبالي مرتب متحرك ، جبتهالك علي بلاطة
= طب اي ؟ انتي جاية معاكي تسدي نفسي؟
_ لاء يعم ، ادخل شقتك وقابلني في البلكونة
= بجد؟ كد علي طول؟ طب حتي لمحي إن فيه اعجاب
_ طب ولما الجيران يطلعوا يشولوك من تحت ايدي انت أي الدنيا؟
= انتي عاوزة اييييييي
_ هديلك حتة جبنة وقرصين طماطم
= افندم ؟ لاء انتي اكيد بتهزري معايا ، أنا مستحيل اكل الي بتقولي عليه دا
_ ها اجيبلك كمان عيش ولا شبعت ؟
بصلي ب طرف عينه = متتكلميش معايا لو سمحتي
_ احمد ربنا غيرك مش لاقي ياكل
= اه ادخلي علي كلام الأمهات بقي
_ مالها الجبنة بكرة تزول من وشك
= امممم
_ يلا ادخل نام بقي انت خدت من رصيدي كتير النهارده
= اه معلش أنا آسف فعلا انتي كتر خيرك
_ بصي يا احمد ، صلي على النبي
= عليه الصلاه والسلام ، أيوة كد اهدي
_ اقسم ب الي خلقني وخلقك لو صحيت بكرة ملقتكش في الشقه لأكون رمياك من هنا
= بس دي مش طريقة حوار
_ سيباك في الشقة ألاقيك فيها ، جو sub way الي انت عايش فيه دا أنساه
= أنا من بكرة هطلب من ابويا تغيير طقم الحراسة
_ ساعتها هيبقي جميل مش هعرف ارده
= انتي اي يبنتي؟ انتي اييييي!!
_ أنا داخلة انام ، تصبح على خير
كانت علاقتنا بتقتصر علي أنه رحالة عندنا في البيت وامي بتحبه اكتر مني
= مريم هو احنا ممكن نكون صحاب؟
_ اه انت فلوسك مقوية قلبك عليا
=مش بهزر والله
° تتصاحبوا أي يا احمد يعني دا وقته؟
_ قوليله يماما بالله عليكي ، اسمع من صوت الحكمة
° ما تتجوزوا يبني وخدها وامشوا
_ يعني لو امسك السكينة دلوقتي رشقتها فيا هتبقي مرضية ؟
واتصاحبنا ، منكرش أنه لذيذ ، دمه خفيف ، طيب اوي وقلبه ابيض ، كان بيتابع شغله من اللاب توب وبعدها نفضل نتكلم لحد الفجر ، اول مرة ارتاح ل راجل كد!
_ هو مين الي كنتي واقفة معاه دا ؟
= عبدالله ، بتسأل لي؟
_ أيوة يعني مين بردو؟
= احمد احنا مجرد صحاب!!
_ ولو بردو يمريم مينفعش تصاحبيه
= لاء أنا بقول عليا أنا وأنت!
_ طب ادخلي شقتك واتمسي وقولي يمسا
= طيب تصبحي علي خير
_ مريم؟ ، هو مين دا؟
= يسيدي واحد عاوز يتجوزني، ها جاية معاك ب أي ؟
_ ب موتك
= حلو ، وريني
_ هي نفس ساعة الشيطان بتاعت كل مرة
= طب ابقي سيطر علي نفسك بقي
_ هو انتي موافقة عليه؟
= لسه هفكر
_ تفكري؟ يعني في احتمال تواففي؟
= لي لاء؟ دا شاب كويس جدا وكل المنطقة تحلف ب أخلاقه وسمعته
_ وانا سمعتي مالها؟ ما زي الجنيه الدهب ولا عشان مهدد بالقتل بقيت بسمعة مش ولابد ولا اي مش فاهم ؟
= احمد احنا مجرد صحاب!
_ مش لسه بتقولي عاوز يتجوزك ؟
= لاء أنا بقول عليا أنا وأنت!
_ هقتلك واقتل نفسي واريح الناس كلها مننا
= تبقي عملتلي خدمة العمر
_ انتي اي يبنتي ؟ انتي ايييييي!!
بقي صاحبي الوحيد ، الي بتكلم معاه في كل حاجة ، والي بيفهمني لو زعلانة أو مضايقة ، الي استحمل مني حاجات كتير عمري ما كنت متخيلة إن فيه حد يستحملها مني ، وكأني لقيت ونسي في الدنيا! الراجل الي المفروض بحميه بقي هو الي بيحميني ، كنت حابة وجوده ، قربه ، وهو!
_ انت كنت فين؟ أنا قلبي وقف لما ملقتكش في الشقة
= اهدي طيب مفيش حاجة أنا كويس
_ انت كنت فين؟ انت خارج من مدة
= هو انتي خايفة عليا ؟
_ لاء خايفة علي فلوسي طبعا ، بقولك انت مرتب
ضحك = ما علينا ، غمضي عينك
رفعت حاجبي _ لي؟
= انتي لازم تقاوحي علي كل حاجة؟ ما تغمضي وخلاص!
_ صوتك لو علي عليا تاني هتسمع صوت دكتور بيقولك احكيلي أي الي حصلك
= ساعة الشيطان مش عاوزة تسيبني ، معلش غمضي عينك
غمضت وفتحت = كل سنة وانتي طيبة يمريومة
_ دا ورد؟ انت جايبلي ورد؟
= مش عاجبك؟ طب قولي عاوزة أي وهجبهولك
_ خدته منه دا تحفه ، أنا أول مرة حد يجيبلي ورد ، انت عرفت منين أنه عيد ميلادي ؟
= مامتك قالتلي واحنا واقفين نحمر الفراخ في الفرن
احمد حسسني اني بنت رقيقه ، كنت عاوزة احس الاحساس دا من زمان ، كان بيشيل هو وبيريحني أنا ، مكنتش معاه جبل! ، كنت معاه بنت جميلة ولذيذة بيجيبلها ورد ، وحبيته! مكنش صعب احب واحد زيه ، كنت متأكدة اني لو كابرت اكتر من كد كنت هفضل غبية لو مجبتش راجل زي احمد .
الست شهور خلصوا! باباه رجع وبمساعدة البوليس اتقبض علي الي كانوا مهددنهم ، هيرجع تاني؟ ، مكنتش عاوزة يمشي ويسيبني ،مكنتش عاوزة ابص جمبي ملاقيهوش ، أقوله ؟ اقوله أنه ميمشيش؟
_ طب اي يمريم ؟ مش حاسة ب أي حاجة؟ ، مش عاوزة تقوليلي أي حاجة قبل ما امشي؟
= بالسلامة انت يقلب اخوك
_ نعم؟
= دا انا شارية قلل ب ٢٠٠ ج جوا ، دا انا هكسرهم كلهم في بير السلم دلوقتي
_..
= الواحد اخيرا هيعرف ينام
_ اه ، انتي عاوزة تقنعيني انك مبسوطة انك معتيش هتشوفيني تاني؟
= يعني يا احلي يوم في عمري
_ مشكلتك انك بيان عليكي انك كدابة ، تمثيلك يقرف يهانم ، أنا سامع عياطك امبارح ب وداني
= بص يا احمد ، انا معايا رقم دكتور انف واذن هدهولك اكشف وطمني
_ انتي جبروت؟ ، طبعا مش عارفة تردي
= اه انا جبروت عادي ، اكدب يعني؟
_ يعني ست شهور طالع عيني فيهم ، مستحمل كل الي بتعمليه فيا دا عشان اي؟
= عشان اي؟
_ هبسطهالك ، حد استحملك غيري؟
= لاء
_ حد استحمل دبشك وأسلوبك الغير آدمي غيري ؟
= الصراحة بردو لاء ، بس عبدالله كان..
_ لو جبتي سيرته تاني علي لسانك هنصلي عليكم العشا النهارده حاضر ، أنا قولتلك الي فيها
=..
_ أنا همشي
= في رعاية الله
_ اقسم بالله ؟
بصيتله = هو انا ينفع اقولك حاجة ؟
ساب الشنط بسرعة _ ها ؟ انطقي بقي انطقي
= هتوحشني اوي ، شكرا علي كل حاجة ، عمري ما هنسي الست شهور دول في حياتي ، واني معاك كنت لأول مرة اركن عقلي ، وهيوحشني أكلك بس المكرونة معتش تعملها تاني
ضحك _ مبتعرفيش تكملي صح للآخر ؟
= اشوف وشك علي خير يا احمد
_ اشوف وشك علي خير فين؟ أنا هاخدك وانا ماشي
= نعم؟
_ مريم أنا بحبك
=..
_ تتجوزيني؟
= لاء طبعاً
° كلمة كمان وهلم عليكي المنطقة ب المناطق المجاورة
= خشي يا حماتي ، خشي عليها يقلبي أيوة اديها
_ ماما!!! انتي واقفة معاهههه؟
= طلباتك يحماتي ؟
° تسامحنا يبني والله
_ ماما!!!!!!
= ها هتتجوزيني؟؟
_ لاء
= علي خيرة الله ، هجيب الحج واجيلكم النهارده يذوبة
° حبيبي تنوروا ، هروح اعزم الجيران أنا بقي
_ ماما خدي هنا
= مخلاص بقي! ما تقوليها هتخسري لي يعني ؟
_ بص ماشي انا موافقة زي بعضه
= موافقة لي؟
_ ها؟
غمز = لي يعني موافقة؟ أي يخليكي مواقفة؟
_ عشان.. ، ماشي يا احمد بحبك جاية معاك ب اي؟
= ب جواز