رواية احببتك مرتين الفصل الاول1بقلم رزان عزالدين
ده بني آدم براس بخاخة
-انا نفسي أفهم يعني انتِ بتحبيه وبتقولي عليه كده اومال لو ماكنتيش بتحبيه؟؟
-خلاص ياسارة بقا اقفلي الموضوع
-بصي الصراحة ياحور انتِ غلطانة برضو مكانش ينفع تنزلي منغير ما تقوليله
-ليييييه؟ كان ابويا؟
-طب ما انتِ باباكي مسافر وزين مسؤول عنك!!
-يووهه بقا، خلاص يا سارة سلام
-ربنا يهديكِ، سلام
قفلت معاها ورميت التليفون علي السرير وانا بزفر.
خرجت النهاردة اجيب حاجة من السوبر ماركت منغير ما اقول لزين ابن خالتي اللي ساكن في الشقة اللي في وشي، اصل انا لازم اقوله عشان بابا مسافر عشان شغله، فانا نزلت عادييي جدااا السوبر ماركت تحت البيت حرفيا مخدتش دقيقتين وطلعت لقيته في وشي باصصلي ووشه بيطلع دخان فانا قولتله:
-حاسب لتتحرق
وماقولكوش علي التهزيق اللي اتهزقته. اه صح نسيت اقولكوا، هو ابن خالتي بس حبيبي في مخيلتي.
مش موضوعنا، موضوعنا ان انا متدايقة، ممكن اكون غلطت بس برضو، انا بعيط ليه؟
ده اصلا عيل...
فجأة سمعت تلت خبطات علي باب الشقة، لبست الازدال ومسحت دموعي ولقيته، قرة عيني.
بصيتله بقرف وقولتله:
-عايز ايه ياض؟
-ياض!! انا أكبر منك بخمس سنين يمحترمة!!
-ايه يعني خمس سنين
-اوعي يا حور
دخل واداني كيس منغير ما يبصلي وكان مليان شوكولاتات وحلويات
-يا خالتاااااااي
ابتسمت وبصيتله، دايما لما ازعل حتي لو انا اللي غلطانة بيصالحني بالطريقة دي.
ماما خرجت من الاوضة وقالتله:
-ايه يلا بتجعر كده ليه؟!
-اعمليلي كيكة
-عنيا ياحبيبي اقعد وانا هعملهالك
-تسلم عيونك الجميلة
علاقة ماما وزين حلوة جدا، هي بتعتبره ابنها وهو بيعتبرها مامته.
كنت لسة واقفة وماسكة الكيس ومتنحة فيه راح بصلي بطرف عينه وقال:
-ايه شكلي حلو؟
-اه
-ايه؟!
-ايه؟!
-انتِ قولتي ايه؟
-بقولك زي الزفت
ومشيت بسرعة دخلت الاوضة وقفلت الباب، بعدين فتحته وقولتله:
-وشكرا علي الحلويات افتكرتك معفن وبخيل طلعت معفن منغير بخيل
وقفلت الباب بسرعة قبل ما يشتمني.
ــــــــــــــــــــــــــــــــــــــــ
"لا حول ولا قوة إلا بالله"
-بقولك ايه ياخالتي ماتيجي نروح نتفسح
-هنروح فين يا زين؟
-نروح نتعشي برا وبعدين ناكل ايس كريم ونقعد علي الكورنيش
-حلو اوي، روح قول لحور وانا هلبس
-ماشي يا جميلة
كنت قاعدة بقرأ رواية ومندمجة اوي فجأة...
-حوووووووووووور
اتفزعت
-بسم الله في ايه يعجل؟!!
قالي من ورا الباب:
-اجهزي عشان نازلين
-بجد والله يابو نواف!
-ايوا
-يحبيب قلبي تسلم يعجل وربنا!!
سمعت صوت ضحكته اللي بتخطف قلبي دايما، وفتحت الدولاب طلعت منه دريس ابيض وطرحة اوف وايت ولبست عليهم سكارف (شتوي) بني وشنطة سودة عشان اكون كملت الأويتفيت، وطلعت.
كان هو قاعد علي الكنبة ولابس تيشيرت اوفر سايز ابيض ونطلون بوي فريند، مززززز قرة عيني.
كان قاعد علي التليفون واول ما فتحت الباب راح رفع راسه وقال:
-اخيرا بقالي ساعة مستنـ...
بعدين تنح، فضل باصصلي بنظرات غريبة، اتوترت شوية...شويتين...تلاتة؟
قال بصوت واطي:
-شكلك تحفة كالعادة...
-ايه؟
-ولا حاجة يلا خالتو سبقتنا للعربية
نزلنا سوا وركبنا العربية، ماما في الكرسي اللي قدام وانا ورا وكلنا قاعدين بنتكلم ونهزر.
وصلنا المطعم وكلنا وبعدين زين جابلنا ايس كريم وقعدنا عند الكورنيش، عندي حركة بحب اعملها اوي، بحب اقعد علي السور فانا طلعت فوقه وقعدت، زين فضل يقولي لأ بس انا عملت اللي في دماغي برضو
-الأيس كريم تحفة بجد
-اه والله، الواد زين ده مش بيجيب حاجة وحشة
زين عدل هدومة بفخر وقال بغرور مصطنع:
-طبعا
-يارب افرح بيك ياحبيبي قريب
-يارب ياحبيبتي
خلصت الأيس كريم وحطيت العلبة علي جنب وقعدنا كلنا نتكلم وكان المكان زحمه ومليان ناس، كان في شلة ولاد بيهزروا ورانا فراح واحد زق صاحبه اللي قد الفيل وخبط فيا، وفجأة
-حووووور!!!
ــــــــــــــــــــــــــــــــــــــــ
"لا إله إلا الله"
كنت قاعد برا وخالتي في اوضة المستشفى، راسها كانت ملفوفة عشان الخبطة، فانا مدخلتش لغاية ما تفوق وتغطي شعرها.
كنت قلقان جدا عليها، ومستني حد ييجي يقولي حور صحيت، مستني اشوفها واشوف ابتسامتها.
كنت مرعوب جدا عليها وخصوصًا انها كانت بين ايديا ومش عارف اساعدها...
@فلاش باك
-حوووووور!!!
حور وقعت من علي السور وراسها اتخبطت، وقفت علي السور بسرعة بدون تردد -نظرًا لأن انا محترف في السباحة- و نطيت وراها.
اول ما وقعت في الماية انا كنت وصلتلها، وشديتها بسرعة،
الماية حوالينا لونها بقا احمر...
حور وشها ابيض وشاحب...
في نص النيل...
مغمي عليها...
راسها بتنزل دم كتير جدا..
حاولت اوقف الدم بإيده وشديتها طلعتها من الماية بصعوبة، حضنتها بين ايديا وفضلت اقولها وانا مش سامع اي اصوات حواليا ولا صوت الناس اللي بيصوتوا ولا يسألوا في ايه:
-حور...حور اصحي بالله عليكِ...حووور
-ماتسيبنيش ارجوكِ ياحور انا ماليش غيرك...ياحووور
خالتي جت جري علينا وهي بتعيط وانا برضو مش سامع ولا شايف غيرها.
بدأت افوق علي سارينا الأسعاف ودكاترة بيجروا عليا وشدوها مني...
@باك
كنت بفكر في اللي حصل و واقف وحاطط راسي بين ايديا
-استاذ زين
فوقت علي صوت الممرضة بتنادي باسمي
-نعم
-احم...حور فاقت
عيني اتسعت وجريت علي الاوضة، اول ما فتحت الباب كانت قاعده علي السرير ولابسة طرحة خفيفة عشان راسها، خالتي جنبها و...بتعيط؟
ابتسمت عشان شايفها فايقة اخيرا وجريت وقفت جنب السرير وقولت وانا بتفحصها بعيني:
-انتِ كويسة؟!
-انت مين؟...
الجملة نزلت عليا شبه الصاعقة، ابتسامتي بدأت تختفي تدريجيًا، وعلامات الاستفهام بدأت تترسم علي ملامحي.
انا مين؟
يعني ايه!!
ضحكت فجأة وقولتلها بعدم تصديق:
-انا عارف الحركات بتاعتك دي
بصيتلي بحدة وقالت:
-حركات ايه؟ انت مين!!
-حور بطلي هزار، ماتتكلمي يا خالتو
حور ضمت حواجبها وقالت بعدم فهم:
-حور؟ انا اسمي حور؟
-ياخالتي هو في ايه ماتتكلمي
خالتو كانت لسة بتعيط، وانا بدعي مايكونش اللي في بالي.
قطع صدمتي صوت الدكتور وهو داخل وبيأكدلي مخاوفي:
-الأستاذة حور حصلها فقدان ذاكرة رجوعي بسبب اصطدام شديد في راسها، مع الوقت ذاكرتها هترجع.
مقدرتش اتكلم، جسمي كله اتجمد حتى لساني
فضلت ساكت وباصصلها وبفكر:
اعمل ايه؟
ــــــــــــــــــــــــــــــــــــــــ
"أستغفر الله العظيم و اتوب إليه"
بيقولوا ان اسمي حور، وبيقولوا ان عندي 20 سنة، وبيقولوا ان انا عايشة مع ماما عشان بابا ميـ*ت، وابن خالتي الله يرحمها زين في الشقة اللي قدامنا
هل انا فاكرة حاجة من ده؟ لأ
"طق طق طق"
-اتفضل
الباب اتفتح وزين دخل، وشه كان حزين. فضل باصصلي شوية بعدين قال:
-اعمامك وعماتك وأولادهم جايين كمان شوية، اجهزي
-حاضر
لف وكان هيخرج بس وقف فجأة ولف بوشه وقال:
-اه صح، متتكلميش مع ابن عمتك محمود ولا ليكِ دعوة بيه
-ليه؟
-هفهمك بعدين ياغزال، البسي بس
-غزال؟ انا اسمي حور...تقريبا؟
ضحك بصوت عالي وقالي:
-ايوا صح ياحور
وخرج،
هو مجنون؟
ــــــــــــــــــــــــــــــــــــــــ
"اللهم صل وسلم على سيدنا محمد"
-اسم الله عليكِ يا حبيبتشي ايه اللي جرا بس
زين مسح علي وشه بضيق وقال بقلة حيلة:
-يا طنط هي هتفتكر اللي حصل ازاي بقولك فقدت الذاكرة!
شهقت عمتي سوسن وحطت ايديها علي قلبها وقالت:
-يامصيبتي! يعني البت مخها راح!!
-يووه ياطنط سوسن بقا حرام عليكِ بقولك مش فاكرانا
شهقت تاني:
-مش عايزانا!!
-اه مش عايزانا، متبريه مننا ياطنط
ضحكت علي شكل زين وهو خلاص صبره خلص وهو بقاله ساعه بيحاول يفهم عمتي اني فاقده الذاكرة
-سوسن حبيبتي انتِ مبتفهميش؟
-اخص عليك ياحما، حد يقول لمراته انت مبتفهميش؟
-اه انا، عشان انت مبتفهميش فعلا
-بقي كده ياحما؟ طب والله م هعمل عشا
-عساس ان انتِ بتعملي يعني
كلنا ضحكنا (احنا وباقي اعمامي وعماتي واولادهم)
زين ميل نحيتي وقال بصوت واطي:
-ده محمد جوز عمتك، هم دايما كده ناقر ونقير
-واخده بالي
فجأة دخل شاب عشريني، طويل، قمحاوي، عنده شنب، وكان بيبصلي بنظرات غريبة، زين زفر بضيق وقال:
-يادي النيلة السودا
-مين ده؟
-محمود، اعملي زي ما قولتلك
هزيت راسي، بعدين محمود اتقدم وقالي بعد ما وقف قدامي:
-الف سلامة عليكِ ياحور، قلقتيني عليكِ ياحبيبتي
زين وشه كرمش وكان لسة هيقوم يضربه بس انا رديت بسرعة وتلقائية:
-حبك برص يبعيد
-ايه؟
قولت بصوت اعلي:
-بقولك حبك برص وامشي من قدامي والله مش فايقالك
معرفش ليه لسبب ما حسيت انه بني آدم غتت ومش طايقاه رغم اني مش فاكراه اصلا، زين بصلي وابتسم بعدين رجع نظره لمحمود وقال:
-نورت ياحودة، ياريت تمشي بدري بقا
-ليه كده بس يازينو
زين كان هيرد بس انا قولت:
-اصلك ضيف تقيل
محمود بصلي بغضب مكتوم بعدين بص لزين وقاله وهو بيجز علي سنانه:
-انت قولتلها ايه عليا يا زين؟
-ولا حاجة والله سبحان الله مش بتطيقك في كل الحالات
محمود قال بخبث:
-ازاي، هو في حد مش بيطيق حبيبه؟
شهقت وقولت بعصبية:
-نعم ياخويا!! حبيب مين ياض؟؟
انا احبك بشكلك اللي شبه كعب الكوباية ده وشنبك اللي شبه كلب البحر؟! عيبة في حق كلب البحر والله احلي منك ياراس البخاخة!
منك لله يازين، انت ازاي سمحتلي احب العجل ده؟؟
كلهم قعدوا يضحكوا جامد وزين عينه دمعت من كتر الضحك، محمود بصلي بتوعد ومشي وانا كنت لسة متعصبة ومش مصدقة اني كنت بحب ده
-زين هو انا كنت بحبه بجد؟؟
رد وسط ضحكه:
-لأ، هو اللي بيحبك وانت رفضتيه تلت مرات وادي الرابعة.
هو عمل كده عشان يستغل انك فاقدة الذاكره وكده ويلعب في مخك، بس انت ماشاء الله عليكِ شبهتيه بكل حاجة
وكمل ضحك، سرحت في ضحكته وفي ملامحه اللي لسة مكتشفاها دلوقتي...ثانية، احنا هنخيب ولا ايه؟!
ــــــــــــــــــــــــــــــــــــــــ
"سبحان الله وبحمده سبحان الله العظيم"
عدت ايام، واسابيع، وشهور
وزين وماما بيحاولوا يفكروني بيهم بأي طريقة
خصوصا زين، كان اكتر واحد بيحاول يقرب مني الفترة دي وانا؟ لا حياة لمن تنادي
بصراحة بقيت احس اني معجبة شوية صغيرين بزين
طريقته، هزاره، ضحكته العسل
وكمان كنا بننزل كتير انا وهو وماما، وفي جنينة حلوة اوي بيودينا فيها.
طول الفترة دي في حاجة واحده بس مش فاهماها، ليه ساعات بيقولي غزال وانا اسمي حور ولا هم بيضحكوا عليا ولا ايه بالظبط مش موضوعنا.
اه صح نسيت اقولكوا ان عندي واحده صاحبتي اسمها سارة بتقول اننا نعرف بعض من ابتدائي وبجد عسوله اوي وحبيتها، بتكلمني كل يوم وبتحاول انها تفكرني وانا زي الاطرش في الزفة
-حووووووووووور
-في ايييييه!!
-عارفة النهاردة ايه؟
-الخميس
-ظريفة، النهاردة عيد الميلادك
-بجد!
-ايوا، البسي بقا عشان ننزل
-اوكيي
فتحت الدولاب ولبست دريس بيج واسع وطرحه بني ولبست شنطة بيضة و سكارف ابيض.
خرجت وماما وزين كانو قاعدين برا، ماما اول ما شافتني ابتسمت ابتسامة واسعه وقالت بحب:
-بسم الله ماشاء الله، اللهم بارك، الله اكبر
-في ايه يا خالتي هتأذني ولا ايه؟
وبعدين هو احنا هنفضل كل مرة نستني ساعتين عشان حضرتك يا استاذة حور بتـ...
رفع عينه بصلي وفتح بوقه، ارتبكت من نظراته في حين ان ماما قالت:
-ايه القمر ده يابت ياحور اتصدقي زين عمره ما غلط لما كان بيقولك غزال!
-اولا انا نفسي افهم ايه موضوع غزال ده
ثانيا اتعدل ياض بدل ما اجي اعضك!
زين حمحم وبص علي الارض بعدين قال:
-طـ...طب يلا بقا عشان ننزل
ونزل هو الاول بعدين ماما وبعدين انا
وصلنا كافيه وقعدنا فيه وانا طلبت ايس كوفي وماما هوت شوكليت وهو كابتشينو
-انا هروح اجيب حاجة من العربية وجاي
-ماشي يا حبيبي
قعدت انا وماما لوحدنا وهو راح العربية
-ماما ممكن أسألك سؤال؟
-قولي ياحبيبتي
-هو زين بيحب حد؟
-مش عارفة
بعدين غمزتلي وقالت:
-وقعتي ولا ايه؟
ارتبكت وقولت:
-ا...ايه...لا خالص بسأل بس، طب هو ليه مخطبش لغاية دلوقتى؟
-ااهه انتِ هتقوليلي،
فجأة دخل زين وهو ماسك قفص قطط!!
جيه قعد وحطه قدامي وبعدين قالي:
-خدي ياستي هدية عيد ميلادك
-اااااااااااااااااااااعاااااااااااااااااااااا
-بسسسس وطي صوتك
خرجتها بسرعة من القفص ومسكتها، كانت قطه سوده شيرازي زي القمر
-يوووغتييي كوتييي بوووتيييي، شكرا يازيييين بحبككك
ماما وزين قالوا بصوت واحد:
-بتـ ايه؟!
-زي اخويا يعني سلكوا النية شوية
ماما ضحكت وزين كشر فجأة، استغربت بس مهتمتش وقعدت العب مع القطة وقررت اسميها "لولي"
بعد ما كل واحد شرب اللي طلبه
قررنا نطلع من الكافيه ونتمشي شوية، شوفت في نص الطريق محل بيبيع ادوات رسم وهم قالولي اني كنت برسم فعايزة اجرب.
طلبت من زين وماما اني اشتري ادوات رسم و وافقوا وفعلا جبت كنڤاس وفرش والوان زيت وأكريليك كتير، وماما قررت هي اللي تدفع عشان عيد ميلادي بعد خناق طويل مع زين انه ميدفعش، وروّحنا
-شكرا يازين بجد اليوم كان تحفة، وشكرا انك جبتلي لولي
-علي ايه ده انا عيوني ليكِ ياغزال
ضحكت بخجل...انتوا صدقتوا؟ احنا هنخيب ولا ايه لأ طبعا مضحكتش بخجل ولا حاجة
-شكرا مش عايزاهم شكلهم وحش
ودخلت بسرعة وسيبته في حالة صدمة، الصراحة عيونه زي العسل بس اعمل ايه ياربي في لساني بس.
شكرت ماما وبوست راسها وحطيت اكل للولي، ولما نامت جهزت ادواتي وبدأت ارسم.
ايدي كانت بترسم منغير ما احس، الواضح ان المهارات لسه عندي.
كنت برسم بنت قاعده علي شط وشعرها بيطير في الهوا، ولونتها بالوان الزيت
خلصت بعد حوالي 7 او 9 ساعات وكانت لسة مخلصتش بس تعبت.
كلت وقعدت علي السرير بتأمل السقف ومعرفش ليه كنت شايفة صورة زين، ومش عارفة ليه من اول يوم شوفته فيه وانا حاسة بحاجة نحيته، انا كنت بحبه قبل ما افقد الذاكرة؟
"تن"
مسكت التليفون اشوف مين بعتلي، كان رقم غريب باعت رسالة جمدتني وخليتني في حالة صدمة
-ابعدي عن زين، هو السبب في انك تفقدي الذاكرة...