رواية بين هذا وذاك الفصل الثالث3بقلم مريم سمير
_ أنا الدبدوب بتاعي ضاع مني
= انتي جاية ل دكتور نفسي عشان دبدوبك ضاع!!
_ أمشي ؟؟
= استني استني ، أنا متأسف جدا ، اتفضلي أنا هسمعك
_ بجد؟
= أيوة منا باخد فلوس ، أحلل اللقمة علي الاقل عشان مزورش
ضحكت _ هو ينفع اقعد علي الشيزلونج دا؟
= اكيد ، اقعدي في أي مكان يريحك ، اقعدي علي دماغي لو حابة
_ لاء العفو هقعد عليها وسعلي كد وخف يدكتور استخفاف دم عشان مش نقصاك والله
= حلو اوي ، يبقي كد انفصام في الشخصيه كملي
_ أنا الدبدوب بتاعي لو مرجعش مش هتشوف نور الشمس تاني دا اولا يعني بسم الله الرحمن الرحيم
= اي هنعمل movie night ولا اي؟
_ رجعنا للاستظراف تاني يدكترة
= لو دمي تقيل علي قلبك قولي او اديني إشارة
_ إشارة أي أنا من ساعتها بقولك!!
= خلينا في موضوعنا عشان الجلسه ساعة ، اتفضلي
_ طب لو حجزت ساعتين هيبقي الحساب كام؟ تعملي خصم؟
= لاء مهو احنا مش في بتاع عجل ، أنا مشغول جدا أنا طالع عين امي ومبنامش
_ بس مفيش حد برا خالص! ، هو انا اول حد يجيلك مش كد؟
= بصي متدخلنيش في تفاصيل دلوقتي ، قولي مشكلتك ونحلها سوا
_ لاء أنا جايه تسمعني ، اكيد مش هستناك تحل مشاكلي كنت حليت مشاكلك انت!
= والله معاكي حق ، طب قولي أنا سامعك
_ الدبدوب بتاعي ضاع
= أنا نفسي في جملة غيرها ، جودي كد عشان منزهقش
_ وعاوزة ارجعه ، مينفعش يضيع
= طب ما تشتري واحد غيره؟
_ يدكتور لو قومت عدمتك العافيه دلوقتي هتستفاد اي؟ منا قولت مش عاوزة حلول!
= خلاص والله ، اتفضلي كملي
_ عزوز كان صاحبي الوحيد
= عزوز مين؟
_ تصدق أنا عرفت دلوقتي انت مبيجلكش زباين لي بمخك دا؟
= اه عزوز دا الدبدوب يعني ؟ طب حد قالك اني بنجم طيب؟ منتي لازم تقوليلي هو انا دجال!
_ انت بترغي لي؟ هو انا حاجزة ساعة عشان اسمعك انت؟ لا تعالي اقعد مكاني علي الشيزلونج تعالي يعم متتكسفش
= طب قومي هو انا هقعد جمبك يعني ولا اي!
_ طب ولما اكسرلك العيادة واسيبك تحت الأنقاض هترتاح؟
= عزوز كان صديقك الوحيد وبعدين بجد ؟
_ لما كنت صغيرة كان بابا وماما بتخانقوا طول الوقت ، مكنش حد بيشوفهم غيري انا وهو ، مكنتش بنام غير وهو جمبي ، ولا اروح في أي مكان غير وهو معايا ، لما ماما وبابا عملوا الحادثة واتوفوا مكنش جمبي أي حد يطبطب عليا ، لقيت نفسي بحكيله هو واعيط ، روحت عيشت مع جدتي والحاجة الوحيدة الي خدتها كانت هو ، لما كبرت كنت بشيله في شنطة الضهر بتاعتي ، أنا مكنش قصدي اضيعه كان غصب عني ، الشنطة اتسرقت مني أنا فضلت اجري ورا الموتوسيكل لحد ما نفسي اتقطع ، كنت عاوزة اقول للي خدهم خد كل حاجة بس رجعهولي ، مينفعش ابقي لوحدي ، مينفعش انام وهو مش جنبي ، أنا بقالي اسبوع بنام بمنومات ، أنا مش عارفة اعمل اي
مد أيده بمنديل ف خدته ومسحت وشي الي كان اتملي بالعياط .
= بتشوفي فيه أهلك ؟
هزيت راسي ب اه = أنا فاهمك ، طب انتي اتسرقتي في شارع اي؟
_ شارع المدينة ، هو انت لي بتسأل؟
= المدينه ؟ هو زعتر اكيد
_ مين دا؟
= مريض بيتعالج عندي
_ الحرامي؟ بتعالج عندك!!
= والله يمريم لسه واخد المحفظة وروحت من يومين مشي مكنش في العربية بنزين ، بس نعمل أي المرض النفسي ملوش لوم
_ اه يعني انت بتعالجه؟
= لاء هو مبتعالجش هو بيجي يقلبني ويمشي ، بس اعمل اي المرض النفسي ملوش لوم
_ يعني انت حاولت معاه أنه يتغير ومنجحش؟
= اي منجحتش دي ؟ اسمها فشلت ، وبعدين المرض..
_ النفسي ملوش لوم
= يبنت اللعيبة عرفتي منين ؟
_ يعني انت هترجعهولي تاني مش كد؟
مسك الفون وكلمه وقاله يجيله العيادة وقفل وبصلي
جاي في الطريق وقولتله يجيب الشنطة عشان هشتريها منه
_ دي براند علي فكرة
= يعني ١٥٠ ج مستريح!
_ أنا جيباها ب ١٢٠٠
= لاء بقولك أي خدي تمن الكشف وشوفيلك حد تاني
' يدكتور المريض زعتر برا
دخل وراها ° مريض أي يا أبلة ؟
' أبلة!!
= معلش يميادة امسحيها فيا ، اتفضلي انتي
° اي يدكتوووور شيعتلي لي ؟
= شيعتلك!! ما علينا يا استاذ زعتر ، انت تعرف الأستاذة ؟
° لاء مين الحتة؟
_ حتة لما تفرتكك يا قليل الادب
= طب ولو طلع علينا مطوة وخد جسم كل واحد فينا جولة ، لسانك الطويل هينفعنا ب أي ساعتها؟
_ خلاص اتكلم انت ، انت عاقل وعارف انت بتعمل أي
= بص يا استاذ زعتر ، دي واحدة أنا سارقتها من اسبوع ، الشنطة الي معاك دي بتاعتها
° اه يعني أنا في كمين ؟ أنا يتعمل معايا كمين يبني ادمين؟ دا لا كان ولا عاش
_ ولما ادخلك الانعاش؟
= اسكتي انتي ، اسكتي انتي بقولك المرض النفسي ملوش لوم
_ بقولك أي استني انت ، أنا عاوزة شنطتي وكان فيها دبدوب ، هو جوا ؟
° اه يختي جوا بس أنا كد استفدت أي ؟
= هشتريها منك يعزوز أنجز الدنيا ، أنا ادفع كل ما املك عشان الحوار دا يخلص والمشكلة تتحل
عمزلي = خدتي بالك اني man ب الجامد؟
° 2000 ج ودا عشان خاطرك يدكتور
= إن شالله ما اتحلت يجدعان ، أنا من اول ما اشتغلت مدخليش 2000 ج علي بعض
_ أنا هدفع
خرجت من شنطتي فلوس _ معاك 1900 ج سلف؟
= اقسم بالله ؟ ولما ارقعلكم بالصوت يعني دلوقتييييي ؟ وبعدين الي يشوفك ويقولك هدفع يقول بس دي وارثة
_ طب اتصرف عشان أنا تكة واخلي وشك محتاج عملية تجميل
= 500 يعزوز
° 1800
= 800
° 1200
= 900 وسندوتشين كبدة هوهو من عند عم ابراهيم الحاتي
° استبينا
خدت منه الشنطة بسرعة وطلعت عزوز وحضنته ف بصولي ب استغراب
= لا يحبيبقلبي اقلب أنا قاعد هنا شويه ، وبعدين المرض النفسي ملوش لوم ولا اي يا ابو الزعاتير
° انت خدت عليا اوي يدكتور! مش عشان اتكلمنا حلو شويه تنسي نفسك
اداله الفلوس = كان فيه 500 اتلطشوا مني اول امبارح مسمعتش عنهم؟
° ولا في طبق اليوم ، يلا في رعايه الله
= بيعجبني فيك ايمانك ، مع السلامة ، لما تعطل بقي تعالي لاخوك عيادتي مفتوحة
° حبيبي يدكتور أنا حاسس اني هتغير علي ايدك
= تتغير أي يزعتر انا قربت أسرق!!
خرج ف رجع بصلي _ أنا بجد مش عارفة اقولك أي
= يستي ولا اي حاجة ، فيه 900 نقطة بس عاوزين نتكلم فيهم
ضحكت _ هجيبلك الفلوس بكرة إن شاء الله ، أنا بجد متشكرة ، أنا لازم امشي دلوقتي
= مع 900 الف سلامة يا رب
_ مخلاص يا احمد!!
خرجت من عنده وانا حاسه إن روحي رجعتلي تاني ، بتهيقلي عمري ما هنسي الموقف دا أبدا
_ ممكن ادخل؟
= اهلا ازيك؟ اتفضلي طبعا ، هي ميادة فين؟
_ بتفطر برا
= هو انا فاتح عيادة ولا مصمط يجماعة؟ أي الاستهتار دا بجد ، بتفطر اي؟
ضحكت _ أنا جاية ارجع الفلوس
= انتي كد بتشتميني ومش عشان أنا متساهل معاكم هسمح بالغلط دا
_ تمام يعني مش عاوزهم؟
= لاء طبعا ، أنا راجل جدا يعني رجولتي ب900 ج دا مثلا
_ امسك يا احمد
= عشرينات؟ جيبالي ٩٠٠ ج عشرينات؟ انتي مشوفتنيش
_ امبارح وانا بطلع الميتينات؟
= معلش فرق الطبقات بقي نعمل أي
_ أنا بهزر أنا اكيد مش هاخد منك فلوس
= عزومة مراكبيه بقي وكد ، خلاص ماشي انت شهم
_ بجد والله؟ شهم؟ دا الي ربنا قدرك عليه؟ أقل من 900 كلمة مدح مش هقبل
= يا دي النيلة ، يعم خد فلوسك
_ ممكن اخد رقمك بداله؟
= رقم الفون ب 3500
_ قولتيلي ال900 ج فيهم كام عشرين؟
ضحكت = أنت طيب اوي يا احمد
_ دكتور احمد ، مش معني اني كنت عادي معاكي لمدة يوم ننسي الألقاب
= أنا همشي دلوقتي عشان عندي شغل ، شكرا انك سمعتني وحليتلي مشكلة كنت فاكرة إن ملهاش حل ، أنا بجد عمري ما هنسي الي عملته
_ استني! ، انتي مش جاية هنا تاني ؟
= هاجي لي؟
_ ايوة صحيح ، عشان ، ولا اقولك أنا هزق عليكي زعتر يسرقك تاني
مسكت الباب وبصيتله = ساعتها هعمل محضر فيك انت واقول انك بتحرض علي الفسق وتفكك المجتمع ، سلام
روحت المستشفى عشان كان عندي شيفت ، فوني رن ف رديت
_ أيوة مين ؟
= عاملة اي بجد؟ طمنيني عليكي ؟ روحتي؟
_ انت احمد مش كد؟
= أيوة أنا الدكتور احمد
_ وجبت رقمي منين بقي ؟
= هو انتي فاكرة إنك بتملي استمارة قبل ما تدخلي للكشف عادي؟
_ ثواني يعني انت خدت رقم فوني من بياناتي الشخصيه ، = طب مسمعتش عن حاجة اسمها اداب المهنة؟
_ لاء كنت غايب في المحاضرة دي محضرتهاش
ضحكت = طب أنا عندي شيفت دلوقتي لازم اكمله
_ انتي ممرضه؟ ملاك رحمه فعلا
=..
_ فكرة قديمة صح؟ معلش اصل انا اخر مرة شقطت كنت في ثانوي
= اقفل يا احمد واتمسي وقول يمسا
_ طب معلش شغالة في مستشفى أي؟
= الحياة والامل ، لي؟
_ سلام دلوقتي يمريم ضروري
قفلت وكملت شغلي ، خلصته ونزلت ، كان عندي سهر الساعة دخلت علي واحدة ومفيش مواصلات ، روحت الموقف واستنيت عربية تيجي تحمل .
= امنت بالله لا اله الا الله ، سبحان الله
_ ايدا في اي
= بدون تدخل بشر ، ماشي عادي لقيتك ، الله اكبر
_ هو انت هنكمل في سلسلة الاذكار دي ولا هتهدي؟ ، أي الي جابك ؟
= انتي تعرفي إن المستشفى دي تبقي بتاعت ابو صاحبي ؟
_ ماشي! و..؟
= هوصلك إركبي ، حاطط بنزين ب 900 ج
ضحكت _ بردو يا احمد! ما قولتلك خد فلوسك
= لاء إنتي بجد نكدية والحياة معاكي بقت صعبة
_ طب اتفضل من هنا شوف انت رايح فين
= واسيبك لوحدك الساعة واحدة ونص؟ طب ورجولتي اقولها اي؟ اروح السجل المدني بكرة اغير اسمي ل انجي طيب ولا اي يرضيكي؟
ركبت _ ماشي عشان مفيش عربيات ، اتفضل وطول الطريق صمت بعد اذنك
= اه منا لو عزوز كان زمانك دلوقتي بتقولي سأستمع لك حتي في صمتك
_ احمد انت أهبل؟
= نعمل أي بس المرض النفسي ملوش لوم
ساق ووصلنا قدام البيت ، خرجت من العربية وبصيتله
_ كد تاني خدمة ، خدماتك كترت ، اخلص هتقتلني امتي؟
= افندم ؟
_ مهو مفيش راجل طيب كد ، انت قاتل متسلسل؟
= انتي التراست ايشو عاملة عمايلها ومسوحاكي
جيت امشي وقفني صوته = مريم هو انتي مش فاكرة انك شوفتيني خالص قبل كد؟
_ في العيادة ؟
= بقولك أي تخلف مش عاوز دلوقتي
_ انت خدت عليا اوي! ، طب قولي انت تعرفني؟
= إركبي تاني عاوز اتكلم معاكي
ركبت _ ها ؟؟ عاوز تقول اي؟
= هتسامحيني؟
_ اي سرقت مني حاجة ولا اي؟
= لاء أنا الي قولت ل زعتر يسرقك
_ افندم؟ اكيد بتهزر
= مريم أنا بحبك
جيت افتح باب العربيه = انتي لو نزلتي هعدي عليكي بالعربية رايح جاي اخليكي سوا الاسفلت
قفلت الباب تاني _ انت متعرفنيش!!
= دا بالنسبالك ، لكن أنا عارفك بقالي ست شهور ، أنا جيت المستشفى كذا مرة بس معرفتش اخليكي تاخدي بالك اني موجود ، كنت بلبس بالطو ولا يونيفورم اعدادي أنا عاوز افهم؟
ضحكت _ وبعدين ؟
= وبعدين خدت بالي انك بتاخدي بالك من الدبدوب بتاعك ف عرفت أنه لو بعد عنك شويه ممكن تحتاجي انك تجيلي بما اني الدكتور النفسي الوحيد في المدينة كلها ، أنا مكنش قصدي انك تعيطي حقك عليا والله ، أنا بس كنت عاوز طريقة ، انتي لا بتتكلمي مع حد ودايما ساكتة ومفيش ولا باب كنت ادخل منه ، لقيت نفسي عاوز اشوفك كل يوم ف بقيت اخترع حجج ل صاحبي عشان اجي المستشفى ، صاحبي دا انا مكنتش بكلمه من اعدادي عشان كان واخد مني الاستيكة الي بالفراولة وضرب عليها ، انتي متخيلة أنا ضحيت ب أي عشانك؟
_ ما تجرب تتعالج يسطا ؟
= يسطا!! لا انزلي انزلي
_ تصبح على خير
= مجاش معاكي ب أي حاجة ؟ أنا قولت كل دا علي الفاضي؟ اقسم بالله ؟
_ انت عاوز اي يا احمد؟
= عاوز اتجوزك
طلعت من العربية وبصتله _ بتهيقلي الطريق دلوقتي مفتوحلك!
= بجد؟؟
بصيتله وهزيت راسي اطلعت الشقة ، اول مرة حد يحاول عشاني! عشان اخد بالي منه أو يلفت نظري! رغم أنه كان وسيم بس وهو بتكلم كانت عيونه مدلوقة حب ، كنت محتاجة احس الاحساس دا في حياتي ، بتهيقلي اني لقيته!
واتخطبنا ، عملنا خطوبة صغيرة في البيت عندي ، يعتبر محدش عرف عنها حاجة
_ شماريخ يا احمد! انت جايب شماريخ تحت البيت؟
= دا انا لسه هركب الموتوسيكل واخمس بيه تحت
_ هي دي الخطوبة الي هتمر زي النسمة زي ما اتفقنا؟
= مع نفسك بقي دا انا مصدقت اليوم دا يجي ، أيوة يحبيب اخوك نازلك حاييني بطلقتين كد خلي الشارع يتقلب عليا
كان لذيذ ، بيسمعني ، دمه خفيف ، وبقي صاحبي ، لاول مرة احس اني مش عاوز غير وجوده ، أنه مينفعش اليوم يعدي من غير كلامنا وهزارنا وأننا شبه بعض في كل حاجة ،
_ هي مين دي؟
= هو انا بشتغل أي يمريم ؟
_ هي مين الي كانت خارجة من عندك دي؟
= مريضه هتكون أي يعني!
_ اه ، مريضه أي أنا بتقرطس عيني عينك ؟ ودي عندها اي؟
= عمر ويس
_ اه انت هتستظرف تاني ، مريضه مالها ؟
= عندها انفصام ، بجد والله دكتور أنا ولا في السعدية ولاد؟ ، ثواني مريم هو انتي بتغيري؟
_ اتعالج يا احمد في أوقات فراغك
= غمضي ، متفتحيش عينك غير لما اقولك
_ أنا قولت قاتل متسلسل محدش صدقني
= طب ولما اخبط دماغك في الطربيزة وسط الناس هترتاحي؟
غمضت عيني = فتحي
_ الله ايدا! دا تحفه
= كل سنة وانتي طيبة يمريوم
_ دي اول مرة حد يجيبلي هدية أو يفتكر عيد ميلادي
= عجبك ؟
لبست الخاتم _ اويييي ، شكرا يا احمد بجد ، أنا مش عارفة اقولك أي
= طب لي مش عارفة؟ صارف ومكلف لي مش بتقدري؟
_ منا عاوزة اقولك اني وانا كمان
= وانتي كمان اي؟
_ انت بتقولي كلمة كد ساعتها أنا بسكت ف بقولك دلوقتي وانا كمان
= هنجم يعني ولا اي متقوليها!
ضحكت _ ماشي ، احمد أنا بحبك
= ياه ، اخيرا يشيخة أي حجر!! ، طب أي هنتجوز امتي؟
_..
= احنا لازم نتكلم ف 900 نقطة قولتلك عليهم قبل كد