رواية حوديت من الظلام الفصل الثالث3والاخيربقلم عمرو علي

خلي بالك من نفسك يا حبيبي

= يا ماما بالله عليكي متسبنيش ، انا مش عايز ارجع لوحدي تاني ، قومي بقا ، قومي وقولي انك بتهزري معايا ، يا ماما ردي عليا ، مااماااا

" صدمات متتالية كانت على وشك انها تخلص عليا ، ليه بيحصل معايا كل دا ، يعني انا بعد ما حبيتهم ليه يروحو مني ، بعد إجراءات الدفن و مراسم العزا ، دخلت شقتي ، البيت فاضي ، مفيهوش أي صوت ، مش عارف المرادي هنادي على مين ، مين هيكون مهتم اني جيت ولا مجيتش حتى ، موتهم ساب جوايا اثر كبير ، قعدت على السرير بحاول انام ، لكن فوقت بسرعة و نزلت اجري رايح للشيخ ، هو السبب في كل دا ، هو السبب اني موجود هنا اصلا ، كانت الساعة 11 ، وصلت بيته و دخلت ، روحت على الأوضة اللي كان قاعد فيها ملقتهوش ، دورت في باقي الشقة لحد ما صوت من ورايا اتكلم

بتدور على حاجة يا حازم

" كان واقف على باب الشقة 

= انت اللي قتلتهم

قتلت مين ، قصدك يعني ابوك و امك

= لما انت عارف ان هما هيموتو ليه محذرتنيش ، ليه جبتني هنا اساسا

انت اللي جبت نفسك هنا وانت برضو اللي قتلتهم وبرضو انت اللي هتقدر تخرج من هنا

= انا خلاص بقيت محبوس هنا ، مش عارف ارجع ل حياتي القديمة ولا عارف اعيش هنا

كنت ممكن تعيش عادي جدا ، بس انت مش هتتغير يا حازم

= اتغير ايه أكتر من كدا ، انت مش شايف لبسي وشكلي بقا عامل ازاي 

قصدي تتغير من جوا ، بس لا انت لسة حازم

= انت صدقت اني حمزة بجد ولا ايه

مش هتعرف أصلا تكون حمزة 

= انا احسن من حمزة مليون مرة

مش بقولك عمرك ما هتتغير يا حازم ، امشي و خلي بالك من اخر فرصة

" الغضب كان مخليني اعمى ، يمكن حمزة أحسن مني فعلا بس انا اللي بكابر ، انا بجد تعبت ، دي مش حياتي ومش عايزها ، على الأقل حياتي القديمة مفيهاش كل الوجع دا ، رجعت البيت ، نمت من الإرهاق والتعب اللي انا فيه ، صحيت تاني يوم على صوت جرس الباب ، قومت متعصب ، خرجت من الأوضة

ايه يا ماما يعني مش سامعة الباب

" ولكن افتكرت اني بقيت عايش لوحدي ، روحت فتحت الباب ، كانت امل 

شكلي صحيتك

= عادي ، ادخلي

انا جاية اقولك حاجة مهمة 

= في ايه

الضرائب هتحجز على الورشة 

= ضرائب ايه

انت ناسي ان عليكو ضرائب ب 20 الف جنيه 

" في اللحظة دي انا مبقتش قادر استوعب ، حاسس اني في عالم تاني 

وانا هعمل ايه دلوقتي

= لا طبعا نقدر نعمل

ازاي

= انا كنت داخلة في جمعية ب 10 آلاف وهقبضها اخر الشهر ، ممكن تاخدهم و تحاول انت تجمع الباقي

مش هقدر

= مفيش حل تاني يا حمزة

اسمعي يا امل ، انا مش هقرب ل اي حاجة تخصك

= يا حمزة احنا واحد و لازم اساعدك لما تكون في مشكله

برضو صعب

= والله ما صعبة ، خد الفلوس و انزل افتح الورشة و ابدأ شغل و هنعرف نعدي الموضوع دا

انا مش عارف أشكرك ازاي يا امل

= تشكرني انك تقوم و تنزل تشوف شغلك

ماشي

" احساس لطيف انك تلاقي اللي يسندك وقت ضعفك ، من تاني يوم بدأت انزل الورشة ، اشتغلت اكتر ، بقيت بنام عدد ساعات قليل جدا في اليوم عشان اقدر اجمع باقي المبلغ ، النهاردة قدرت فعلا اجمع المبلغ ، روحت و دفعت الفلوس كلها للضرائب ، حمدت ربنا اني قدرت انجح في حاجة ، كان عدا 40 يوم على وفاه امي ، مازلت مش عارف اقتنع باللي حصل ، ولكن بحاول اتعايش لاني معنديش حل تاني ، امل كان ليها دور كبير عشان اقدر اعدي كل دا ، يمكن الاستفادة من الرحلة دي هي اني حسيت بمعنى الاهل بجد ومعنى الحب ، حبيت تلقائيتها و كلامها الغريب اللي مش بفهم منه حاجة ، طيبة وجدعة ، يمكن مش دي المواصفات اللي كنت راسمها ل شريكة حياتي ، لكن هي اللي عرفت تحببني فيها ، كملنا شهرين بالظبط على وفاه امي ، مكنتش قادر ابقا لوحدي أكتر من كدا ، بدأت اجهز للفرح ، كفاية خطوبة 6 سنين ، لكن انا مش معايا فلوس ، مكنتش عارف اتصرف ازاي ، معرفش حد عشان استلف منه ، فكرت في الشخص الوحيد اللي اعرفه ، إبراهيم ، كان لسة جاي ف بالي وفجأة لقيته قدامي

لسة بفكر فيك

= من غير ما تفكر ، انا جيتلك

محتاج منك فلوس

= ما انت عارف يا حمزة ، انا معيش جنيه واحد حتى

طب فكر معايا اجيب منين الفلوس عشان اعمل فرح

= وليه تفكر وتتعب نفسك وانت قدامك الطريقة

طريقة ايه

= المعلم صابر ، بس دا بقا مش هيعملك الفرح وبس لا دا هيقلب حياتك كلها جنة

بس انا خايف

= تخاف من ايه ، كل حاجة معمول حسابها 

" فرصة مضمونة يبقا ليه مستغلهاش 

انا موافق

= هو دا الصح يا حمزة ، هكلمك بكرا عشان اقولك معاد العملية

" يعني ايه ، خلاص هيبقا معايا فلوس ، حياه حازم الحديدي هترجع ولا ايه ، كل حاجة هترجع ، هعمل فرح ويبقا معايا فلوس اقدر اعمل بيها اللي انا عايزه ، روحت البيت ، مكنتش عايز انام ، فرحان اوي ، لازم اكلم امل عشان افرحها هي كمان ، اتصلت بيها مرة مردتش ، كلمتها تاني وتالت و رابع وخامس مش بترد ، عمرها ما عملت كدا ، بدأت اقلق ، كلمت ابوها قالي انها خرجت عشان تجيب حاجات للفرح ، كلمتها تاني و المرادي ردت

ايوا يا امل ، أنتي فين كل دا

= حضرتك قريبها

" صوت راجل غريب

انا خطيبها ، انت مين

= للاسف في عربية خبطت أستاذة امل و نقلناها على المستشفى

ايه ، مستشفى ايه 

= *****

انا جاي حالا

" نزلت بجري ، ركبت المواصلات ، الدنيا زحمة جدا ، نزلت وكملت جري لحد المستشفى ، وصلت

لو سمحتي خطيبتي عملت حادثة من نص ساعة ، هي فين

= الدور الرابع

" طلعت ، بقيت مش قادر ااخد نفسي ، بنهج ، ضربات قلبي سريعة ، لقيت أوضة مكتوب عليها العمليات ، كان فيه بعض الناس واقفة ، بدعي يارب تعدي على خير ، يارب الا دي ونبي ، الدكتور خرج ، كان باصص في الأرض ، سأل على حد من قرايبها ، روحتله بسرعة

قولي يا دكتور هي حالتها ايه دلوقتي 

= انت تعرفها

انا خطيبها و فرحنا قريب 

" لسانه كان متلخبط 

للاسف انا مش عارف اقولك ايه ، بس هي وصلت متأخر ، حصل ليها نزيف في المخ ، ملحقناش نعمل حاجة

" مكنتش مستني اسمع باقي كلامه ، جريت على أوضة العمليات و دخلت ، لقيتها مغطيين وشها 

انتو عاملين فيها كدا ليه ، هتتخنق ، هي تعبانة اصلا ، دايما عندها ضيق تنفس ، صح يا امل ، يلا بقا عشان نمشي ، امل يلا ، هجبلك الايس كريم اللي بتحبيه ، أنتي بالذات متعمليش فيا كدا ، امل ، أنتي سمعاني صح ، انا خلاص هيكون معايا فلوس وهنعمل فرح ، معقول يعني هتمشي قبل ما تلبسي الفستان ، ونبي قومي معايا 

" وقعت على الارض ، الممرضين حاولو يخرجوني من العمليات ، لكن رجلي خلاص وقفت مش قادرة تتحرك ، مفيش اي إشارات من مخي ، فقدت الوعي ، معرفش عدا قد ايه ، فوقت لقيت نفسي في المستشفى ، بدأت اقوم من على السرير ، الممرضة جات بسرعة

مينفعش تتحرك ، انت لسة تعبان

= فين امل

" سكتت ومردتش. 

ما تنطقي امل فين

= اهلها استلموها و مشيوا

هو انا بقالي قد ايه هنا

= يومين

" قومت ومشيت ، منتبهتش لكلام الممرضة اللي بتحذرني ، خرجت و رجعت بيتي ، ملحقتش اشوفها ولو لآخر مرة ، حتى معرفتش احضر العزا ، دخلت الشقة و قعدت ، بقيت لوحدي ، مليش حد ، يارب انا مستاهلش منك كل دا ، ارحمني يارب ، ارحمني من الوجع دا ، انا غلطت بس انت غفور رحيم ، اغفرلي يارب  ، اغفرلي عشان انا تعبت ، كنت منهار مش قادر اقف ولا أتحرك ، نمت مكاني على الكنبة ، عدا أسبوع وانا مش بتحرك من البيت لقيت الباب بيخبط ، فتحت ، كان إبراهيم 

مالك قافل على نفسك كدا ليه

= عايز ايه يا ابراهيم

مش عايز حاجة ، المعلم صابر بيقولك العملية بكرا 

= انا مش هعمل حاجة

يعني ايه

= يعني انساني خالص ، انا مش هعمل العملية دي

المعلم صابر كدا هيزعل

= مبقاش يهمني 

براحتك يا حمزة

" مشي ، الله اعلم حياتي الجاية هتبقا عاملة ازاي ، حتى لو هموت مبقاش في حاجة اعيش عشانها ، الباب خبط تاني ، قومت و فتحت كان الشيخ ، متكلمتش ، سيبته و دخلت وهو دخل ورايا 

مبروك يا حمزة

= انت جاي تشمت فيا

دا انا جاي اقولك مبروك ، دلوقتي بس اقدر اقول انك بقيت حمزة مش حازم 

= يعني ايه

يعني فوق يا حازم ، فوق ، فوق دلوقتي

" دماغي بدأت تلف ، دايخ جدا مش قادر اقف ، غمضت عنيا عشان اقدر اتوازن ، فتحت لقيت نفسي قاعد على الكرسي بتاعي ، ايه دا ، هو دا حقيقة ولا بحلم ، روحت بصيت في المراية ، انا رجعت بيتي تاني ، نزلت تحت 

صباح الخير يا حازم بيه

= حازم!! ، انا حازم ، انا رجعت تاني

احضرلك الفطار 

= أنتي فاطمة صح

اه يا حازم بيه ، انا فاطمة 

= و انا حازم 

" لقيتها بتضحك ، بالمناسبة فاطمة تبقا مديرة البيت ، مشيت بسرعة ، خرجت برا في الجنينة ، لقيت ايه دا ، الشيخ ، جريت عليه بسرعة 

انت جيت هنا ازاي

" كان بيبص ومبتسم

= اتمنى تكون اتعلمت

هو ايه اللي حصل بقا

= ربنا كان عايزك ترجع عن افعالك ، حطك في اختبار صعب عشان يعلمك 

و امي و ابويا و امل

= كل دول كانو مساعدين ليك عشان تقدر تتغير

و ابراهيم

= الشيطان اللي بيغويك في السكة الغلط ، ولما كنت تمشي وراه ، كانو المساعدين بتوعك بيختفو

وبعدين

= انت فضلت مكمل في الطريق الغلط و ماشي وراه وبالتالي خسرت امك و ابوك و امل ولما فوقت و رفضت تمشي وراه ، رجعت تاني ل حياتك

طب ولو كنت وافقت في المرة الأخيرة

= يبقا مكنتش هترجع هنا خالص

وانت ، انت مين

= مجرد دليل عشان ينصحك

" حكاية ولا في الاحلام ، اتغيرت وبقيت واحد تاني ، باصص للحياه بنظرة مختلفة جدا عن حازم الحديدي ، بقيت حمزة ، فهمت الدرس ، روحت ل الأمن اديته مكافئة ، كان مستغرب جدا

مالك مستغرب ليه

= اصل عمرك ما كلمت حد فينا ولا اديت مكافئات

من النهاردة هيكون فيه بس للي يشتغل بجد

" نظرة الفرح اللي كانت في عينه متتوصفش ، رجعت البيت ، لكن شوفت حاجة غريبة ، امل

امل ، وحشتيني اوي

= امل مين حضرتك

انتي امل

= انا اسمي فرح

" كفاية مفاجآت بقا ، انا زهقت ، لقيت فاطمة جاية بتجري 

انا اسفة يا حازم بيه ، دي فرح بنتي جبتها معايا النهاردة عشان  تساعدني اصل انا تعبانة شوية

= ولا يهمك ، ممكن تاخدي اجازة لو عايزة

بجد ، شكرا جدا يا حازم بيه

" مكنتش باصص ليها ، انا تايه في عيون فرح ، قربت منها

ممكن تيجي معايا

= ااجي فين

هوريكي حاجة صغيرة

= ايه

حارة بسيطة كدا

= حارة ايه

تعالي وهنشوفها سوا ، مالك أنتي خايفة ولا ايه

= خايفة من ايه ، هو انا حد يعرف يقربلي ، دا انا كنت قطعت الشبشب عليه

شبشب!!!

= اه شبشب

والله انا شكلي كدا حبيتك

" بقا انا حازم الحديدي اتجوز واحدة تقولي شبشب ، بس اتجوزتها عادي والله ، فرح وهي فعلا فرح ، ياريت تكون اتعلمت حاجة من قصتي ، مش لازم درس عشان تتعلم ، كل فترة حاول تبص على اللي انت مش شايفه لانك اكيد هتلاقي حاجات كتير فايتاك 💛 " 

                      تمت