رواية بت عز الفصل الرابع4والاخيربقلم سبا النيل
مجرد ما سمعت كلمة مبروك يا عريسنا راسي شطب .. بقيت واقف بفكر نسمة دي قصدها شنو ، هي قالت كدة ولا انا الما سمعتها كويس ؟ .. لمن شافتني ما رديت بقت تنادي فيني وتقولي ، الو ! عماد انت معاي؟ ، عماااد .. انتبهت ليها وقلت ليها اي يا نسمة قلتي شنو ؟ .. قالت لي انت شارد وين ، قلت ليك مبروك البت وافقت .. حسيت بضربات قلبي حرفيا .. قلت ليها البت؟ .. البت منو قصدك .. سكتت ثواني وقالت لي لينا يا عماد ، مش انت اتقدمت ليها ولا انا غلطانة .. جاني صوت ابوي بعد ما شال منها التلفون وقالي الو يا ولدي ، ابو البت دق علي قبل شوية وقالي البت موافقة .. قال لازم نتلاقى عشان نحدد معاد الخطوبة والعرس .. سكتت شوية بحاول اركب الكلام في راسي وحسيت انو ابوي بتكلم اسرع من سرعة استوعابي في اللحظة دي .. قلت ليهو لحظة لحظة بس يا ابوي يعني انا اسي ا، اعمل شنو .. ضحك ضحكة خفيفة وقالي انت بس خلص شغل وتعال بنتفاهم .. قفل وانا وقفت مكاني دقايق وانا بستوعب في الحصل دة .. بعد شوية اتحركت واول حاجة عملتها كانت سجدة شكر .. الفرحة الكنت حاسي بيها حسيت انها ما تستاهل الا سجدة شكر لله عز وجل .. طول اليوم وانا بحاول اواصل شغلي طبيعي بس بين كل لحظة والتانية ببتسم لا اراديا من الضرس للضرس البدخل الورشة كلو بقولي ربنا يديم الضحكة .. ما صدقت متين خلصت شغل قفلت الورشة هوا ومشيت البيت .. الظاهر انو ما انا براي الفرحان .. امي وابوي ونسمة .. قدرت اشوف نظرات الفرح في عيونهم ..
بعد رقنا شوية قعدت مع ابوي .. قالي نمشي الجمعة الجاية عشان نحدد مع الجماعة موعد الخطوبة والعرس .. قلت ليهو خير ، .. قالي ح نجيب ليك عفشك من البيت الكبير لي بيتك وشوف لو عندك حاجة عايز تغيرها فيهو ولا لا .. سكتت شوية بفكر .. هو فهمني وقالي البت لو ما عايزاك بالجد بعيدا عن كل الاوضاع ما كان وافقت عليك .. ومن مكاني دة بقوليك ما تقصر معاها ابدا .. اتعب عشانها ونحن وراك .. انت ما قصرت معانا يا ولدي وعلى طول مفرحنا ورضيانين عنك وجا الوقت التفرح فيهو انت .. قلت ليهو يا ابوي انا فرحتي من فرحتكم انتو .. قالي بالمناسبة دي امك عايزة تفرحك .. رفعت راسي لمن امي جات وهي شايلة في يدها شنطة انا عارفها كويسة .. قعدت وقالت لي الدهب دة انا خاتاهو ليوم سعدك .. عارفاك ح تكون نسيتو لكن انا لسة محتفظة بيهو .. شيلو يا ولدي وبيع العايز تبيعو وخلي منو العايز تخليهو للبنية .. .. ما عارف امي دي اجازيها كيف والله .. بتذكر زمان بين كل فترة والتانية زمن الدهب كان بتجاب بالهين كانت بتجي داخلة بي كم غويشة ، وكم عقد .. وكم خاتم .. كل ما تسمح ليها الفرصة كانت بتلمهم وتقولي دة لي يوم تبقا عريس .. قمت على حيلي بستها في راسها ويدينها وابوي نفس الحاجة وانا حاسي انو ربنا موفقني في الخطوة دي ..
صباح الجمعة مشينا لي ابو لينا وجهزنا الحاجات الح نوديها و شلناها ووصلناهم .. رحب بينا بي بشاشة وضيفنا وجات مرتو سلمت علينا وبقينا نتونس .. رغم اني شايف الرضا في نظرات ابوها بس كنت برضو شايف نظرات ضيق في عيون امها .. حاولت ما اركز كتير وحددنا معاهم المواعيد بس كان شرط ابوها انها تتخرج وتستلم شهادتها .. هي حاليا خريجة باقي ليها تلاتة شهور واتفقنا الخطوبة بعد التخرج وبعدها العرس .. طبعا طوال القعدة خيالها ساي ما شفتو .. لمن قمنا ماشين ابوها وقفني وقالي عايزك في كلمتين .. قلت لي امي وابوي يمشو وانا بلحقهم .. قعدنا وقعد قصادي وابتسم .. الابتسامة شوية طمنتني رغم اني اتوترت في البداية .. قلت ليهو اتفضل يا عمي .. قالي شوف يا ولدي انا عندي حاجتين بس عايز اقولهم ليك عشان انت تتصرف .. سكتت شوية وقلت ليهو سامعك .. قالي اول حاجة انا ما كنت متوقع لينا توافق عليك سبحان الله لانها كانت رافضة فكرة الزواج في الفترة دي اساسا .. يعني كمية كبيرة اتقدمو ليها وكانت بترفض بإستمرار لم انا شلت هم انها توافق على زول في المستقبل .. بس المرة دي مجرد ما نطقت اسمك شفت الموافقة في عيونها قبل ما تنطقها .. ما اكذب عليك شكيت انو بيناتكم معرفة سابقة بس شكوكي اتلاشت لمن عرفت انت منو وقاري شنو وشغال شنو وعلاقتك بالناس كيف .. ومع انو نحن جيران وانا كنت حاضر مصيبة لكل ولد في الحي دة بس لمن كانو هم بيعملو في المصايب في سن المراهقة انت كنت شغال في السوق وبتقرا في الجامعة .. عشان كدة انا متطمن من ناحيتك كتير يا ولدي .. بس امها عندها اعتراض بسيط طبعا دة من خوفها على بتها ودي الحاجة العايزك تعرفها .. ضحك وقالي طبعا هي مع الزمن ح تقتنع انت بس طبل ليها هي بتحب التطبيل وزولة طيبه على قدها يعني لو جبت للبت حاجة ليها هي وامها اكتب في الكرت "الى امها وامي ، السيدة العظيمة صاحبة القلب الطيب " وكلام بالشكل دة وصدقني ح تتقبلك مع الزمن ويمكن قبل العرس زاتو .. ضحكت وقلت ليهو إن شاء الله .. ما عايز عرس بتها يمر وهي ما راضية .. قالي الله ينور عليك ...
كمل وقال وتاني شي .. على حسب علمي انت شغال في ورشة كهربا صاح ؟ .. قلت ليهو ايوا صح .. قالي الورشة ملكك انت ؟ .. قلت ليهو اي .. قالي بسس جات معاي حلوة دي .. استغربت وقلت ليهو كيف يعني .. قالي انا عندي مشروع بتاع قطع غيار عربات وما لقيت لي نقطة بيع مناسبة .. ف رايك شنو لو نعدل في الورشة بتاعتك ونعملها ورشة ومحل قطع غيار كلها مستوردة وطبعا انت ليك حقك وربحك واوعى تقولي لا .. سكتت شوية .. كنت عارف بالحركة دي عايز يتطمن على بتو معاي بطريقة غير مباشرة .. عايز يحسن من وضعي عشان يحسن من وضع بتو معاي بدون ما يحسسني .. سكتت مسافة .. شكلو عرف اني فهمتو وقالي قلب الابو يا ولدي .. اخدت نفس وابتسمت وقلت ليهو خير يا عمي انا ما عندي مشكلة .. ابتسم ابتسامة كبيرة وقالي الله يرضا عليك ...
بديت في الفترة دي اجهز في البيت .. اتصلت على واحد صحبي شديد اسمو علي هو شغال موزع لي شركات مختلفة .. طلبت منو نتلاقى وفعلا جاني على طول .. سلم علي سلام حار وبارك لي .. قعدنا واتونسنا شوية وبعدها قلت ليهو ، انت يا علي عارف ليك محل سراميك ببيع وبشتغل بي سعر معقول .. سكت شوية وقالي محل سراميك ؟ .. قلت ليهو اي عايز ادق البيت سيراميك كلو .. قالي بيتك مش ؟ .. قلت ليهو اي .. قالي عرسك متين هو ؟ .. قلت بعد سبعة شهور .. سكت شوية كدة وفحأة استعدل وطلع ورقة وقلم وقالي شوف انت محتاج شنو للبيت وانا بسألك ليك منهم كلهم بأقل الاسعار .. ابتسمت وقلت ليهو بالجد؟ .. قالي اي والله قول وحتى لو لقيت بالتقسيط بكلمك .. قلت ليهو تكون ما قصرت يا صحبي .. بديت اقوليهو في الحاجات من غسالة وشاشة ومكيف ومراوح وتلاجة وستاير واثاثات البيت المختلفة .. بعد شوية سكت وعاين لي بإستغراب وقالي دة كلو عايز تجيبو دفعة واحدة ؟ .. ابتسمت وتكيت ضهري على الكرسي وقلت ليهو يا علي انا ما عايز حاجة تنقص .. عايز اعمل كل البقدر عليهو عشان الحاجة البحبها .. سكت شوية وطبق الورقة دخلها في جيبو ووقف على حيلو وابتسم وقالي ربنا يفتحها عليك يا اخوي ان شاء الله ح يكون كل شي جاهز .. وقفت سلمت عليهو وودعتو
.. خلال الاسبوع دة علي اتواصل لي مع ناس كويسين شديد واسعارهم كويسة جو اشتغلو لي السراميك في البيت .. سألتو من باقي الحاجات قالي اتواصلت ليك مع واحد عندو الاجهزة المنزلية دي كلها بأسعار حنينة وكمان ح يقسط ليك بس حاليا بضاعتو خلصت لكن بعد تلاتة شهور كدة ح تجي البضاعة الجديدة .. قلت ليهو تلاتة شهور ؟ .. يعني بعد الخطوبة بإذن الله؟ .. قالي اي انت في الفترة دي زبط امورك وخلي قروشك جاهزة وهو قال ما ح يقصر معاك بما انك عريس وكدة .. قلت ليهو ما قصرت والله يا علي .. قالي اخوي ياخ .. ..
مرت ايام واسابيع وشهور وانا واقف على رجل وساق .. سبحان الله .. تحس انو خطواتي ميسرة ميسرة بطريقة عجيبة .. وانا كل ما احس انها ماشة معاي تمام بدي سجدة شكر .. .. بعد فترة تخريج لينا خلصت واستخرجت شهادتها عملنا الخطوبة .. للصراحة اللحظة دي حسيتها كذب كذب .. مع انو دي الخطوبة ياداب .. انا حرفيا كل نص ساعة كانت بتعدي علي بعد الخطوبة دي كنت بدي الخاتم الفي يدي نظرة .. بحس اني باقي لي شوية بس .. بي انها مربوطة بي .. وكل ما اعاين للخاتم بتذكرها .. .. بعدها بأسبوع جاني اتصال من علي .. رديت عليهو وقلت ليهو كنت منتظر اتصالك .. قالي وين انت .. قلت ليهو في البيت .. قالي خلاص تعال بي غادي في بيتك وجيب معاك مفتاح الباب الكبير .. قلت ليهو الباب الكبير ؟ .. ليه .. قالي انت بس اسرع ارح انا والشباب منتظرنك .. قلت ليهو الشباب جو معاك ؟.. قالي عماد انجز يا شيخنا .. قلت ليهو وانا بقوم من السرير طيب طيب جايكم .. شلت مفتاح باب بيتي الكبير ومشيت ليهم .. وصلت ليهم وانا بعاين بإستغراب للشاحنة الواقفة قدام باب البيت .. لقيت علي واقف بتكلم بالتلفون وبعد خالص عاين لي وجاني سلم علي وقالي وينو المفتاح ؟ .. فتحت يدي وقلت ليهو هندا ، لكن دة شنو ؟ .. شال المفتاح من يدي وجو باقي الشباب سلمو علي .. علي اداهم المفتاح فتحو الباب على ضلفتين وفتحو الشاحنة وانا بسأل في علي وبقوليهو في شنو ودة شنو وهو كان بقولي اصبر اصبر .. شوية وبدو ينزلو في حاجات بي كراتينها وكانو عبارة عن تلاجة وشاشة .. مكيفين ومراوح وغسالة وستاير وجرادل بوماستك وطرابيز جديدة وكمية من الاواني المنزلية وانا بعاين ليهم متعجب شديد .. ختيت يدي في كتف علي وقلت ليهو دة شنو ؟ .. قالي دة سيدي هدية من الشباب كلهم ليك بمناسبة انك عريس .. عاينت ليهو بصدمة وقلت ليهو شنو ؟ .. قالي مالك مستغرب كدة بعيدة مننا ؟ .. قلت ليهو وانا بستوعب لالا ابدا بس دي حاجات كتيرة شديد و ، .. قاطعني وقالي يا اخوي انت ما بتقصر ووقفت معانا كلنا نفر نفر في المرة قبل الحلوة .. دي حاجة بسيطة مننا كلنا بتبين ليك معزتك عندنا .. ونحن حاليا لا طالبين شكر ولا اي حاجة كل الطالبنو منك تكون مبسوط وقعدة قهوة ظابطة كدة ... انا في اللحظة دي ما كنت قادر اوصف مقدار الفرحة الحسيت بيها .. لدرجة اني اتصمغت مكاني وانا بعاين ليهم واحد واحد وهم بنزلو في الحاجات وكل شوية يجو يسلمو علي ويشبكوني يا عريس ...
جهزت البيت كلو والحمدلله فيهو كل حاجة تقريبا ممكن تحتاجها لينة قلبي .. زبطت الشغل مع ابوها والورشة بقت عامرة اكتر من اول .. جبت ليها حاجاتها وشنطتها وهدايا كتيرة ليها ولي امها وكمان لي ابوها .. جهزت كروت الدعوة .. حجزت الصالة .. وعملنا العرس .. ايوة عملنا العرس .. كنت "فرحان" .. وشديد كمان .. يعني كل ما اعاين ليها بشوفها وكأنها اكبر انتصاراتي .. الجهد البزلتو تجاهها كلو عوضتني بيهو .. انا ما قادر اوصفها بكلمة والله .. كنت شايفها رهيبة شديد .. بس لمن عاشرتها فترة طويلة اكتشفت انها اكتر من رهيبة ... من اول سنة زواج لينا ولغاية الان .. رهيبة .. كانت بشوشة دايما دايما بشوشة .. يعني لو داخل البيت وانا زهجان وشفت وشها ساي مزاجي بتغير .. زولة من ما عرفتها ولغاية اللحظة بترضى بالقليل .. ما حسسنتي ابدا اني مقصر معاها في حاجة .. كنت بشوف الحب في عيونها كل يوم .. كل يوم حرفيا لدرجة خلتني اشك انها بتحبني من بدررري ويمكن من قبليني كمان .. كل يوم بكتشف فيها حاجة جديدة .. بس اعظم حاجة اكتشفتها فيها انها انسانة بسيطة .. انسانة مُريحة .. انا حرفيا ما طالب منها حاجة غير انها تكون مبسوطة .. بس هي بتعمل اكتر من واجباتها بكتير .. تستقبلني لمن ارجع .. تجهز لي الحمام .. تجهز لي ملابسي .. بتسرح لي شعري ، بتميز لي اكلي .. محترمة امي وابوي واختي .. بتحاول تحسسني كل يوم قدر شنو هي بتحبني وقدر شنو هي فرحانة بي .. وانا من يوم ما اتزوجتها ما وقفت من سجدات الشكر .. كنت بحاول ما اقصر منها في حاجة .. كنت مدلعها شديد .. ما عشان شي .. بس عشان هي بتستاهل .. كل حاجة كبيرة كانت او صغيرة اتنازلت عنها عشان تكون معاي رفعتها بيها درجة في قلبي .. والحاجة النجحت انها تعملها بإتقان شديد اني خلتني احبها بعد اتزوجنا اكتر مما كنا قبل الزواج .. من ناحية هي بت عز .. فهي فعلا بت عِز واصول ..
انا بقول في كلامي دة حاليا وانا عندي اربعة عيال .. بتين وولدين ماشاء الله تبارك الرحمن سويين ، محترمين بعضهم .. محترمين اهل امهم واهل ابوهم .. قدرت تربيهم احسن تربية .. الصراحة قدرت تربينا كلنا على حاجة واحدة عظيمة وبتخلينا دايما في حالة نفسية سوية .. قدرت تربينا على البساطة .. ودي بحالها عايزة ليها سجدة ..
تمت