رواية خذ بيدي الفصل السابع7والاخيربقلم سبا النيل
صلوا على النبي..
امي عاينت لي بتفاجؤ وقالت لي "شنو"؟.
قلت ليها "أنا عايز اتزوج فاطمة"، قبلت على ابوي وقلت ليهو "ولا رايك شنو يا ابوي"؟..
ابوي سكت ثواني قبل ما يقول " والله الرأي رايك يا ولدي الحياة حياتك انت البتعيشها ما نحن".
امي مسكت يدي تلفتني عليها وقالت لي بهدوء "احمد يا ولدي، فاطمة زولة ما شاء الله عليها وانا ما بقوليك فيها عيب أو حاجة ما فيها لانو ربنا بحاسبني، لكن يا ولدي هي اتزوجت قبل كدة وفوق لدة عندها ولد وانت ياداب يعني اول زواج ليك والموضوع ده ما راكب".
اتصلحت في قعدتي ومسكت يدها الكانت فوق يدي وقلت لها " يمه انا ما فارقة معاي متزوجة قبل كدة أو لا دي قلها أقسام من ربنا وبالنسبة "لنادر" ف انا معتبرو زي ولدي والله ويعز علي شديد، ما بقدر اتطمن عليهم مع أي زول تاني وتاني بيانو عين اصلا ح اشوف نادر لو هي اتزوجت زول غيري، يمه الحاجات دي سطحيات الليلة انا لو معرس ومطلق وعندي ولد وقلت عايز اعرس لي واحدة اول مرة تعرس بي صدق كدة ح يكون عندك مانع؟".
سكتت مسافة بتعاين لي وبعدين حركت رأسها بي نفي، ضغطت على يدها وقلت ليها طيب يا يمه حلال علي وحرام عليها؟.. قالت لي بنبرة مُبررة "لكن يا ولدي المرا ما زي الراجل".. قلت ليها: "يمه ده كلام دنيا والله العظيم، وبعدين ربنا قال "وليس الذكر كالأنثى" ما قال المرا ما زي الراجل، الآية دي يا يمه ما تفضيل وانما بتبرز الفروقات بين الراجل والمرا البتخليهم يوازنو حياتهم، ماف واحد فيهم كامل إنما بتلاقو عشان يكملو بعض، الراجل بقوامتو على المرا يعني يكون قايم بكل واجباتو تجاها ياهو من توفير سكن شرعي لتوفير الرعاية والاكل والشراب والعلاج وغيرو وغيرو، اما واجبات المرا مختلفة لأنها بتقوم على الطاعة والتخفيف على زوجها وهي تعتبر دفا البيت وكل الحاجات البينهم دي قايمة على المودة والرحمة، عشان كدة المرا ما صلبة زي الراجل ودي ميزة عندو والراجل كمام ما لين زي المرا ودي ميزها عندها، المرا في حياتها بتحتاج للقوة والصلابة وبتلقاها في راجلها والراجل بيحتاج للعطف واللين وبيلقاهو في مرتو وكدة الاتنين بكملو بعض ومادام الصفات دي متوفرة ما فرقت ارملة من مطلقة أو أرمل من مطلق الدين ده أدى فرص للاثنين عشان يعيشو ويباشرو حياتهم عادي لانو الدنيا دي مستمرة وما بتقيف على زول، كلها أقسام يمه حتى الأنبياء اتزوجو أرامل ومطلقات واقرب مثال النبي صل الله عليه وسلم اتزوج امنا سودة بنت زمعة وكانت ارملة، وحفضة بنت عمر وأم سلمة وزينب بنت خزيمة كلهم كانو أرامل ومنهم مطلقات فالعقدة دي فينا نحن ديل اذا كان ربنا بجلالة قدرو خلا الحرية للانسان يواصل او يقيف ويختار البرضيهو وبيرضي ربو وتلقينا نحن عندنا فيهو رأي فمعناها العقدة فينا نحن ديل".
سكتت مسافة بتحرك رأسها بإيجاب وقالت لي "كلامك صاح يا احمد يا ولدي لكن كلام الناس"..
قلت ليها "كان على كلام الناس كلام الناس يمه لا بجيب ولا بودي والناس كدة كدة ح يتكلمو عشان كدة بقولو ليك "رِضى الناس غاية لا تُدرك"، لو انتي راضيتي ده ما ح ترضي داك ولو داك رضى في واحد تاني ما ح يرضى عشان كده عليك الله يمه خلينا من الناس وشوفي بس راحة ولدك وين وخلي الناس يتكلمو من هنا ليوم القيامة انا ما بهمني مدام انا مرتاح وانتي وابوي راضيين عني وانا والله ما بعمل حاجة بدون مشورتكم ورضاكم فخلونا نكون منطقيين جدا وننسى الناس وكلامهم وقوالتهم في اللحظة دي".
اخدت ليها سكتة تاني مساااافة لدرجة ابوي قالي يا ود اهبش امك دي ما تكون نامت.. امي عاينت ليهو ورجعت عاينت لي وقالت لي خير يا ولدي البريحك". قلت ليها البريحك انتي يمه".. قالت لي راحتي من راحتك يا ولدي، اتوكل على الله وان شاء الله ربنا يكتب ليك الفيهو الخير، لكن قبل كل حاجة انا عايزة اعرف فاطمة دي أهلها ليه اتخلو عنها، يعني أهل راجلها ديل عرفناهم القروش والمشاكل وغيرو،يب أهلها ديل سببهم شنو؟، مفروض يقيفو مع بتهم مش يخلوها بتحارب في الدنيا دي مع ولدها براها.
ضحكت وقلت ليها انا سبقتك في الحتة دي وسألت من الموضوع ده لانو الاهل ديل ما بتخلز عن الواحد الا لو كان عامل حاجة كبيرة".. قالت لي عرفت كيف والوراك منو؟.. قلت ليها في واحدة كدة كان اصلا حكت لي عن وضع فاطمة دة ف انا مشيت استفسرت منها اكتر.. ابوي مسد بي يدو على دقني وقالي "وطيب قالت ليك شنو؟".. قلت ليهم "قالت انو فاطمة زوجها كان وضعو ما تمام شديد يعني وضعو المالي كان صعب شديد قبل ما يتوفى وقالت انهم رغم أنها في الفترة ديك كانت بتعاني مع ولدها لكن وقفت وصبرت معاهو لغاية ما وضعو اتحسن شوية وتاني رجع اتدهور، أها أهلها على حسب قولها والله اعلم ناس صعبين، أخواتها المتزوجات كلهم كان وضعهم فوق الممتاز الا هي ف أهلها بدو يلمحون ليها شوية شوية لأنها تنفصل من زوجها"..
امي رفعت حواجبها بإستغراب وقالت لي "معقولة؟".. حركت راسي بإيجاب وواصلت وقلت " هي شوية شوية بدت تفهم تلميحاتهم دي وبقت تخفف زياراتها ليهم لغاية ما جابوها ليها بالواااضحة وقالو ليها تتطلقي من الراجل وتجي تعيشي في بيتك معززة مكرمة، طبعا هي رفضت ورفض شديد خلاص وقالت إنها قعدت معاهو في الحلوة ما تقعد معاهو في المُرة؟"... "استمر الوضع على الحالة دي لغاية ما أهلها تاني ضغطو عليها وقالو ليها يا تخليها يسجل البيت بإسمك يا يطلقك، هنا هي اكتفت ووقفت زيارة من بيت أهلها فترة عسى ولعل ربنا يهديهم عشان تتفاجأ انو الكلام وصل راجلها وهو حب يحسم الموضوع ف مشى سجل البيت بإسمها رغم رفضها بس هو كان مقدر صبرها معاهو وكأن متأكد انها ما ح تخليها بسبب ظروف زي دي، وفعلا ده الحصل وافتكرت انهم ارتاحو من نقنقة أهلها بس بعد كم شهر رجعو بموضوع الطلاق من جديد يا إما الطلاق يا إما رضاهم ف هم خلوها تخت خيارين ما بيرضو ربنا وفضلت مع زوجها وبسبب الحاجة دي أهلها قطعو صلتهم معاها وحتى في وفاة زوجها ما وصلوها".
امي ختت يدها على قلبها وقالت لا حول ولا قوة الا بالله، معقولة في ناس كدة؟".. ابوي قاليها اصابع اليد دي ما واحدة يا سنية وانا الفدامك دة شفت الاكعب من كدة.. قالت ليهو "ربنا يهديهم ويصلح بينهم لكن دمي ولحمي ما برميهو كدة والله".. قلت ليها " ربنا يهدي الجميع، المهم انتي يمه كلمي لي فاطمة عليك الله شوفي رأيها شنو واعصري عليها شوية وان شاءالله لو ربنا وقف نمشي نتقدم رسمي لاهلها".. عاينت لي شوية وقالت لي "أهلها؟".. قلت ليهو "الأصول اصول، نصلهم اول شي وتاني اي شي تاني يحصل بتصرف أن شاءالله"..
بعد اسبوع من كلامنا دة امي مشت كلمت فاطمة وزي ما كنت متوقع فاطمة شكرتني ليها كتير بس في الاخر رفضت، قلت لأمي حاولي معاها ما توقفي وفعلًا امي كلمتها كم مرة وهي لسة ثابتة على رأيها ف اضطريت في المرة الأخيرة امشي مع ناس امي عشان اقعد معاها بنفسي.. خليتها كانت عازمة ناس امي فطور فهم شالو فطورهم ومشيت معاهم وهي اتفاجئت لما لقتني جيت ف طلبت منها نتكلم.. كان عندهم شجرة نيم في الحوش ف جابت كرسيين وطربيزة ضيفيني بي موية وعصير ف قلت ليها اقعدي عايز اتكلم معاك.. قعدت بتوتر وبقت بتعاين مرة لناس امي القاعدين مع نادر في العريشة ومرة بتعاين في الارض ف حبيت اكسر التوتر وقلت ليها لسة ما سجلتي نادر في المدرسة؟.. حركت راسها بنفي وقالت لي لسة صغير باقي ليهو سنة في الروضة..
قلت ليها كويس، سكتت ثواني وبعدها قلت ليها " ليه رافضة موضوع الزواج دة، فيني عيب ولا حاجة لا سمح الله".. ردت بتردد وقالت لي "ابدا والله ما فيك اي عيب لكن يعني وضعي من وضعك بيفرق وما بيسمح بموضوع زي ده".. عقدت حواجبي بإستغراب وقلت ليها ياتو وضع قصدك؟.. عاينت اتجاه العريشة لولدها وقالت لي "أنا كنت متزوجة قبل كدة وكمان عندي ولد، وانت دي اول مرة تتزوج، المجتمع ما بيرضى بي فكرة زي دي".. غمضت عيوني وزفرت بي ضيق وقلت ليها حريقة في المجتمع يا فاطمة المجتمع دة عامل شنو غير مصعبها علينا".. اتنهدت بهدوء وقالت لي "احمد الموضوع دة خالص عندي، انا لو وافقت بالزواج ده ح اكون بظلمك وانت تستاهل الأحسن والله لكن م.. .." قاطعتها وقلت ليها "فاطمة لا اله الا الله"..
سكتت شوية وقالت لي "محمد رسول الله"..
قلت ليها " أنا راجل فاهم وواعي وعارف نفسي بعمل في شنو وعارف الاحتمالات الممكنة بعدين وعارف الأحسن لي شنو وما بعمل خطوة ساي، انا لمن جيتك انتي كنت حاسم قراري وما كلام البسوا والما بسوا بقدر يغير قراري دة ولا يأثر عليهو لاني واعي كويس للبعمل فيهو، لا زول لعب لا زول فارغة والعايزو دة انا جيتو عديل ووضعك الانتي بتتكلمي عنو دة انا متقبلو وما بفرق معاي ومستحيل في يوم اعايرك بيهو وانا بشوف دي ما حركة رجال، اسي انا دحين بكلمك كلمة زول ما عندو حاجة لكلام اي زول وبقوليك انا جاي هنا عايزك على سنة الله ورسوله وما بهمني اي شي تاني انتي معترفة بي سببو، ونادر دة زي ولدي غالي علي وان شاءالله ربنا يقدرني واشيلو جوة عيوني ولو ربنا قسم لي بأولاد ح يكون زيو زيهم واحد، دة الكلام كدة بكل ما فيهو وبالمختصر، انتي اختي وقتك وفكري وامي بتجيك بعد اسبوع تسمع رايك"..
بقت ساكتة وما قالت اي كلمة، وقفت على حيلي ووقفت وراي ف قلت ليها يلا السلام عليكم".. طلعت بعد ما أصرت اقعد وافطر بس انا رفضت بحكم انو الشغل راجيني.. اخدت هي بعدها فترة الاسبوع الالتهاب ليها وانا بدعي انو ربنا يكتب لي الفيهو الخير لغاية ما امي مشت تشرب معاها قهوة في اليوم المحدد ولمن جات بلغتني بموافقتها وفي اللحظة دي حسيت انو الدنيا ابدا ابدا ما سايعاني وحمدت ربنا انو وفقني وسهل لي وجبر بخاطري ولانو كلو كان لله فهو يسرها لي بطريقة ما كنت ابدًا متوقعها.
" بعد خمسة اعوام ":
يوم الجمعة بعد المغرب، كنت بتجهز عشان طالعين بعد صلاة العشا ماشين نجيب حاجات المدرسة للعام الدراسي الجديد للاولاد، لبست الجلابية والشبشب وطلعت الصالة لقيت فاطمة بتلبس في دة وتمسح في دة وهي لسة ما جهزت.. قلت ليها فاطمة خليهم انا بجهزهم انتي امشي اجهزي عشان ما نتاخر، وقفت بسرعة وقالت لي الله جابك، انا لبست نسمة بس لبسها الشرابات دي".. قلت ليها كويس، يلا استعجلي.. جيت مسكت قميص نزار وقلت ليهو نزار تعال البس اختفيت وين اسي ما كنت هنا، جاني طالع من جوة اتاريهو اتسحب ومشى ورا امو، لبستو القميص وقلت ليهو امشي جيب جزمتك".. شلت شرابات نسمة وشغالتها شوية وهي راقدة قعدت تضحك وهي ما فاهمة حاجة من البقولو، مسكت شراباتها الصغيرونة عايز البسهم ليها قبضهم مني نادر وقالي ابوي انا بلبسها عليك الله عليك الله، ضحكت وقلت ليهو سمح لكن ما تلبسهم ليها بالمقلوب".. قالي حاضر حاضر"..
قمت خليهو بلبس فيها ومشيت على نزار الاتخر جوة لقيتو قعد يحضر وحاضر الجزمة، رفعتو زي ما هو وطلعت بيهو برا وبقيت بلبس فيهو وبعدها عاينت لنادر وقلت ليهو تعال البسك بنطلونك ده، جاني ولبست البنطلون وشوية وجات فاطمة طالعة كانت جهزت ولبست نقابها لأنها اتنقبت بعد سنتين من زواجنا، بتذكر الفترة الاولى من زواجنا طبعا ما سلمنا من القال والقيل، انا الكلام ما فارق معاي كتير بس طبعا فاطمة كانت بتتاثر وانا عارف المرا عموما حساسة ف اضطريت اني اسوقهم وارحل لمنطقة تانية، في البداية سكننا إيجار وبعد اول سنة واول ولادة ليها بي نزار ربنا فتحها علي من أوسع ابوابو واشتريت البيت دة واستقرينا فيهو، حياتنا كانت مستقرة جدًا وكانت نعم الزوجة، أهلها لسة علاقتها معاهم متوترة بس احسن من الاول، كنت بحاول كتير أصلح العلاقات بينهم والحمدلله مع الاصرار بدت تظهر نتايج..
جات شالت نسمة وانا شلت مفتاحي وسقت نادر ونزار من يدهم وطلعنا على السوق جبنا ليها مستلزمات المدرسة من الألف للماء بحمدالله طبعا جرجرة ووقوف وعزل وايييك، بعد ما خلصنا وديتهم لمحل حلويات قريب كنا بنمشي ليهو كل جمعة المسا بحكم انو شغلي بكون بالصباح ويوم الجمعة برامجها ما بتخلص الا المسا، قعدنا الجو كان ظابط اكلنا باسطة وايسكريم واتونسنا ولعبت الاولاد في لعبات المحل واخدنا قعدتنا وغيرنا جو ورجعت البيت اب واحد نايم بإتاجه، كانت حياة عبارة عن نعمة، حياة بسيطة وما معقدة وماشة بستر ربنا وتوفيقو، البساطة العايشنها من أكبر النعم الممكن الإنسان يحظى بيها، وفي آخر المطاف لا عاينت لفلان قال ولا لعلان قال لانو فلان وعلان ما منهم عمار غير خراب البيوت، القسم لي ربنا انا راضي بيهو وراضي بيهو شديد كمان والحمدلله.
~~~~~~~~
والله لو صاحب الإنسان جبريلا
لن يسلم المرء من قال!، ومن قيل.
قد قيل في الله أقوال مدبجةُُ
تُتلى اذا رُتل القرآن ترتيلا.
قيل بأن له ولدًا وصاحبة،
جورًا عليه، وبهتانًا، وتضليلا.
هذي مقولتهم، في الله خالقهم!،
فكيف إن قيل فينا بعض الذي قيل؟. ♡🦋..
تمت