حسيت اني حبيت ابوبكر ما عارفه سبب حبي ليهو شنو احتمال عشان حنين علي في زمن كنت محتاجه فيهو حنيه اهلي وجا هو شال كل مشاعري ولا احتمال عشان م عشت مراهقتي وم حبيت ولا عملت علاقات حتي زواجي كان ما مفهوم وقدر الايام العشتههم مع محمد ما فاتت ال١٥يوم رغم اني بديت اتعلق بيهو بس م حبيتو احساسي اتجاه ابوبكر مختلف تماما هو مهتم بي شديد بس م حاول اتعدا حدودو معاي ولا حتي في يوم قال لي انا بحبك بس بحس اهتمامو وغيرتو علي م طبيعيه بس كنت لمن اتزكر كلام ابوهو بطني بتطم لانو خاطبين ليهو بت عمو من هي طفله ودي عاداتهم وتقاليدهم هم شكريه ابوهو كان بحترمني شديد ما شفت منو شين كان بعاملني زي بتو وكان بوصيني شديد علي نفسي وعلي ابوبكر وعرفت منهم انهم هم ساكنين مع عذابه وبيتهم ف الجزيره في قري من قري تمبول قررت اني اشتغل لاني كنت في حوجه للشغل
في يوم بعد خلصت المدرسه ابوبكر لقيتو واقف لي جنب الباب وكانن معاي صحباتي لمن شفتو فرحت شديد وكنت بحس صحباتي لمن اشوفونا مع بعض بضايقو شديد بس م ركزت معاهم شديد سلمت عليهو وبدا يسال فيني ويطمئن علي ولمن يسالني ولا يطمئن علي بحسو ملهوف لي ردي والشي المحيرني انو نهاي م عبر لي عن مشاعرو قلت ليهو بكري انا ماشه افتش شغل قال لي نوسه انا عارف القروش البديك ليهم ابوي م بكفنك بس والله يا نوسه الظروف وهناك اخواتي ف المدارس وامي عاوزه توضع قلت ليهو م شاء الله ربنا احلها بالسلامه قلت ليهو العفو ي بكري ابوك م مقصر مني وعشان الظروف دي انا عايزه اعتمد علي نفسي واشتغل حسيتو اضايق قال لي نوسه لا مابخليك تشتغلي ولا تطلعي شبر من البيت قلت ليهو بكري عليك الله يابكري خليني انتو ما دايمين لي قال لي انا دايم ليك ي نوسه عاينت ليهو ودموعي جرت قال لي نوسه مالك انا قلت حاجه غلط ماتفهميني غلط انا بحترمك شديد ي نوسه وانتي عارفه كده قلت ليهو عارفه ي بكري بس انت ذنبك شنو تدوم لي عندك حياتك وح يكون عندك بيتك واولادك قال لي انتي برضو حياتي قلت ليهو بكري انت لسه صغير والدنيا قدامك انا زوله مريضه واكبر منك ماتركز معاي زعل مني وما اتناقش معاي دخلني الداخليه وقال لي نوسه م تطلعي لو احتجتي لحاجه تعالي لينا ف المكان والمساء تعالي نقرا قلت ليهو تمام دخلت الغرفه ولقيت البت مافي كنت مضايقه العبره خانقاني قفلت الغرفه وبقيت ابكي وابكي وصوتي عالي والبنات الفي الغرف التانيه اطقو لي ف الباب والحاله جاتني وساعتين حتي وعيتت فتحت الباب ووقعتا البنات بقو يكوركو واظنو بكري جا يسوقني جا جاري وبكل لهفه شالني وبقا جاري بي وقف رقشه ووداني الدكتور وانا كنت سامعه دقات قلبو وكنت بتوجع من جواي وصلنا المستشفى وركبو لي دربات وظهرت عندي ملاريا جاب لي كل العلاجات وجاب لي عصير وبقا يسقي فيني حنيت بكري انا ما شفتها معقوله انا الدنيا ضحكت لي لدرجه انها وقعتني في بكري وبقيت احبو وادمنتو عديل مابقدر انوم لو ما شفتو نساني الدنيا ونساني اي شي
في يوم قررت اني اشتري تلفون عشان عايزه اعرف اخبار اهلي من غير ما يعرفوني اني دي انا وطلبت من بكري اني اشتغل واترجيتو وطبعا ورفض و انا م بعرف لي شي غير اني اشتغل انظف قلت امش للمدير واشرح ليها حالتي واطلب منو يشغلني عامله نظافه نهايه اليوم وافق عشان ظرفي انبسطت شديد وحاولت اكذب علي بكري قلت ليهو تاني ماتجي تسوقني البنات كلمن المدير وقال لي الولد دا لو جاك تاني انا برفدك قال لي يرفدك ليه يا نوسه نحنا م عملنا شي غلط انا م بقدر اخليك براك والاولاد كلهم بعاينو ليك قلت ليهو نحنا زاتو عندنا معسكر بنطلع متأخرين يعني الاولاد زاتهم ما ح يشوفوني المهم اقنعتو وبقيت اخلص مزاكره وبعد انتهي ابدا نظافه في الفصول والمكاتب والمدرسين بكونو قداعين وبقو يحبوني شديد واي شي واقف علي بشرحوهو لي وكنت مبسوطه شديد وادوني قروش كويسه اشتريت لي تلفون وعملت صفحه ف الفيس باسم وهمي والفيس جاب لي ايلاف طوالي رسلت ليها طلب ومن خلال صفحتا صادقت محمد ود عمتي واخواتو كلهن واهلي كلهم في صفحه ايلاف ونص حلتنا من اولاد وبنات انا اضفتهم وقررت اني انشط صفحتي دي وأزيد المتابعين قلت انا كده كده فاضيه اقوم اكتب خواطر وقصص قصيره وكنت بميل اني اكتب قصص خياليه صعب انها تتعاش حقيقه وفي زمن بيسط قدرت اجمع متابعين وكانو كلهم نفسهم اشوفو الشخصيه الورا الشاشه بس قصدت اني م اظهر اي شي عني الحاجه العرفتها واتاثرت شديد ابوي جاتو جلطه حكيت لي بكري وبقا يهدي فيني قال لي ارح نمشي ليهم قلت ليهو لا اهلي حسو اني عايق في حياتهم انا م ح اظهر ليهم وادمر حياتهم خليني انا مرتاحه 😭
عشت ايام وداخله في شخصيه مستعاره ف الحقيقه وف الفيس وشخصيتي الحقيقيه اختفت تماما كنت مبسوطه اني قدرت اخفي شخصيتي الحقيقيه لانها كانت هاجس لي ولي اهلي ربنا ابتلاني بس مافي زول استحملني والحاله خفت مني وفي دكتور مره جابني بكري مضايقه ليهو وحكيت ليهو قصتي قال لي انتي زي اختي انا لا شعوريا فرحتا شديد قلت ليهو اختك كيف هسي قال لي اختي هسي تمام الحمد لله وبتدرس بره السودان قلت ليهو طيب ي دكتور اختك عالجتوها كيف قال لي انا بوصف ليك شيخ في قريه اسمها اربجي تمشي ليهو بقرا ليك قران الايام الاولي ح تتعبي شديد بس صدقيني ح تبقي كويسه قلت ليهو وصفو لي انا تعبت من حالتي دي انا عايزه اتعالج قال لي هاك دا رقمي خليني اصل البيت اتصل لي امي واستفسر من الشيخ وبكلمك قلت ليهو تمام مشينا من مكانا داك الدكان كلمنا عمي محمد قال لي انا بلتزم اني اوديك الشيخ دا قلت ليهو م بتقصر انا ما بتعبكم معاي كفايه وقفتكم جنبي دي براها بالدنيا قال لي لا ي بتي م تقولي كده انتي زي بتي والله وانا والله بفتش للاجر والله وقعك في طريقي شكرتو شديد
المساء اتصلت علي الدكتور وصف لي الشيخ مشيت كلمت عمي محمد قال لي بكره الجمعه نمشي ليهو قلت ليهو سمح
تاني يوم بدري ركبنا مواصلات الحصاحيصا ومشينا للشيخ وهو النوع البقرا قران ومابشيل مقابل دخلت ليهو وحكيت ليهو قصتي بقا يقرا لي شديد واظني اتغيرت وبقيت م واعيه والدنيا بقت ظلام بعد زمن حتي وعيت الشيخ قال لي شوفي ي بتي لا يعلم الغيب الا الله انا م ح اقول ليك كاتبك فلان ولا ساحرك فلان بس انتي من ناحيه مكتوبه مكتوبه ومن ناحيه مسحوره مسحوره انا بخفف ليك حالتك دي وانتي ساعديني انك تقري الاوراد دي يوميا ومع صلاه الصبح تقري سوره البقره ويس قلت ليهو طيب قال لي بأذن الله تبقي كويسه عمي محمد اداهو قروش بس الشيخ حلف ما يشيلن عرفنا انو الشيخ دا بعالج بالقران بدون مقابل وفرحت انو ربنا وقعني فيهو طلعنا منو وقال لي اقري القلتو ليك وتعالي الجمعه قلت ليهو ان شاء الله لمن طلعنا منو عمي محمد قال لي ايلاف دي منو يا بتي انا راسي بقا كبير قلت ليهو ايلاف انت بتعرفا من وين
الفصل العاشر
عمي محمد قال لي انتي ي نسيبه ايلاف دي منو قلت ليهو ايلااااااف قال لي اي قلت ليهو عرفتها من وين انت قال لي الشيخ لمن كان بقرا ليك كنتي بترددي اسمها طوالي انخلعتا خلعه قلت ليهو كيف يعني قال لي والله رددتيها كتير خلاص بقيت محتاره قلت ليهو يعني شنو الكلام دا ي عمي قال لي البت دي بتغير منك ولا حاسداك حكيت ليهو اني كنت متفوقه عليها قعد اضحك قال لي معناتا دي ضرتك قلت ليهو كيف قال لي كدي خلينا بعد نجي الجمعه الجايه انا بفتح الموضوع دا مع الشيخ ونشوف الكلام دا قلت ليهو سمح رجعنا مدني لقينا بكري مقلق علينا ودي اول مره كان اطلع فيها من عرفتهم بعد ابوهو دخل الدكان قال ليهو وصل نسيبه وتعال اعمل لينا اكل قلت ليهو عمي اديني النعملو انا قال لي لا لا ي بتي هنا الرجال بجو كتار ما صاح مني وان شاءالله ربنا يرزقك بود حلال تعرسي وتعزمينا يوم كامل معاك قلت ليهو ان شاءالله لقيت بكري بعاين لي وملامحو متغيره مشيت قدامو بخطوات قال لي نوسه وقفي وقفتا قال لي نوسه كلام ابوي جنني قلت ليهو ياتو قال لي م قادر اتخيل انك ح تتزوجي وح تفوتي مننا عاينت لي ملامح وشو وكان قلبو مقطوع قلت ليهو انا م ح اتزوج ي بكري اطمئن انا اتزوجت قبل كده استفدتا شنو الراجل جدعني وم وقف معاي الوقفه الوقفتوها معاي انت وابوك اهلي ولا راجلي ما وقفوها معاي وانا هسي م شايفه شي غير مستقبلي بالذات لمن عرفت سبب. مرضي قال لي مالك فشنو وسببك شنو حكيت ليهو بي تنافسي مع ايلاف وشكلها عملت لي شي بقا اتعوذ قال لي معقولة في ناس كده قلت ليهو للاسف دا مجتمع القري بالذات لمن اكونو في اتنين متنافسات بس لكن لدرجه اعملو لي حاجه م اتوقعتها انا كبرت ي بكري وكل يوم بكتشف خباثه الناس م كنت متخيلاها حتي صاحباتي كانو بقولو لي بتكرهك كنت بكذبهم عشان نيتي جوه بيضاء ودا كلو خليهو حكيت ليهو بمحمد ود عمتي الكان عايزني عرستو وسافرت ليهو قلبي انقطع ودموعي جرت بكري وقف جنبي واول مره يمد يدو لي قشا لي دموعي قال لي نوسه خلاص م تحكي ممكن انا م بحب اشوف دموعك قلت ليهو حاضر دخلني الداخليه وراسي داير ينفجر عرفت الحاله ح تجيني م عديت ثواني والا والحاله جاتني وبعد وعيت لقيت بنات الداخليه واقفات في وشي قعدت ابكي قدرتي وكل سؤال بسألوني ليهو بقطع قلبي البتقول لي اهلك وين البتقول لي راجلك وين انا شايفه الحنه في يدك اول م جيتي قلت ليهم ماتو في حادث كلهم وممكن ما تسألوني
دخلت الفيس وبقيت اكتب في خواطر بس المره دي غير بقيت اكتب في قصص قصيره عن الحسد والكتابه ونتايجه فيما بعد علي الطرف التاني عايزه طرف السوط اصل ايلاف وفعلا اصبت الهدف بقت من متابعين كتاباتي وبالذات في الحته دي وانا ميلتا اني احكي المعاناه والحلول في القصص
مرت الايام وانا جاتني شجاعه اني لو م اتعالجت من الحاجه دي اني اكمل مشواري بالذات في التعليم وكنت متفوقه اي ماده بقفلها والاساتذه متكيفين مني شديد المدير ناداني وقال لي الاساتذه بحكو عنك وانتي متفوقه جداااا انا مبسوط منك وعلي كده عايز اقول ليك تاني ما تشتغلي تنظفي وقروشك ح تصلك انا عايزك تجتهدي اكتر واكتر عشان ترفعي لينا اسم المدرسه لو مره واحده دا حلم سنين انا بحلمو ونفسي اتحقق وعشان احققو لازم أشجعك واقيف معاك وانا عارف ظرفك البتمري بيهو وعارف اي شي بس ممكن تفضي نفسك للقرايه قلت ليهو حاضر ي استاذ وكلامو شجعني زياده وثقتو فيني ادتني دافع اكتر ما ضروري الثقه تلقيها من اهلك ممكن تلقي الثقه من ناس حولك حسو بي قيمتك وحسو بي تفوقك وعاهدت نفسي اني ابذل طاقه جهدي ف القرايه واتفقنا انا وبكري نركز شديد في القرايه عمي محمد سجل لينا في مكتبه عشان نقرا فيها ولحسن حظنا المكتبه بتكون فاضيه لمن نجي انا وبكري وبكري مستواهو بقا احسن وبقينا محتهدين لا بنوم ليل لا نهار وكثفنا جدول قرايتنا والمدرسه ساعدتني بالشرح بعد اليوم الدراسي وحسيت نفسي اني قدرثقه الاستاذ وبقيت صلاتي ودعواتي في وكتها وكنت ما ناقصاني حاجه
وكنا متابعين عند الشيخ وحكيت ليهو بي ايلاف قال لي الزوله دي لو كتبتك العمل ما بفك الا تفكو هي وانا بالقران بحسن ليك حالتك وربنا قادر انو يشفيك وبقيت مواصله معاهو والاوراد المديني ليهم محافظه عليهم
بقيت مجتهده في قرايتي شديد واختفيت من الفيس في يوم جاني كلام قلت اكتبو دخلت الفيس جاتني رسايل من ايلاف انخلعتا دخلت رديت عليها دقيقه م عديتا ردت علي هي قالت لي منتظره نهايه القصه قلت ليها ان شاء الله بنزلا بعد اخلص قرايتي حسيت انها عايزه تعرف نهايه القصه شنو وكان القصه انا الحكيتا نتايج الكتابه والحسد بتنعكس علي الكاتب عايزه طرف السوط يصلا وفعلا وصلها قلت ليها عارفه القصه دي حقيقيه وحاصله لي انا وبديت االف ليها في كلام عشان اضربها اكتر قالت لي ممكن تحكي لي قلت ليها زمان عندي بت خالتي اسمح مني وكنت بغير منها وامي شايفه غيرتنا والشيطان وزانا مشينا كتبناها ودمرنا حياتنا وانا حياتي كانت ماشه فل الفل لغايه ما ربنا قلب علي الطاوله ولقيتا مركزه علي اي حرف انا بقولو ليها وشكلها اتوترت قالت لي عارفه نفس قصتي وفعلا انا حياتي ادمرت قلت ليها كيف بسم الله قالت لي عندي زميلتي ف المدرسه بت طيبه وفي حالا بس الشيطان خلاني ادمرها كانت منافساني وقصتي زيكم كده عندي خالتي ودتني لشيخ وكتبناها وطفشناها من القرايه والحياه وانا هسي م عارفه الحاصل شنو عليها اتزوجت دي اخر اخبار عنها وانا الغيره م وقفت علي القرايه وبس اتزوجت ود عمتها الاكتشفت انو بحبها وللان بحبها بس امو رافضه زواجهم انا اتندمتا اني عملت فيها كده منتظره انتي تحكي باقي القصه عشان انا اتصرف طبعا انا هنا كسبتها فرصه قلت ليها الايام دي م بقدر اكتب انا ممتحنه لكن انتظريني بكره بفضي نفسي بجي احكي ليك عملنا شنو قفلت التلفون وجريت حكيت لي عمي محمد بالقصه كلها قال لي بس نحنا هنا وصلنا للعايزنو وما شاء الله ي بتي عليك ذكاء فعلا بتحسد ربنا يغطي عليك واتصل للشيخ واداني ليهو قال لي امشي قولي ليها انا مشيت فكيت العمل العملتو لي بت خالتي عند الزول العملو ليها زاتو قلت ليهو سمح تاني يوم دخلت عليها ووريتا بالكلام كلو القالو لي الشيخ وهي صدقتني قالت لي انا ح اتصل لي خالتي تمش تفكو كان حياتي دي تنعدل قلت ليها صدقيني انا حياتي دي ما انعدلت الا لمن اتمنيت لبت خالتي الخير وفكيت كتابتها وشفتها كويسه وامورا ظبطت وقصدت اكتب تجربتي عشان غيري ما يقع فيها فنصيحه ليك اسرعي وفكي العمل واستغفري وتوبي لو قدرتي تصلي ليها عافيها ف الدنيا قالت لي ان شاءالله
وانا هن امتحاناتي قربت خلاص ومجتهده شديد وبقيت ساكه ايلاف بالاسئله عشان كنت خايفه الحاله تجيني ف الامتحان وكلو بضيع مجهودي دا لغايه م يوم لقيت رساله من ايلاف كاتبه لي فيها انا بشكرك والله طلعتيني من هم لا يعلم بيهو الا الله كنت لا بنوم ليل لا نهار ونهاي م مرتاحه اتواصلت مع خالتي ومشت فكت العمل والشيخ شال مننا دم قلبنا بس انا اصريت اني افكو لو بحياتي لانو ما معروف الظروف وانا في حال ولاده لو موتا ساي ذنب البت دي يكون في رقبتي وطبعا انا كنت فرحانه لا شعوريا كتبت ليها لا لا انا عافيه ليك والله …