رواية رغبة في الانتقام الفصل التاسع 9 بقلم نوسه حمد

سمعت الباب بيضرب لبست عبايتي وطلعت لقيتو مهند  سلمت عليهو قال لي نوسه عاوزك في موضوع ممكن اتفضل قلت ليهو طوالي ي مهند اتفضل   اخواني كانو نايمين اصلا عندهم نومه بياخدوها بعد يجو من المدرسه طلعت سرير ف الحوش وفضلتو وعملت ليهو قهوه قلت ليهو خير ي مهند قال لي خير ان شاءالله انتي جاك عريس قلت ليهو عريس منو دا كمان قال لي عمار قلت ليهو عمار الواحد دا قال لي اي ياهو زاتو قلت ليهو راجل مره يعني قال لي راجل المره مالو طالما طالبك بالحلال ما ترفضي قلت ليهو مهند الراجل محلالات ليهو اربعه بس لمن مرتك تكون م مقصره في حقك وقايده ليك اصابيعنها العشره شموع وانت تكون عينك طايره غلط  ماف زول بتكلم في الشرع بس منال ما المره البتزوجو فيها انا عاشرتها كويس وفهمت راجلها النوع شنو راجلها دا عامل زي ابوي نرجسي ما بهمو الطرف التاني في العلاقه عندو مده معينه وبعديها بزهج سريع وبلجا للخيانه مهند قال لي عرفتي كيف ي نوسه م تصدقي كلام مرتو ظالماهو هو قال م مرتاح معاها قلت ليهو لا كذاب هو بفتش لسبب بس ما لاقيهو قال لي يا نوسه الستره سمحه بعدين الزول دا متكفل بيك انتي واخوانك وانا والله عاوزو ليك ليه عشان يسترك ويبقا ليك سند قلت ليهو يسند نفسو انا هينه وبعدين يا مهند عشان اختصر ليك عمار دا لو بقا اخر راجل ف الدنيا انا م ح اتزوجو انا ممكن اعيش كده من غير راجل ومن غير ستره بس اتزوج راجل نرجسي وبحب نفسو لا لا مستحيل انا ماخده كورس مكثف في الزواج لمن اجي اتزوج بتزوج راجل بخاف ربو موش مباري الحياه ومستحيل اتزوج عمار لاسباب هو عارفها كويس وعليك الله كلمو خلي يشيلني من راسو انا خلاص شقيت طريقي مهند قال لي البتشوفيهو بس انا كنت عاوز ليك السند وما تشيلي هم يا اختي نحنا سندك وربنا يقويك قلت ليهو امين 🤲 ودعتو وفات ما قعدتا سمح جاتني منال لاول مره سلمت عليها ورحبت بيها حسيتها مهمومه شديد وفي راسها ف كلام عاوزه تتكلم قاطعتها قلت ليها انا المره الفاتت استحملت مطاعنتك لي بس ي منال م اتوقعت منك المعامله دي كتر خيرك انا ما زي ما انتي مفتكره انا عيشت حياتي قاعده ببيع ف الشارع اقسم بالله ماف راجل بالغلط رفعو عينو عاين لي كلهم غير الاحترام م شفت منهم شي والمعلومه الوصلتك غلط زول عايز يفتن بينك وبين راجلك ابقي علي راجلك عشره ولو علي انا تاني جنب مدرستكم ما ح احوم اخدي راحتك قالت لي ولا ح ترضي تعرسي عمار قعدت اضحك قلت ليها عمار راجل اختي وغير اخوي م شايفاهو حاجه اطمئني قالت لي نوسه انا نفسيا تعبانه زهجت من اني الفت نظر عمار اعمل شنو عشان ما يشوف غيري قلت ليها والله انا فاشله في العلاقات الزوجيه عشان ما جربتها بس دا زوجك اعرفي منو بحب شنو بكره شنو ونصيحتي ليك احتوي انتي ما تخلي للشارع قالت لي تعبت وجاتني نفسيات لمن عرفت انو عايز يتزوجك وجيت بنفسي اعرف قرارك قلت ليها انا هسي مهند طلع مني وقلت ليهو مستحيل اتزوج عمار  اطمئني من ناحيتي  وشوفي كيف تخليهو يقتنع بيك وما يعاين بره وربنا يقدرك ويقويك وربنا ح ينصرك قالت لي امين انا والله تعبت ونفسنت منو المشكلة يا نوسه مرات بعاين لواحدات ما بجن بي ضفري  دا اسمو شنو قلت ليها نفسي ارد عليك بس والله انا امور الرجال دي م بعرف ليها وانا والله من ناحيتي ارقدي قفا  والبينا عامره يا اختي  قالت لي شكرا ليك قلت ليها العفو ما تشيلي في خاطرك مني انا والله اكلت معاك ملح وملاح م ح اخونك ودعتني وفاتت  جد قلبي وجعني ليها بتحاول بكل السبل تدافع عن بيتها وراجلها بس للاسف راجلها ما عامل اعتبار لا ليها لا لي بيتو رجال اخر زمن 

مرت الايام واخواني ما شاء الله من المتفوقين شديد يوم قلبي اكلني قلت لازم امش اشوف نادر رغم انو محزرني بس انا قلبي كل يوم بتقطع  والمسافه بعيده بس لازم امشي ليهو كلمت مهند لاقاني ف الشارع  قال لي  النمش معاك قلت ليهو لا مالك ذنبك شنو خليني بمش براي بس ابقو علي اخواني عشره اتحركت والمره دي مشيت براي بدون عم احمد نزلت في مكان بجو داك وبقيت منتظره نهاي م جو سالت منهم ناس السوق قالو لي ديل الاولاد الصايعين ديل معذبننا عذاب الشرطه قبضت عليهم قلت ليهو ياتو شرطه قال لي والله ما عارف مسجونين وين بس الله ريحنا من اشاكلهم خجلت شديد اقول ليهو معاهم اخوي بقيت اتحسبن في سري ابوي بدل اكون الاب الصالح اخوي وصل للفيهو دا بسبببو بقيت م عارفه اتصرف كيف سريع مشيت حلتنا ونهاي م جيت بشارعنا عشان ابوي يشوفني مشيت طويل بيت ناس الامام  فتحت لي الباب مرتو قالت لي اتفضلي احمد ليهو شهر عيان دخلت لقيتو راقد في السرير كفرت ليهو قال لي عملت عمليه زايده وما كانت ظابطه عملت لي مشاكل وانا الان احسن قال لي ادعي لي اقوم بالسلامه اشتهيت الجامع والخطبه قلت ليهو ان شاءالله ح تقوم مرتو اكرمتني م قصرت قال لي مالك خير ي بتي فشنو قلت ليهو  جيت اشوف نادر ومشيت  مكان بقعدو انتظرت م جو سالت منهم رجال السوق   وقالو انو الشرطه قبضت عليهم وما عرفت مسجونين في ياتو قسم خجلت اني اقول ليهم رئيسهم دا اخوي واكيد نظره الناس ليهو انو شماسي لافي اهلو م عرفو يربيهو ما  عارفين انو هو وصل لكده عشان انتقم من ابوي وان شاءالله السجن دا يكون ادبو  قال لي اخوك مظلوم لازم تتصرفي اهل امك وين خليهم يجو يتكلمو معاهو انا والله لو بقدر كان مشيت معاك واوعك تفكري تمشي براك كدي اتصلي لي خيلانك وحبابك بيتي مفتوح ليك في اي وقت  قلت ليهو م قصرتا والله جزاك الله الف خير ربنا يشفيك ويعافيك ياقادر يا كريم اتصلت علي خالي قال لي منو معاي قلت ليهو نسيبه قال لي انتي وين ي بت كمان جاك قوه قلب تهربي  قلت ليهو عايزني اعمل شنو عايزني اتزوج لي راجل كبير واتعذب زي امي واجدع اخواني اذا انتو بتخافو انا بقيت م بخاف مستعده عشان اخواني ومستقبلهم اقع معاهم النار واطمئن انا كويسه واخواني كويسين بس نادر اخوي قال لي مالو كمان حكيت ليهو بي نادر والعايز يعملو بقا يستغفر ويتحسر علي اختو وولادتها قلت ليهو خالي م كل مره تقعد تسمعني فارغ انا محتاجه ليكم ساعدوني  اخوي بضيع انا عايزه المو علي ونربي اخوانا ونعيش في امان انا تعبت من المشاكل والنقاشات قال لي المشاكل تفوت ابوك وين انا امش معاك وين ابوك فاتح فيني بلاغ قال انا الخطفتكم   بسبب ابوك شغل م قاعد اشتغل زي الناس وانا هسي مافي البلد انا ف الدهب  قلت ليهو طيب يا خالي شكرا ليك انا ي داب عرفت امي ليه ما كانت بتطرق بابكم  شكلها طرقت بابكم كتير بس صديتو في وشها ع العموم انسو انو عندكم اولاد اخت ودي اخر مره اتصل ليكم فيها وربنا كريم علي قفلت الخط في وشو بقا يتصل ويتصل ما رديت عليهو وحظرتو ودموعي كانت مغرقاني   مرت احمد قالت لي ي بتي م تبكي كل مشكله وليها حل كدي النشوف احمد يتصرف ليك قلت ليها احمد لو بي عافيتو م بقصر ربنا اديهو العافيه لي روحو  دخلت عليهو عشان اودعو لاني  ما لقيت حل لاخوي وحكيت ليهو بخالي قال لي ي بتي ربنا اقدرك وقدر ما تتخزلي من ناس قريبين ليك ربنا بعوضك بي ناس افضل منهم اصلك ما تيأسي وتقولي خيلاني م شغالين بي هم لو اشتغلو بيك ابقا قلبهم حار لو م اشتغلو بيك أوعك تزعلي هم م مجبورين عليك بس انتي طمني قلبك وانا والله لو  بقدر بمش معاك بس انا الله عالم بي حالي قلت ليهو م قصرتا معاي وزي م قلت عوض ربنا جميل النتصل لي مهند قال لي اي بس شوفي الاولاد ديل بساعدوك اكتر من خالك اتصلت علي مهند حكيت ليهو قال لي خليك في مكانك انا بكره بدري بجي عليك قلت ليهو تمام م بتقصر سالتو من اخواتي قال لي تمام التمام شايفهم فرحانين ادوهم نتيجه الامتحان الشهري والاتنين جو الاوائل قلت ليهو الحمد لله   الدنيا تفرحني من ناحيه وتحزني من ناحيه واهي ماشه والحمد لله تاني يوم صحيت بدري جهزت ولبست اختي وانتظرت مهند اتصل علي طلعت ليهو قال لي خليك واقفه في الشارع   وبقيت واقفه جنب الباب منتظره مهند يجي واميمه اختي تلعب تحت شجره بيت ناس احمد  وتضحك شديد  فجاه لمحت ابوي جاي علينا عديل وانا قلبي طار واتجمدتا في مكاني وسكت خشمي م فتحتو واميمه شغاله تقول لي ماما عايزه حلاوه وانا نهاي م رديت عليها فجاه اختي جرت علي ابوي وكانها حاسه انو دا ابوها وانا خلاص المعاي كملت لو فتحت خشمي ابوي ح يعرفني والله يستر…….يتبع

                     الفصل العاشر من هنا