الفصل الثالث 3 والاخير
بقلم احمد محمود محمد
وده اللى معجبش اخوها وهجم على تاليت بس رجاله تاليت اللى كانوا فى كُل مكان.. هجموا على الولد وضربوه لحد ما اغمى عليه.. واخدوا اخته قدامه وقدام ابوه وامه وهوه عاجز عن عمل اى حاجه
تاليت مكتفاش بكده لأ ده عرف يوصل لصوره الولد ده اللى اسمه' خالد' وبدأ يعمل عليه عمل وجاب الصوره وحطها على صخره وبدأ يجيب ديك ودبحه وأخد منه دم واخد ريشه من حمامه وبدأ يكتب بالريشه والدم على صوره خالد
طلاسم ورموز وارقام ومسك الصوره وخيطها فى عروسه مصنوعه من القُطن وبعدها مسك دبوس وكتب اسم خالد على ضهر العروسه
وكل مكان يشك العروسه بيه بالدبوس بيتألم خالد فى المكان ده سواء الايد او القدم
لحد ما خالد مكنش عارف يقف من شده الالم والكُل كان عارف ان ده من عمايل تاليت بس محدش كان قادر يتكلم الكُل كان خايف. محدش فى ايده حاجه يعملها
لحد ما فيه شيخ فى قريه جمبنا سمع ببلاوى تاليت ومكنش قادر انه يواجهه كان خايف خالص بس قرر يستعين بأتنين من اصحابه لما سمع باللى حصل لخالد
وراح مع اصحابه على بيت خالد ولاحظ انه تعبان اوى وان مفيش طب ولا دواء نافع معاه والكل كان عارف ان تاليت هوه السبب والمشايخ دول هُما كمان كانوا عارفين
فقرروا يحطوا حد للبلاوى اللى بيعملها تاليت وخلاص هوه مبقاش شايف حد قدامه.. المشايخ دى بعد ما فاقت مكنش هاممها الشيطان ولا تاليت خلاص وقت انتهاء فتؤه تاليت وسيطرته وجبروته قرب
لحد ما بيجى يوم وجاليت والد تاليت بيموت وتاليت كان عامل مراسم غريبه كده لأبوه اشبه بمراسم عبده الشيطان بس مكنش فيه حد من اهل القريه حاضر خالص المراسم دى
فبيقرر تاليت يخلى رجالته تجبر اهل القريه على حضور المراسم دى واى حد يعترض بيخلصوا عليه علطول فى نفس الوقت المشايخ وصلوا بيت خالد ولما دخلوا عليه تأكدوا من الشكوك اللى كانت جواهم انه بيعانى من عمل او سحر اسود
وبيبدأوا يحاولوا فك السحر ده بأى طريقه وفضلوا على الحال ده ما يقارب من ساعه وده بيدل على قوه السحر وقوه الساحر
لحد ما خالد بيبدأ يبقى كويس من أثار السحر وبيبدأ يفوق وبعدها بكام يوم بيقرر انه يجمع اهل القريه وبيتكلم معاهم على انه لازم يخلصوا من تاليت
بس الناس كانت خايفه.. لاكن خالد وبرغم اللى حصل ليه مكنش خايف وكان عنده شجاعه وقال : احنا ازاى رجاله واكتر منه ومن رجالته بكتير وخايفين منه.. ازاى
ازاى نسيب بناتنا زى الجوارى عنده. احنا لازم نحط موقف للى بيحصل ده ومهما كلفنى الامر حتى لو كان التمن هو حياتى
انا مش فاهم ازاى محدش فيكم مضايق على شرفه وعلى بنته اللى بقت جاريه عند واحد اقل من اقل واحد فينا
الشخص ده لازم يموت.. الناس بعد الكلام ده بتكون خلاص قررت انها تقف لجاليت وأول حاجه عملوها.. انهم اتحركوا على المقابر وطلعوا جثه جاليت نفسه
واخدوها معاهم على المقام اللى كان مبنى ليه فى البلد ورموها جوه المقام وبعدها غرقوا المقام بالبنزين وولعوا فيه
وطلعوا على بيت تاليت كلهم وهوه لما سمع باللى حصل وشاف كل اهل القريه جايين ناحيته. فا رجالته سابوه وهربوا واللى تبقى منهم اهل البلد خلصوا عليه لأن كل واحد من الشباب واهل البلد كان ماسك شومه فى ايده
ولما تاليت شاف الموقف ده هوه كمان مكنش عارف يتصرف ازاى السحر والدجل والشعوذه فى الوقت ده مكانش ليهم فايده واهل القريه دخلوا البيت اخدوا البنات من جوه
بس اكتشفوا انه هرب بس امه لسه موجوده فقرروا يولعوا فيها وفى البيت وماتت محـ ـ ـروقه هى كمان
والركام اللى بقى من البيت هدوه خالص لدرجه ان البيت اتساوى بالارض.. وده كان اصعب انتقام لتاليت وعيلته صحيح هوه هرب بس على الاقل خلصوا من شره وعرفوا ان فى الاتحاد قوه
اما عن اسم تاليت وجاليت فا الاسمين دول مشتقين من اسماء سحره فرعون اللى تحدوا سيدنا موسى فكانت فيه روايات بتقول ان من اسماء السحره اللى تحدوا سيدنا موسى ماليت وجاليس او جانيس
والسؤال هنا هل ممكن تاليت يرجع تانى
تمت بحمد الله