ضحكت سماره ضحكه عاليه وقررت تطلع الورقه اللي معاها وهي بتهب فيهم وبتجز على سنانها بغل ملى قلبها بسببهم وهي بترد عليها :
ــ انت اللي اشترطي على ابويا اني ما اكونش بنت وبسببك لبسني جلابيه الراجل علشان ما كناش لاقيين شغل ولا كنا لاقيين مكان يئوينا وفي الاخر اللي كنت خايفه منه على ابنك حصل ولعلمك بقى ابنك ما كانش معايا انا كده بس ده كان عارف ستات ملهاش اول من الاخر ومش بعيد تلاقي بلاوي ومصايبه هتجيلك واحده واحده بس اصبري اصل المشي البطال العوج اخره صاحبه يلبس في الحيط .
وطلعت الورقه ومسكت ايديها وحطيتها فيها بكل ثقه :
ــ خدي يا ست هانم دي صوره من عقد الجواز اللي ابنك ماضي عليه وخاتم كمان وانا رحت وثقته في الشهر العقاري وكان معايا الختم بتاعه والبطاقه بتاعته علشان العقد يبقى سليم 100% .
خدت منها الورقه بلهفه وهي بتبص فيها وبتدقق على كل حاجه لقيت ان هي قسيمه جواز وفيها اتنين شهود وكمان صورته وصورتها محطوطه وماضي عليها وخاتم وكمان فعلا متوسط في الشهر العقاري فحطت امه قدامه العقد وهي بتسالوا بغضب :
ــ جرى ايه يا نعمان ده البنت طلعت صدقه في كل حاجه وانت متجوزها وبشهود والعقد مختوم في الشهر العقاري وكل حاجه بتقولي ان العقد سليم مش مزور يعني اذا كانت الصور حطيتها والبطاقه كمان قدرت تسرقها امضتك كمان قدرت تسرقها ختمك كمان قدرت تسرقه ؟
وعلت صوتها جامد :
فهمني ازاي ده حصل انت ازاي تتجوز واحده زي دي وكمان الورق سليم ازاي تعمل كده يا نعمان انطق ؟
نعمان شد الورقه من ايد امه وهو بيبص عليها قوي الامضه امضته والصوره صورته والختم بتاعه ازاي ده حصل وعيونه الاتنين برقت مش مصدق ان هو شايفه هو مش فاكر انه عمل كده فردد بذهول لامه :
ــ والله يا ماما ما اعرف حاجه عن الكلام ده ولا اعرف ازاي انا مضيت ولا فاكر ان انا عملت كده اكيد البت لعبت عليا انا مش فاهم اصلا هي عملت كده ازاي.
ضحكه سماره باستهزاء وهي بترد عليه باللي خلاه اتجنن :
ــ شرفتك حاجه اصفره خليتك مضيت على عقد الجواز !
نعمان رمى الورقه في الارض ونزل على وشها بضرب الاقلام جامد وهي ما قدرتش تلاحق عليه ولا تدافع عن نفسها ولحد اما قدرت تخلص نفسها منه جريت على اول حجر قابلها في الجنينه وراحت حذفته في وشه فتح له دماغه وهي بتقول له بجنون :
ــ والمره الجايه هخلص عليك يا ابن امك لو فكرت تمد ايدك عليا تاني انا مش باقيه على حاجه ولا اب ولا ام ولا اخ ولا اخت ولا اي حاجه في الدنيا ،
امه بقت ماسكاه وهي بتحاول تكتم الدم بطرحتها وهي بتشتمها:
ــ تك كسر ايدك انت ازاي يا بت انت تمدي ايدك على اسيادك اللي بتاكله وتشربي من خيرهم انا بقى اللي هعرفك وانا اللي هعلمك الادب.
وجت ترفع ايديها علشان تضربها هي كمان بالكف على وشها علقت سماره ايديها وهي بتهددها بفحيح :
ــ الله الوكيل يا مره انت يا اللي بينك وبين القبر خطوه لو فكرت تمدي ايدك عليا ما هعمل اعتبار انك ست كبيره وهبهدلك وهخليك ما تسويش احسن لك انت ما انتيش قدي وما فيكيش صحه ليا طول ما انت ايدك بعيده انا كمان مش همد ايدي وطول ما انت لسانك طويل انا لساني هيطول اكتر منك .
كان نعمان بيتوجع وهو ماسك دماغه وعمال يلف حوالين نفسه وهو بيشتم فيها اقذر الشتايم اما امه بقت مذهوله من كل اللي بيحصل مش مصدقه نفسها وكانها بتتفرج على تمثيليه مش حاجه واقعيه عايشه فيها :
ــ بقى بتعضي الايد اللي اتمدت لك وكانت بتلبسك وتاكلك وتشربك ما انت صحيح تربيه شوارع هيطلع ايه منك ؟
ردت عليها سموره وهي بتحاول تستفزها ببرود زي ما هي غلطت فيها :
ــ اي تربيه الشوارع دي بقت مرات ابنك يا حماتي ومن بكره هروح ارفع عليكم قضيه وهطلب حقي منه ثالث ومثلث وخصوصا لو شفتي المؤخر اللي ابنك ماضي عليه وكمان القايمه اللي ماضي عليها كمان .
ــ هو انت كمان مضيتيه على قايمة ومؤخر اه يا ملعونه ازاي عملت كده انطقي يا بت هو ما مضاش ومش فاكر ان هو عمل كده .
خبت عليهم هي عملت كده ازاي وعمرها ما هتنطق وخصوصا انهم ملاعيين ولو عرفوا هيوقعوها ومش هيقولوا عليها يا رحمن يا رحيم :
ــ والله يا حماتي انا ما عملت كده غصب عن ابنك هو انت شايفاه عيل نونو علشان خاطر يمضي على جواز وقايمه ومؤخر ويختم كمان على ايد محامي واثنين شهود !
وبعدين هو انت عمرك شفتي عروسه بتتجوز من غير مؤخر وقايمه !
ولعلمك بقى انا معايا تسجيلات الكاميرات لابنك وهو بيدخل العماره اللي كان بيقابلني فيها بدل التسجيل مية ومعايا الشهود كانوا بيشوفوه وهو طالع نازل عليا وكمان الشهود من نفس العماره ومنهم البواب يعني مهما تحاولي تعملي انت وابنك انا مراته غصب عنه .
ام نعمان بقت تلف حوالين نفسها في الجنينه وكمان ابنها مخبوط في دماغه وبيصر دم فحبت تلم الموضوع بهدوء :
ــ اخلصي يا بت تاخدي 100 الف جنيه وتجيبي عقد الجواز ويرمي عليك اليمين ويا دار ما دخلك شر ومش عايزه اشوف وشك هنا تاني .
ضحكت سماره باستهزاء على كلامها:
ــ هأو أو أو 100 الف مين يا وليه يا شايبه اللي عايزه تديهم لي هو انا شرفي طول الخمس سنين اللي ابنك كان بيستغلني فيهم وبيستغل ان انا عيله صغيره وما ليش حد يسوى عندك الملاليم دي !
بشرفي اللي ابنك وحله لي لازم ابنك يتجوزني ويعمل لي فرح اسكندريه كلها تشهد عليه واكون مراته وانت كمان توافقي يا اما هعمل فيكم اللي ما يعمل ،
ويكون في معلومك انا قبل ما اعمل الحوار ده كله رحت عملت محضر لابنك بعدم التعرض وبعقد الجواز ان هو بيضربني وبيمد ايده عليا على طول وان انا عايزه احمي نفسي وليكي انت كمان انك بتستقوي عليا علشان انا غلبانه عشان لو حصل لي اي حاجه بعد كده محضر عدم التعرض هيثبت ان انتم اللي عملتوها يعني ما تفكريش نفسك تخطفيني في اي مكان تعملي لي عاهه هوديكي في 60 داهيه انت وابنك ودلوقتي الكوره في ملعبك تقدري تتاكدي من العقد عند المحاميين بتوعك يشوفوه سليم ولا لا وبعدين تشوفي بقى شروطي انت وابنك وتوافقوا عليها .
نعمان بقى واقف مذهول مش عارف هي ازاي قدرت تعمل كل ده وازاي قدرت انها تخليه يمضي ويتجوزها هو مش فاكر اي حاجه عن الموضوع ده اما امه بتحاول تستوعب كلامها :
ــ شوفي بقى انك تتجوزيه علني ويعمل لك فرح ده مستحيل انسي ان ده يحصل فشوفي حل تاني يخلينا نخلص من الموال اللي ما يعلم بيه الا ربنا ده وبعدها مش عايزه اشوف وشك تاني .
قربت سماره من نعمان بدلال :
ــ وانت يا نعومتي مش عايز تشوف سماره تاني ولا تجرب حضن سماره اللي ياما اشتكيت فيه من جبروت الست الوالده عليك وهترضى ان سماره اللي ما كنتش بتطيق راجل يقعد جنبها ولا يبص لها انها تبقى مع راجل ثاني !
بلع نعمان ريقه بصعوبه من كلامها ومن قربها منه وطريقه الدلع بتاعتها لكن شاف زمجره امه فبعدها عنه بحده :
ــ ابعدي عني يا بت انت ومش عايزه اشوف وشك تاني غوري في 60 الف داهيه .
مديت له ايديها وهي بتطلب منه :
ــ طب ايدك على مفتاح الشقه اللي بنتقابل فيها وكمان هات كده قد 10000 جنيه علشان اشوف نفسي واروق على حالي عقبال ما تفكر انت وامك هتعملوا ايه .
أمرته امه :
ــ اديها المفتاح عقبال ما اطلع اجيب لها الفلوس .
واتحركت من قدامهم اما هو مسكها من كتافها الاثنين بعد ما ربط راسه وهو بيسالها :
ــ عملتيها ازاي دي يا فاجر ! ازاي قدرتي تخليني امضي على عقد الجواز وبالشهود وكمان متوسق في الشهر العقاري !
جاوبته بدلال وهي فرحانه فيه وفي شكله وبتذلله ليها :
ــ هو انت فاكر ان انا هسيب لك الخمس سنين اللي ضاعوا من عمري وانت بتستغل شرفي بلاش ! او فاكر ان انا هسيبك تفضل راهني تحت اشارتك وقت ما تحتاج تستمتع تبعث لي وبعدين ترمي لي قرشين زي بنات الليل !
انا حذرتك ولازم تعرف ان كيدهن عظيم واللي بيجي على واحده ست وخصوصا لما تكون داقت المر زيي لازم هيجي له يوم تترد فيه المظالم والنهارده ده يومي اللي هاخد حقي فيه منك يا نعمان تالت ومتلت .
نزلت امه واديتها الفلوس وقالت لها سماره:
ــ قدامك اسبوع بالكتير تفكري هتعملي فيه ايه وما تحاوليش انك تقدمي لي لا انت ولا ابنك يا اما هلبسكم قضيه وانت عارفه انا استغليت الوقت الصح اللي الناس موجوده فيه علشان كله يبقى على عينك يا تاجر انا ماشيه وبعد اسبوع تجيبي الدلدول بتاعك وتجولي لحد شقتي بكل هدوء علشان انا مامنه نفسي كويس قوي .
وخرجت سماره وهي بتبص على ابوها اللي واقف موطي راسه في الارض بقرف لانه ما حاولش يدافع عنها ولا حاول يتحرك من مكانه وللاسف مش هتقدر تعمل له حاجه ولا تنتقم منه وعامله له اعتبار انه رباها وراحت على شقتها وهي حاسه انها النهارده انتصرت على نعمان اخيرا بعد كل سنين الذل والاستعباد واستباحه شرفها وفرده جسمها على الكنبه وهي بتفتكر ازاي خلت نعمان يتجوزها
فلاش باك
كانت سماره قاعده على البحر هي وصاحبتها اللي بتحكي لها باسى :
ــ البت دي بقى ابوها قعد يدور على اللي عمل فيها كده واغتصبها بالشكل ده وهي عماله تحلف لهم ايمان بالله انها مظلومه وما سلمتش نفسها لحد ومش فاكره اصلا ان حد لمسها ولا فاكره ايه اللي حصل وفضلوا دوروا يا بت يا سماره على اللي كانت بتقعد معاهم من اصحابها البنات لحد ما افتكرت ان واحده صاحبتها عزمتها على عصير وهي عمرها اصلا ما بتعزمها على حاجه وراحوا للبنت دي هي دي الوحيده اللي خدت منها العصير وقعدوا يقرروها وهددوها انهم هيودوها الحبس لحد ما اعترفت انها حطيت لها مخدر في العصير علشان تروح مع الجدع اللي اغتصبها بارادتها من غير ما حد يكون غاصبها لان المخدر ده بيخليكي شايفه وسامعه كل حاجه وفي نفس الوقت ما بتقدريش تعترضي على اللي قدامك ولا عن اي حاجه وبعد ما تفوقي ما تفتكريش اي حاجه من اللي حصل وكان ما فيش حاجه حصلت والبنت دي مش فاكره اصلا ازاي الجدع ده اغتصبها .
سماره كانت مركزه في الكلام قوي وهي بتسالها :
ــ يا نهار ابيض يعني هو صاحبتها اللي اديت لها العصير علشان تاذيها بالشكل ده وبعدين مخدر ايه ده يا بت اللي يخلي الواحده مغيبه بالشكل ده واي حد يعمل فيها الهباب ده وما تحسش .
ــ اسكتي يا اختي ده بيتباع بالجرام له اماكن معينه بيتباع فيها وغالي موت الكيلو منه معدي ال ٢٠٠ دولار بيقول لك خمسه جرام منه يغيبوا الواحد يوم بحاله ويخلوه ما يعرفش يعمل اي حاجه في دنيته واللي قدامك لو قال لك اعملي ايه بالذي هتعمليه .
سماره فضلت تجيبها وتوديها في الكلام لحد ما عرفت المخدر ده بيتجاب منين وكان نعمان في الوقت ده ضاربها ومبهدلها وحلفت لتشربه من كاس السم اللي ياما شربها منه وفضلت تدور على المخدر لحد ما لقيته وجابت منه بالفات يا دوب الخمسه جرام اللي صاحبتها قالت عليهم وحطيته لنعمان في العصير في اليوم اللي كان هيجي لها فيه وخلى نعمان مغيب اكثر من 24 ساعه جابت محامي عقر من تحت لتحت وجابت البواب وشاهد كمان من نفس العماره اللي كان بيجيبها نعمان فيها وكانت مجهزه صوره ليه وصوره لها والبطاقه خلته كتب عليها وختم وعملت كل حاجه وسابته نايم وراحت وثقت العقد في الشهر العقاري ببطاقته وبالختم بتاعه هي والمحامي اللي كتب لها العقد وبقت متجوزه نعمان اللي صحي من النوم مش فاكر ولا اي حاجه من اللي حصلت بسبب المخدر .
عودة من الباك
قضت سماره الاسبوع ده وهي قاعده في البيت تاكل وتشرب بالفلوس اللي اخذتها منهم ومكفياها وفايضه كمان ومستنياهم يجوا علشان يحلوا المشكله ومش هترضى باي حل غير اللي في دماغها ،
اما عند نعمان وامه بعد الاسبوع ما عدى قاعدين مع بعض :
ــ يعني لحد دلوقتي مش فاكر انت كتبت عليها ازاي وماضي وخاتم !
والمحامي قال ان العقد سليم 100% وراح اتاكد من مدى صحته في الشهر العقاري ولقاه سليم ، ولا انت بتشتغلني يا نعمان مش عايز تعترف انك اتجوزتها .
ــ والله يا ماما ما اعرف ازاي ده حصل انا كنت اعرفها وكنت بروح لها الشقه زي ما هي ما كانت بتقول لكن بتطلب مني الجواز على طول وانا دايما برفض انا مش للدرجه دي علشان اتجوز واحده بالشكل ده واوطي سمعتنا في الارض .
الاثنين بقوا محترمين وخصوصا ان هو راح حلل وما لقاش في جسمه اي نوع من انواع المخدرات وده لان سماره عملت الحكايه دي من كذا شهر وقدرت تحط له علاجات من غير ما ياخذ باله تطلع المخدر من جسمه وما اعلنتش عن عقد الجواز الا لما اتاكدت تماما ان اثر المخدر طلع من جسمه زي ما سمعت من البنت وبكده تبقى انتقمت من نعمان ولبسته في جوازها ولازم تاخد حقها منه ،
ام نعمان قررت انها تشوفها عايزه ايه وهتنفذ لها اللي هي عايزاه مهما كانت الخساره الماليه مش هتيجي قد الفضايح اللي هتحصل لهم بسببها هم وقعوا في الفخ بسبب ابنها والحرام اللي كان ماشي فيه واخذته وراحت لها علشان يشوفوا معاها حل ،
وصلوا لهناك واستقبلتهم وهي في قمه الشياكه واول ما شافها نعمان حس بالحنين والاشتياق ليها لكن هي كانت نافراه تماما وده اللي كان مأثر فيه وساب كل اللي بيحصل وركز على جمالها وانها بتخطفه من اول نظره وسالتها ام نعمان:
ــ طلباتك ايه يا سماره علشان نخلص من الموضوع ده بعيدا عن حوار الجواز والفرح لان ده مش هيحصل فقولي من الاخر انت عايزه ايه واي طلبه تطلبيه انا هنفذه .
حطت سماره رجل على رجل وهي بتتشرط عليهم هي اصلا مش عايزه تتجوزوا ولا طايقه تشوف وشه من بعد ما جرحها وكسرها بدل المره 1000 :
ــ شوفي حماتي عايزه تعملي لي مول كبير للملابس اللي بتيجي من بره وتملي لي المول ده على اخره وكمان تعملي لي اعلانات في التلفزيون عنه والاعلانات تغرق النت كله ده اول شرط ليا علشان يكون لي مصدر رزق ،
ثاني حاجه عايزه شقه بدورين يرمح فيها الخيل في نفس المكان اللي هتعملي لي فيه المول وكمان انت اللي هتجيبي لي العمال اللي هتشتغل فيه وتقبضيهم اول شهرين لحد ما المول يشتغل ويتعرف وتحطي لي باسمي في البنك مليون جنيه.
انصدم نعمان من طلباتها وهو بيقول لها:
ــ انت جرى لمخك ايه يا بنت انت انت مفكره ان الحاجات دي كلها سهله وبفلوس قليله المول ده هيخش له في 2 مليون جنيه انت اتجننتي انت ما تسويش ثلاثه تعريفه .
اتجننت سماره من سخريته بيها وانه لحد دلوقتي بيستقل بيها وقامت من مكانها :
ــ طب يا حماتي شكل ابنك جاي وهو مش ناوي خير انا بقى ديتها اعلان على النت هصرف عليه حبه فلوس ما لهمش لازمه وهجرس سيبنك وهخلي اللي ما يشتروا يتفرج عليكو طالما هو بيستقل بيا لحد دلوقتي .
بص نعمان ليها بتحدي وهو بيقول لامه :
ــ طب يا ماما ربنا زي ما شرع الجواز اللي هي ما اعرفش عملته ازاي شرع برده الطلاق وهطلقها وتبقى تعمل الفضايح اللي على كيفها انا ما بيهمنيش وانا راجل وما فيش حاجه تعبني.
استهزات سماره بكلامه :
ــ وماله طلقني وهتدفع برده المؤخر اللي قيمته مليون جنيه والقايمه اللي قيمتها ما تقلش عن مليون جنيه برده واللي انت ماضي عليهم وخاتم وبرده القايمه متوثقه في الشهر العقاري ومش بس كده خلي بقى الفضايح تنفعك لما مصنعك اللي قايم على الشرف والنزاهه يضيع وانت الخسران يا نعمان بدل الاثنين مليون ولا الثلاثه مليون ثروتك كلها .
حاولت ام نعمان تهديها وهي بتزعق لابنها:
ــ انت تخرس خالص ومش عايزه اسمع صوتك ،
انا موافقه يا سماره على كل الشروط اللي انت عايزاها بس اضمن منين بعد كده ان انت ما تقليش معانا وتعملي الحركات بتاع النسوان وكيدهم في نعمان لما تلاقيه بيرتبط بواحده ثانيه وعايز يعيش حياته.
بصه سماره لنعمان بقرف وهي بتاكد لها:
ــ لا من الناحيه دي اطمني يا حماتي ابنك ما يلزمنيش وعمري ما هبص له تاني اصلا انا كمان بقيت بقرف منه واذا كان على اللي هيتجوزها مع السلامه والقلب ادعي له سماره لما توعد بتوفي وطالما خدت حقي عمري ما هاجي ناحيتكم وانتم كمان ما تجوش ناحيتي لاني كل الناس اللي كانوا في الحفله بعثوا لي الفيديوهات اللي صوروها وهحتفظ بيها يوم ما يحاول يقل معايا هقل معاه ،
وكملت وهي بتحاول تستفزه:
ــ وبعدين انا سماره اللي بتمشي في الحته تقول يا ارض نهدي ما عليك قدي ولو عايزه اي راجل كلهم باشاره من ايدي هيكونوا تحت رجلي وبكره اوعدك ان سماره هتكون مرات احسن واحد في اسكندريه كلها واحسن من ابنك 100 الف مره اللي رفص النعمه بايديه .
ام نعمان كانت بتغلي من جواها من كلامها لكن قررت انها تجاريها لحد ما تخلص منها وتغور بعيد عنهم:
ــ تمام يا سماره هجيب المحامي بتاعي وهتمم لك كل حاجه بس بشرط تدينا القايمه وكده كده الطلاق هيتم وهيتوثق في الشهر العقاري وصدقيني نعمان مش هخليه يجي ناحيتك .
اشترطت سماره عليهم:
ــ لا المحامي بتاعي هو المسؤول عن كل حاجه مش عايزه محاميين منكم .
ــ قد كده مش واثقه فيا يا سماره؟
ــ طبيعي مش لازم اثق فيك ولا في ابنك بعد البهدله اللي انتم بهدلتوها لي فخلينا نخرج بالموضوع على كيفي علشان كل حاجه تبقى تمام .
وفعلا خلصت القعده وبدات الاجراءات اللي طلبتها سماره تتنفذ زي ما قال الكتاب عملوا لها المحل الكبير وجابوا لها الشقه وحطوا لها المبلغ في البنك بما فيهم مرتبات العمال وكل حاجه قالت عليها اتعملت وخدت كمان عليهم تعهد بعدم التعرض وخصوصا نعمان وبقت سماره هانم بعد ما كانت سمير الراجل الست اللي متخبي في جلابيته ،
بعد مرور سنة كان نعمان اتجوز فيهم والموضوع اتلم لكن حس بالاشتياق لسماره فرح لها المول وهو كله وحشه ليها واول ما شافها :
ــ وحشتيني يا سماره .
اتخضت سماره وهي بتضرب على صدرها:
ــ بسم الله ما تشوفش وحش يا اخويا عايز ايه يا نعمان ؟
ــ بقى دي مقابله تقابليها لحبيب القلب بعد سنه بحالها ما شفتكيش فيهم ما كانش العشم يا سمورتي ؟
ــ شوف بقى ان ما خدتش بعضك ودورت وشك ورحت لامك انت عارف ان انا سمي بيموت ابعد عني يا نعمان وسيبك من الألاعيب بتاعتك دي انا ولا طايقاك ولا طايق اشوف وشك ولا عايزه اشوفك من تاني ولا بالوحش ولا بالحلو .
ــ بس انا جاي لك وانا مشتاق وعايزك ورايدك في الحلال يا سمارة؟
ــ ما كانش انعذر يا حبيبي والحلال اللي يجي منك مش عايزاه انا كرهتك وكرهت صنف الرجاله بسببك ابعد عني يا اما هبعت لامك فيديو بدخولك هنا وبكلامك علشان انا مركبه كاميرات صوت وصوره وشوف بقى هتعمل فيك ايه ولا لو بعته لمراتك السنيوره اللي انت اتجوزتها ومش تتبهي بيها وبجمالها في اسكندريه كلها
ــ الله ما انت متابعاني اهو وعارفه اخباري ومتابعه كل حاجه عني امال عامله نفسك من بنها ومش واخده بالك ليه اتاريكي حطاني في دماغك زي ما انا ماحطك .
ــ انا يا اخويا ولا حطاك في دماغي ولا يحزنون كل الحوار اني وانا بقلب بشوف الكونتيسه مراتك عشان هي زبونه عندي في المحل منزله الحاجات دي كل شويه ويلا بقى طرقنا عشان مش فاضيه لك .
مهما يحاول يستجديها باي طريقه هي مش مدياه الوش وسابها ومشي واول ما خرج جه محروس ابوها :
ــ هو الجدع ده كان عايز ايه يا سماره وجاي تاني ليه.
ردت عليه ببرود ماسماره جابته يعيش معاها واجرت له شقه صغيره في نفس المكان وراعى ان هو رباها طول السنين دي كلها مهما كانت اذيته ليها :
ــ كان جاي يصيع عليا وانا اديته اللي فيه النصيب ومشي ما تشغلش بالك انت يا عم محروس .
ــ لساتك هتقولي عمي محروس مش هتقولي ابويا يا سماره ؟
ــ ما بقاش ينفع كلمه ابويا وانت عارف انت كسرت ايه جوايا انا سامحتك علشان امي وعلشان انت قاوتني تحت جناحك سنين مهما كنت بتاذيني الا انك حمتني واظن انا رديت لك الدين ثالث ومثلث .
وانتهت قصه سماره وهي واخده حقها من كل اللي ظلمها وبعدت تماما عن الطريق الشمال ومش مركزه غير في شغلها وانها تكبر وبس ونعمان زي ما هو ديل الكلب عمره ما يتعدل .
تمت بحمد الله