رواية جبروت انثي الفصل الحادي والثلاثون31الاخير بقلم نوسه حمد
انتظرت محمداجي بيتنا وطبعا محمد من عادتو كريم شديد م بجي يدو فاضيه نهاي حتي لو جاي لحظات م قاعد اقصر من اهلي و اهلي بحترموهو شديد وهو كمان بحترمهم شديد محمد قال لي انا بمش السوق اشتري حاجات واجي قلت ليهو لا م بحتاج اسماعيل جا امس وما قصر جاب اي شي تعال ساي بتلقانا منتظرنك بالفطور قال لي عيب عليك مابجي يدي فاضيه قلت ليهو طيب كنت مضايقه وماقادره اعاين لي محمد في وشو عشان انا متعوده اني اصارحو بي اي شي مشيت الديوان لي اسماعيل اخوي قلت افضفض ليهو قلت ليهو اسماعيل محمد عايز اتزوج فيني قال لي كيف الكلام دا قلت ليهو والله عايز اتزوج مرت الشهيد ود عمو لانو عندها اطفال قال لي بعدين انتي القال ليك منو قلت ليهو سمعت ي اسماعيل ومحمد زاتو متغير قال لي محمد احتمال متغير عشان عدم الولاده انتي م تشوفي دكتور شاطر واتعالجي العبره خنقتني م قدرت احكي قلت ليهو مشيت الدكتور ومواصله في علاجاتي ربنا م قسم لي اعمل شنو اكسر رقبتي قال لي خلاص محمد من حقو اتزوج الراجل محلالات ليهو اربعه قلت ليهو انا ما اميه وما جاهله عارفه كده وجيت افضفض ليك طممت بطني قال لي بالعقل كده اذا هو عايز اعرس انتي ح تمنعيهو ولا انا ح امش اقول ليهو اوعك تعرس في اختي ولا هو ح يسمع كلامنا عشان كده يا اختي خشمك وعندك وتستحملي وانا عشان اكون معاك واضح والله عقد اعقد ليهو قلت ليهو شكرا يا اسماعيل مشيت منو لقيت محمد جا واتونس مع امي سلم علي بي لهفه كنت مشتاقه ليهو مشاعري خزلتني قلت ليهو محمد فاقداك قال لي وانا كمان البيت من دونك ماليهو طعم
م عارفه جاني احساس انو محمد مستحيل يتخلا عني انا استحملت كلام الناس في الولاده عشانو هو معقوله اجازيني بي انو اعرس فيني وما قادره اواجهو نهااااي امي نادتني عشان اعمل الفطور ومحمد مشا لي اسماعيل ف الديوان جيت جهزت الاكل ووديتو ليهم وعملت الشاي والقهوه محمد قال لي اجهزي عشان نمشي مشيت جهزت حاجاتي وانتظرتو شرب القهوه امي قالت لي اهتمي بي نفسك مالك مبهدله كده قلت ليها بي قلبي م عارفه العلي قلت ليها ان شاء الله قالت لي خليك نجيضه راجلك م يقوم اعاين لي غيرك الراجل لمن احس مرتو م مهتمه بي نفسها بزهج منها وبعرس فيها قلت ليها حاضر يمه بهتم بنفسي بتكلم معاها كده محمد قال لي يلا نمشي ونعمه اتعابطت فينا سوقناها معانا الشارع كلو كنا نتونس بلهفه لمن قربنا حلتهم قلت ليهو محمد امي قالت لي انتي مبهدله وما مهتمه بنفسك عايزاك تغشيني بوتيك اشتري حاجات بنات قال لي جدا من عيوني رغم اني م شايفك مبهدله قلت ليهو والله امي طممت بطني عديل قالت لي مبهدله وما متميزه والراجل بحب المره البتهتم بي نفسها ما تحوجي يعاين لي بره ولا يعرس فيك حسيتو اضايق قال لي مستحيل ي نوسه قلت ليهو شنو المستحيل قال لي اني اعاين لبت ما حلالي قلت ليهو بس ما مستحيل انك تعرس سكت م ردا علي قلبي اكلني شديد قلت ليهو محمد ح تعرس فيني ودموعي بقت جاريه قال لي ي هبله اعرس شنو هو انا شايف غيرك قلت ليهو م شايف بس انا خايفه قال لي مالك انتي فشنو قلت ليهو ماف شي ي محمد م تركز معاي قال لي اطمني ي نوسه غيرك م عايز وانا مبسوط انتي اولادي وطفلتي شايف حاجات الناس ما شايفنها فيك مرات بحسك بتي م مرتي قاعدة تديني الاحساس دا بدلعك قلت ليهو محمد انا مستعده اديك عمري كلو محمد انا لو شفتك مع غيري ح اموت انا م انانيه بس انا بغير عليك شديد قال لي نوسه م تبكي انا مستحيل اعاين لغيرك انتي كل حياتي ودنيتي استحملتي معاي وصبرتي معاي هسي لو دي واحده غيرك كانت طلبت الطلاق بس انتي بت اصول انا مستحيل اجرحك بتكلم معاهو كده تلفونو اتصل قال لي دا سعد ردا عليهو وبقا يتحوقل قلت ليهو فشنو يا محمد وكان مندهش ودموعو جرت قال لي نوسه حاجه مدينه اتوفت من غير م اشعر بقيت اكورك وابكي واتزكر في كلامها محمد رجع بالعربيه ووصلنا مكان قاعده والرجال ما ادوك الدرب انا المره الوحيده في وسطهم محمد قال لي نوسه انا حاسي بيك بس ممكن م تبكي قلت ليهو حاضر دموعي بقت جاريه والرجال كلهم واقفين زول قادر ادخل اكفنها ماف لمن جيت انا قالو لي حاجه مدينه امك ودا اليوم المحتاجاك فيهو انا قلبي انقسم النص ودموعي جاريه وكنت ما بعرف غسل الجنازه قالو لي نحنا ح نوريك تعملي شنو نحنا مجهزين اي شيء بقو يوصفو لي ورا ستاره كده وانا بعمل البقولو لي عليهو لغايه م سترتها ودموعي عشره عشره سبحان الله وهي ميته كانها ملاك وشها منور الرجال شالوها ومشو عشان يدفنوها سعد قال لي محمد انت م تمش معانا انتظرني هنا مع نوسه انا عايز نوسه محمد اصرا انو يمش الدافنه قال لي بخليك ف العربيه والشارع كلو انا ابكي ومحمد ضاميني عليهو ويسكت فيني ونعمه مخلوعه تعاين محمد قال لي نوسه اسكتي جننتي البت قلبي انقطع نفسي اعزيها وسط نسوان وكل واحده تقلدني وتبكي سبحان الله الرجال بكوها وكلهم دموعهم جاريه مشينا دفناها وسعد قال لينا ترجعو معاي الوصيه في الزمه مشينا معاهو قال لينا حاجه مدينه م كانت عيانه ولا عندها شي بس فجاه لمتنا كلنا وقالت دا الموت وكنا شايفن كلاما دا كذب وكانت عايزاك ي نوسه بس تلفونك م دخل معاي وهي اضايقت علينا وادت الروح وكانت خاته وصيه هنا ليك وقالت ليك الكنت بعملو انا اعمليهو قلت ليهو سعد كانت بتعمل شنو انا م فاهمه شي قال لي ح افهمك حاجه مدينه دي متكفله بي يتاما كتار كانت بترسلنا ليهم كل شهر وقالت العايد بتاع شغلها يمشي ليك وادتنا ليك الامانه دي اداني كيس مخده ملان دهب انا لمن انخلعت قال لي دي وصيه وانا لازم اسلمها ليك وقالت ليك حقي ليك ولي اولادك انا قلبي انقطع وبقيت ابكي وابكي غلبني اسكت سعد قال لي نوسه لازم تنفذي وصاياها دي قلت ليهو ربنا اقدرني وانتو ساعدوني قال لي ان شاءالله ورجعنا البيت والدنيا مسخانه علي وكل يوم بمر علي ببكيها فيهو وغير دعواتي ماف شي بفيدا كل ما اتزكرها بدعي ليها
مرت الايام وكانت عندنا جمعيه في الاسره وقالو القهوه عند مرت المرحوم عشان طالعه من الحبس المهم مشيت عشان الناس ما يتحسسو وطبعا انا كرهتها موت وكل مره بسرح وبعاين ليها هي صراحه احلي مني وحلبيه وسمينه وجميله شديد وشكلو ام محمد عاجباها عجب وبنااتا ما شاء الله الناس اتونسو وانا سرحانه معى معاهم نهاي ام محمد طلعت من القهوه بدري انا طلعت بعديها بربع ساعه وصلت البيت وسامعاها مع محمد تتناقش معاهو وتقول ليهو ياولدي انا دايره ليك الجنا البونسك والفرصه جاتك ي محمد ما تظلم نفسك الاولاد ديل بعدين بنفعوك بعد تربيهم ومحمد رافض شكلو بقول ليها بت الناس استحملتني اجي اعرس فيها مع كلمتو دي انا جيت داخله قلت ليهو محمد الفحص الاخير طلع قال لي فحص شنو قلت ليهو الدكتور طمني قال انك ممكن تسافر مصر وح نتعالج محمد بقا ساكت واعاين لي امو قالت ليهو يا ولدي لو بتتعالج ممكن تسافر نفسي اشيل جناك قال ليها ان شاء الله امو فاتت مننا قال لي فحص شنو ي نوسه قلت ليهو محمد دي خطه ع فكره انا سمعت من زمان انك ح تعرس مرت المرحوم ومفتكره انت موافق وهسي لمن سمعتك بتتناقش مع امك قلت اقول ليك كده محمد انا عندي فكره قال لي شنو قلت ليهو نقول مسافرين للعلاج ونمش مصر نقعد تسعه شهور ونجي راجعين الخرطوم نتبنا لينا اطفال مواليد ونقول ديل اولادنا محمد قال لي نوسه مستحيل قلت ليهو محمد عشان خاطري انا نفسي في طفل يقول لي امي حسيتو مضايق قال لي نوسه بطلقك واتزوجي قلت ليهو اقسم بالله راجل تاني يلمس يدي يحرم بس انا عايزه امك تسكت ونشيل اجر في البنربيهو دا قال لي نوسه صعب قلت ليهو م صعب ارح نستخير قال لي طيب
بعد كم يوم محمد صحا مخلوع قال لي نوسه انا حلمان انك ولدتي قلت ليهو ان شاءالله قال لي نوسه انا موافق يومين اجهزي فيهن وح نسافر قلت ليهو بالمره نمش احتمال انت تتعالج قال لي المهم الفيهو خير يحصل انا ح اكلم اهلي وانتي صعب اوديك اهلك ودعيهم بالتلفون قلت ليهو طيب
بعد يومين جهزتا واسماعيل جا ساق بتو واديتو دهبي ووصلنا المطار وسافرنا مصر 🇪🇬 هناك استلمنا صاحبو واجر لينا بعد ايام اقنعت محمد نمشي الدكتور وصفو لينا دكتور شاطر بالذات في امراض الذكورة مشينا الدكتور وقال نعيد كل الفحوصات لانها م دقيقه ووصف لينا معمل دقيق شديد وجبنا النتيجه وكنا علي اعصابنا الدكتور قال لينا ع فكره في امل انكم تنجبو بس صعب شويه ونسبتو ضعيفه بس ماف حاجه بعيده من ربنا محمد فرح شديد قال ليهو نحنا معاك لو بعد ميه سنه نحنا معاك ولو بكلف اي شي نحنا جاهزين قال لينا مبدئيا كده انت ح تاخد علاج مكثف وح تحتاج عمليه ان شاءالله قال ليهو تمام محمد فرح شديد وكانو كان في نار وودوهو الجنه قال لي نوسه انا بحمد ربنا م سمعت كلام اهلي واتزوجت مرت المرحوم وقنعت من الولاده انا بشكرك ي نوسه انك فكرتي معاي بجد انتي قوتي وسندي قلت ليهو محمد اقسم بالله انا ما قنعت موش الدكتور قنعنا من الولاده بس انا كنت كل ما اسجد بدعي انو تحصل معجزه واني الد والحمد لله الدكتور ادانا امل وانا ما قنعانه وباذن الله ح نتوفق انا متاكده
مرت الايام والدكتور قال حمل طبيعي م ح يحصل في حاله محمد الا حقن مجهري بعد اعملو ليهو عمليه وعملو ليهو العمليه وبدينا في العلاج لغايه م حقنو لي وبعد ١٥يوم النتيجه ال١٥يوم ديل محمد لا بنوم فيهن لا ليل لا نهار اليوم كلو يصلي ويدعي رجعنا بعد ١٥يوم عملنا الفحص والحمد لله بفضل ربنا انا حامل وقالو لينا تعالو بعد اسبوع نشوفهم بالموجات وبعد اسبوع جينا والحمد لله انا حامل بي تلاته تؤام محمد سجد سجده 🙏 شكر وكنا مبسوطين شديد محمد اتصل فرح اهلو وقال لي ابوهو اضبح عشره خرفان ووزعوهن للمساكين كان مبسوط وخايف علي شديد رجلي ف الارض م بخليني انزلا وبعمل اي شي براهو وانا كنت تعبانه شديد مرت الشهور وبقيت خلاص تقيله وامي جاتني تحضر ولادتي والحمد لله ربنا رزقني بي ولدين وبت امنيه واحمد واسعد محمد كان طاير من الفرحه وانا كنت مبسوطه اكتر منو كان حلمي اني الد منو اطفال والحمد لله ربنا جبر بي خاطري وبعد اربعين يوم رجعنا السودان واهلو استقبلونا بالافرآح وكانو طايرين من الفرحه الحمد لله ربنا عوضنا ومرت الايام والسنين واولادي مالين علينا حياتنا وكلهم قطعه من محمد ومحمد كان بحبهم حب بالذات امنيه بقول لي دي الامنيه الاتمنيتا بت منك والحمد لله ربنا رزقني دي كانت نهايه
اول هدف شخصيه نوسه كانت بت بتحب الحياه واخوها كان عارف المجتمع والزباله الفيهو المشكله كان بتعامل معاها بقساويه وبحزرها من غير م يفهما بس هي كانت عنيده شويه والعناد دا طبع من طباع الانسان الزول ما بعاين ولا بحسب لي اي شي عشان كده م كانت بتسمع كلام اخوها لغايه ما وقعت في مصيده ناس قصدهم الدمار ومستعدين يعملو اي شي عشان غيرهم يدمر وما قدرو يجيبو راسها بس بالقوه وصلو للعايزنو والحاجه دي زادتها قوه وجبروت ورغم صغرها ما واصلت ف تهديدهم وعاندتهم وكانت سبب في تسليمهم الشرطه وعلي فكره النوعيه دي م تستبعدوها نهاي في منها وكتير بس نحنا بنخاف ما بنقيف في وشهم بنستسلم عشان ما نقع في الفضيحه الاحسن الفضيحه ولا انك تواصلي ف المعصيه وربنا بجعل ليك مخرج
تاني حاجه احترمي نظره اخوك للمجتمع لانو مرات هو بكون شايف حاجات انتي ما شايفاها لمن يمنعك ويحزرك من واحده معناتا شاف فيها صفات م بتشبهك ما تقوي راسك زي م عملت نوسه اسمعي كلامو عشان الخير بخص والشر بعم
تالت حاجه الحا اتكلم عنها السكه الحرام التعاطي والدعاره والحاجتين ديل كترو شديد وراحو فيهم ضحايا اولاد ناس "اتقوا الشبهات" دا تحذير نبوي يعني "ابتعدوا عن الأمور المشتبه بها" لأنها بتؤدي إلى الوقوع في الحرام. الببعد عنها يحفظ دينه وعرضه من النقص البقع فيها بعرض نفسه للخطر، كالراعي الذي يرعى حول منطقة محمية قد يدخلها دون قصد.
رابع حاجه اهل نوسه شخصيتهم كانت ضعيفه شديد ابوهم مات بسبب مبهم وبتهم وقعت ضحيه في نفس السبب المبهم بعد دا كلو ما انتبهو ولسه بتعاملو بي عدم وعي لغايه ما الاسره كلها كانت ح تضيع الفهم والوعي مهم جدا في الحياه خليكم ذكيين ح تقللو المشاكل وما ح تقعو ضحايا الا اذا انتو عايزين كده دايما الناس المستهدفة هم العقلهم صغير محل ما يودوهم بمشو ومحل اجيبوهم بجو والزمن العلينا دا السوشيل ميديا فتحت عقول الناس وكترت فيهو المصايب الكنا عمرنا وحياتنا ما شفناها وبنسمع بيها سمع ولا بنشوفا في الافلام وينستبعدها عشان كده صحصحو وما تدو الامان والامان امان ربنا بس❤️
خامس حاجه اتكلمت عنها السند ما بمعني انك ما لقيتي اهلك سند ح تفقد السند بالعكس ربنا ح يعوضك بالاحسن زي م حصل لي نوسه ربنا عوضها بي حاجه مدينه وكانت ليها نور لحياتا المظلمه وما كده بس كانت سبب في قسمتها ولقت السند الحقيقي اللهو زوجها محمد اتقبلها بكل عيوبها وما حسسها انها مذنبه ليه لانها اذنبت غصبا عنها عوضها عن اي شي وما خزلها وقف معاها اكتر من اهلها وكان سعادتها ❤️
سادس حاجه الغلط ما بعالجوهو بغلط اكبر منو زي ما عملت نوسه ومني وغيرها افتكرو الاجهاض حل لمشكلتهم بالعكس كان سبب في موتهم وعشان ما تقعي فيهو احفظي نفسك وشرفك وعرضك الدنيا ما مستاهله ح اجي اليوم وتندمي فيهو وعشان م تندمي ما تغلطي❤️
سابع حاجه الامل طالما اقدارنا في يد ربنا ما نقطع الامل حتي اذا اتحطمنا من ناس خبره زي م حصل لي نوسه ومحمد الدكتور اقنعهم انهم م ح ينجبو وقفل الطريق في وشهم وناسي انو الاقدار مرات بتفتح أبواب مغلقه بس ناسا املهم ما انقطع من ربنا وربنا قادر انو يغير الاحوال من حال الي حال واكيد في زيهم كتار عشمهم انقطع بس طالما في العلاج الناس م تقيف علي راي دكتور واحد ويسعو السعي فيهو بتصل للعايزو وغير كده فيهو الاجر ❤️
تامن حاجه إذا اجتمع الناس ليضروك، فإن ضررهم لا يقع إلا بإرادة الله وبما قد كتبه لك، لأن كل شيء مقدر في اللوح المحفوظ، فلا يقدر أحد على أن يضرك إلا بإذن الله. زي ما حصل من هناء وقتيبه كانو بسعو جاهدين عشان يضرو نوسه بس ربنا كريم
اخر شي بقول ليكم التلفونات والميديا دي ما اخترعوها للفارغه استفيدو منها كبرو عقولكم اتصفحو اكتر ساعدو نفسكم بنفسكم ما تكونو جاهلين فكرو في مشاكلكم الف مره قبل حلها اتثقفو عشان ما تقعو ضحايا لو الدنيا وقعتكم في ناس عايزين استغلوكم تقدرو عليهم الزمن دا ما زمن عقول صغيره عشان المستحيل بقا يحصل عادي ربنا يحفظنا من كل المصايب ويبعد مننا شر نفوس الناس الضعيفه واتمني اكون افيدتكم احداث الروايه
🌹🌹🌹🌹🌹🌹🌹🌹🌹🌹🌹🌹🌹🌹
💚 مرحبا بكم ضيوفنا الكرام 💚
هنا في كرنفال الروايات ستجد كل جديد
حصري ورومانسى وشيق ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا ليصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله
💚 مرحبا بكم ضيوفنا الكرام 💚
هنا في كرنفال الروايات ستجد كل جديد
حصري ورومانسى وشيق ابحث من جوجل باسم الروايه علي مدوانة كرنفال الروايات وايضاء اشتركو في قناتنا👈علي التليجرام من هنا ليصلك اشعار بكل جديد من اللينك الظاهر امامك
🌹🌹🌹🌹🌹🌹🌹🌹🌹🌹🌹🌹🌹🌹
تمت بحمد الله