رواية صراع قاصر الفصل الثلاثون30 الاخير بقلم نوسه حمد
طالعه من المدرسه وبفتش للسواق الجابني عشان نتحرك سمعت صوت بنادي علي والصوت م غريب علي اتلفت وياريتني ما اتلفت لقيتو محمد ولمن شفتو قلبي انقطع شكلو مريض وشعرو كلو ماف ومركب جهاز في رقبتو حسيت انو مريض مرض خطير سلمت عليهو وكفرت ليهو قلت ليهو مالك ي محمد الحاصل عليك شنو قال لي خليك من الحاصل علي انتي كيفك وبكري كيف وولدي كيف انخلعتا وبقيت اتمتم قلت ليهو ولد شنو ي محمد انا م ولدت منك قال لي نوسه م تخافي انا ما ح اشيلو منك انا وضعي زي ما انتي شايفه م بسمح لي قلت ليهو انت مالك ي محمد فشنو قال لي ربنا شال ليك حقك ودموعو نزلت قلت ليهو كيف فشنو قال لي انا مريض سرطان الرئه وفي مراحلو الاخيره اخدت كيماوي وحالتي أسوأ من اول وما زعلان دا قدري وقسمتي بس ي نوسه لو بتعزي الله وريني الولد الكنتي شايلاهو دا ولدي قلت ليهو لا م ولدك ي محمد دا ولد بكري قال لي نوسه انا غلطت في حقك وما اظن في عقاب اكتر من الانا فيهو دا اصلا ربنا بخلص حق الناس دنيا واخره اخدت حق الدنيا لو دا ولدي خلي يدعي لي ربنا بعد اموت يخفف علي حق الاخره حسيت انو يئس شديد وقلبي بقا مقطوع ولو قلت اي شي بكري ما ح يرضا واحتمال يطلقني بقيت ما قادره اعترف ليهو قال لي نوسه فرحي قلبي قولي لي دا ولدك انا محتاج خبر يفرحني حاجه تطبطب علي قلبي انا كده كده راحل قلت ليهو ربنا يطول في عمرك ويرزقك بالزوجه الصالحه وتجيب ليك البشيل اسمك قال لي انا ربنا اداني البشيل اسمي بس كنت اعمي والسبب مرتي ربنا انتقم منها انا م ح اضغط عليك عشان تردي علي بس ي نوسه عايني لي حالتي بس اشوفو لو مره احضنو واشم ريحتو واودعو ما تبقي انتي والزمن علي انا زي م قلت ليك انا والله ما عايز اشيلو بس انا عايز انسبو لي واشيل اسمي واهلي يعرفوهو ما تظلميني انا لو موتا من غير ما اضم ولدي علي م عافي ليك انا قلبي انقطع مشيت منو من غير م ارد علي كلامو
وكنت متأثره لي حالتو شديد وفي حيره من امري هل اعترف ليهو انو دا ولدو وفي نفس الوقت اهل بكري رايهم شنو ما بضمنو والطريق كلو افكر وراسي ح انشلا وقررت اني احكي مع بكري واقنعو انو نعترف لمحمد وكده كده محمد تعبان م ح يشيل ولدو بس كلامو وانو م عافي لي لو مات من غير م يضم ولدو عليهو دا جنني جن وصلنا متاخرين وكنت تعبانه لقيت بكري قالب المكان وكلو عباره عن ورود وبالونات قلت ليهو الليله في شنو قال لي عيد ميلاد سند ولا انتي نسيتي غلبني ارد عليهو دخلت غرفتي استحميت ولبست وصليت وجيت شوفت اولادي وبقيت شايله سند وسرحانه وسند عباره عن محمد الشاف محمد كلو ح يعلق التعليق دا بس بكري زي الجاتو فوبيا من الحته دي قلت لازم اتكلم معاهو عديت معاهم اليوم وهم مبسوطين الا انا نهاي م مبسوطه وقلبي مقطوع وبالي بعيد بكري حساس بحس بي سالني كم مره م رديت عليهو انتظرت خلصنا الاحتفال والليل جا وبقينا انا وبكري برانا من غير م اتكلم قال لي مالك حبيبتي مهمومه وتعبانه فشنو م رديت كرر علي السؤال تاني قلت ليهو بكري انا لاقيت محمد بكري بقا مخلوع وقال لي انا م كنت عايزك تمشي ليه ي نوسه قويتي راسك اتمنيت تسمعي كلامي وما تخالفيهو محمد ح يشيل ولدو وانتي عارفه انا سند نسبتو لي ودا ولدي وانا بريدو اكتر من اولادي الحقيقين قلت ليهو شعورك ليهو طبيعي ومخلص انت قررت تحتويهو واحتويتو بمعني الكلمه حتي حبك ليهو بختلف بس انت اسمع القصه وقرر بكري نحنا الوحيدين العارفين الحقيقة وداسينها بس سند شكلو بقول الحقيقه اشبه ابوهو وفرق الليل من النهار لي وليك بدل الناس يشكو فيني وفي ولدي ويفهمو غلط احسن الناس تعرف الحقيقه بكري جاط فيني قال لي خليهم يشكو انا ما سأل في زول والبتكلم بقفل خشمو قلت ليهو قدرت تقفل خشوم الناس سند دا لمن يكبر ويتردد عليهوانت م بتشبه امك وابوك ح يتعقد ولا ما ح يتعقد قال لي نوسه انتي قصدك اني ادي محمد ولدي قلت ليهو بكري م كده اسمع كلامي للنهايه انت لو خايف من اهلك عم محمد عارف اني كنت متزوجه محمد وتتزكر لمن انت ضربت محمد وانا جيت حكيت لي ابوك يعني عارف اي شي وح يتفهم حته انو انا رجعت ليهو عشان اكمل تعليمي واهلي ما يعرسوني لي ود عمتي وابوك لو فهم الناس كلها ح تفهم قاطعني ف الكلام قال لي ابوي وغيرو انا م شغال بيهم انا لي بي ولدي دا لو زول شالو مني احتمال اموت قلت ليهو بكري محمد م ح يشيل سند بس هو عايز يعرف الحقيقه قال نوسه ي سلام عليك كيف يخلي ولدو بعيد منو تتزكري لمن هددك وقال ليك بالمحكمه بشيلو قلت ليهو سؤال ليه م عمل كده قال لي نحنا هربنا وم كان عارف طريقنا قلت ليهو م بغلبو بس الحاصل م ح تتوقعو يابكري محمد عندو سرطان وفي اخر مراحلو وهسي لو قال ليك مات صدق قال لي جبتي الكلام دا من وين مستحيل ي نوسه قلت ليك ي بكري شفتو بي عيوني بكري خليني اتم باقي حياتي مرتاحه خلينا نعترف بالسر دا خلي محمد يشوف ولدو وننسبو ليهو وما ح يشيلو ح يعيش معانا ي بكري انا متاكده وبعدين ربنا انت بدل الولد رزقك بي اتنين ودموعو كانت في عينو وما قدر يفتح خشمو طلع مني انا قلبي وجعني عرفت بكري ح يكون م قادر عديل ودموعو حكت عن حالو اتصلت علي علي اخوي قلت ليهو تعالو لينا انا عايزاك في موضوع ضروري قال لي خير ان شالله قلت ليهو خير بس تعال تاني يوم كلمت محمد انو ناس علي جايننا وما وريتو اني انا الطلبت منهم انهم يجو مشا السوق جاب لي الحاجات وقال لي مسافه هم يجو انا بخلص الشغل اتصلت علي علي قلت ليهو تجو بدري قبل بكري يجي وفعلا جو بدري وحكيت ليهو القصه واتاثر شديد قال لي نوسه بكري لازم يوافق وانا ح اتفاهم معاهو انتظرنا بكري جا من الشغل اتغدينا كلنا مع بعض وكانت لمه حلوه علي فتح الموضوع مع بكري وفي الاول بكري كان مصر اننا م نعترف بس تاني علي قدر يقنعو وقال ليهو اهلك خليهم علي لانو دي حاجه م ساهله حسيتو انكسر علي اتصل علي ابو بكري وفهمو القصه كلها وحكا ليهو اي شي عم محمد طلع فاهم جدا وغلط بكري ولدو انو من الاساس كان يقول الحقيقه مافيها شي حتي لو نوسه كانت حامل نحنا كنا ح نوافق عليها بس يضاري الغلط بغلط دي المصيبه وقال انو محمد جاهو كم مره بس م قال حاجه وطلب انو بكره نجي نمشي ناس محمد ونودي ليهو ولدو يشوفو بكري قال م بمشي معانا انا كنت مجبوره اني امشي وعلي وعم محمد تاني يوم مشو معاي والبركه المشينا قالو انو محمد مضايق ومرقد في العنايه مشينا المستشفي الهم فيها اخواتو من شافن سند جو جارين عليهو وشالوهو مني وبقو يسلمو عليهو ويتحسرو علي محمد قلت ليهم فشنو فهموني حاجه قالو لي محمد بين الحياه والموت عم محمد شال مني سند ودخل ليهو محمد كان عباره عن جثه كلام م بقدر يتكلم سمح لمن شاف سند دموعو بقت جاريه ادينا ليهو يسلم عليهو بس ماكان فيهو حيل عشان يضمو عليهو رقدناهو جنبو والناس كلها بقت تبكي وتتحسر انا زاتي قلبي وجعني قلت ليهو محمد انا عافيه ليك وربنا يشفيك ويقومك لولدك بالسلامة ابتسم وقال لي ولدي امانه في رقبتك انتي وبكري وبقا يتلفت عايز يشوف بكري بس م لقاهو عم محمد قال ليهو ان شاء الله ي ولدي ربنا يخفف عليك قال ليهو امانه عليك ي ابوي ولدي دا امانه في رقبتكم خلوهو يدعي لي انا ح اكون محتاج دعواتو كان نفسي احضرو واحضر جديدو وافرح بي انجازاتو بس الدنيا خلاص م عندي فيها قعاد وكل املاكي سجلتهن بي اسمو مافي زول يقدر يشيل حقو وصيتي ليكم كلكم ابقو عليهو عشره وياهو دا الحا يشيل اسمي واشهد ان لا إله الا الله وان محمدا رسول الله وغمض عيونو كانو حلم ولا كابوس ولا تمثيل كلنا بقينا نعاين لمحمد ومخلوعين ومتجمدين عم محمد بقا يتشهد وشال منو سند ومشا جاب الدكتور وقال محمد اتوفي الدنيا بقت ظلام لو م كان جبت سند لي ابوهو كان ح اكون طول حياتي م كويسه مشينا معاهم البيت لغايه م سترو الجثمان والناس كلها عرفت انو سند ولد محمد وكل زول يشوف ولدي يشيلو ويقعد يبكي لحظات كانت صعبه علينا شديد رجعنا متاخرين الخرطوم وبكري زعل لمن عرف خبر وفاه محمد وقال لي يا ريتني مشيت معاكم قلت ليهو خلاص البقا بقا عمي محمد قال لي بكري الوصيه في الزمه محمد قبل اموت وصاك علي جناهو محمد شال سند وبقا يبكي وحالتو صعبه شديد وقال لي نوسه بكره بشوف محامي يطلع لي شهاده ميلاد لسند قلت ليهو احسن قرار اتخذتو وربنا يقدرك وتربيهو وتشيل جناهو
بكري طلع شهاده الميلاد لسند وضبح ليهو من جديد والناس عرفت القصه كلها وفيهم البتكلم كلام ايجابي وفي البتكلم كلام سلبي بس جدعنا كلام الناس ورانا وبقينا في روحنا بكري ساقنا عمره كلنا بالشغاله معاي عمره جدعنا فيها همومنا وادعينا فيها لنفسنا وعمرت لي امي وابوي ومحمد كانت اجمل لحظات في حياتي
مرت الايام والسنين وانا دخلت طب جامعه الخرطوم وكنت متفوقه جدا رغم ضغوطات الحياه وتاني ولدت بت سميتا منه وبكري اتخرج قبليني بسنه وانا م واجهتني مشكله وكنت اوله الدفعه واولادي في مراحل عمريه مختلفه وكنت فخوره بيهم
مرت الايام والسنين وانا اتخرجت وحضرت الماجستير واشتغلت في اكبر مستشفيات الخرطوم دخلت مجال الطب وكنت فخوره بنفسي وبي انجازاتي لغايه م اتخصصت نساء وتوليد وكنت مشهوره وقدرت اطلع بره وادرس كورسات وطورت نفسي عشان المجتمع يستفيد مني وبكري بقا اكبر اخصائي عظام
مرت السنين واولادي كبرو وما ولدت تاني منه ومحمد وحمد وسند وبت بكري
سند قرا هندسه والقسمه جمعتو بي بت عمتو اتزوجها واستقرو في السعوديه وشال اسم ابوهو الاتحرم منو ❤️❤️وفعلا كان سند وسند اهل ابوهو لانو بعد وفاه ابوهو ما كان عندهم البسندهم سند ولدي م قصر منهم وكان اسم علي مسمي ❤️
حمد ولدي الوحيد الما درس ف السودان هاجر بريطانيا في عمر صغير وربنا وفقو درس هناك وعمل بزنس هناك واتزوج بت علي اخوي وسفرناها ليهو ❤️
منه بتي الوحيده الشالت كل صفاتي وكانت اولي السودان في كل السنوات ودرست طب جامعه الجزيره واتزوجت زميلها ❤️
محمد ولدي اكتر واحد كان هادي وحنين وصفاتو حلوه شديد م محظوظ في الحب اتخزل مرتين لغايه. م خطبت ليهو بت زميلتي وحظو ف الزواج طلع احسن واحد درس صيدله وأبوهو فتح ليهو صيدليه
ميعاد بت بكري اتزوجت ولد خالتها ودرست لغات وكانت شاطره جدا زي ابوها ❤️
نجي لقصتي انا وبكري كنت مبسوطه رغم الصعاب وحظي الكعب في الاول انو ربنا جمعني ببكري ورب صدفه خير من الف ميعاد وبعد كنت راقده ف الشارع بدل البيت بقا عندي الف بيت ودا كلو نتيجه صبري وكفاحي وعزمي ودي كانت واحده من اهداف روايتي وبكده انتهت روايتنا صراع قاصر من اهداف الروايه
اول شي التعليم جد العلم برفع المكانات حتي في تصرفاتك المتعلم من الما متعلم ظاهر نوسه اتولدت انسانه شاطره وربنا ابتلاها بمرض ما كانت عارفه هو نوعو شنو وبسبب جهل اهلها قررو قرارت شبه دمرت حياتا وربنا م خزلها لانها كانت قويه وواثقه من نفسها واحترامها وادبها كان سبب في انها تعيش في مكان م بتعرف فيهو وزول وربنا يوقع في حياتا بكري وابوهو وانجبرت عاشت بعيد من اهلها وهمها كلو التعليم وكانت فخر لي اهلها وقدرت توصل للعايزاهو وبي عزمها اجتازت كل الصعاب ❤️
تاني شي الحسد في الارياف بالذات في التعليم مخيف شديد بسبب التنافس اضررت واحده م عندها ذنب ذنبها انها كانت متفوقه وقسمتها سمحه ندعي ليها بالتوفيق اكتر واكتر لا نحسدها ونكتبها وندمرها ونخليها تلف حوالين نفسها وما تلقا الاجابه بس الشي الما قادر يفهمو الانسان البحسد انو دي ارزاق واقدار حتي لو ضريت غيرك عشان بالقوه تصل لمكانتو او الهو فيهو مستحيل تصل ليها لانو من قومتا ربنا وزع رزقك وكتب قدرك الشيطآن م يغشكم وترتكبو غلط لا يغفر زي م حصل لي ايلاف بكل السبل حاولت تدمر نوسه وتكتبها نجحت في انها خلتها لا في السماء لا في الارض بس بقوتها وعزيمتها ومن غير علم للحاجه العندها قدرت تتعالج وتقيف وتتفوق اكتر من اول وايلاف العملت كده عشان تبقا زيها للاسف م قدرت لانو ربنا خلق الناس مختلفين وكل زول بقدرو ونصيبو انكتبت ليها سيئات في غفله ونسال الله ان يبعدنا من السيئات البتجي في غفله 🤲
تالت حاجه الزواج بالغصب والاجبار تسعه وتسعين في الميه الزواج دا نهايتو فشل ونهايتو اتولدو فيهو اطفال م عندهم ذنب اقومو يلقو امهم وابوهم منفصلين اغلبيه الناس شايفين انو الزواج ستره المهم البت تتزوج تتزوج كيف ومنو دا م عندهم فيهو شغله واضرار الحاجه دي بتكون ماشه معاك زي القدر م ح تقدر تتخلص منها فعشان كده زواج الغصب دا نبعد منو بالذات للبنات في عمر صغير الستره كيف تعلمها انها تحافظ علي نفسها من المجتمع والناس الفيهو ستره البت في تعليمها وتوعيتها وثقتها في نفسها ازرعو فيهم القيم والأخلاق وادعو ليهم ربنا م ح يخزلكم ❤️
رابع حاجه اتكلمت عنها دنيا نظره نوسه لدنيا من بدايتها كانت كعبه شديد ما تنظرو للناس من شكلهم ولا من توقع اتوقعتو لتصرف حصل من الزول ما تحكمو علي الناس وتظنو فيهم سوء احسنو نواياكم
خامس حاجه التصرف من غير اهل زي م عملت نوسه كانت زوجه محمد واتخلي عنها في عز وجعها وبعدت منو سنين عشان اهلا م يغصبوها علي ود عمتها رجعت ليهو من غير علم اهلها والنتيجه كانت وقعت في الحرام تلاته مرات قعدت معاهو وهي محرمه ومطلقه وحملت منو واتزوجت وهي حامل ودا كلو نتيجه التصرف من غير اهل اهلك سندك ما تفكرو انكم تعملو حاجه وراهم ح تلقو روحكم انكم واقعين في الغلط وغرقانين فيهو غرق خت اهلك في الصوره واتوكل وما خاب من استشار ❤️
سادس حاجه موقف بكري ما كل الاولاد زي بكري وبكري حبا لنوسه الخير قبل يقع في حبها ووقع في حبها غصبا عنو رغم انو كان خاطب بس الحب مابعرف عواقب لمن يقع مرات بدمر صاحبو ونيتو جواهو كانت حب طاهر م حب استغلال ولا قال نوسه دي مطلقه وماعندها اهل انا استغلها بالعكس كان ليها حمايه وامان حبو البخاف عليكم ما البتخافو منو ومن تصرفاتو ربنا عالم بالنيه وبديك قدرها ربنا رتب اقدارهم ورزقهم كل خير وكانو سند لبعض وكانو فخر للبقيه ❤️❤️
سابع حاجه ام نوسه وابوها رغم بساطتهم بس حبهم لبعض واكتفاهم ببعض كان قادر انو يسندهم في حياتهم واوراحهم كانت متحابه ماتو في نفس الشهر ❤️
اخر حاجه نوسه البت الحكيمه قامت والمصايب كانت حظها ورغم صغرها قدرت تكسر حاجز الخوف وتصلح حياتها للاحسن وبعزيمتها قدرت انتصرت علي المرض وربنا كشف ليها الحقيقه الوحيده الكانت عارفه حجم المرض الكانت فيهو بس م انسكرت قدرت تكسر المرض وتبقا كويسه ومتفوقه وربنا ما خزلها جبر خاطرها ومن توكل علي الله فهو حسبه
تمت بحمد الله
لقراءة باقي الفصول من هنا
تعليقات