الفصل الثالث 3
بقلم عادل عبد الله
الصراحة دياب انقذ حياتي لأني بالفعل كنت ممكن اموت .
حسيت وقتها انه انسان شهم وجدع وأني كنت فهماه غلط .
وفي المستشفي عرفت ان الحمل نزل وحصل لي اجهاض .
ورغم ان جمال وامه كانوا السبب في اللي حصل لي لكن حملوني انا المسئولية وكل ما حماتي تكلمني كانت تعايرني أني السبب في الاجهاض وموت اول حفيد للعيلة !!
أما جمال فبعد ما بدأت أخف واسترجع عافيتي قالي : منك لله ، ده اللي كان في بطنك كان ولد وكان هيكون اول حفيد للعيلة ضيعتي فرحتنا !!
: وانا اعمل اي ؟؟ امك اللي كانت دايما مش رحماني من شغل الدار كله ومهما اقولها تعبانه مفيش فايدة .
: مش انا قولتلك قبل كده متجبيش سيرة امي علي لسانك يا بت ؟!
: منها لله هي السبب .
وفجأة اتحول جمال لوحش وفضل يضرب فيا بأيديه ورجليه وكنت هموت في ايده لولا اللي انقذني منه أبوه اللي دخل علينا بسبب صراخي بصوت عال !!
الحياة كانت سودا قدام عينيا وللأسف مفيش جنبي أي حد يقدر يخرجني من اللي انا فيه !!
فكرت أموت نفسي واخلص من حياتي لكن تراجعت في أخر لحظة وخوفت من عقاب ربنا .
فكرت أني أهرب من البيت والقرية كلها لكن كنت هروح فين واعمل ايه وانا عمري ما خرجت بره المركز بتاعنا ولا اعرف ايه شكل الدنيا بره !!
فكرت أني أموت جمال علشان اخلص منه ومن أمه وارجع اعيش في بيت ابويا تاني لكن خوفت ادخل السجن وأكمل حياتي جوه سجن معرفش هخرج منه ولا لأ !!
كان الأمل الوحيد قدامي أني اتطلق بعد وقت قد أيه معرفش ، لكن أملي الوحيد كان في الطلاق !!
بدأت أحاول اضايق جمال علشان يطلقني وكنت علطول ارد عليه بصوت عال وارد علي أمه واحيانا مش بنفذ اي حاجة يطلبوها مني !!
لكن جمال كان بيرد علي افعالي دي بالضرب والأهانة .
وفي يوم زهقت وقولتله : طلقني ، انا بكرهك !! لو عندك دم طلقني !!
وكان رده عليا : مش هطلقك و مدام بتكرهيني هتعيشي هنا معايا خدامة ليا ولأهلي وبردو مش هطلقك !!
مشاعر الكره ناحية جمال وأمه زادت جوايا لكن كنت مش عارفة اعمل اي !! فمنعت الكلام نهائي !!
وفضلت مش بتكلم مع جمال ابدا ، لما بيطلب مني الأكل كنت بجهز واقدم له الاكل بدون كلام ولما ييجي الليل ويتقفل علينا باب واحد كنت بنزل انام علي الأرض علشان اكون بعيد عنه !!
ورغم كل ده كان بردو بياخد حقه الشرعي مني بالقوة ويقولي لازم تحملي تاني علشان يخلف ويفرح ابوه وامه .
كنت بعمل نفسي مش سمعاه لكنه كان بيعمل كده غصب عني ولما كنت بصده واحاول أمنعه كان بيضربني بقوة لدرجة أنه احيانا كان بيربط ايديا علشان معرفش امنعه !!
ومن البهدله والتعب اللي كنت بشوفها قررت أني مش أمنعه تاني علشان يقل الضرب والبهدلة فيا اللي كنت حاسة أني هموت بسببها !!
وسبحان الله عدت شهور كتير بدون حمل !! وكل ما كان يعدي شهر ويعرفوا أني مش حملت كنت بسمع منهم كلام بيدبحني ويسم بدني !!
وبسبب العناد بيني وبين جمال منعني ازور اهلي نهائيا وبقيت عايشة في الدار خدامة له ولأهله وممنوع عني الخروج وكأني عايشة في سجن !!
كانت ساعات الليل والنهار بتعدي عليا كأنها سنين طويلة مش عايزة تتحرك وتمشي .
نسيت اقول ان كان عند أهل جمال دار تانية وسط الارض الزراعية و علشان كلنا عايشين في الدار الكبيرة كنا بنستخدم الدار التانية في تربية الطيوم وتخزين الحبوب .
كان أسعد وقت عندي لما اروح الدار التانية أكل الطيور وانظف لهم لأني كنت ببعد عن جوزي وحماتي .
كنت كل يوم استني الساعة اللي هروح فيها أكل الطيور وكأني هخرج من السجن .
وفي يوم عرفت من كلامهم أن دياب اخوه الأصغر منه هيخطب ويتجوز .
فرحت أوي بالخبر ده يمكن اكتر منه هو شخصيا واكتر من أمه !!
وكانت فرحتي لأن وجود زوجة لابنهم التاني معايا هيكون معناه اننا نقسم شغل الدار بينا احنا الاتنين .
أخيرا التعب والذل والقهر اللي انا عايشاه هيقل عني شوية !!!
وكمان ممكن عروسة دياب تبقي صاحبة ليا وتخف عني الضغط و الخنقة اللي عايشة فيها !!
وبعد أيام دياب خطب بنت اسمها شهد وفعلا كانت طيبة ورقيقة اوي ولما كلمتها حسيت بارتياح قوي لها واننا ممكن نكون اصحاب .
وعدا كام شهر وانا بعاني من قسوة جوزي وافتراء حماتي وأسوأ الكلمات اللي كنت بسمعها منهم بسبب عدم حدوث حمل مرة تانية !!
اثناء الفترة دي كنت براقب نظرات دياب لي واللي قلت كتير خصوصا بعد خطوبته وارتباطه بشهد .
لحد يوم فرح دياب ، كنت أسعد واحدة في الدنيا لأني حسيت أني ممكن ألاقي حد يقلل من الضغوط اللي عليا ويكون ونيس لي في وحدتي !!
ونفس اللي حصل معايا حصل مع شهد مرات دياب !!!!!
اللي حماتي استلمتها من يوم الصباحية وبدأت تمارس عليها دور الحما بأبشع صوره !!
لكن شهد كان حظها احسن مني شوية لأنها لقيت شريكة لها في اعمال الدار .
لكن بدأت ألاحظ علي شهد انها كل يوم بتكون فرحانة وسعيدة ودايما كنت بشوف دياب بيعاملها معاملة كويسة جدا ودايما يضحك معها بعكس جمال جوزي اللي كان دايما بيعاملني بقسوة وعنف !!
مش هنكر أني حسيت بغيرة من شهد وقولت في نفسي " ليه شهد جوزها بيعاملها كويس جدا وانا جوزي بيعاملني بقسوة شديدة ؟!! " .
كان نفسي يكون.. متابعه للصفحة الشخصية بعد اذنك جوزي جمال زي أخوه دياب ويعاملني كويس ويضحك معايا زي ما اخوه دياب بيضحك مع مراته .
بدأت اقعد واتكلم مع شهد كتير وبقينا اصحاب و اصبح وجودها في الدار اللي بيهون عليا الايام ، لكن حماتي كانت دايما تحاول تبعد بينا .
وبعد اقل من شهرين حمايا مرض مرض شديد وبعد ايام قليلة مات .
بعد موت حمايا اتغيرت كل حاجة في الدار وحصلت خلافات كبيرة بين جمال جوزي واخوه دياب واخواتهم الأصغر عاطف وعماد !!
وقسموا الارض بين الاربع اخوات وأخد جوزي نصيبه من الارض وقرر يبيعه علشان يبدأ مشروع خاص بعيد عن شغل الارض والفلاحة .
لكن دياب قرر يحتفظ بالارض ويشتغل في الفلاحة في ارضه وارض اخواته عاطف وعماد القصر اللي امهم كانت وصية عليهم .
جمال اشتري سيارة نقل وشغلها في نقل الخضار والفاكهة من الاراضي للأسواق .
وبعد فترة قصيرة بدأت احوالنا المادية تتحسن كتير .
واستمرت حماتي في معاملتي بنفس القسوة ويمكن أشد .
وفي يوم حماتي طلبت مني اقوم بكل شغل البيت وحدي
لقراءه الجزء الثاني من مذكرات حبيبة من هنا