رواية دون أن أشعر
الفصل الثالث والعشرون 23 والاخير
بقلم ال زهراء
وقفت قدامو وقولت ليهو ما تمشي اسمعني...، ما رد واتجاوزني فتح الباب بقوة وقفلو وانا بقيت ببكي!!، قعدت في الكنبة للساعة 12وما جاء بقيييت ماشة وجاية وما خليت صاحب ما اتصلت بيهو قلقت شديد وما عرفت اعمل شنو!!، شربت كوبايه موية عشان اهدا بس دقات قلبي ما هدت وبقييت متوترة توتر شديد!!!، مدرك جاء وهو بفرك في عيونو ونعسان قال لي ماما عايز موية!!!، كبيت ليهو وتاني سوقتو سريرو لانو كان نعسان شديد غطيتو وشوفت يزن!!، لقتيتو كاشف فغطيتو برضو!، طلعت وبقيت منتظرة الصبح اذن ولسه ما جاء!! صليت وبقييت استغفر قولت في نفسي انا مالي ما اتحكمت في اعصابي وليه قولت كدة!!!، قريت قرآن ورقدت في المصلاية والدموع نزلن مني!!!.
بعد فترة عاينت للساعة ولقيتها 6 قومت وكنت مرهقة شديد ،صحييت الاولاد وقولت ليهم الروضة!!!، جهزتهم وجهزت الشاي وبردتو ليهم يزن قال لي بابا سياف وين؟!، قولت ليهو بابا الليله طلع بدري عندو شغل، طلعتهم الترحيل وبقييت قاعدة وكنت تعبانة شديد رقدت في الكنبه وكنت بنوم 5دقائق وبصحى مخلوعة!!! لانو ما عارفة حاجة عنو!!!، عاينت لقيت الساعة 11، اتصلت بيهو ما رد علي، قولت خلاص ماف حل غير اتصل بامو تشوفو وين احتمال يرد ليها، الباب فتح انا طوالي جرييييت طلع هو!!!، قولت ليهو وين كنت انا خوفت عليك وقولت الا حصلت ليهو حاجة، ما ردا لي ودخل كانو ما كنت قاعدة اتكلم معاه مسكت يدو وقولت ليهو سياف عليك الله ما تسكت مني ،سكوتك دا بوجعني،اقتلني احسن بس ما تسكت علييك الله ،نفض يدي ودخل الغرفة،دخلت وراهو طلع ملابس وكانت متجهة على الحمام وقفت في وشو وقولت ليهو اسفة انا ما كان اقول كل الكلام دة انا ما من حقي اعايرك بعلاقة اهلك ،انت ما حصل قولت لي حاجة بتخص اهلي بالرغم من انو عارفنا انا ومروة علاقتنا من زمان ما تمام ، انا اذييتك بعترف بالحاجة دي وما عندي اي مبببرر لفعلتي ،انت ما بتستاهل مرة زي ،انا زولة سامة!!!، بقيت ابكي بصوت وبتنهد وتاني انهرت!!!وبعدها حسيت انو جسمي خدر وانو الدينا لافة بي وما وعيت لاي حاجة بعدها.
_______________________
بلسان سياف
لمن وقعت في الأرض يادوب عرفت حجم الغلط الارتكبتو انا ما مفروض اغيب من البيت الوقت دة كلو انا مفروض اعرف انو هي بتقلق وبتخاف حتى لو انا غضبان منها ما من حقي اخليها تتعب ،جريت ليها وشلتها وختيتها في السرير مشيت وقست الضغط وطلع منخفض شديد ،ضربتها من خدها برفق وقولت ليها مها اصحى!!!، صحت بعدها بكم دقيقة وقامت وهي بتبكي تاني وحضنتي وقالت لي عليك الله سامحني!!!، ما حا اعيدها!!، زحيت ليها شعرها قولت ليها تمام بس ما تبكي انا حا اعمل حاجة تاكليها، قالت لا ما عايزة اكل الا تقول سامحتني، مسحت ليها دموعها ،قولت ليها سامحيني انتي!!، شوفي عيونك ما بتشافن من البكاء، وباين انك ما نومتي طول الليل! انا ما مفروض اخوفك علي!، ختت يديها الاتين في خدودي وقالت لا انا الأسفة ما تعتذر ،قولت ليها طيب قومي معاي تاكلي حاجة، قالت لي بتاكل معاي ،قولت ليها زي ما عايزة بحصل، فرحت ودموع نزلن منها ،مسحتهن ليها وقولت ليها بكاء ما فينا تمام.
كانت عايزة تقوم بس راسها تاني لف وقعدت في السرير،قولت ليها انا بمشي اعمل ليك حاجة وانتي ارقدي مسكتني من يد القميص وقالت لي ولو اختفيت، ضميتها وقولت ليها افوتك كيف في الوضع دة، قالت لي سامحتني انت!!!، عاينت ليها وقولت ليها ايوا، قالت لي من كل قلبك، قولت ليها اي، قالت لي احلف، قولت ليها والله العظيم سامحتك اهدي كانت ضربات قلبها عاليه شديد ،انا العملتو في البت دي شنو!، قولت ليها اسف انا عصبت بس ما كان امشي واقلق بيك!!!، قالت لي هس ما عايزة اي اعتذار منك كفايه اسي انت معاي، رقدت عملت ليها بيض على السريع واديتو ليها قامت طوالي وما بعرف لشنو وحاولت تمشي بس ما قدرت وقالت لي سياف الحقني وثبتني ثبتها ووديتها الحمام استفرغت ،شلتها لانو جسمها كان تلج وما قادرة تتحرك خطوة، خوفت عليها وقولت دا شنو العملتو انا دة، لو جاتها حاجة ما بسامح نفسي ،قولت ليها الاستفراغ دة من البيض ولا جاك بدون سبب ،قالت لي بدون سبب ،قولت ليها طيب اكلي وحا نمشي نفحص ،قالت لي لا ما عايزة اوريك عايزة شنو، قولت ليها شنو!!!، قالت لي بلهفة سمك يا سياف سمك يكون من نارو ومعاه ليمون، عاينت ليها وقولت ليها طيب تمام اتصلت بمطعم... وطلبت منهم،مشيت وعملت ليها عصير وقولت ليها اشربيه عشان تتصبري قالت لي طيب، شربتو وبقيت قاعد جنبها، وهي كانت بتعاين لي، لمن جاء الطلب فتحتو وهي متحمسة وقالت الله ريحتو تشهي ،بقت تاكل وتاكل ونست انو هي عزمتي للاكل معاها قبيل!!، ضحكت عاينت لي قالت لي في حاجة ،قولت ليها قبيل منو الشرطو اكل معاه ،ضربت راسها وقالت ايوا نسييت، هاك كان بتمد لي في القطعة الأخيرة وشكلها كان بضحك ،قولت ليها انتي عايزاها صاح أكلها ماف مشكلة اعتبريني اكلت معاك ،قالت لي جد، وبقت تاكل، استغربت لانو مها مستحيييل تتنازل ولازم تحنس و متأكد انو في النهاية حا تاكلني ليها بالقوة، لمست جبهتها وقولت ليها ماف اي حرارة بس نفحص للاستفزاغ دة!!، شبكت يديها الاتيين ببعض وقالت لا ما عايزة اي فحص!!، قولت ليها لشنو ما عايزة تعرفي مالك، قالت لي انا عارفة مالي لكن، قولت ليها وريني انا ما عارف، قالت لي دقيقة بس فتحت الدرج وطلعت ليها ورقة ومدتها لي قالت لي دة ما الوقت المناسب بس تقول شنو انا ما بقدر ادس عليك ،فتحت الورقة وانا خايف لقيتو فحص حمل وطلع إيجابي عاينت ليها وقولت ليها دا فحصك ؟؟؟؟؟، قالت لي ما قريت الاسم ولا شنو مبروك حا تبقى احلى بابا، قام وبقى حايم بالغرفة وتاني قرب لي وقال لي مها انتي جادة،، قولت ليهو وانا بضحك التقرير بكذب ولا انا بكذب!!، حضنتها وقولت ليها الحمد لله رب العالمين، ربنا اكرمنا بالنعمة دي ،قالت لي الحمدلله،فكيت منها وقولت ليها اسف انا لو حصل ليك حاجة ولجنين....، قاطعتني وقالت ما حصلت ولو حصلت مني ما منك انا القولت الكلام الشين وانت ما عارف اصلا اني انا حامل ،بس بشكر ربنا انو ما عرفت لانك كنت ضغطت نفسك ومشيت كلامي وانا ما عايزة الحاجة دي، انا غلطت وباعترف بغلطتي واتسرعت!!!، قولت ليها من حقك تاخدي العداله لابوك يا مها بس ما عايزك تعذبي ابوي من دون دليل وأمور جرجرة وحبس انا بذات نفسي حا اسالو، قالت لي هو بجاوبك لكن قولت ليها انا بعرف اخليه يقول الحقيقة كيف انتي واثقة مني، قالت لي تمام الثقة.
اليوم التاني مشيت ودخلت ليهو كان راقد وبعاين للسقف ،هو من وفاه ندى بقى هادي شديد وما زي زمان، كأنو ندى شالت روحو معاها ،بس ما بستغرب منو هو مهما بعاملنا زمان بوحشية بس كان بحبنا اكتر من نفسو، اتصلت بيها عشان تسمع الحقيقة بنفسها، كنت واثق انو حا تسمع عكس المتوقعاهو لانو بعرف ابوي، فتحت الاسبيكر وبقيت ماشي عليهو انا نبهتها في البيت انو ما تعمل صوت، قعدت في كرسي وسلمت عليهو وقولت ليهو ابوي انا حا اكون ابو عن قريب ،عاين لي بفرح كبير وقال لي حا تجيب ندى صاح، قولت ليهو إن شاء الله ربنا يرزقني ببت ويسمع منك ،قال لي إن شاء الله ،تاني قولت ليهو بس عندي موضوع شاغل بالي يا ابوي وما مخلي حياتي تمشي، قال لي شنو قولت ليهو انا عرفت انو الملف الكنت بتعاين ليهو كانت المرحوم عندو قبل الحادث وعرفت كمان انو سجل مكالمتو كان انت من ضمنهم وانت اخر واحد مفروض المروحوم يلقايهو عايزك بس توضح لي الحصل الوقت داك عشان مها لو عرفت ما عارف ابرر ليها بشنو ؟؟،وما عايز اخسرها ولا اخسر أولادي معاها قال لي انت التفاصيل دي عرفتها كيف؟، قولت ليهو يا ابوي ما ضروري اسي التفاصيل الله يرضى عليك وريني الحقيقة، قال لي كنت عايزو يلاقاني عشان اقول ليهو اتنازل شويه والوقت كان متأخر بس عشان هو هدد انو الساعة 6بكون معاهم ومكلمهم بالحقيقة ،قبل ما يصل لي قتلوهو ناس تسعة طويله وانا لمن شوفتو طول قررت امشي ليهو في البيت بس لقيت عربيتو في الطريق ونزلت وشوفتو لقيتو مضروب شوفت نبضو لقيتو ميت،وكان في ملف شلتو منو وتلفونو كان تحت واقع وكان برن، تاني انا طوالي طلعت العربية واتخارجت، بس والله ما قتلتو!!!، انا لو كان عايز اقتلو ما كنت قتلتو من زمان بس في النهاية هو اب وعندو بنات وانا ما كعب للدرجة دي، انا حدي معاه انو اهددة او اسجنة بس كتل لا. قولت ليهو في دليل يثبت براءتك ،قال لي ناس تسعة طويييله لسه في السجن امشي واسالهم بنفسك وبوروك الحقيقة قول ليهم من طرفي لانو انا زمان شبعتهم قروش عشان بس اعرف المعلومة دي،قولت ليهو هو في تاني في حقيقة، قال لي اي هم اعترفو لي بس ما كان في صالحي اتكلم الفترة ديك لاني كنت مهدد الأوراق الاصليه كانت عندو والعندي كان مجرد نسخة نسخها هو عشان يوهم عمر بس، وبعدها حصل الحصل ونسيت القصة ،قولت ليهو انت ليه اصلا مشيت وسالت ناس العصابة قال لي كان في حاجة غريبة جنب العربية خلتني امشي واشك انو قاصدنو ،قولت ليهو شنو ،قال لي بطاقة، قولت ليهو بطاقة بطاقة شنو ،قال لي ما بقدر اتكلم.
في اليوم التاني مشينا انا ومها لأنها راسها قوي وقالت الا تمشي، المهم سمحو لينا بالزيارة!!!، قعدت وقولت ليهو يا عطاء انا جايك من طرف ابو شنب!!، قال لي أووو صاحبنا القديم عايز شنو يا فردة، قولت ليهو القال ليكم اقتلو عمر منو ،ضحك وقال لي انت عايز تبحت المدفون مالك ،مها قالت ليهو عليك الله كلمني، قال لي الرقة المتحركة دي جايبها معاك عشان اتكلم ولا شنو، قولت ليهو احترم نفسك...، مها مسكت يدي وقالت لي لو سمحت اهدى، قولت ليهو انا بديك ضعف ابوي اتكلم وبحول ليك الحساب للعايزو وكمان لو شهدت ضد الفاعل انا... قاطعني وقال لي ما بشهد انا ما عايز اموت المهم انا بقول بس القروش تتحول اول، قولت ليهو جيب رقم الحساب ملاني ليهو حولت قولت ليهو اتفضل قول قال لي بابكر اسمو!!، قولت ليهو بابكر منو؟؟!، قال لي بابكر محمد ، عاينت لمها ومها عاينت لي وبقت تصرخ!!!، قامت سريع وطلعت بره وانا لحقتها قولت ليها لا ما بصدق كيف يا سياف!!!، قولت ليها إهدي وهاك اتنفسي اول ،اخذت بخة بس ما جاب خبر ،قولت ليها ما كان تجي معاي ،كان عندي جهاز تنفس في العربية كنت بختو دايماً للطواري نفستو بيها حتن اتحسنت، قولت ليها نرجع البيت ،قالت لي لااا ما نرجع نمشي نشوفو ،قولت ليها انا خايف عليك وعلى صحة الجنين ،قالت لي ما تخاف انا قوية والبيبي قوي وبنتحمل ،مشينا ليهو في البيت لقيناهو قاعد وبسمع في رادي وبدندن ،مها جاتو وقفلت الرادي وقالت ليهو بابكر انت قتلت ابوي ،قام مخلوع وقال لي بتي بسم الله انا اقتل ابوك لشنو ؟؟!، قالت ليهو ما تكذب انا عرفت الحقيقة كلها وحتى سجلتها ليك عشان ما تنكر، طلعت ليهو تسجل عطاء!!!، انا ما كنت مفكر انو كانت مشغلة التسجيل الوقت داك والله، ضحك وقال ليها كشفتيني كيف بعد السنين دي كلها قعد وقال ليها حا تعملي شنو امشي للشرطة وعطاء بنكر اي حاجة وبقول اجبرتوهو يعترف ياسمي وانا برفع فيكم تشويه سمعة!!!، قولت ليهو ما عطاء بس الممكن يشهد عليك ابوي زاتو ممكن يشهد وحتى عندو بطاقتك النسيتها جنب العربية!!!، ضحك وقال لي بطاقة دليل، قولت ليهو ما براها الدليل بس انت ناسي حاجة مهمة سجل مكالمتك معاهو قبل الحادثة ،قال لي عرفت كيف، قولت ليهو الواسطة ليها دور تخليني اعرف سجل مكالمات ليهو 4سنة وحتى كمان المكالمة موجودة بتحب تسمعها ،مها بحلقت عيونها فيني ،قال لي وهو بتمتم هو براهو العملها في نفسو!!!، كان ما كاتب لي اي حاجة وغشاني، وفي النهايه عايز يقول الحقيقة ويهرب بالقروش حقات الاراضي البعاهن ،بس انا كشفتو في آخر لحظة وخليتو يلاقيني اول وكتلتو عشان كذبو وعشان استغلني وخلاني اشتغل كعبد ليهو طول السنين الفاتن،ولحسن الحظ لقيت القروش في ضهر العربية وشلتهن، وخليت محمد يفكر انو معاي الملف الأصلي!!!، بس عشان اكون مهددو بحاجة وما يتكلم!!!،ضحكت وقولت ليهو وقعت في شر أعمالك تصدق غبي انا وين القى سجل مكالمة ليهو 4سنين بس استنجت من كلام مها القالتو لي انك اكيد ما عايز التلفون يصل للشرطة لأنها قالت انك دسيتو طوالي وقولت نسيت ما اديتو وحتى اديت ولدك يفرمطو معقول بس عشان قروش تقتل، قال لي كان عايز ياكلني انا،محمد من وقت عمر دسا الوصية محمد كان مغرقو بالاراضي وانا ما كنت عارف السبب وتاني شغلني معاه في المخدرات ووعدني بانو بديني املاك فاشتغلت عندو المهم شوفتو شال ورقة مننا واستغربت وباريتو لمن وصل البيت ودخل مشيت وشوفت العربيه وعاينت للورق ولقيتو ورق ورثة وتاني في ورق اراضي كتير وفيهن كان الأراضي يلي مفترض يكوننن باسمي ،المهم عشان اتأكد اتصل بزول بعرفو في سجل الأراضي قال لي الأراضي ديل اتباعن وباعهن سيدهن عمر ،زمان كنت واثق منو عشان كدة ما مشيت اتأكد وكنت مبسوط بيهن،المهم اتصلت بيهو وقررت اقتلتو اقتلتو وارتاح منو ،ابوك لمن جاء قال لي قتلت عمر لشنو ؟؟!، اتذكرت انو الزول دة شال كل الورثة براهو وانو الأوراق القريتهن عكس الكلام دة فطوالي هددتو انو لو اتكلم حا أفضحو وانو الأوراق الاصليه معاي وانا اصلا اخر همي الأوراق وما شالتهن بس كنت عايز انتقم من عمر عشان ضيعت شبابي وانا مباريه.
جات الشرطة وساقتو وبضغط من الأمن عطاء اعترف وابوي شهد كمان وبالتسجيلات السجلناها اتسجن بابكر واتحققت العداله لابو مها،مها كانت بتبكي اليوم داك بكاء شديد وانا كنت جنبها وما خليتها ولا ثانية.
كنا بنعمل ليهو صدقات من فترة للتانيه وبتدعي ليهو ربنا يغفر ليهو ، ومشت عفت أعمامي كلهم وهم عفو ليهو.
______________________
بلسان مها
بعد مرور 2 سنة
يلا تنام يلا تنام لضبحك طير الحمام روح يا حمام لا تصدق بضحك على ندى لتنام ،بدل تنومها الاغنيه دي كانت بتضحك لي بس، بقيت العب معاها وقولت ليها انوم انا وما تنومي انتي!!!، شلتها وقولت ليها ابوك ما يكون اسي قاعد مع شقراء حا اقتلو والله اتصل بيهو يا بتي ولا لا، قولت النتصل اتصلت فيديو كول ما ردا، قولت بكون مشغول، فتحت الواتس وعاينت للحاله ما كان فيها شي مريب كانو مجتمعين في طاوله وهو قاعد في نصهم قولت ليها حسي بالفخر يا بتي ابوك قاعد مع نخبه من اميز أطباء الجراحة في العالم ،بقيت اهز فيها عشان تنام واغني ليها جو يزن ومدرك جارين!!!، قولت ليهم اختكم عايزة تنوم ما تصحوها العبو جوة بدون صوت دخلو جوة وسمعو الكلام طوالي، قولت في نفسي مؤدبين وعاقلين ما شاء الله بس انا وسياف تعبنا فيهم ما اكذب وسياف كان حازم اكتر مني في موضوع التربيه لكن انا اتعلمت غلطي وبقيت لو غلطتو بوريهم الصاح وما بدافع ليهم ،نامت وختيتها في السرير ،وقولت في نفسي يا رب بكون مع منو اسي.
الباب دق مشيت افتحو وانصدمت لمن شوفتو صرخت
وقولت سياف وجريت حضنتو!!!، ضحك وقال لي يا بت انتي مجنونة!!!، قولت ليهو مشتاقة ليك، قال لي وانا مشتاق ليك يا حبيبتي، دخلنا جوة قرب لندى وقال لي اميرتي دي نايمة ليها كم اصحيها، قولت ليهو لا يادوب نامت بعد تعب، قال لي مشتاق ليها انا عايزها تضحك لي اصحيها ،قولت ليهو بعدين لمن تصحى براها تصحيها شنو عليك الله، قال لي بصحيها براحة ، كان جاد المشكلة، قولت ليهو سياااف،ضحك و قال لي تمام خليها تنوم حبيبه ابوها ، عفاريتنا وين، قولت ليهو جوة يلعبو، دخل ليهم جوة وانا لحقتو حضنوهو الاتنين وبقى يلعب معاهم، تاني طلعنا عاين لي وقال لي والله بقيتي حلوة اكتر ولا عشان انا طولت منك ما بعرف ،ضحكت وقولت ليهو ليك 15 يوم بس وبعدين ما على اساس شهر قال لي ما قدرت ابعد منكم ،ندى بكت عرفتها صحت سياف جرى وشالها وبقى يبوس فيها وهي تضحك!!، قال لي شوفتي كيف يا مها ما قولت ليك بت ابوها طوالي مما شافتني وقفت بكاء ،قولت ليهو بغيظ عاجبها طولك بس ،عاين لي وقال يا بتي امك شكلها غيرانة، ضحكت رقد وختاها في بطنو وبقى يلعب معاها وانا بقيت اعاين ليهم قال لي تعالي يا حبيبتي ووريني ال15 يوم كانن كيف من غيري، جيت وانا كلي حماس ورقدت جنبو حاوطني بيدو وبديت احكي ليهو واحكي لمن لقيتو نام من التعب، عاينت لندوش لقيتها رجعت نامت تاني، شلتها براحة وختيتها جنبو وبقيت اعاين فيهم ،جاء يزن داخل غرفتنا وقال لي ماما نحن جيعانين، مشيت وعملت ليهم سندوتشات وعصائر ووديتها ليهم.
بالمساء كدة كلنا اجتمعنا كعائلة يزن ومدرك كانو بورو في ابوهم في نتائج اختباراتهم ومبسوطين وهو شال ندى ومتفاعل معاهم وانا بس كنت بعاين ليهم وبتبسم براي.
انا كمها عشت تجربه سيئة قبل كدة وقفلت باب الحب من حياتي بس #دون_أن_أشعر حب سياف اتسلل جواي وبقى جزو مني.
وبعد اتزوجتو اتعلمت أمور كتيرة منو اتعلمت الصبر واتعلمت وزن الكلام وبقيت اضبط كلمتي قبل ما تطلع والحمدلله انو طول السنتين ديل مشاكلنا كانت بسيطة وبتنحل في لحظتها، وهو طبعا عادة الهرب دي خلاها لانو ندم اخر مرة وانا بقى كلامي معاه هادي شديد ورجعت مع كل النااس كدة وخليت جني الزمان ،المهم هو غيرني للأحسن وقدر يرجع روحي القديمة ويزح نفسي المزعزعة والمضطربة نفسياً... انا بشكر ربنا عليهو وبحمدو على النعم التي لا تعد ولا تحصى،قاطعني من شرودو وهو بقول مهااا، قولت ليهو نعم، قال لي شاردة وين ،قولت ليهو فيكم، ضحك وقال لي تعالي قريبة جيت وتاني الاولاد مشو ينومو وندوش كانت نايمة في حضن ابوها شالها وختاها ،وتاني جاء وخت يدو حوليني وقال لي قبيل ما كملتي لي، قولت ليهو ما عارفة وقفت وين انسى بقى يمرر في اصابعو في شعري وقال لي لا احكي لي بديت احكي واحكي واحكي وهو بس يعاين لي ،قولت ليهو انت ما معاي صاح، قال لي اي ما معاك شارد في جمالك، قولت ليهو ثقيل ياخ، ضحك وقال لي احكي اخر مرة...، قاطعتو وقولت ليهو ما عايزة احكي حردتا، احكي انت مؤتمرك قال لي هو انا عرفت ليهو شنو من شوقي ليك ولاولادي، ضحكت وقولت ليهو بحبك ياخ، قال لي وانا.
اللهم صل على محمد عدد ما ذكره الذاكرين وغفل عن ذكره الغافلين
تمت بحمد الله