رواية اللعب على حبلين
الفصل العاشر 10 والاخير
بقلم مجنونة
أول حاجة حابة اشكر منوس إنو خصصت لي فقرة من الرواية دي اقدر اتكلم فيها و احكي ليكم عن نفسي شوية أنا عارف إنو في جزو منكم بكرهني ممكن بي سبب و ممكن بدون سبب عشان أنا ما طلعتا البطل بس 😂 وفي جزو بحبني و شايفني مظلوم لكن الحاجة المتاكد منها إنو بعد البارت دا كلكم هتكرهوني أنا أحمد إبراهيم تاج السر البخيت عمري 35 سنة شخصية عادية لا اسمر ملتحي و ولا مفتول العضلات و كريزما ذي وليد داير اصرح ليكم بي حاجة ممكن تتفاجؤ بيها كلكم بس أنا ما حبيت زينب لا هسع ولا زمان عمري ما حبيتا بس كنت مجبور عليها تحت شعار اكفي قدحك و استر بنت عمك 😂 أنا اعتزلتا فكرة الزواج من زمان وكنت دائماً بتحجج ليهم بي إنو ما جاهز و بيتي لسا ووووو لحدي ما ابوي لبسني في زينب و قدر ما حاولتا افرفر ما قدرتا و لمن زينب حاولت تنتحر مشيت ليها في المستشفى و قلتا ليها أنا ما جاهز هسع قالت أنا ذاتي دايرة أقرأ وقتا قلتا خلاص يا أحمد جاك الفرج و الفترة دي كافية عشان تخليها ترفض او تقدر تتصرف فيها و اقنعتا ابوها و ابوي بي موضوع نخليها تكمل دراستا لحدي ما اجهز نفسي و وافقو معاي طبعاً كنت عارف إنو زينب بتتكلم مع اولاد و الموضوع ما كان فارق معاي كتير و يوم اخوها لمح لي ختيت خطتي الجهنمية لي الهروب المؤبد من زينب و الخطة مشت في البداية لحدي ما زينب فاجأتني بي هروبا 😂 أساس الخطة انها تقول ما دايرني و عندها زول جاهز و أنا بدوري اسحب ورقي بس الحيوانة دي هربت والموضوع إتحول لي موضوع كرامة لازم اردها لأنو الاهل والقرية والقريات المجاورة كلها بقت تتكلم بي سيرتي و إنو خطيبتي شردت مع واحد تاني و طبعاً لو سكتا ببقى عيب في حقي و حق رجولتي فا إطريت افتش عليها بالرغم من إنو كنت بتمنى إنو ما نلقاها لكن على قول زينب الدنيا دي طالماً فيها معرصي،ن ما بتجيك عوجة تب 😂 جاني سيد البوكس الوصل زينب لمن الخبر إنتشر وقال هو وصل بنت بي نفس المواصفات دي وشكلو مغبون عليها شديد لأنو حكى لي القصة بالتفصيل المومل وقال لي لمن تلقاها اتصل لي اجلد معاك و مشى لمن قال الكلام دا سمعو واحد من اولاد الحِلة و جرا كلم رجُال الديوان و نادوني أنا قالو لي الكلام دا صاح يا أحمد قلتا ليهم اي صاح قالو لي من دربك دا لي المدينة ولازم تجيب البنت دي و فعلاً مشيت لي سيد البوكس و وصلني بي ست الشاي الوصلها ليها و هي حكت لينا عن الولد السرق قروشها و طلعت منها بالليل و كدا مشيت القسم و بلغتا عن بنت مفقودة اخدو مني البيانات وقالو لي لو في مستجدات بنتصل ليك رجعتا الحِلة تاني يوم إتصلو لي من القسم وقالو في بنت بنفس المواصفات دي في بيت الضابط وليد محمد الامين طبعاً الاسم ما غريب علي بس ما إتذكرتو في البداية فاتاني رجعتا المدينة تاني يوم بس المرة دي معاي عمي وعمتي فاطمة و الفاضل عشان الدلك مشيت القسم اخدتا عنوان بيت الضابط و مشيت ليه مع الفاضل و حصلت المشكلة دي كنت بتمنى إنو البنت المعاهم دي ما تطلع زينب بس طلعت هي 😡😫😩 و الاظرط من كدا الفاضل طعن عمتي و دخلونا السجن قلتا خلاص يا أحمد موضوعك مستحمي وعفنت فيك بعد ما مشينا القسم و في التحري كتبو إسم المجني عليه منى تاج السر البخيت عرفتا إنو دي عمتي والفاضل ذاتو عرف المهم إتصلتا لي عمي و حكيت ليه في البداية ما صدقني بس اظنو مشى المستشفى و حنك لي اختو و فكونا و عمي طلب مني امشي اجيب زينب و لو جبتا ها اطر ازوجا و ما باقي لي اي طريقة اتخلص منها غير اقول ليها بالحقيقة الحلصت من سنين طويلة و سبب الخصام بين عمتي و الاهل كلهم و لي إتبرو عنها و مافي زول جاب سيرتا الفترة دي كلها مشيت لي زينب في الغرفة و قلتا ليها ممكن ما تصدقي القصة بس دايرك تسامحيني و تعفي لي لانو أنا داير داير ابدا معاك حياة شفافة خالية من الكذب أنا ما طاهر ذي ما شايفاني أنا اسواء إنسان ممكن تشوفي في حياتك
احمد_مواصل
زينب بقت مركزة معاي و دايرة تعرف السبب شنو جريت نفس عميق و قلتا ليه الكلام دا قبل اكتر من 30 سنة عمتي منى دي إتزوجت واحد من الاهل البعيدين ديل كان تاجر في المدنية وهي مشت المدينة معاهو بعد كم سنة من زواجهم جاهو عقد لي السعودية ومشى و من هناك خبرو إنقطع يلا أهل راجل عمتي دي ما كانو بعاملوها سمح و لمن بقو بجوعوها و بجوعو اولادها رجعت الحِلة الوقت داك كان عندها وعد عمرها بكون ذي 5 سنة كدا و وليد دا صغير بكون كم شهر على ما اظن المهم عمتي دي نزلت في البيت الكبير في البداية كل الاهل عاملين ليها شنا و رنة مرت المغترب و اولاد المدينة بعد كم شهر كدا الناس نظرتهم ليها إتغيريت في البقول طلقوها و في البقول مات حتى اعمامي و ابوي بقى ما عندهم ليها حاجة المهم يا زولة بعد سنة و حاجة طلعت إشاعة إنو راجل خالتي دا مات و في ورثة طلعت لي اولادو عمتي دي قالت غير اولادها ديل ما عندها حاجة و هم بس بنفعوها قامت دخلت وعد المدرسة طبعاً الوقت داك مدرسة بنات مافي اولاد بس و بنهاجر ليها هجر عشان نصلها و عشان مافي بنت بتقراءة غيرها كانت بتمشي معاي أنا وبنرجع سواء من نحن صغار في الاساس لمن دخلنا الثانوي سواء لمن نجحنا في الشهادة و دخلنا نفس الجامعة بقينا حبينا بعض شديد و الله ادمنتا عديل بس ما كنت جاهز لي عرس و هي ذاتا قالت دايرة تخلص قراية و إتفقنا بعد نتخرج سواء نعرس و نسكن في المدينة يلا لمن نزلنا السمستر الاول لقينا ود عمها هي دكتور في نفس الجامعة كان زول ما شاء الله هيبة و جاهز من كل النواحي مثقف و راقي بديت احس أنو عندو ميول لي وعد دي و وعد ما رافضة الفكرة كم مرة حزرتها منو ما إشتغلت بي لحدي ما في يوم قال داير يطلب يدها و هي وافقت بكل بساطة ولا راعة لي ولا لي حبي ليها و بكل برود قالت لي مافي زول ببدل الجنة بالنار كلمتا ديك و جعتني شديد و قررتا انتقم منها لحدي ما في يوم الشيطان و سووس لي في راسي طبعاً هي نازلة في بيت اسرتهم الكبير و أنا نازل في داخلية المهم متزكر اليوم كان جمعة و كان في مناسبة حقت جيرانهم ولا اهلهم ما متأكد كلهم مشو إلا وعد كان عندنا إمتحانات ما مشت أنا جيت البيت تاوقتا بي الشباك لقيتا نايمة قلتا خلاص دي فرصتي اشتريت لي مخدر من الصيدليا رشيتا بيه و عملتا عملتي فيها 💔 بعد شفتا في الوضع داك خفتا شديد شلتا علبة المخدر جدعتا في غرفة الدكتور إسمو عمر تاني يوم ما جات الجامعة و بتصل ليها ما بترد مشيت البيت من دخلتا حضتنتي وقعدت تبكي بكل حيلا وقالت لي وديني لي أمي طبعاً عامل ما فاهم حاجة و هي ابدت تحكي لي قلتا ليها خلاص لمي شنتطك و ارح رجعنا القرية وعد إتغيرت 180 درجة بقت ما بتاكل ولا بتتكلم كل الناس انتبهو ليها أما أنا كنت مبسوط عشان ما بتتزوج غيري لحدي ما بقت تستفرغ 🤮🤢 و يغمى عليها و إنتشر خبر إنها حامل و طبعاً دي اكبر جريمة عندنا ليها و عقوبتا الموت بس الاهل كلهم قالو يقتلوها و اولهم ابوك كان اكتر واحد متعصب فيهم و قدر ما عمتي إترجتو عشان يرحم بتها رفض و وعد لمن يسالوها عملتي كدا مع منو تحلف تقول ليهم عمر إغتصبني لأنو لمن فتحت عيونا لقتو هو ولقت المخدر في شنطتو المهم عمتي بالليل ساقت عيالها و شردت مشت المدينة بعد فترة سمعنا إنو وعد إتزوجها عمر و غطى على عملتو دي و أنا خليت الجامعة و ما عارف تاني حصل فيها شنو بس من داك قررتا تاني لا أحب ولا أتزوج لانو كل حبي اديتو لي وعد لقيت زينب مصدومة و بتعاين لي بي إستحقار ما عادي قالت لي أنت جادي هزيت ليها راسي بي نعم قطعت فيني كف لمن حسيت بي صنا في إضاني و بقت تصرخ أنت مجنون ما بتخاف الله حرام عليك ياخ دي بنت عمتك و عرضك و شرفك كيف تعمل فيها كدا بس سببك أنت 16 سنة أنا ما عارفة حاجة عن عمتي يا حيوان و جاي تحكي لي بكل بحاجة خاف الله ياخ بس احمد كان قاعد في السرير مستكين و ببتسم كاني ما بتكلم معاهو لحدي ما جاء وليد من ورا الباب و كان سامع كلامو كلو و من غير اي مقدمات وقع فيه ضرب لكن ما ضرب عادي ضرب زول شايل وجع و غبينت سنين في قلبو وليد كان بضرب فيه و ببكي اول مرة اشوفو ببكي بقول ليه اختي ماتت بي سببك يا حيوان اختي عانت في حياتا في سببك عمرها كلو عاشت مكسورة و ماتت مكسورة يا خايب وأنت ولا على بالك و لسا بضرب فيه قدر ما حاولتا افكو ما قدرتا و ناديت أمي و عمتي و برضو ما قدرو يحجزو منو الشي المحيرني أحمد فعلاً ولا على بالو كانو ما بضربو فيه ولا حتى قاوم ساكت و مبتسم و وشو كلو كابي دم وليد لمن وصل اخر مراحل التعصيب جراهو من جلابيتو وطلع بيه من الغرفة ودخلو غرفة البنات جدعو في النص لمن البنات بقو بصرخو جرا تالين الكبيرة وقال ليه دي زنبها شنو تكبر بدون أبو تعيش على إنها بنت حرام و ابوها قاعد جاب توليب وقال ليه دي زنبها شنو تعيش بدون أم و ابو بي سبب برضو اداهو شلوت لمن إتلصق مع الحيطة وقال ليه ياخ أنت خربتا حياة اسرة كاملة ربنا لا يوفقك ياخ قعد في الواطة و يبكي بعد شوية أحمد بقى يحبة على تالين و بقول ليهم دي بتي دي بتي لحدي ما اغمى عليه من كترت الضرب
--صلوا علي النبي
كمية الصدمات المريت بيها الفترة دي كفيلة إنها تهِد جبل شامخ ياخ كل ما اقول تاني ما بتفاجى من شي يجي خبر يدمر كياني اي صاح أنا ما بحب أحمد بس كنت بحترمو شديد و عندو صورة سمحة في حياتي لكن بعد العملو و القالو دا بطني طمت منو بي كلو بعد اغمى عليه وليد حلف كن يودي المستشفى كراهو الحمام وفتح فيه الدش بعد مسافة صحى يبكي ويضحك سواء بقول أنا عندي بنت كبيرة كدا وما عارف 😭😂 افتكرتا نزلت الجنا لانو ما سمعتا بيها ولدت 😂 بقى بعاين لي تالين و بقول ليها أنا ابوك يابت ما تخافي تعالي و تالين المسكينة إنهارت من الخبر و دخلت في صدمة لا قادرة تتكلم ولا تبكي ولا تعبر وليد تاني كان داير يضربو بس امو حلفتو واصلاً أحمد شكلو ما تمام لانو بقى بهضرب و بجيب خارجيات اظنو جنا بقى بضرب راسو بي الحيطة إلا وليد مسكو و ربطو بعد شوية إتصلنا لي اعمامي و ابوي كلهم جوا عمتي منى قالت ليهم العملتو فيني ما بنغفر ولا بتسامح عليه ولا بتنسي طعنتو بتي في عرضا و شرفا بالرغم من إنو شرفكم أنتو كمان و في النهاية طلع العمل العملا دمكم و لحمكم بتي زوجتا لي واحد بريئ و هو عارف نفسو لكن إتجبر عليها بقى يسكر وكل يوم بضربا و بسمعها اكعب الكلام عن شرفها ربا بنت ما بتو وكان بكرها كره الموت عمل لي البنت نفسيات من صغيرة بنتي كانت حامل في السابع راجلها جاء سكران اهلو حرشو دقها لمن تعبت ولدت و ماتت بي وجع قلبها بتي زنبها شنو بي سبب ولدك يا اخوي كلكم غلطانين ما في زول معفي فيكم من الغلط دا (واحد قادر يرفع راسو من الخجل مافي بالزات ابو أحمد و موسى) و المصيبة بعد دا لا سألتو عن الكلاب ديل ماتو ولا حيو و إتبريتو مني أنتو شنو أنتو حرام عليكم 😭 البركة في وليد ولدي ما قصر بقى لي راجل واخو و ولد و عوض من ربنا الله يحفظو لي و هسع أنا ما دايرة منكم حاجة شيلو ولدكم و امشو خلونا في حالنا و اكفونا شركم و كن عندي حق ربنا بردو لي في يوم ترد الحقوق لي اهلها امشو يا اخواني و العفو والعافيه 😭 إبراهيم ابو أحمد قعد لي منى في كريعنا و بقول ليها اعفي لي يا منى اعفي لي يا اختي بنت أمي و ابوي ربنا خلاص ردا ليك حقك فينا كلنا شوفي موسى مشلول و ولدي جنا عليك الله اعفي لينا أما موسى بقى برجف في كرسيهو من الزعل تاني جاتو النوبة و ودوه المستشفى أول ما فتح عيونو قال نادو لي زينب لمن مشت ليه قال ليها اعفي لي يابتي حقك علي لو غلطتا فيك ممكن أنا ما الابو المثالي و ممكن اكون قاسي بس والله دا طبعنا كدا و قمنا كدا و في النهاية أنا داير مصلحتك بس ما تزعلي مني يالغالية مسكتا ابوي شديد و قعتا ابكي و اقول ليه أنت كمان اعفي لي أنا تعبتك معاي وأنت في الحالة دي بسبب اعمالي قال لي لا يابتي دي عمايلي العملتا فيك و في اختي أنتو ما عندكم زنب عمتي منى جات داخلة وقالت ليه عافية ليك دنيا و أخرى و ما زعلانة منك في النهاية أنت دمي و لحمي و الضفر ما بطلع من اللحم والدم ما ببقى موية لكن بعفي ليك بي شرط واحد قال ليها اطلبي اي شي دايراه ولو فيني حيل لي يوم واحد بوعدك اعملو ليك قالت ليه تدي بنتك زينب لي وليد ولدي أبوي قال ليها إنتي جادة قالت ليه ايااا ما بلقى احسن منها ليه و أصلاً هو رادها من قلبو صوح ما قال لي كدا بس ظاهرة الريدا عليه ابوي عاين لي وقال ليها الراي راي البنت أنا ما موسى الزمان البجبر البنات على العرس اها يا زينب قلتي شنو أنا بقيت اتبسم و اتكشم قعدو يضحكو و قال ليها اظن الجواب و صلك قال ليها خلاص تجونا هناك و تطلبوها على الاصول قالت ليه ابشر يا ود الاصول طبعاً أحمد ودوه لي الدكتور و نقلوه لي المصح طوالي اما تالين بقت متابعة مع دكتور نفسي كل فترة و الفاضل اخوي قال دايرها و بقى بجهز في حالو عشان يقدر يتقدم ليها رجعتا القروش لي ابوي و سدد ديونو كلها و هو ذاتو بقى عندو جلسة دلك كل اسبوعين و حالتو بدت تستقر اما وليد رفارف قلبي جاء إتقدم لي رسمي و طوالي عملو عقد و حفلة بسيطة كدا و مشينا المدينة عمل لي حفلة زفاف في الصالة عزم فيها كل زملائو و المراة العسكرية ديك حتى خالتي عوضية جات مع بناتا راجلا ظهر ليه تليف في الكبد بسبب السكر و هسع بين الحياة و الموت و عماد من اليوم داك تاني ما عرفتا عنو حاجة أما أنا طلعتا أحلى عروس فيك يا دنيا كل البشوفني بقول ما شاء الله بختو وليد الله ادهو قمر هو في نفسو ما مصدق فاتح خشمو متر 😲😯 وكل شوية يقول لي عليك الله دي إنتي 😂 و أنا الضحك شارطني نزلنا في الشقة التانية و حياتنا كانت حلوة شديد خالية من المشاكل و الحقد نسينا الماضي دا كلو و بدينا صفحة جديدة عنوانا حب بس في يوم وليد قال لي أنا بحبك يا زينب قلتا ليه وأنا كمان ب . ك العشرة زعل شديد و قال لي شكلك مستخسرة فيني الكلمة كاملة ضحكتا وقلتا ليه يا مجنون أنا لمن اقول ليك بحبك بكون اقتصرتا إحساسي ليك في حب بس لكن لمن اقول ليك الباء كاف العشرة بكون (بحبك 🤍. بعشقك.🧡 بموت فيك.💛 بحترمك.💚 بغير عليك 💙. بحلم بيك.💜 بتمناك 🤎. بهواك 🖤. بموت من دونك❤️. بريدك.♥️ ) خجل و قال لي كن كدا أنا ذاتي باء. كاف لكن 11 قلتا ليه الحداشر شنو قال لي ببقى ابو عيالك 😂 طبعاً ما وريتكم نزلتا تالت منازل مع تالين و امتحنتا و جبتا 75 كنت فرحانة شديد و وليد سجل لي في الجامعة بس قبل ما انزل ظهر لي حمل و منعني من اي شي وحمي كان كعب شديد 😂 كلو مرض و بكى و مشاكل مع وليد بس و هو ربنا يديه الصحة و العافية كان مستحملني الشهور دي كلها لمن جبتا أحلى وعد فيك يا دنيا و بكدا انتهت قصة زينب المجرمة بتاعت الحركات لي زينب عاقلة و راكزة شديد مسكت بيتا بي حب و تفاهم و حتى في حلتنا في مفاهيم كتيرة إتغيرت و بقو بخلو البنات يمشو المدارس و الجامعات عادي و ما بجبرو بنت لي عرس غيتو الحمدلله على كل حال يلا بنتي بتبكي فتكم عافية
تمت بحمد الله