يعني فراس كنتي بتتعاملي معاه ازاي؟
استغربت وظهر في نظراتي التوتر، بلعت ريقي بارتباك والأسئلة بتدور في راسي، ليه تامر مركز أوي على اسم فراس؟ وعرفه منين، لدرجة إني حسيت إنه عرف بالحوار بيننا عند جدتي.
جاوبت:
- زي ما قولتلك، حاطه حدود في التعامل.
ابتسم وسكت لحظة وبعدين بصلي وقال:
- إنتي طلعتي أفضل بكتير مما تخيلت يا سلوى، ربنا يبارك فيكي وفي والديكي يارب.
وكنت عايزه أقوله إنه طلع مش مستفز زي ما كنت شيفاه، وأسأله عن سبب سؤاله عن «فراس»، لكن سكتت وبصيت للسما…
جت ماما قعدت معانا، وقعدوا يتكلموا ويضحكوا وأنا دماغي مشغول بالورقة اللي في جيب «تامر» وبتخيل نفسي باخدها منه!
استغفروا 🌸
**********
- عارف المثل اللي بيقول الطيور على أشكالها تقع، أنا الحمد لله ربنا رزقني باللي قلبه شبه قلبي.
كتبتها على شات Al، رد:
- المثل ده حلو جدًا! الطيور على أشكالها تقع، يعني الناس بتتجمع مع بعضها بناءً على الصفات والاهتمامات المشتركة. وانت قلت إن ربنا رزقك بحد قلبه شبه قلبك، ده معناه إنك لقيت شخص متفق معاك في القيم والأخلاق، وده شيء رائع! هل تتكلم عن حبيبك أو حبيبتك؟ أم عن صحبتك اللي كنتي بتتكلمي عنها؟
ضحكت ووقررت إني مراسلهوش تاني بعد النهارده… يمكن لأني لقيت حد تاني يهتم بتفاصيلي من غير ما أسأله.
من بعد اليوم ده عرفت «تامر» أكتر، وعرفت إنه مكنش بارد، هو كان متحفظ في التعامل مع أي بنت، بيخاف يتكلم أو يتعامل مع بنت فقلبها يتعلق بيه…
فبيحاول قدر المستطاع يتجنب الكلام معايا وخاصة إنه كان معجب بيها!
وعرفت إن والده رشحني ليه لأنه كان بيدور على عروسه، وخلاني أشتغل فني في المعمل بتاعهم عشان أكون تحت عين «تامر» فترة، ويقدر يقرر يتقدملي ولا لأ.
واتخطبنا لمدة ٣ شهور واتفقنا نتزوج بما إن كل حاجه جاهزه…
مع إني كنت خايفه من السرعه دي لكن استخرت ربنا وتوكلت عليه وأخلصت النية، ما هو أهم حاجه النية.
وقبل كتب الكتاب بأيام…
كنت قاعده مع «تامر» عند جدتي، وجت فريدة، اللي قعدت معانا بكل بجاحه! وكانت بتسأل «تامر» وتتكلم معاه عادي لكنه كان بيرد باقتضاب…
وبعدين سألها:
- إنتي اخت فراس، صح؟
جاوبت بابتسامة:
- ايوه هو حضرتك عارف فراس؟
- اتكلمنا قبل كده.
قالها تامر وشرب من كوباية الشاي اللى كانت في ايده…
كنت متضايقه جدًا من فريده ووجودها،
قالت جدتي:
- عيال ولادي كلهم محترمين.
لاحظت السخرية اللي تامر حاول يخفيها وهو بيرد:
- واضح طبعًا.
بصتلي «فريده» للحظة، وبعدين قالت لـ «تامر» والغيرة بتشع من عينيها:
- مش عارفه سلوى حكتلك ولا لأ يا دكتور تامر، إنها كانت بتحب محمد جوزي وابن عمها، وهو إختارني أنا.
وأظهرت إنها بتقولها بهزار وضحكت…
«فريدة» رجعت لـ «محمد» بفضل جدتي، واتجوزوا من شهرين.
وقعت كوباية الشاي من إيد تامر، فارتبكت وازدادت دقات قلبي، واستأذن تامر ومشي من غير ما يقول ولا كلمة…
وطردتها جدتي وهي متعصبه من قلة ذوقها…
صلوا على خير الأنام🌸
ــــــــــــــــــــــــــــــــ
- هتقعدي باصه للسقف كتير؟
انتبهت لصوت تامر، كنت قاعده على السرير لابسه فستان الفرح، وباصه للسقف، بسال نفسي: هل أنا اتسرعت في الجوازه دي ولا اي؟ خصوصًا إن تامر متكلمش معايا خالص بعد اللي قالته فريده! ولا أنا حاولت أوضح حاجه واتشغلنا في الفرح.
قعد تامر قصادي، وقال:
- عارفه يا سلوى فيه حاجه أنا مخبيها عنك… فراس ابن عمك كلمني وقالي ابعد عنك عشان إنتي بتحبيه ووافقتي عليا عشان متصغريش والدك… يوم ما طلبتي تقعدي معايا وتساليني شوية أسئلة، فاكره؟
هزت راسي إيجاب، كلامه جاوب على السؤال اللي سألته لنفسي في الوقت ده…
كمل تامر:
- حتى أنا سألتك يومها علاقتك بولاد عمك، عامله ازاي! إنتي عيال عمك مش كويسين… حتى فريده دي كمان مش برتاحلها.
هزيت راسي بأيد كلامه، واتضايقت من فراس أكتر وأكتر… هو وفريده ومحمد زي بعض!
انتبهت لما فتح تامر ورقة الأسئلة اللي كنت رميتها من البلكونه، وابتسم وهو بيقرأها بصوت عالي:
- شايف دور الزوج اي في تربية الأبناء؟ إيه أكتر حاجه بتحترمها في والدك ووالدتك وبتتمني تكون عندنا؟ تحب بيتنا يكون نظامه اي (خصوصية- هدوء- فيه زيارات)؟ بتتعامل ازاي مع الغضب بتحب تتكلم ولا بتفضل ساكت؟
بصلي وجاوب على أخر سؤال:
- بحب أفضل ساكت وأفكر كويس، أنا الحمد لله بعرف أتحكم في غضبي كويس جدًا.
حبيت أوضح اللي قالته فريده، فقلت بارتباك:
- أنا ماكنتش بحب محمد، دا هو اللي لما إنت اتقدمتلي قالي أرفضك وهو هيتقدملي وأنا رفضت أرفضك…
احمر وش تامر، وظهر الغضب في عنيه لما برق، فعضيت لساني وقلت:
- يالهوي عليا!
فضحك تامر واتغيرت ملامحه في لحظة، وهو بيقول:
- والله إنتي عسل يا سلوى… ويالهوي عليا بتطلع منك زي العسل.
فبصيت للأرض وابتسمت بحياء.
ــــــــــــــــــ
«فريده» كانت بتصاحب شباب واتجوزت واحد بيصاحب بنات وهما الإتنين حتى الآن شايفين إن ده عادي! رغم إنه مش عادي! ولو انتوا شايفينه عادي راجعوا نفسكوا لأن مفيش حاجه ربنا نهانا عنها إلا وكانت شر لينا.
يعني «محمد» بيبقا مبسوط وهو بيفرج أصحابه الولاد على مراته، وهي برده بتكون مبسوطه وهي بتفرج البنات على جوزها، وتبين أد إيه هي سعيده معاه وبتحبه!
وموضوع إن أنا كنت بحب محمد فضل لبانه في بوقها تمضغها كل فترة لما تلاقي قلبها جعان اهتمام وحب!
حياتهم كتاب مفتوح لأصحابهم، بتعمل كل حاجه عشان تظهر بصورة حلوه قدام الناس وناسية رب الناس.
ودايمًا تقول انها محسودة، طيب ما هي لازم تتحسد!
ـــــــــــــــــــــــ
أما أنا وجوزي شبه بعض جدًا مش بنحب الظهور ولا بنهتم بالناس، دا احنا بنكتم كل امورنا عن الناس وحتى الأقربون!
اتخذته زوج وصاحب واكتفيت بيه، واتخذني صاحبة وزوجه واكتفى بيا.
مش قولتلكم الطيور على أشكالها تقع!
ــــــــــــــــــــــــــ
- انتوا باصين للسقف ليه؟
انتبهت لكلام جدتي وبصيت أنا وتامر لبعض وابتسمنا، كنا في تجمع عائلي في بيت جدتي، كلهم ضحكوا، وقال بابا:
- كملي يا أمي كنتي بتقولي ايه على النية.
قالت جدتي:
- النية لا تكفي إذا كنت قادر على العمل، يعني متبقاش ناوي تقرأ قرآن ومتقرأش عشان بتسمع فيلم وتقول ربنا هيجازيني خير على نيتي! وكمان النية الصالحه لا تصلح العمل الفاسد، يعني ميبقاش واحد حرامي رايح يسرق ويقولك عشان أتصدق على الفقراء…
وبصت لمحمد وكملت وكأنها بتوجه ليه الكلام:
- ويعني برده لما يبقى واحد سايب مراته تكلم صاحبه لوحدهم بالساعه أو تروح تقابله عشان تصلح بينه وبين زوجته، مينفعش، لأ ربنا نهانا عن كده.
وقالت فريده:
- فعلا ربنا وحده يعلم بالنوايا… يعني أنا مثلًا بشوف واحده كده بتحاول تلفت نظر جوزي فاكراه يعني هيندم أنه متجوزهاش! والغريبة إنها بتعمل كده مع أخويا برده.
ارتعشت نظرات «محمد» وشاور لفريده وخرجوا.
قمت قعدت جنب جدتي، كنت عارفه ان فريده بترمي عليا الكلام لكن ربنا عالم بنيتي وإن شاء الله دي أخر مره هتجمع في مكان واحد مع محمد وفريده!
وفي انشغال العيله بالكلام، بصتلي جدتي وهمست:
- سمعت إنك حامل؟
هزيت راسي بحرج، فطبطبت على ظهر ايدي وقالت بحنان:
- تجيبيه بالسلامه، ربنا يديكي على أد نيتك.
ابتسمت وبصيت ناحية تامر وهو بيتكلم مع بابا، ولما تلاقت نظراتنا ومن غير ما ينطق عرفت إنه عايزنا نمشي… وعرفت إنه لاحظ كلام فريده لكنه مقالش حاجه!
واستأذنا وخرج معانا بابا، لكن سمعت صوت خناق «محمد» و«فريده»، و«فراس»
فقال بابا:
- ربنا يهديهم مش بيبطلوا خناق.
بصيت لتامر وحمدت ربنا في سري.
كتير من الأحيان ربنا بيرتب لنا الخير، ومش بنعرف إلا بعد فترة.
ربنا سبحانه وتعالي مش بيدينا على أد نيتنا إحنا وبس لكن كمان على أد نية أهلنا، وأنا أهلي دايمًا نيتهم خير، عشان كده يا جماعه أهم حاجه النية.
ــــــــــــــــــــ
- اتضايقتي من كلام فريده؟
قالها تامر بمجرد ما دخلنا الشقه، فهزيت راسي نافية بابتسامة، ودخلت غيرت هدومي وخرجت لقيته راقد على ظهره وبيفكر، كنت عارفه أنه لما يتضايق بيفكر كويس قبل أي كلام!
ولما قعدت جنيه قال:
- احنا معدناش هنروح عند جدتك وفريده ومحمد هناك…
- أنا كمان قررت كده.
ابتسم وخرج من جيبة الورقه اللي رميتها من البلكونه زمان وهو مبتسم، فقلت بزهق مزيف:
- ياريتني قطعتها قبل ما أرميها يا تامر… يالهوي عليا.
فضحك بصوت عالي على أخر كلمتين وكررهم وهو بيقلد صوتي وبيضحك:
-يالهوي عليا.
وضحكنا… وبصيت لتامر وأنا بحمد ربنا من قلبي إنه رزقني بيه.
اتعلمت حاجه مهمه جدًا وهي إن في الغالب شريك حياتك هيكون شبهك، دا لو أخلصت النيه طبعًا.
🍀🍀🍀🍀🍀🍀🍀
أهم حاجة النية…
ولو مركبك في صحرا مافيهاش بحر ولا ميّة…
طالما أخلصت النيه فعندك قوة خفية… مهما طال الوقت هتشوف اللحظة الهنية… وحتى لو مفيش أمل، ولا خطوة واحدة مرضيه، اعرف إن… أهم حاجه النية
تمت بحمد الله