رواية لنا موعد اخر الفصل الحادي والعشرون21 والثاني والعشرون22 بقلم لولا
وسام وهو لسه مصدوم : هما اسمهم ايه الناس دي
هناء بدموع وضيق هتفرق ايه يا وسام
وسام بحده مخلوطه بتوتر شديد : ماتقولي ياهناء هو سرر
هناء تنهدت وتابعت هو نادر وصاحبه امير واخته يارا
وسام اتصدم بشده معقول هناء البنت اللي حبها وخطفته من اول نظره تطلع هي اللي كانت خطيبه ابن خالته وكانت هتبقى مراته !! حس ان دماغه اتشلت من فرط التفكير فكل حاجه ففاق على صوت هناء
هناء باستغراب مالك يا وسام في ايه
وسام ابتسم بتوتر وتابع ابدا يحبيبتي مفيش حاجه انا معاكي اهو وطبطب على ايديها وتابع بابتسامه وهنعدي كل ده سوا انتي بس عرفيني عايزه ايه وانا جنبك
هناء ابتسمت بحزن وتابعت عايزه اشوفه ومتوجعش على نفسي .. والدموع اتجمعت في عينيها وتابعت لسه كل ما اشوفه بفتكر كل اللي مريت بيه كأنه امبارح
وسام تنهد بحزن وتابع اوعدك هخليكي تتخطي ده و اوعدك ان هيجي يوم هتشوفيه ومش هيبقى في حاجه في عينيكي غير الثبات والثقه في نفسك
هناء بدموع ياريت يا وسام بجد
وسام قام شد كرسيه وقعد جنبها ومسح دموعها وتابع بحب ممكن بلاش عياط .. اهدي علشان خاطري
هناء بدموع صعبان عليا نفسي اوي بجد انا مستاهلش كده
وسام تنهد بوجع وتابع كنتي بتحبيبه اوي ولا صالونات؟
هناء بوجع لا كنت بحبه اوي هو انا عرفته صدفه زي ما حكيتلك لانه كان زميل لميا اختي في الكليه بس حبيته .. حبيته اوي .. ولسه فاكره كل مكان روحناه وكل اكله كلناها سوا وهزارنا وضحكنا والسينما انا فاكره كل حاجه بالتفاصيل وده اللي واجعني .. ان ازاي كل ده هان عليه عادي كده !!!
وسام قلبه وجعه جدا من كلامها وتابع لو اتاكدتي انه ندم وهيعيشك مبسوطه هترجعيله يا هناء !!
هناء ابتسمت بدموع وتابعت كان ممكن الاول رغم اني قولت لا مش هعملها بس كان ممكن اضعف علشان قلبي كان لسه عايزو .. بس بعد ما عرفتك وساعدتني كتير اني اعرف قيمه نفسي فمعتقدش اني هفكر في كده .. لا عمري
وسام تنهد بوجع وقام وقف واتمشى خطوتين قدام الترابيزه اللي قاعدين عليها وبص للنيل لان الكافيه مطل على النيل وهناء استغربت اوي وقامت وقفت جنبه وحطت ايديها على كتفه وتابعت وساام
وسام وهو باصص للنيل تابع اممم معاكي
هناء بحزن هو انا قولت حاجه ضايقتك؟
وسام من غير مايبصلها تابع بتنهيده: لا ابداا انتي حقك تقولي كل حاجه لاني دكتورك وده طبيعي ومش معنى اني اضايقت شويه يبقى انتي قولتي حاجه ضايقتني كدكتورك لا خالص
هناء باستغراب ايه دكتورك دكتورك اللي شغال تقولهااا دي !!
وسام بصلها وتابع مانا فعلا دكتورك
هناء بضيق لا انت مش كده وبس
وسام بتنهيده امال انا ايه في نظرك ؟؟
هناء الدموع اتجمعت في عينيها وتابعت فاكر لما قولتلي انك بتحب القهوه ساده يعني بتبقى عاديه ومره ومفيهاش افتكاسات بس بتسيب اثر دافي على قلبك زي الناس اللي مش بتحاول تبهر بس وجودهم لوحده بيخلي اليوم احسن ؟؟؟
وسام ابتسم وتابع فاكر طبعا
هناء بحب ودموع انا كمان بحس بكده في وجودك .. انت بتخليني احسن ومش علشان دكتوري .. انت كشخص .. وسام نفسه بطريقته وكلامه وافعاله عملي في شهور اللي غيره مقدرش يعمله في سنين .. فانا مش عارفه انت ايه كمان غير كونك دكتوري بس واثقه ومتاكده اني مش هعرف اكمل من غيرك ومش فتره علاج .. لا العمر كله وسام انا فعلا محتاجه وجودك انت فاهمني ؟؟ ودموعها نزلت
وسام ابتسم بحب ورفع ايديه يمسح دموعها بحنان وتابع بحبك
هناء اتفاجئت بشده ورفعتله عينيها وتابعت ايه قولت ايه ؟؟!!
وسام بضحك بحبك ياهبله اومال هقوم متضايق من سيره سي زفت القديم ده ليه
هناء عيطت بفرح وتابعت وسااام يخربيتك انا مش قادره اصدق !! يعني انت بتحبني انا !!! بتحبني اللي هو الحب الحقيقي دده !!
وسام فضل يضحك وتابع مش قادره تصدقي تبقي غبيه لان انا واضح جدا اني بحبك ومسح دموعها وتابع وبعدين هو ايه اللي بتحبني اللي هو الحب الحقيقي ده وضحك وتابع هو في حب حقيقي وحب مش حقيقي
هناء بدموع فرح اه طبعاا في اومال انا جيتلك ليه ماعلشان شوفت اللي مش حقيقي
وسام ابتسم وتابع بس اناا وسام .. مش نادر ووسام عمره ما قلبه هيدق لواحده ويتخلى عنها مهما حصل
هناء بدموع يعني مش هتسبني في يوم من الايام لاي سبب ولا تندمني اني حاكيتلك ماضيا ؟؟!!
وسام بابتسامه اولا انا مش هسيبك غير لما روحي اللي تسيبك
هناء بعياط بعيد الشر عنك متقولش كده والنبي
وسام فضل يضحك وتابع يخرابي ياناس على اللي خايفه اموت
هناء بحده ودموع ماتخرس وتجيب سيره حاجه عدله بقى قولنا بعيد الشر وضربته في صدره جامد
فوسام فضل يضحك وتابع خلاص يخربيت اهلك ايدك تقيله
هناء بدموع طب علشان خاطري متقولش كده تاني
وسام ابتسم وباس جبينها وبصلها وتابع بحب انا كنت بعرفك مدى صعوبه اني اتخلى عنك دي قد ايه .. وبالنسبه لانك حاكتيلي ماضيكي وخايفه تندمي فااحنا كرجاله اه غيورين زياده وضحك تابع والاحسن منعرفش ان الواحده حبيت قبلنا طلما مكناش في حياتها فاهي حره و
هناء بمقاطعه وضيق منا قولتلك علشان انت دكتوري وربعت ايديها بضيق وتابعت فانت خلتني احبك واتعلق بيك واتجوزتني وانت معااك كل اسراري اعمل فيك اييه بقى انت كده خطر علياااا
وسام فضل يضحك بشده وتابع لالا استني بس انا بحبك ومعجب بيكي من قبل ماتجيلي العياده والله حتى اسألي معتز دكتورك هو صاحبي وسألته عليكي قالي منفصله عن خطيبها وحاليا مفيش حد في حياتها فجيت الطف الجو روحتي كسرتي المج
فهناء فضلت تضحك وتابعت عايزه غييره صح يا وسام
وسام بضحك يسلام ده يعيون وسام ورفع ايديها باسها بحب وحطها بين ايديه وطبطب عليها بحنان وتابع انا بقولك الاحسن منعرفش لاننا غيورين زياده بس انتي قولتيلي مش في نيتك ان نفس الشخص هيبقى جوزك باذن الله
فـ هناء ابتسمتله فضحك وتابع وانا اوعدك بما اني شايل اسرارك دي كلها امانه جواايا فتطمني ومش هعمل غير الحلو اللي تحبيه ويسعدك وعرفته من كتر كلامنا زي انك بتحبي تخرجي فين وتاكلي ايه وكل ده انما اني اندمك على انك فتحتي قلبك ليا فموضوع نادر فا دي اخر حاجه تفكري انك تندمي عليها ومش هتحصل وابتسم ابتسامه ليها مغزى وتابع : بالعكس بقى ومسيرها الايام هتعدي وهيتثبتلك انك كنتي صح جدا لما اختارتيني انا بالذات تعرفيني
هناء ابتسمت بحب وتابعت وسام انا بجد مش عارفه اقولك ايه
وسام بحب متقوليش اي حاجه ومش عايزك تخافي ولا تقلقي انا جنبك وعلي يخرج بالسلامه وهاجي اتقدملك
فـ هناء دموعها نزلت من الفرح وتابعت خلاص ماشي موافقه طبعاا
وسام بضحك موافقه ازاي ده انا لحد دلوقتي مسمعتهاش
هناء بضحك ماقولتلك موافقه اهوو الله
وسام بضحك هنااء
هناء بضحك عيونهاا
فوسام فضل يضحك وتابع يسلمولي طبعا بس انا عايز اسمع الكلمه
هناء بضحك هو انا لازم اقولهاا مانت المفروض حسيتها خلااص
وسام بضحك ياستي انا معنديش حسه الاحساس شغاله اوي بس بسمع كويس
فـ هناء فضلت تضحك وتابعت هفكر وابقى اقولها بس في الفون مش هنا
وسام بضحك طب براحتك يلا غوري بقى وراكي محاضرات
هناء بتمثيل حزن بتغورني يا سومي اخص عليك
وسام اتفاجئ وفضل يضحك وتابع بس يا بنت الجزمه اخرسي سومي ايه وزفت ايه هو انا الاقيها منك ولا من ليناا
هناء فضلت تضحك وتابعت لا لينا بتقولك ويسو انا سمعت على فكره بس انا مميزه مينفعش اناديك زيهاا وادلعت وتابعت ولا انت شايف ايه ؟
وسام فضل يضحك وتابع انا شايف انك تتلمي وتروحي محاضراتك حاالا يلا اجري
فـ هناء فضلت تضحك وتابعت حاضر رايحه وراحت عند الترابيزه وخدت شنطتها وتابعت بضحك معاك تدفع ولا احط انا الحساب
وسام بضحك امشي يا بنت الجزمه يلا
هناء فضلت تضحك وتابعت قول بس متتكسفش احنا واحد يا سومي
وسام فضل يضحك وتابع انتي لو ممشيتيش حالا بعد سومي دي هاجي ازعلك دلوقتي
هناء بضحك لالا خلاص ماشيه وعلى ايه الطيب احسن وشالت حاجتها وراحتله وتابعت بضحك علشان متتقمصش بس .. بحبك يا سومي ومشيت وهي بتضحك
فوسام اتفاجئ وفضل يضحك وتابع بصوت مسموع: مش هزعلك لاجل الكلمه بس
فهناء ضحكت وشاورتله بسلام من على باب الكافيه ومشيت فابتسم وتابع وانا بموت فيكي وملامحه اتبدلت وتابع ووعد مني لاعيش نادر ويارا ايام سودا لاجل الحاله اللي وصلوكي ليهاا دي وتشويه سمعتك اللي حصل من تحت راسهم وابتسم بسخريه وتابعت لا وعامله فيها ملاك بريئ يارا بنت الجزمه وراح فتح دفتر الحساب وحط الفلوس وطلع ركب عربيته وتابع بخبث مش استخصرتيها في اخوكي يا ياراا ؟!! .. اديها هتتجوز الراجل اللي بتتمني منه كلمه وطلع بعربيته وتابع انتوا اللي بدأتوها يا عيال خالتي بس طلما الموضوع جيه قدامي يبقى النهايه بتاعتي اناا
-----
عند نيره في الجامعه كانت قاعده مع نديم وبيشرحلها الاجزاء اللي واقفه معاها
نيره تنهدت بتعب وتابعت خلاص يا نديم بجد هبطت نكمل يوم تاني ورجعت شعرها لورا ونفخت بضيق
نديم باستغراب مالك يحبيبتي في ايه
نيره بضيق تعبانه .. ومضغوطه وندمت اني دخلت اسنان بجد حقيقي صعبه بشكل لا يوصف والسنه دي والسنه الجايه اتقل سنتين على قلبي
نديم بابتسامه طب وشايله الهم ليه منا معاكي يابابا وهشرحلك كل حاجه واقفه معاكي اهدي كده ده فات الكتير مبتقاش الا القليل هانت خلاص وتتخرجي
نيره بضيق هي المشكله فهتخرج امتى .. المشكله فهشتغل ازاي انا حقيقي بتوتر اوي وانا بشتغل عملي قدام الدكاتره فمش مستوعبه ازاي هعمل كل ده لوحدي
نديم بحب هو انتي لما دخلتي حضانه مش مامتك كانت بتمسك ايديك وتمشيها وتكتب الحروف في البدايه
نيره اه اكيد
نديم بحب نفس الصعوبه اللي ممكن يواجها طفل في بدايه دراسته هي اللي انتي حساها دلوقتي .. بس بالتدريج كله بيجي فاهدي كده انا كنت زيك والله بس بعد كده الموضوع بقى بسيط خالص
نيره بحب ربنا ميحرمنيش منك ابداا
نديم بحب ولا منك يعمري وابتسم وتابع ها هاجي اتقدملك امتى
نيره اتوترت وتابعت بتنهيده مش وقته يا نديم ومسكت الادوات وتابعت بتوتر: تعالى كمل يلا وفهمني اعمل دي ازاي
نديم حط ايديه على ايديها وتابع باستغراب نيره انتي بتتهربي من السيره ولا انا متهيألي ؟؟
نيره نفخت بضيق ورمت الادوات على الترابيزه بضيق وتابعت وانا هتهرب لييه ما انت عارف اني عاايزاك وانت عايزني لازمته ايه التهرب يعني بس اجواء البيت مش احسن حاجه الفتره دي وكريم مش فااضي
نديم باستغراب كلام كريم معاياا ان انا اظبط معاد واقوله يعني مقالش مش فاضي
نيره بحده يانديم الفتره دي والله العظيم في مشكله وهو مش فااضي وانا اعصابي تعبانه ارجوك قدر شويه والدموع اتجمعت في عينيها واتخنقت
نديم بخوف خلاص خلاص اهدي طيب حقك عليا مقصدش اعيطك والله وطبطب عليها ومسح دموعها
نيره بدموع متزعلش مني بس بجد مش هينفع اقولك بس فعلا في مشاكل
نديم بتنهيده هو انا غريب بنسبالك للدرجه دي !!
نيره بدموع مش مسأله غريب بس الموضوع ميخصنيش علشان اتكلم فيه بس يهم كريم جداا وانا اكيد مش هشوفه في الحيره دي واقوله نديم جاي يقعد معاك
نديم بتنهيده لا وعلى ايه ادينا مستنين متزعليش نفسك وابتسم ومسح دموعها
سهيله جات وتابعت بضحك يسيدي يسيدي على عصافير الكليه اللي رايح واللي جاي مالوش سيره غير دكتوره نيره ودكتور نديم ابن دكتوره منال
فنديم فضل يضحك وتابع هيحسدوها ان حماتها دكتورتها وهي هتسقطها في العملي عادي
نيره ضحكت من بين دموعها وتابعت لا بقى اومال انا بخليك تشرحلي ليه ماعلشان تدربني على تفكير مامتك متبقاش رخم يا نديم ده انا هبقى المدام
نديم بضحك عيون نديم والله عيب عليكي طول منا معاكي متقلقيش هعرفك خبياها
سهيله بضحك قوليلها عديها علشان منكدش على ابنك هتخاف
كلهم فضلوا يضحكوا فتابعت نيره بضحك مين دي !! دكتوره منال !! يعني تعمل مني انا وابنها شاورما لو قولت كده
نديم فضل يضحك وتابع ده حقيقي على فكره بس بعيدا عن الكليه ماما ملهاش في البيت سيره غيرك بتحبك اوي بجد
نيره بضحك وانا بموت فيها والله وعلطول كانت تقولي قمر يابت يا نيره عسل يابت يا نيره كل ماتشوفني فكنت بهزر واقولها جوزيني ابنك بقى فشكلها اعتمدت الكلمه بجد
كلهم فضلوا يضحكوا فتابعت سهيله بضحك اه والله ده حقيقي بس العيال فعلا حاسدينك على الفاضي فاكرينها هتتسااهل معاكي
نيره بضحك اهو محدش جايبني ورا ومخليني قاعده بعيط دلوقتي غير عينيهم اللي يندب فيها رصاصه دي
نديم فضل يضحك وتابع قولنا ايه انا معاكي متقلقيش بقى
نيره بحب وانا هركز معاك وهسعى واعمل اللي عليا والباقي بتاع ربنا بجد
سهيله بحب ايوه هو ده الكلام والله
-------
في بيت رانيا كانوا بيجهزوا وحبيبه كانت لبست بنطلون بوي فريند تلجي وبلوزه سودا وسرحت شعرها ورفعته في شكل كحكه فوضويه ونزلت خصلتين وشكلها كان رقيق وحلو اوي ودخلت المطبخ تكمل باقي الاكل اللي بتعمله
وخرجت رانيا وهي بتظبط طرحتها وتابعت بتنهيده بت يا اسراء انتي يابت
اسراء جات وتابعت ايه يا ماما في ايه
رانيا بتنهيده تعالي شيلي عن اختك شويه من صباحيه ربنا بتعمل اكل لاخوكي بايد واحده وبتسند بالمكسوره وتعبت
حبيبه بلهفه لالا والله خليها زي ماهي ولا اي حاجه انا بشيلهم في العلب اهو وهحطهم في الشنطه وخلاص الموضوع مش صعب
اسراء بحب هاتي عنك بس انا هكمل تقفيلهم
حبيبه بتعب ماقولنا لا يا اسراء بقى الله
رانيا بقلق مالك يحبيبه فيكي ايه
حبيبه بتعب مفيش ياماما حاسه خدت دور برد مش قادره
سلمى خرجت وتابعت بحزن طب يحبيبتي استني نسااعدك طيب
حبيبه بابتسامه قولت لا انا عايزه اعمله كل حاجه بايدي لحد الاخر ممكن تسكتوا بقى
رانيا بضحك خلاص سيبوها براحتها بس عينيكم عليهاا لتقع ولا حاجه
حبيبه بضحك لا متخافيش اانا جامده
سلمى طب هروح اشوف اسيا لحد مانتي تخلص يا بيبه
حبيبه بحب ماشي يعمري وانتي يا ساسو روحي شوفي كريم هيجي امتى
اسراء بحب حاضر وخرجت هي كمان
وراحت سلمى دخلت اوضه اسيا وتابعت ايه يحبيبتي خلصتي ؟
اسيا تنهدت بتعب وتابعت اه خلصت بعمل شعر تولين بس
سلمى ماشي يحبيبتي على مهلك احنا برا مستنينك
اسيا بتنهيده دققتين وجايه وراكي
سلمى بحب ماشي يعمري وخرجت
فتابعت تولين بحزن مامي هو احنا هنشوف خالو؟
اسيا تنهدت وتابعت اه يا تولين رايحين اهو يحبيبتي ولمت شعرها في شكل قطتين ومسكت الفون تكلم سليم بس كان غير متاح فنفخت بضيق شديد
تولين مامي هو انا ينفع اكلم بابي؟
اسيا تنهدت بضيق وتابعت برن عليه مقفول يا تولين ومن امبارح مش عارفه اوصله والله لما اكلمه هخليه يكلمك يعمري حاضر دلوقتي بقى يلا علشان نروح لخالو
تولين بحماس يلا
خرجوا وكان الكل وحبيبه رصت الاكل في علب ودخلت اوضه علي وجابت المصحف والمصليه بتوعه وشالتهم في شنطه وخرجت وتنهدت وتابعت ها خلصتوا كلكم ولا ايه؟
اسراء ااه وكريم واقف تحت وقالي ننزل
حبيبه بحب خلاص ماشي يلا وقفلوا الباب وابتدوا ينزلوا وبصت لتولين وتابعت بضحك صحيت بالليل وبهدلتني عياط وهديتها بالعافيه ونمنا تاني مكنتش اعرف بتموت في علي كده
سلمى بضحك انتي كويس رحمتيها من اسيا وعصبيتها وخدتيها ونمتوا في اوضه علي
حبيبه بضحك اه منا عارفه كانت هتتغابى عليها بس والله سكر بتحبه اوي
اسيا ابتسمت وتابعت ده تولين لو قولتيلها علي ولا سليم هتقولك علي
فكلهم فضلوا يضحكوا فتابعت حبيبه بضحك قال يا توتي الكلام ده .. بابا ولا علي
تولين حطت ايديها على وشها وضحكت وتابعت بصوت واطي : خالو
فكلهم فضلوا يضحكوا فتابعت اسيا ااه انا عارفه بنتي
حبيبه فضلت تضحك وتابعت طب ايه السر بقى
اسيا ابتسمت وتابعت علي مدلعها شويتين عمره مازعقلها عكس سليم بيربي فبيشد بعض الاحيان
فتابعت حبيبه بحب بس سليم صح بردو والله الدلع الزياده وحش
اسيا بضحك تقولي ايه لبنت الكلبه بقى
فشافهم كريم فتابع بحب يلا قسموا نفسكم كده بسرعه تولين على رجلي واسراء جنبي قدام وجنبها رفيده واسيا وحبيبه ومرات عمي ورا وحد ياخد سلمى على رجله
فكلهم فضلوا يضحكوا فتابعت سلمى: انتوا جايبيني هنا تهزقوني ولا اييه
فتابع كريم بضحك يلا يابت ماعيب اقعد مرات اخوكي على رجلهم وانتي وهي اقل حاجه في الحجم
اسراء بضحك متجرأتش تقول سلمى ورفيده قدام علشان انا كبطل لو قعدت ورا مش هنفع
كريم بضحك يباشا ده كده كده
رفيده تنهدت بضيق وتابعت طب ما ممكن حبيبه متجيش علشان نوفر المكان واركب انا مكانها وسلمى واسراء قدام
حبيبه بصتلها بسخريه وتابعت وانتي فكرك تعرفي تملي مكان حبيبه سواء في القاعده او في وجودي هناك؟
رفيده بحده قصدك ايه يعني هاا
حبيبه بضحك قصدي فرق احجام يعمري يعني انتي لو قعدتي مكاني مش هتمليه اهدي بس كده ليطقلك عرق انا مقصدش حاجه وحشه
رفيده بحده انتي اصلا ايه يوديكي .. علي يخصك في ايه علشان تروحي و
رانيا بمقاطعه وعصبيه ومتروحش لييه ان شاء الله وهو في حد غيرها اتمرمط امباارح علشان يحاول يوصل لحل ولا حد قدهاا تعب لاجل علي ومع اهل علي رغم انها مكسوره وتعبااانه
حبيبه بصتلها بكيد وباست راس رانيا وتابعت ربنا يخليكي يغاليه بس انا معملتش غير الواجب والاصول متقوليش كده
رفيده بعصبيه والله يا ماما لو كنتي طلبتي مني حاجه او بايدي حاجه مكنتش هتاخر اكيد
رانيا بحده من غير ما نطلب يحبيبتي ايه مفكيش عيين تشوف ؟؟ ده انتي حتى مهنش عليكي تيجي تقعدي وسطنا لحد مانشوف جوزك الدنيا هترسي معااه على ايه وانا واخواته كنا هنموت من الجوع لولا اللقمه اللي حبيبه ربنا يجازيها خير دنيا واخرى وقفت تعبانه عملتهاا علشان كل واحده فيناا في وادي ونفسيتنا زي الزفت فانتي كنتي فين فكل دده يا مراات ابني
رفيده بصتلها بذهول وتابعت بعصبيه على اساس انتوا نفسيتكم تعبااانه وانا عايشه في الساحل مش كدده !!! ماهو جووزي .. انا مش عارفه اطفح اللقمه ولا اعيش عدل انتي انسانه مش بتقدر ولا تحس كده ليه هاا ؟!!
كريم بعصبيه احترمي نفسك يا رفيده انا ساكتلك من الصبح بس هتوصل بيكي تشتميها وانا واقف انتي اتجننتي ولا ايه
رفيده بعصبيه علشان مبتعرفش تطبل غير لاختك يكريم وكانت هتموت وتجوزهاا لعلي وبتحبها وتدلعها وتطبطب على ضهرها في المستشفى انما انا مشوفتش منها غير كل معامله جاافه
كريم بعصبيه ماتحترمي نفسك هو انا اللي اختي فاارضه نفسهاا عليهم يعني ولا اييه !! ايه هتموت وتجوزها لعليي ديي !! ولا حبيبه عايزاه ولا هو عايزهاا وحب مرات عمي ليهاا ده من زمان فبلاش تقولي كلام انتي مش فهمهاااه
اسيا بتنهيده لازمته ايه الكلام ده بس يا رفيده ماهو جوزك يحبيبتي وعيب تطلعي كلام على بنت الناس هو انتي شوفتي حبيبه عايزاه يعني
رفيده بعصبيه اه كلكم تعالوا علياا يلاا علشان هي عامله الملاك البريئ بس انا عارفه انها كانت عايزاه وهي عاارفه انها لحد انهارده هتموت عليه بس ريحي نفسك يحبيبه محبش ولا هيحب غيري وفري مرواحك هنااك لانه مش هيغير حاجه
كريم بعصبيه يا رفيده احترمي نفسك انا قسما بالله كل ده محترم انك مرات اخوياا ومش عايز ازعلك
رفيده بعصبيه ادينا سكتنا ممكن يلا علشان اتخنقت
حبيبه قلبها وجعها ومنعت دموعها بالعافيه وادت سلمي الشنط اللي كانت مسكاها وتابعت اديهم لعلي
سلمى الدموع اتجمعت في عينيها وتابعت بهمس متمشيش روحي شوفي علي وطمني قلبك عليه
حبيبه بدموع وهمس : علي كويس ولو كان غير كده كنت حسيت وبالنسبه للمشكله دي فهفضل اصليله
ورايحه تمشي فمسكتها رانيا وتابعت بحده رايحه فين
حبيبه بدموع طالعه شقتي
رانيا بعصبيه هتروحي تشوفي علي اللي طلع عين اهلك امبارح علشان تدخليله لقمه ياكلها وغيرك راح بيته اتخمد من غير مايفكر كل ولا مكالش ..هتروحي تشوفي علي علشان جريتي حطيتي على رقبه اللي شكيتي انه حبسه سكينه ومتهزلكيش رمش .. هتروحي تشوفي علي علشان من امبارح بتجري في الشوارع تدوري على حل .. هتروحي تشوفي علي علشان جيتي راعيتي اهله في غيابه .. محدش تعب قدك معاااه فلازم تشوفيه والامر منتهي
حبيبه بعياط مش عايزة مشاكل يا ماما ابوس ايدك سامحيني المره دي
رانيا بعصبيه اقسم بالله يحبيبه لو مروحتيش لا انتي بنتي ولا اعرفك تاني بعد النهارده
رفيده بعصبيه يعني انتي شايفه ان كل اللي عملته ده عملته عاادي !!
رانيا بعصبيه انتي صوتك ميعلااش تااني علياا خاالص علشان بعد كده ردي هيكون على جوزك واهلك واعتبريني بسخن الامور بقى طلما هتوصل لقله الادب دي وبالنسبه لحبيبه فمشاعرها لعلي مشاعر اخوه بس صادقه ورينا لقطه انتي يا زوجه يا مُحبه المفروض كان يحصل ايه
رفيده مردتش علبها وركبت العربيه فتابعت رانيا بحده ابو تربيتك تربيه ناقصه
اسيا بتنهيده ياما خلاص يخرابي عليكم بجد
كريم بحده اركبوا واخلصوا طيب
وبالفعل ركبوا وفون حبيبه رن فتابعت بلهفه: الو يا عمو معاك
كمال بحب ايه يحبيبتي بصي انا بعت امجد واحد من اكفئ الظباط اللي اشتغلت معاهم وراح لعلي وقعد معاه وشغال مع زمايله على القضيه فخير يحبيبتي متقلقيش باذن الله
حبيبه بدموع يارب ياعمو والله تسلملي تعبتك بجد
كمال بحب لا يحبيبتي ولا تعب ولا حاجه ربنا يطمنكم عليه
حبيبه بدموع يارب اللهم امين
كمال بحب يلا عايزه حاجه
حبيبه بحب سلامتك
كمال بحب يلا باي يحبيبي واي حاجه تعوزيها كلميني
حبيبه بحب اكيد حاضر باي
وقفلت معاه فبصلها كريم من المرايه وتابع هاا في جديد
حبيبه بدموع بيقول بعت ظابط من عنده لعلي وبيتابع القضيه
كريم تنهد وتابع خير باذن الله
فتابع الكل اللهم امين يارب
فتابعت تولين مامي انا عايزه غزل البنات
اسيا كانت سانده راسها على الشباك وتابعت بتنهيده واحنا راجعين يا تولين حاضر
تولين بضيق لا هكيون مشي
كريم بحب استني يعمري انا هنزل اجبلك
اسيا بتفاجئ يكريم سيبك منها وكمل طريقك يكريم
كريم بضحك بس يابت اخرسي وباس خد تولين وتابع بحب توتي تبقى نفسها في حاجه وامشي طب ازاي ؟!!
ووقف على جنب ونزل بيها فضربت اسيا ايديها في بعض وتابعت دلعوها دلعوها ونيجي نروح تفكر سليم جوز امها مش ابوهاا
فكلهم فضلوا يضحكوا فتابعت حبيبه بضحك طب مايدلعها ده البنات بتتولد علشان تدلع الله
اسيا بضحك يابنتي بيدلع والله بس مستحيل نكون رايحين مشوار ضروري وتقول عايزه دلوقتي كذا وينزل لا بيقولها وانا راجع يا توتي .. او مش هعرف اقف .. اجبلك بكره انما الدلع ده لا مبيحصلش
رانيا بحب هو ينورعيني عليه مربي 4 بنات فاتعود يدلع
حبيبه بحب اه ربنا يديمه لينا يارب والله
وجيه كريم وهو جايب لتولين اللي هي عايزاه وفتحت وبتاكل ومبهدله خدها فضحكت اسيا على شكلها وتابعت طب قولي لخالو شكرا طيب
تولين باست خده وتابعت شكرا يا خالو
كريم بضحك يعيوون خالو ده احنا نجيب غزل بنات كل يوم طلما هناخد بوسه حلوه كده
فاسيا ضحكت فتابعت رانيا بحب عقبال بنتك ينورعيني
كريم بحب تعيشي يا غاليه
-------
عند علي في المكتب كان قاعد لان فؤاد قالوا ان اهله جايين يزوزه
وكان قاعد على الكرسي وحاطط ايديه على جبينه وساندها على المكتب وعينيه حمرا من قله النوم ودقايق والباب اتفتح ودخلوا فاسيا واسراء كانوا في الاول وشافوه جريو عليه وحضنوه وفضلوا يعيطوا فتابع علي بوجع: بس بس اهدوا علشان خاطري حقكم عليا والله وحضنهم اكتر ودموعه نزلت وباس راس الاتنين وتابع بس يحبيبتي اهدوا
اسراء بعياط قلبي واجعني عليك اوي ياعلي مش مستوعبه ازاي مش قاعد معانا واتظلمت بالشكل ده وحضنته اكتر وتابعت بعياط مش عايزه اسيبك وخايفه الوقت يعدي وعيطت اكتر وتابعت اول مره احس اني عايزه الزمن يقف وانا في حضنك علشان مش هستحمل اسيبك وامشي
فكلهم فضلوا يعيطوا فتابع علي بدموع : يا اسرااء يحبيبتي ابوس ايدك اهدي مش كده هتتعبيهم معاكي
اسيا بعياط من غلبنا ينورعيني والله .. والله ما عارفين نعيش يعلي وهنموت .. دنيتنا وقفت وحتى اللقمه مش بتتبلع وعيطت اكتر وتابعت كنت دنيتنا فلما غيبت عننا غابت الدنيا وضلمت حتى تولين من امبارح مموته نفسها عياط وعايزاك
علي بدموع حرام عليكم يا اسيا والله تفهم ايه دي وبص لتولين اللي بتعيط في حضن كريم وعايزاه ففتح ايديه وتابع بدموع بس بس ينورعيني تعالي يقلبي تعالي
فكريم راح بيها وادهاله بحزن فعلي حضنها جامد وباس راسها خدها وضمها لحضنه وتابع بدموع بس والله انا اهو خلاص متعيطيش انا جنبك والله
تولين بعياط تعالى معاياا انا عايزااك
علي بوجع جاي والله يعمري هو كام يوم بس كده علشان في مشكله صغيره فانا هحلها مع عمو الظابط وجاي والله وفضل يبوس خدها وتابع بس متعيطيش وغلاوه خالو عندك ماتعيطي وحضنها جامد وتابع بوجع كفياها عيااط ابوس ايديكم محدش يتكلم قدامها على اي حاجه نهائي
رانيا بعياط واحشتني ينورعين امك وفضلت تعيط بانهيار وحضنته فعلي حضنها بعمق فتابعت اسيا بدموع تعالي يعمري يسلم على تيته بس وهياخدك تاني فعلي رفع ايديه التانيه وحضن امه جامد ودموعه نزلت على كتفها وتابع محتاج دعواتك اوي يا امي .. حقيقي ضافت عليا لدرجه اني مبقتش مستحمل
رانيا بعياط بدعيلك ينورعين امك فكل ثانيه والله وعيطت اكتر وتابعت وهموت عليك وعلى اللي بيجرالك بس عارفه ربنا كبير ومش هيسيبك يا ابني
علي بوجع يارب يا امي والله يارب يسمع منك
رانيا حطت ايديها على خده ومسحت دموعه وتابعت بعياط حقك علياا كل اللي انت فيه ده انا السبب فيه وعيطت اكتر وتابعت ياريتني كنت مووت ولا شوفتك بيحصلك كده ينورعيني
علي بدموع متقوليش كده ده قضاء وقدر وبعيد الشر عنك ربنا يديمك لينا .. انا عايزك تدعيلي بس كل شويه دي اهم حاجه ومسك ايديها يبوسها
فرانيا حضنته وباست خده وضمته ليها جامد وتابعت بعياط وقهر: ااه يااارب ااه مش قادره ولا جايلي قلب اسيب حته مني هناا وامشي بمووت بالحياا يعلي والله بمووت
علي حضنها اكتر وتابع بدموع ابوس ايديكي لو بتحبيني اجمدي ومتتعبنيش عليكي اكتر من كده علشان تعبكم ده هو اللي فعلا هيموتني انا بالحيا لان ما باليد حيله
رانيا بعياط غصب عني يا ابني والله بموت في غيابك يعلي وعيطت اكتر وتابعت ده انت اللي كنت مصبرني علي غياب ابووك .. ضهرنا مكسور في غيابك ومش عارفين نقعد في البيت من غير حسك
علي حضنها وتابع بدموع ياما ابوس ايدك خلاص بتتعبيني كده
رانيا بعياط الظلم يقهر يا ابني انا لو عارفاك تعمل كده كنت ضربتك قلمين وسيبتك تتربى وحطت ايديها على خده تمسح دموعه وتابعت بعياط انما انت ينورعيني ده اانا مشوفتش ولا هشوف في ادبك واخلاقك
علي بوجع اختبار وهيعدي والله العظيم بس اجمدوا ابوس ايديك
رانيا باست خده وتابعت وهي بتحاول تتماسك حاضر ينورعيني حاضر
فعلي ابتسملها وبص لسلمى ورفيده اللي بيعيطوا بصمت فتابع بوجع تعالوا وفتح ايديه
فراحوا حضنوه فباس راسهم وتابع بوجع مش عايز حد يتعبني اجمدوا ابوس ايديكم وادعولي وباس راس الاتنين بعمق
سلمى بدموع انا مش قادره اجي اشوفك وامشي واسيك هنا ومش هعرف بردو استغنى عنك وابطل اجي وعيطت وتابعت انا مش هزود وجعك بس انا حقيقي مقهوره اوي
علي مسح دموعها وباس جبينها وتابع عارف انكم تعبانين بس والله يسلمى بموت لما اشوفكم كده ودموعه نزلت وتابع يستي اضحكوا عليا علشان مشوفش بعيني وجعكم ومعرفش اكون جنبكم زي ما متعود
سلمى عيطت وتابعت علي انا هطلع برا ابوس ايدك مش قادره
علي بوجع لا متطلعيش عايز اشبع منكم متضمنيش المره الجايه امتى
كريم بقلق انت عرفت حاجه ولا ايه
علي بوجع لا معرفتش بس الموضوع مش سهل
رفيده بعياط انا تعبت ومش قصدي ازود همك بس هتخرجلي امتى بقى انا حقيقي عايزاك جنبي مش عارفه اواجه اللي بسمعه لوحدي
علي بوجع حقك عليا وخدها في حضنه فلفت ايديها حوالين رقبته وحضنته جامد وهو ضمها ليه وسند راسه على كتفها وفضل يطبطب على ضهرها وتابع ادعيلي يا رفيده انا حقيقي في وضع صعب
رفيده بدموع بدعيلك وهدعيلك والله
فحبيبه قلبها وجعها وهي شيفاه حاضنها كده واترددت في بالها جمله رفيده ""انا عارفه انها كانت عايزاه وهي عاارفه انها لحد انهارده هتموت عليه بس ريحي نفسك يحبيبه محبش ولا هيحب غيري وفري مرواحك هنااك لانه مش هيغير حاجه """ فحبيبه مسكت دموعها ومسكت الاوكره ورايحه تفتح الباب فتابع علي : حبيبه
حبيبه خدت نفسها بعمق وبصتله وهي بتحاول تبان طبيعيه فساب رفيده واتقدم شويه وتابع تعالي
فحبيبه سابت الاوكره وراحتله وتابعت بابتسامه طمني عليك ودموعها نزلت غصب عنها بقهر من قله حيلتها موجوعه عليه وموجوعه منه كان نفسها تعمل زيهم وتترمي في حضنه وتقوله قد ايه تعبت زيهم واكتر بس كل ده كان حرب جواها ومن برا عينيها بس اللي مقدرتش تسكت وبينت انها موجوعه ودموعها نزلت
فعلي مد ايديه الاتنين ومسح دموعها وتابع بوجع متعيطيش دموعك غاليه علياا
حبيبه دموعها زادت وحطت ايديها السليمه فوق واحده من ايديه وتابعت بعياط انا كويسه المهم انت وعيطت اكتر وتابعت انا مش مهم عامه فكل حاجه بس انك انت تكون مرتاح فكل حاجه دي الاهم عندي
علي مسح دموعها وباس راسها وتابع حقك على راسي تعبتك ومرمطك امبارح اليوم كله وحتى الظابط اللي جيه من طرف ابو صاحبتك قمه فى الذوق والاحترام فحقيقي مش عارف اقولك ايه يحبيبه حاسس نفسي عاجز قدام اللي انتي بتعمليه
حبيبه بصتله بحب ودموعها نزلت وتابعت وتلقائيه : متقولش حاجه ينورعين حبيبه .. انت لو تعرف غلاوتك عندي قد ايه هتتاكد ان كل ده عادي وولا حاجه اصلا منا اكيد مينفعش اسيبك في مصيبه زي دي
علي بابتسامه لا والله ده انتي فعلا اصيله وعملتي كتير
رانيا بدموع وجات قعدت معانا وبتراعينا في غيابك
علي اتفاجئ والدموع اتجمعت في عينيه وتابع طب والله ارد اقول ايه !! الواحد مكسوف منك
حبيبه ابتسمت بدموع وتابعت متقولش اي حاجه وصحيح انا جيبالك معايا اكل لليوم كله انهارده يارب يعجبك ومتخافش مش هيبوظ وراحت تفتح الشنط
علي بحب تعبتي نفسك والله
حبيبه وهي بتطلع العلب تابعت قولنا متقولش كده بقى وراحت طلعت العلب وحطيتها قدامه وتابعت افطر لانك اكيد لسه مفطرتش وعملتلك شاي في الازازه الحراريه دي ومسكت شنطه تانيه وتابعت بابتسامه وده المصحف والمصليه بتوعك
فعلي اتفاجئ بشده وتابع ياااربي عملتيها ازاي دي بجد ولا كأنك قريتي افكااري كنت فاكر اقول لاي حد فيكم يجيبهم معااه بس نسيت حقيقي
حبيبه بضحك شوفت علشان تعرف عد الجمايل بس
علي خدهم منها وباسهم وتابع بابتساامه ميتعدوش والله يحبيبه
حبيبه بصتله بحب وتابعت متقولش كده
رفيده نفخت بعصبيه وبصتله وتابعت هو انا ممكن اقعد معاك لوحدنا ؟؟؟
علي باستغراب ده اللي هو ازاي يعني فكراني بتفسح هنا فهاخدك ونروح اي حته تانيه ؟؟
رفيده بحده خلاص ياعلي هشوف وقت تاني واجيلك
علي بعصبيه انتي بتزعقلي ليه انتي عبيطه ولا ايه
رفيده نفخت بضيق وتابعت لا خالص مبزعقش مخنوقه شويتين بس
علي برفعه حاجب مالك يا رفيده ماتظبطي كده في ايه
رفيده بحده والله انا مظبوطه الدور والباقي على اللي ..
علي بمقاطعه وعصبيه : رفيددده
رفيده نفخت بضيق وتابعت نعم يعلي
علي بحده ورفعه حاجب اتلمي واتمسي وقولي يامسا علشان انا لو سمعت حاجه معجبتنيش همد ايدي عليكي وانا ولا بحب اعمل كده ولا احب اني اقلل منك قدام حد
رفيده بضيق ااه يعني ايه ياعليي
علي بعصبيه يعني تخرسي مسمعش حسك تمااام ؟؟
رفيده اتعصبت ورايحه تتكلم فتابع علي بمقاطعه وبحده تمااام ؟؟
رفيده بضيق تمااام بس بردو مش هعديها على خير
رانيا بحده ماخلاص يحبيبتي حصل ايه لكل ده مالك في ايه
اسراء بابتسامه يمكن حست ان الناس اللي قالت عليهم مرواحهم مش هيغير حاجه طلع دلوقتي هيغير ولا حاجه
علي باستغراب انتي قصدك ايه ليه حصل ايه
حبيبه بتوتر مفيش يعلي محصلش حاجه
رفيده بحده ماشي اسراء حسابك معايا بعدين
اسراء بحده ايه انتي هتزعقيلي زي ما زعقتي لامي وشتمتيها ولا ايه
علي اتصدم وتابع بحده نعمم ؟!!! زعقت وشتمتها !!!!
رفيده بصتله بخوف فتابعت رانيا بحده بس يحيوانه انتي اسكتي مزعقتش يا ابني ولا عملت حاجه
اسراء بعصبيه لا زعقت وقالتلك انتي مبتحسيش هو علشان علي مش قاعد هتهين فيكي ونسكت من اولهاا ولا اييه فرانيا بصت لاسراء بحده
فعلي مسك دراع رفيده وتابع بعصبيه ايه اللي اسرااء بتقولوا ده انتي اتجننتي ولا ايييه ؟!!!
رفيده بحده ودموع انا مكلمتهااش انا كنت بتخانق مع امي في الفوون واختك سمعت بس مشاافتش وفكرتني اقصدهااا
اسراء رايحه تتكلم فتابع كريم بعصبيه اقسم بالله العظيم يا اسرااء لهطلع عين اهلك لو بوقك ده اتفتح تااني .. مش فاهمه حاجه متتكلميش
علي بعصبيه يعني ايه بردو مش فااهم ماتردي وتفهميني ياامااا عملت كده معااكي انتي ولا كانت بتتكلم في الفوون ؟؟!!
رانيا بتوتر كانت بتتكلم في الفون يا ابني وغلاوه النبي عندك لتسيبهاا علشان خاطري انا
علي ساب رفيده بضيق وتابع اقسم بالله العظيم لو كنتي عملتي كده مع امي كنت دفنتك حيا وماحد كان عرف ياخدك من تحت ايدي
رفيده بصتله بخوف وتابعت بحده ودموع مهببتش حاجه مش عبيطه انا علشان اعمل كده مع واحده قد امي هي اسراء فهمت غلط
علي بعصبيه انا نبهت وخلاااص خلصنااا
اسراء برفعه حاجب طب ماما كنتي بتتكلمي في الفون بالنسبه لحبيبه بقى مش هزقتيها وقولتيلها متجيش
رفيده بعصبيه ااه عملت كده يا اسرااء ارتااحتي ؟؟!!
علي بصلها بصدمه وتابع بعصبيه جراالك ايه يا رفيدده بدل ماتشكريها على وقفتها جنب جووزك تهزقيها !! انتي شكلك اتجننتي والله العظيم
رفيده بحده تيجي تعمل ايه ياعلي هي ماالها بيك
علي بعصبيه ليهاا وليها زيكم كلكم كمااان هو مين غيرها تعب معاياا فحبيبه بصتله بحب ودموعها بتنزل فتابع علي بعصبيه كفاياكي غيره فااضيه بقى انا رااجل متجوز ثقي فيااا اكتر من كدده مش هفضل اهري في الموضوع دده كتيير بس حبيبه وجودها مهم ولو مكانتش جات كنت هزعل منها انا اتبسطت اني شوفتهاا انتي ايه مضاايقك فكده مش فااهم
رفيده بعصبيه يعني انت هتعديهاا ان انا اقولك حابه اشوف عصاام
علي بعصبيه عصاام عصام واتعصب اكتر وتابع انتي كرهتيني في عصاام اكتر منا بكرهوو ومسك دراعها وتابع بعصبيه افهمي بقى ده كان خطيبك وبصلك بنظره انك مرااته انما حبيبه دي متربيه معااياا بتقاارني بمين بمين بجددد وبعدين مانتي رايحه جايه معااه ولا فكراني ناايم على ودااني
رفيده بعصبيه ودموع ده ابن خالتي هلجئ لمين غيره يوصلني ويجبني ويقف جنبي يعني
علي بعصبيه وانا رغم اني عاارف انه وسخ وعينيه منك شوفتك معااه وسكتت لاجل اني واثق فيكي وقولت معلش هي في وقت صعب فـ لجأتله انما انتي لاا وبجد هتوصليني في مره اني اخد اعدام في عصااام ده لان انا حقيقي مبكرهش حد قده وكله بسببك
رانيا اتصدمت وتابعت بحده وتاخد في اعدام ليه ولا تيجي جنبه ليه عملك اييه الوااد مشوفناش منه غير كل خيير وهو مراتك كان في بينهم خطوبه ومكملتش وشكرا مش حاجه تخليك تكرهو يعني
اسراء بصت لامها بذهول وتابعت ماما انتي بتقولي ايه ده هو ..
رانيا بمقاطعه وعصبيه هو واد محترم وابن ناس ووقف جنب مرات اخوكي ومشوفناش منه حاجه وحشه فمتستدعاش انك تكرهو يعلي انت قلبك احن من كده
علي بعصبيه ما اكرهو ولا يولع انتي هيفرق معاكي في اييه
رفيده بحده متدعيش عليه يعلي لو سمحت
علي بصلها برفعه حاجب وتابع نعم يا روح امك ؟؟؟
رفيده بلعت ريقها بتوتر وتابعت ايه ابن خالتي وزي اخوياا
علي بعصبيه عليكي وعلى اخوكي انتي عبيطه يابت انتي ولا اييه طب اشوفك معااه تاني يا رفيده ولا تقابليه تاني وانا اطلع عين اهلك
رفيده بضيق انا ماشيه وخرجت وقفلت وراها
فبصت سلمى لاسراء وتابعت بهمس انتي كله منك
اسراء بهمس حاد بقولك ايه فكك مني علشان انا عملت احترام لكريم وسكت انما دمي اتحرق منهاا
علي تنهد وتابع رفيده عايشه تتعبني بس عمرنا ما اتفقنا على حاجه من غير خناق
كريم بتنهيده متشيلش هم حاجه دلوقتي غير نفسك ورفيده زيها زي كل الستات الغيره بتجننهم حبتين
علي تنهد بوجع وتابع على رايك والله يكريم وبص لتولين اللي نامت في حضن اسيا وتابع محدش يجيبها لو الموضوع وصل لمحاكمه
حبيبه بدموع بعيد الشر ان شاء الله تطلع من هنا او من النيابه
علي بوجع يارب يحبيبه والله
ودقايق ومشيوا والامين مسك علي ينزله الحجز تاني فدخل فؤاد وتابع بوجع علي عندي ليك خبر مش حلو
علي بقلق ايه يا فؤاد في ايه ؟؟؟
فؤاد تنهد وتابع الكاميرات في الاماكن اللي ادتهاني ممسوحه ومفيش اي دليل ان حد حطلك حاجه في العربيه
علي اتصدم وتابع يعني ايه يا فؤاد !! يعني انا هتحبس وهشيل ليله مش ليلتي !!
فؤاد بوجع متقولش كده قول يارب بس كده 99% هتترحل على النيابه وهناك التحقيقاات اكبر
علي غمض عينيه بوجع وتابع للامين : نزلني الله يخليك عايز افضل لوحدي
فؤاد بحزن انا شغاال والله وبعمل اللي عليا يعلي
علي وهو ماشي مع الامين تابع بلا مبالاه: لالا يغالي مش عليك انا فقدت الشغف عموما والدموع اتجمعت في عينيه وهو حاسس بالمصيبه اللي وقع فيها
--------
قدام القسم خرجوا كلهم لقيوا رفيده واقفه مع عصام وبيتكلموا
فتابعت اسراء بحده شايفين بنت الجزم اللي بتدافعوا عنها وزعلانين اني سخنت علي عليها ما كله من افعالها يعني جوزها قالها مشوفكيش معاه تاني وبردو اتصلت بيه جاابته ومعملتش لكلمه اهله احترام
اسيا بضحك يعني لو عملتها مع سليم يطلقني
سلمي بتنهيده هي قله ادب بصراحه هو معلش علشان محبوس يعني ومش شايفها ؟؟
فكريم اتعصب جدا وراح مسك دراعها وتابع بعصبيه هو انتي مش جوزك قالك ملكيش دعوه بيه تاااني ولا هو مفيش احتراام خالص
عصام بسخريه ملهاش دعوه بمين لمؤاخذه اوعاا ايدك عنها كده بس وشد رفيده وقفها ورا ضهره وتابع هو انهي دين اللي قالوا يمنعها من قرايبها يعني معلش
كريم بعصبيه انت اخر واحد تتكلم عن الدين يا زبااله ولو هنتكلم في الصح واللي فعلا الدين بيقولوا فكلمه جوزهاا فوق اي حاجه وبص لرفيده وتابع بعصبيه يلا على العربيه يا رفيدده
رفيده بحده انا هروح مع ابن خاالتي انتوا متخصونيش في حاجه هو اللي من اهلي
اسراء بعصبيه شوف النااقصه ماهو العيب مش عليكي العيب على اخوياا انا انه جاب واحده لمامه زيك واداها اسمه
رفيده بعصبيه ده انا ورحمه الغالين عندي لهدفعك تمن خربان بيتي اللي كنتي هتعمليه ده غالي اوي يا اسرااء
اسراء بضحك لا خوفت وكشيت يابت وضحكت وتابعت يحبيبتي ده انا اعرف ادعك منك عشره مع بعض ففكري قبل ماتتكلمي
اسيا بحده ومش هي اللي كانت هتخرب بيتك يا رفيده. . لسانك وافعالك هما اللي كانوا هيخربووه واعتبري اسراء عيله ومستحملتش اللي انتي قولتيه لامها واشتكت لعلي انما دلوقتي بقي انتي بتعملي اييه مانتي بتكسري كلمته اهو
كريم بحده ولا هتكسر ولا هتنيل هي هتيجي معانا يلا يا رفيده علشان اقسم بالله هزعلك مني
رفيده بعصبيه قولت مش جايه معاكم ووالله العظيم مافي حاجه مصبراني عليكم غير جوزي انما انا لو علياا كنت قطعت من بدري
عصام بحده روح يكريم وانا هجيبها مش هاكلها يعني
كريم بعصبيه وانت مالك بيها اصلاا ومسكه من قميصه وتابع بعصبيه انا مش عايز امد ايدي عليك
فرانيا راحت شالت ايد كريم وتابعت بحده ودموع بس سيبه خلااص مش هيااكلها هي مع ابن خالتهاا مش مع حد غريب
كريم بذهول يمرات عمي علي مش مواافق انتي بتشجعيها على ايه بجدد !!!
رانيا بوجع معلش هي مش هتقررها تاني بس دلوقتي علشان زعلانه مقموصه مننا سيبوها
فكريم اتعصب ومشي وتابع يلا اخلصواا فكلهم اتخضوا وراحو وراه
ورفيده ركبت جنب عصام ونفخت بضيق شديد
فبصلها وتابع مالك يحبيبي في ايه
رفيده بضيق مخنوقه ياعصام ومش طايقه نفسي بجد
عصام بتنهيده عرفتي تتكلمي معاه في اي حاجه؟
رفيده بحده لا هما سابونا نتنيل اصلاا !! ده هما ولعوها حريقه وخصوصا اسراء بنت الجزم دي
عصام بتنهيده هقعدك معاه بالليل هدي نفسك خلاص حصل خير وطبطب على رجليها وتابع متزعليش نفسك
فابتسمت رفيده وبصت لايديه باستغراب وتابعت الساعه اللي منه جابتهالك فين؟
عصام بتمثيل: ابدا شيلتها خلاص
رفيده بتفاجئ ايه ده لييه كدده
عصام بتنهيده اكتشفت انها كانت عايزه نتجوز بسرعه علشان طمعانه تسافر 3 سنين امريكا معايا وتاخد الجنسيه فا ده مش حب يا رفيده ومش دي اللي تستاهل تشيل اسمي
رفيده باستغراب وهي لو اتجوزتك تاخد زيك الجنسيه عاادي ؟!!
عصام بتنهيده ااه طبعل تاخدها عادي علشان مراتي بس لازم تسافر امريكا 3 سنين الاول انما عيالي ياخدوها بعد ولادتهم علطول فا دي واحده بتاعت مصلحتها فسبتها بقى مش ناقص قرف
رفيده بابتسامه احمد ربنا انه كشفها ليك بس فعلا الموضوع ده يطمع فيك اي حد
عصام اممم منا عارف اصل اي واحده بتبقى عايزه تضمن مستقبلها ومستقبل عيالها بس الحقيقيه من الكدابه بتبان عامه .. فواحده زي منه دي كانت طول الوقت مش بتتكلم غير على الجنسيه فخلاص فهمت بقى
رفيده بتنهيده ربنا يعوضك يحبيبي بس معلش ممكن اطلب منك طلب
عصام بحب اؤمري طبعاا
رفيده بابتسامه وديني على البحر انا مخنوقه ومش عايزه اروح دلوقتي بابا بيتعبني نفسيا
عصام بحب بس كده ده من عيوني وسرح وهو بيفتكر حاجه
فلااش باااك
عصام بحده يعني متاكد يا زفت انت ان الفيديو معااك واتمسح من الكاميرات
عزيز بابتسامه متاكد والله يا بيه انا خدت النسخه الوحيده واتاكدت بنفسي ان الكاميرا كلها اتمسحت وراضيت صاحب المحل بالفلوس اللي انت بعتهالي علشان يوافق يمسح ويسكت فكده احنا على اتفاقنا تديني ال 500 الف واديك الفيديو بعد الحكم
عصام بحده تمام غور دلوقتي وهبقى اكلمك اديك الفلوس
عزيز بضحك باي يا بيه
بااااك
وفاق وتابع في سره وهو عنيه بتروح لرفيده ترجع تبص للطريق تاني : انا عملت كتيير اوي علشان تكوني ليا حتى اخترعت منه اللي مش موجوده دي علشان ابعد النظر عني وتشوفيني كويس ومستعد اعمل اكتر بس مش هسيبك لابن قاسم يا رفيده
ودقايق ووصل وتابع بحب وصلنا يعمري
فرفيده ابتسمت وفتحت الباب ونزلت واتقدمت لقدام وخدت نفسها بعمق وعصام قعد على المقعد الموجود وطلع علبه السجاير بتاعته وولع واحده ونفخ دخانها ورجع ضهره لورا وتنفس بعمق
وفون رفيده رن وكانت صاحبتها جيهان فتابعت بتنهيده عصام انا هكلم جيهان قدام شويه
عصام ماشي بابا بس متغبيش عن عيني ونفخ دخان سيجارته وطلع فونه يسكرول فيه
رفيده حاضر ومشيت شويه لقدام وردت وتابعت ايه يا جيجي
جيهان ها طمنيني جوزك عمل ايه
رفيده بضيق ولا حاجه لسه مش عارفه هترسي على ايه والله
جيهان بتنهيده اقولك رايي ومتزعليش يا رفيده؟
رفيده بحزن اكيد انتي اختي يا جيهان
جيهان بضيق بلاش علي هيضيعك انا لو منك اطلب الطلاق
رفيده بحده طلاق ايه يا بنتي هو انا اتنيلت اتجوزت علشان اطلق انتي التانيه !!
جيهان بضيق جوازه النداامه ياختي قال يعني مستنيه يلمسها علشان تعتبر نفسهاا في مصيبه وانها متجوزه بحق
رفيده بضحك مش كده يامهزقه .. بس بردو لسه هو جوزي ورق بس .. وانا بحبه وعايزاه .. ده انا لو مش بحبه بردو حراام اعمل في نفسي كده هي كلمه مطلقه دي سهله على المدام علشان تبقى سهله على بنت البنوت يا جيهان ؟!!
جيهان بحده انتي عبيطه يا بت ولا مجنونه !! بتحبي مين حبك بورص يشيخه وبعدين وفيها ايه لما تطلقي مش احسن ماتستوعبي المصيبه اللي انتي فيها وانتي شايله عيل منه ؟!!! انا بجد حساكي ساذجه ومراهقه ومش فاهمه اي حاجه في الدنياا .. حب ايه اللي بتتكلمي عليه اللي هيموتك من الجوع ده !!!يعني يبقى قدامك دكتور عصاام الامريكي اللي شغال في جامعه نشوفها في الاحلام واحنا نايمين بس ورايحه تحبيلي بتاع المكتبه السواق
رفيده غمضت بضيق وتابعت بدموع جيهان لو سمحتي
جيهان بحده بلا جيهان بلا زفت بقى .. فوقي لنفسك يا رفيده ده هيبقى شريك حياتك العمر كله والقضيه اللي هو فيها مش سهله يعني حتى لو خرج سُمعته بقيت زي الزفت ولو اتحبس هيطلع رد سجون تقدري تقوليلي يا دكتوره يا متعلمه عيالك هيبقى مستواهم وسيرتهم ايه لو وده ابوهم !!!
رفيده عيطت وتابعت عارفه بس انا بحبه و الدنيا ظلمته اوي مش عايزه ابقى انا والدنيا لان انا حقيقي مش هقدر اجي عليه ولا الومه ولا اقوله نطلق لان انا اكتر حد عارف علي شخص محترم وطموح قد ايه وتعب قد ايه في حياته
جيهان بحده خلاص يا رفيده خليكي على ذمته انا مالي بس ياريت ابوكي يوافقك الرأي بقى
رفيده بحده ودموع وقت الجد هقول ده جوزي وانا عايزاه وهروح اقعد عند حماتي لحد ما يخرج بالسلامه سيبك من بابا خالص علشان خلاص انا بقيت مرات علي
جيهان بتنهيده براحتك يابنت الناس اللي ياكل على ضرسه ينفع نفسه ده ياريته عصام حبني انا اقسم بالله كنت ركبت في شنطه عربيته في لحظتها
رفيده فضلت تضحك من بين دموعها وتابعت حيوانه صح
جيهان بضيق لا ياختي انسانه وبمخ طبيعي بشري الحيوان صح اللي لاغي عقله انتي تضمني منين ان علي مش متورط بجد ؟!! يعني مين قالك انه ميعملهاش من كتر الاحتياج مثلا ؟؟
رفيده تنهدت بعمق وتابعت انا واثقه فيه ومع ذلك هقعد معاه وافهم شغله ده بيوصل ايه لان هما شركه شحن كبيره فانا مش فاهمه اصلا ايه الحاجات اللي بيوصلها للمحافظات التانيه
جيهان بتنهيده ربنا معاكي يا رفيده
وفضلوا يتكلموا شويه بعدين قفلت معاها وراحت قعدت جنب عصام فابتسم وتابع الكلام خدك مع جيجي
رفيده بابتسامه يعني مش اوي
عصام بضحك يعني مش اوي ايه بس ده انا راسي اتلوحت من كتر ما باصص عليكي وانتي قاعده هناك
فرفيده فضلت تضحك وتابعت ياروحي حقك علياا
عصام بحب متقوليش كده ده واجبي
فرفيده ابتسمت وتابعت انا بعت لماما اني هاجي بالليل فخلينا شويه اشوف علي ونروح ممكن ؟ وحضنت نفسها وفضلت تمشي ايديها على كتفاها
عصام بحب ممكن طبعا وبص لايديها وتابع بس مالك في ايه انتي بردانه ولا ايه ؟؟
رفيده بضحك ااه شويه علشان لابسه نص كم وخفيف
فعصام قلع جاكت بدلته وحطه فوق كتافها وخدها في حضنه وباس جبينها وتابع وكده؟
فرفيده ابتسمت وتابعت هتبرد انت كده
عصام بحب متشغليش بالك بيا المهم انتي
رفيده رفعت راسها من على صدره وبصتله بوجع وتابعت عصام
عصام بحب عيون عصام
رفيده دموعها نزلت وتابعت انت لسه بتحبني؟
فعصام تنهد بعمق وبص للبحر بشرود فمسكت خده ووجهت وشه ليها وتابعت بدموع عصام انا بسألك سؤال جاوبني
عصام بصلها بوجع وتابع انتي شايفه ايه ؟
رفيده بوجع طب مش حرام عليك كنت هتظلم منة معاك ؟
عصام تنهد بوجع وبصلها وتابع كنت بحاول ادور على رفيده بس ولا هي كانت رفيده .. ولا وافقت باسماء عيالنا يكونوا چوري ويزن زي ماختارناهم انا وانتي .. ولا انا عرفت اعمل احلام جديده مع حد زي ما انتي عملتي
رفيده بدموع عصااام
عصام تنهد بوجع وتابع عصام لسه فاكر لهفه عينيكي وانتي مستنياه يرجع اجازه من امريكا علشان بيبات معاكم وتعمليله فشار وتسهروا في البلكونه للصبح وسكت ثواني وتابع بوجع: هو انا عملتلك ايه يخليكي تكرهيني للدرجه دي يا رفيده ؟!! ده انا مكنش ليا في الدنيا غيرك انتي وامي لانك عارفه اني وحيد ومقاطعين اهل ابويا وعشت عمري كله في بلد غريبه ومصر بنسبالي كانت رفيده وعيون رفيده اللي كنت بنزل كل اجازه مشتاق اشوفهم .. ازاي كنتي قاسيه كده لدرجه انك عرفتي تتجوزي غيري ؟؟!!
رفيده بوجع الكلام ده معتش ليه لزوم وقامت ووقفت بعيد عنه فبصلها بوجع وتنهد بعمق وولع سجاره وقام يشربها بعيد عنها شويه وتابع بصوت ممسموع من غير مايبصلها: حقك عليا يا رفيده .. مش هصدعك بحاجات قديمه تاني .. بس يمكن انا مش عارف انساهم لاني بعيش على الايام دي .. عملتك امي في غيابها واخويا وصاحبي وكل الادوار في حياتي لاني اتحرمت من كل الاحاسيس دي وعشت وحيد بس معلش دي مش غلطتك انتي ابداا ومالكيش انك تتحملي مسئوليه مشاعري وبصلها وتابع انا اللي عملتك كل حاجه وانا اللي هرجعك ولا حاجه ورمى سجارته وداس عليها وراح ركب عربيته وهي تنهدت بعمق ووجع
---------
بعد شويه عند اسيا كانت قاعده في اوضتها بتشتغل على اللاب
ودخلت سلمى وهي جيبالها القهوه وتابعت بحب لاقيتك بتشتغلي ومسحوله قولت اعملك قهوه تفوقك شويه
اسيا بحب تسلميلي ينورعيني
سلمى بتوتر اسيا هو انا ينفع اكلمك في حاجه خاصه شويه ؟
اسيا بحب يسلام ده يعيون اسيا وسابت اللاب وتابعت اقعدي
سلمى بلهفه لالا انا باخد اذنك انما مش دلوقتي كملي شغلك حقك علياا
اسيا بضحك اقعدي يابت اخلصي هكمل مش هيغور في حته الشغل موجود لحد ما هيخلص عليا
سلمى بضحك ربنا يقويكي يحبيبتي بجد وقعدت قدامها وتابعت بتوتر: انا كنت بفكر لما علي يخرج بالسلامه واطمن عليه اروح لدكتوره نفسيه وكده
اسيا باستغراب نعمم !! وده ليه ان شاء الله
سلمى اتوترت وتابعت بصي هي حاجه محرجه بس انتي اختي فهحكيلك
اسيا بضحك ماتخلصي يابنت الجزمه انتي هتتكسفي مني انا !!
سلمى بضحك لا هقول اهو
اسيا بضحك وغمز ايه حازم اتحرش بيكي ولا ايه
سلمى اتكسفت وتابعت لا طبعا ميقدرش
اسيا بضحك ااه يقلب اختك صادقه منا واثقه في ايه بقى
سلمى تنهدت وتابعت انا بخاف من التلامس عامه يا اسيا واظن انتي عارفه ان انا كده
اسيا بحب عارفه طبعا وانتي اكتر حد خواف فينا بس يعمري انتي كويسه مش مستاهله دكتور
سلمى بحزن لا ماهو ده مش لوحده كده ده من عقده قديمه
اسيا بصدمه ازاي يعني
سلمى بحزن هقولك "" وفضلت تحكيلها كل اللي حكيته لحازم ""
فاسيا اتصدمت وتابعت بحده وازاااي متعرفنيش انا ولا اخوكي باللي حصل من ساعتها انتي مجنونه يا سلمى !!!
سلمى بدموع اهو اللي حصل كنت عيله وخوفت
اسيا بخوف انا علشان عارفه الدنيا ملهاش امان مقدرش افوت يوم من غير ما اقول لتولين حصل ايه انهارده في الحضانه واحكيلي واصاحبها علشان اعرف كل حاجه فاهي بالتدريج بقيت تيجي من نفسها اكون بعمل حاجه في المطبخ وتقف جنبي تحكيلي كل الشريط بقى انما ماما مكانتش توعى ان ده مهم
سلمى بوجع اه بالظبط وتنهدت وتابعت بس فا الموضوع نفسيا صعب اوي وحازم محضنيش يوم كتب الكتاب وقدر خوفي انما لما حضني في شقتنا مستحملتش واترعبت والدموع اتجمعت في عينيها وتابعت اسيا انا مش مستوعبه يعني ايه هيلمسني والله مرعوبه من الفكره بس ومش عايزاها
اسيا نفخت بتوتر وتابعت اهدي بس حقك عليا وقامت قعدت جنبها وخدتها في حضنها وفضلت تمشي ايديها على شعرها وتابعت بصي يحبيبي مبدائيا خوفك ده علشان انتي عروسه زي اي عروسه انا عايزه اقولك يوم فرحي مكنتش عايزة اليوم يخلص ومرعوبه وعيطت من غير عقد اهو ولا اي حاجه ولما روحت جسمي كان تلج وعلي بيطلعني لقاني كده فهمس لسليم وقاله معلش يسليم حقك علياا بس بلاش انهارده هي مرعوبه وفعلا سليم لقاني خايفه قالي خلاص يابابا كلي وهنام وانا بقى حسيت كانه جبل وانزاح من على قلبي وفضلت اضحك وساعتها قالي يابنت الجزمه دلوقتي الخوف راح فقولتله انا فعلا مرعوبه والله فقالي علي خد باله ووصاني اسيبك انهارده وعايزه اقولك دخلنا بعد اسبوع وكله فاهم ان من الصباحيه تمام الحمدلله معادا علي صارحناه واديني معايا تولين اهو بسم الله ما شاء الله اربع سنين فوالله يحبيبتي العشره كفيله تضيع خوفك انتي بس في الاول خدوا الامور ببساطه وواحده واحده ومش شرط اول يوم ولا عاشر يوم لا براحتكم انتوا مش هتطيروا من بعض وخلي نور خفيف كده وبالتعود خلاص هيبقى حته منك وهتبقي حته منه فمش هيبقى في خوف خالص انما كسوف عادي انا لحد انهارده بتكسف من سليم والله العظيم
فسلمى فضلت تضحك فتابعت اسيا بضحك اه والله زي مابقولك كده بس والله يا سلمى ايام ما كتت عروسه دي كانت احسن اياام فمتضيعيهاش خايفه واستمتعي بيهاا علشان مفيش راحه ولا برااحه بعدهاا ولو لاقيتي المشكله لسه موجوده يبقى ساعتها نلجئ للدكتوره انما انا والله حاسه الجواز هيساعدك تتخطي كل ده
سلمى بحب خلاص هعمل كده وباست خدها ونامت في حضنها وتابعت مش عارفه بجد اقولك ايه مندمتش لما حاكيتلك ريحتي قلبي بكلامك وفهمتي موقفي ربنا يديمك ليا يعيوني يارب
اسيا باست راسها بعمق وتابعت ويديمك ليا ينورعيني انتي وافرح بيكي ياارب
سلمى بحب يارب ورفعت راسها وبصتلها وتابعت بس قال صح بيتغيروا بعد الجواز
اسيا فضلت تضحك وسلمى فضلت تضحك على ضحكها وتابعت ايه في ايه ؟
اسيا بضحك ما لسه بقولك استمتعي باول فتره دي هكون بقول كده ليه ؟
سلمى بضحك يسد نفسك يا اسيا بجد قفلتيني
اسيا بضحك مش مسأله بقفلك بس بوعيكي لان الحياه مش دايما وردي وتنهدت وتابعت سلمى انا اخر فتره مكنش بيتي فيه اكل وصلت بينا مرحله مكنش بيبقى في اكل وقعدت تولين فتره من حضانتها وبعت دهبي وحاجات كتير ولولا سليم سدد اللي عليه وكمل من البنك على اللي فاض واشترى اسهم في شركته لولا عرفنا نمسك فلوس تاني وبقى ماسك في الاداره دلوقتي وهيبقى مدير الفرع التاني لشركتهم والحمدلله ربنا عوض تعبه انما س
صدقيني شوفنا ايام سودا وبقيت بضاعف عدد ساعات شغلي ومش مكفي فاهو مش وحش بس المسئوليات بتغير
سلمى بحزن يحبيبتي بجد حقك عليا ده محدش كان يعرف الموضوع ده خالص والله
اسيا تنهدت وتابعت لان انا مبحبش احكي مشاكل بيتي بس بجد اخر فتره استحملت مرار طافح الحمدلله فتره وغارت
سلمس بحب ده علشان معاه ست جدعه واصيله زيك وقفت في ضهره والله
اسيا بحب ينورعيني انتي وحضنتها
سلمى بحب انا مش بجاملك بجد بس نفسي ابقى زيك بتكتمي على مشاكلك وبتستحملي ومش بتشتكي وشيلتي جوزك في اصعب اوقاته ونكلمك تقولي عايشه ومتهنيه وانتي شغاله ليل نهار وطالع عينك
اسيا بحب لان ده الصح وسليم يستاهل اعمل علشانه كده واكتر
سلمى بحب ربنا يخليكم لبعض يعيوني يارب
اسيا رايحه تتكلم فونها رن فبصت لقيته هو فتابعت ياااه اخيرا يسليم برن عليه من امبارح مقفول
سلمى بضحك وغمز طب اسيبكم شويه مع بعض بقى
اسيا بضحك يلا يا بنت الجزمه فسلمى ضحكت وقامت خرجت وقفلت الباب
فردت اسيا وتابعت ايه يحبيبي قافل فونك ليه من امبارح قلقتني عليك
سليم بتعب لسه صاحي والله يا اسيا كنت سهران في الشركه امبارح وميتينج وحوارات وجيت نمت محستش بنفسي من التعب ونسيت اشحنه طمنيني انتي عليكي وعلى البت واخوكي عمل ايه
اسيا بتنهيده كويسين بس علي الدنيا معاه بايظه خالص والله يسليم
سليم بحزن حقك عليا يحبيبتي لولا اني في الغردقه مكنتش سيبتكم ابدا انتي عارفه انه غصب عني
اسيا بتنهيده عارفه طبعا بس دلوقتي بنتك كانت عايزه تكلمك وحاليا نامت اعمل ايه بقى
سليم بضحك ياروحي .. انا هكلمها شويه كده لو صحيت او بكره عادي منا بشحن الفون اهو
اسيا ماشي يحبيبي فوق كده وخد شاور وكل واتصل بيا
سليم بحب ماشي يعمري يلا باي
اسيا بحب باي
وقفلت معاه وابتدت ترجع تاني تشتغل على اللاب
--------
بالليل عند علي في الاوضه كان قاعد لانه عرف ان رفيده جايه
فدخلت وقعدت قدامه فتابع بحده مين جابك دلوقتي يا رفيده؟
رفيده بتوتر اظن ان فؤاد قالك اني جايه يعني هو اللي جابني
علي بحده فؤاد دي تقوليها لحد تاني مش لياا انا
رفيده بحده هو صاحبك هيضحك عليك ليه يعني ها
علي بعصبيه علشان مرتكبش جنايه والبس اكتر منااا لابس عرفتي ليه؟
رفيده بتوتر لا يحبيبي صدقني هو اللي جابني انت عارف مقدرش اكسر كلمتك ومسكت ايديه وتابعت انا بس عايزه اتكلم معاك فحاجه فجيتلك
علي بتنهيده خير يا رفيده
رفيده بتوتر هقولك بس متفهمنيش غلط
علي باستغراب ماتقولي في ايه
رفيده بتوتر انا عارفه انك متعملهاش والدموع اتجمعت في عينيها وتابعت بس انت قولتلي انا مستعد اعمل اي حاجه علشان نتجوز بسرعه فهل حد اقنعك تشيل القرف ده مره وخلاص وكده ولا ..
علي اتصدم بشده وقاطعها بعصبيه وتابع انتي بتخرفي بتقولي اييه والدموع اتجمعت في عينيه وتابع مين لعب في دماغك يا رفيده ومسك دراعها وتابع بوجع ردي عليا انطقي اصل ده مستحيل يكون فكر الست اللي انا اختارتها علشان تكون ام عيالي
رفيده بدموع علي انا مش قصدي انا بتكلم انك عملت كده من كتر حبك فيا فبحسن نيه يعني
علي بوجع وسخريه وانا مجربتش اعمل كده ليه من زمان بدل ما انا محنطك جنبي سنتين ؟!! الطرق الشمال كتير بس ولا واحده منهم تربيتي ده انا اتخليت عن مهنتي اللي بشهادتي علشان مش هترضي ربنا .. فمين انتي عشان احبك اكتر من ربنا واغضبه بسببك يا رفيده ؟!!
رفيده بدموع بص هو انا شكيت لاني مش فاهمه العربيات بتاعه الشحن بتاعتكم بتحمل ايه اصلا بس خلاص يا علي متزعلش مني
علي بوجع بتحمل اوردرات اللي بتتطلب اون لاين يا رفيده وابتسم بسخريه وتابع انتي ايه اللي جرالك ؟!! وازاي بقيتي كده !! يعني حتى الكلمه اللي قولتها بحب اني مستعد اعمل علشانك اي حاجه تتفهم غلط بالشكل ده ؟!! طب ازاي ده انتي ندمتنيي اني قولتها
رفيده بدموع علي انا اسفه والله و
علي بمقاطعه من فضلك كفايه واطلعي برا انا اعصابي تعبت النهارده بما فيه الكفايه
رفيده بدموع وحياتك عندي انا اقصد ان ..
علي بعصبيه قولت اطلعي براا
فرفيده اتخضت وقامت طلعت وهي بتعيط وعلي نفخ بعصبيه وزق الترابيزه برجليه
--------
بعد مرور 15 يوم علي كان اترحل للنيابه وبردو مثبتوش اي حاجه غير ان مفيش دليل لبرائته ورفيده وقفت جنبه وراضيته على قد ما قدرت وحبيبه فكت الجبس وسليم بيسافر الغردقه ايام ويرجع واسيا كل ده قاعده مع اهلها وحبيبه معاهم وبتراعيهم وما فيش اي جديد في الاحداث الايام واقفه وشبه بعضها لحد ما جيه يوم المحاكمه واسيا سابت تولين مع شيري والمرافعه كانت طويله وفؤاد واقف بيدافع عن علي بكل اللي يقدر عليه والكل حضر الجلسه وواقفين متوترين وعلي قدامهم واقف في القفص والقضاه قاموا علشان يقرروا
وحبيبه بتبصله وبتعيط وبتدعي ربنا وهي مرعوبه وكلهم زيها
فبص فؤاد لعلي وتابع بوجع صدقني انا عملت كل اللي اقدر عليه
علي بوجع عارف كتر الف خيرك يا صاحبي
ودقايق والقضاه جم والكل انتبه ليهم برعب ودقات قلبهم بقيت عاليه جدا زي الطبل وعلي بيدعي ربنا الشاهد الوحيد عليه انه ينجيه
فتابع القاضي: حكمت المحكمه حضوريا على المتهم علي قاسم الجارحي بالسجن لمده 3 سنوات رفعت الجلسه