رواية حكاية مريم
الفصل الثاني عشر 12 والاخير
بقلم محمد منصور
بسم الله توكلت علي الله. وهو رب العرش العظيم
★فتضحك مريم وتقول
تحب اكلم فتحية دلوقتي قدامك
هاشم باهتمام
لو هاتكلميها تكلميها فيديو
فتضحك مريم وتقول
بس كدة
وتمسك الموبيل ال أيفون بتاع سيد وتتصل بمكالمه فيديو ويتم الرد وهنا كانت المفاجاة الكبري اللي بترد فتحية ومعها بنتها رضوي فينظر هاشم وجنزير الي فتحية اللي في الفيديو ويمسك هاشم الموبيل من ايد مريم ويقول وعيونه تكاد تخرج من مكانها
انتي فتحية
فتحية من الفيديو تقول
اية اللي جاب الاشكال الوسخة دي عندك. شكلك يا مريم ناوية تبيعني وتغدري بيا. وتعرفيهم مكان فلوسنا
مريم
انتي اللي ابتديتي بالغدر يوم ما اتجوزتي حسان من ورايا ودة ما كنش اتفقنا انا اتفقت معاكي اعمل نفسي موت عشان اعرف افتح المقبرة اللي تحت بيت جدي لكن انتي طمعتي ولفيتي حوالين ابويا لغاية ما صدق انك بنته وبدئتي تهدديني بابويا وامي يا ما ارجع الدهب بتاع المقبرة يا اما تقتليهم. لكن عايزا اقول انك انتي اللي هاتموتي
فتقول رضوي في فيديو
ماما هو دة الراجل اللي كان خاطفني
فتحية بتحدي
مانخفيش دة حمار ولا يقدر يعمل حاجه احنا كلها 6ساعات ونكون برة مصر وعايزا واطي من اللي عندك دول يفكر يتعرض لي
جنزير
مش هاتلحقي تهربي يا روح امك هاجيبك وهأقتلك انتي وبنتك
ولكن الفيديو ينتهي فيرمي جنزير الموبيل غاضبا ويضع المطواة علي رقبة مريم ويقول لها
هي فين
مريم
في شارع محمد محمود في التحرير عمارة رقم 23 شقة 6 والفلوس كلها ودهب المقبرة اللي بالملايين. في الشقة
هاشم بصرع
يالا بينا يا جنزير نلحقها
فينظر له جنزير ويقول
لغاية هنا ودورك خلص يا روح امك. الفلوس دي حقي انا وماحدش هيشاركني فيهم
ويذبح جنزير هاشم ويخرج جري من الشقة وهاشم يضع ايدة علي رقبته والدم ينزف منه بشدة وتمسك مريم بحتة قماشة وتحاول ايقاف الدم وتقول لسيد
اتصل بالاسعاف بسرعه
ولكن هاشم حصد ما زرعه ومات الموته اللي تليق بي.،،،،،،،،
وبعدها بساعه يصل جنزير الي الشقة اللي خد عنونها من مريم وفتح باب الشقة بطفاشة ودخل الي الشقة وهو يقول
فتحية انتي فين.
ويفتح حجرة وراء حجرة وهو يصرخ كالمجنون ويقول
مش هاتعرفي تهربي مني المرة دي. ردي علية انتي فين
ويدخل الي حجرة نوم فيجد فتحية تجلس علي السرير وفي حضنها رضوي وهي نائمة وتقول له
صوتك يا حمار ما صدقت رضوي نامت
فيتجة ناحيتها بكل غضب الدنيا وهو يقول
انا حمار يا بنت،،،،،،،،،
وقبل ان يكمل الجملة ظهر سيد من وراء الباب واتجة ناحيته وفي يدة صاعق كهرباء ويصعق به جنزير في راسة
فيصرخ جنزير ويرتعش من قوة الكهرباء ويسقط علي الارض وجسمه كله بيتنفض ولكنه مش قادر يتحرك زيه زي المشلول فتقف امامه فتحية وتضع رجليها قدام بوقة وتقول له
عايزني ارحمك بوس رجلي
ولكن جنزير ينظر لها ومش قادر يعمل حاجة الكهرباء عجزته تماما فتنظر فتحية لسيد فيصعقة مرة اخري ويصرخ جنزير ويتالم بشدة وهو ينظر لها وتقول فتحية
انت اية يا اخي حيوان ماشي تقتل في الناس فرحان بصحتك وبتفتري بيها علي خلق الله اهو ربنا هايخلي نهايتك علي ايد مراة زيي ما تجيش قد دراعك لكن مخها مش طخين زيك. وليك حق علية اني قبل ما اسلمك للبوليس احكي لك حكاية. ،،،،،،،،
ونرجع بالاحداث لكام يوم فات وفتحية في شقة سيد ونايمه علي السرير وهي تعبانه والدكتور بيكشف عليها وبيكتب لسيد روشته ادوية يجبها لفتحية وفعلا ينزل سيد عشان يجيب الدواء وهو خارج من الصيدلية شاف جنزبر ومعه هاشم واقفين قدام البيت بتاعه فبص لهم وخاف وطلع جري الي شقتة ومن ستر ربنا ما حدش منهم شافة وادي العلاج لفتحية وفاقت شوية وحكيت له فتحية علي قصة الفيرس والعدوي وكل حاجه حصلت لها في الفترة اللي كانت عايشها في المنطقة فبعد ما خلصت قال سيد
ياااااااا. انتي اتبهدلتي قوي يا فتحية
فتحية
دة حساب علية ولازم اسدة. ثمن التوبه غالي قوي ولازم اكون قدة
سيد
طيب انتي دلوقتي لازم تكشفي وتشوفي المرض عندك وصل لغاية فين
فتحية
خايفة اكشف. يا سيد. ليكون المرض عندي في مرحلة مافيش ليها علاج واموت
سيد
خايفة من الموت
فتحية
من ساعه ما توبت بطلت اخاف من الموت. الموت راحة لاي مؤمن. لكن خايفة علي بنتي تتبهدل من بعدي
سيد
ربنا يديكي طولت العمر وتربيها لغاية ما تشوفيها عروسة
فتحية
يارب
ثم تنظر فتحية لرضوي اللي كانت قاعدة جنبها وماسكة موبيل سيد ال ايفون بتصور نفسها فيديو ولكن الغريب ان الفيديو ظاهر علية اشارة المكالمه الفيديو فقالت لها
رضوي حبيبتي ادي الموبيل بقي لعمو سيد
سيد
خليها تلعب
فتحية
لا بلاش لتبوظ لك حاجه انا شايفة كلام علي الفيديو اللي عماله تصورة
سيد ضاحكا
يا توحه متخافيش دة برنامج فوتو شوب بتعملي بي اي حاجة علي الفيديو اللي انتي مسجله يعني ممكن تدخلي فيديو علي فيديو وتكتبي اللي انتي عايزا علي الفيديو وكدة يعني
فتحية وهي بتضحك
انت من زمان غاوي برامج وموبيلات غالية
سيد ضاحكا
ما أنا عشان كدة مش عارف اتجوز.
فتحية
انت شكلك كدة هاتتجوز رضوي
ويضحكا الاثنين. وفجاة يتذكر سيد انه شاف جنزير قدام البيت فقال لفتحية
صحيح. جنزير لسة حطك في دماغه
فتحية بفزع
جنزير هو لسة بيدور عليا دة أنا افتكرته مات في الخناقة اياها. وهو انت شوفت فين المخفي دة
سيد
واقف قدام البيت ومعه واحد اسمر كدة واقصر منه شوية وشعرة خشن
فتحية
مصيبة ليكون هاشم.
سيد
هاشم مين
فتحية
هاشم ابن رضوان
سيد
اللي خطفك وكان عايز،،،،،،،،
فتحية مقاطعه له
هو. هما واقفين فين
سيد
كانو واقفين قدام باب البيت
فتقف فتحية وتقول لسيد
لو وقفت في الشباك أشوفهم
سيد
لو لسة واقفين اة تشوفيهم
فتذهب فتحية ناحية شباك الصالة وتنظر منة بحذر من وراء الستارة فتجد جنزير وهاشم يجلسون علي قهوة امام بيت سيد فتقول لسيد
دة فعلا جنزير ومعاه هاشم. هما الاثنين شكلهم اتفقوا علية وناوينلي علي الشر
سيد
يعني هايكونوا عايزين اية منك. هو انتي حيلتك حاجة
فتحية وهي تجلس امام سيد مرة اخري
ماجنزير مش مصدق اني اتبرعت بفلوسي كلها ومبقاش حيلتي حاجة. بس انا تعبت بقي من جنزير وهاشم وكل القرف اللي في حياتي
سيد
احسن حاجة اننا نبلغ البوليس ويجيوا يقبضوا علي جنزير واللي معه ويرحمونا منهم
فتحية
هايهرب اول ما يشم ريحة البوليس في المنطقة. أنا لازم اسلمة للبوليس وهو جاهز بس اللي محيرني هو لية قاعد علي القهوة وبيراقب البيت وهو اكيد عارف اني هنا
سيد
ممكن مايعرفش انك هنا
فتحية
لا هو عارف اني هنا ومتاكد كمان والدليل علي كدة انه لو عارف اني مش عندك كان طلع وسئألك علي مكاني
سيد
صدقي صح.
فتحية
اكيد بيحضر لمصيبة ومش بعيد يخطف بنتي رضوي تاني مني عشان كدة لازم أخبئ بنتي رضوي منه واجهز له ملعوب يخلصني منه
سيد
قبل أي حاجة لازم تكشفي ونطمن عليكي
فتحية
قبل ما أكشف عايزا اخفي رضوي واجهز نفسي لأي غدر ممكن يحصل من جنزير وهاشم
سيد
رضوي ممكن اطلعها عند جارتنا اللي فوق تاخد بالها منها لغاية مانخلص من الشر دة
فتحية
كويس. وتاني حاجة أسلم جنزير للبوليس واخلص منه بس ازاي
في هذة اللحظة تقف رضوي امام فتحية وفي يدها الموبيل وهي مدخلة فيديو في فيديو وتقول رضوي
ماما شوفتي عملت اية
فتحية وهي دماغها مقلوبة
ماشي يا حبيبتي روحي انتي ألعبي
ولكن فتحية تقع عينيها علي الموبيل وتنظر للفيديو المتركب علي فيديو وتلمع عيونها ويخطر علي بالها فكرة مجنونه وتمسك الموبيل من رضوي وتقول لسيد
لقيتها
سيد باهتمام
هي اية اللي لقيتيها
فتحية
الفيديو اللي هايحميني من جنزير وهاشم
سيد
مش فاهم
فتحية
هاسجل فيديو ليا وانا فتحية ومعايا رضوي وكأننا هربنا وقاعدين في شقة تانية هاتاجرها أنت مفروش لمدة شهر
سيد بدهشة
مش فاهم. هربتي ازاي وهو لو طلع عندي هيلاقيكي
فتحية ضاحكا
اللي معاك في الشقة دلوقتي مريم رضوان
سيد باستغراب اكتر
مريم ماتت. ازاي انتي تكوني هي وهما هايصدقو. صعب جدا
فتحية وهي تنظر للموبيل
عشان ابسط لك الدنيا لازم تتخيل المشهد معايا جنزير وهاشم ممكن يهجموا علينا في اي وقت وهايكونو زي المجانيين ومسعورين علي الفلوس أنت هاتقول لهم اللي عندي في الشقة دي مريم مش فتحية طبعا مش هايصدقة هاقول لهم انا لو مش مصديقين انا هاتصل بفتحية قدامكم واخد منك الموبيل وانت تكون دخلت علي البرنامج بتاعك وتكون فتحت الفيديو اللي احنا سجلنا وفتحت الكاميرا اللي قدام. وتبقي في مربع صغير في اعلي الشاشة. ساعتها هايبان اية لجنزير وهاشم
سيد
هايبان الفيديو المتسجل وفي مربع فوق الصورة بتاعت اللي ماسك الموبيل.
فتحية
وقبل ما ينفتح الفيديو المتسجل هايكون في صوت جرس بيرن وكلام بالانجليزي كأننا في انتظار الرد ويشتغل الفيديو وتبقي المكالمه ابتديت
سيد
طيب هنا ممكن واحد منهم يكلمها بنفسة
فتحية
وهو دة اللي انا عايزا اني واحد منهم هو اللي يمسك الموبيل عشان الفيديو يبدأ صح باني هاشتمهم هما الاثنين وبعد كدة كلامي مش هايكون كتير في الفيديو عشان ما نتكشفش
سيد بقلق
مش مرتاح وحاسس انها مش هاتخش عليهم
فتحية
يا سيد افهم مفاجاة ان مريم عايشة دي هاتشل تفكيرهم وحتي لو في غلطات مش هاتبان لانهم مسعورين علي الفلوس وبمجرد جنزير ما يعرف ان الفلوس مع فتحية في الشقة اللي اتاجرت هايروح جري وهناك يتقبض علية بعد ما اربيه واعلمه الادب. وانا واثقة في ربنا انه هايعميهم زي ما عمي قلوبهم وهايصدقوا غير كدة ممكن يخلصوا علينا صدقني هي دي فرصتنا الوحيدة وربنا معانا .،،،،،،،،
ونرجع للشقة اللي في التحرير وفتحية تقف امام جنزير بعد ما كتفة سيد وحط ايدة في الكلبشات فيقول لها جنزير اللي كان بدأ يفوق من تأثير الكهرباء
يا مراة يا بنت الكلب. انا تلعبي بيا كدة
فتنظر له فتحية وتقول
وهأقل منك كمان
وتخلع شبشبها وتضرب جنزير علي راسة وتقول لة
الشبشب دة هاربطه علي راسك من فوق لغاية ما البوليس ما يجئ يا خدك وعايزاك تفضل باصص للشبشب في المرايا وتفتكر ديما ان اللي علمت عليك مراة
وتضع الشبشب علي راسة وتربط راسة باشارب حريمي وتنظر لسيد وتقول له
أطلب البوليس يجيوا ياخدوا الحمار دة.
وتضحك وهي تقول
لازم ترجعونا لقلة الادب ما كنت توبت ولساني بقي نظيف
وتضرب جنزير علي قفاة وهي تقول
اشكال وسخة صحيح
جنزير بغضب وكالثور الهايج ويحاول فك نفسه وهو يقول
انا مش هاخش السجن لوحدي هاقول لهم انك انتي فتحية السيد
فتخرج فتحية البطاقة بتاعتها وهي تقول
اسكت مش انا بقيت مريم رضوان. وبرضو الحكومه هي اللي قالت كدة يعني خلاص انسي. سلام يا حمار. ونصيحة ربنا يكفيك شر النسوان. دول لما بيحطوا راجل في دماغهم لازم يتهان
وتخرج فتحية من الشقة ومعها سيد وجنزير بينادي عليها والبوليس في الطريق للقبض علية، ،،،،،،،
وبعدها بساعه ومن داخل شقة حسان يقف حسان امام سميرة وهو يضربها بالقلم وعلا تحاول منعه وهو يضرب سميرة ويقول
الواطي اللي انتي سلمتي نفسك لي هو اللي الدم بتاعه في الفيرس اللي اتنقل ليا عن طريقك. وبسببك. واللي بسببك برضو ظلمت فتحية.
سميرة
انت السبب في اللي حصل انت اللي خلتني اعمل كدة واكون رخيصة واسمع كلامه
حسان باستغراب
انا.
سميرة وهي تبكي
اة انت. انت لما طلقتني فقدت الثقة في نفسي وحسيت اني ولا حاجه. وان مريم عندك بالدنيا واللي فيها. حتي وهي ميته انت بتحبها ومش قادر تنساها.
حسان
وعمري ما هانساها. مريم اديتني كل حاجة انتي حرمتيني منها. اديتني الاهتمام والحب اللي بدون مقابل وكل حاجه كنت بلاقيها منها من غير مطلبها عشان كدة حبيتها وهافضل احبها لغاية ما اموت. واوعي تفتكري اني رجعتك لذمتي عشان بحبك. لا خالص انا بس رجعتك عشان علا بنتي اللي دفعت تمن غلطتك
سميرة
انا كمان دفعت الثمن وكان غالي قوي دفع تمن حبي لراجل ما بيحبنيش وبيحب واحدة غيري وبسببة انا بقيت كدة
حسان
خلاص ملهوش لزوم الكلام. انتي طالق
وينظر لعلا بنته ويقول لها
وانتي يا بنتي عماد لو بيحبك هايرجع عشان تكوني مراته انما هو لو هايتجوزك عشان خاطر انتي بنتي وبس احسن لك انك ماتجوزهوش وتشوفي حد يحبك بجد
ويخرج من الشقة وينزل علي دراجات السلم فيجد فتحية امامه وفي يدها نتيجة تحليل الدم بتاعها وتقول له
انا سليمة واشرف من مراتك
حسان وهو يقترب منها
فتحية انا عرفت الحقيقة
فتحية
والله. بس يا خسارة متاخر اوي يا عم الشيخ
وتخرج من البيت وتقف وسط المنطقة وبكل حرقة تقول
اسمعوا ياناس اسمعوا يا خلق يا اهل المنطقة. أنا سليمة من اي مرض ومش جربة
وتنظر للشيخ احمد اللي جالس في دكانه وتقول
سامعني يا عم الشيخ مش جربه. ومش معدية. ومن حقي اقعد في المنطقة زي اي حد وأي كلمه هاتمس شرفي تعتبر بتمس شرف مريم وشرف مريم خط احمر. انا مريم رضوان اشرف بت في الحارة دي. و ما حدش لمس شعره مني الا في الحلال.
حسان
فتحية
فتنظر فتحية لحسان وتتركه وتذهب الي منيرة اللي كانت واقفة في محل المنظفات وحزينه علي جوزها وابنها الاثنين ماتو واتقطم ظهرها فتنظر لها فتحية وتقول
اطلعي ارتاحي انتي يا امي أنا واقفة هنا مكانك
فتنظر لها منيرة وترتمي في حضنها فيقف امامها حسان وهو يقول
حقك علية يا مريم
فتنظر له فتحية ولا ترد،،،،،،،،،،،
وتمر الايام سريعا علي خلق وبطيئة جدا علي خلق ويقف حسان قدام منيرة وفتحية في محل المنظفات وحسان بيبص لمنيرة ويقول
خالتي منيرة خليها تسامحني. انا كنت زي المجنون لما عرفت باللي جالي وما كنتش عارف بقول اية ولا بعمل اية
منيرة لفتحية
سامحي. حسان بيحبك وافتكري هو عمل عشانك اية. يا مريم.
فتحية وهي تبكي بحرقة
كل كلام الناس كوم وكلامه هو كوم تاني ورميته ليا
منيرة
مريم قلبها ماكنش اسود وعمرها ما زعلت ولو انتي فعلا مريم سامحي
فتنظر فتحية الي حسان وتقول
هاتعمل كدة تاني. وتصدق اني ممكن اخونك يا غبي
حسان باستغراب مما سمعه ومنيرة باستغراب اكتر فتقول فتحية باحراج
وربنا اسفة حقك علية. اصل انا بقالي كام ساعه لساني طويل. وربنا ما تزعل
فيضحك حسان
وربنا ما تزعل دي . معنها اية
فتحرج فتحية وتضحك وتقول
ماعرفش بقي هي طلعت كدة.
حسان
عموما انا مش زعلان. انما لو قولتيها تاني
فتحية مقاطعه له
والله ابدا ما قدر
ويذهب ناحيتها ويبوس يدها ويقول
عارفة لولا خالتي منيرة صاحية كنت بوست، ،،،،،
فتضع فتحية يدها علي بوقة وتقول
بس. وربنا ما عارفة انت شيخ ازاي
فيضحك وهو يقول
اية مراتي وبحبها بلاش
وفي هذة اللحظة يقف الشيخ احمد خلف منه ويقول
حسان اهل المنطقة عايزينك ترجع تاذن تاني وتصلي بيهم
حسان فرحا
بجد
احمد
يا ابني مريم علمتني النهاردة درس عمري مع ان سني قد سنها مرتين لكن ازاي فعلا ربنا اللي خلقنا فاتح باب التوبة لكل عاصي واحنا المخلوقين بنقفلة. شرفتي منطقتك يا مريم يا بنتي
وتضحك فتحية وتبكي من شدة الفرح، ،،،،،،،،
وبعدها بيومين يموت وليد بسبب الفيرس اللي في جسمة. ويرجع عماد ويتزوج علا لانة كان بيحبها فعلا. وتعيش سميره وحيدة بعد ما تم شفائها من الفيرس. هي وحسان اللي عاش احلي ايام حياته مع مريم ويعدم جنزير.
تمت بحمد الله