رواية رغبة في الانتقام الفصل الثالث والثلاثون 33 بقلم نوسه حمد
جنابو محمد قدم دليل برائتي والولد المنتحل شخصيه العسكري اعترف انو هو القتل عمار قلت للقاضي لا ديل كذابين انا القتلت عمار كلهم انخلعو بي ذكي وقالو لي نوسه مالك جنيتي قلت ليهم لا لا م جنيت دي الحقيقه وممكن احلف قسم جنابو محمد قال لي نوسه استهدي بالله مالك الحاصل شنو موش كنتي منتظره برائتك عشان تطلعي تعرسي لي اخوانك ليه تكذبي مالك فشنو قلت ليهو لا انا م كذابه وقلت للقاضي احكم علي بالاعدام انا القتلتو القاضي قال لي انتي م قتلتي بس شكلك خايفه من حاجه واتكلمي ما تتستري علي اي شي اتزكرت ندي اختي وانها في خطر ومعتصم خاتي زول في المحكمه قلت ليهو يا مولانا انا القتلتو وممكن احلف قسم وعليكم الله الليله نفذو فيني الحكم العسكري قال ليهم الزوله دي خايفه من معتصم عشان كده اثبتت التهمه عليها القاضي قال لي اتكلمي ي بت م تظلمي نفسك ماتخافي من زول القانون معاك قلت ليهو م خايفه انا وانا القتلتو عليك الله احكم علي طوالي جات الدكتوره داخله قالت ليهو يا مولانا ممكن تقفلو المكان وتشيلو من كل الحاضرين التلفونات قالو ليها فشنو قالت ليهم اعملو القلتو ليكم انا ح اتكلم قلت ليها لا ي دكتوره عليك الله اسكتي طوالي جنابو محمد قفل الباب واستلم كل تلفونات الموجودين القاضي قال لي الدكتوره اتكلمي فشنو قالت ليهم والله يا مولانا انا ح اقول الحق وما ح اكذب في حرف انا بقيت اترجا فيها تسكت عشان اختي قالت لي نوسه م تخافي اختك ما بتجيها عوجه القاضي قال ليها اتكلمي ي بت قالت ليهو انا كنت مداومه وجا ضابط اسمو معتصم ساق السجينه دي وهي كانت رافضه تمش وكانت بتغمز لي وانا م كنت فاهمه حاجه وطلب مني اخرجها عشان ارجعها السجن وانا علي الاساس دا خرجتها وكتبت ليها علاجاتها وفاتو لغايه ما جا ولد جابا لي تاني راجعه وطلب مني ما اجيب سيره انو الضابط جا ساقا واداني قروش وانا رفضت بعد فات بقيت اسال في نسيبه وحكت لي انو الضابط دا ماسك اختها عندو في مكان فيهو عصابه وهو رئيسهم وقال ليها تمشي تقولي انا القتلت عمار ولو م قلتي كده نحنا حا نعتدي علي اختك وقال ليها في زول ح يكون حضور في المحكمه وح يبلغنا البحصل عشان كده انا طلبت منكم تقفلو الباب وتشيلو التلفونات عشان اختها ما اعملو فيها حاجه والعسكري القاتل ح يكون عارف مكانهم وين يمش معاكم لغايه ما تجيبو اختها عشان ما يعتدو عليها جنابو محمد قال لي نوسه كلام الدكتوره دي صاح خشمي م فتحتو طوالي جنابو محمد قال للعسكري عارف مكانهم قال ليهو اي وطلب من القاضي انو يمشو المكان الهم فيهو وينقذو اختي وسمح ليهم وطلعو فاتو وانا قلبي في يدي وبقيت ادعي لي اختي ويارب ما تجيها حاجه الدكتوره قالت لي نوسه استهدي بالله الحق ح يظهر ليه انتي تضيعي نفسك وتمشي ورا العصابه ديل هم لازم ياخدو جزاهم ما تبكي اختك ما بتجيها حاجه قلت ليها لو اختي جاتا حاجه ما ح اسامحك قالت لي خلي ايمانك قوي انو الخير بنتصر علي الشر وبأذن الله الليله شرهم ح يتحسم وربنا بنصرك عليهم انا بقيت متوتره وصوتهم بضرسني وبقيت ادعي واستغفر واصلي علي الرسول واحصن في اختي ومغمضه عيوني وخلاص بقيت في حاله توتر وجنيت عديل ذكي اقول لي نوسه اهدي وانا ابكي اقول ليهو اهدا كيف وانا سبب في دمار اختي اهدا كيف واختي في خطر وانا دايره اموت واهون لي الموت من الانا فيهو دا قال لي استغفري اختك معاها ربنا انتي ليه ايمانك ضعيف كده قلت ليهو بالعكس انا ايماني قوي شديد بس انت م شفت معتصم دا عامل كيف مهما حكيت ليك ما ح اقدر اوصفو ولا ح اوصف القساويه العندو زول م عندو اي رحمه ومستعد يقتل بدل المره الف قال لي هسي خلي الكلام دا واتفائلي خير يا نوسه باذن الله جنابو محمد ح يكشفهم والقضيه دي ح تنحلا بس انتي البصبرك شنو بقيت اقول يا الله تصبرني ياربي انت عالم بحالي انا خلاص قوتي انتهت اتحملت فوق طاقتي وفي اثناء دعواتي ديك سيف ونادر جو ومعاهم مهيد ومهند وحالتهم حاله مهيد دمعتو في عينو قال لي نوسه ادعي اننا نلقا ندي غلبني اقول ليهم ندي اتخطفت بسببي نادر قال لي ندي من انتي فوتي البيت بقت م طبيعيه وبتتنرفز في ابسط الحاجات شكلها زهجت مننا وطلعت وطبعا انا واثقه من مدي تحمل ندي مستحيل لو اضايقت تفكر تطلع من البيت قلت ليهو لا يا نادر ندي م طلعت بي ارادتها قال لي كيف انتي عارفه مكان ندي غلبني ارد بقيت مدنقره مهيد قال لي نوسه اتكلمي نوسه قولي اي حاجه اديني امل انو ندي كويسه غلبني ارد طوالي الدكتوره قالت ليهم ندي كويسه وجنابو محمد مشا اجيبا كميه الفرحه الدخلتهم فيهم عمري م شفتها والمحكمه كلها جاطت وفي جوطتنا ديك جنابو محمد جاب ندي وقبض علي معتصم والمعاهو لحظه اني انتصرت واختي كويسه عمري ما انساها بقيت في عالم تاني وابكي باعلي صوت واقول يا امي انا حافظت علي الامانه وبتك بخير كنت ببكي لا شعوريا وكاني بخاطب في امي وهي جنبي والناس كلها دموعا جرت معاي ساعه حاضنه ندي وببكي وببكي كانو امي ماتت اليوم نهاي ما هاميني جسمي المقطع ولا الجروح الفيهو ولا الاهانه والتعذيب والظلم الضوقتو علي قدر ما هاماني اختي وشرفها قلت ليها ندي انتي كويسه في زول لمسك قالت لي الحمد لله انا كويسه يا نوسه قلت ليك ما تطاوعيهم وتكذبي انا م بتجيني حاجه وكتر خير جنابو محمد علي شويه كده وكانو ح يخلصو علي بس ربنا ستر الناس كلها بكت وفرحت في نفس الوقت جنابو محمد بدا يسرد في احداث القضيه من ملاذ زوجه معتصم الكانت شغاله في المدرسه وخططت انها تقضي علي عمار وتزور اوراق زواج وتنسب ليهو ولد م ولدو علشان تكتب المدرسه بي اسمو وجنابو معتصم شريكها زور الاوراق والبصمات وجاب شماسي انتحل شخصيه عسكري وشغال في الناس ملطشه وقتل واثبت عليهم اي شي وبالدليل دا غير انو العسكري اعترف والدكتوره بلغت فيهم علشان حاولو يرشوها والقاضي طلعني براءه والزغاريت ملت المحكمه وقبضو علي جنابو معتصم ومرتو وكل زول ليهو يد في الحاصل والجريمه شكرت الدكتوره وقالت لي كلام عمري م انساهو قالت لي نوسه خليك قويه م تنكسري م تستسلمي سريع بالذات لمن تكوني انتي علي حق ما تخافي الا من الله الخلقك لكن زول ماشي بي كرعين اتنين م تخافي منو لو خاتي ليك سيف في رقبتك قالت لي كنتي ح تضيعي نفسك وتساعدي في انتشار عصابه في البلد دي الزي ديل لازم انعدمو هم لانو افكارهم شيطانيه ومخالفه مع اخلاقنا نحنا السودانيين ناس بسيطين م عقليتنا بالغزاره دي شكرتها وقلت ليها اتعلمت درس عمري ما انساهو ومن اليوم انا نوسه تانيه خالص وعزمتها لي عرس ندي ونادر وشيلتا رقمها لانها بت طيبه ومحترمه ذكي اعتزر لي وقال لي نحنا اسفين انو اتسببنا في ازيتك من غير قصد قلت ليهو العفو يا دكتور واعفو لي انتو كمان وسلم علي منال وابقا عشره علي بنات عمار وربنا يحفظهن طلعنا من المحكمه واخيرا شميت هوا وكنت مشتاقه لي ابوي بطريقه غريبه ولي اميمه اختي وصلنا البيت ابوي لمن شافني غلبتو القومه ودموعو عشره عشره وكانت اول مره احضن فيها ابوي بسبب الكان حاصل لينا وكنت ببكي ببكي وهو زاتو ببكي قال لي كنتي وين انا قلبي انقطع عليك اخوانك كذبو علي بس من وشوشهم عرفت انك م كويسه واختك قطعت قلبي وانا المرض مانعني احميكم قلت ليهو معليش يا ابوي القدر هو البعدني منك بس وعد تاني م ابعد منك وسريري جنب سريرك قال لي تاني كان طلعتي بطلع معاك اميمه لمن شفتها اتزكرت امي ضميتا علي وهي تقول لي سيبه ما تبكي 😢 صوتك كان بشجيني وكانت بي براءه بتمسح في دموعي قلت ليها عشانك انا م ح ابكي قالت لي الدقاك بدقو قعدت اضحك قلت ليها الدقاني ابوي بتدقي قالت لي لا لا ابوي حلو قلت ليها انتي الحلوه حمدت ربنا انو اميمه انحرمت من امي وما انحرمت من حنان ابوي الوحيده الكسبت عطفو وحنانو وما شافت ليهو يوم سيئ
سلمت علي مرت عم احمد وبتها وكانو زعلانين للحاصل لي. قلت ليهم م عايزين حزن نادر عايزين نفرح حددو العرس انا نفسي افرح قال لي ان شاءالله اليوم ح نحددو بعد نعمل ليك كرامه قلت ليهو في اقرب وقت قال لي اكيد ام مهند في كلامي داك جات داخله ومعاها مهند شايل خروفو وخطيبه مهند ونادر اخوي والبيت اتملا ناس ومنال وذكي وبنات عمار والناس كلها فرحت برجوعي منال قالت لي اعفي لي صدقت وظلمتك وانتي الظهرتي لينا الحق قلت ليها العفو قالت لي م اتوقعت ملاذ تعمل معاي كده بعد دخلتها بيتي قلت ليها غلطتك كان تعاملك معاها اكون في حدود المدرسه بس وحدود الشغل حسدتك ودمرتك وطمعت في العز الكنتي فيهو بس القانون لا ح يرحمها لا يرحم زوجها قالت لي ديل عصابه ما بشر قلت ليها الحاله دي م شفتي اشكالهم اقسم بالله مبالغه الناس ديل بس الحمد لله وقعو في شر اعمالهم والقانون ح يشيل ليكم حقكم وربنا كريم طلعت وقفت مع نسوان الشغله وقلت لي نادر اعزم جنابو محمد قال لي تمام بشوف ذكي لانو كانو ع تواصل مع بعض مشا كلم ذكي واتصلو ليهو وجا حضر معانا الكرامه وسلم علي ابوي وحكيت ليهو بالعملو معاي ابوي قام سلم عليهو في راسو قال ليهو العفو يا حاج بتك بت حلال ربنا يسترها عرفت تربي والله قال ليهو الحمد لله وفي يوم كرامتي حددو العرس بعد شهر عزمت كل الموجودين وكنت مبسوطه شديد الحمد لله بعد الناس طلعو ناس ذكي طلعو اخر ناس ومنال قالت لي نوسه عاوزه اقول ليك عاوزين خالتو تهاني دي لي عمي ذكي تهاني دي مرت عم احمد قلت ليها انتي عارفه انا والله فكرت اخلي ابوي يتزوجها بس حرام لانها صغيره وابوي مريض وكبير وطالما انتي شايفه كده انا بسالها ليك وبديك خبر قالت لي اي عليك الله انتي زي م شايفه هو قاعد براهو ورافض العرس قلت ليها والله زين م اخترتي ليهو تهاني دي خلقه واخلاق انا بستشيرها وببلغك هو كلمتي قالت لي اي وموافق بدل يقعد براهو قلت ليها اي والله انا بعدين بفتح معاها الموضوع قالت لي سمح واديني رد احتمال نعمل ليهم مناسبه قبل اخوانك قلت ليها ان شاءالله ودعتهم وفاتو
طبعا اهلي مبسوطين بي شديد وكنا متلمين وكلهم احكو لي بالحاصل عليهم وكانو كانهم فاقدين كلام ما مديني فرصه اتكلم وانا كنت راقده وبعاين لي نظراتهم الكلها حب وابوي الكان اقسي انسان حسيت انو اطيب خلق الله قومتا من مكاني ورقدت جنبو وهو يونس فيهم ويضحك فيهم ضحك يوم رغم انو كان ح يكون اسوا ايام حياتي بس الحمد لله ربنا نصرني ورجعت لحضن اهلي بعد ونستنا ديك كلهم مشو ينومو فضلنا انا وتهاني طوالي فتحت ليها الموضوع قالت لي ستين يمين انا بعد المرحوم م بتزوج بقيت اقنع فيها وانها احسن ليها تتزوج عشان هي صغيره قالت لي اهلي بشنفو لي الموضوع قلت ليها شوفي ما تقولي لي اهلي دا زواج ع سنه الله ورسوله وازواج الارمله م حرام بس نحنا متعقدين وعم احمد ربنا يرحمو راجل ما بخلفو راجل تاني بس دي سنه الحياه حاولت اقنعها وقدرت اقنعتها وقالت لي بكره بتصل لي اهلي واهل احمد قلت ليها اهلك احتمال يوافقو بس اهل عم احمد ح يطلبو بتهم وانا البت دي امانه في رقبتي انتي زاتك م ح اخليها تمشي معاك قالت لي هي بتفوت غايتو هي واميمه حامياتني النوم الليل كلو اتونسن ويلعبن قلت ليها الله يحفظهن بس المهم البت دي م ح اخليها تمشي مكان قالت لي ان شاءالله وربنا اديك ولد الحلال قلت ليها انا والله دايره اعيش اشيل رضا ابوي واعمل وصيه امي للاخر قالت لي بري والله لو جاك عريس طوالي تعرسي ابوك مع اميمه ما بتجيهو عوجه ومرت نادر هديه ورضيه قلت ليها يلا نادر ومرتو نهاي م يعيشو معانا اعيشو حياتهم وخصوصيتهم مع بعض بس تقعد معانا وتنظلم لا ولا عندها ذنب تقعد تخدم ابوي نحنا اولي بيهو قالت لي ذوق منها ساي قلت ليها م بتقصر هي والله بس انا مصره انو نادر من الاول يبدا حياتو براهو ومتي ما يجونا حبابهم نشيلهم فوق راسنا قالت لي انتي اصيله والله ماف اخت بتقول كلامك دا اغلبيه الاخوات انانيات وبحبن نفسن وما عايزات لي نسوان اخوانهم الراحه عايزان يغلغلنهن كده قلت ليها والله يا تهاني م اشكر نفسي بس انا زوله حقانيه بحب الحق والنصيحه انا زاتي بجي يوم واكون مرت اخو لي اخوات زوجي اكيد م ح اقبل يعاملني معامله سيئه وفي مثل بقول ليك البتسويهو بتلقاهو وانا م دايره القا الا الخير وما يكون بينا الا الاحترام قالت لي اكيد قلت ليها كدي نفسي ف نومه قويه قالت لي اي نومي وما ح اصحيك براي بقوم اشد ملاحي قلت ليها والله اشتهيت اكل البيت تعبت من العدس والفول قالت لي الحمد لله الرجعتي لينا انا مستعده كل دقيقه اعمل ملاح اعوضك العشتيهو هناك
قلت ليها م بتقصري ربنا يديك لينا العافيه قالت لي امين ونومتا خليتا تونس فيني وتحكي لي تاني يوم صحيت متاخره لقيت تهاني عملت ملاحها وعاست وفطرت ابوي طوالي بعد فطرت ناديتا جوه وقلت ليها اتصلي لي اخوانك كلمهيم واتصلي لي اعمام ايثار قالت لي تمام اتصلت علي اخوانها ف الاول شنفو ليها الموضوع تاني قالو ليها عرسي ساي واتصلت لي اعمام البت قالو ليها لو عرستي بنسوق بتنا اتكلمت معاهم وقلت ليهم حرام عليكم هي صغيره لي تدفنوها بالحياه حسيت انهم قالو كلامهم دا عشان م تقول قنعانين منها بس م عندهم مانع فرحت شديد وطوالي اتصلت لي ذكي كلمتو وكلمت منال قالت لي بعدين بنجيكم تتعرف علي ذكي تهاني قالت لي قولي ليهم م يحتاج وريت ابوي ونادر قلت ليهم ذكي طلب يد تهاني قالو لي وهي رايها شنو قلت ليهم في الاول كانت رافضه بس اقنعتها قالو لي والله ذكي زول كويس كده بتطمئن علي مستقبل بتها وما بتجيها عوجه ومشو ليها اتكلمو معاها وباركو ليها طبعا تهاني صغيره م كبيره عمرها بكون كم وتلاتين
المساء منال جات ومعاها ذكي واتكلمو مع تهاني واتفقو انهم يعملو عقد بس عشان وضعهم الاتنين ومن بكره يشترو ليها الحاجات بجو بسوقوها قالت ليهم لا البتجيبو جيبوهو وهي موافقه قررو يوم الجمعه يعقدو والجمعه الجايه يجو يسوقوها اتصلت كلمت اخوانها وقالو بجو للعقد واتصلت لي اعمام بتها والمره دي متنازلين قالو ليها ان شاءالله ح نجي وانا بعد طلعو مننا مشيت كلمت ام مهند عشان تجي تقيف معاي وكان اليوم أربعاء ماف زمن زاتو نادر تاني يوم مشا جاب ليهو تور وجابو الحاجات وانا عزمت الجيران وطبعا تهاني قالت كحل في عينها م بتختو م قدرت اقنعها بس لمن يجي يسوقها ح اقنعها واجيب ليها بت تمكيجها من بليل اخوانها جو وبيتو معانا وكانو فرحانين واخواتا زاتهم جو وقفو معاي وتاني يوم اهل بتها جو وعقدو ليها وباركو ليها واليوم كان جميل كنا كلنا فرحانين وشديد كمان وعزمنا جنابو محمد وسالتو الحصل شنو قال لي كل الادله ضدهم واي دليل قدمتو للمحكمه ومعتصم ما بطلع منها لو كسر رقبتو قال لي احتمال بعد اسبوعين الحكم تعالي احضري الجلسه قلت ليهو ح اجي ونفس النظره النظروها لي لمن القاضي حكم علي ظلم علي ادبلها ليهم قعد اضحك قال لي حقك والله الشفتي م هين وعايزك في موضوع قلت ليهو شنو قال لي والله خجلان بس انا عايز منال علي سنه الله ورسوله فرحت فرح قربت ازغرت المره الجايه نشوف هل منال ح توافق ولا لا ………يتبع