سمعت اللي دار بين ماما وفهد خرجت لهم جري وقلت لماما ازاي تقولي عليا كده انت مش عارفه بنتك
قال فهد انا جاي لكي اطلب يد امنيه وهي بنت مؤدبه ومحترمه وملتزمه هي غير كل البنات اللي شفتهم في الجامعه عشان كده انا حبيتها وداخل من الباب
قالت ماما اتفضل يا ابني وقعدت معه في الصالون وقالت لي اتصلي بباباك يطلع
حاضر يا ماما اتصلت ببابا وطلع في الحال وقعد مع فهد ساله بابا هو منين من القاهره
قال فهد لا انا من ابو زعبل محافظه القليوبيه من قريه واحنا فلاحين عندنا ارض في نفس البلد زارعينها واحنا بنتين وولدين البنتين اكبر مني ومتزوجين معنا في نفس البلد وانا اكبر من اخي أخي معه دبلوم صنايع وعامل مع ابويا في الفلاحه احنا عائله متوسطه
قال بابا ماشي يا ابني اديني العنوان وان شاء الله هبعت لك الرد ومشي فهد وبعد خروجه ندى بابا عليا قال ايه رايك يا امنيه قلت الراي رايك
قال لا قلت انا موافقه قال بابا بس يا امنيه هم فلاحين وهتتعبي في عيشتك معاهم في مرواح الغيط وشغل في البيت وهيكون تعب يا بنتي
قلت له انا موافقه عليه كان شخص طويل عريض ملامحه جميله وحبه لي باين عليه وانا بالفعل حبيته
طلعوا اخواتي وقعدوا وكلمهم بابا على فهد اخويا الصغير اخذ العنوان وقال انا هسال عنه وعن اهله وبالفعل في اليوم الثاني في الصباح ذهب اخي الى بلدهم ابو زعبل وسال عنهم والكل شكر فيهم لكن في نفس الوقت قالوا على امه انها شديده وست قويه
وجاء اخي عند غروب الشمس وحكى البابا ما حدث ندى بابا علي قلت له حاضر انا جايه يا بابا وذهبت اليهم
قال بابا اخوك سال عنهم وهم ناس الكل بيشكر فيهم لكن امه ست قويه وشديده انا وافقت على كده
وبابا بعث الرد لفهد وجاء فهد واخذ ميعاد من بابا يجي فيه هو وابوه وامه يتكلموا في الجهاز وميعاد الفرح
ماما دايما تقول لي يا بنتي قبل ما يجوا هتتعبي في حياتك امه شديده انا خايفه عليك انت بنت مدلعه يا امنيه وفرفوشه ومشاغبه هتقدري تعيشي مع فلاحين
قلت ايوه يا ماما انا هقدر
قالت ماما افتكري الكلام اللي انا قلته لك وانا خايفه عليك واللي انت عايزاه اعمليه قلت لها ماشي انا برده موافقه انا كنت بنت عناديه شويه لكن مش في الغلط اني عايزه اي شيء لازم يكون في الحال لكن انا حسيت بحبه ليا وقلت أنه عايزني وهيقدر يهيا لي العيشه اللي انا عايزاها
وفي ميعاد مجيهم عندنا عملنا غدا ليهم انواع المحشيات ورقاق ومكرونه بشاميل انواع كتير على السفره وبعد الغداء شربوا الشاي والكل قاعد في الصالون بابا واخواتي وماما معهم وانا وزوجات اخواتي في الاوضه ما سمعناش بيقولوا ايه ولا اتفقوا على ايه كان عندى الفضول ان اعرف لكن ما عرفتش غير لما ندهه عليا اسلم عليهم قبل ما يخرجوا سلموا عليا وخرجوا وخرج بابا معهم هو واخواتي وصلوهم الى الموقف
وانا مسكت ماما وعايزه اعرف منها كل ما حدث كانت عماله اتعاند فيا وتقول لما بابا يجي يقول لك ما سبتهاش غير لما قالت ان الخطوبه والشبكه بعد التخرج والفرح بعده بست شهور كنت فرحانه وسعيده كنت ليا بنات جم اصحابي يباركوا لي لما عرفوا اني اتخطبت فكانوا فرحانين قوي بيا
لكن صاحبتي الانتيم اللي هي بعتبرها اختي كانت زعلانه اني هبقى بعيده عنها لاننا ما فرقناش بعض ابدا من الصغر واحنا مع بعض من ابتدائي لكليه وهي جارتي في نفس الشارع اسمها اسماء
قلت لها انا دايما هبقى معاكي كل اما اجي هنا هنبقى مع بعض طول اليوم النتيجه ظهرت انا جيد وفهد امتياز
وجاء يوم الخطوبه كانت خطوبه عائليه مش كبيره لكن كانت حفله جميله وكنت سعيده قوي وحصلت حاجه غريبه جدا وانا في عز فرحتي،،،