رواية من العتمة إلى قلبي الفصل التاسع عشر 19 والاخير بقلم ال زهراء
بقلمي :ال زهراء
قولت في نفسي لاا دقيقة الدكتور بكذب دة انا لسه ما وريتو خططتي ،في حاجات كتيرة عايزة اشاركو فيها، ليه يوم داك ما قولت ليهو وانا بحبك ،هو داير بت وكمان مختار اسمها لااااااا مرواااان!!!، صحيت وانا مخلوع قومت ودموعي كانت جارية!، توتة طوالي حضنتي وقالت لي عزة الحمد لله انك صحيتي، قولت ليها الحصل شنو؟؟!، قالت لي اغمى عليك من شدة التعب والوقوف الكتير! ،اتعوذت من الشيطان وتفيت 3مرات في الجهة الشمال، قولت ليها طلعو الحمد لله ،حا يختوهو تحت المراقبة!، قولت ليها الحمدلله رب العالمين!، صليت سجدتين شكر وطوالي قمت.
قعدنا أربعة اسابيع في المستشفى عشان يراقبو الحرارة ويعرفو اذا كانت في رفض ،وهل الخلايا اتجددت ولا لا،ما خلونا نشوفو نهاي طول الفترة الفاتت!!، والتقول عارف الحاجة دي لانو قال لي ما تتجرسي!، المهم الليله بنطلع وانا منتظرة اشوفو!، قولت لتوتة انا ماشة اصلي لو طلع اسي كلميني، قالت لي هم قالو بعدين!، قولت ليها توتة!!!، قالت لي طيب طيب بكلمك، مشيت وصليت وبقيت راقدة في المصلاية جاء زول ولكزني! طلع مروان، قمت سريع وضميتو قولت ليهو الحمدالله الذي قر عيني بشوفك، شهر عديل منك!، انا اشتقت ليك والله لو ما كلامك داك ما كنت سكتا وكنت اصريت اشوفك حتى لو عملو لي قيود صارمة ،قالت لي انا هنا معاك وحا اكون معاك دايماً، قولت ليهو إن شاء الله!، قولت في نفسي الحمدلله رب العالمين رحمة ربنا واسعة، بعدت منو قال لي كانك زدتي حلا في غيابي!!، إبتسمت وقولت ليهو لا دا من خيالك، قال لي لا والله كنتي حلوة وبقيتي احلا! اديك عيوني تشوفي بيهن نفسك!، خجلت ودنقرت في الأرض!!، قال لي تتخجلي مني كدة لشنو؟ ؟؟، ارفعي راسك!!، قولت ليهو ما بقدر!، ضحك تاني ورفع راسي بالقوة وقال لي انا بموت فيك والله يا عزة!، باسني من جبيني ،قولت ليهو ما خايف تتعدي، قال لي خليني اتعدي، دا هدف نبيل!، ضحكت وقولت ليهو عليك الله يا مروان بطل!، انت لسه مناعتك ضعيفة، قال لي ما تخافي علي!، قولت ليهو تمام بس احذر المرة الجاية ! المهم الدكتور موش طمنك، قال لي اي لسه التقارير مستقرة ما بعرف البحصل شنو تاني ،قولت ليهو مروان داير تتشائم فيني ما تتكلم، قال لي لا ما عايز ،ما قولت ليك انا عندي املين ما تنسي وعدك لي بس!!، قولت ليهو عارف الحاجة دي أرزاق صاح! ،قال لي عارف مالو المرة الأولى ولد التانية بت ولو التاني ولد التالت بت ولو التالت ولد الرابعة بت، قولت ليهو دقيقة دقيقة انت مخطط لكم ولد اصلك، قال لي والله ما مخطط بس لازم بت!، يعني يا قمري لو جبتي لي 7اولاد داير بت!!!، ضحكت وقولت ليهو نصيب إن شاء الله الله يرزقنا ببت انا بدعى بس،قال لي إن شاء الله بقى يبتسم لي وإبتسم ليهو ،توتة جات داخلة فجاءة قالت لينا جوز اللوز كفاية!، عملتو لينا جفاف عاطفي ليكم ساعة تتكلمو مروان انت عندك اهلك برة منتظرين يتونسو معاك ،قال ليها انا وعدها انو اجيها براي بعد العمليه اخلف بوعدي يعني وبعدين امي وابوي لاقيتهم اول ناس قبيل، امشي من هنا يا توتة!!!، توتة قالت لي لالا ورح يا عزة منو!، قولت ليهو لا ما بخلي راجلي! ما صدقت شوفتو نطتت عيونها فيني وقالت لي خاينة وبياعة!، قولت ليها توتة ما تزعجي مروان! وامشي، قالت لي حتى انتي يا عزة يخسي!!، ضحكنا عليها طلعت، قولت ليهو ما تقول اسي توجع فيك والله ما شوفتها كانت متجرسة وتبكي كيف واصرت الا تجي تحضر العمليه، قولت ليهو عارفها توتة!، بت لسانها طويل بس حساسة وما بترضى فيني، قولت ليهو حتى هديل يا مروان والله كانت ما خايفة من العمليه نهاي وهمها بس انت تبقى متين كويس!!، قولت ليها عارف والله يا عزة اخواتي كويسات شديد، بس انا كنت بضغط عليهن عشان شايف المجتمع الكعب عامل كيف وما كنت عايز يبقن زي البنات الفااكات القابلتهن انا ،انا كاي اخو خايف على اختو!، انا بحب اخواتي اكتر من نفسي! وما عايز اغلاطي تنعكس عليهن هن ،قولت في نفسي ما حا أكلمو انو هديل كسر قلبها زياد لألف قطعة بس عشان ينتقم من مروان ،بس الحمد لله انو هي ما خلتو يتجاوز حدودو تاني معاها من يوم لقيتو وهو بحضن فيها ،هي قالت لي انو هي بجبرها تقول كلام ما ياهو معاهو وحتى هو الحرشها علي بس طفح بيها الكيل وبقت تصدو! ،تاني بقى ما بقول ليها ولا حتى بهبشها حبة حبة قالت اتعلقت بيهو وفكرتو اتغير بس طلع في النهاية غشاها وبعد فترة لمن رسل ليها انها تقابلوا في حتة جاب كل اصحابو ودساهم واتقدم ليها وهي وافقت وقالت ليهو بحبك بس قال ليها معاك الكاميرا الخفية وكل اصحابو الفاسدين جابهم معاهو ،وخلاهم يضحكو عليها،مروان ممكن انو ندم! بس في النهاية هو لعب بالبنات كتير ومنهم ريان.
ريان غلطانة شديد عشان رضت تعمل معاهو الحرام وتنفذ ليهو كل طلباتو وحتى مروان قال لي ما هو براهو كان مع كم واحد غيرو.
ماف ولد بكون عايزك بلمسك بالحرام ،ماف ولد بكون عايزك بباريك في الغلط وبقول انو كلامك صاح، الولد العايزك بنصحك بهديك! وأهم شي ما بقرب منك ولا بقول رسلي صورة، رسلي صوتك ، ويتجاوز حدودو معاك وانتي تمشي ليهو، الولد البكون عايزك وشاريك كلام والله ما بتكلم معاك وبخاف عليك اكتر من نفسك ،عندو باب واحد بس بعرف يصل ليهو بيك وهو باب ابوك!، ماف ولد بكون عايز بت بقول ليها اديني حضن اديني بوسة ،لانو الما برضاه لاخوتو ما برضاه لبت ناس وكدة معانتو مصنفك انو انتي بت كعبة و ما بت ناس ،البنات عاطفيات اكتر من الأولاد وهدفهم الأساسي بقى الزواج بغض النظر عن الطريقة غلط او صاح، وفي النهاية لا تلم في زواج ولا تلم في شي تاني ،ما اقول انو الاولاد زاتهم ما بتغشو كتير من البنات بستعطفن الاولاد والأولاد بكونو عايزنهم وبخلنهم عشان واحد مقرش اكتر منهم، وحتى عشان في واحدين أوجه منهم، وفي بت بترتبط مع 3 بس عشان تمسك ليها مصاريف شهرية منهم ،تلقي الواحد شغال عتالة والتاني يبني والتالت لاف في درداقة وكلهم شارين البت وهي ولا في بالها وهمها بس المصاريف وفي النهاية تبيعهم كلهم وتتزوج واحد تاني غيرهم وتمشي السعودية مع راجلها يلي بكون مغترب، المجتمع عموما ما بخلي من اولاد وبنات فاسدين!، يعني ماف طرف بكون احسن من التاني، والاتنين بغلطو.
نقص الوازع الديني وعدم تدخل الاهل المبكر في قرارات الأبناء وحتى الدلع الزايد واخد الحرية الزايدة هو السبب في دة، يعني أبسط شي الاهل مفروض يسألو أولادهم كل فترة عن حياتهم ويعرفو التغيرات الحصل فيهم! عشان يقدرو يلفوهم، في النهاية اي ام وابو بعرفو اذا ولدهم متغير ولالا.
مروان قال لي شاردة وين يا قمري ،قولت ليهو ولا في اي مكان نطلع، قال لي اي نطلع.
____________________________
بلسان أسامة
حياتي مع شموس كانت جايطة جوطة شديدة!!،بس حلوة! هي مزعجة وما بتوقف كلام في البيت بس كان على قلبي زي العسل واتعودت عليها.
مشيت الدكتور النفسي عشان هي حست اني محتاجو وخاصة من الارق الليلي البجيني وعدم الشهية ، وقال لي عندك أضطراب الحزن المعقد وبديت علاجات واتحسنت وهي جنبي وحتى اكلي بقى كويس والارق راح الحمدالله، وانا واقف الباب فتح التفت لقيت بتجر وطوالي نطت فيني ،قالت لي مشتاقة ليك أسامة!،حكيت حاجبي وقولت ليها ليك مني كم، قالت لي حتى لو لي منك نص ساعة انا مشتاقة ليك، ضحكت وقولت ليها وانا بس انا ما قولت ليك خلي الجري دة انتي حامل يا بت الناس ناسية ، قالت لي لا ما ناسية وما بجري تاني المهم حددو الامتحانات وانا طبعا ما عايزة امتحن فقولت لو انت بس تكلم لي صاحبك الدكتور دة يزيف لي تقرير...، قاطعتها وقولت ليها ايوا انا عرفت شوقك دة ما لخير من غشنا فليس منا يا شموس حا تمتحني واسي دي حا تقعدي تقري ،فصلت الشاشة وقولت ليها ماف شاشة وكلام فارغ!، قلعت التلفون قولت ليها التلفون بديك ليهو بمزاجي وما تجي تحنيسيني ما بقبل ليك، تالت شي من اليوم انا بجيب ليك زولة تساعدك وحا تبطلي وساوس تخنقني تقتلتي وتشيل حقي! وتشلب راجلي ضحكت وقالت لي انت ما عارف بس والله القصص دي في تجي تشتغل تخدر ناس البيت كلهم وتهرب القروش!، ولا تغريك وتشلبك ،ضحكت قولت ليها دة في اي رواية عليك الله!، يابت الناس والله لو جات لعندي الفين بت ما بعاين ليهن، انتي الأولى والتانية التالتة والرابعة وانا مكتفي بيك، قالت لي احم احم بقينا رومنسيين شوية ،ضحكت وقربت منها وبوستها في خدها! وقولت ليها بحبك!!، فصلت!، وبقيت منططة عيونها وإبتسمت وقالت لي وانا ،قعدت وقالت لي أسامة الجنين ألفي بطني بتأثر بسبب القراية!!!، ضحكت وقولت ليها شموس على منو ؟؟!، ودا في اي كتاب!!؟، قالت لي اصبر لي بعمل بحث يثبت الحاجة دي ، ضحك قولت ليها منتظر انا وبكون اول المشترين ،ضحكت قعدت معاها وهي فتحت الشيت وبقت تشرح لي انا حفظت معاها عديل وكنت داعمها وساندها وبحب لمن تشاركني حاجات قرايتها ،انا صاح ما قاري بس ما الحاجة دي ما منعتني اني اقيف معاها،واصلا انا مجهز عشان امتحن تالت عشان شذى! وعشان حلمها بتحقق واوري اصحابي انا شنو زي ما هي عايزة.
شذى ذكرى وما حا ننساها ،بس شموس هي حاضري ومستقبلي وحبي ليها كل يوم بقوى اكتر وأكتر!!.
اتعملت من شموس حاجات كتيرة! وعرفت انو الزول ما يوقف حياتو عشان زول ميت لانو دي سنة الحياة!،لكزني وقالت لي وين شارد، قولت ليها مافي حتة، قالت لي نفسي اسالك سوال ،قولت ليها شنو؟؟!، قالت لي انت بقيت تحبني عشان بشبة اختي!!، قولت ليها عارفني ما حصلت شوفت شذى! الا من عيونها!، وشوفتك انتي اول واحدة فيبقى انا بحبك لنفسك ما عشان بتشبهي شذى شذى وانتي مختلفات عن بعض، وانا حبيتك عشان انتي شموس!، ما عشان بتشبهي شذى ،صاح الفترة الأولى كنت بفتشها فيك بس تاني وقفت وحبيتك بشخصيتك! ،واسي حبك زاد! فعشان كدة ما تجيبي سيرة الموضوع دة تاني وركزي في قرايتك وصحتك!، حضنتني وقالت لي طيب، قولت ليها جيبي شنطتك افتشها! قالت لي لااا، قولت ليها شموس جيبي الشنطة ،شالتها وقالت لي لااا، شلتها منها لقيت المقرمشات الحارة و اندومي كتيرة! ،قولت ليها ايييوا يا شموس ما قولت ليك ممنوع!، قالت لي ما نفسي فيها انا نفسو فيها ولد امنعو هو، قولت ليها هو عبارة عن نطفة لسه بتكلم!!!، لو عايزة اي شي تاني بجيبو ليك بس ديل لاا، قالت لي سمعت بقصة الولد القامت ليهو وحمة بشكل كبدة بس عشان امو كانت متوحمة بكبدة وما لقتها يلا بعدين ولدنا بكون كدة!، قولت ليها حناكةةة لكن!!! بس ما علي، قالت لي والله جادة قال لينا الدكتور اتصل ليك بيهو، جدعتو ليها وقولت ليها اخر مرة ،إبتسمت و قالت لي بوعدك، هي محليه علي حياتي بسببها رجعت للندوات والمناقشات الدينينة وبقيت قريب لربنا اكتر كانت نعم السند والدعم ،وانا كدة جاني اتصال من ام ميمونة رديت قالت لي ياولدي ناس صهيب ديل جايننا يوم الجمعة تعال ومعاك مرتك ابوك قال نضبح ليهم عشان اول مرة ميمونة تجينا زيارة بعد اتزوجت قولت ليها تمام.
طبعا ميمونة اتزوجت صهيب لانو عرفت انو تعلقها بي طفولي شديد وما فيه فايدة ليها وحتى اعتذرت لي اناوعزة ،لكن للأسف عزة ما رجعت صاحبتها وهي للان ندمانة انها خسرت صاحبة زي دي وما قادرة تتجاوزها لانو عزة الوقفة الوقفتها معاها احتمال اختها ما تقيفها.
____________________________
بلسان زياد
من يوم كسرت قلبها وانا ما قاعد افكر الا في هديل، هديل البرئية الفاكراني اني اتغيرت عشانها وفي النهاية طلعت بغشها!، بس والله ما قايل فراقها بفرق معاي وبخليني عايش كأني مييت، العملتو ليها كان كعب شديد وانا ما بسامح نفسي عليهو بس اسي عايز اطمن عليها وعلى مروان لانو بقى ما عندي تواصل معاهو !، شلت التلفون واتصل بيها رقمها مغلق قولت اجرب ماسنجر بحساب تاني لانو داك حاظراني فيه، انا عارف انو مشت لاخوها عشان عيان!، المهم اتصلت بيها ردت لي قالت لي عايز شنو؟؟!، قولت ليها داير اطمن علييك ،قالت لي انا كويسة ،قولت ليها مروان، قالت لي اتحسن وتاني ما تتصل بي، قولت ليها اسف، قالت لي اسفك ما بفيدني بحاجة! انا انكسرت،قولت ليها ماف لينا فرصة، قالت لي لا وما تتصل بي تاني ،قفلت في وشي، قولت في نفسي دا هو عقابي البستحقو! صاح ما حا احصل عليها بس هي كانت سبب في تغيري بقيت بصلي وملتزم وعسى في يوم تكون من نصيبي وحتى خليت مبارية شلتي الما بقى فيها اصلا غير فيفي، لانو تاليا انسجنت بتهمة المخدرات ومعاها مازن ،وريان أهلها عرفو عمايلها وساقوها السعوديه وسمعت انها تابت والتزمت هناك!!! بعد امها خشت في غيبوبة بسببها، وشكلها يادوب حست بالعائلة لانو ما قدرت تتتحمل مرض امها وحست انو فراقهم حار شديد وانو الأسرة اهم شي.
___________________________________
بلسان عزة
قعدنا سنة هناك للمراقبة وكل التحاليل بتثبت انو العمليه نجحت وشفي من المرض وما عليهو اي حاجة الحمدلله!!، بس لازم يتابع دورياً.
رجعنا السودان الليله وقولت ليهو يا مروان حا اشوف امي اول!، قال لي انا زاتي عايز اشوفها مشتاق ليها، قولت ليهو طيب!!، مشينا ليها هي ضمتو وقالت ليهو الحمد لله على السلامة يا ولدي، علاقتهم اتحسنت شديد ،قال ليها الله يسلمك!! طبعا عزام وديناهو مركز معالجة الإدمان بمساعدة مروان، وعبير بقت منقبة وما شغالة بالفارغة! وشغلت وقتها بالأمور المفيدة ،وحتى علاقتها مع مروان اتحسنت!، قعدنا هو قال لي ما كان في فرصة عشان اقول الكلام دة بس الحمد لله ربنا اداني عمر جديد! عشان كدة حا اطلب يد عزة على سنة الله ورسوله!، قالت ليهو نحن لاقينك يا ولدي حبابك بينا! وضحكت!،طوالي انا سحبتو وقوولت ليهو شنو دة ما فهمت قالت لي يا عزوز حا تقعدي هنا وانا بعرسك عرس يليق بمقامك! لانك بتساهلي!!، بجي اسوقك من بيت ابوك معززة مكرمة لبيتي!! فانتظريني!، قولت ليهو بحدة لااا ما ف داعي اصلا نحن متزوجين، قال لي لا انتي ما ناقصك اي حاجة من البنات وانا ما برضى ليك، حا تطلعي من بيت ابوك عروس لابسه الأبيض وحا تنزفي زيك زي اي واحدة تانية!، حضتنو وقولت ليهو مروان لااا! عايزة امشي معاك!، قال لي لا حا تقعدي هنا! بعد تحانيس حتن وافقت.
بعد أسبوعين كان العرس و كان رهيب مروان ما خلا حاجة ما عملها لي! وانا بالجد فرحت وطيرت السماء! ،نزلنا وقال لي غمضي عيونك يا حبيبتي وثبتي كويس لابسه كعب أطول منك، قولت ليهو مروان ما تقول كلام يخليك تندم يا حبيبي، ضحك!!، مشينا كم خطوة قال لي فتحي طلع بيت رهيب شديد كان فيهو شتلات جوافة بدل واحدة وفيهو مساحة للزراعة ،نطيت فيهو وانا مبسوطة وبقى يدور بي!!!، دخلنا جوة كان مصمم تصميم بسيط وحلو شديد قولت ليهو تسلم يد المهندس الشاطر العملو قال لي احم احم!! هو شخصياً واقف جنبك،إبتسمت إبتسامة عريضة!! ،بوستو من خدو وقولت ليهو افضل مهندس في السودان كلو.
بعد مرور سنة :
مروان يادوب عرف بالحاجة العملوها لاختو!!! وندم وزعل زعل شديد هو اصلا كان حاس انو حق البنات حا يرجع في اختو، المهم انا منعتو يمشي لزياد لانو قصة وانتهت والضرب ما مفيد بحاجة بعد الوقت دة كلو وهديل اصلا نست واتقدمت في حياتها وشغلها واترقت !! وبقت أقوى !، وحتى عقلت شديد واتزوجت !،وسمعت انو زياد بقى يحفظ في معهدنا القرآن وحتى بقى زول ملتزم وخطب واحدة من هناك.
طلعني من شرود صوت بكاء تقى! ،مشيت وشلتها وقولت ليها بسم الله بسم الله!!، مالك بتبكي انا قاعدة!!، هدت الباب دق مشيت فتحتو طلع مروان قال لي ما قولت ليك ما تفتحي الباب بدون ما تعرفي منو لو راجل غريب!، قولت ليهو ماف زول بجي زي الوقت دا، جاء وباسني من خدي وباس بتو وقال لي مشتاقين يا اميراتي الاتنين!.
تقى شالت شبهو نفس صفرتو ونفس حركات نومو باختصار كانت نسخة مصغرة منو حبيبي ،سمعت مرة انو البحب زول شديد بجيب ولد زيو ودة طلع فيني، كان فرحان وطاير السماء لمن جات امورتنا للدنيا.
انا مبسوطة معاهو شديد، هو حفظ القرآن كلو وبقى ملم بالدين الإسلامي.
هو خرج من عتمتة ووصل لقلبي وحبو جواي كل يوم بكبر وبكبر!،هو كان مقدرني جداً وبستشريني في الصغيرة والكبيرة!! وما بدس حاجة مني ،كل مرة بمشي معاهو الدكتور للمتابعة وقلبي في يدي من رجوع المرض و التقارير بتطلع سلمية دعائي إستجاب ولله الحمد.
الدعاء بغير القدر, الرسول صلى الله عليه وسلم قال لا يرد القضاء الا بالدعاء ودة من لطفة وكرمة،لكن في فرق بين القدر المطلق والقدرالمعلق القدر المطلق ما بتغير بس القدر المعلق ربنا بكتبه في اللوح المحفوظ ويعلق تحقيقة على أشياء زي الدعاء الصدقة البر.
الدعاء سبب قوي لتغير البلاء وشفاء الأمراض قال تعالى" ادعوني استجب لكم".
الصدقات وبر الولدين برضو بتعدل الطريق وبتنجي من حاجات كتيرة كانت حا تحصل لي الانسان ودة كلو من فضل رب العالمين على العباد.
قعدنا وهو كان شايل تقى قال لي البت دي كل مرة منقلبه لي!!، ومعاها إبتسامة، قولت ليهو معروفة انو البت بت ابوها، بس الولد بكون ولد امو، ضحك وقال لي دي غيرة على فكرة يا عزة، ضحكت وقولت ليهو اعتبرها زي ما عايز!!، ضحك وقال لي تأني اول امس كانت قدر كفة يدي ما شاء الله كبرت!!، البشوف بطنك ما حا يقول حا تطلع بتنا كدة يوم الولادة ،قولت ليهو عارف لشنو طلعت كدة لمن ولدوها لانو منععتني من القنقليز بالشطة والمنقا بالشطة وكل مرة تجدعهن مني !،قال لي لو شافعة وما عارفة مصلحة نفسك موش انا كراجلك مفروض اتصرف عنك ،قولت ليهو ما بعملن حاجة!، قال لي عملن ليك حموضة مرة!، قلبت وشي وقولت ليهو طيب كلامك صاح في دة، بس اسحب كلمة بطن كبيرة، قال لي لا ،قولت ليهو حا اوريك فيديو لي وبثبت ليك بطني كانت صغيرة ، ضيق عيونو وقال لي صغيرة متأكدة وريني الفيديو، قولت ليهو لا، قال لي وريني عايز اشوف عزة الدبدوبة، كنتي حاجة كدة لطيفة حايمة في البيت ،قولت ليهو ههه ظريف لكن!!!، اعرف لو ما لطيفة دي كنت وريتك!، ضحك!! وقال لي بموت فيك وانتي مغيوظة يا قمري، إبتسمت ليهو واتخجلت هو بعرف يفصلني ويخليني في عالم تاني كيف!.
كل يوم بنصلي مع بعض الصبح وبقى هو البتلي لي!!، وبالجد صوتو في التلاوة رهيييب،حياتنا كانت مستقرة وقليل ما نتناقش نقاشات تافههة وبكون انا السبب فيهم لانو هو يوم عرسنا وعدي انو ما يسألني نهاي ولا حا يعلي صوتو وحا يشيليني في رموش عيونو ووفاء بوعدو!!!.
بعد مرور 10سنين :
جبت من مروان الله يرحمة 3 اولاد حلوين، واتحقق حلمي وحفظتهم كتاب القرآن الكريم وحتى مروان سجل ليهم القرآن كلو بصوتو وكدة خلى لي ذكرة تانية منو!!.
مروان ما مات بالمرض لانو ما رجع ليهو تاني ، بس اتوفى في حادثة ماس كهربي في آخر عمارة شغال فيها ! ،ما صدقت الفترة الأولى بس تاني اتقويت وقولت لو اتسخطتا بتجيني مصيبة أكبر! ،فبقيت مركزة مع أولادي ومركزة على تعليمهم زي ما مروان كان عايز!، هو خلى لي جزو منو وانا مبسوطة بيهم، صاح مرات ببكي شديد باليل لانو في النهاية انا انسان والانسان خلق ضعيف ،بس بالجد رضيانة بقضاء ربنا وقدرو. مروان اثبت للناس كلهم انو المرض ما بقتل وبقتل اليوم ،ما مات بالمرض الخطير ومات بحادث عادي.
الدكتور مرات بتصل بيهو عشان يجي يدي امل لمرضى السرطان وبقو متشجعيين بيهو وانا بالجد مبسوطة للحاجة دي.
ادعيت ليهو وقولت تاني الحمد لله على تلاقي طرقنا والحمد لله الذي سخرني ليهو والذي زرع حبة في قلبي وزرع حبي في قلبة وربنا يقدرني اربي أولادي ويطلعو زيو مع وجود الناس الحوليني الكلهم بحبوني وبحبوهم.
تمت بحمد الله