رواية رغبة في الانتقام الفصل الخامس والثلاثون 35 والاخير بقلم نوسه حمد

رواية رغبة في الانتقام الفصل الخامس والثلاثون 35 والاخير بقلم نوسه حمد

ملاذ كانت بتبكي شديد شكلها م عملت حساب لليوم دا وخططت ودبرت انها تظلمني وتشيلني التهمه بس ربنا كريم رداها ليها وانا م شمتانه بس لمن تصل لمرحله القهر والظلم وتنتصر علي اعدائك بتحس نفسك مبسوط ماف انسان بعجبو الكعب للناس بس هم البادرو بالغلط ورجع ليهم في الدنيا  قبل الاخره سوقنا ولدها ورغم اجرامهم بس ولدهم ما سئ البراءه ظاهره في وشو ولسه عايش علي انو ذكي ابو ابوهو ذكي قال لينا دي امانه في رقبتي رغم انو ابوهو حرمني من ولدي بس هو م عندو ذنب في تصرفات اهلو ح احافظ عليهو وعشرين سنه حاجه ما ساهله عمر ناس عديل وربنا يقدرني واكسب فيهو اجر قلت ليهو  ان شاء الله ربنا يقدرك وتربيهو قال لي ان شاء الله سوقنا الولد ورجعنا تهاني لمن شافتو زعلت شديد قالت م يعيش معاهم عشان هي عندها بت وكده م صاح ذكي انسان فاهم شديد دخل الولد الغرفه وشغلو بالتلفون وجا راجع بقا يتفاهم مع تهاني قال ليها الولد م عندو ذنب وهو شايفني انا جدو والناس ديل م عندهم اهل قالت ليهو انا م عندي مشكله ان شاء الله تربي بدل الولد ميه بس انا عندي بت يا ذكي وغير كده الفي بطني دا احتمال يكون بت تعيش معاهو كيف ذكي انخلع وانا زاتي انخلعت وشكلها هي عاملاها ليهو مفاجاه بقينا مخلوعين قلنا ليها شنو انتي حامل ابتسمت وقالت لينا اي هسي حللتا وكنت منتظره ذكي اجي عشان افرحو ذكي من غير م يشعر قرب يشيلها ويلف بيها وكان مبسوط وبضحك وقال ليها ان شاءالله الفي بطنك عمار انا متاكد ربنا ح يعوضني باركت ليهم وفرحت ليهم من قلبي وقلت لتهاني اول شي ايثار معاك م جايه تسكن والفي بطنك ان شاءالله يطلع ولد وولد الناس ديل مسكين اكسبو فيهو اجر قالت لي انا والله اشيلو في راسي بس خايفه من الحرام وانتي عارفه قلت ليها كلامك صاح والبقول غلط هو الغلط  ربنا يقدرك والولد مسكين والله ان شاء الله ما ح تشوفي منو كعب قالت لي ان شاءالله قلت ليها ارتاحي ومن بكره امشي المقابله شوفي الحاصل شنو وما تجينا الا يوم العرس نومي اشبعي نوم لو شعرتي بي حاجه بلغيني  انا بجيك قالت لي ان شالله مشيت بيتنا حكيت ليهم الحاصل كلو قالو لي الحمد لله اخدو جزاهم بس اتاثرو للولد لانو عشرين سنه حاجه م ساهله وريتهم بحمل تهاني فرحو شديد وندي قالت لي مهيد فات الخرطوم قبلوهو في الشركه بجي يوم حنتو بس باركت ليها وقلت ليها قدمك قدم السعد عليهو وبقينا نتونس ونخطط للعرس وانا ح البس شنو ندي قالت لي احسن تأجري فستان ولا تقصي قعدت اضحك قلت ليها مالي الدرجه دي بشتري لي اي شيء من السوق يقضي الغرض نادر سمعنا نتونس قال لي تشتري افخم فستان ولا تقصي ودايرك بكره تمشي السوق تجيبي لي اخواني ديل لبسات وانا عايزه اسوق ابوي للترزي يقص ليهو كم جلابيه ومنها تكون حقات العمره لانو بعد نحنا نجي من شهر العسل طوالي ح اوديكم العمره قلت ليهو ان شاء الله ابوي ح يطير من الفرح عديل قال لي اوعك تكلمي بس شوفي لي جوازو قلت ليهو عندي في الشنطه اصلا اوراقنا امي كلها خاتاها في ملف وادتني ليهو بشنطتو قال لي تمام ان شاءالله بس يكون ساري قلت ليهو ساري قال لي خلاص بطلع ليكم جوازات بس الشي المأثرني ايثار قلت ليهو انا كمان والله كمان تهاني الوضع بقا حساس ولد ناس معتصم الكانو مزورين اوراقو وقالو انو ولد عمار اتعابط في ذكي وجا معاهو قال لي خلاص ح اخليها معاي انا قلت ليهو فكره والله زاتو تونسكم وتساعد مرتك قال لي ان شاءالله  بعد اسبوع مشينا طلعنا الجوازات 

مرت الايام وخلاص الزمن قرب اهل امي واهل ابوي جو من بدري ونادر اشترا البيت وفرشو وفتحو للضيوف قعدناهم فيهو مشيت السوق اشتريت لي اخواني وياحليلهم اخواني نهاي ما النوع البقولو عاوزين قنوعين لدرجه مبالغ فيها لو جبتا ليهم اي شي بعجبهم اتمنيت اولادي يكونو زيهم وان شاءالله ح ازرع فيهم الحاجه دي وخلاص الزمن ضاايقني م قدرت اشتري فستان مشيت الكوفير الحجزن فيهو العروسات وحجزت لي فستان وحجزت البس هناك وغير الطباخ الجايبنو لتجهيز الوجبه الاساسيه نحنا جبنا لي فطورنا نسوان عملن الاكل والاهل كلهم وقفو معاي وناس العروس جابو لينا فطور وانا وديت فطور لي ناس مهيد ما خليت حاجه نادر قال لي شيلي اي شي لانو الناس ديل ادونا مال كويس والناس محتارين نحنا العز الجانا دا من وين وبعد نحنا كنا عندهم زي الجزم بقو ملصقين فينا قلت سبحان الله علي ناس الدنيا م عندك يعتبروك صفر علي الشمال عندك اختوك في زحل والما دارنا نحنا م عندنا ما يدورنا ونحنا عندنا انا م بحب الناس الكده واستحملتهم عشان اهلي وونستهم كلها نحنا حاجزنك وحاجزين اميمه قلت ليهم عشان اكون معاكم واضحه خلو المقامات محفوظه انا من الاهل م عايزه وطبعا اولاد خالاتي واعمامي الكانو بندسو مننا لمن نزورهم وكانو شايفين انو نحنا اقل منهم كل واحد اعاين لي براهو وفي اللمح لي عديل بس احرجتهم كلهم لانهم م بنفعو معاي وبقيت م مركزه معاهم بس انا ونادر اكرمناهم لمن قالو بس وواقفين ليهم نهاي م زحينا منهم  ندمناهم انهم خسرونا بس الضفر م بطلع من الللحم وحبابهم كاهل نشيلهم في راسنا بس  نرتبط بيهم لا   بعد كفينا الناس بالفطور بعد الظهر العقد والنسوان طلعن  وقعدن في الصيوان وعملنا حفله العصريه لي نادر شبع رقيص وقريب المغرب سيرناهو لي مرتو وعملو ليهم جرتق ومرتو طلعت رهيبه   وطوالي ساقها لانو م عايز حفله لانو مرتو انصاريه نادر قال لي تعالي اركبي معانا اوديك الكوفير نودي الجدله وتدخلي تلبسي عشان الحفله قلت ليهو خلاص رجعت اديت اخواني ملابسهم وابوي قال لي انا ماش علي ذكي وريني حبوبي قلت ليهو امشي وانا بتصل علي تهاني ولا ذكي يدوك ليهن قال لي بعد تلبسي تعالي لي وجيبي اختك النشوفكن واحصنكن واميمه وايثار بسوقهم معاي البسن هناك وتعالي سوقيهم قلت ليهو خلاص وشيلت حاجاتي ومشيت الكوفير لقيت ندي اختي لابسه زغرت ليها وباركت ليها لمن قعدت تبكي خربت المكياج ست الكوفير شاكلتني وعدلت ليها مكياجها وهي م شاء الله طلعت رهيبه ومرت مهند زاتا واستلمتني انا بتاعت الكوفير اشهد الله لمن انتهت مني انا روحي م عرفتها قلت ليها الا تمسحي لي ابوي بشاكلني قالت لي دا فرح اختك ي بت م بشاكلك وحنسوني خليتو وم عدينا ساعه العرسان جو ساقو العروسات وانا مشيت مع ندي وزفتهم كانت مع بعض والحفله كانت رهيبه وطبعا الناس بقو مخلوعين فيني وقالوها لي عديل معقوله دي انتي  قلت ليهم ياني زاتي قايلني شينه والعرس كان رابي وانا خلقه الله م بحب الرقيص بس واقفه جنب اختي اشاركها وهي اختي من اول يوم اتفرمتت وبس شغاله ترقص مع راجلها فجاه اتزكرت كلام منال لمن قالت لي مهما عملتي لي اخوانك مصيرهم ينشغلو بي حياتهم ولازم تعرسي وتجيبي الولد البسندك في سرحتي ديك عيني ما تقع الا في سيف وهو عينو م نزلا مني ونظراتو لي كلها حنيه بس كل م اتزكر انو متزوج ما اديهو نظره تانيه  بعد انتهت الحفله ومهيد ساق ندي بعد مشينا لي ابوي والبركه المشينا ليهو بعد الحفله انتهت ابوي ماسك ندي ساعه كامله وببكي لمن فكيناهم من بعض  ولمن عاين لي قال ليهو دي منو انا م قدرت ارد من شده الضحك قالو ليهو دي نسيبه م عرفتها بقا يتشهد ويقول لي ي بت بسحروك تشبهي امك لمن كانت عروس وحضني وبقا يبكي ابوي بقا كل م يفرح لينا يتزكر امي ويبكي  

مرت الايام وندي فاتت خلت لي البيت مسيخ وبعد جات من شهر العسل رحلتها وشبعت بكا ومهيد قال طوالي مسافرين الخرطوم موديهم سيف تاني يوم ندي شبعت بكا  بس ياهو المصير وصيتا علي زوجها وانها تخلي بالا منو وتطول بالها لانو الرجال ديل دايرين طوله بال والحياه كلها م حب فيها السمح والشين قالت لي ان شاءالله وتاني يوم نادر جاب مرتو بيتا رحبنا بيها وضبحو كرامتهم  واكرمنا اهلا وقلت ليها الايام الاولي ارتاحي بجيب ليك الاكل حدي عندك قالت لي لا لا م تتعبي نفسك قلت ليها ماف تعب والله مرت نادر زوله تقيه شديد النقاب دا م لابساهو ساي لابساهو علي قناعه وملتزمه وكلاما وونستا كلها في الدين وطبعا نادر بحبها حب مبالغ فيهو  بعد اسبوع نادر قال لي انا جيت افرح ابوي العمره طلعت ليكم الجمعه ح تمشو ابوي من الفرحه لمن سجد سجده شكر اتمنيت اكون شغاله واعمل ليهو عمره واشوف الفرحه دي وفرحتي بي طاعه نادر اكتر  كانت و من  رغبه في الانتقام  اتبدل  سعي في الطاعه   والحمد لله ابوي فرحان نوم م نام اشيل ويقول لي انا م مصدق قلت ليهو تستاهل ي ابوي والعجب اميمه وناجي مبسوطين شديد والليل كلو يدعو لي نادر جاتني لحظه اتمنيت امي تكون معانا لمن قعدت استغفر 

مرت الايام ومشينا العمره  وعمرنا كلنا وقعدنا في فندق جنب الحرم الصباح صحيت لقيت ابوي مافي الخوف داير يكتلني وبقيت افتش وابكي وناجي واميمه يفتشو معاي وبكيت بكا نزلنا تحت سالنا الامن الفي الفندق قالو لينا م شفناهو لكن امشو الحرم اصلو الحجاج ديل بمشو يصلو هناك احتمال مشا معاهم قلت لي ناجي مستحيل ابوي م يكلمنا وخلاص ابوي دا حصلت عليهو حاجه ودموعي جاريه واسال زول زول واوريهو صورت ابوي لغايه ما اميمه قالت لي هداك ابوي وانا م شايفه وشو وشغاله ليهاا ابوي وينو ي بت انا م شايفاهو وهي جاريه قدامي وانا وناجي بي وراها لمن وصلنا لقيناهو ابوي ونحنا شايفنو بي ورا والرجال كتار لو م اميمه ما كان عرفناهو والتلاته وقعنا فيهو وبقينا نبكي بكا  وهو اقول لينا م تبكو قولو بسم الله وكان معاهو ولد  قال لينا ابوكم دا ما تخلوهو يطلع براهو انا من قبيل قاعد معاهو عشان افهم وصف مكانكم ما عرفت وغلبني اخليهو براهو وكان تعبان هو عندو شنو مريض بعاني من شنو قلت ليهو كان عندو مشكله ف الكبد وعملنا ليهو عمليه والحمد لله كويس وبياخد في علاجات قال لي ابوكم لازم يتابع دكتور لانو كان تعبان وانا طبيب ودا رقمي شغال في مستشفى جنب الحرم جيبو لي واتصلو علي وتاني م تخلو يطلع براهو لغايه م ترجعو ناجي شكرو  وانا كمان وسوقنا ابوي ومشينا قلت ليهو مالك الحصل شنو قال لينا اضايقت وراسي لفه وانا نزلت عشان اصلي وانتو كنتو نايمين م حبيت ازعجكم  ناجي قال ليهو تاني بصحا اسوقك ونصلي مع بعض قال ليهو تمام   وصلنا الفندق وبقا يحكي لينا بالولد الكان ماسكو قال لينا ولد حلال ناس الشغل اتصلو ليهو وهو ابا يمشي يخليني براي  قلت ليهو الحمد لله واديت ناجي الرقم حقو قلت ليهو عشان نمشي ليهو ابوي قال لينا لفه راس خفيفه م تخافو علي اقنعناهو وقال لينا بكره نمش تاني يوم مشينا المستشفى الفيها الدكتور والدكتور اسمو همام   طوالي ردا علينا لمن اتصلنا وجا ساقنا وفحص لي ابوي وعمل ليهو صوره ف الراس ولقا الفحوصات نظيفه ادانا ليهو فايتمينات مقويه وحلف ما يشيل مننا جنيه قال لينا العفو انتو من وين ابوي بقا يوصف ليهو وقال لينا انا زاتي من الجزيره من قريه اسمها اربجي بس شغال هنا  ف السعوديه لو احتجتو اي شي تعالو لي قلنا ليهو نحنا جينا عمره باقي لينا عشره ايام وراجعين قال لينا تمام ح اعزمكم يوم شكرناهو واعتزرنا ليهو ابوي قال ليهو بجيك انا تعال سوقني الجمعه اصلي معاك قال ليهو تمام ابوي لمن رجعنا غير الدكتور دا م عندو سيره عجبو عجب قال لي ناجي لازم تجينا دكتور زيو ولازم تكون عندك اخلاق وانسانيه زيو ناجي قال ليهو ان شاء الله يا ابوي انت بس ادعي لي ابوي بقا يدعي لينا وفي عز دعواتو ديك قال لي ربنا يجعل الولد دا من نصيبك قعدت اضحك قلت ليهو ابوي دا دكتور مفتكرو بعاين لي الزيي تلقا بنات دفعتو كلهن دايراتنو وبنات اهلو قال لي في النهايه بعرس نصيبو احتمال اكونن م من نصيبو وي بتي خليني ادعي ليك ساي ان شاء الله الدعوه تصادف ابواب السماء سرحت بعيد واتزكرت الولد الادب العندو والاحترام قلت بي قلبي يارب دعواتك يا ابوي تستجيب  وبقيت مننتظره يوم الجمعه اكتر من ابوي وجهزت عبايتي قبل جلابيه ابوي بس م حسستهم والصباح شربتو الشاي بعد استحما جا لقاني لابسه قال لي ماشه وين قلت ليهو ماشين نصلي الجمعه تحت معاك قال لينا لكن انا ماشي مع الدكتور قلت ليهو لو جا امشي معاهو نحنا بنمش برانا ونزلنا لقيناهو منتظرنا وساق ابوي من يدو كانو بعرفو ليهو سنين ناجي قال لي انا بلحقهم امشو صلو في المكان الامس وما تتحركو منو قلت ليهو تمام لو لقيتنا ماف طوالي اعرف نحنا مشينا الفندق وابوي م تخليهو براهو مهما كان قال لي تمام وفارقتهم مشيت صليت وفي سجودي ادعيت الولد دا يكون من نصيبي  وبعد زمن ابوي وناجي جو وابوي متكيف من الولد دا قال لي احفظي رقمو اتصلي لي ليهو قولي ليهو انا بت عمك حمد قلت ليهو طيب اتصلت عليهو طوالي عرفني قلت ليهو ابوي قال لي اتصلي ليهو اديتو ليهو قال ليهو احفظ الرقم دا وكان جينا مسافرين بنتصل عليك نودعك قال ليهو تمام  مشينا البيت وانا مبسوطه عندي رقم الولد دا وحسيت براحه عجيبه ورقمو معاي المساء بعد انتهيت من العشاء وهم نامو لقيتو مرسل لي ف الواتساب لمن قرب يغمي علي رديت عليهو بقا يسال فيني من ابوي قلت ليهو تمام وقال لي ممكن نتعرف قلت ليهو انا نوسه قال لي نوسه ايناس ولا نسيبه قلت ليهو نسيبه قال لي اختي اسمها نسيبه وبقا يسال فيني قريت شنو وكده حكيت ليهو بظروفي المنعتني القرايه وبقا يونس فيني لمن نعستا ونومتا من غير م اشعر وهو شغال يرسل الصباح صحيت لقيت الرسايل كتيره اعتزرت ليهو قال لي تاني لمن تجي تنومي وريني فرحت قلت يعني فيها تاني يعني ح اتونس معاهو معنوياتي بقت مرتفعه والتلفون من يدي م بنزلو وهو التقول م شغال الرساله بي ورا الرساله  مرت الايام وادمنت حاجه اسمها دردشه معاهو وخلاص راجعين السودان كلمتو زعل شديد ابوي قال لي اتصلي لي للدكتور اتصلت ليهو عليهو قال ليهو تعال النودعك نحنا مسافرين  طوالي رسل لي ف الواتس رساله قال لي اخيرا ح اشوفك انا قلبي دقاتو زادت  عمري م حسيت بالاحساس دا والولد لمن اتصل قال ابوي ينزل ليهو طوالي نزلت مع ناجي ولقيناهو جايب لينا كترت هدايا ما مخلي حاجه وودعنا وقال لي ابوي بتصل ليكم واتساب قال ليهو تمام قال لي خلي بالك من نفسك واخوانك وابوك جاني احساس اني حبيتو ابوي قال لي الولد دا حبيتو من قلبي قلت ليهو طيب ومحترم ناجي قال لينا زي ناس مهند طوالي اتزكرت دعوه امي واتاكدت تماما الولد دا ح يتزوجني ورجعنا السودان وعملنا الكرامه وابوي ما خلا زول م حكا ليهو بالدكتور وكل دقيقه يقول لي كدي وريهم صورتي مع الدكتور اعجاب ابوي للولد دا حيرني وطبعا هو متواصل معاي وسالني انو مرتبطه حكيت ليهو بظرفي قال لي طيب لو اتزوجتي مغترب ح تعملي شنو ح ترفضي وتقولي ليهو ابوي واخواني ولا ح توافقي اتزكرت كلام منال انو لازم يكونو عندي اولاد يسندوني قلت ليهو والله لو جات القسمه وكان مغترب اكيد ح اوافق قال لي بس ح يسوقك من اخوانك قلت ليهو انا م دايمه ليهم فجاه اتنازلت عنهم م عارفه دي انا البتكلم ولا دا النصيب قال لي طيب يا نوسه انا والله لا داير اقول ليك بحبك ومشتاق ليك وكلام الحب المسعول دا انا عايز اقول ليك انا عايزك علي سنه الله ورسوله وكلامي دا بعد استخاره استخرتها من اول يوم شفتك فيهو او قبل اشوفك ابوك الساعات القعدتها معاهو دي غير سيرتك والعملتي مع اخوانك ما جاب سيره لدرجه اني خليت شغلي وبقيت ادعي في سري انو اشوفك وفعلا نزلتي وشفتك ورجعت من دوامي استخرت وتواصلي معاك ما عشان مثلا انا عايز اتونس مع بنات بس كنت عايز اشوف فهمك وانا الان بقول ليك عايزك علي سنه الله ورسوله واديني رقم اخوك نادر وقبل اخوك نادر تسمحي لي اتصل وتديني ابوك سكت م رديت قال لي نوسه استخيري والفيهو خير يحصل بس انا ح اتقدم قبل تستخيري ولو قلتي خير طوالي بخلي اهلي يجوكم خطوبه ويحددو العرس وانا م اكذب عليك مستقر في السعوديه وحابي انو زوجتي تستقر معاي لو لينا نصيب  ح تكوني مرتي   مجرد احساس اني ح اخلي اخواني بقيت ابكي الولد بقا في البسكتني قال لي انا اسف بس م حبيت ادس مشاعري اكتر من كده عشان عندي كلام كتير ح اقولو وانتي هسي انا ح اقفل منك ارتاحي م تجهدي نفسك بالتفكير وخليها علي الله بعد المغرب بتصل اديني ابوك تمام قلت ليهو خير قفلت منو ولبست عبايتي جريت كلمت تهاني قالت لي شوفي ي نوسه اوعك تضيعي الفرصه دي الولد دا م ولد بترفض طوالي توافقي واليوم داك كانت معاها منال قالت لي نوسه لازم توافقي قلت ليهم شايفين كده قالو لي اي قلت ليهم طيب بستخير رجعتا منهم قريب المغرب وهمام اتصل اديتو ابوي واظنو طلب يدي وابوي مبسوط قال ليهو انا موافق وخليني استشيرها هي ونديك رد قفل منو وقال لي دعواتي استجابت الولد طلب يدك وخشمك م تفتحي استخيري وبعد الاستخاره ردي واوعك تقولي مابتعرسي عشانا انا والله ما بتجيني عوجه اختك معاي وتهاني جني ومرت اخوك جنبي وانا م مكسر زول بي صحتي بتحرك شوفي مصلحتك يا بتي قلت ليهو ان شاء الله بستخير مشيت منو استخرتا وحسيت اني عايزاهو  ابوي كلم نادر وناجي ناجي قال لي طوالي توافقي واتصلنا فرحنا ندي وادينا همام رد قال لينا عايز صوره يرسلا لي اهلو رسلت ليهو صور وبقيت متواصله معاهو وحبيتو حب بس هو نهاي م حصل قال لي بحبك وحدد لينا يوم اهلو جايين وبنعمل خطوبه وتاني بجونا للعرس وهو م بقدر يجي برسلوني ليهو مشيت فرحت ناس تهاني وانبسطو لي وام مهند قالت لي ابوك واخوانك مابقصر منهم حمدت الله اني قدمت للناس الخير ومدو لي يدهم وندي جات من الخرطوم واظنها حامل اليوم كلو راقده وحيلا ميت ومهيد حارسها وخايف عليها خوف لمن حللنا ليها ولقيناها حامل كلنا فرحنا بس مرت مهند ونادر لسه 

ويوم الجمعه جونا اهل همام وكانو فرحانين ليهو والعجب امو شكلها بتحبو حب بس قاعده جنبي وتبوس فيني عرفت انو همام دا ولدهم الصغير وكان رافض يتزوج بت يحجزوها ليهو الا بت يشوفها براهو والحمد لله لمن شافني شافني علي طبيعتي وقال عايزني وحققو الخطوبه وهو شغال يرسل لي ف الرسايل ومبسوط وجابو لي هديه وقوله خير وتلفون وقالو بعد شهر بجيبو الشبكه والشنطه والعقد وتاني بس انا اسافر ليهو كنت طايره من الفرحه واتصلت عزمت اهلي وعزمت الدكتوره وجنابو محمد وطبعا منال بقت عندها علاقه مع جنابو محمد بس منتظره ولدها يتم السنه حتي تتزوج وانا سبقتها اتزوجت  وانحبستا للعرس وهمام بقا متعلق بي وحبيتو وهو كمان  وكان متابع معاي تفاصيل عرسي وهو حنين وطيب وماقصر مني وحجزت في الكوفير قال لي البسي توب الزفاف خلي لمن تجي السعودية لانو عامل مناسبه هناك  ونادر عمل لي عرس رهيب وعزمنا كل الاهل وفرحو لي وكان يوم حلو شديد وجابو لي حاجات مبالغه والناس كلها لمن نقول ليهم زوجي دكتور بنخلعو كانو الدكاتره ديل م بتزوجو البنات الزيي قسمتي كانت اقوا من توقعاتهم حمدت الله وشكرتو وخالاتي قعدن عملن الريحه وجهزني لغايه ما سافرت وفراق ابوي واميمه كان صعب علي بس كان لازم امشي ودعتهم ومشيت ولقيت همام منتظرني في المطار شايل لي الورد رحب بي وحضني عليهو وباسني في جبهتي  ونزلني عند ناس خالتو قال لي ح نمشي شهر العسل بعد الصاله خالتو محترمه شديد شالتني في راسها وعاملتني كاني انا الببقا ليها م همام الببقا ليها  وتشيل توصي فيني عليهو حسيت امي بتتكلم معاي قالت لي لو زعلك شيلي شنطتك وتعالي لي اصلا الرجال ديل مرات عندهم نفسيات  ما قالت لي ما تتشكلو حسيت انها واعيه وفاهمه الحياه الزوجيه بي قلبي قلت ليها انا شفت امي ابوي بشاكلها عمرها ما علت صوتا عليهو رغم اي نقاش بتحترمو لسه قلت ليها عادي يا خالتي بستحملو قالت لي انتي واعيه ي بتي ربنا يحفظك وبناتا جهزوني وكانو معاي اول بي اول من حجزو لي في الكوفير لغايه م سلموني لهمام ودي كانت لحظه العمر الكنت بحلم بيها طول عمري واهلي اتصلو لي مكالمه فيديو ابوي يشيل ويبوس في التلفون ويحصن فيني دموعو قطعت قلبي بس ما حسستو بعد الحفله انتهت ومشيت شهر العسل وكل م اتزكر دموع ابوي ابكي وشبعانه بكا وهمام يحنس فيني قال لي معليش حبيبتي ياها حال الدنيا مصيرك تلاقي ابوك اوعدك نرسل ليهو زياره اجي هو واميمه اختك قلت ليهو ان شاء الله طبعا همام زول محترم وبخاف ربنا قال لي قومي نبدا حياتنا الزوجيه بالدعوات ونصلي ركعتين وانا كنت بصلي وراهو وهو بدعي دعوات تدخل القلب حبيتو شديد وكنت مبسوطه معاهو ومرت الايام وانا عايشه في جنه همام م مقصر مني  وانا من اول شهر حملت وكان مبسوط وهو بكلم في اهلو وامو لمن زغرت ليهو  مرت الايام والشهور وانا عايشه في سعاده م يعلم بيها الا ربنا وربنا عوضني كل ايامي بالسعاده والاستقرار وتهاني ولدت ولد وسموهو عمار  وكمان ندي اختي جابت بت سمتا اميمه علي امي وواصلت في قرايتها وانا ولدت ولد سميناهو محمد علي ابو همام وابوي واميمه جو حضرو ولادتي واميمه اختي م شاءالله في اي شي تشبه امي وبقت واعيه وفي دراستها متوفقه وطبعا ناجي خطب ايثار وايثار مشت عاشت مع امها وولد ملاذ اهل ملاذ جو ساقوهو وذكي قالو اتجرس شديد ومرت مهند ولدت ليهو بت سماها علي امو ونادر مرتو ولدت بت سماها نسيبه  ومنال اتزوجت جنابو محمد والدكتوره كانت متواصله معاي اتزوجت زميلها وجات السعودية وسكنت جنبي وبقت لي اخت وطبعا معتصم نفذو عليهو حكم الاعدام  وناجي اخوي دخل طب الخرطوم ومشا قعد مع ندي وندي شالوها صيدله معاهو  واميمه بقت ماسكه ابوي ونادر اخوي م مقصر منو وانا همام بقا متعلق بي شديد ما نزلنا السودان الا انا وهو سوا ونزلنا هناك عند اهلو وكانت اول مره ازورهم ناس محترمين شديد واحترامهم شفتو في ولدهم  حمدت الله انو ربناوقعني فيهم وبعد رجعنا السعوديه جبتا ابوي حج وحققت ليهو حلمو الحمد لله  ودي كانت نهايه روايتنا رغبه في الانتقام ❤️🫰🏻

ح اتكلم عن اهداف الروايه 

اول هدف كتبت عنو الروايه شخصيه ابو نسيبه الرجل النرجسي البحب نفسو وما عندو شغله بي غيرو الدمر حياتو بسبب الخمره ولعب القمار المشا مع ناس م من توبو وخلوهو يكون م واعي حتي لي حياتو والشخصيه دي في زيها كتير بس بجي دور الاولاد والزوجه  انهم يصبرو عليهو ويحاولو يهدوهو من الصفات السيئة في الربنا بهديهم بسرعه وفي البغرقو في المعاصي وبكونو في عدم وعي زي م حصل لي ابو نسيبه والدفع التمن ولدهم البقا في النص وقام لقا ابوهو بعاملهم معامله سيئه وامو كانت بتصبر فيهم وما كانت بتسمع ابوهم كلمه كعبه الولد بقا في النص بين طيبه امو وعنف ابوهو والنتيجه مرض نفسي خلاهو يفكر كيف ينتقم من ابوهو عشان امو ماتت قدام عينو بسبب اهمالو رغم فكرتو للانتقام من ابوهو لقا اختو الكانت برضو مضايقه من ابوها بس الفرق اختو عاشت الحياه وعرفت انو الاب مهما كان اب حتي لو كان كعب نحنا نصلحو م نفكر انو ننتقم منو لانو هو لا صديق لا عدو انا عايزه اوصل ليكم معلومه انو الاب مهما كان قاسي والدنيا عميان فيها بجي اليوم والبتغير فيهو بس كيف الاولاد يستحملو عنف الاب وجا هنا دور الام  الكانت رغم العليها صابره ومستحمله مالقت في الدنيا  وتعبت بس جزاها عند ربنا عظيم الام كانت مثال للزوجه الصابره وصامده رغم الاهانه الكان بتعامل بيها الاب في ناس كتير م بستحملو الاهانه وبشوفو انو الطلاق حل عكس ام نسيبه صبرت وزرعت في اولادها الصبر والتحمل وبعد وفاتها  سعو لي انهم يضمو ابوهم ويعكسو ليهو تربيه امهم لغايه م رجع لي صوابو وندم اشد الندم ووقفو جنبو  وسندوهو رغم انهم ما لقوهو في عز حوجتهم 💔💔

تاني هدف اتكلمت عنو رغبه نادر في الانتقام وانو م كان علي طبيعتو الانسان الطبيعي ربنا بديهو طاقه يتحمل بيها والدينو عكس نادر  بسبب الحاله الهو فيها فكر انو ينتقم لي موت امو وناسي انو دا قدرها سوا كان ابوهو وقف معاها لحظه ولادتها او م وقف وجا هنا دور نسيبه الاخت الصبرت وشالت اخوانها ضمت اخوها عليها وبدت تغير مفهومو لي انو الاب مهما عمل نحنا ما بنخت راسنا قصادو ونقول لا لازم ننتقم لا نحنا الامرنا بيهو ربنا اننا نطيعهم  وما نعصاهم  وربنا عالم انو ح اكونو في ابهات سيئين بس امرنا اننا نطيعهم   ما حدد في الطاعه الاب المثالي  الطاعه دي بتشمل كل الابهات بكل صفاتهم وكل شي قسمه ونصيب والوالد دا والد لو كعب ولا سمح  واجبنا اتجاهم الطاعه وكيف نغيرهم من حال الي حال ما نحنا البنعاقبهم❤️زي ما عملت نسيبه اول م سمعت بمرض ابوها مشت ليهو وكانت مستعده تعمل اي شي قصاد انو ابوها يبقا كويس كانت ليهو طوق نجاه من المعاصي الكان فيها ولمن شاف معامله بتو ليهو رغم الحصل منو قصادهم رجع لي صوابو وكانت ليهو سبب في توبتو وهدايتو وانه غفور رحيم وباب التوبه مفتوح لاخر يوم في عمرنا 

وتالت هدف اتكلمت عنو الدنيا دي لو اتقفلت في وشك من اقرب الاقربين ليك  وقطعو صله رحمهم منك بتلقا البسندك وبقيف جنبك زي م عمل عم احمد شجعها وكان ليها سبب في حياه كريمه والاولاد المشت معاهم مدو ليها يدهم واكرموها كانهم كانو مرسلين ليها من السماء وسندوها وجا اخوها اشتغل معاهم وبقا ليهم سبب في رزق وخير وفير انحرمو من اهلهم بس ربنا سخر ليهم ناس بقو ليهم اكتر من اهل وسبب في رزق ونصيب ❤️✌🏻

رابع هدف اتكلمت عنو الشر الكانو فيهو جنابو معتصو وزوجتو  بس ربنا وقع في طريقهم الكشف حقيقتهم وادا نوسه طاقه ايجابيه وخلاها رغم الحصل ليها تتشجع وتواجهه المصايب لغايه ما انتصرت عليهم 

وخامس حاجه اتكلمت عنها عمار رغم ابوهو وامو وصفاتهم السمحه بس هو كان بحمل صفات سيئه ودا م دلاله علي تربيتو دي صفات مكتسبه من الدنيا الفيها العجايب دي  وابتلاء من ربنا   ورغم صفاتو السيئه زوجتو كانت مثاليه وبناتو محترمات ومتواضعات 

ما تحكمو علي الانسان السيئ بتربيتو لانو النفس اماره بالسوء في ناس بكونو كويسين لمن اكونو صغار بس بعد يكبرو ويبقو مسؤولين من نفسهم بضلو الطريق وبمشو ورا الدنيا ومصايبها 

سادس حاجه اتكملت عنها القضاء والقدر  والايمان بيهو 

القدر هو تقدير الله تعالي الأشياء في الازل وعلمه انها ستقع في اوقات معلومه 

والقضاء يعني وقوع الاشياء حسب م قدرها الله وكتبها  والإيمان بالقضاء والقدر واجب وانو كل انسان في الدنيا دي معرض للابتلاء في حياتو يعني مثلا زي المرض وفقدان مال وموت شخص عزيز ومفارقه الاهل والمشاكل العائليه   والمؤمن في كل الحالات علي خير كثير لان الابتلاء يقربه من الله بالشكر والصبر  ولازم نحنا نرضا  بالقضاء والقدر زي م عملت ام نسيبه ونسيبه كانت مؤمنه تماما انو  كل الحصل ليها خير او شر دا قضاء الله وقدره والصبر عليهو اجر عظيم وربنا قادر يغير الحال من حال الي حال  زي م حصل لنسيبه صبرها علي الابتلاءات وايمانها القوي كان سبب في  انتصارها وقسمتا الحلوه ❤️❤️🫰🏻🫰🏻