أبويا كان آسي في المعاملة ليه بيعمل كل ده لانه بيفرق بين البنت والولد كانت افكاري دايما تروح لبعيد مكنش عنده رحمه حبه للاولاد عمى عينيه انا هحكيلكم قصتي
انا اسمي سمر عبد الرحمن بنت على ثلاث اولاد انا البنت الوحيدة وأبويا كان شغال عامل في مصنع الحديد والصلب واخويا الكبير احمد في الثانوية العامة ومحمود في تالتة اعدادي وانا وأخويا سيد توام كنا في اخر مرحله في الابتدائة كنت دايما متفوقه ومن الاوائل من اول سنه دخلت فيها المدرسه كل المدرسين كانوا بيتباهوا بيا عندي ذكاء في الرياضه اي مسألة صعبه احلها بسرعة من غير ورقه وقلم ومن غير آلة كان دايما المدرسين يقولوا لي اني ليا مستقبل باهر وان هيكون ليا شأن كبير لكن كان دايما ابويا يحبطني ويقولي انت ملكيش تعليم اخرك المرحله الاعداديه وبعد كده تقعدي تخدمي اخواتك وتشوفي طلباتهم مع امك كان دايما يخليني اعيط ليه بيعمل معايا كده ده انا كنت اكثر واحده شاطرة في اخواتي انا في سني ده وانا بحضر للمدرسين كشكول الحصص خطي كان جميل كأنه مرسوم كانت دايما أمي في خناق مستمر مع ابويا عشان خاطري ومن فرق المعامله بيني وبين اخواتي ماما ربة منزل حنونه جدا عمرها ما فرقت بيني وبين اخواتي وهي دايما تقولي انا حاسه يا سمر ان ربنا ان شاء الله هيكون معاكي وهيكون لك شان كبير وتحققي اللي نفسك فيه يا حبيبه قلبي وبعد مرور ثلاث ثلاث سنوات اخدت الاعداديه انا وتوأمي وانا طلعت الاولى وجايبه الدرجات النهائيه في جميع المواد لكن سيد مجموعه كان اقل مني بكثير أمي فرحت ليا واخدتني في حضنها وقالت ربنا يزيدك من علمه يا بنتي واشوفك حاجه كبيره
لكن ابويا كان زعلان جدا ان الولد يجيب مجموع اقل من البنت
بابا نده عليا سمر يا سمر نعم يا بابا تعالي عايزك خرجت له نعم حضرتك عايز مني ايه بعد ما كسرت بخاطري وحتى ما هنش عليك تباركلي قالي انت بنت وانا معرفك ان اخرك الاعداديه وان بعد كده مفيش علام انت هتقعدي في البيت تتعلمي شغله وتساعدي أمك البنت اخرها الجواز وتعرف تكتب وتقرأ عشان تساعد اولادها بس
عيط كتير ليه بتعمل معايا كل ده من صغري ومعاملتك معايا غير اخواتي نفسي اعرف ليه قالي انا مش مؤمن بعلام البنات واحمدي ربنا انك اخذتي الاعداديه
أمي عملت معاه المستحيل عشان يسيبني اكمل علامي لكن للأسف رفض رفضا باتا حبي الزائد لاخواتي وحنيتهم عليا ما عرفتش اكرههم بسبب ابويا عشان أمي كانت دايما محببانه في بعض ودايما بتوصيهم ان اختكم ملكوش غيرها وهي ما لهاش غيركم وخليكم واقفين جنيها دايما
اخواتي ملهمش ذنب كلموا ابويا كثير عشان خاطري لكن من غير فايدة كنت دايما بحسبن عليه مين اللي عمله فيا اخواتي كلهم اتعلموا علام عالي احمد اتخرج من كليه التجاره ومحمود اتخرج من كليه اداب قسم لغه عربيه اما سيد توأمي دخل كليه الحقوق وانا قاعده في البيت مستنيه ابن الحلال رغم ان ابويا قعدني من المدرسه دايما كنت بقرا كثير وبتعلم اكثر من كتب اخواتي كلهم كنت دايما بحب اكتب قصص وروايات كتير
كان في مسابقه عن تأليف احسن قصة كنت كاتبه قصص كتير بعت ثلاث قصص منهم في المسابقه بإسم مجهول وفي قصه منهم اخذت المركز الاول فرحت جدا وانا قاعده بقرأ رن التليفون رديت عليه في شخص رد عليا وقال انا عايز سين عين هي اخذت المركز الاول في تاليف القصص ولازم تكون الساعه 2:00 ظهرا موجودة في دار الكتب مكنتش عارفه ارد عليه كنت مبهوره جدا وفي نفس الوقت خايفه جدا لان قدمت القصص من ورا اهلي قلت له حاضر ان شاء الله في الميعاد هكون موجوده ناديت على أمي وكانت في المطبخ
أمي نعم يا سمر في ايه يا حبيبتي
انا عايزه اكلمك في موضوع وخايفه من رد فعلك
قولي يا سمر ما تخافيش يا بنتي
انا قدمت قصه من تأليفي واخدت المركز الاول ولازم اروح بكره هناك الساعه 2:00 ظهرا ردت امي طب يا بنتي ابوكي ما بيرضاش يخرجك وإنتي قدمت ازاي وانتي ما بتخرجيش اصلا قولتلها والله يا ماما انا ما خرجت انا اتصلت بمرفت بنت عمي وهي اخذت القصص مني وقدمت لي في المسابقه
أمي انا خايفه عليك يا سمر ابوكي صعب وانا ما اقدرش اكلمه في حاجه زي كده قعدت اعيط على معاملته ليا هو انا اللي خلقت نفسي بنت وليه ما بيحبش البنات انا اكثر واحده بحبه وبحترمه رغم اللي عمله فيا ده يا ماما مستقبلي وحرام قعدني من علامي ورضيت بالامر الواقع لكن ده مستقبلي حرام حرام انا تعبت بكت امي من اجلى وزعلت على زعلى يا ريت يا سمر كان في ايدي حاجه كنت عملتها لك والله يا بنتي طب انا هقول لك خلي ميرفت تذهب الى هناك واكنها إنتي
انا يا ماما ما ينفعش لان لازم يناقشوا القصه مع صاحبها وميرفت ليس تعرف بذلك خلاص يا سمر ابعثي لها النهارده وكلميها عن القصه وترد مكانك هناك
يتبع