رواية روح غائبة الفصل الثاني عشر12بقلم السيد عبد الكريم
تخيل يا طارق بيه حاطين المخدر ات جوه العود .. تخيل الست دي ذكية ازاي .. دا انا قلت هتديني شنطة فيها المخدرات وتغمز بعينها كده وتقولي كلمة السر ( يوم ورا يوم ) وانا اديها باقي المبلغ في شنطة واغمز بعيني واقول كلمة السر ( اه ياني يا اما ) زي ما بنشوف في الأفلام .
ضحك طارق بيه وعمر بيه وقال عمر بيه :
ـ هو بصرف النظر ان مفيش كلمة سر اسمها ( أه ياني يا أما ) بس حلوة يا أستاذ رأفت .
قلت :
ـ اقولكم نكتة تانية طيب ؟
قال طارق بيه :
ـ ياه انا احب النكت اوي يا أستاذ رأفت .. ومن اول ما جيت هنا وانت عملت جو حلو والله .. جو هزار وضحك .
قلت :
ـ أنا بتريق يا طارق بيه .. لما قلت اقولكم نكتة كنت بتريق .. احنا هنفضل نهز لامتى ... هزرنا كتير وضحكنا كتير والمخدرات عمالة تنتشر في البلد .. وكل اللى بيتعاطوا كلهم شباب صغيرين .. المفروض كنا قبضنا عليهم ... هنقبض عليهم امتى ؟
قال عمر بيه :
ـ انا مباحث .. السؤال ده تقوله لطارق بيه .
قال طارق بيه :
ـ حلو الحماس بتاعك يا أستاذ رأفت .. بش شغلنا هنا مينفعش يكون فيه حماس من غير تخطيط .. من غير دراسة .
قلت :
ـ طيب انا حاسس اننا واقفين فى مكانا متقدمناش ولا خطوة ..والتهريب شغال قدامنا واحنا كمان بنساعدهم وبنشتري منهم المخدرات وبعدين الفلوس دي اللى لهفتها الست محاسن .
قال طارق بيه مبتسما :
ـ متشغلش بالك .. دي كلها فلوس مرقمة .. يعني متراقبة .
قلت :
ـ هي فيه فلو بتتراقب يا طارق بيه ؟
أجاب :
ـ اه فيه وياريت متسألنيش ازاي .
قلت :
ـ ازاي ؟
نهض واشعل سيجارة وقال :
ـ الموضوع شرحه طويل .. بس باختصار .. دي فلوس مطبوعة مخصوص بأرقام معينة علشان نعرف حركتها .. مين صرفها واداها لمين وكده .. ولو لسه مفهمتش فمش لازم تفهم دلوقتي .
قلت :
ـ خلاص ... مش لازم افهم .
قال :
ـ حلو .. دلوقتي بقا ركزوا معايا .... حضرتك هتقنع الست محاسن انها تستورد اكبر كمية تقدر عليها .. حضرتك هتطلب نص طن مواد مخدرة .. وتشوف هتوصل معاها لكام كيلو لانها فى الاول هترفض تستورد نص طن .
قلت :
ـ لا بقا .. احنا كده يعتبر شغالين معاها .. نص طن نعمل بيه ايه .
قال :
ـ بص حاول متقاطعنيش وانا بتكلم علشان ممكن اتعصب .. ولو تعصبت هسيب المكتب واروح .
قلت :
ـ لا تروح وتحرمنا من الخطط دي .. تفضل قول .
قال :
ـ لما تقنعها تستورد كمية كبيرة زي نص طن .. يبقي المورد هيضطر انه يترك سوهاج ويفرغ شحنته فى الجيزة مثلا او القليبوية المهم هيفرغها فى اي حدود قريبة من القاهرة ... وغالبا هيفرغها قبل نقاط التفتيش ويدخلها على اجزاء بالحمير .. لان دي الطريقة اللى متعودين عليها ... ساعتها هيكون تحت ايدينا المورد والمستلم .. ونكون بلغنا الوزير بالخطة .. والقوات الخاصة تكون مغطية المكان ... عندك اي سؤال .
قلت :
ـ لا ... بس حاول تشرحلي الخطة دي تاني قبل ما ننفذها علشان بنسي .. حضرتك عارف الزهايمر وكده .
قال :
ـ طيب أنا عاوز أسألك سؤال يا أستاذ رأفت .
قلت :
ـ سؤال اجباري ولا اختياري ؟
قال :
ـ اعتبره أكمل مكان النقط ... انت ملاحظتش ان وزن العود تقيل .
قلت :
ـ فريد الاطرش الله يرحمه هو الوحيد اللى يقدر يجاوب على السؤال ده .
قال :
ـ الله يرحمه .
قلت :
ـ يا طارق بيه ..انا اول مرة اشيل عود فى حياتي .. يعني معرفش ان كان وزنه كده طبيعي ولا مش طبيعي .
بعدها قال زيزو :
ـ عامة عز ده اللى اداك العود اعتقد انه ميعرفش حاجة عن موضوع المخدرات .. وحتى لو يعرف قأكيد واحد من رجالة الست محاسن ...انا بشوفه كتير على المسرح وفى البروفات بس اول مرة اشوفه يخترق القعدة بتاعتنا بالشكل ده .
بعد يومين كنا فى كازينو الست محاسن ، وبعد انتهاء الفقرات جلسنا وقدمت لها الحقيبة اللى فيها فلوس مرقمة وقلت :
ـ ملعوبة الطريقة دي يا ست هانم .
قالت :
ـ كل مرة هتستلم بيها البضاعة هتستلمها بشكل غير التاني .
دي عشمانة تسلم بضاعة طول عمرها !!!
قلت ذلك فى نفسي ثم قلت :
ـ طيب لا مؤاخذة يعني فى الكلام .. 15 كيلو دا لعب عيال بالنسبة لي .. انا عايز عملية كبيرة .
قالت :
ـ كام يعني ؟
أجبت :
ـ طن .. نص طن .. كده يعني ؟
قالت فى ذهول :
ـ انت بتتكلم جد يا معلم ؟
أجبت :
ـ طبعا جد ... أنا ناوي اعمل العملية دي واختفي شوية عن السوق .
قالت :
ـ بس الموضوع ده أكبر مني .
قلت :
ـ انتى قدها يا ست الكل ... وبالسعر اللى تطلبيه .
قالت :
ـ انت عارف الكمية دي هتكلفك كام .
قلت :
ـ كام يعني ؟
اجابت :
ـ مش أقل من 15 مليون جنيه .
قلت :
ـ وماله .... المهم الكمية تكون متوفرة .
قالت :
ـ طيب سيبني افكر واشوف ظروف الناس اللى معايا .. بس فيه حاجة .
قلت :
ـ تفضلي يا ست هانم .
قالت :
ـ لو قدرت اجيبلك الكمية دي .. يبقي ليا نسبة من البيع والتوزيع .
قلت مفكرا :
ـ بس ياست هانم ..
قاطعتني قائلة :
ـ مفيش بس .. انت هتهبر أكتر من 5 مليون مكسب .. ومش كتير عليا ربع مليون .
وطبعا هنا مينفعش اوافق على طول علشان احبك الموضوع شوية علشان كده قلت :
ـ بس أنا برضه معايا رجالتي وكده .
قالت :
ـ ما العملية دي لعب بالنار يا معلم .. طن ولا نص طن .. دا لعب بالنار .. انا واخدة كل احيتاطتي على 30 كيلو بس ... بالك بقا بطن ولا نص طن .
قلت :
ـ ماشي كلامك يا ست هانم ... مش هنختلف .
قالت :
ـ خلاص هرد عليك قريب .
بعدها نهضت الست محاسن وظللت مع زيزو ونسمة التي قالت :
ـ افتكرت ... انت شبه واحد عايش فى القرية بتاعتنا فى الصعيد .
يا بنتي طلعيني من دماغك دلوقتي مش وقتك خالص !!! خليكي انتي فى زيزو لحد ما تتصدمي وتعرفي انه ضابط ... البنت باين عليها الحب اوي ... وانا حبيب قديم وافهم فى الحاجات دي .. يا سلام ! فينك يا أستاذ شماشيري ... المهم سمعتها تقول :
ـ مش بترد ليه ؟
قلت :
ـ انا عمري ما رحت الصعيد يا دلوعة .
قالت فى شرود :
ـ أنا متأكدة انك فيك حاجة منه .
هنا ضغطت على قدم زيزو بقدمي فقال مسرعا :
ـ المعلم سحلب يا نسمة حياتها كلها فى القاهرة .
قلت :
ـ على فكرة يا زيزو .. الاغنية اللى غنيتها انهادره مش عجباني .. ايه الاغاني دي .. انا احب الاغاني الرومانسية ... محبوك تاجر مخدرات اه بس افهم فى الرومانسية ... ما تسمعنا حاجة .
وبدأ زيزو يغني وانا تركتهما حتى يخلو لهما الجو وغادرت .
في قسم الشرطة قال طارق بيه :
ـ بهاء بيه كلمني وقال انهم لقيوا المعلم عبد العزيز عايش فى قرية فى سوهاج وهو شبه فاقد الذاكرة .. وبالتحريات عرفوا انه ساب البيت وراح للقرية دي وهو مش فاكر اي حاجة عن حياته .. وفضل ينام قدام المساجد لحد ما اهل القرية بنوا ليه بيت صغير جمب الغيطان وسموه المجذوب ... وبالصدفة حد شافه من قريتكم وعرفه والشرطة لقيوه ... بس بهاء بيه متحفظ عليه عنده لحد ما نقبض عليهم .. لان ظهروه فى الوقت ممكن يبوظ الدنيا معانا .
قلت :
ـ مش مجذوب .. دا مسحور .
قال طارق بيه :
ـ ازاي ؟
قلت :
ـ الست محاسن مش تاجرة مخدرات وبس .. دي ساحرة بتمارس السحر الاسود ... سحرت نسمة .. وسحرت عبد العزيز .. وسحرتني انا كمان لما رحت عندها فى البيت ... علشان كده هي تعرف رأفت كويس أوي .. وكان لازم اظهر بشخصية سحلب قدامها هي ونسمة .
ثم نظرت الى عمر بيه وقلت :
ـ نسمة دي عمر بيه أغلب من الغلب نفسه .. واحدة مسكينة .. ضحية مرات ابوها وضحية سحرها السفلي .
قال عمر بيه :
ـ عارف .. عارف انها لما بترقص مش بتكون في وعيها .. وعارف انها نفسها تهرب من الجحيم ده .
قال طارق بيه :
ـ بس برضه فيه شريك مع محاسن .. محاسن مهما كانت شيطانة كده بس أكيد فيه شريك معاها .. والشريك ده هو اللى مشغل معاه المورد وادمن الجروب اللي بيدير الجروب والتطبيق بتاع اللعبة .
قلت :
ـ انا اعرف ان شمندي فى سوهاج بيساعدها فى توزيع المخدرات .. والعفريتة قالتلي .. قصدي وفيه واحد اسمه مندور شغال معاها بس دوره ايه الله اعلم .
قال طارق بيه :
ـ اكيد دوره زى دور شمندي بتاع سوهاج ده .
قلت :
ـ لا .. دا وراه سر أكبر ... دا اتجوز بسمة بعد ما زور وفاتها .
قال :
ـ بسمة مين ؟
قلت :
ـ نسمة معاها اخت اسمها بسمة توأم ... مندور اتجوزها بعد ما محاسن سحرتها .. وعلشان محدش يدور عليها فزورت موتها .
قال عمر بيه :
ـ بس نمسة عمرها ما حكت معايا عن اختها .
قلت :
ـ لانها بتعتقد انها ميتة ... بهاء بيه يعرف تفاصيل الحادثة بتاعت بنات جامعة الكوامل بسوهاج .. ويعرف اللى ماتت هي رانيا رامي ... ومحاسن شوهت جثة رانيا رامي وتم دفنها على انها بسمة عبد العزيز .. بس اللى مش قادر افهمه ... طالما هما دفنوا رانيا على انها بسمة ...الشرطة عرفت ازاي ان رانيا ميتة أصلا .
قال طارق بيه :
ـ لا انا كده مش فاهم حاجة .
قلت :
ـ طيب تصدقني لو قلتلك ان المعلومات دي كلها عرفتها من عفريت رانيا رامي .
لم يرد عرفت انه لن يصدق لذلك قلت :
ـ بلاش تصدقني .. اعتبرني بخرف زي المجنون .. بس بسمة لسه عايشة .. ومندور اتجوزها وهي مسحورة ... والشرطة فاهمين انها ميتة مدفونة .. في حين ان اللى مدفونة هي رانيا رامي .
قال :
ـ طيب دا هيفيدنا بحاجة فى موضوعنا .. اصل انا شايف ان كله شغل مباحث .. احنا هنا مكافحة مخدرات .
لم أرد ...
بعد يومين كنت نايم فى فندق رمسيس ، وفجاة لقيت حدا بيخبط على غرفتي ، ولما فتحت شفت زيزو اللى دخل وقال :
ـ عاوز اعرف كل حاجة عن تزوير وفاة بسمة عبد العزيز .