رواية خلف الابواب المغلقه الفصل الثالث والثلاثون 33 والرابع والثلاثون 34 بقلم مشاعر مبعثره
33
ما بقدر ازعل منك ، اصلا ما عندي غيرك يا بابا💔
: كيف ما عندك؟ نسيتي اختك لين؟؟ وماما سمر واخوانك الثلاثه .
دموعا طوالي جرت ، حضنا
: لالا معناها بالجد الموضوع كبير .
: هم حايمشو ويخلونا برانا تاني😭😭😭
: منو الماشي يا بنتي؟ ، بتجيبي الكلام دا من وين؟؟
: ماما سمر واولادا .
: ايواااا فهمت !!!!
اكيد سمعتينا بنتكلم عن القضيه ، ما تخافي ابدا ، مافي زول ح يمشي.
هزت راسا وقالت له : انا سمعتها بتتكلم مع امها ، قالت لها انا اصلا اتزوجت عشان اولادي ، وفايدة البيت شنو وهم مافي😭😭
نزار حس بنقزه في قلبو ، لمن بلع ريقو مع الكلمه دي وسكت اما هي كملت كلاما
: معناها لمن ياخدو منها الاولاد حاتمشي مننا ، وما ح تعيش معانا !!!!
: لا طبعا ، مافي زول ح ياخد الاولاد ، انتي بتثقي في ابوك ولالا؟؟؟
: اكيد بثق فيك .
: معناها كوني مطمنه ، سمر واولادا ح يفضلو معانا ومافي زول بقدر ياخدهم منها اصلا ، ولا زول .
: بس هي مدام قالت كدا ، معناها ما بتحبنا!!! ، ولابنفرق معاها ، ممكن عادي تتخلى عننا
: ختي نفسك مكانا يا بنتي؟؟ بتقدري تقعدي في مكان من دوننا انا واختك؟؟
: لا.
: معناها انتي فهمتي هي ليه قالت كدا !!! وبرضو بطمنك الاولاد مافي زول بياخدهم مننا .
: ان شاء الله
: يلا تعالي خلينا نمشي نقعد معاهم ما يزعلو مننا ، انتي ما جعتي؟؟
: جعتا .
: طيب قومي ناكل مع بعض.
جو طالعين وانا عيني عليهم ، عاينت لنزار جوا عيونو باستفسار ، غمض عيوني باطمئنان ، بمعني انو المشكله اتحلت ، ليان زاتا جات اعتزرت مني .
قمت ختيت الغداء وقعدنا نحن الثلاثه اكلنا ، او بالاصح انا وليان اكلنا ، نزار دا كان بهبش بس ، حسيتو بالجد ما قادر ياكل ، عشان كدا ما ضغطت عليه..
قعدنا شويه كدا والاولاد مشو غرفتهم ساقو معاهم مهيلم ، نزار زاتو قال لي داخل ينوم ، انا قفلت التلفزيون ودخلت المطبخ
عملت له عصير منقه تقيل مع الحليب ، عشان يملى بطنو.
دخلت كدا لقيتو ببلع في حبوب ، وخباهم مع دخلتي لمن خلعني ، قلت له : نزار انت عيان؟؟؟
: لالا ابدا دا مسكن بس .
ختيت الكبايه وجيت وقفت جنبو وشلت الحبوب من يدو المخبيها وراه
عاينت له باستفسار .
قلت له : دا مضاد حيوي يا نزار !!! انا ما جاهله وريني فيك شنو؟
ابتسم لي وقال لي : ولا حاجه صدقيني ، بس مبادئ التهاب قلت الحقو قبل يتمكن مني .
: بس ديل 400mg كيف تقول مبادئ؟ وريني المرض بدسوه يعني؟؟ ولا ما عاوزني اقول لك اخد راحه وما تتعب نفسك؟
: والله يا دكتوره سمر بس اعتمدت فحص الجبين بتاعك داك ، وبناءا عليه جبت الحبوب دي .
قعدت اضحك لفتره طويله وهو ساكت وبعاين لي لمن سرحان
جيت تاني قربت منو و لصقت جبيني معاه ، بقينا ساكتين الاتنين ، كأننا بنتلصص على افكار بعض ، بس هو بياخد نفس واصل لجوا انفي مباشرة ، وحاسه به في رئتي
قال لي : اها النتيجه طلعت؟؟
: ما قادره احلل ، في تشويش !!! ، واعراض جديدة ظهرت......
مد يديه الاتنين أسر بهم خصري !!! وحضني لمن انوفنا دخلت في بعض ، وبقيت سامعه دقات قلبو اوضح !!!!
قال لي بهمس : دي أعراض حب !!!!
رفعت راسي وابتسمت له ، باسني 🙈🙈🙈🙈
فضلت في حضنو لفتره طويله وانا بفكر ، وهو برضو بفكر اي واحد فينا كان في عالم ضاجي بالافكار !!!!! ، بس ما طالع لينا صوت .
انا كنت عاوزه اسألو عن القضيه والحايحصل ، بس ما حبيت انكد عليه ، واطلعو من حالة الاطمئان دي ، ولا اجبرو يديني اجابه غلط ، وجرعة تخدير يرضيني بها .
اما هو !!!! حضني ذي الكانو بودع فيني !!!! او حاسس اني بضيع من يدو وحايفقدني ، عشان كدا بحاول ينتزع كل اللحظات المن حقو في الوقت الحالي !!!!
قلت له : شكلي ح انوم واقفه كدا !!!!!
فاجأني بسؤالو :
انتي ومدثر اتطلقتو ليه؟؟؟
بعدت عنو بسرعه ، واصلا سيرة مدثر بتعصبني
قلت له : في داعي تجيب لي سيرتو وانا في حضنك؟؟؟
: وليه تنزعجي كدا؟؟ المفروض انو يكون عادي بالنسبه لينا وما نتأثر بسيرتو ، وذي ما نحن ما بنحبو ما نكرهو كمان ولا يكون في عواطف !!!!
قلت له : ما يكون في عواطف؟؟ انت فاكر انو ساهل علي انسى كرهي للزول دا؟؟ ولا عندك فكره عن الحصل بيننا؟؟!!!!
: انتي قلتي لي بس تراكمات ، واتطلقتي لانك ما قدرتي تستمري .
اخدت نفس ومشيت قعدت في السرير بثقل ، كأني برمي حملي عليه ، قلت له : من حقك تقول كدا ، اصلا كنت متأكدة انك ذي امي ما صدقت انو ما هي الإتسببت بطلاقي !!!!! ، لكن خليني اقول لك نجاتي مش طلاقي .
عاينت له لقيتو منتظر يسمع مني وبهمو يعرف الحصل بيننا .
ابتسمت باستهتار وقلت له : فعلا كان في اسباب كتيره ذي ما قلت لك من البدايه ، بس اكيد في واحد فيهم كان قوي لدرجة انو ينسف طاقة التحمل دي ، انا انجرحت منو شديد يا نزار بسبب الخيانه !!!!
غمض عيونو بتثاقل وخيبه !! كأنو بسمع الاجابه الكان خايف منها ، وانا دموعي نزلت قلت له : انا اخلصت له رغم المشاكل والتنافر البيننا ، حتى اني كنت بتصدى لأمي لمن تهاجمو ، بس الشي الماقدرت اتقبلو خيانتو لي وانا على زمتو وام اولادو !! ..........
34
انا اخلصت له رغم المشاكل والتنافر البيننا ، حتى اني كنت بتصدى لأمي لمن تهاجمو ، بس الشي الماقدرت اتقبلو خيانتو لي وانا على زمتو وام اولادو !!
نزار جاء قعد جنبي وخت راسي في حضنو بعداك مسح دموعي وقال لي : احكي مدام الموضوع مؤلمك كدا
كان في بيننا تنافر ومشاكل روتينيه ، انا بتجاوزا ذي غيري من الزوجات ، ولو انو كان بزودا كتير ، حتى تعاملو مع اولادو ما حلو ، ما بتحسو الاب الحنون الحريص على اولادو ، او العايش عشانهم وممكن يضحي بشي عشانهم ، مدثر كان بنزعج لو واحد من الاولاد بكى او مرض !!!! ، لو اتصلت به وقلت له حاصل كدا ، بقول لي اتصرفي ، انا ما بتزكر انو شال واحد من الاولاد ديل يوم وداه المستشفى عشان عيان !!!!! ، انا البمشي وانا البعالج واسهر ، بس برضو ما حصل قلت شي ، لاني ما بقدر اجبرو يكون اب حنون!!!! دي عاطفه بتنولد مع الانسان ، والربنا نزعا من قلبو مافي سبيل انو يتأثر بكلام زول ، كان بعاملهم على اساس انهم عبئ ، شادن دي ما فرح بولادتا ابدا ولا سمى لها ، حتى انو قامت مشكله كبيره بينو وبين امي لمن جات تنفسني ، بس انا وقفت معاه هو قصادا وقلت لها ما تدخل .
في موقف هزاني شديد ، وما اظن هاني يكون نساه !!!
كان كل ما يجي من الشغل يكون زهجان وينبذ من الباب
وكانو هم الاتنين بجرو له ، بابا جاء ، بابا جاء ، بكونو منتظرين انو يجيب لهم العاب وحلويات ذي باقي الاطفال ، او حتى يضمهم لصدرو ، بس كان ببعدهم ويقول ما ناقصكم ، هاني بطل يجري له ، بس شادن صغيره وكل يوم بتعمل كدا ، رغم انو بصدا وبصرخ عليها كمان
يوم قلت له : انت ليه ما تمشي لابوك في الباب ذي اختك؟
قال لي : واستفيد منو شنو وهو بطردني ، انتي قاعده تقولي لينا التكرار بعلم « الحمار » !!!!! وانا ما « حمار »
اليوم داك شاكلت مدثر وقلت له : لو على الحلاوة انا بديك قروش جيبا لهم معاك بس فرحهم ، زعل وقعد يشاكل ، واصواتنا علت شديد ، هاني قال لي : ي ماما انتي ما تشوفي لك راجل غيرو يكون بابا!!!!!
مدثر حلف يضربو اليوم داك ، والله الا قفلتو منو في الغرفه ، يوم كامل وهو قاعد جوا منتظر متين الوضع يهدأ عشان بس يطلع ، حتى اكلو دخلتو له .
اليوم داك اتخذت قرارات حازمه معاه ، بس هو ما اتأثر لأنو عارفني ما بقدر ارجع لأهلي او حتى اشكي لهم ، لاني اتزوجتو غصبا عنهم ، ودي حاجه بزكرني بها ويعايرني في كل مشكله تحصل ، كان انسان سيئ شديد معاي ومعيشني في ضغط كبير ، لمن اجي انوم بحس اني ما بقدر اصحى تاني من شدة الارهاق والالم النفسي ، حقو دا ما بتنازل عنو لأي سبب لا بعرف تعبانه ولا عيانه ، ولا براعي ، اتشاكلنا كم مره للسبب دا
نزار كان بمشي يدو على شعري وقف لفتره طويله ، بعدها قال لي : كملي .
: استمرينا بنفس النمط دا يا نزار ، كان عندو تصرفات مريبه وواضحه ، بس بسبب انشاغلي ما انتبهت ، امي جاتنا وقبضتو كم مره بتكلم مع واحده في التلفون وبقول ماشي لها ، انا ما كنت بصدقا ، وبقتنع بأعزارو الواهيه عشان الحياة تستمر واحافظ على العلاقه دي من الانهيار ؛ لأنها اخر علاقه سليمه فضلت لي ، او انا كنت فاكره كدا .
تلفونو دا بقى ما بديه لزول لأي سبب ، ولا بسمح لي حتى اشوف الزمن من خلالو ، الأولاد طبعا ولا بفكرو حتى يطلبو منو يديه لهم يلعبو به ، وصامت ٢٤ ساعه ، كتير كنت بفقدو بليل والقاه بتكلم بالتلفون ، بقول لي شغل ، انا ما كنت بصدق لأني ما مقصرة معاه وشايفه انو مستحيل يعاين لمرا غيري لحدي ما امي مره قبضتو بعمل مكالمة فيديو مع واحده ، كان في حالة صعبه شديد ما بتتخيلا ، وامي دي اتشاكلت معاه شكله كبيره ، انا جيت من الشغل لقيت الشكله فوق ، وهو ينكر ، لمن سألتا متأكدة من الشفتيه؟ ، قامت علي انا زاتي شاكلتني ، وقالت لي : انا ما طفله عشان تسأليني سؤال ذي دا !! ولو ما متأكدة ما كان سألتو ، ياخ لبس ملابسو في قدامي منتظره اكتر من كدا شنو دليل؟؟ ، اصلا انتي تستاهلي كل البحصل معاك
المهم زعلت شديد ومشت ، انا شكيت فيه من لحظتا لحدي م اتأكدت انو بخوني ومع مرا متزوجه !! راجلا مغترب ، بمشي لها
البيت !!!! اليوم داك طلعت كل الفي قلبي وطلبت الطلاق لأنو فاض بي ، يعني الحصل دا خلاني اشوف كل السؤ الفيه ، واعرف انو العلاقه دي وهميه ومافي لها اي اساس ، طلبت منو الطلاق فورا ، وهو طلقني لأنو خاف من الفضيحه ، وكان مصر يقعد معانا رغم الطلاق ، الا قمت عليه وطردتو ، لانو البيت بيت اولادي ، هو كمان ما صدق نسى كل مسؤولياتو ، قال لي انا بمشي انتي اقدري على اولادك ديل وربيهم براك ابقي لهم ام وأب ، انا ما مسؤول عنهم تاني ، منها تاني ما شفتو وكنت حامل بمهيلم ، باقي القصه انت عارفو
نزار كان ساكت ، رفعت راسي قلت له : م حتقول حاجه؟؟
: الحصل مقدر ومكتوب .
: انا بحمد ربنا على الحصل دا رغم السؤ الحسيتو ، لانو انكشف قدامي ، والا كنت عايشه في وهم لحدي اللحظة دي 😭😭😭
نزار كان بهديني بس ما علق ابدا ، حاساه ما راضي عن الحصل دا ، وفي الواقع هو انجرح ، حس اني لجئت له كحل لمشاكلي ، وانو كلام مدثر صح !!!!! انجرحت منو لأنو خاني ، واحتمال يكون شاكي انو لسه في مشاعر في قلبي تجاه مدثر ، ودا سبب عدوانيتي الشديدة !!!!!
جاء يوم المحكمه واتواجهنا كلنا قدام القاضي ، مدثر كان مبسوط ، ما عارف انو موقفو ضعيف شديد ، وبما انو الاولاد في سن الحضانه مستحيل ياخدهم .
المشكله انو حضانة هاني وشادن انسحبت مني واتنقلت لأمي ، لأنو هي البتجي بعدي في الاحقيه بما اني اتزوجت ، وهو الزموه بالنفقه عليهم الثلاثه .
غضب وقعد يجوط ويشاكل واول ما طلعنا هو قام مسك في نزار الا بعدوهم عن بعض ، وانا زعلت من نزار لانو كان هادي وما متأثر ، كأنو كان عارف الحايحصل وما مهتم .
انا طلعت زعلانه وسبقتو للبيت ، قعدت ابكي عشان ح ياخدو مني اولادي حتى لو لأمي ، اتصلت بمدثر نبزتو
: ان شاء الله انبسطت؟ هدا القانون حرمك منهم نهائي ، كنت فاكر انو حايدوك لهم يعني؟؟؟....يتبع♥️