رواية زين الفصل الثامن والعشرون 28 والتاسع والعشرون 29 بقلم سحر فرج
سميحه وسماح وشاهندا الكل كان بيعيط على اللحظه دى .. زين مقدرش يتحمل منظرها ده وخد بعضه على فوق وطلع على اوضته .
سماح قربت منها وخدتها فى حضنها واتفتحت اكتر فى العياط وقالت .. ااااه يا ليل يا حبيبتى .. ياما اتمنينا نشوف هدى تانى وربنا بعتك لينا تعوضينا حضنها وحنيتها .
امك يا ليل كانت حنينه اوى اوووى والكل بيحبها ... اتحرمنا منها سنين طويله وهى اكيد اتحرمت مننا .
شاهندا قربت منها وهى بتعيط وفتحت ايديها لى ليل وحضنتها وقالت .. ليل انا مش مصدقه ان بعد العمر ده كله يكون عندى بنت خالة جميله اوى كده ومن هنا ورايح هاتكونى اختى وحبيبتى .. وخدوا بعض بالحضن تانى .
زين اول لما طلع على اوضته بدأ يكسر فى كل حاجه اودامه لدرجه انه مسك ازازة برفان من بتوعه وحدفها بعزم ما فيه فى مرايه التسريحه اللى اتكسرت .. وافتكر ليل وهى بتقول .. يوسف خطيبى وبنحب بعض انا هو
وافتكر كمان صورهم هما الاتنين ونظراتهم لبعض .. وافتكر لحظه ما كان بيضرب فيه وهى نزلت وحاشت عنه وبقت تزق فى زين علشان يبعد عنه .
سميحه وكل اللى تحت اول لما سمعوا صوت التكسير الفظيع ده اتخضوا واترعبوا من شده الصوت ولسه سميحه هتاخد بعضها وتطلع بسرعه تشوف ايه اللى بيحصل فوق ده وتطمن على ابنها .. ليل مسكت ايديها وقالت .. سيبيه يا خالتو .. سبيه انا عارفه هو بيعمل كده ليه ومتقلقيش عليه وتعالى اقعدى وانا هاحكيلكم على كل شىء حصل من ساعه ما اختفيت .
وفعلا قعدت سميحه وهى مستغربه وقلقانه فى نفس الوقت على زين ابنها واللى بيعمله فوق ده وقعدت كمان سماح وشاهندا وبدأت ليل تحكى ليهم على التمثيليه اللى هى عملتها هى وحسام وعمر ويوسف على زين علشان تقدر تسترد كرامتها منه بعد ما جرحها ووجعها واهانها بكل قسوة .. وكمان علشان تحاول تغير فكرته عن البنات اللى واخدها من ساعه ما خطيبته سابته وهو فى عز احتياجه لها ومحنته .. وانها تحاول ترجع زين بتاع زمان اللى حسام حكلها عنه هو وعمر .. زين المتفائل المحب المسامح مش زين المتكبر المغرور .
سميحه ابتسمت وفرحت من كلام ليل لان ده اقوى دليل على ان ليل وزين بيحبوا بعض بالشكل الكبير ده.
هو علشان تكبره وغروره وكبريائه وفى نفس الوقت خوفه ان يدخل فى اى علاقه جديده مش قادر يعترف بالحب ده لى ليل .
وهى علشان بتحبه حب كبير عاوزة تغيره لزين القديم وتحاول تثبت ليه انها قويه وهاتنجح من غير مساندته ليها ورغم جرحه ومعايرته ليها.
فى الوقت ده عمر وحسام كانوا وصلوا وعيونهم على ليل وبيدوروا على زين .
حسام اول لما دخل قال .. مساء الخير عليكم جميعا ازيك يا طنط اومال فين زين مش شايفه يعنى ؟!
سميحه ردت وقالت .. اهلا يا حسام يا ابنى اتفضل يا حبيبى اقعد .. مع انى زعلانة اوى منك وكنت هاخصمك ومش هاكلمك تانى خالص بس فى نفس الوقت عاوزة اشكرك من كل قلبى على انك وقفت جنب ليل بنت اختى هدى وحافظت عليها وبتساعدها انت ووالدتك كمان .
حسام اتصدم وبص لى ليل باستفهام وليل شاورت براسها على انها حكت كل حاجه ليهم وحسام باحراج رد وقال .. انا اسف والله يا طنط سميحه .. احنا كنا مخبين علشان نقدر نكمل الخطه مضبوط وخفنا نقول ليكم على اى حاجه والخطه تتكشف وزين يعرف .
وبعدين مفيش شكر ما بينا .. ليل دى زى اختى بالضبط واكتر وبحاول انى اساعدها باى طريقه وزين كمان اخويا وصاحب عمرى ونفسى يرجع زى زين بتاع زمان اللى كلنا مفتقدينه .
المشكله بس فى كل اللى حصل ده يوسف الشريف والعلقه اللى خدها من زين من شويه .. ده متدشدش يا عينى وحاولت انا وعمر نعمله الاسعافات الأولية.
عمر قرب وقعد على ايد الكرسى اللى قاعده عليه شاهندا وميل برأسه ناحيتها وبكل شوق قال .. وحشنى يا قمر انت 😉
شاهندا اتحرجت وحاولت تقلب عليه وقالت.. بقولك ايه يا أخ انت .. لو سمحت من هنا ورايح مالكش دعوة بيا خالص ولا تكلمنى ولا لسانك يجى على لسانى .. انا مش بنت خالتك انت وليل وزين والمفروض تشركونى فى كل حاجه بتعملوها .. كده تختطوا وتتفقوا وتنفذوا كمان من غير ما اعرف .. وكنت بتختفى بالساعات الكام يوم الأخيرة دى ولما كنت اسألك تتحجج وتقولى شغل وعندى شغل كتير لا يا عمر انا بجد زعلانه منك انت بالذات اوى اوى .
عمر رد وقال .. بتقولى اووووى اوووى اووووووى 😉
شاهندا اتكسفت جدا وزقته من على أيد الكرسى بتاعها وقامت بعيد عنه وراحت قعدت جنب ليل .
سميحه بصتله بغيظ وقالت .. اتلم يا بلوة انت وملكش دعوة بيها ومتحرجهاش كده .. وانت اصبر بس عليا حسابك معايا بعدين يا عمر .. يا لى كنت عارف مكان ليل حبيبتى ومقولتليش انا وخالتك وخبيت علينا بس هاقول ايه غير واطى .. مع انك كنت شايف القلق اللى احنا كنا فيها اد ايه .
على العموم ناوين كده تكملوا الخطه دى لحد امتى .. زين فوق بيكسر فى كل حاجه تقابله .. والظاهر كدة والله اعلم كسر الاوضه واللى فيها كلها .. ولو استمريتوا اكتر من كده جايز يهد الفيلا دى فوق روسنا كلنا .
قولولى كده ناوين على ايه تانى .. وانتى يا ليل ناويه على ايه بالضبط بعد ما فجرتى قنبله خطوبتك من يوسف .
حسام وعمر اتصدموا اول لما سمعوا الكلام ده من سميحه .. وحسام بص لى ليل وقال .. ايه ده انتى خرجتى بره الخطه اللى حطينها من غير ما تعرفينا ولا ايه ؟؟
عمر بزهول بص لى ليل وقال .. ايه ده انتى اتخطبتى امتى انتى ويوسف يا بنتى انتى وازاى ما تخديش رأينا في كده 🤔
ليل بصتله بغيظ وقالت .. خطوبه ايه بس يا اخ انت ما تفوق كده .. انا اطريت اقوله كده لما شالنى غصب عنى وحطنى فى العربيه بالعافيه واستفزينى بالكلام وعلشان استفذه اكتر خطرت فى بالى الفكرة دى وقولتله إن انا ويوسف اتخطبنا وكمان بنحب بعض 🙄
عمر ازبهل 🙄 واتصدم وابتسم وقال .. الله يرحمك يا يوسف كنت راجل طيب .. ليل انتى ازاى تقولى لزين كده .. انتى مش شايفه عمل ايه فيه بس لمجرد انه عرف مكانك ومقلش ليه وانه عاوز يشغلك معاه .. ده كان هايموت فى ايده يا شيخه .. انتى مش عارفه احنا سايبين يوسف عامل ازاى ... انتى كده ذوتيها يا ليل ومكنش ليها لزوووم خالص موضوع الخطوبه ده زين مش بعيد يموت يوسف فيها 😟😔
حسام بصلها وقال .. عمر عنده حق يا ليل .. مكنش المفروض تشعليلى نار زين اكتر من كده .. زين فعلا مش بعيد يموت يوسف بجد علشان يستريح .. زين صاحبى من زمان وعارف هو زمانه دلوقتى بيفكر فى ايه وكويس انها جت على أد تكسير اوضته .
سماح بخوف وقلق ردت وقالت .. ربنا يستر وزين ما يتهورش اكتر من كده .. المهم يا جماعه ناوين على ايه ؟؟ وهاتعملوا ايه فى الحكايه دى ؟؟ وبتختطوا لايه الايام الجايه ؟؟
ليل ردت وقالت .. انا من بكرة هاروح احضر محاضرات فى كليه الاعلام علشان اكمل دراستى ودى كانت اهم حاجه بالنسبه ليا انى احققها .. يوسف كتر خيره بقاله كام يوم بيجرى فى الموضوع ده وكلم ناس كتير يعرفها والحمد لله قدر انه يقدم ليا هناك بشهاده الثانويه العامه بتاعتى ومجموعى الكبير.
سميحه فرحت اوى بالخبر ده وبصت لى ليل وقالت .. حلوة اوى الفكره دى وكويس ان زين بيدى محاضرات هناك علشان يخلى باله عليكى .
عمر ضحك بأعلى صوته وقال .. يخلى ايه بس يا حاجه .. ده ممكن لو شاف اى حد بيبص لى ليل او بيكلمها بس او بيسألها عن حاجه بخصوص المحاضرات يمسكه يضربه .
حسام قام وقف وقال .. ربنا يستر .. وبعد اذنكم بقى انا لازم امشى الوقت أتأخر اوى .. وسيبوا الايام الجايه هى اللى هاتعرفنا ايه اللى هايحصل .
حاولوا ما تحتكوش بزين خالص الفترة دى .. وبص لى ليل وقال .. والكلام ليكى انتى بالذات يا ليل حاولى تتجنبيه خالص .
عمر قام وقف وراح وصله لحد عربيته بره وشكره .. ولما مشى حسام بعربيته عمر خد بعضه ودخل على جوا .
وسميحه خدت ليل وطلعتها اوضه من الاوض اللى فوق كانت جنب اوضه زين على طووول وقالتلها انها من هنا ورايح دى هاتكون اوضتك ورغم اعتراض ليل انها تفضل معاهم فى نفس المكان وكانت عاوزة تقعد فى اوضه الجنينه .. لكن سميحه رفضت خالص الحكايه دى .
زين من كتر التكسير اللى كسره فى اوضته اترمى على سريره ونام على ضهره وفضل مركز بعيونه على السقف بيفكر فى كل اللى حصل معاه واتوجع اووووى لما افتكر ليل وهى بتقول انها بتحب يوسف واتخطبت ليه .
باب الاوضه اتفتح ودخلت سميحه واتصدمت اول لما شافت كميه الحاجات اللى اتكسرت فى الاوضه والازاز اللى مالى المكان فى كل حته .
فقربت من زين وقعدت جنبه على السرير وقالت .. ليه بس كل ده يا حبيبى .. ليل والحمد لله رجعت ولقيناها واطمنا عليها انها بخير وكمان هاتعيش معانا .
لزومه ايه كل اللى انت عملته ده .. فيك ايه بس يا ابنى قولى انا امك .. قولى وريحنى وريح نفسك يا زين يا حبيبى .
زين قعد وبص لامه واترمى فى حضنها زى الطفل الصغير وقال ... ااااااااه يا امى .
سميحه بكل وجع على حاله ابنها ضمته لحضنها وقالت .. مالك بس يا حبيبى فيك ايه طمنى .
زين بكل وجع وهو فى حضنها قال .. زين وحشنى اوى يا امى .. زين الطفل الصغير البرىء اللى مكنش شايل هم اى شىء ابدا .
وللاسف مقدرش كمان يعيش حياته زى اى شاب فى سنه .. ولما جه الوقت وفكر يعيش حياته ويحب ويتحب .. خد اكبر طعنه فى صدره من اكتر واحده حبها بصدق ومن ساعتها وهو مش قادر يرجع تانى زى الاول .
مش عاوز اكون زين اللى اتحمل المسؤليه من بدرى وشال شركه كبيرة بالحجم ده بعد موت ابوه .. مش عاوز اكون زين المتكبر المغرور اللى بيجرح ويوجع ومش عاوز ينجرح من حد .. هاتيلى زين يا امى .. هاتيلى زين ابنك .. هاااتيه ارجوكى .
فى اللحظه دى كانت سميحه هاتضعف وقلبها وجعها اوى على منظر زين والحاله اللى هو فيها بس هى كمان ام ونفسها ابنها بتاع زمان يرجع تانى ويملا الفيلا كلها ضحك وهزار ويرجع لطبيعته الحقيقيه اللى هى عرفاها .
مسكت نفسها بالعافيه وسكتت وطبطبت عليه وبصتله وقالت .. انت الوحيد اللى تقدر ترجعه يا حبيبى .. انت الوحيد اللى هاتحارب بعزم ما فيك علشان زين يرجع زى الاول واحسن كمان .
وقامت وبدأت تداوى جروحه وتطهرهم وطلبت منه انه يقوم يغير لبسه ده وياخد شور دافىء علشان يقدر يناااام .
__________________________________
طلع النهار والاسطى حسن كان وصل هو وأيه القاهرة علشان يعرفوا ايه اللى بيحصل ده وازاى ليل وصلت لكده وكانت مختفيه فين الفترة دى كلها .
سميحه وسماح كانوا صحيوا زى عاويدهم من بدرى وكانوا قاعدين فى التراس وسمعوا جرس الباب بيرن وميرفت راحت فتحت على طول ورحبت بيهم وراحت بلغت سميحه هانم بوصولهم .
وسميحه وسماح راحوا واستقبلوهم ورحبوا بيهم واتجمعوا كلهم وقعدوا فى الانتريه .
الاسطى حسن بتوتر وقلق بص لسميحه وقال .. طمنينى يا سميحه هانم قدرتوا توصلوا لى ليل او تعرفوا مكانها فين بالضبط وايه حكايه الصور بتاعتها اللى ماليه النت دى كلها والتلفزيون طمنونى لو سمحتوا انا هاتجنن من ساعه ما شوفت صورها ومنمتش طول الليل بسبب كده .
سميحه بدأت تهديه وتطمنه وبلغته هى كمان بكل اللى ليل بلغتها بيها وخلته اطمن .. مع انه كان مش مصدق كل اللى بيتقال ده .. بس فى الاخر فرح لما حس ان زين بيحب ليل واتاكيد من كل اللى بتعمله ليل ده انها كمان بتحبه زيه واكتر .
وأيه نفسها مكنتش متخيله ان حسام يبقى مشترك فى التمثيليه دى وفرحت اوى انه حاول يساعد ليل صحبتها اللى بتعتبرها زى اختها بالضبط وقدر كمان يقويها هو وعمر علشان تقدر تقوم من جديد بعد كلام زين الجارح ليها وحست انها فخورة بيه وكل شويه تتاكد ان اختيارها لحسام اختيار صح وراجل بمعنى الكلمه .. وكمان فرحت اوى ان ليل قلبها بدأ يدق لانسان بتحبه وبيحبها زى
زين الجبالى .
وفجاه وهما قاعدين بيتكلموا أيه لمحت ليل وهى نازله من فوق وجريت عليها وحضنتها وفضلوا يبوسوا فى بعض كتييير .
أيه بكل حب بصتلها بفرحه لا توصف وقالت .. ليل حبيبتى وحشتينى موووت .. كل الفترة دى يا ليل ومش قادرة تتصلى على اختك وطمنيها اخس عليكى اخس طلعتى اخت فشنك ونسيتينى .
ليل بفرحه لا توصف هى كمان اول لما شافتها قالت .. أيه حبيبتى ما تقوليش كده ابدا انا مقدرش انساكى ابدا .. انتى اختى يا أيه والله وبحبك جدا بس ....... وقبل ما تكمل كلامها سمعت الاسطى حسن وهو بيقول .. بنتى ليل وحشتينى اوى يا حبيبتى وقام وقف وفتح ايده الاتنين وليل اول ما عيونها جت عليه ما صدقت و جريت واترمت ما بين ايديه وحضنته وحست بحنيته وعطفه وطيبته وكأنه ابوها رجع ليها من جديد .
ليل بصوت كله حزن وفرح فى نفس الوقت ردت وقالت .. وحشتنى اوى يا عم حسن .. وحشنى صوتك وحنيتك .. انا حاسه ان بابا رجع تانى بطيبته وحنيته عليا .. ومسكت ايد عم حسن وراحت ناحيه خالتها سميحه وقالت بفرحه .. عم حسن اهو يا خالتو .. عم حسن الراجل الطيب الكريم الشهم اللى وقف جنبى وساعدنى كتير بعد موت بابا .. اللى لولاه مكنتش عارفه هاعمل ايه .. عم حسن صديق واخ لبابا الله يرحمه .. وكان بيحبه اوى اوى .
ومهما اقول واحكى عليه مش هاقدر اوفيه حقه .
عمر نازل من فوق وسامع صوت هيصه ودوشه واتفاجاه بعم حسن وأيه .. وفرح اوى وراح سلم عليهم ورحب بيهم .
سميحه قامت وطلبت من دادة زينب انهم يجهزوا الفطار علشان الكل يفطر .. وبعتت ميرفت عند زين فى اوضته علشان تبلغه بوصول عم حسن .
وفعلا طلعت ميرفت على طول لفوق وخبطت على باب اوضه زين لحد ما جه وفتح وقال .. عاوزة ايه يا ميرفت .
ميرفت اتصدمت لما عيونها جت على الازاز المكسر اللى فى الاوضه وقالت .. ست سميحه بعتتنى ابلغ حضرتك ان عم حسن هو وبنته أيه تحت والكل فى انتظارك .
زين اتفاجأه ورد وقال .. تمام انزلى انتى وانا هاحصلك .
وقفل الباب وكمل باقى لبسه ولبس القميص وحط برفانه وسرح شعره وفضل باصص على جزء مكسور فى المرايه بحزن شويه وبعدها فاق من شروده وخد نفس طوييييل و نزل على تحت .
واول لما نزل قرب من عم حسن وسلم عليه ورحب بيه ومد ايده كمان وسلم على أيه بنته وبارك لها على قرايه فاتحتها على صاحب عمره .
وكل ده وعيونه مجتش على ليل خالص وكان قاصد كده وليل خدت بالها انه بيهرب منها ومن عيونها .
حتى سميحه وسماح لاحظوا كده اوى .
وفضلوا يتكلموا شويه وكل ده وهو متجاهل ليل نهائى وفجاه ليل حبت تستفذه فابصت لعم حسن اللى كان عارف التمثيليه والخطه بتاعتها كويس اوى وقالت .. مش تباركلى يا عم حسن .. مش المنتح الكبير يوسف الشريف طلب ايدى وانا وافقت 😛 وهايجى يتقدم لخالتوا خلال يومين .
زين حاول يتمالك نفسه على اد ما يقدر وعمل نفسه وكأنه مش سامع حاجه خالص هى قالتها ولا حتى عيونه جت عليها .. وده استفذ ليل اكتر 😡 وهو كمل كلامه مع عم حسن .
فابصت لأيه وقالت .. مبروك يا أيه على خطوبتك .. دكتور حسام راجل محترم جدا وعرفت انكم قريتوا الفاتحه وكنتم منتظرين انكم تعرفوا مكانى وتوصلولى علشان تشتروا الشبكه وتعملوا حفله كبيرة بالمناسبه دى .. ايه رايك يا يويو يا حبيبتى نعمل حفله خطوبتى انا ويوسف وخطوبتك انتى وحسام فى يوم واحد يااااه هاتبقى حفله حلوة اوى وكل الفنانين اللى يعرفهم يوسف خطيبى هايكونوا موجودين .
فى اللحظه دى زين كان زى البركان لما ينفجر وبصلها بكل غيظ وتحدى 🤨 وحط رجل على رجل وقال .. اظن يا ليل هانم عرفتى انتى بقيتى من عيله مين كويس اوى .. وعيله كبيرة زى عيلتنا دى استحاله توافق على واحد زى يوسف .. وبعدين لو سياتك بتحبيه اوى كده زى ما انا شايف .. يجى يتقدم رسمى ويطلب ايدك منى ومن خلاتك الاتنين وساعتها نشوف ونقرر هو مناسب ليكى ولعيلتنا ولا لا 🤨🤨🤨
ليل اتعصبت وحاولت انها تتمالك نفسها اكتر من كده وبصتله بتحدى وابتسمت وقالت .. والله انا لسه قايله انه هايجى ويتقدم رسمى لخالتوا .. انا طوووول الليل بتكلم انا وهو على الموبيل لوش الصبح 😛 وكنت بطمن عليه بعد اللى سياتك عملته فيه امبارح وهو بلغنى انه هايجى ويتقدم خلال يومين .
وبعدين يا مستر زين انا عندى 23 سنه وانا اللى اقرر اتجوز مين ومتجوزش مين ومش مستنيه راى حضرتك فى كده .
عمر فى اللحظه دى انفجر من كتر الضحك لطريقه كلام زين وليل مع بعض ومن كتر الضحك مقدرش يسكت واعتذر وقام راح المطبخ وشاهندا راحت وراه .
وشويه ودادة زينب جت وبلغتهم ان السفره جاهزة والكل قام وسميحه قومت عم حسن وأيه بنته بالعافيه وكانوا رافضين خالص انهم يفطروا معاهم ولولا محايله سميحه وليل عليهم قاموا واتجمعوا كلهم على السفره .
زين اعتذر انه مش هايقدر يفطر معاهم بحجه ان معدته تعبانه شويه وكمان علشان عنده محاضرة فى الكليه ويادوبك هايجهز نفسه لها وطلب من دادة زينب انها تجبله القهوة بتاعته على اوضه المكتب.
الكل قعد وفطر الا ليل اللى كانت سرحانه وحزينه من كل اللى بيحصل ده بس فى نفس الوقت عاوزة تفوق زين وترجعه لنفسه وتعمل اللى عليها لاخر لحظه .
سماح خدت بالها ان ليل مش بتاكل اى شىء فبصتلها وقالت .. نحن هنا يا ست ليل مش بتكلى ليه .. وبعدين لو مش اد اللعب متلعبيش .. ولو بدأتى حاجه لازم تكمليها للاخر وتصبرى وتستحملى لحد ما تخلصيها وتفرحى بالنتيجه اللى وصلتلها .. زين مش هايتغير فى يوم وليله فاعلشان كده لازم تصبرى يا حبيبتى .
سميحه ابتسمت وقالت .. خالتك سماح عندها حق .. لازم تصبرى وتستحملى يا قلبى لحد ما يتغير زى ما كلنا عاوزين .
وبدات ليل تاكل وشويه وشافت ميرفت وهى مدخله فنجان القهوة لزين فقامت وقفت وابتسمت وقالت .. تسمحيلى يا خالتوا اروح اوديله القهوة بنفسى .
عمر اللى رد وقال .. يا لهوووى عليكى وعلى ايامك يا ليل يا بنت خالتى .. يا بت اتقلى مش عارفه تتقلى اسألى بنت خالتك القمر دى وهى هاتعرفك التقل على اوصوله 😉 دى استاذه فى كده و عندها حاجات حلوة اييييييييه رهيبه .
شاهندا ضربته فى كتفه والكل فضل يضحك
وسميحه ابتسمت وقالت .. روحى يا حبيبتى ووديله القهوة بنفسك ربنا يقويكى عليه ده ابنى وانا عرفاه كويس اوى .
وفعلا راحت ليل واخدت فنجان القهوة من ايد ميرفت وراحت لحد باب المكتب وخبطت وزين سمح للى بيخبط انه يدخل .. واول لما شاف ليل جايبه فنجان القهوة بنفسها سند ضهره على الكرسى واستغراب وبصلها من فوق لتحت وقال 🤨🤨🤨 ااااافندم .
ليل عملت نفسها بتتفرج على اوضه المكتب لانها اول مرة تدخلها وابتسمت وقالت .. حلوة اوضه مكتبك بس .....😏...... مش اد كده برضه.
اوضه يوسف احلى بكتير وفيها روووح والوان فاتحه وهاديه مش كلها غوامق كده .
هنا زين قام من مكانه ولف نفسه ووقف اودامها بكل غيظ وعيونه مركزه على عيونها وهى بدأت تقلق من نظرته دى جدا بالذات لما عيونه ركزت على شفايفها .. وفجأه شدها لحضنه وقرب من وشها اوى اوووى ولسه هايقرب اكتر ويبوسها من شفايفها .. فاقت ليل وزقته وبعدته بعيد عنها وخرجت بسرعه من الاوضه .
زين ابتسم وبينه وبين نفسه قال .. انا بقى هواريكى الفرق بينى وبين سى يوسف بتاعك ده من هنا ورايح يا ست ليل 😉😉😉
وفى لحظه ما خرجت ليل كانت شاهندا مقبلاها واستغربت منظرها ده ووقفتها وقالت .. فى ايه يا ليل وشكلك عامل كده ليه .. اوعى يكون زين قالك حاجه تزعلك .
ليل جسمها كان بيرجف واتنهدت جامد وابتسمت وقالت .. لااا لا يا حبيبتى متقلقيش تعالى نروح نقعد مع أيه علشان ميصحش تقعد لوحدها .
وفعلا خدوا بعض وقعدوا مع الباقى فى التراس يشربوا الشاى وشويه وزين جه واستأذن من عم حسن انه لازم يخرج دلوقتى علشان عنده محاضرة فى الكليه لازم يحضرها .. واتفق معاه انه هايجيب حسام معاه وهو راجع ويتغدوا كلهم مع بعض .
وكل ده وليل بتهرب من عيونه وبتحاول انها تنشغل مع أيه وشاهندا باى شىء .
وعلى طول خرج زين وركب عربيته وطول الطريق وهو بيفكر فى ليل وفى كل اللى بيحصل ومش متخيل ابدا ان ليل بالسهوله دى تروح ليوسف وتضيع منه .. وافتكر لحظه لما قرب منها فى اوضه المكتب وحاول يبوسها وهى زقته وجريت من اودامه .. وابتسم وقال .. لييييه يا ليل لييييييه . وشويه وكان وصل اودام بابا الكليه وركن عربيته ونزل بكل وقار وعيون الطلبه كلها عليه بكل حب واحترام .. وقابل بظروفها زميل ليه ووقفوا يتناقشوا شويه بخصوص المحاضرات .
__________________________________
يوسف كان لسه نايم فى اوضته من كتر التعب والارهاق والضرب اللى خده من زين وفجاه سمع صوت جرس الباب بيرن فافتح عيونه بالعافيه وقام من السرير وخد بعضه ونزل على تحت على طول وهو ماشى بالعافيه ومش قادر يحرك جسمه كله وراح ناحيه الباب وفتح واتفاجأه بالدكتور حسام واقف مبتسم اودامه .
حسام بضحك بصله وقال .. كنت متأكد انك لسه نايم من تأثير علقه امبارح .. علشان كده قولت اعدى عليك قبل ما اروح على المستشفى واشوف اخبارك ايه واطمن على جروحك .
يوسف بيبصله بعين مفتوحه وعين مقفوله وقال .. اضحك يا اخويا اضحك ما انا اللى اتحطيت فى وش المدفع بسببكم وانتم بعيد صح .. ومحدش فيكم نبهنى ان زين ايده تقيله اوى كده 😔 اتفضل ادخل .
حسام لسه بيضحك وقال .. فى دى عندك حق كنا المفروض نبهناك الاول .. بس يالا كله علشان خاطر ليل .
يوسف رد وقال.. ماشى ماشى اكيد هاتجربوا ايده قريب لما يكتشف التمثيليه دى كلها واننا كلنا شركاء فيها وساعتها هابقى اضحك عليكم زيك كده .
حسام بصله وقال .. ماشى وربنا يستر ساعتها يا باشا المهم اقعد يالا خلينى اطمن عليك وعلى الكدمات والجروح اللى فى وشك دى كلها علشان عندى عمليه كبيرة كمان ساعه .
وفعلا قعد يوسف وبدأ حسام يغيرله على الجروح والكدمات اللى فى وشه ولما خلص استأذن منه وخد بعضه ومشى .
ركب حسام عربيته وشويه وموبيله رن وكانت أيه خطيبته بتطمن عليه وبتبلغه انهم وصلوا عند سميحه هانم فى الفيلا من شويه وقاعدين مع ليل .
حسام رد وقال.. ايه ده معقول طب كويس لانك وحشانى اوى اوووى يا يويو .
أيه سكت من الخجل ومردتش وحسام حس بكده وقال .. ايه روحتى فين 😉
أيه بخجل ردت وقالت .. معاك يا حسام .
حسام رد وقال .. قلب حسام ❤ وعيون حسام 👁 بجد وحشتينى اوى يا أيه ولو مكنتيش جيتى النهارده كنت هاجيب بعضى واجيلك بكرة على البلد واقولك كلام كتييير اوى حاسس بيه ونفسى تسمعيه منى .
أيه اتكسفت وقالت .. وانا اهو معاك وسمعاك قولى بقى كنت عاوز تقولى ايه يا حسام ☺
حسام ابتسم ورد وقال .. عاوز اقولك انى بحبك اوى اووووى اوووى .. ونفسى اغمض عينى وافتحها اشوفك جنبى وفى حضنى وبين ايديا .. نفسى بجد يا أيه نتجوز بقى وتفضلى معايا على طول فى كل وقت وفى كل لحظه تمر من عمرى .
أيه فرحت اوى من كلام حسام بس كانت مكسوفه ترد عليه وسكتت .
حسام رد وقال .. أيه روحتى فين .
أيه ردت وقالت.. معاك يا حسام .
حسام رد وقال.. حسام بس كده .. نفسى اسمعها منك يا حبيبتى .
أيه ردت وقالت.. مكسوفه مش هاقدر .
حسام وقف العربيه فجأه وقال .. مش هاتحرك بالعربيه غير لما اسمعها منك يا أيه قولتى ايه 🤨🤨🤨
أيه حاولت تجمع نفسها وتبطل خجل وردت وقالت .. بحبك يا حساااااام .
حسام فرح اوى ان اول مرة أيه تعترف ليه بحبها ده وكان يتمنى تكون اودامه فى اللحظه دى ويضمها جوه صدره ويدخلها جوه ضلوعه .
زين بعد ما خلص كلامه مع زميله دخل مكتبه وقعد شويه يقرأ فى كتاب عقبال ما ميعاد المحاضره يجى اللى كان فاضل عليها حوالى ربع ساعه وشويه وبص فى ساعته وقام وقف على طول لما اكتشف ان ميعادها جه وخد شنتطه وفتح باب مكتبه علشان يروح على قاعه المحاضرة .. واول لما دخل شاف مجموعه كبيرة من الطلبه واقفين وعاملين هيصه ودوشه واستغرب جدا .
فقرب منهم علشان يعرف سبب تجمعهم ده ايه واتصدم اول لما عيونه جت على ......................
يا ترى فى ايه ؟؟ وحصل ايه ؟؟ وايه سبب وقفة الطلبه بالمنظر ده ؟؟
روايه_زين
سحر فرج
روايه_زين
الفصل التاسع والعشرون
بقلم_سحر_فرج
أيه حاولت تجمع نفسها وتبطل خجل وردت وقالت .. بحبك يا حساااااام .
حسام فرح اوى ان اول مرة أيه تعترف ليه بحبها ده وكان يتمنى تكون اودامه فى اللحظه دى ويضمها جوه صدره ويدخلها جوه ضلوعه .
زين بعد ما خلص كلامه مع زميله دخل مكتبه وقعد شويه يقرأ فى كتاب عقبال ما ميعاد المحاضره يجى اللى كان فاضل عليه ربع ساعه وشويه وبص فى ساعته وقام وقف على طول لما اكتشف ان ميعادها جه وخد شنتطه وفتح باب مكتبه علشان يروح على قاعه المحاضرة .. واول لما دخل القاعه شاف مجموعه كبيرة من الطلبه واقفين وعاملين هيصه ودوشه واستغرب جدا .
فقرب منهم باستغراب علشان يعرف سبب تجمعهم ده ايه واتصدم اول لما عيونه جت على ......................
ليييييل !!!!
ليل خدت بالها انه دخل وكملت اللى كانت بتعمله ووقفت تهزر وتضحك مع كل الطلبه اللى واقفين حواليها والشباب كلهم واقفين هايتجننوا ويتصوروا معاها وهى مش مركزه معاهم من ساعه ما شافت زين .
زين بصدمه قرب من التربيزة اللى فى وسط القاعه وحط شنتطه وقال بكل عصبيه وصوت عالى هز المدرج كله .. ايه التهريج اللى بيحصل هنااااااا ده 😠😡😠
الطلبه جريوا على اماكنهم اول لما سمعوا صوت زين وهو عيونه مركزه على ليل اللى فضلت واقفه مكانها متحركتش من مكانها وعيونها فى عيونه بكل ثقه .
زين نزل من مكانه وراح وقف اودامها وعيونه مركزه فى عيونها بكل عصبيه و غضب واستغراب بصلها وقال .. ممكن اعرف سياتك بتعملى هنا ايه بالضبط 😠 وازاى اصلا دخلتى من باب الكليه !! وبصفتك أيه 😠
ليل واقغه بكل تحدى وشموخ وابتسمت وبنظره كلها ثقه فى نفسها بصتله وقالت .. انا هنا علشان احضر المحاضرة بتاعه سياتك .. ودخلت من باب الكليه بالكارنيه بتاعى ده .
وبصفتى انى طالبه هنا مع حضرتك فى القسم ده 🙄
زين واقف مصدوم من كلام ليل وكل عيون الطلبه عليهم وبالذات شاهى اللى كانت قاعده هاتفرقع من ساعه ما وصلت ودخلت المدرج واتصدمت لما شافت ليل فى المدرج والكل ملموم حواليها وفضلت قاعده بتاكل فى نفسها ومش طايقه اى حد من زمايلها يكلمها .
لان عمرها ما تخيلت ان ليل توصل لكده علشان تقرب من زين وبمساعده مين 🤨 عمها يوسف بنفسه .
زين لاول مرة فى حياته يحس ان ضعيف ويحس انه مش قادر يتكلم ولا يتصرف ولا قادر حتى يفكر او يرد بكلمه .. فخد نفس طويييل وبص لى ليل بكل غيظ و تحدى 🤨 وقال .. اتفضلى تعالى ورايا على مكتبى .
وخد بعضه وخرج من المدرج باقصى سرعه وليل ابتسمت ابتسامه النصر وعيونها جت على شاهى بتحاول تستفذها وخدت بعضها وراحت وراه .
زين اول لما دخل مكتبه راح وقف ناحيه الشباك اللى فى الاوضه بكل عصبيه وغضب وكان مدى ضهره لى ليل اللى دخلت وراه على طول واول لما هو حس بيها وبدخولها قال .. اقفلى الباب وراكى .
ليل بدأت تخاف من نبرة صوته وراحت قفلت الباب ورجعت بكل هدوء ووقفت مكانها وكل ده وهو مديها ضهرة وفجأه كور كف ايده وخبطه بعزم ما فيه فى الحيطه 👊 وبعدها لف نفسه وعيونه كانت بطلع شرار وده اللى خلى ليل تترعب اكتر واكتر لانها اول مرة تشوفه بالمنظر والحاله دى .
زين قرب منها وبصلها وقال بصوت عالى .. الكلام اللى انا سمعته ده مضبوط .
ليل حاولت تتغلب على خوفها وشجعت نفسها وقالت .. اه مضبوط عندك اى ماااانع 😏
زين بغضب رد وقال .. ازاى وامتى حصل الكلام ده .. ومين اصلا اللى ساعدك فى كده ؟ وعملتى كل ده امتى 😡
ليل ردت وقالت .. حصل من حوالى عشر ايام لما قدمت اوراقى وشهادة الثانويه العامه بتاعتى .. ومجموعى الكبير كان شفيع ليا انهم يقبلونى وكمان يوسف ساعدنى كتير وكلم ناس كبيرة وتقيله فى الوزاره يعرفهم وعلشان كده قبلونى .
زين جز على اسنانه وبكل غيظ وصوت هز الجامعه كلها بصلها وقال .. يوسف يووسف يوووسف 😠😡😠 كل حاجه دلوقتى بقت من يوسف .. هو اللى بيخطط لحياتك ومستقبلك .. هو اللى بيساعدك فى كل شىء هو اللى بيقولك تعملى ايه ومتعمليش ايه .. هو اللى بقيتى بتلبسى على مزاجه وراحته 😠 لامتى يا ليل هاتفضلى كدة تحت طوعه .. وقرب منها ومد ايده ومسكها من دراعها اوى اوووى لدرجه ان ايديها وجعتها وبدأت تألمها من شده المسكه والعصبيه اللى هو فيها وكمل كلامه وقال ..
لامتى هاتفضلى كدة مش حاسه ب.............
؟؟؟؟؟؟؟؟
وسكت اول لما شاف عيونها اتملت بالدموع وغصب عنه زق دراعها لبعيد عنه ولف وشه الناحيه التانيه وهى حاولت تسيطر على نفسها ومتعيطش علشان ما تضعفش وبكل حزن ووجع اتشجعت وقالت .. مين قال ان يوسف اللى بيخطط ويحدد لكل شىء انا بعمله .
عاوزة ايه ومش عاوزة ايه .. اعمل ايه ومعملش ايه البس ايه وما البسس ايه
اناااا انااا .
انا يا زين يا جبالى اللى عاوزه احقق احلامى وامالى وطموحاتى اللى اتحرمت منها زمان
انا اللى نفسى امحى الماضى بحلوه وبمره واحقق حلمى وهدفى ومستقبلى .
انا اللى كنت بستحمل الذل والاهانه والمرمطه من سعاد مرات ابويا لما كانت بتشوفنى فاتحه كتاب وبزاكر علشان الإمتحانات اللى قربت .
انا اللى كنت بصحى من بعد الفجر واروح اشتغل فى الكشك بدل ابويا علشان صحته اللى بقت فى النازل من ساعه ما اتجوز العقربه سعاد واقف على رجلى طول النهار والليل فى عز البرد وعز التلج علشان اقدر الاقى اى فرصه وازاكر فيها ليله الامتحان وانا فى الكشك وبعيد عن ذل مرات ابويا المستمر ليا .
انا اللى شربت المر بعد موت امى واتمرمت واتعذبت بكل انواع التعذيب على ايديها وكنت بسكت وبستحمل علشان خاطر ابويا ميزعلش ولا يحس انى زعلانه او حزينه .
وكنت بستحمل كمان نظرات الحيوان اخوها ليا غصب عنى برضه علشان خاطر ابويا 😥
وبصوت كله وجع قالت .. انا يا زين اللى كنت بنام من غير ما آكل ولا شرب وكنت ببقى ميته من الجوع وانا راجعه مهدوده من شغل الكشك نصف الليل ومرات ابويا تقولى بمنتهى الوقاحه مفيش أكل نامى خفيف احسن .
اناااااا 😔😔😔 انا للاسف كنت ولا حاجه والدنيا جت عليا اوى اووووى لحد ما تعبت
😔😔😔
حتى انت يا زين مرحمتنيش وجيت عليا زيهم كلهم من غير اى رحمه ومن غير ما تسمع منى الحقيقه ولا خلتنى ادافع عن نفسى لما دخلت عندى ولقيت يوسف معايا .. وجرحتنى ووجعتنى بكلامك واهنتنى وعايرتنى بأهلى وبعيلتى وضحكت بسخريه وقالت .. وللاسف اللى طلعت فى الاخر عيلتك واهلك 😔 وفى الاخر قولت دى واحده جبتها من الشارع
💔💔💔
كل ده وزين واقف قلبه بيتقطع من كلامها ونفسه يشدها وياخدها فى حضنه ويقولها انا بحبك يا ليل .. انا بعشقك .. سامحينى 😔
سامحينى على كل حاجه انتى مريتى بيها بس للاسف غروره وكبريائه مسمحوش ليه يعمل كده .
وآخر ما تعبت ليل وفقدت الامل منه راحت وقربت منه ووقفت اودامه ومسحت دموعها وقالت .. انا من هنا ورايح هاعمل كل اللى كنت بحلم بيه وبتمناه ومفيش مخلوق هايقدر يمعنى على وجه الارض وكفايه اوى اللى انا عيشته وحسيته ومريت بيه .. هاشق طريقى بنفسى وهاكمل كليتى وهانجح وهاتفوق من غير حتى مساعده يوسف نفسه ليا .
وابتسمت ابتسامه وجع وقالت .. عن اذنك ياااا دكتور زين وكفايه اوى كده لحد هنا زمان الطلبه بتوعك فى انتظارك .. بعد اذنك 😔
وخدت بعضها ورجعت على المدرج وقعدت وسط الطلبه وعيون شاهى عليها وانتظرت زين يدخل وراها بس للاسف مدخلش و دخل زميل ليه واعتذر بدل زين عن عدم حضوره الوقت الحالى وبلغهم ان هو اللى هايشرح لهم المحاضرة بداله .
زين خد بعضه وخرج من المبنى كله وكل اللى كانوا حواليه كانوا بيتكلموا عن الوجه الجديد اللى اكتشفه يوسف الشريف وكمان عن وجودها هنا كطالبه جوا الكليه معاهم وده اللى جننه اكتر .. وراح ركب عربيته بمنتهى العصبيه وطلع بيها باقصى سرعه .
وفضل يلف فى الشوارع مش عارف رايح فين ولا جاى منين لحد ما بعد فترة وقف بالعربيه على كورنيش النيل وركن ونزل وراح وقف ناحيه المايه وفضل يتأمل فيها لاكتر من ساعتين وهو واقف بالمنظر ده بيفكر فى كل شىء هو مر بيه فى حياته وكأنه شريط اودام عيونه .. لحد ما تعب وقرر انه يمشى وفعلا راح وركب العربيه من تانى وراح بيها على مستشفى حسام صاحبه وطلع ليه مكتبه على طول لما حس ان هو الوحيد اللى محتاج يقعد ويتكلم معاه .
بس للاسف دخل لحسام مكتبه ولما ملقهوش سأل عليه الممرضه وبلغته ان حسام لسه مخرجتش من اوضه العمليات واودامه حوالى نصف ساعه فارجع لمكتبه تانى وفضل قاعد مستنيه ومن كتر زهقه مسك موبيله وفتح الفيس بوك وشاف كميه صور كتيرة اوى لى ليل هى ويوسف ورأى الناس فيها وفى جمالها وفى رقتها وأناقتها وكان هاين عليه يمسك الموبيل ويكسره فى الارض .
وقام وقف وفضل رايح جاى فى قلب المكتب لحد ما دخل حسام عليه وشاف منظره ده وخاف لا يكون عرف ان شريك فى التمثيليه بتاعه ليل عليه .
حسام بتوتر وقلق بصله وابتسم وقال .. اهلا يا زين ايه المفاجأه الحلوة دى اقعد واقف كده ليه .
زين بعصبيه بصله وقال.. مش هاقعد غير لبسك ده الاول وابقى حصلنى على تحت ولما تنزل نبقى نكمل كلامنا سلام .
وفعلا زين خد بعضه وخرج من مكتب حسام اللى كان واقف مرعوب لا تكون خطتهم انكشفت وزين عرف بيها .
وبعد عشر دقايق كان نزل لزين وزين شاورله بأيده انه يحصله وطلع بعربيته وحسام ركب عربيته هو كمان وطلع وراه على طول .
ليل كانت خلصت المحاضرة الاولى ليها ولمت حاجتها وخدت شنتطها بس بعض الطلبه وقفوها وحبوا يتصوروا معاها وهى اعتذرت ليهم ولسه هاتخرج من باب المدرج لقت اللى بتشدها من ايديها فجاه .
ليل لفت نفسها واتفاجأت بشاهى اودامها وباستغراب ليل قالت .. خير يا شاهى عاوزة حاجه ؟!
شاهى اودام الطلبه كلهم بصتلها من فوق لتحت وبكل غيظ قالت .. انتى عاوزة ايه من زين بالضبط يا ست ليل 🤨 عماله تلفى وتدورى وتروحى كل مكان يروحه .. اوعى تفكرى يا شاطرة ان واحد زى زين الجبالى ممكن يبص لواحده زيك انتى .. اوعى تفكرى بالهبل اللى انتى بتعمليه مع عمو يوسف ده هاتخليه يفكر فيكى تبقى عبيطه اوى .. زين الجبالى وقت ما يفكر يحب ويتجوز هايحب واحده من مقامه ومن وسطه هو علشان تليق بيه .. مش واحده ملهاش لا اصل ولا فصل .
ليل رغم الوجع اللى جواها واحراج شاهى ليها اودام الطلبه حبت تغيظ شاهى وتستفذها فاضحكت اوى وقالت .. هو انتى متعرفيش ان زين الجبالى ابن خالتى على طول .. ياااا حرام تصدقى صعبتى عليا اوى .. وبصت فى ساعتها وقالت .. اااااخ باى باااى يا شوشو بقى علشان زمان خالتوا سميحه وزين مستنينى على ناااااار علشان نتغدى كلنا مع بعضنا باااااى 😛😛😛 اااه ونسيت اقولك .. شكرا على وقعه البيسين اللى خلتنى اعرف زين بيحبنى وبيخاف عليا اد ايه 😉
باااااااى .
ومشيت ليل وهى حاسه بالفوز على شاهى وانها قدرت تحرق دمها وتستفذها كمان وبعدها خرجت من الكليه بكل فخر وثقه بنفسها ووقفت تاكسى ورجعت على الفيلا على طول .
وشاهى من غيظها وكسفتها اودام كل الطلبه خرجت من غير ما تنطق اى كلمه مع حتى اصحابها وركبت عربيتها بكل نرفزة وراحت على فيلت عمها يوسف .
__________________________________
زين كان وصل اودام كافيه على النيل وركن عربيته ونزل وحسام كان وراه على طول وركن هو كمان ونزلوا وحسام اتفاجأه انه نفس الكافيه اللى ليل كانت شغاله فيه واستغرب جدا جدا وحس ان زين ممكن يكون عرف حاجه عن خطتهم اللى عملوها عليه .
زين خد باله ان حسام مش على بعضه فبصله باستغراب وقال .. فى حاجه ولا ايه ؟؟
حسام بتوتر ابتسم ورد وقال.. لا ابدا بس مستغرب الكافيه ده شويه اول مرة اجى فيه .
زين رد وقال .. اى حاجه وخلاص يا حسام اصلى زهقان اوى وعاوز اقعد معاك ونتكلم شويه .
حسام رد وقال.. طيب ما تيجى نروح على شقتى وبالمرة نتغدى مع بعضنا ونتكلم براحتنا بدل الكافيه ده .
وقبل ما زين وحسام يدخلوا الكافيه زين افتكر وقال .. ااااااخ كنت هانسى وكويس انك فكرتنى بحكايه الغدا ده .. نسيت اقولك ان حماك عم حسن وأيه خطيبتك عندنا فى الفيلا من الصبح جايين يطمنوا على ليل ومنتظرينا على الغداء انا وانت زى ما وعتهم انى هاجيبك معايا بعد ما اخلص شغلى ونتغدى كلنا مع بعض .
حسام علشان ميخلهوش يدخل الكافيه بصله وقال .. طب كويس انى فكرتك ويالا بينا بقى من هنا وتعالى نروح لهم زمانهم منتظرين وبينى وبينك كده أيه وحشتنى اوى .
زين مستغرب حسام جدا بس من كتر القلق والوجع اللى هو فيه قاله يالا بينا وفعلا ميصحش نتأخر عليهم اكتر من كده ونبقى نتكلم فى وقت تانى .
حسام خد نفس طويل علشان زين لغى فكرة الكافيه دى وخدوا بعضهم هما الاتنين وزين راح ركب عربيته وحسام لسه هايركب عربيته سمع اللى بينده عليه وبيقول .. استاذ حساااام .
حسام التفت على مصدر الصوت وشاف زميله ليل فى الكافيه اللى اتعرف عليها ساعه ما جه خد ليل .. وعيونه بسرعه جت على زين اللى كان فى عربيته وخاف انه يشوفها معاه فابتسم بكل قلق وتوتر لعايده وقال .. اهلا وسهلا ازي حضرتك .
عايده ابتسمت وردت وقالت .. ازى حضرتك يا استاذ حسام وازى ليل دلوقتى .. انا قولت انك مش هاتفتكرنى انا شوفتك بظروفها وانا داخله الكافيه وشبهت عليك وافتكرتك على طول انك اخو ليل .
حسام عيونه ما بين عايده وما بين زين وبكل قلق رد وقال .. الحمد لله بخير وليل كويسه واسف اصل معايا صاحبى ومستعجلين شويه بعد اذنك .
وفى ثانيه حسام كان رايح ناحيه عربيته وركب وقفل الباب وعايده بصوت عالى قالتله .. سلامى لى ليل .
حسام اترعب لا يكون زين سمعها وبسرعه كان متحرك بالعربيه وطالع على طول بيها ..وزين وراه .
واول لما وصلوا اودام باب الفيلا وركنوا عربياتهم ونزلوا زين باستغراب بصله وقال .. مين الست اللى كنت واقف معاها عند الكافيه دى 🤔 وسمعتها بتقولك سلملى على ليل ؟!
حسام بتوتر بصله وقال .. ابدا ابدا دى كانت مريضه عندى فى المستشفى وقابلتها بظروفها زى ما انت شوفت كده .
زين رد وقال .. وهى تعرف ليل منين ؟؟
حسام رد وقال .. كانوا قابلوا بعض بظروفها ايام ما كانت ليل محجوزة عندى فى المستشفى واتعرفوا على بعض .
وخد بعضه بسرعه ودخل على جوا قبل ما زين يسأله عن اى حاجه تانى.
زين مش مستوعب كلامه اوى واتنهد وخد بعضه ودخل ورا حسام .
واول لما دخلوا الكل رحب بيهم وحسام سلم على عم حسن وكمان أيه اللى فرحت اوى اول لما شافته .
زين بص لعم حسن وقال .. اسف يا عم حسن واعذرنى انى مقدرتش اقضى اليوم معاك .
كان عندى شغل مهم خلصته حتى ماروحتش الشركه النهارده وعديت على حسام فى المستشفى وجيبته وجيت .
حسن بكل طيبه ابتسم وقال .. يا ابنى انا اللى اسف انى معطلكم عن شغلكم انتم الاتنين . انت من شركتك ومحاضراتك وحسام من المستشفى .. انا كنت جاى اطمن على ليل واخد بعضى وارجع على البلد على طول علشان اشوف شغلى انا كمان .
سميحه ردت وقالت .. كلام ايه ده بس يا راجل يا طيب بقى معقول تشرفنا لاول مرة فى بيتنا ومانعملش معاك الواجب الصح وتقضى معانا اليوم ده مش كفايه كل اللى انت عملته ولسه بتعمله مع ليل .
ولا انت بخيل بقى ومش عاوزنا نيجى نقضى كام يوم عندكم فى البلد .
حسن رد وقال .. ابدا والله ده انا اشيلكم فى راسى من فوق وتيجوا طبعا وتنورونى .. وبعدين ليل دى بنتى ومفيش حد بيشكر أب على اللى بيعمله مع عياله .
سميحه ردت وقالت.. ربنا يديك الصحه ويخليك ليهم وتفرح قريب بأيه ودكتور حسام وعقبال بنتك عبير يارب .
حسام ابتسم ورد وقال.. اه والنبى يا طنط عاوزين نفرح بقى ونحدد ميعاد خطوبتنا .. او اقولك نخليها فرح على طول .. ليل الحمد لله واطمنا عليها نستنى ايه تانى بقى يا عم حسن .
أيه اتكسفت جدا ووشها احمر وحسام ابتسم لها وغمز بعيونه .
وفجاه ليل كانت وصلت والكل اتفاجأه بيها وردت هى على حسام وقالت .. عندك حق يا حسام نخليها فرح على طول .. فرحك انت وايه وفرحى انا ويوسف 🤨
الكل اتصدم من كلام ليل واللى قالته وزين بصلها بكل غضب وقام وقف واستاذن من عم حسن انه هايطلع يغير لبسه وخد بعضه وطلع على فوق على طووووول .
علشان حس لو قعد لحظه تانيه ممكن يرتكب اى جريمه .
عم حسن بعتاب ولوم بص لى ليل وقال .. ليه بس كده يا بنتى .. حرام عليكى .. وكفايه اوى اللى هو مر بيه .. بلاش تزوديها يا ليل يا بنتى اكتر من كده علشان لو زادت اوى ربنا اعلم هاتنتهى ازاى .
سميحه صعب عليها ابنها مهما كان وردت وقالت .. عم حسن عنده حق يا ليل كفايه يا بنتى لحد هنا ..انا وانتى متأكدين ان زين بيحبك وانتى كمان بتحبيه يبقى ايه لزمته بقى العذاب ووجع القلب اللى انتم فيه ده .
حسام رد وقال .. الصراحه يا ليل طنط وعمى حسن عندهم حق .. لو كنتى شوفتى منظر زين لما جالى المستشفى من شويه كان صعب عليكى اوى .. كفايه كده يا ليل واقعدى معاه واعترفى ليه بكل حاجه وصارحوا بعض وداوو جروح بعض .
ليل بوجع ردت وقالت.. انتم مفكرين ان اللى انا فيه ده انا وهو شىء سهل عليا للاسف لا .. انا بتوجع كل لحظه وكل دقيقه لما اشوف زين اودامى بالحاله دى 😔 ببقى نفسى اترمى فى حضنه واقوله خبينى جوا ضلوعك واحمينى ببقى نفسى بأعلى صوتى اقوله بحبك يا زين .. ببقى نفسى اقوله انت الأمان اللى انا مفتقداه انت السند انت العوض يا زين 😥 بس للاسف لما افتكر كل الكلام اللى قاله وجرحنى وطعنى بيه اشيل الفكرة دى من عقلى .
كل لما اشوف غروره وكبريائه فى عيونه وفى تصرفاته مقدرش اتراجع عن اللى ابتديت اعمله ومش هاوقفه غير لما الاقى زين اللى كلنا عاوزينه .
سميحه قامت وقفت وخدتها فى حضنها وقالت .. سامحينى يا بنتى ده مهما كان ابنى وانتى كمان بقيتى بنتى ومش قادره اشوف حد فيكم بيتعذب وانا مش قادرة اعمله حاجه .
ليل بوجع ابتسمت وردت وقالت.. متقلقيش علينا يا خالتوا .. لازم نداوى جروحنا الاول علشان نعرف نبدا من جديد .
سماح قامت وقفت وندهت على دادة زينب انها تجهز السفره وفعلا زينب دخلت على طول وبدأت تجهز الاكل وليل وأيه وشاهندا دخلوا يساعدوها وينظموا الاطباق على السفره بنفسهم .
عمر كان يادوبك بيركن فى عربيته وكان راح الشركه ورجع .. ودخل على جوا على طول وكان جايب معاه شويه حلويات وتورته كمان وسلم على كل الموجودين ودخل على المطبخ علشان يدخل الحلويات .
شاهندا ابتسمت اول لما شافته وخدت منه الحاجه وهو بخباسه خلاها بتشوف الحلويات والتورته قرب منها واداها بوسه سريعه فى خدها وقال .. وحشتينى يا روح قلبى .
شاهندا اتفاجأت باللى هو عمله وبدات تضرب فيه بهزار .. وللاسف ليل وأيه كانوا داخلين بظروفها المطبخ وشافوه .
ليل حبت تهدده وتهزر شويه معاهم فقالت .. يا نهارك ابيض يا عمر ايه اللى انت عملته ده .. انا هاروح انادى على خالتوا سماح واقولها على انت عملته دلوقتى ده .. 😉ايه رايك يا شاهندا .
شاهندا فهمت ليل وقالت .. روحى يا ليل اصله بقى قليل الادب اوى .
عمر بصدمه عاااااااااااا 🙄🙄🙄 بصلهم وبيمثل الخوف وقال .. يا لهووووى يا دى الفضيحه استروا عليا وحيات امك انتى وهى .. يا فضيحتك يا عمر يا ابن سميحه 🙈🙈🙈 ومن خباسته قرب بسرعه من شاهندا تانى واداها بوسه تانيه على خدها التانى وقال .. متنسيش بقى يا ست ليل تقوللها على دى كمان سلام يا قطه منك ليها ليها لييييييييها 😉😉😉
وخد بعضه وخرج من المطبخ والبنات اتفتحوا فى هستيريا من الضحك وخرجوا يكملوا باقى الاطباق على السفره وبعد ما كل حاجه جهزت ندهوا الكل واتجمعوا على السفره الا زين كان لسه منزلش من فوق .
ليل ابتسمت لسميحه بنظرة وسميحه فهمت هى عاوزة تعمل ايه وشاورت ليها بالتمام .
ليل خدت بعضها وطلعت على فوق وراحت لحد اوضه زين وخبتط وهو مردش فارجعت وخبتط تانى وبرضه مردش فافتحت الباب بشويش ودخلت ودورت بعيونها فى كل ركن من أركان الاوضه وملقتش زين بس لقت صوت الدوش فى الحمام وعرفت انه بياخد دوش لسه .
عيونها جت على قميصه اللى كان لابسه محطوط على السرير فقربت منه ومدت ايديها ومسكته بكل شوق وعشق وقربته من وشها وبدأت تشم ريحته وتتعمق فيها وفى ريحه برفانه الرهيبه وقربته من شفايفها وباسته بشووووويش وغمضت عيونها وسرحت وللاسف زين كان فتح باب الحمام وخرج وهى محستش بيه خالص وكان يادوبك لافف نفسه بالبشكير من تحت وصدره مكشوف واتفاجأه لما شاف ليل وهى فى وسط اوضته وماسكه قميصه ومقرباه ناحيه شفايفها فابتسم وقرب بهدوء منها ومد ايده على وسطها ولفها ليه وقال .. للدرجه دى قميصى عجبك 😉
ليل اتصدمت 😲 اول لما حست بأيد زين على جسمها واتصدمت اكتر لما شافته بالمنظر ده وصدره كله عريان وحاولت تشد نفسها من ايده بس للاسف زين ما صدق ومسكها كده وقربها اكتر منه ولصدره المكشوف وغصب عنها ايديها جت على صدره علشان تذقه بعيد عنها بس هو كارجل اشد واقوى منها ومسكها اوى وكل شويه يقربها اكتر .
ليل بخوف ورعب بصتله وقالت .. سيبنى يا زين سيبنى بقى .
زين ابتسم وضمها ليه اكتر وقال .. انتى بتعملى كده ليه ليل انا .......... وسكت .
ليل ذقته وبعدت عنه وقالت .. ممكن تبعد عنى وتخلينى انزل لتحت زمانهم مستنينا ننزل وهايستغربوا التاخير ده .
زين بدأ يقرب وهى تبعد وهو يقرب وهى تبعد لحد ما وصلت وبقى ضهرها للدولاب ومقدرتش تتحرك وبدا جسمها يرجف من الخجل والخوف .
زين حس بيها وبخوفها فقرب منها ومد ايده الاتنين لفوق وحطها على الدولاب وبقت هى اودامه ما بين ايديه على طول وشه فى وشها وصدره على جسمها وحس بنبضات قلبها وعيونه فى عيونها بكل شووووق ولسه هايقرب من شفايفها ويبوسها
سمعوا صوت عمر وهو بيقول ..
احم احم احم .
نحن هنا نحن هنااااا يادى الفضيحه يا دى الفضيحه .. الكل فى انتظاركم تحت يا بهوات 😉
ليل اتكسفت جدا جدا وذقت زين بعيد عنها وذقت كمان عمر اللى كان واقف على الباب وساند عليه لدرجه انه كان هايقع على الارض وخدت بعضها بسرعه ونزلت على تحت على طول .
زين بعصبيه قرب من عمر وعمر حس بنظراته وقال .. والله ماليش دعوة امك اللى قالتلى اطلع انده لكم وفى ثانيه كان واخد نفسه وجارى على تحت 🏃♂️🏃♂️🏃♂️🏃♂️
زين ابتسم ومد ايده على صدره مكان ما ليل حطت ايديها وخد نفس طويل وبدأ يكمل لبسه بسرعه وبعد ما خلص خد بعضه ونزل على تحت على طوووول .
وعيونه مركزه على ليل اللى كانت باصه فى طبقها ومش بترفع عنيها منه .
سميحه بصت لسماح وابتسمت وحست ان فى شىء حصل مع ليل وزين .
الكل كان بياكل فى هدوء وحسام كل شويه يناول أيه حاجه من الاكل شكل وهى كانت مكسوفه .
لحد ما خلصوا اكلهم وشويه وقعدوا كلهم كلوا فاكهه وحلويات وكمان شربوا الشاى .
وبعدها البنات خدوا بعض وقعدوا فى الجنينه شويه.. وبعدها قام عم حسن واستأذن انه هايمشى بقى قبل ما الدنيا تليل اكتر من كده .
وزين اقترح عليه انه يفضل معاهم ويبات ويمشوا الصبح براحتهم بس هو رفض .
وسلم على الكل وأيه كمان كانت دخلت وسلمت على الكل وخرجوا وحسام وزين وعمر معاهم وصلوهم لحد بره وركبوا عربيتهم ومشيوا بيها.
وحسام كمان بعد ما اطمن انهم مشيوا خد بعضه وركب عربيته ومشى وروح على بيته .
وسميحه وسماح كانوا قاعدين مع بعض بيتكلموا كالعادة .
وزين استأذن وطلع على اوضته شويه .
وعمر وشاهندا وليل فضلوا سهرانين فى الجنينه .
وعند يوسف فى الفيلا كان قاعد بيتفرج على التلفزيون هو وشاهى وبيكلوا بيتزا بعد ما فضلت تزعقله كتير على علاقته ومساعدته لى ليل وكمان قربها من زين بالطريقه دى وكانت عاوزة تعرف ايه اللى بيحصل بالضبط وليه بيساعدها بالمنظر ده ويوسف كان رده الوحيد عليها انها اكتشاف جديد ليه مش اكتر ومرديش ابدا يجيب سيره الخطة اللى بينه وبين ليل وحسام وعمر .
وفجأه سمعوا صوت جرس الباب وشاهى بصتله باستغراب وقالت .. انت مستنى حد ولا ايه يا عمووو ؟؟
يوسف ابتسم ورد وقال .. هاكون مستنى مين يعنى خليكى انتى كملى أكلك وانا هاقوم اشوف مين على الباب .
وفعلا فضلت شاهى تكمل اكل البيتزا وتتفرج على التلفزيون ويوسف قام وراح ناحيه الباب ومد ايده وفتح واتصدم من اللى كان واقف اودامه ................؟؟؟؟؟؟؟