رواية اسرار خلف الأبواب الفصل الثالث والثلاثون 33والاخير بقلم نوسه حمد

رواية اسرار خلف الأبواب الفصل الثالث والثلاثون 33 والاخير بقلم نوسه حمد

مرت الايام وسوسن اتصلت علي مبسوطه وقالت لي الحمد لله حقك خلص قلت ليها حق شنو قالت لي يختي انتي م متابعه النت ولا شنو قلت ليها نت شنو وفشنو كدي فهميني واحده واحده انا كنت مشغوله مع غيث نفسياتو في الارض قالت لي مالو غيث بسم الله جانا مبسوط قلت ليها موش مشا منكم اهلو اظنو اتزكر امو ومحمد اخوهو وحسا بالذنب وكانت حالتو النفسيه سيئة حاولت اخفف عليهو وتاني كانت عندي امتحانات والتلفون م قاعده اشيلو احكي لي في شنو ما تجننيني قالت لي سلمي وابوها قلت ليها ماتو ان شالله قالت لي م ماتو بس صلاح طبق فيهم  نظريه خلاهم لا في السماء لا في الارض قلت ليها كيف كدي احكي لي الحصل شنو قالت لي تتزكري الولد الكانت متزوجاهو سلمي قلت ليها مالو قالت لي المهم اتفقو هو وصلاح يوقعو ابو سلمي لانو الدجل  البعمل فيهو دا دمر ناس كتيره م غيث ومحمد وانتي بس  كميات من الابرياء الماعندهم ذنب في خبث الناس المريضه 

المهم  صلاح عمل واتساب برقم سعودي شغال عند الولد  هناك وهو من هناك ملاهو الرمز وصلاح بواتسابو دا بقا  متواصل مع الشيخ ع اساس انو هو سعودي وطلب منو انو يدمر شخصيه سياسيه مشهوره وقال ليهو بديك العاوزو ان شاء الله قصر في السعودية بكتبو ليك قالت لي ابوها ف الاول شكا في الدردشه بس صلاح  والولد متفقين انو صلاح يستخدم الواتساب والولد الاتصال ويمثل فيها سعودي لانو عارف لهجتهم المهم اظنو ابو سلمي شكا في الدردشه فقام اتصل والولد م قصر قلد ليهو صوت واحد سعودي لمن اقتنع المهم صلاح بقا يرسل ليهو ويغري فيهو ابو سلمي طلب مبلغ كبير وصلاح رسلو ليهو قلت ليها صلاح بالغ تاني م بلم في قروشو دي قالت لي كدي اصبري النحكي ليك انا بقيت متشوقه وفاتحه خشمي قلت ليها اها قالت لي المهم صلاح دا مسك علي الراجل معلومات تغطس حجرو حتي عرف اسماء الناس  الشغالين معاهو توصيل بوصلو للسعوديه اعمال السحر دي وابو سلمي م مصدق يشيل ويطلب وصلاح يشيل ويرسل لغايه م بقا ماسكو في يدو مشا لواحد ببقا ليهو وحكا ليهو اي شي قال ليهو في واحد دجال وكلمو انو دخل عليهو ع اساس انو سعودي وطلب منو يدمر شخصيه سياسية ووافق  وقال ليهو رسل لي  الاعمال  وانا شرطتها لانو هدفي انو امسك  عليهو حاجه توديهو وررا الشمس وبلغ في سلمي والعملتو قال ليهو انت بس م قصرتا سلمتنا قضيه جاهزه بس عايزنك تدردقو وتطلب منو يسفر ليك بتو عشان نقبضها في المطار وصلاح عمل القال ليهو عليهو الضابط وقبضو سلمي في المطار وابوها قبضوهو وكشفو حقيقتو للناس وقالو بيتو ملان كتابه وسحر ودهب ودولارات وبنقو ومخدرات وكان متخفي ورا الدين وواهم الناس انو بطلع السحر والعين وبيطلب مبالغ كبيره وما كده في واحده بعد قبضو عليهو قالت اغتصب بتها وقال انو كان بعالج فيها ي بت والفيس قايم قاعد بالاخبار دي وقالو ليك حكم البعملو فيهو دا سجن مؤبد قلت ليها واي م قادره اصدق اخيرا اتخلصنا من الحيه وابوها حسبي الله ونعم الوكيل فيهم قالت لي مش قلت ليك اصبري حقك برجع ليك وطبعا صلاح جنو وجن الشيوخ الدجالين من زمان نفسو يلم في واحد يخلي عظه وعبره لي غيرو وربنا وقعو في ابو سلمي ولو ما وقعو م ارتاح يابت القنوات عملت معاهو لقاء والخبر لافي قلت ليها والله ما سمعت بالكلام دا انا كنت ممتحنه وما جايبه خبر قلت ليها اديني صلاح عاوزاهو قالت لي يختي صلاح بقا فاضي من التحقيقات وقال مابخليهم الا يعدموهم او يحكمو عليهم مؤبد قلت ليها غيث ح يفرح قالت لي بالمناسبه دي الشرطه قالت بترجع لاي زول حقو ومن ضمنهم  بيتكم ان شالله لانو قالو الزول دا لقو عندو قروش بالشوالات ودهب صغار صغار كميه اظنو النسوان بجن عشان يكتبن ليهن ناس وبطلب منهم قروش وبطلعن الدهب من يدهن غايتو اعوذ بالله من الجهل قلت ليها سوسن والله انا كنت شايفه نفسنا جاهلين بعدم قرايتنا بس م اتوقعت القا ناس جاهلين لي دينهم بالطريقه دي يعني واحده تخسر دهب وقروش بس عشان تدمر حياه زول قالت لي اي الحقد والحسد بعمن الزول والحمد لله نحنا م جاهلين لي دينا اي م قرينا جامعات بس بنعرف الصاح والغلط والحلال والحرام والجاهل فعلا الما بعرف ديل قلت ليها سوسن م اوصف ليك انا فرحانه قدر شنو سوسن انا كنت خايفه منها تظهر لي تاني وتدمر حياتي وحياه غيث قالت لي تاني تحلم بيكم حلم والحمد لله قبضو عليها بس انتي ابقي علي اولادك وراجلك عشره وميه مره بنقولا ليك تاني اوعك تدخلي بت حياتك قلت ليهم ان شاء الله انا توبتا توبه اولادي وغيث وانا  قالت لي نوسه طبعا م كلمتك سحر اختي الليله جو من الدكتور ولدها عندو مويه في الراس وحالتو تحنن قلت ليها كور علي انا طولت منهم ح اتصل عليهم قفلت منها واتصلت لي امي قلت ليها ولد سحر مالو يمه قالت لي عندو مويه في الراس وعاوزين يعملو ليهو عمليه قلت ليها يمه سحر كيف قالت لي حالا تحنن تبكي والله وتعبت قلبي معاها غلبني أسكتها وابوك شايل الولد حالف م ينزلو قلت ليها كدي اديني سحر ادتني ليها ياحليلا ما ياها السحر الكعبه بتاعت المشاكل كانت بتبكي قالت لي ادعي لي ولدي قلت ليها م بنساهو ي سحر وكلو قدر اصبري دا امتحان بقيت اواسي فيها  وقلت ليها بخلص امتحاناتي وبجي احضر العمليه قالت لي م تتعبي انتي اولادك صغار قلت ليها بجيبهم معاي وقفلت منها بجد وجعني مرض ولدها وقطع قلبي  بعد خلصت منهم اتصلت لي غيث وكلمتو بي ناس سلمي وابوها قال لي بلاهي الدجال وبتو السيرتهم ماليه الفيس دي سلمي وابوها قلت ليهو  اي ياهم زاتهم قال لي ربنا انتقم منهم واشوف حبل المشنقه في رقبتهم  وفرح شديد بالخبر دا انا من فرحتي جريت جري ناس نمارق كلمتها بالحاصل ولقيت وشها مخطوف قلت ليها مالك قالت لي حامل باركت ليها وفرحت ليها من قلبي  فرحت فرح لمن عرفت الخطه العملها صلاح ووقع سلمي وابوها قالت لي راجل اختك دا ضكران  وشجاع قلت ليها اي والله ربنا م رزقنا بي اخو بقا لينا اخو وسند ربنا اديهو العافيه ان شالله 

بعد خلصت امتحانات غيث قال لي نعقد قلت ليهو لا ولد سحر عيان وانا راجعه البلد  قال لي تمام نمشي نكفر ليهو ونعقد قلت ليهو نطمئن عليهو اول غيث وداني اهلي وحضرنا العمليه وللاسف الولد اتوفي سحر كانت حالتها صعبه قطعت قلبنا كلنا وانا بقيت قاعده معاهم بواسي فيها حسيتا متعلقه بي اولادي زي الجاها  نقص انها فقدت ولدها وزوجها زول صبور وقف معاها وقفه مبالغه بس سحر رفضت ترجع معاهو البيت لغايه م ابوي حلف عليها طلاق وفي نفس اليوم المشت فيهو سحر انا ابوي عقد لي علي غيث ورجعت بورسودان وانا زوجه غيث وفي فترتنا القاعدين فيها في البلد غيث اشتري بيت ورحل لي كل عفشي ورجعت لقيت البيت عباره عن جنه ما ناقصو غير طلتنا وجينا وملينا البيت حيويه وغيث كان مبسوط وانا بعد رجوعي ليهو اكتشفت انو الطلاق زاد حبي لغيث والحمد لله اولادي مبسوطين بي غيث  وانا كمان 

مرت الايام وسوسن قالت لي بتّها الكبيره اسمها لدن بت عمرها ١٤سنه قالت لي صلاح اداها للولد الكان متزوج سلمي قلت ليها البت صغيره خليها تقرا قالت لي يلا لدن ما شاطره تعبتني معاها اخير ليها العرس من ناحيه فرحت ليها ومن ناحيه قلت البت لو م كملت تعليما مشكله سوسن قالت لي قال بسوقا السعوديه طوالي وحددو العرس العريس جاي يتزوج ويرجعو طوالي لانو اهل العريس قالو  عاوزين يفرحو بي ولدهم ولازم يكون حاضر. كلمت غيث بالزواج قال لي كويس بشيل اذن ونمشي قلت ليهو تمام اتجهزتا للعرس وغيث جاب لي افخم توب واشترا لي اخواتو تياب واشترا لي غوايش دهب سته قال لي تستاهلي اوزنك دهب حبيبتي قلت ليهو م محتاجه دهب  والله بحسو كماليات 

مشينا العرس وما شاء الله العروس كانت حلاتا والعريس حلاتو  ما ياهو الولد اللاقيتو اتغير شديد  وشكلهم حبو بعض غايتو بنات الزمن دا م زينا زمان والله انا لمن عرسوني ما فاهمه اي شي هسي دي م شاء الله  م خلت ترند م عملتو والعرس طلع رهيب وطبعا سحر اختي اتغيرت تغير مبالغه موت ولدها خلاها تتراجع من كل الشر الجواها وربنا عوضها وحملت وانا كمان اكتشفت اني حامل في العرس وغيث طار من الفرحه  وقال لي نرجع طوالي ودعت بت سوسن اختي واهلي وسافرنا وكلمت امي قلت ليها انا حامل صعب اجي هنا  تاني قالت لي بجيك انا اوعك تجي 

مرت الايام ونمارق جابت بت وسمتها علي نسيبه بت نسخه  من نمارق  وطبعا مرت سفيان الاولي اتوفت بذبحه  💔

ومرت الايام وانا وسحر ولدنا سوا انا ولدت تاني تؤام محمد وامنه علي ام غيث ومحمد علي اخوهو غيث كان مبسوط شديد وانا طبعا تعبت في الولاده والدكتور ربط لي  والحمد لله عندي خمسه كريم وكرم ومنه وامنه ومحمد ❤️❤️🫰🏻 ربنا وفق غيث وفتح شركه براهو وانا اتخرجت وبقيت مديره اعمالو وقصتنا كانو بضربو بيها المثل  وسحر اختي ولدت ولد سمتو محمد ورجعت تقرا في المدرسه  قالت عاوزه تكمل تعليمها زيي 

وسوسن م شاءالله زوجها ربنا فتحها عليهو ❤️وبتها في السعوديه مع زوجها وولدت ولد سمتو يامن 

مرت الايام وانا مرتبي نصو لي اهلي والنص التاني جمعتو ووديت امي وابوي حج ربنا امد في عمري وشفت الفرحه في عيونهم ودا كان حلمي من زمان بس كنت بقول ح احققو كيف رغم الطلاق كان وجعه بالنسبه لي بس كان سبب في تكمله تعليمي وقدرت اشتغل وبي حقي احقق حلمي واحجج امي وابوي ورغم السنين بتمر بس غيث نهاي م نسا امو كل م يحس بالذنب يعمل صدقه لي امو واي يتيم يعرفو يتكفلو والحمد لله ما نقص مالو بالعكس ماشي في زياده بديها بهنا بتجينا راجعه اضعاف اضعاف لغايه م عمل جمعيه كافل اليتيم و عين فيها شباب بي رواتب وكان كل زول بعرفو وعارف الجمعيه بساعدو لغايه م بقت تجيهم مساعدات من بره وبدل الجمعيه عملو الف  

طبعا حسب معلوماتي سلمي وابوها حكمو عليهم بالاعدام وقالو زوج سلمي اتزوج بت عمها المخاصمنهم بالسنين وجابا ليهو تربي اولادو  

مرت الايام واولادي كبرو قدامي ووفرنا ليهم كل احتياجاتهم وما دلعناهم بالعكس علي قدر م نقدر ربينا فيهم الصفات الحلوه وانو ماف شي دايم ما يتكبرو ولا يتعالو علي زول  لانو في لحظه ممكن الزول صحتو يخسرها خليها القروش والعز كنت بفتخر بصفاتهم السمحه حنيتهم علي وعلي ابوهم وادبهم واحترامهم وكانو مواصلين ارحامهم عماتهم وخالاتاهم وم كده كريم خطب بت عمتو واتخرج من طب جامعه الخرطوم وكرم اتخرج هندسه زي ابوهو واشتغل في الشركه مع ابوهو ومنه  درست مختبرات طبيه  وامنه درست هندسه نفط ومحمد درس اداره زيي الوحيد الادبي واشتغل في الجمعيات الخيريه وكان هميم بحب يساعد الناس غيث كان بقول لي زي سيد الاسم  

منه اتزوجت زميلها في الجامعه 

وامنه اتزوجت ولد نمارق 

وكرم اتزوج بت وزير الصحه 

ومحمد اتزوج بت سحر اختي ❤️

والحمدلله رغم الصعاب غيث كان لي نعم السند وما قصر مني وانا كمان بقيت ليهو ام واخت واخ ❤️❤️❤️

ودي كانت نهايه روايتنا اسرار خلف الابواب مع تحياتي نسيبه حمد عبدالصادق

أهداف الروايه 

اول هدف عارفين كلكم الروايه كانت بتتكلم عن شنو مضمون الروايه كان عن واحده اتزوجت وهي في عصمه راجل في البدايه  شفت كميه تعاليق فيها دهشه انو معقوله دا بحصل احب اقول ليكم الروايه خيال بس  الحقيقه الوحيده الفيهو الواحده الاتزوجت وهي في عصمه راجل وسحرت الاتزوجتو بالشيوخ لانو ماف راجل طبيعي ممكن يقبل يتزوج واحده متزوجه الا يكون م واعي ونتفق انو البت لمن تخسر الحياء بتكون في تصرفاتها اخطر من الرجال وبتكون عباره عن شيطان  ممكن تعمل اي شئ يخطر علي بالكم   في القالو لي حتي لو في م تكتبي عنها ليه م اكتب عنها وليه م اخلي الناس يوعو والنسوان يصحصحن ويشوفن رجالن علي وين بدل الناس لاهياها الدنيا وبي مشاغلا ولسه عايشين في حسن النيه الزمن دا نفسك م تضمنها اذا كان ربنا قال النفس اماره بالسوء ما بالك نفس غيرك وغيرك 

واتكلمت عن  انو الزواج دا باطل واي شي بتبني علي باطل باطل ومصيرو الحق ينتصر زي م حصل لي نوسه وغيث  وغلط كبير وحرام واحده تتزوج بالطريقه دي غلط في حق زوجها يضمن كيف انو الاولاد الولدتهم ديل اولادو هو وهي مع راجل غيرو 💔

تاني هدف اتكلمت عنو التعليم ودا جسدتو نوسه نوسه كانت بت طيبه وحنينه ورزينه فيها كل الصفات الحلوه بس عقليتها محدوده  زوله فهمها انها تكون في بيتا ومع اولادا وزوجها ما مختلطه بالعالم واجهتا مشاكل بسبب عقليتها المحدوده او مخها ما كان متفتح في ناس م متعلمين بس واعيين شديد وفي الزي نوسه ديل م متعلمين ومافاهمين وبتصرفو ساي وتصرفاتهم الساي دي بتدخلهم في مشاكل م ليها حد 

تالت حاجه الصاحبات اتكلمت عن الصاحبه البتدخل حياتك وبتخربا والصاحبه البتدخل حياتك وتصلحها سلمي دخلت حياه نوسه وكانت صديقتها المفضله الما بتقبل فيها بس سلمي نفسها ضعيفه ودا ناتج عن خلل في تربيتها ونقص في تربيتها رغم انو ربنا سترها واتزوجت بس الغل والحقد الجواها عموها من اي شي حسدت نوسه في استقرارها وحياتا الحلوه وعشان نوسه بتحب زوجها شديد طمعت في زوجها ورغم انو وضعها م بسمح ليها تتزوج او تعمل علاقه بالدجل قدرت تصل لي غيث وتسحرو وتخلي م واعي واتكلمت عن الصحبه الصالحه زي نمارق نمارق دخلت حياه نوسه صدفه لقتها جايطه وعشان نمارق بت محترمه ومؤدبه دخلت حياتها ورتبتها ونشلت نوسه من الظلمه للنور وكانت نعم الصديقه ❤️❤️

رابع حاجه اتكلمت عنها ابو سلمي وفي زيو دجالين عاملين فيها شيوخ وبتاجرو بالدين و كتار في حياتنا وياما هدمو بيوت وياما مرضو ناس وماتو بسببهم بس مافي الزي صلاح يقدر يوقعهم والقانون ياخد فيهم مجراه  ❤️

 خامس حاجه اتكلمت فيها عن غيث الكان تحت تاثير السحر  ماف انسان عاقل وولد حلال بخاصم امو وبحاربها الا اذا كان معمول ليهو عمل انو م يشوف اهلو وفي كتار والله اعوذ بالله من اي واحده تكتب راجل وتلفتو من اهلو ماف سبب بخليك تعملي كده هم مكانتهم براهم وانتي مكانتك براك ياريت لو نصفي النيه ونصيبك بصيبك حتي لو الناس حاولو يمنعو بصلك عشان كده م تخسروها دنيا واخره في اعمال الشيطان  زي م حصل لي غيث سلمي كتبتو حتي اهلو يخاصمهم وشالت ذنب امو الماتت بحسرتها علي ولدها هو ما عندو ذنب في الكان حاصل ليهو وشالت ذنب اخوهو المات بسبب اعمالها 💔💔💔

اخر حاجه اتكلمت عنها نوسه الانتو قلتو شخصيتا ضعيفه كل زول بوجهه نظرو انا اتكلمت كتير عن الحته دي في كل روايه بتحسو انو البطله شخصيتا ضعيفه ليه م تعاينو ليها من ناحيه تانيه انو البطله قبّلت الابتلاءات بصدر رحب وصبرت عليها وجزاها عند ربنا عظيم وليه م تشوفو انو البطله حامله صفات المسلم سهله وهينه ولينه عمرها الصفات دي م كانت ضعف بالعكس بعديها بتجي قوه ربانيه ومعجزات   واجهت نقد كتير في الحته دي   رواياتي بتشمل كميه من الشخصيات مافي روايه بتخلي من الشخصيه السيئه القويه بس نهايتها بتكون م حلوه فانا بحب اختم رواياتي بحاجات حلوه الناس تستفيد منها وتتعلم كيف تتحمل وتصبر وتجاهد وتكافح زي م عملت نوسه رغم انها كانت شايفه الطلاق نهايه دنيا بس بالعكس الطلاق كان ليها بدايه دنيا بقت شجاعه وبتتصرف بحكمه وفهم وكملت تعليمها وبقا ليها سلاح وحققت حلمها وحججت امها وابوها ونالت خير الدنيا بصبرها وربنا بارك ليها في رزقها وزويتها وعاشت اجمل حياه ❤️🫰🏻 وفي حاجه تاني اتكلمت فيها شخصيه سحر اخت نوسه رغم انهم اتربو في بيت واحد بس سحر كانت شخصيتا مختلفه ودا م ناتج عن تربيها دي جينات وطبع وفي الزيها كتار بكون كلامهم قوي وبسم البدن وبتكره البيت عشانهم زي م سحر كانت صعبه وكلاما كلو صعب وجارح لدرجه انو اختها خلت ليها البيت والزي ديل بتمر عليهم مراحل صعبه وبتراجعو من الكانو فيهو زي م حصل لسحر فقدت ولدها وعرفت انو الدنيا دي الزول علي قدر م يقدر يكون صالح م يكون جارح وكلامو سام القدر وقع في ولدها وخلاها تتراجع من الكانت فيهو وحياتها بقت حلوه ❤️❤️

ا

علي قدر م تقدر كون صالح ما جارح❤️🫰🏻 

كون سهل هين ولين تلين ليك الدنيا بما فيها ❤️🫰🏻

نصيبك بصيبك ❤️🫰🏻

صبرك علي الابتلاءات   فالصابر: لا يتسخط البلاء، ولو في نفسه وقلبه، بل نفسه صابرة محتسبة، وإن لم يكن راضيا، ولكنه أيضا غير ساخط. والصابر: يمسك لسانه عن الشكوى، فلا يقول: لماذا أنا؟

"ما بني على باطل فهو باطل" هي قاعدة فقهية وقانونية أساسية تعني أن أي تصرف أو إجراء أو حكم قائم على أساس غير صحيح، باطل، وغير شرعي، فإنه يترتب عليه بطلان كل ما تفرع عنه،