رواية خلف الابواب المغلقه الفصل التاسع والعشرون 29 والثلاثون 30 بقلم مشاعر مبعثره
29
اعفي لاني طلعت بالطريقه دي ، بس والله كنت حاسي بذنب كبير وما شايف قدامي .
: يعني انت اسي في الباقير؟؟
: ايوا يا سمر .
: عليك الله انتبه لنفسك انت عارف المكان هناك خطر شديد ودي منطقة عمليات عديل .
: ما تخافي قال تعالى ﴿ قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ ﴾
: ربنا يحفظكم بس ، ما قادره اقول لك غير كدا ، دائما بتدخل نفسك في مشاكل كبيره ومعقده .
: سمر ما تخلينا نرجع للحوار القديم ، انا بتحمل جزء من المسؤوليه ، وحتى لو ما كانت ليان بنتي طرف في الحصل مستحيل ارد المرا وهي طالبه المساعده مني ، انتي ادعي لينا وما تحكي للاولاد عشان ما يخافو ، خاصة ليان لمن اجي تمام؟؟
: تمام
انا طبعا ما نمت تاني اصلا ، الصبح اذن ، قمت صليت واليوم كلو متوتره لمن برمي الحاجات من يدي ، الاولاد يسألو ساي قلت لهم ابوكم في المستشفى ، ولمن اتصل وما يرد لي بهبط .
في النهايه دخلت الغرفه رقدت وخلاص عاوزه ابكي قام اتصل بي
: نزار لو م اتصلت انا كنت حا موت .
: ربنا يطول عمرك ، كيف امسيتو انتو كويسين كلكم؟
: خليك مننا وطمني عليك ، والله ما قادره اقيف على طولي .
: نحن جايين خلاص ما تخافي .
: وان شاء الله اقنعتوه؟
: والله هو كان رافض بس هدا جاء معانا زاتو....... سمر اسمعيني وما تخافي...
: لالا خايفه 😧 .
: معناها اهدي ، ما في شي خطير حاليا ، بس امس بليل حصل اشتباك قريب مننا ، وابراهيم دا اتصاب في رجلو ، بعد تعب طلعنا من هناك ، والبنت والله وضعا صعب شديد ، انا جايبهم معاي البيت ، انتي نادي امها واحكي لها براحه .
قعدت اصرخ ، كرعلي يا نزار انت كويس؟ اوعا تقول لي حصل لك شي و ابراهيم........... والبنت ما تكون اتصابت؟
: انا تمام والبنت ما فيها شي والله ، بس اتشنجت من الخوف واسي عندها حمى لكن مافي شي تاني بخوف انتي حاولي هدي امها بس
: وابراهيم؟؟ 😧😧😧
: اخدناه المستشفى وطلعنا له الرايش اسي وضعو مستقر .
انا طوالي مشيت المدرسه انادي المرا قالو مشت بيت اهلا وصفوه لي مشيت لها هناك وما حكيت لها الا بعد جبتا معاي البيت ، قلبتو عزاء ما سكتت الا لمن جو وشافت البنت ، طبعا نزار اسعفا هي وابراهيم قبل يصلو المستشفى ودا الساعدهم..
اها المرا لمت لك في طليقا دا شكل ونبذ ، انا الاقفلت اضاني منو هي واخوها بعد تعب هديناهم منو ، وحالفه الا تشتكيه هو زاتو بعد الحصل دا ندم واتراجع بس اشترط عليها تشوف بيت تقعد فيه ويكون معاهم راجل ، « اخوها طبعا » وهو بدفع الإيجار .
انا زعلت زعل شديد لانو زكرني بطليقي
ما كان شغال بها الا لمن عرفا قاعده في المدرسه ووضعا صعب اتزكر انو اب؟؟
: بس هي الكانت مانعاه يا سمر !!! وللسبب دا دخلو المحاكم ، والله الراجل دا حكى لينا مصايب كتيره عنها وعيوب انا ما صدقتا الا بعد سمعت نبذها له قبل شويه ، استغفر الله العظيم ، هو طلقا بعد معاناة شديدة في الحياة معاها ولأنو ما قدر يستمر ويصبر عليها ، ولو انو اتصرف غلط وكان ممكن يلقى حلول افضل ، بس نقول شنو ، دي ارادة ربنا ، والله البيوت دي فيها مصايب كتيره مخبيه .
كان يوم ثقيل شديد علينا وخاصة نزار تعبان وانا حاسه به بس ما راضي يهدأ الا يطمن على الكل ، جاب ابراهيم البيت انا جهزت له الديوان وقاعد معاه ، وفي يدو التلفون يتصل من دا لدا ، عاوز يطمن
مشيت لقيتو غفيان جنب اخوه ، صحيتو براحه وقلت له : تعال نوم شويه وارتاح .
مشينا غرفتنا قلت له : كل شي تمام ما تشيل هم خلاص ، وفكر في نفسك شويه انت برضو بشر وبتتعب .
: ما تخافي علي ، انا بخير..
حضنتو وختيت يدي على جبينو ، قلت له : عندك حراره !! وضربات قلبك ما منتظمه انا حاساهم ، قعد يضحك ، قال لي : بقيتي انتي الدكتوره ولاشنو؟
: دي ما عاوزه دكتور ، انت تعبان والله ، ارتاح شويه.
عاوز يتكلم قاطعتو : واشتقت لك شديد والله ، من امس حاسه بالغربه والوحده ، والله ما عارفه الزمن عدا كيف !! بالجد ما بتخيل حياتي من دونك .
قبل راسي وقال لي : وانا كان معاي نفس الاحساس..
كان بتثائب قلت له يدخل يتحمم ويجي ياكل حاجه عشان ينوم .
اتحمم وجاء طالع ، بس ما قدر حتى ياكل لقمه واحده من التعب ، عملت له عصير شربو ورقد ، يتقلب ما قادر ينوم حاسه انو موجوع والنوم مجافيه ، شلت راسو ختيتو في رجولي ذي المخده ، وقعدت امشي يدي اليمين عليه ، واليسار بدلك له بها اكتافو براااحه ، ابتسم لي وعيونو مغمضه .
قلت له : كدا احسن؟؟
قال لي : بالطريقه دي ممكن انوم الدهر .
وفعلا هو بعدها راح في نومه طويله شديد ، وما قدر يصحى بدري .
عدينا ايام صعبه شديد ، وابراهيم قعد معانا لمن اتحسن بعداك مشى على شغلو ، قدر ما حنسناه يقعد رفض نزار قال لي : من زمان عرضت عليه الشي دا رفض .
ليان مشت اعتزرت لأبوها عن الحصل وكانت حاسه بالذنب💔 بس هو طبعا ما بزعل منها ، وفهما انو الشي الكانت بتعملو دا غلط بدليل المشكله الحصلت ، ووعدت تاني ما تكررا .
: ماما ، ماما .
: ايوا حبيبتى .
: تعالي نومي جنبي الليله .
: حااااضر .
ليان شالت مهيلم رقدتو جنبا وانا رقدت جنب شادن ، لمن غفيت معاها صحيت بحركه قمت مخلوعه لقيتو نزار قلت له : في شنو؟
: تعالي خلاص نامو كلهم .
قمت طوالي لحقتو .
طبعا في غرفتنا الدنيا كأنها لسه صباح مولع الانوار والتلفزيون شغال وهي ياكل في البوشار ، جيت قعدت جنبو حضني قلت له : غريبه كأني جيت من عالم تاني .
: كيف؟؟
: لمن كنت في غرفة الاولاد نعست من السكون وقلة الحركه.
: ماهو اصلا هنا عالم تاني حقنا نحن الاتنين.
: برضو الزمن اتأخر ، اقفل التلفزيون خلاص ، وخلينا ننوم ، لصقت جبهتي مع جبهتو ، كان في حراره..
قلت له : انت تعبت شديد الايام الفاتت ، ارتاح كم يوم شوف جسمك حار كيف؟
: انا كويس حبييتي ، ما تخافي ، دا من الارهاق بس .
: طيب اخد اجازة ان شاء الله بكرا بس ، انت والله عيان....
30
خلاص ، وخلينا ننوم ، لصقت جبهتي مع جبهتو ، كان في حراره..
قلت له : انت تعبت شديد الايام الفاتت ، ارتاح كم يوم شوف جسمك حار كيف؟
: انا كويس حبييتي ، ما تخافي ، دا من الارهاق بس .
: طيب اخد اجازة ان شاء الله بكرا بس ، انت والله عيان
: بكرا بالذات عندي عمليات ، لكن برجع بدري ، رايك شنو نطلع مع الأولاد نفسحهم ، بكونو اتوترو معانا الفتره دي .
: يا سلااام ، ديل ح يموتو من الفرح ، معناها خلينا ننوم بدري .
قمت طفيت النور والتلفزيون ، وجيت رقدت جنبو ، عديناها ونسه لمن نمنا .
الصباح قعد يتعابط وما عاوز يخليني اقوم 😅
قلت له : ليان بتصحى بعد دا خليني اقوم ما تفقدني .
: تفقدك ليه ماهي عارفاك معاي .
: برضو خلينا نقوم .
: لا خليك شويه .
قعد ينكش لي في شعري ضحكت وقلت له : انت قايلو ضفاير ذي حق بناتك ولا شنو ، بالمناسبه انا تعبت في تسريحو واسي انت مجبور ترجعو ذي ما كان
: هههههههه بس كدا؟ طوالي يا ستي انا اصلا متعود على تدليل البنات .
: عاوز تفهمني انو انت كنت بتسرح لبناتك .
: اكيد طبعا واسألي ليان بعمل لهم تساريح انتي ما بتعرفي تعمليهم.
: يا سلام ما شايفاك والله.
: اسي ما كبرو خلاص بسرحو براهم.
: طيب اثبت لي.
قومي تعالي
مسكني من يدي قعدني قدام التسريحه وجاب الزيت قعد يكب في يدو ويعملو لي في راسي مع التدليك مبالغه قربت انوم .
قعد يضحك فيني
: اها عاوزه تسريحه كيف؟
: جادي كمان انت فاكرني طفله؟؟
طبع قبله على خدي وقال لي : انتي طفلتي المدللة
شال المشط وسبحان الله يدو بارده في التسريح ولا حسيت بأي ألم مع انو شعري كان منكوش ومشبك شديد
ضفرو لي اتنين حلوات وخت لي فيهم باندتين صغار باللون الزهري عليهم قرون كدا ذي الارنوب😅
حتى بعداك استحمينا وطلعنا .
لقينا ليان عملت الشاي ماشاء الله وشربت مهيلم وشادن هاني ولين كانو لسه نايمين، صبحنا عليها وقعدنا شربنا مع بعض، ومهيلم يتحاوم بيننا اي زول ماسك كبايتو في يدو عشان ما يطقشا له😅
الليله غير العمليات عندك شي؟
: لالا بخلص وبجي .
طيب تعال بدري ، امس قلت حاتفسحنا..
: بس كدا؟ من عيوني جهزو نفسكم بدري لاني بعد اجي ما بنتظر .
: حاضر .
مشيت اصحي لين وشادن وافرحهم ، شادن شافت الباندات على شعري دقت جرس 😄.
طلعو حقاتا هي ومخبياهم في غرفتنا زي ليان😅😅😅
المهم نزار مشى الشغل ونحن اي زول على برنامجو ، لمن العصر جاء جهزنا نفسنا وقاعدين منتظرنو ، الباب دقا مشيت فتحتو انا .
واعوذ بالله من الشوفه الشفتها!!
: انت؟؟؟؟؟؟ 😱😱😱😱😱😱😱😱
: مالك مستغربه ولا م اشتقتي لي انتي زاتك .
كان طليقي !!!!
انت؟😱😱😱😱
: مالك مستغربه؟ ولا م اشتقتي لي انتي زاتك!!!
كان طليقي!!!
واقف بكل وقاحه قدام بابي !!!
قال لي : والله ما شاءالله عملتي لك بيت واولاد .
: انت الجابك هنا شنو؟ جاي ليه اصلا عاوز مني شنو؟
: ما تصرخي ، انتي طليقتي ما تنسي وفي بيننا اولاد .
: اولاد؟ انت عندك اولاد يا مدثر؟؟ من متين وريني؟ .
: الله؟ اولادي الثلاثه ، هاني وشادن و...... بالله سميتيه منو الاخير دا؟؟
انا حرارتي ارتفعت شديد اللحظة ديك ، ووصلت لأقصى درجات الغضب قلت له : انت ما عندك اولاد ابدا ، طير من وشي يلا ما عاوزه اشوفك ولا تدق بابي .
عاوزه اقفل الباب فيه ، مسكو بيدو .
قال لي : انتي بتمنعيني من اولادي يعني؟؟ انتي متزوجه حاليا ما تنسى ، وانا مستحيل اخلي اولادي يتربو مع راجل غريب .
طوالي لزيت الباب بقوه ، طاخ قفلتو لمن هو انضرب في يدو . سمعتو بطلع اهة قويه .
وجريت جوا لقيت اولادي بلعبو ، مسكتهم الثلاثه حضنتهم في خوف ، وهم مستغربين ولا فاهمين سبب التصرف دا ، ليان قالت لي : في شنو؟
قلت لها : ولا شي .
مشيت الغرفه ما قادره افكر ، حسيت اني بخسر !! بخسر حياتي ، اتصلت بنزار وانا ببكي لمن ما قادرة اتكلم .
: اهدي يا سمر عشان اقدر افهمك ، الحاصل شنو؟ .
: عاوز ياخد مني اولادي😭😭
: منو العاوز ياخد اولادك؟
: مدثر .
: مدثر منو ؟
: طليقي .
سكت مسافه حتى قال لي : عرف انك اتزوجتي يعني؟؟
: مش بس عرف ، دا جاء لحدي البيت وهددني .
: شنو؟؟ جاء البيت؟
: ايوا 😭
: طيب ما تخافي انا جاي فورا .
وفعلا جاء بسرعه شديده ، لقى الاولاد برا سألهم مني قالو له في الغرفه .
جاني وبسأل فيني وينو؟
قلت له : انا ما دخلتو ، من الباب طردتو .
: طيب هو جاء بس عشان يهددك يعني؟ وعرف عنوانك من وين؟
: ما بعرف ، ما بعرف؟
فجاءة اتزكرت امي !! اكيد هي الحكت له انا متأكدة مافي غيرا ، شلت التلفون وطلعت برا اتصلت بها .
: اهلين يا بنتي كيف حالك؟
: امي انتي عملتي شنو؟ 😭
: مالك بتبكي يا سمر؟ اوعا يكون راجلك عرس فيك؟
: عرس شنو؟ مدثر ي امي ، جاء لحدي البيت وهددني انو ياخد اولادي .
: سجمي !!! جاكم البيت؟ ب بس.....
: هو عرف كيف؟ 😭عليك الله ما تكوني انتي القلتي له !!!
سكتت ، طوالي عرفتا دي هي ، ذدت بكاء وما عرفت ارد لها بشنو اكتفيت ب : الله يسامحك ي امي ، انتي دمرتيني خلاص ، اولادي ديل حياتي !! لو اخدهم مني معناها انا انتهيت مافي وجود لسمر.
: لا اوعا تقولي كدا يا بنتي.
: الخلاك تعملي كدا شنو؟ ليه تسألي الثعبان في جحرو؟ ، بعد ما فارقنا ، وكنا عايشين مبسوطين من غيرو ، ليه ي امي؟
: استفزاني يا بنتي ، خطب وامو اتصلت عزمتنا لعرسو بكل بجاحه ، وكان شفتي اختك قالت ناشر في الفيسبوك كلام ذي السم عليك ، قال حاسي انو بتزوج لأول مره !! وربنا خلصو من قفص ، وشبح مراءة خاليه من الانوثه .
: ما يقول ي امي 😭 ، نحن مالنا ومالو؟ هو نبي ولا شيخ عشان تهمني شهادتو؟ ولا رأيو فيني باثر علي؟ اصلا واحد زيو ما بحكم علي ، ولا بهمني تقييمو !! والكلام دا لو هو بنفسو قالو لي ما كان ح اهتم !! ولا حتى برد عليه .
: انا غايتو ما قدرت اتحمل ، اتصلت نبذتو وزكرتو بماضيه الاسود.
وقلت له بنتي زاتا اتزوجت راجل احسن منك ، وعايشه في مدني مرتاحه مع راجلا واولادا .
: يا الله ، يا الله .
: والله ما قايلاه حايفتشك......يتبع♥️