رواية خلف الابواب المغلقه الفصل التاسع والثلاثون 39 والاخير بقلم مشاعر مبعثره
لبست في اقل من دقيقه والشعر دا قبضتو ورا وختيت فيه طرحه ، جيت سلمت عليه ذي الكاني يداب شفتو ، وهو بس بعاين لي ، جبت له المويه ، قال لي : اسي هاني جاب لي ، وسألتهم امكم وين؟ ، ذي الكأني شفت واحده بتشبها قبل شويه 😅😅
: لالا ديك الحبشيه اسي مشيتا 🙈 ، مالك جيت بدري كدا؟
قرب وهمس لي : حسيت اني عاوز احضنك بس😉
: انت قاصد تزكرني بحاجه ولا بتهيأ لي؟
: هههههههه لالا والله جاتني حاله مشابهة بس ، ما حاتغدينا ولا شنو ي ام هاني؟ جبت حاجات كتيره ، وشامي ريحة حريق في المطبخ..
طبعا كانو ليان ولين في المطبخ مشو يدخلو الحاجات ، مشيت لهم ، لقيت الحله مسكت ، وليان بتحاول تنزلا.
: خلاص ، خلاص ، خليها ما تحرقي يدك .
نزار جاء قال لهم : امشو احضرو خلاص انا بساعد ماما..
طلعو قلت له عاوز توزعهم صح؟ بس اعمل حسابك اسي مهيلم بجي .
قبل اقفل خشمي حضني وقال لي : خلاص احسن اكسب الزمن.
فضلت فتره في حضنو ، وانا حاسه بأمان وراحه شديده .
هو كان مدي ضهرو للمصطبه وفيها اكياس الحاجات الجابهم عيني وقعت على علبة كرز 🍒 ، مديت يدي واتناولت واحده ، وتاني واحده ، تاني ما وقفت ، لمن سمع صوت الاكل بعد عني وقعد يضحك
: دا شنو البتعملي فيه دا؟
: حبيتو😍
قعدت اشتغل وهو بساعدني ، كل شويه امد يدي واكل كرزه لمن خلصت العلبه لقيتو بعاين لي بخلعه 😲
ما عرفت اقول شنو ، بس منزله راسي 🙈
قال لي : ضروري امشي الصيدليه
: ليه في شنو؟
: لازم اجيب لك جهاز كشف الحمل !!!
: هههههههه بس عشان اكلت كرز؟ 😅
: ايوا عشان كدا .
كنت فاكراه بهظر بي طلع جادي ، ومسافة اكمل شغلي و احضر الصفره هو مشى جابو وجاء ، عملتو بعد الغداء وطلع ايجابي ، هو كان منتظرني ورا الباب ،
طلعت ورفعتو له ، لمن شاف سجد عديل من شدة الفرح وشكر ربنا ، اصلا هو من بدري قال لي احتمال الحمل بعد الاجهاض كبير ، ودا الحصل واكتملت فرحتي باني شايله حاجه من حبيبي وح اجيب له ولد ولا بنت تشيل اسمو ، بدعي ربنا يسخر لاي متضايق فرج على هيئة شخص ، بقلب رحيم ، يجبر كسرو ، ويخفف معناتو ذي ما عمل معاي نزار ❤ .
« لم أعد أشعر بضيق التنفس !!! ولايزعجني صوت اغلاق الباب !!!! استمتع بسكون الاماكن ، وانين الاشياء المعلقه بعد مداعبة الهواء
اصبح ذاك السجن وطني ، وحريتي تكمن في كوني ، اسيرة بين احضان طبيبي ❤ »
#النهايه
_الرسول صلى الله عليه وسلم قال : ( ﻛُﻞُّ ﺍﻣْﺮِﺉٍ ﻓﻲ ﻇِﻞِّ ﺻَﺪَﻗَﺘِﻪِ ﺣَﺘَّﻰ ﻳُﻔْﺼَﻞَ ﺑَﻴْﻦَ ﺍﻟﻨَّﺎﺱ )
وكمان قال : « ﺳﺒﻌﺔ
ﻳﻈﻠﻬﻢ ﺍﻟﻠﻪ ﺗﺤﺖ ﻇﻞ ﻋﺮﺷﻪ ﻳﻮﻡ ﻻ ﻇﻞ ﺇﻻ ﻇﻠﻪ ». ﻭﻣﻦ ﻫﺆﻻﺀ ﺍﻟﺴﺒﻌﺔ: « ﻭﺭﺟﻞ
ﺗﺼﺪﻕ ﺑﺼﺪﻗﺔ ﻓﺄﺧﻔﺎﻫﺎ ﺣﺘﻰ ﻻ ﺗﻌﻠﻢ ﺷﻤﺎﻟﻪ ﻣﺎ ﺃﻧﻔﻘﺖ ﻳﻤﻴﻨﻪ ».
يعني بفضل الصدقه دي انت بعدين بتكون تحت ظل الرحمن!! يوم الحساب والحر ،و ربنا سبحانه وتعالى فضل الصدقه في الخفاء ، وخلاها في مرتبة اعلى ، لاحظو بس للوصف ، لا تعلم شماله مأنفقت يمينه يعني انت تحاول قدر الامكان تخفي الموضوع ، بحيث مافي زول يعرف .
_حاول اتفقد الناس الانت عارف وضعهم صعب ، ان شاء الله خت لهم كيس ملاح ورا الباب ، وصلو لهم عن طريق شخص موثوق اتصدق كفاعل خير !!! الاجر المنتظرك عن ربنا ما بتقارن بعبارات الشكر وثناء الناس عليك ، الدعوة البدعيها لك الشخص الانت اتصدقت عليه اكيد واصلاك محل ما كنت ما ضروري قدامك ، وكدا افضل زاتو عشان ما يحس بالحرج منك لمن يشوفك او يحاول يعمل حاجه عشانك .
_مع الاسف في ناس بتصدقو بس عشان الاطراء !! وعشان يكبرو في عيون الناس ويتباهو، الواحد يعمل حاجه عشان محتاج ويتصور معاه !!! انا عملت كدا لفلان!!! طيب امكن الزول دا يحس بالحرج؟؟ امكن ما عاوز الناس تعرف انو وضعو كدا؟ في ناس والله عفيفين شديد وما بقبلو يمدو يدهم مهما احتاجو نحن بنكون عارفين بوضعهم ليه ما نساعدهم في الخفاء؟؟ ولا نحسسهم اننا عملنا حاجه نحتسب الاجر عند ربنا لانو اعظم ، مافي حاجه انت عملتها بتروح ساي ربنا مسجل لك كل شي وبجزيك عليه .
_الزول ما يبقى متصعب لدرجة ما يقبل المساعدة وهو محتاج!! والله في ناس برفضو المساعدات مع انهم في امس الحاجه. بس عشان ما يقولو انهم مساكين او بياكلو الصدقه!! ليه هي الصدقه حرام؟؟ ماهي اصلا للحالات الذي دي ، خاصة في وضعنا الحالي دا ، انت اقبل المساعدة واشكر الزول المد لك يدو بدل تحبطو ، والله في ناس ببطلو يساعدو خوف بس من الرفض والاحراج ، وامكن انت بحركتك دي تقطع الصدقه دي عن زول محتاجا بسبب « انا » فارغه في نفسك ما بتزيدك حاجه !!! يعني لو مت من الجوع والحاجه بقولو مت بشرف ولا شهيد؟؟ لا انت كدا بتكون جنيت على نفسك واندرجت تحت اسم القاتل لنفسو عمدا والحفاظ على النفس من مقاصد الشريعة الاسلاميه .
_افقدو جيرانكم يا جماعه خاصة في الظروف دي ربنا وصى على سابع جار ، ما ممكن انت جارك بالحيطه ما تعرفو جعان ولا عيان ولا محتاج لك ، غارق في دنيتك وشؤؤنك جارك دا زاتو انت مسؤؤل عنو ما ممكن اي زول يقفل بابو عليه ويخت راسو على المخده مرتاح .
والله ورا الابواب المقفوله دي في قصص!! وقصص كتيره اي واحده بتختلف عن التانيه ناس بتخت املا بس على صحية ضمير!!! ومنتظره يحسو بها .
كمان في حركة انو بنسكت وما بنشتغل بالغلط البنشوفو ونسمعو ونحن عارفين انو المفروض نمد ايدينا، بحجة البعد عن المشاكل وتجنب الاحراج وفي ناس بتنتظر زول يتحرك عشان يقيفو معاه ليه ما تكون انت البتبدأ وتحرك الموضوع امكن في غيرك منتظرين حركه منك عشان يقيفو معاك ويصححو الخطاء ولو انو منتشرة ظاهرة عدم التدخل ويخلوك تتبنى الموضوع براك والله ربنا يصلح الحال بس ويكتر من اصحاب القلوب الرحيمه والانسانييين .
♥️
تمت بحمد الله