وفجأة العربية بتقف وبيفتحوا الصندوق بيطلع وماسك ضهره وبيبص حواليه وكان هاين عليه يعيط:
انتم هاتعملوا فيا ايه! بالله انا غلبان ما استاهل كده!
بيقرب منه الحراس وهو بيرجع لورا بخوف وبيبص للصحرا اللي هو فيها!
ابتسام: هاتموتوني ازاي ، هاتدفنوني حي ها ولا ايه ماكانش يومك يا ابتسام يا صغير يا محير..
بيمسكوه الحراس وبيكون فيه حصان واقف بيربطوا رجل ابتسام ..
ابتسام بيزق اللي بيربط رجله وبيجري ..
ابتسام: هاهرب هاهرب..يارب ساعدني
بيبص وراه بيلاقي الحراس بيجروا وراه
ابتسام: يا ختييي بتجروا ورايا ليه ليييه كده منكم لله ...
بعد خمس دقايق بيرجع الحراس وواحد منهم شايله علي كتفه..
ابتسام : لا حاكم بقولك ايه نزلني بدل ما تزعل مايغركش جسمك دي حقن انما انا طبيعي يلا انا خارق وهازعلك اهئ اهئ انت ماتعرفنيش ...والنبي نزلنييييي
الحارس: اصمت !
ابتسام : مش صامت بقا هيييه يلا ..
بيرزعوا علي الأرض وبيربط في رجله الحبل وبيطلع واحد منهم علي الحصان والحصان بيمشي وبيجرجر ابتسام وراه..
ابتسام بصويت: ليه كده يا جدودي ليييييه انا عملت فيكم ايه اااااه يا كفره منك لله يا حتشبسوت انتي وسنموت وتحتمس كفاية كلت عشرين كيلو رمل عارف بيقوي المناعة بس انا قولوني عصبيييي عااااااااااا
بيقف الحصان وبينزل من عليه الحارس والحراس التانيين واقفين ..
الحارس 1: لم يمت بعد
ابتسام وهو بيكح من الرمل : اااه الأعمار بيد الله سيبوني بقا في حالي كح كح
الحارس 2: الملكة حتشبسوت امرتنا بقتله بعد تعذيبه بشتي الطرق
ابتسام وهو حاطط ايده تحت دماغه وبيسمع لهم:
هههههه شتي الطرق طب شتي يعني كثير الله يحظك يا استاذ عبد الغني قعد يحفظني فيها اسبوع وطريق يعني سبيل وطرطريق يعني سلسبيل خههههه
الحارس 3: الأن فلنحرقه بالنار او نصب فوقه الزيت الساخن
ابتسام بصدمة: لييه طعمياية !
الحارس 2: لا فلنخرج احشائه وهو حيا و نحنطه ثم نلقي به للحيوانات حتي لاتنعم روحه بالسلام!!
ابتسام برق عينيه : احيييييه
سمع صوت وبيبص فجأة لقاهم جمبه علي الأرض..
ابتسام وقف بخوف:
ايه ده دم ! ياما انتي فين ياما تعالي شوفي ابنك ياما اهي اهئ
كانوا مضروبين بالسهام ...
ابتسام جري وهو بيلطم: نهار اسوح نهار اسوح وبعدين راح واقع .....
شاف حد لابس اسود بيقرب عليه والشمس ضاربه في عينه...
ابتسام: كانت ناقصاك اهئ اهئ عاوزين ايه مني يا فراعنة دا انا غلبان ..
قرب عليه ومد ايده عند رجله..
ابتسام بعد عنه:
لا حاكم بقولك ايه مهما اختلفت الأزمان انا راجل ابن راجل اه ليكون عقلك مصورلك اني اه اكيد فهمتني!
فك رباط رجله ..
في نفس الوقت وقع الشال من علي وشه...
ابتسام بفرح: چني ...خضتيني يا شيخة!
جني : انت ايه اللي حصل معاك ..
ابتسام كشر وشه:
يعني مش عارفه ماانتي اللي قولتي لهم يقتلوني ..
قام وقف ينفض هدومه...
جني: اكيد مش انا انا فوقت لقيت نفسي جارية بتباع في سوق الجواري اشتراني راجل عجوز ضلفة ..
ابتسام: وانا خدوني خدام للملكة حتشبسوت اللي شبهك بالمللي وكانت عاوزة تموتني لاني حضنتها من فرحتي انك بخير
جني: دي اختي التوأم !
ابتسام: بس انتي جيتي ازاي وعرفتي مكاني..
جني: هربت من الراجل العجوز بعد ما عرفت انه مش نيته خير وقليل الادب وحاول يقل ادبه ضربته علي دماغه وجريت في نفس الوقت لقيت الحراس ساحلينك هنا.
ابتسام :انا كنت هاعلمهم الأدب بس كنت منتظر اللحظة المناسبة يعني...
ضحكت جني ومشت ومشي جمبها ابتسام. ...
ابتسام: طيب دلوقتي هاننقذ اختك ازاي ونمشي من هنا لاني دمي نشف !
جني: مش عارفة بس لازم يبان لنا علامات نمشي وراها اكيد قوتنا هاتساعدنا
ابتسام بضحك: هههههه جات الحزينة تفرح مالقتلهاشي مطرح قوتي من ساعة ما دخلت هنا وهي مش موجودة !
بصت له جني باستغراب لانها حصل معاها نفس الحكاية...
فجأة وقف في طريقهم اتنين حراس ...
جني: دول حراس الراجل العجوز
ابتسام برق عينيه:
احييييه
مسكوا جني من ايديها وشدوها وماشيين وابتسام كان خايف :
اروح فين واجي منين يا ربي البت بتتخطف مني
نده بصوت عالي وبص للحراس:
سيبوها ده امر !
لفوا ليه ورفعوا حواجبهم:
من انت وكيف تجرؤ..
ابتسام:
انا ابتسام اكيد سمعت عني سيبوها بدل ما ادوقكم العذاب الوان...
قرب من واحد فبلع ريقه ورجع لورا ...لحد ما مسكه من قفاه ورفعه لفوق
ابتسام: ههه مش كده يارجولة مش قدام البنت دا الشباب لبعضها تقول عليا ايه دلوقتي
حس ابتسام بحاجة غريبة وعينيه اتحولت للأزرق وفجأة ضرب الحارس ببونية ..سابوا الحارس فوقع علي الأرض
ابتسام وقف بثقة:
دي اشتغلت اشتغلت ...اوديكي فين يا قوة
قرب من الحارس اللي ماسك جني وضربه في كل مكان وراح للتاني لحد ما نيمه في الارض
وبعدين وقف ونفخ نفسه وهو بيستعرض حركاته:
قولتلكم هاتزعلوا مافيش فايدة يعني ..
وبعدين عمل صوت زئير الأسد..
شدته جني وهي بتضحك:
مش وقته خالص يلا نمشي!..
مشي ابتسام مع جني ...
جني: قوتك رجعت تاني ..وانا حاسة اني قوتي رجعت
ابتسام بتفكير: رجعت لما جيتي دا معناه اننا مرتبطين ببعض!
جني: ممكن ...دلوقتي احنا لازم نفكر ازاي هاننقذ نادين
ابتسام : نادين مين ؟!
جني: نادين دي اختي التوأم اتفرقنا زمان انا توهت وانا عيلة صغيرة لحد ما خدتني عيلة ربتني حقيقي كانوا نعم الأهل بس كان نفسي اعرف اهلي الحقيقين لحد ما قابلتها في يوم نفس الشكل كاننا واقفين في مراية نفس الملامح اختلاف بسيط في لون الشعر والشبه ده كان غريب عرفت انها هي كمان بطلة خارقة زيي كان في صدف كتير بقينا اصحاب وحكت لابوها عني وطلب انه يقابلني ...
ابتسام: وبعدين!؟
جني: عرفت انه امها متوفية واكتشفت انه يبقي ابويا واننا اخوات توأم وانه كان مخبي علي نادين انه ليها اخت
ابتسام: وهو عارف ان عندها قوة خارقة
جني: بابا كان من اكبر الداعمين ليها !
ابتسام: كان !!!
جني بحزن: ادهم قتله وقتل أهلي ودلوقتي بيهددني بأختي الطار اللي بيني وبينه كبير !
ابتسام:هو في ناس وحشة كده
ضحكت جني: مافيش اوحش من كائن اسمه الانسان يا صديقي.
ابتسام: طب ايه انا جعان!!
بيفضلوا يمشوا لحد ما بيوصلوا للسوق ..
ابتسام بيمسك راسه لانه سامع اصوات افكار كتير. .
جني: ياتري دول عملتهم ايه
ابتسام: مش عارف بس ممكن المقايضة واحنا مش معانا حاجة!
بتخبط بنت في جني وبتوقع حاجتها علي الأرض بتنزل جني تلمها ليها
بتبص لها البنت بخوف:
اهربي
جني باستغراب: ايه ؟!
بيبص ابتسام بيلاقي الحراس بيشاوروا عليه بيشد جني ويجري والبنت وراهم ..
_____________________________
في نفس الوقت بتكون الملكة حتشبسوت اللي هي المفروض نادين شايفة ادهم في بلورة قدامها..
نادين: سمعًا وطاعة !
بيضحك أدهم بشر:
انتم في عالم انا المتحكم في كل تفصيلة فيه اغبياء انا المتحكم في عقل نادين اللي دلوقتي بتحكم شعب
بيقعد علي الكرسي وبيحط رجل علي رجل:
اللي بيموت في العالم الافتراضي بيموت في العالم الحقيقي ههههههههههه وانا مش هاتوصي !
________________________________
العصافير في بيت ابتسام...
العصفورة: بطني بتتقطع من الجوع ياخويا فين الموكوس ابن الموكوسة يحطلنا اكل اهئ اهئ
العصفور: مش عارف انا عصافير بطني بتصوصو بس كل اللي مخوفني القط اللي قاعد لنا ده حاسه ناوي علي الغدر
العصفورة: استرها علينا يارب دا احنا غلابة اهو القط يعرف يدخل ويطلع ويجيب اكله حتي الفراخ علي السطوح انما احنا محبوسين في القفص
العصفور: شكلها النهاية يا حبيبتي هاتعملي ايه لو انا موت
العصفورة: تف من بوقك يا حبيبي دا انا ماقدرش اعيش ثانية من غيرك دا انت الحب والموب والأسد والدب اهيييهه
العصفور: اسد هو انا عاد فيا حيل ما خلاص !
العصفورة: اومال دا الدهن في العتاقي يا خويا فشرت !
___________________________
بيستخبي ابتسام وجني في ضهر بيت والحرس بيقرب
بتشدهم البنت لجوه البيت وبتقفل الباب براحة
ابتسام:انتي مين
_ انا هنا عشان اساعدكم ...اللي ادتكم قوتكم هيا اللي بعتتني ليكم خودوا الخاتم ده
جني: ماله الخاتم
البنت: الخاتم فيه جوهرة خضرا في مكان معين الجوهرة هاتنور أحمر وده الحل
نادين تحت تأثير ادهم هاتاخدوها للمكان اللي بتنور فيه الجوهرة هاترجع طبيعية وهو نفس مكان خروجكم من هنا
جني: شكرا ليكي بجد
البنت: بس افتكروا لازم تلاقوا المكان قبل ماتغرب شمس بكره تكونوا هناك ساعة مابتكون الشمس لونها برتقالي والا هاتنحبسوا هنا للابد او هاتموتوا علي ايد الملكة واللي هايموت هنا هايموت في الحقيقة !
ابتسام بصدمة: احييييه
البنت: انا كده مهمتي خلصت انا لازم امشي
بتمشي البنت وابتسام بيبص لجني وبيضحك:
الموضوع واعر قوي !
جني: بس هانقدر عليه انا عارفه انك دخلت في مشاكل مالكش دعوة بيها
ابتسام: نصيبي كده اقع في احلي مشاكل في حياتي الا صحيح القناع بتاعي وقناعك راحوا ليه لما دخلنا هنا اله الزمن حرامية !
جني: ممكن العالم الافتراضي ده مابيدخلش حاجة
ابتسام: طب يلا ندور علي اي حاجة نتغمغم بيها عشان ماحدش يعرفنا وندور عالمكان
بيلاقوا لبس بيلبسوه ..
ابتسام بيلبس جلابية بيضة وشال ابيض وجني بتلبس لبس اسود في اسود
ابتسام بيضحك: حياكي الله يا رفيقتي ....
وبيلاقوا أكل بياكلوا منه ومية ...
بعدين بيمشوا بين الناس وبيحاولوا ما يختلطوش بحد وابتسام مركز مع الخاتم ...
ابتسام : مشينا كتير ومافيش فايدة
جني: ماتفقدش الأمل..
ابتسام: طيب ...
بيفضلوا ماشيين لحد ما بيوصلوا لصحرا الجوهرة بتبدا تتغير للون الأحمر
ابتسام بيضحك وبيفكر انهم قربوا....
بس بيفضلوا ماشيين بعدها كتير ومش بتتغير كلها للأحمر ..
ابتسام بيقع علي الأرض بتعب:
ماعتش قادر
_كسرت لي البيض ياااا متخلف تس تس
بيبص ابتسام بصدمة ناحيته وبتتغير ملامحه وبيكون هايعيط في نفس الوقت جوهرة الخاتم بتتلون كلها باللون الأحمر ..