رواية خلف الابواب المغلقه الفصل الثاني عشر 12 بقلم مشاعر مبعثره
قالت لينا معناها كانت مشكلتو مع النظاره
كان كدا ما بلبسا قلت لها لالا تخليها عشانو هو؟ دا مستهبل ساي : اي بخليها عشانو انتي خليني مع ولدي السمح دا وامشي شوفي شغلك
طوالي مشيت مع البنات غسلنا العده وجبنا الشاي وقعدنا نتونس وهي طبعا مع مهيلم بتعلمو المشي لحدي ما وقع خافت خوف وهو يبكي انا جيت شلتو قلت لها عادي دا في اليوم بقع عشره مرات : كرعلي من اول يوم
ابو ليان قال لها قولي عاوزه تتهربي من مهمة تعليمو للمشي بس مافي لك
قالت لي سريع رضعيه عشان يسكت
طوالي شلتو وقعدت ارضع فيه اداني عضه لمن صرخت ، اسمع لك يا ساتر رفعت راسي لقيتو ابو ليان🙈 لمن انخلعت طبعا م انتبهت لوجودو ، واول مره راضعو قدامو ، خجلت خجل ونزلت التوب بسرعه وهو عاوز يرضع ويصارع ، نهرتو قلت له : هسس مافي لك .
قعد يبكي ، نسيبتي قالت لي رضعيه ساي يا بنتي ليه منعتيه؟ نزلت راسي وقلت لها : عضاني ضحكت قالت لي تاني لو عضاك اديه قرصه.
قمت على حيلي واستأذنتهم دخلت جوا عشان ارضعو وهي مستغربه التصرف دا.
جات لاحقاني لقتني برضع فيه قالت لي مالك جيتي هنا؟ : عاوزه انومو هو من قبيل نعسان لكن ما عاوز يبطل غلبه ولعب.
: ايوا كويس ، بس ما تعوديه على الطريقه دي لأنو كدا حيغلبك شديد ، وما بنفطم لك بسهوله ، وعشان يفك ارتباطو الشديد بك ويتعود على اخوانو .
: لالا هو ما صعب كدا ، عادي بسكت لهم وخاصة ليان متعلق بك شديد .
بعد نام قعدت تتونس معاي شويه وتسألني عن حياتي وانا حكيت لها وضعي بكل صراحه عاينت لرجولي قالت لي : انتي مش عروس؟؟
سكت
قالت لي : وين حنتك ودخانك وجيهتك معقوله قاعده غبشه كدا في قدام راجلك؟
ما عرفت اقول لها شنو اكتفيت بالصمت ، قالت لي : لالا عيب الكلام دا ، لازم تتحننني.
مشيتا وقلت لها : ان شاء الله المهم بليل بقينا في موضوع النوم ، طبعا نحن بننوم برا لمن الكهرباء تقطع ، ولمن تكون شغاله بندخل جوا ، اليوم داك كانت قاطعه طلعنا السراير.
قالت ل ليان : مالك ملصقه السراير كلها كدا؟ وجادعا سرير ابوك هناك ؟
: نحن اصلا بننوم كدا يا حبوبه.
: وليه يعني؟ مافي زول غريب ، دي زوجتو وديل اولادو ، جيبوه هنا جنب سرير خالتكم سمر وانتو ابعدو سرايركم منهم شويه.
: بس............
: ما بس يلا.
انا لمن شفت الوضع ما عجبني ، وبقيت ادعي ربنا انو الكهرباء تجي ، والحمدلله انها جات ، دخلنا ودخلنا السراير ، طبعا الغرفه بتشيل اربعه وفي واحد ثبتناه مع الاتنين الاصلا برقدو فيه ليان ولين ، اما حقي انا بدخلو واطلعو عشان الغرفه ما تجوط! اها انا كنت شغاله في المطبخ لمن خلصت وجيت انوم لقيت المرا راقده لي في سريري!!! كرعلي وانا اقبل وين؟
طلعت برا وقاعده افكرا ، هي قامت ماشه الحمام شافتني قالت لي : يا بنتي مالك قاعده ما تمشي تنومي؟
قلت لها : ماشه.
قالت لي : ولدك خليه معاي، نام ما بتجيه عوجه يلا امشي على راجلك.
بلعت ريقي وانا ما عارفه اعمل شنو!! والمرا بعد طلعت من الحمام تاني جات وقفت لي ، الا قمت مشيت دقيت له الباب جاء مخلوع فتح وشكلو كان غفيان.
قال لي : خير في شنو؟
قلت له : انا اسفه والله ، بس بس.......... خالتو رقدت ف في.........
قال لي : ايوااا رقدت في سريرك ، خلاص ما مشكله بدخل لك واحد .
طلع برا لحقتو ، وانا ما قادره اشرح له ، بس بشبك في يدي . قعد وقال لي : انتي مالك يا سمر؟
قلت له : بصراحه هي يعني فاكره انو نحن...
قعدت ابلع في ريقي واتمتم
قال لي : انو نحن بننوم مع بعض!!
قلت له : ايوا
: والله ما عارف دي غابت عن بالي كيف!! خلاص ما تخافي امشي نومي في غرفتي وانا برقد هنا برا .
: كيف الكلام دا؟ والباعوض؟ والله ما بقدر اعمل كدا.
: ما تخافي علي.
قلت له : بس لو شافتك الصباح برضو بتعلق.
قعد يحك راسو وقال لي : والله الحاجه دي شغلتا لينا شديد😅 اسمعي؟
: ايوا .
: خلينا ننوم برا بس ونشغل المروحه المتحركه.
: فكره كويسه.
قام صلح السراير وخلاهم قراب نوعا ما، عاينت له قال لي : عشان المروحه والحاجه في نفس الوقت😉
انا طلعت الفرش للسريرين وهو طلع المروحه شغلا.
ما قدرت انوم وهو زاتو فضلنا نتونس ونضحك لمن غفينا.
طبعا صحينا بدري ، بس خليناهم في نفس الوضع ، عشان الحاجه لمن تصحى تشوفهم وتقطع الشك ، كنا في المطبخ لمن هي طلعت وعاينا لها بالشباك تتبسم قعدنا نضحك قال لي كفك 🤚.
ضربنا كفوف بعض مبسوطين انو الخدعه مشت عليها😅😅 المشكله انو هي تاني يوم شغلتا لي بحنه ودخان ووينا ريحتك وكلام ذي دا ، ما عرفت اعمل شنو زاتو ، مشيت كلمتو .
قال لي : ما تخافي ، بس اعملي زي ما بتقول لك ، اصلا انا ما عندي مانع تتحنني ، م انتي مرا متزوجه في النهايه.
يلا بليل تاني جاتني قالت لي : نوم الحوش دا ما بنفع والاولاد بشوفوكم وكلام كتير زهجتني عديل كنت برضع في ولدي ، ابو البنات جاء ، اتغطيت بتوبي ، هي كانت مراقبه ، لمن مشى قالت لي انا ملاحظه لك من امس بتتغطي من راجلك ليه؟؟
سكت قالت لي : في مشاكل بينكم صح؟؟
قلت لها : خليني اكون صريحه معاك يا خالتو ، نحن اتزوجنا بس عشان نقطع لسان الناس ، ونربي اولادنا، لكن علاقة المرا والراجل دي مافي بيننا اي زول بنوم بشكل منفصل .
ختت يدا في صدرا وشهقت : كيفن يعني ما دخل عليك؟؟
هزيت راسي قالت لي : بس كدا ما صح ، حرام عديل انتي ما عارفه اساس الزواج شنو؟ وزوجك دا عندو حقوق عليك.
قلت لها : انا عارفه بس من اتزوجنا عايشين كدا.
: يعني انتي شارطتيه انو ما يلمسك؟
: لالا والله العظيم ما قلت حاجه ذي دي بس هو من اول يوم قال لي مافي شي حايتغير في حياتنا والزواج دا وسيله لأسكات الناس بس.
: يعني المشكله منو هو!!
: ايوا... لا..
ما عرفت اديها جواب ثابت ، واكتفيت ب انو اخت اللوم فيه هو ، ما عارفه الكلام دا صح ولا غلط.
هي خلتني بهنا مشت له سألتو ، برضو اتهرب منها
قالت له : يعني انت ما عاوز المرا دي وعرستا عشان تعلقا......يتبع♥