رواية لا تراجع ولا استهبال الفصل الثالث3 بقلم حنين عادل

بدأت البنت تفتح عينيها وبتبص علي ابتسام والظابط وبتبص قدامها وبتصرخ بصدمة:

حااااسب حااااسب 

ابتسام بص بخوف: عاااااااااا نهار اسود هانمووووت 

كانت العربية طايرة بالتصوير البطئ وقدامهم بحر ...

ابتسام: مش بعرف اعووووم بالله مش بعرف اعوم انتي بتعرفي تعومي يا عسلاية ؟!

البنت بصريخ: اعمل اي حاجة اعمل اي حاجة ..

حاول ابتسام يعمل اي حاجة وبيبص حواليه وفجأة مسك دماغه وغمض عينيه لقا العربية وقفت في الهوا ..

بص حواليه لقا كل حاجة واقفة بالتصوير البطئ 

ابتسام: دا انا طلعت خارق اوي هههههه خارق الخوارق

وفجأة العربية وقعت في المية وهما الاتنين بيصرخوا ....

العربية بدأت تتعبي مية ...

ابتسام : مكتوبالك مكتوبالك يا ابتسام تموت غرقان مش انا اللي عاوز انتحر انا اللي استاهل اهي اهئ انا عارف اني نحس

البنت بصت ليه: بقا يارب ماوقعش غير في ده في ده

ابتسام: صحيح يا عسلاية خيرا تعمل شرا تلقي انا كنت بنقذك بس هو كده اخر خدمة الغز علقة. ..

البنت: طب اعمل اي حاجة وماسميش عسلاية 

ابتسام بخوف : هو ده وقته هو ده وقته هانمووووووت هانمووووووت يا عسلاية..

كانت فيه حاجة كبيرة جاية علي بعيد والعربية اتملت مية وخلاص ها يغرقوا وكل مادا بتنزل لتحت

سمع ابتسام صوت فركز معاه ..

_الله ايه الريحة دي ريحة طازة لأ ونوع الدم اللي بحبه ياااااه فصيلة o اللي شاحة من المصريين واخيرا دا انا بقالي فترة ماشوفتش ده الحمد لله كنت عارف يارب انك هاتبعتلي رزقي

اتفتح ابتسام في العياط :

يارب مايكونش اللي في بالي يارب اموت غرقان وماله بس مش اللي في بالي هاتتعمل برجر اه ياابتسام يازينة الشبان

البنت: في ايه ؟!

ابتسام: عارفه الله اعلم بقا ده يا بيبي شارك يا مامي شارك يا دادي شارك يا العيلة كلها اللي هيا فاميلي شارك وهانبقي تونة وادي رقصة المجنونة يابا يابا علي اللمونة 

حاولت البنت تفتح الباب وهي متأكده انه مجنون ومش فاهمه حاجة

ابتسام: لاااااا اوعي تفتحيه نموت غرقانين احسن مانموت مفرومين اهئ اهئ عااااااااا

البنت بخضة: في ايه

ابتسام : قققققققققق...

البنت: ايييييه ؟!

ابتسام: ق..قرش ههههههههههه 

شافوه مقرب عليهم بشكله المخيف فضلوا يصوتوا برعب

ابتسام: كان لازم الجدعنة اديني هاموت مفروم يامااااااااا 

القرش بتفكير: انت فاكر العربية هاتحوشك عني

ابتسام: مش هانولهالك ياعم

البنت: بتكلم مين ..

القرش بتفكير : انا جعان ماعنديش صبر حرااام عليكم مراتي قالتلي لو مارجعتش بأكل ليها هاتاكلني وهي كده كده مطمع لكل قروش البحر ماهتصدق تخلص مني اخلصوا

ابتسام بضحك : هههههه حتي انتوا كده يا قروش مراتتكم معكننة عليكم صحيح الست هي هيا مهما اختلف حتي في البحرية !

البنت كانت بتبص ليه ومبلمة...

القرش: ماتفتحوا بقا يخربيتكم ياخراب بيتك يا ظلط !

ابتسام: لو اقدر كنت ساعدتك لكن الحياة غالية ..

القرش بتفكير وهو بيلف حوالين العربية: يظهر انكم مش بتيجوا بالذوق ..

بدأ يضرب العربية بقوة وابتسام والبنت بتصوت ...

ابتسام: هانموووت يا عسلاية فرصة كانت يعني فل ! 

البنت: عااااا قولتلك مااسميش عسلاية

القرش: دماغي وجعتني يابني ادم استسلم لو ايه مش هارجع لتوماضر وبوقي فاضي

ابتسام: عااااا ياعم انت قرش وسيد القروش الف مين يتمناك طلقها دي ماتستهلكش بالله هو الراجل عاوز ايه غير واحدة تخاف عليه 

قعد القرش يضرب في باب العربية لحد ما واحد منهم اتكسر اللي كان ناحية ابتسام...

ابتسام غمض عينيه: 

لقد وقعت في الفخ فاصبح الموضوع مافيش فيه لا تراجع ولا استهبال ههههه ابنك هايموت بفتيك يا ماااااا وطلع لي عازة اهووو مش كنتي بتقول ماليش عازة طلع لي عازة ....ايييه اتأخرت ليه ياعم ظلط دا توماضر هاتنيمك بره الميه كده...

فتح عينيه وبيبص لقا وكأن دايرة من الضوء البنفسجي محاوطاه حط ايده خلالها ماكنتش بتمر وكأنه مجال حماية قوي.

وفجأة مسكته البنت تحت ايديها بقوة وطلعت علي وش المية لان العربية كانت يعتبر خلاص غرقت ...

وطلعوا فوق العربية اللي بتغرق اكتر وهما شايفين القرش بيحوم حواليهم..

ابتسام: وبعدييييين هانعمل ايه تاني ....

ابتسام بتفكير: ياسلام لو اقدر اطير يبقي كملت بقا يا سلاااااام .......

المجال بدأ يكون ضعيف والقرش بيضرب فيه ...

مسكت البنت ايده...

ابتسام بضحك: نعم يا عسلايه مش مرتبط انا .....هههه بس بقا بتكسف...

غمضت البنت عينيها وابتسام حس بالخوف فاغمض عينيه ......

البنت: خلاص تقدر تفتح ..

ابتسم: طب مش تفاجئيني ولا كده انا لسه مغمض ولقمة سهلة يعني هههههه ....

فتح ابتسام عينيه وبص حواليه بصدمة :

معقول ازاي ده...

البنت : بصراحة ده...

ابتسام وقف يضحك بعد مارجع علي الجسر وخلاص ماعدش فيه خطر ...

ابتسام : يا ظلط ههههه ضحكنا عليك دي تماضر مطمع قروش القبيلة هاتعملك بطاطس متحمرة هههه اصل انا اللي يجي عليا ما يكسبش تستااااهل

فجأة القرش طلع من المية علي ارتفاع عالي:

بتشمت في الامي هاجيبك يعني هاجيبك

رجع ابتسام لورا بخضة.  

راح للبنت:

ها يا عسلاية كنت عاوزة تقولي حاجة 

البنت: بصراحة اللي حصل انه...

ابتسام : مش عاوزك تقلقي خالص اصل اللي قدامك ده بطل خارق

البنت : بطل خارق !

ابتسام: اه والله انا خارق الخوارق فا كل اللي حصل ده بسبب قوة لسه مكتسبها امبارح تقريبا فامفيش داعي للقلق يا عسلاية بس اوعي كلامي ده يخوفك مني مثلا ...

البنت بضحك: ماشي بس انا اسمي چني

ابتسام: عاشت الاسامي احم ابتسام !

ابتسمت چني...

ابتسام: ايه ده مش هاتضحكي عليا وهوهوووو وتقولي اسمك ابتسام !

جني: لأ...

مشت جني ومعاها ابتسام وهدومهم مبلولة ..

ابتسام: ماتقلقيش هاننشف قريب هههه الا صحيح ادهم بيه ده عاوز يخطفك ليه !

جني : ادهم بيه ده لوحده حكاية !

__________________________

في مختبر كبير كان واحد واقف لابس بالطو ابيض وشعره الاسود الطويل اللي فيه خصل بيضه مغطية جزء من وشه...

واحد دخل يجري وطلع واحد من البودي جارد:

ادهم باشا !

اتكلم ادهم من غير ما يلف:

هاتوها هنا 

اتكلم البودي جارد بخوف:

في واحد انقذها 

وقع ادهم اللي في ايده اللي عمل نار مسكت في الطرابيزة اللي قدامه وبص عليه بعصبية:

ازاي يا اغبية ...وواحد مين اللي اتجرأ وعمل كده اكيد عارف السر وايه اللي هايكسبه منها ان ماجبتهاش اكمل تجربتي هايكون اخر يوم في حياتكم فاهم !

اترعش البودي جارد: حاضر. .

مشي من قدامه بسرعة.  

بص ادهم علي النار:

لأ يا جني مش كل لما اجي امسكك يحصل حاجة تجربتي هاتتم وهانجح مش هاكون العالم المجنون في عين الكل الاكسير لازم يكتمل وهادمر بيه كل اعدائي هههههههههه هههههههههه 

____________________________

ابتسام: يعني ورانا حاجة احكي احكي...

چني: ده عالم بس مجنون شوية عاوز يغير قوانين الطبيعة يعني مثلا لو شوفت فيلم القرود مثلا لما اتحكموا في العالم كانت ايه النتيجة استعبدونا فاي تغيير في قوانين العالم جاي علينا بالخسارة الجامدة 

ابتسام: مش فاهم يعني عاوز يخلي القرود تحكمنا 

جني: لأ ده مثال بسيط هو عاوز حاجات كتير عاوز يرجع بالزمن لورا ، ويرجع اشكال حياة انتهت زي الديناصورات والماموث وغيرها 

ابتسام: بس ده مستحيل 

چني: ماعتش حاجة مستحيلة كله بقا ممكن

بتجري جني مرة واحدة ...وبيجري ابتسام وراها:

في ايه قوليلي 

جني: مش وقته عن اذنك ...

بص عليها وهي بتجري وبعدين بص علي البحر وبيبص تاني مالقهاش...

مشي وهو بيضحك: باي باي يا ظلط ابقي طمني عليك

ظلط القرش: هاجيبك هاتروح مني فين (وعمل صوت مخيف)

جري ابتسام بسرعة ومشي من عالجسر....

ابتسام بتفكير: هو انا لسه هالحق اروح الشغل دا المدير هاينفخني..

وصل قدام مطعم ودخل يتسحب ..

حد بصوت تخين: اقف عندك 

ابتسام لف مبتسم: 

حضرة الباشا المدير 

المدير: انت اتأخرت ليه يا بني ادم انت.  

ابتسام: اصل اهئ اهئ جدتي ماتت يا حضرتك 

المدير: جدتك ماتت انا عاوز اعرف جدتك دي بتموت كام مرة ..

ابتسام بخوف: لا ديكها كانت ام ام امي واللي قبلها خالة ابويا انما دي ام خالتي اهئ اهئ اه يا جدتي يا مأثره في نفسيتي ..

المدير: ام خالتك ازاي

ابتسام: يافندم بالعقل طالما ام خالتي تبقي ام امي برده ! ايه الذكاء ده

المدير: خصم يومين ولو اتكررت اعتبر نفسك مرفود وده انا نفسي فيه ..

دخل ابتسام يلبس اليونيفورم:

نشفت دمي الهي ينشف دمك..دم ههههه ظلط ياحبيبي يا ظلط فات مراته علمت عليه احنا غلابة والله

دخل المطبخ...

ابتسام: اخويا اللي بحبه عامل ايه يادرش

مصطفي: ماشية ! 

ابتسام : هات الاوردر يا بني هات 

مصطفي بتفكير: سمج بتضحك علي ايه هي الدنيا فيها حاجة تضحك..

ابتسام: لمين ده ياعم سيبها علي الله كده يا سمج هههه لمين الاوردر ده 

مصطفي: للمدير اصله مهبط عشان زعق عليك..

ابتسام : يييه طب خلي حد تاني يوديه.  

سكت مصطفي وهز راسه بلأ..

 فخده ابتسام وراح عند مكتب المدير ..

المدير: المهمة الجاية اقتل ابتسام دا انسان مالوش لازمة والتنفيذ لازم في اقرب وقت ويموت موتة بشعة هاهاهاهاه..

وقع ابتسام العصير من ايده:

اهئ اهئ يعني ياربي لما اكون عاوز اموت ماعرفش  عن قلبي ينشرح للحياة الدنيا كلها تكون عاوزة تموتني  ....