رواية لا تراجع ولا استهبال الفصل الرابع4 بقلم حنين عادل

المدير: المهمة الجاية اقتل ابتسام دا انسان مالوش لازمة والتنفيذ لازم في اقرب وقت ويموت موتة بشعة هاهاهاهاه..

وقع ابتسام العصير من ايده:

اهئ اهئ يعني ياربي لما اكون عاوز اموت ماعرفش واما قلبي ينشرح للحياة الدنيا كلها تكون عاوزة تموتني  ..

لا يا ابتسام تماسك اجمد يا واد ..

بص علي المدير والباب متوارب لقاه قاعد علي مكتبه وماسك القلم وعمال يخرم في المكتب .

ابتسام مسك قلبه: ايه السواد ده وصلت لكده احيييه بس ده معناه اني ماثر فيك اوي اعيش وافرسك اههههه 

المدير نفخ: الحيوان ده ماجابش العصير ده..

ابتسام وهو بيلم الازاز من علي الارض:

بسرعة دا ماهايصدق يرفدني مش عارف ليه مابيحبنيش سبحان الله مع اني انسان اتحب بشهادة الكل يعني

*منك لله منك لله 

بص ابتسام علي مصدر الصوت وقرب من الارض اكتر. .

اتكلمت نملة ماشية :

عشر سنين بجري بمراتي نفسي ربنا يرزقني بحتة عيل شوفت الويل والنكد وامي كانت مصرة اني اتجوز عليها بس انا بحبها ومش هاقدر اكسر قلبها وانت تيجي بكل بساطة بعد ماربنا كرمني وقربت تجيب ولي العهد توقع فوقها العصير انتم ايه يا بني ادمين ايه اهئ اهئ

ابتسام : انا اسف والله بس انا .....

النملة: انت ايه انت فاكر انت عايش لوحدك هو الصغير في البلد دي يتعمل فيه كده هنلاقيها منك ولاا اللي قاعد في الحمام في امان الله مش لاقي حاجة يعملها يمسك الدش و يموتنا ولا اللي بيجوا عند بيوتنا بالسرنجة ويموتنا اذيناكم في ايه يا بني ادمين منكم لله. ..

ابتسام: طب انا اسف اسف بس اقدر اساعدك ازاي اودي المدام للدكتور ..

النملة: اهئ اهئ المدام ماخلاص راحت ماعدش مدام هاضطر ارضي اتجوز من جيجي بنت خالتي اللي وشها يقطع الخميرة من البيت عشان خلاص العمر عدي ولازم السلسال يستمر منك لله..

ابتسام: استاذ نملة انا اسف يا عم

النملة: اااااه يا قلبي في الجنة يا نهي يا حبيبتي في الجنة ااااه

ابتسام: انا اسف ربنا يرحمها اهئ اهئ سامحني ارجوك 

النملة: انت قاتل القصاص !

طلع المدير شاف ابتسام نايم علي الارض وبيتكلم ..

المدير: انت بتعمل ايه يا مجنون...

لمعت عين ابتسام وهو بيبص للمدير ومسك حتة ازاز ووقف فجأة بيعمل ريأكشنات غريبة 

المدير: في ايه يا ولد انت اتجننت.  

ابتسام غير ملامح وشه وضحك بهيستريا:

انا هاقتلك عارف ليه عشان ...عاوز اقتلك لاني اتخنقت منك ومن تصرفاتك 

بص ليه المدير بخوف...

ابتسام رجع لطبيعته:

انا اسف يا حضرة المدير بس انا عندي حالة غريبة اوي اليومين دول اسمها السكسفونيا روحت للدكتور قالي دي نتيجة ضغوطاتك النفساوية وانها ممكن توصلني للقتل انا خايف اوي حضرتك مش عاوز اقتل حد

حضنه ابتسام وهو بيحاول يكتم ضحكته:

قالي اهم حاجة تبعد عن الناس اللي بتقل منك لانهم في خطر لانك ممكن تقتلهم ..

بعد عن المدير ...

المدير بتفكير وهو بيبلع ريقه:

دا ممكن يقتلني دا انا بتطلع فيه اللي بتعمله زينب مراتي فيا ..لأ العمر مش بعزقه .

ضحك المدير : 

بص انت روح ارتاح اليومين دول في البيت

ابتسام: ماقدرش اسيب الشغل يا فندم اجوع انت عارف انه مصدر رزقي الوحيد وانت بتخصملي الايام اللي بغيب فيها ما بتصدق يعني

المدير: لا مدفوعين الاجر ماتخفش

ابتسام قرب من المدير ولسه في ايده الازاز:

شكرا حضرتك انت اكتر من مدير انت مدير اب وأم 

بعد عنه المدير وهو بيطبطب عليه ومشي ابتسام وهو بيضحك وراح يغير اليونيفورم.   

_لاااااااا ارحميني حرام عليكي ايه اللي كان خلاني اتجوز الحقونيييييي 

قرب ابتسام من الصوت لقي عنكبوت في الشبكة ومراته بتقرب منه...

العنكبوت: الحقني يا عم انت هاتاكلني ...

ابتسام كان بيبص عليه ومش فاهم حاجة ..

بتقرب العنكبوته من العنكبوت. .

العنكبوت: بقا كده تاخدي غرضك مني ودلوقتي عاوزه تاكليني ليييه كده انا قصرت في ايه وعيالي اللي في بطنك يتيتموا يا قادرة 

العنكوبته: دي سنة الحياة ولازم اتغذي عليك ..بتقرب اكتر ..

بص العنكبوت علي ابتسام:

مابتطقوش تشوفوا حشرات ولا بيوت عنكبوت  وجاه علي حظي واقف صنم ياعم هشني نشني اموت مفعوص اهون..

ابتسام ضحك وقطع الشبكة والعنكبوت هرب .

العنكبوته: هاجيبك 

العنكبوت: دا يبقي رجولي علي ست ان هوبت من عنكبوته تاني ...

بصت العنكبوته لابتسام:

ضيعت الغدا يا غبي عاوزين الكوكب كله تحت امركم يا بشر قرفتونا..

نزل ابتسام شوية عليها وضحك:

هو انتي لو قرصتيني هابقي زي سبايدر مان ؟!

العنكبوته: هههههه لا دي افلام يا خفة حتي بقيتوا بتفهمونا مش عاوزين تفوتوا حاجة انا هالم كل العناكب صحباتي ونعمل اعتصام ونغزو الكوكب ونحرره منكم اسفوخس عليكم ...

وقف ابتسام يهرش في دماغه والمدير واقف من بعيد ومراقبه.....

المدير: دا اتجنن رسمي يارب استرها عليا.  .

خرج ابتسام ومشي يتمشي علي النيل وهو بيضحك :

ايه الحيوانات اللي بتفكر في الاعتصام دي !

قعد يفتكر البنت واللي حصل لها : 

ياتري هنتقابل تاني ...ياريت نتقابل تاني چني اسلاام علي الاسم وجماله ودلاله .

قام يمشي لحد ما دخل الحارة لقي جلهوم ورجالته واقفين تحت بيته...

استخبي بسرعه قبل ما يشوفوه ...

ابتسام : أعمل ايه يادي المصيبة السوده ايه ده !

حاول يسمع هما بيقولوا ايه ...

جلهوم كان بيفكر: 

ههههه احنا نقلعه بلبوص ونركبه علي حمار بالمقلوب والعيال تزفه وابرد ناري.  

واحد من رجالته كان بيفكر:

يارب مايعملش فيه حاجة زي كل مرة واقعد احلف والله ما يقصد دا انا عاوز اصوم تلات الاف يوم عشان اكفر الحلفانات دي ..

ابتسام ضحك :

بلبوص واركب علي حمار بالمقلوب احيييييه احييييييه .(وهو بيلطم)

جلهوم بتفكير: يااااااه اهئ اهئ شكري لو عرفت اللي حصل هاتبيتني بره البيت اه منك يا شكري اااه

ابتسام لف ومشي بسرعة وهو بيكلم نفسه:

ده بقا صراع للبقاء الستات بكل اشكالها حيوانات وحشرات و ثدييات مسيطرة هامشيك مسطرة ههههه لنا الله ..

مشي علي الكورنيش وقعد تاني وهو بيبص علي النيل :

وبعدين هاقضيها في الشارع يعني كان لازم اعمل فيها جامد اوي .

_بس بس ..

بص جمبه لقا واحدة مغطية وشها...

ابتسام: في حاجة حضرتك.

بتكشف وشها بتطلع جني ...

ابتسام عينيه بتطلع قلوب وبيبتسم:

يااااه كل دي غيبة يا شيخة وحشتيني!

چني: مش وقته انا محتاجه مساعدتك !

ابتسام : مساعدتي انا جاهز اديكي حياتي انا روحي فداكي انا قلبي معاكي .

جني: اهدا علي نفسك شوية يا عم الشبح انا في مصيبة

ابتسام بقلق: في ايه ! قلقتيني..

جني: فاكر العالم المجنون اللي قولتلك عليه 

ابتسام: ايوه ماله

جني: خطف اختي التوأم لانه فاكرها انا وهاينفذ عليها تجاربه المجنونة 

ابتسام: ايه هي تجاربه المجنونة وهو عاوز منك ايه ..

چني: قبل أي حاجة أنا وانت عندنا نفس الهبة ..

ابتسام: هبة ! قصدك ايه 

چني: قصدي اني عندي نفس قوتك وقوتنا دي ماجتش من فراغ لازم تكون قدها وهي اللي بتختارك ..

ابتسام: ايه الكلام الكبير ده انا اكلت شيكولاتايه من واحدة ماعرفهاش وبعدها اتبدلت حياتي مايمكن صدفه .

چني: مافيش حاجة بتحصل في الحياة صدفة كل حاجة لها معني انا عوزاك دلوقتي تساعدني نحرر اختي ونقضي علي العالم المجنون وننتهي منه بقا بس لازم قبل اي حاجة تعمل حاجة مهمة..

ابتسام بص لها باستغراب فابتسمت جني ...

مشي ابتسام مع جني وهو مش فاهم رايحين فين لحد ما وقفوا قدام بيت قديم زقت جني حيطة فيه فاتفتح باب في الحيطه دخلت واتقفل وراها 

طلعوا علي سلم والمكان عتمة وضوء الشمس منوره علي خفيف

بدأ ابتسام يخاف :

هو احنا فين وهانشوف مين 

ابتسمت جني: هاتعرف دلوقت 

_اهلا بيك !

بص ابتسام علي مصدر الصوت وفتح عينيه بصدمة:

انتي ! ..